_ فارسي العاشق _
( بقلم بسمة البياتي)
_البارت الثالث والعشرون _
فارس بفزع يولو اوكفي بس خلي اشوفها
ريتال... فتحت ايدي حمرة صايرة اااااااخ دتحركني
فارس...اوكفي بس خلي اجيب عصارة الحروق واجي
ريتال... فارس دهن ايدي وكعد ينفخ بيها
مؤمن... خير هاي شصاير هين سلامات مرة خالي
ريتال... ام فارس ونسرين صافنات على فارس معاجبهن الوضع
ام فارس... شدعوج هي لجعة بالطاوة قابل وكعتي بماي فاير
فارس... هاي بدال ماتكوليلها سلامتج تفاوليها بماي الحار
ام فارس عوجت حلكها وسكتت
دخلت صبا للمطبخ اشو نسرين صارت تخزرني عبالك اني وفارس بمشهد رومانسي ونسرين خاتون دتخاف على مشاعرها
مؤمن... خالو شنو ماتعبت من النفخ اني اكول فدمرة بوس الحرك حتى يطيب بسرعة
ريتال... فتحت عيني خررب اشكد سخيف
فارس...شايف هاي الطاوة البلكاع اذا اجيت ولبستها براسك هم راح احد يلومني
مؤمن... غير اني جاي انطيك طرق سريعة للعلاج واحد مايسوي زين بهل زمن بسرعة ينگلب ضدو
فارس... وفر نصايحك النفسك وكرمني بسكوتك
ريتال... كمت دانظف الكاع واسوي بيض بدال الوكع
فارس... تركي من ايدج هما ينظفونو
ريتال... لا ماكو داعي ايدي مبيها شي اني انظفة
شلت الطاوة من الكاع ونظفت
وكفت على الطباخ اسوي ريوك ثاني اجة فارس يمي وهو ساعدني
ام فارس ونسرين وصبا عينهم تريد تطلع من مكانها
كملنا وكعدنا نتريك
اني تاخرت كملت بسرعة وطلعت ويا مؤمن
مؤمن... اكولج ريتال
ريتال... اي كول
مؤمن... اليوم من تخلصون محاضرات اريد اجيبين رهف وتجين للحديقة
ريتال... مممممم خير وشتريد منا
مؤمن... وانتي شكو ليش جمعتي كولي منها مو منا
ريتال... اوك استاذ مؤمن اي وشتريد منهاااااا
مؤمن... اريد اخلي النقط على الحروف واشوف هي رايدتني مثل ما اني رايدها وعدها استعداد تصبر وتنتظرني
ريتال... خوش خطوة بس ياريت اتكون كد كلامك وتاخذها مو تعلقها بيك وبعدين تعوفها وتاخذ شهد
مؤمن... مستحيل اخذ غيرها واني هساع بس الاريدو منها تنتظرني اني مارايد علاقة ومن هاي السوالف
ريتال... الله يقدملكم البي خير وان شاء الله تنجمعون بالحلال
مؤمن.. احلى دعاء الله يسمع منج
ريتال... رهوفة امشي مؤمن ينتظرنا بالحديقة عنده موضوع وياج
رهف... شنو موضوعيش
ريتال... امشي ومن تشوفي راح تعرفين
جينا يم مؤمن جان كاعد ينتظرنا
ريتال... اني شنو وضعي ابقة لو اروح
رهف... لزمت ايدها عززا وين رايحه
مؤمن... لا ابقي اذا كعدنا وحدنا الطلاب راح يظلون يآلفون سوالف
ريتال.. مممم اوك اباوع على مؤمن كل شوية يمسح كصتة مبين متوتر
ورهف من شكلها وخجلها مبين تعرف مؤمن شيريد منها
مؤمن... رهف اريد احجي وياج بموضوع بس اتمنى ماتفهميني غلط
رهف... برتباك هااا لا ليش افهمك غلط
مؤمن... رهف بدون لف ودوران ومقدمات اني معجب بيج ونيتي صادقة اتجهاهج يشهد الله
ريتال..خرب رهف راح تموع من الخجل اول مرة اشوفها هيجي خجلانة ههههههه
مؤمن... شوفي يابنت الناس اني مجاي اطلب منج علاقة ومن هذا الكلام كل الاريد اعرفو انتي عندج مشاعر ناحيتي لو لا
واذا جان جوابج لا اني احترم قرارج وراح تبقين صديقة عزيزة
رهف... خرب لساني تخيط وسخنت ما اعرف شجاوبة
ريتال... ولج احجي ليش ساكتة يمكن السكوت علامة الرضى
مؤمن... لا اني اريد اسمع جوابها ما اريدها تسكت
ريتال... ههههههه مدتشوفها خجلانة شجاوبك
مؤمن...يولو احجي لاظلين ساكتة
رهف... مكدرت ابقة كاعدة عفتهم وكمت
ريتال... خرب هاي وين راحت ركضت عليها
رهف ولج شبيج اذا متريدي عادي گلبي لاضوجين
رهف... ولج خجلت منه مكدرت ابقة كاعدة
ريتال... امداج صدمتي هسه عباله انتي ضجتي من كلامة
كوليلي أنتي عندج مشاعر اتجاهة لو لا ولو اني اعرف الجواب
رهف... وشتعرفين
ريتال... اعرف بيج تحبي واتحداج اتكوليلي عكس هذا الكلام
رهف... ههههههه ما انكر معجبه بي مؤمن بي كل الصفات الاني احبهم بالرجال
ريتال... لعد محجيتي كدامة صرتي مثل الصنم
رهف... ولج والله خجلت
ريتال...اني راح ابلغة جوابج وبهاي الطريقة اسهل عليج الموضوع
بس اكو شغلة مهمة لازم تعرفيها اذا تريدي لازم تنتظري الحد متتخرجون وهسه يبقة الحال على ماهو عليه
رهف... عادي موافقة اني هم ما اريد ازوج هسه
ريتال... فدوة ربي يوفقكم ياااي اني اسعد وحدة اذا تجين يمي ونعيش بنفس البيت
رهف... يا عمري والله اني هم اتمنى هذا الشي
ريتال... بالرجعة حجيت المؤمن كلام رهف خطية جان طاير من الفرح
المغرب جنت واكفة يم هند همستلها
اكولج اشو الوضع متوتر والوجوه متبشر بخير شبيهم
هند.. بهمس يولي الصبح فارس تكاون ويا عمتي ونسرين وكاللهم بعد ما اريد اي وحدة بيكم تدخل بيني وبين نسواني العدها نصيحة خلي تخليها النفسها
ريتال... ممممم اي احسن زين سوى
وضعي ويا اهل فارس يوم بعد يوم يسوء اكثر
كمية الحقد اتجاهي متنوصف
وزاد حقدهم عليه اكثر من صبا طلبت من فارس يبات يمها يوم ويمي يوم وهو غلس
نسرين وامه تخبلوا يكولون اكيد انتي السبب انتي قريتي براسة ومتخلي يروح يمها
صارت قضية فارس وصبا محور حياتهم لوبيدهم يسوون المستحيل حتى فارس يرجع الصبا
زاد الضغط عليه هم مشاكل وهم شغل
نسرين دمرتني ارجع من الدوام الكيها گالبة البيت بحجة مسوية حملة تنظيف واكثر الشغل يوكع براسي
وهما يستغلون عدم وجود فارس بالبيت ويكربون عليه
اذا قبل جنت اكدر افتح كتابي ربع ساعة هسه حتى هاي الريع ساعة ما احصلها
فارس من يشوفني تعبانة عباله بسبب الدوام واني جنت اسكت وما اكولة شي لان اخاف من احجيلة يشدون وياي اكثر
اليوم رجعت من الدوام شفت المطبخ يلعب النفس من المواعين
صعدت غيرت ملابسي ونزلت وكفت اغسل واجلف
اجة مرة عمهم للمطبخ دتشرب مي
ام محمد... هاي ليش وحدج جاي تغسلين
ريتال... عادي خالة هنه المواعين عليه
ام محمد... المواعين جثيرات وكومة بنوات جانن هين عليش ما غسلنهن بمكانج
دخلت نسرين
نسرين... ام محمد شلون ترهم انخلي الخطار هما يشتغلون
ام محمد... ترى مابيها شي اذا تعاونو عليهن وساعدو هاي المكرودة
نسرين.. لاتخافين عليها اشو هي مدلله من الصبح بالدوام وتاركة الشغل
لازم تشاركنا وتشتغل حالها حال غيرها
ريتال... المرة ظلت صافنة على نسرين دارت راسها وطلعت من المطبخ
بيت عمهم راحوا اني هم خلصت جيت اريد اصعد هلكت من التعب
نسرين... وين رايحة امشي ساعدي شيماء غسلي وياها الزولية اليوم الجهال گلبو عليها بطل الببسي
ريتال... فتحت عيني
خالة ترى هلكت من التعب اريد ارتاح شويه
نسرين... خلصيها وصعدي ارتاحي قابل كاضبينج
ريتال... عوفيها بعدين هسه ما اكدر
نسرين... تريدين نعوفها بوسخها الحد ما حضرت جنابج ترتاحين
ريتال... طلعت للكراج اساعد شيماء الجو بارد وماي البوري ثلج
شيماء بس لأزمة الصوندة وترشها ماي واني بيدي الفرشة افرك بيها
كمت ما احس باطرافي من البرد
وهاي شيماء الحقيرة تتقصد تبللني بحجة ماتدري ايدها فلتت
اخير شي عطت بيها كاااااااافي شبيج عمية خوما عمية
شيماء... العمى لليكرهني شبيج حبيبة ترى انتي جاي تجين جدام الصوندة والماي يجي عليج
ريتال... ذبيت الفرشة قوي بالكاع
يلا كملي الباقي عفتها وصعدت
جنت ارجف من البرد بدلت ملابسي ودخلت جوة البطانية
ثاني يوم صبحت مريضة بالفراش فلونزا حتى دوام مداومت
وخطية فارس ابتلى بيه
العصر شوية صرت احسن نزلت جوة
جانوا بيت عادل موجودين
بس هند ومرة عادل سالوني على صحتي الباقي سلامتج مكالولي
ام قيس... يولو اخاف حبلى
ريتال... ارتبكت هاااا لا خالة مو حامل اعرف بنفسي
ام قيس... ليش ماتراجعين ترى صار هواية على حملج الأول والأسقاط يجوز صاير عندج مشاكل وتحتاجين علاج
ريتال... هفففف هسه وقتة هذا السؤال
لا ماعندي اي مشاكل بس هسه اني وفارس مأجلين هذا الموضوع الحد ما أخلص هاي السنة
ام قيس...مو خوش سالفة هاي واذا علمود دراستج من تجيبين الكل يساعدج بي ما شاء الله البيت متروس نسوان بعد عليش متريدون هسه
ام فارس... زين يسوون على شنو مستعجلين لان الجاهل يرادلو مداراة خوما احنا نربي بدالها
ريتال... هاي اول مرة تأيدني وتوكف وياي سبحان مغير الأحوال
اني من البارحة بايتة يم اهلي
الصبح اخذت عمتي داليا و رؤى ونزلنا للسوك لان هوايه اشياء ناقصتني ومحتاجة ملابس للكلية
رحنا من ساعةعشرة الصبح رجعنا ساعة ثنتين ونص هلكنة من التعب
داليا.. ريتال ليش متبقين حتى نروح للصالون
ريتال.. اي والله ياريت بس ما اعتقد فارس يقبل ابقة
هو يوم واحد بالكوة يقبل ابات
داليا.. جربي مخسرانة شي حتى لو تبقين للمغرب الحد منرجع من الصالون ويجي عليج
ريتال... اتصلت على فارس
فارس... هلا يبعد الروح تحظري راح اجيج
ريتال... حبيبي اريد اروح ويا عمة للصالون خليني ابقة اليوم
فارس... استغفر الله انتي مو البارحة يمهم عجل ليش مرحتي لو الا اليوم حتى ماترجعين للبيت
ريتال... غير عمه هسه يلا حجت وكالت خلي نروح
فارس... وانتي شسوين رايحة
ريتال... احف اصبغ اعدل شعري اريد اغير شكلي
فارس.. يولو انتي حلوة ومو بحاجة هالسوالف
ريتال... فدوة حبيبي خلي اروح
فارس... اي ابقي بس يكون بعلمج اليوم اروح يم صبا
ريتال...فارسسسسسسس يلا هسه تعال عليه
فارس.. هههههههههههه لا لا ابقي شعندج جايه
ريتال... خرررررب فارسسس كافي يلا شوكت تجي
فارس... ههههههه لا يبعد الروح روحي ويا عمتج ومن تخلصين خابريني اجي اخذج
ريتال...ما اريد بعد ولا اروح اي مكان
فارس.. يولو لايصير عقلج زغير اشاقة وياج بنيتي
ريتال.. اكرهك
فارس... ههههههه اموووت عليج
رحنا للصالون سويت تنظيف بشرة وحفيت
باوعت على شعري عجبني هالمرة اصبغة احمر
فتحتة طولان واصل النص ظهري بس جان تعبان ومتقصف لان معندي مجال مثل قبل اعتني بي يادوب من اسبح امشطة وابرمة واشيلة
ريتال كلت الأم الصالون كصي
داليا... عزززا ريتال اكيد تخبلتي
ريتال... دشوفي شلون تعبان اكصة احسن
داليا.. شلون تكصي بدون علم زوجج منو يكول راح يقبل
ريتال.. يااا وهو شعري لو شعرة
عاندت وخليتها تكصة الحد كتفي
وصبغتة احمر
عمة ظلت تحجي عليه
باوعت الكصة ويا تدويرة وجهي واللون هواية لايكتلي
داليا... والله حلوة بس بعدني خايفة عليج من فارس
ريتال... اتصلت على فارس اجة اخذني
يس اشو من كلام ماما وعمة صارت بيه خوفة
هذا بس لا صدوك يروح يتعصب اذا شافة
وصلنا للبيت قبل العشى التهيت وياهم ومصعدت فوك
هند... شسويتي بالصالون
ريتال... حفيت وصبغت وكصيت شعري
هند... يولو شوفيني
ريتال... نزعت الحجاب
هند.. عزا بعينج هاي لوين كاصتو يولي فارس شافو لو لا
ريتال.لا بعده
هند... ويدري بيج كصيتي
ريتال. هم لا
هند... والله انتي مخبلة بس الحق ينكال جثير حلو بالعافيه عليج
ريتال... هو انتي واهلي رعبتوني وهسه اتكوليلي حلو
هند... هههههه الزلم تحب الشعر الطويل
ريتال..ههههههه اليوم راح انام بالحجاب
غسلت مواعين العشى وصعدت الغرفتي نزعت الشال من راسي
اوووف والله حلوة الكصة شبيهم هلكد خوفوني
بعدني واكفة وداحجي ويا نفسي وجان يدخل فارس مبتسم اتقدم عليه مشى خطوتين ووكف وعيونة من المفاجئ تريد تطلع
علامات الصدمة على وجهة
من شفت منظر فارس عرفت اني بخطر وهاي الليلة مراح تعدي على خير
فارس... صكيت على اسناني رييييييتال شششششنو هذا شعرج
ريتال. بغباء هاااا شبي
فارس... جيت سريع وكفت جدامها ولزمتها من زندها وهزيتها
هاي شششششششمصخمه ششششششششلون تروحيييييين تكصينوووووو اليوم احرررررررك اهلج
ريتال... خفت من صياحة عفيه بس اهدء وافهمك والله كله متقصف وتعبان واني مو كتلك اريد اعدله
فارس.... انعل ابوج لا بو عشيرتج جاي تضحكيييييييين على منو
انتتتتتتي باترتو وتكوليلي عدلتو
بس الظاهر اني جثير منطيج عين وصرتي تستغليني وتسسسسسوين اليعجبج والكلب ابن الكلب العايشة ويا مو مهم رأيو
ريتال... لا فارس حشا..
بعدني ممكملة ضربني راشدي من القوى راسي انفر واذني صفرت من الصدمة والخوف ركضت من كدامة وكفت بالطرف الثاني من يم السرير
فارس نار صاير يسب ويغلط روحه مفرفحة من العصبيه
راد يجي يتقدم عليه من خوفي صعدت على السرير وطفرت على الصفحة الثانية
اكو تحفية كبيرة يم الميز شالها وضربها بالكاع عطت من الصوت
جنت اتوسل بي فارس فدوة بس اسمعني
فارس...بنت النعال شسسسسسمع بس حيل ابو زاييييييييد بيه كل هذا اليييييييجرئ من ايدي اني لو من البببببببببببداية ضابج جان حسبتيلي الف حسسسسسسسساب
ريتال.. اندار حتى يجي عليه بحركة سريعة هم رجعت صعدت على السرير ورحت للجهة الثانية
بس اول مخليت رجلي بالكاع حسيت شي انغرس بكعب رجلي عطت بعلووووووو صوتي ودنكت على رجلي
فارس.... غادي ناري لوبيدي افلش الغرفة على راسها
وانوب كلما اريد الزمها تنهزم من جدامي
اريد اجي عليها صعدت على الجرباية ومن نزلت صرخت وكرفصت بالكاع
اشكد جنت متعصب منها بس شفت منظرها عصبيتي كلها تحولت خوف وفزع عليها
جيت يمها دحجت الكاع كلها دم
ريتال... كعدت بالكاع ابجي روحي شاغت من الألم اجة فارس يمي انرعبت ردت اكوم انهزم منه بس مكدرت لان الكزازة بعدها برجلي
فارس... منين هذا الدم كومتها كعدتها على الجرباية
ريتال... خايفة منه دفعتة وخررررر
فارس... لاتتحركين خلي اطلع الكزازة من رجلج
اندكت الباب صوت نسرين وهند يمكن سمعوا صوت صرختي
دخلوا
نسرين... هاي شصاير ليش اصواتكم عاليه
فارس.. مو صاير شي المزهرية انكسرت وريتال انجرحت بيها
ريتال... فارس طلع الكزازة من رجلي روحي فرفحت بجيت بصوت عالي
فارس... رايح اجيب المعقم
خوية بس لمو الكزاز من الكاع
هند... اجت يمي وهمست والله جنت اعرف راح تصير مصيبة يولو خوما ضربج
ريتال... عزت عليه كرامتي ومكدرت اكوللها اي كتلها لا بس تعصب عليه
نسرين عافتنا ونزلت
هند لمت الكزاز ونظفت الكاع وراحت
فارس كعد يعقم رجلي
فارس... يولو. الجرح جثير غميج كومي نروح للمستشفى حتى يداوها الج واذا تحتاج خياط يخيطوها
ريتال.. فزيت شنووو لا ما اريد ما اتحرك من مكاني
فارس... ريييييتال كووووومي مو وكت عناد
ريتال.. كمت اشهك ما ارييييييد خوما كوة اخاف من الخياط
فارس... ما اخليهم يخيطوها بس يداوها يلا بنيتي كومي
ريتال... مااااا ما اريد
فارس... استغفر الله
اكو صيدلية قريبة منا رحت جبتلها ابرة مال التهابات وتعقيم ورجعت
ريتال.. هند اجت ضربتني الابرة
ورجع فارس داوى رجلي مرة ثانية ولفها بالشاش
جنت نايمة بالفراش وبعدني لهسه دموعي بعيني مقهورة من السوى بيه فارس هاي ثاني مرة يضربني
فارس.. جيت تمددت بسدها بستها من خدها الضربتو بس اني بستها لو بتليت على عمري انفجرت بوجهي مثل القنبلة المؤقوتة
ريتال... ابجي واشهك وخررررر لاتجي يمي انت تعلمت تضربني
فارس... يولو عجل هاي سوايتج العاقل يسويها
والله كلما اذكر نار تشب بيه
شعرج طويل وحلو تروحين تبترينو هيجي
ريتال... هذا شششششعري مو شعرك شعليك بيه
فارس... ششششنو شعليه ريتال كلشي بيج يعود الفارس ممنوع تتصرفين بشي بدون علمي
وهالمرة عديتها الج
بعد اذا كررتي نفس الغلط ما ارحمج
ريتال... كل هذا وممسويلي شي
لعد مو ضربتني شسوي بعد اكثر
فارس...انطيني خدج خلي ابوسو يولو گلبي يكوم يوجعني من امد ايدي عليج بس تصرفاتج تخلي الحجر ينطق وتخليني اطلع من طوري
ريتال... وخرررررر لاتبوسني ولا تقترب مني اصلاً كرهتك
فارس... خليت راسي برگبتها وهمست واني ابوسها اي كوليلي شكثر تكرهيني
ريتال... هووووووايه
فارس... اشم برگبتها واحجي اللون الاحمر لايكلج يولو والكصة هم حلوة عليج
ريتال... ايبااااه هسه صارت حلوة وانت گلبت الدنيا عليه
فارس... والله جثير حلوة بس تبقة حلات البنية بشعرها الطويل
ريتال... انت ليش متفهم داكولك شعري تعبان واطرافة متقصفة لان مجاي اكدر اعتني بي مثل قبل
فارس... رفعت راسي باوعت بوجها ومنو لازمج ليش ما تهتمين بي واي شي تحتاجينو كوليلي اني اجيبو الج
ريتال.. ومنيلي وقت
فارس... هاي شلج بيها يعني طول اليوم معندج مجال ربع ساعة
ريتال... لا ما عندي اني تعبانة اهلك مجاي يرحموني
فارس.. عقدت حواجبي يولو شبيهم اهلي وياج احجي
ريتال.... جنت احجي وابجي مو زينين عليه بس هند علاقتي عادية وياها
فارس... لاتخبليني بطلي بجي وحجيلي كلشي
ريتال... من بداية زواجنا خالوا المواعين عليه كلت عادي اني صرت وحدة من البيت ولازم اساعدهم
ارجع من الدوام الكي المطبخ ميبين من المواعين لان ما شاء الله انتو يوميه عدكم خطار بس ابدل وانزل اغسلهم الحد ما ظهري ينكسر وقبل جيتك بشوية يلا اخلص واصعد هلكانة بس اريد انام
ومن انام لازم ساعة واكعد
وارجع الكيهم هم تارسين السنك من اخلص تستلمني نسرين تعالي ساعديني بالطبخ واظل رايحة منا وجاية منا
جيبي هذا. ودي هذا ثرمي هذا غسلي هذاك وبالكوة اسحب روحي منها اروح اغسل هدومي وهدومك واكويهم حتى تنظيف المشتمل عليه كله
انوب ارجع انزل اساعدها بالصب الحد مايخلص العشى اصير فرارة من كثرت الطلبات
ارجع استلم غسل مواعين العشى ومن اخلص لازم اصعد اجهز نفسي الك
والله خمس دقائق معندي مجال افتح كتاب حتى من عندي امتحان اكعد بالكلية ادرس دراستي راح افشل بيها
وياريت لو بس هيجي من غير حملات التنظيف الطلعهن الي نسرين غسل فراش غسل بطانيات وزوالي وتنظيف سيراميك المطبخ وحتى المواعين النظيفة اطلعهم الي اغسلهم
وطقم القنفات بالاستقبال كل كم يوم ادزني انظفة لازم اول شي بالمكنسة الكهربائية وبعدين بمي ومنظف امسحة لو الاستقبال صغير عادي اشو انتو استقبالكم عبالك قاعة مؤتمرات
فارس صافن عليه ويسمعني بتركيز وجها ميتفسر من العصبيه
فارس... من شوكت كل هذا الشغل عليج وعليش ماجنتي تحجيلي
ريتال... من بداية زواجي بس من بدت هالسنة زاد الشغل واني ما احجي مااريدهم يشدون وياي اكثر
فارس... زين البقية شنو شغلهم
ريتال... هند مسؤولة عن مشتملها متسوي اي شي جوة
وصبا كلاص متحرك من الكاع
نسرين تطبخ
والبيت على اساس على شيماء وامها بس والله كلاوات اكثر الشغل نسرين تخليني اني اروح اسوي وحتى بالطبخ اساعدها
والخبز ويا كل وجبه يجي الولد يجيبة من المخبز يعني شغلهم مو هوايه لايعجنن ولا يخبزن بس اني طايح حظي
فارس تذكر من جنت حامل وما اعرف بنفسي
فارس.. بستغراب اي
ريتال.. جنت هوايه ادوخ وبيومها رجعت تعبانة وجان اكو خطار
و مواعين هوايه الحد ما خلصتهم زادت الدوخة جيت اصعد افترت الدنيا بيه و رجلي التوت ووكعت
فارس... بعد شضامه عليه
ولج كل هذا يصير واني اخر من يعلم
ريتال...انت مو دائما اتكول اني ما احب ادخل بسوالف النسوان
واذا احجيلك راح يكرهوني اكثر ويسوولي مشاكل
بس ما ادري شلون هسه حجيت لان تعبت ومجاي اكدر اتحمل كل هذا الضغط
فارس ياريت لو بس على الشغل والله حتى كدام الخطار يحجون عليه وامك ماكو مرة مامفشلتني كدامهم ومطلعتني وسخة وكولشي ما اسوي
فارس... عصرت عيني بقهر لو ما نايمين اكوم اهد البيت على رأسهم
ماشي يجي باجر ويصير خير
ردت اكوم اشرب نركيلة ريتال جلبت بيه ومخلتني
ريتال... حبيبي فدوة لاتتعارك والنبي راح يشدون وياي ويسوون حياتي جحيم
فارس... معليج لاتشغلين بالج اني اعرف شلون اتصرف وياهم
ثاني يوم الصبح جنت بالكوة ادوس على رجلي بس ما اكدر اغيب لأزم اداوم نزلنا اني وفارس حتى نتريك
فارس جان هادئ ولا حجه شي
كملت وطلعت ويا مؤمن
مؤمن... هههههههه اليوم جاي تعرجين
ريتال... شسوي غير بسبب خالك
مؤمن... وشبي فارس وياج لازم علسج البارحة
ريتال...دسكت لاتذكرني غير خالك البارحة انگلب وحش
مؤمن... اكيد مسويتلج مصيبة
ريتال...يامصيبة هو بس رحت كصيت شعري اشو هذا من شافة تخبل عبالك كاصة شعرة مو شعري
وستلمني صياح وغلط واني تعرف بيه قوية بقيت واكفه بمكاني صامدة جبل ميهزني ريح
مؤمن... لا بربج هاي منو الجبل هههههه اي كملي
ريتال... هو تقدم عليه والشرار يطلع من عينه وصل يمي ولزمني من ايدي ويصرخ بوجهي هستوني اريد اشرحلة اسبابي محسيت غير ايد فارس لزكت بخدي
وبهذيج اللحظة الله وكيلك وانت ممحلفني صرت شيتا الي ويا طرزان بقدرة قادر وبحركة اسرع من البرق كمزت على السرير
والحد هاي اللحظة ما اعرف شلون هيجي كدرت اكمز
مؤمن ... ههههههههه خرب عرضج اي كملي
ريتال... اي طفرت ورحت للجهة الثانية وبقيت على نفس قوتي وصمودي
وهو من اعصابة اكو تحفية شالها وضربها بالكاع
اندار ديجيني من الصفحة الثانية واني بحركة طرزانية سريعة هم رجعت كمزت على السرير
بس للاسف من دانزل تعرضت للخسائر والنتيجة دخلت كزازة برجلي
مؤمن... اي واضحة القوى والصمود ههههههههههههه
ريتال... عابت لاتضحك بس ديربالك اتكول كدام احد فارس ضربها والنبي بس انت كتلك هند سالتني كتلها لا مضربني
مؤمن.. ههههههه لا ما اكول بس ترى عادي ضري الحبيب شربت زبيب
ريتال... عمي ما اريد هيجي شربت
قبل لايخلص الدوام فارس اتصل عليه كالي لاترجعين ويا مؤمن اني اجي عليج
انتظرتة اجه ورجعنا سوى
دخلنا للمطبخ المواعين مكومات حتى مكالوا هاي خطية رجلها متاذية متكدر توكف عليها
فارس ظل يباوع وعيونه صايرات دم من العصبيه
اجت نسرين لان متعودة تنتظر مؤمن حتى تصبلة غدى من شافت فارس استغربت
نسرين... هلا خوية اليوم من وكت جاي
فارس... هلا بيج دحجت على المطبخ وحجيت وياها شنو اليوم غداكم متاخر
نسرين... هااا ههههه لا نفس الوكت
فارس... عجل ليش المطبخ هيجي وسخ
نسرين... لونها تغير هااا مو مشغولين شويه هساع اني وشيماء انظفو
ريتال...هسه ابدل واجي اغسلهن هنا المواعين عليه
نسرين خزرتني
فارس... اهاااا حلو يعني المواعين يومية يبقن بزفرتهن الحد ماتجين وتغسليهن خوش
امشي صعدي جدامي وبعدين نحجي بهذا الموضوع
نسرين... خوية لاتكبر الموضوع هنا مواعين ترى مانگلبت الدنيا اذا هي غسلتهن
فارس... اشرتلها تسكت عفتها وصعدت
ريتال ما اعرف فارس بشنو يفكر لو شيريد يسوي
قبل صلاة العصر كعدني من النوم كالي امشي ننزل
بهذا الوقت الشيخ يكون موجود بعده مرايح للجامع
نزلت ويا جانوا الكل موجودين ديشربون شاي
فارس... شيخ راح احجي جدامك واريد تحكم بالحق
يتال.. يبووو هذا شراح يسووي
شيخ عگاب... خير ان شاء الله كول وليدي
فارس... حجيت الابوية على كل سوالفهم
جان ساكت وبس يهز براسه
يابة يرضي ضميرك الكاعد يسوو بيها ويشهد الله كل هذا وما فديوم شكتلي
لو ما البارحة صارت مشكلة بيني وبينها هم مجان حجت
الشيخ... خيتي ام شيماء رايد احجي ويا ام عادل ونسرين بسالفة واترخص منج نبقة وحدنا
ام شيماء وشيماء طلعوا جيت اني هم اكوم
الشيخ... بنيتي انتي ابقي كاعدة
دحجت على ام عادل وحجيت وياها
كولي يا مرة ترضين رغد عيالها يسوون بيها مثل ما كاعد تسوين بهاي المسكينة
ام عادل... واني شمسويتلها هو بس منطيها المواعين گلبت الدنيا علينا
الشيخ.. يولو خافي ربج سوي الاخرتج شي يرضي الله ومن تموتين خلي الناس تذمرج بخير وتترحملج
شنو البنية خدامة يمكم وهيجي محمليها
وانتي نسرين عود اني اكول عليج العاقلة ام گلب الطيب انعديتي الحقد والغل من امج
نسرين... يابة ترى احنا ممسويلها شي بس الظاهر هي عرفت شلون تشحن فارس علينا وتخلي يجي يشكي من امو واختو
فارس... نسسسسرين هذا منو التشحنو مرة ويمشي بكلامها ولج اليوم مو رجعت الظهر جدامي جانن المواعين تارسات المطبخ
نسرين... اي هذا شغلها وهي تسوي ماكو داعي انت تدخل
فارس...صبا ليش متساعدها وشيماء وامها وينهن
ام عادل... معليك بشيماء وامها شنو هنا خدامات وتريدهن يخدمن مرتك
فارس... عجل مو انتي جنتي اتكولين هنا يجن يساعدن بالبيت
واحنا رغم مسلوبة راحتنا بوجودهن ساكتين ومنحجي شي
نسرين... حتى صبا معليك بيها اشو المرة اسمها مزوجة
انت من جاي ادور عدالة وحقوق اول مرة انطيها حقها بعدين تعال احجي
فارس... حياتي الخاصة بين نسواني ما اقبل احد يدخل بيها
الشيخ... سمعوني كلكم الشغل يتوزع عليهن بالعدل واذا بعد سمعت مفضلين وحدة على الثاني راح احاسبكم
البنية عدها دراسه خافو الله بيها
وانتي ام عادل تركي البنية بحالها لاتخليني بهذا عمرج اجيبلج ضرة
ام عادل... كول انت تريد تزوج عليش جاي ادور حجج
الشيخ... اني حذرتج وبعد بكيفج
وانت فارس مثل ماخايف على هاي حرمتك خاف على بنت عمك وانطيها حقها
فارس... سكت اوووف
ماشي يابة اني راح اعدل بينهن ليلة يمها وليلة يم صبا
بس من هسه اكوللكم اذا صبا شكتلكم مني لو كالت تمرضت بسببو
لو شسوي بيها بعد ما اقبل احد بيكم يدخل
ومن اليوم اليجرى على ريتال يجرى عليها روحه الاهلها كل شويه بعد ماكو تروح كل عشر ايام تبات ليلة وترد ثاني يوم
ومن اكون يمها ملابسي وشغلاتي هي المسؤولة عنهن
الشيخ... صبا اعتقد كل الكالو فارس من حقو ومابي شي غلط
صبا...بلي عمي
ريتال... احس انضربت على راسي هذا شديخربط شنو يمها شنو يمي بالزور لزمت دموعي
من خلصو كلام بسرعة عفتهم وصعدت دخلت الغرفتي وانهاريت........
يتبع....
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!