رواية فارسي العاشق الفصل الثاني وأربعون 42 - بقلم بسمة البياتي

_  فارسي العاشق _
( بقلم بسمة البياتي)
_البارت الثالث والأربعون _

من رجعنا للشقة سالت هشام شنو الغير امك وخلاها تفتح گلبها وتحجي بصراحة

هشام... اني حجيت وياها

ريتال. مممم وشكتلها خوما تعاركت وياها ؟

هشام. لا طبعاً على شنو اتعارك اكو شي اسمة لغة حوار وتفاهم
اني واخواني معتبرين امي صديقتنا وعلاقتنا بيها قوية

من حجيت وياها سالتها شنو السبب الخلاها تعاملج بهاي الطريقة

كان جوابها نفس الكلام الكالتة ألج

كتلها يوم اني كضيت عمري منطوي على نفسي وغركان بالدراسة والشغل معشت حالي حال باقي الشباب
من اخذتها هسه يلا حسيت بالراحة والسعادة

يعني انتي متفرحين اتشوفين ابنج مرتاح بحياتة

كالت الله شاهد اني ما اريد شي من هاي الدنيا غير شوفتكم فرحانين ومتوفقين بحياتكم

ريتال من دخلت بيتنا وشفت طبعها واخلاقها اني غيرت نظرتي عنها وصارت حالها من حال ايات ومنار

ريتال.. ممممم اني اليوم هوايه حبيتها

هشام... ههههه ليش قبل مجنتي تحبيها

ريتال... بصراحة لا احبها ولا اكرها

هشام... متاكد بمرور الأيام راح تحبيها اكثر

ثاني يوم اتصلت على اهلي علمود السفرة كالوا منكدر نجي

كلت لعد يزن و رؤى خلي يجون ويانة

يزن هم كال ما اكدر اروح

رؤى تريد تجي بس بابا مقبل كال بنية شابة صعب اخليها تروح وياكم لان انتوا مو وحدكم

هشام اتصل على بابا وكالة رؤى اختي وبامانتي لاتخاف عليها

هشام باسلوبة وكلامة كدر يقنع بابا

قبل السفرة بيوم اجت رؤى يمنا حتى من الصبح نطلع

حظرنا مستلزمات السفرة وثاني يوم من ساعة سبعة طلعنا حتى نوصل ومن وقت

طلعنا سيارتين سيارة هشام وسيارة محمد زوج تبارك

عصام ومنار صعدوا ويا تبارك وزوجها

ومازن نور رؤى ويانة اني وهشام

ولاحسينا بالطريق كضينا شقة وضحك

دخلنا سليمانية وتوجهنا الدوكان بالطريق شفت يبيعون تين بعلب بلاستيك

بسرعة حجيت ويا هشام

فدوة وكف السيارة اشتريلي تين

هشام... ههههههه ماشي

مازن.. بدربك فدماعون الي هم

نور... رتولة اخاف حامل وتتوحمين على التين؟

ريتال.. ههههههه لا يمعودة بس اني هاي فاكهتي المفضلة

رؤى.. ههههههه شوف هاي البطرانة ولج بسبب التين ريتال شابعة رزايل من بيبي

نور... هههههه ليش

رؤى... من نروح للحلة بيت جدي عدهم اشجار تين كبار ريتال اذا اضيعيها تلكيها جوة الشجرة ومرات تجي اغاصان الشجرة بيدها وبيبي من تشوفهن تنجن

ريتال... كافي ولج فضحتيني

هشام نزل جاب ثلاث علب واجه تينهم يجنن طازج  يقطعوا من الشجر يخلوا بالمواعين ويبيعوا نفس الدقيقة

اخذت ماعون خليتة بحضني قبل لا اكل اخذت وحدة انطيتها الهشام

رؤى.. احم بالكذب احنا هم قدميلنة  مو بس الحبيب الگلب

ريتال.. رفعت حاجبي مو جابلكم ماعون الج والنور بعد شنو هالطمع ثاني شي هو ديسوق وتعبان حطيتي عينج على هالوحدة النطيتها اله

هشام... ههههههه فدوة الحبيبتي بس هي تفكر بيه خو هذا اخوية بصفي بالكذب مكال تفضل وياي عكب البطون تعمى العيون

مازن... مو عندك ايد متاخذ لو لازم عزيمة
رؤى خاتون هسه انتي شحجاج

رؤى... تورطت وحجيت اكلوني بكشوري

وصلنا دوكان دخلنا مجمع اجرنا بي شقة

دوكان عبارة عن مجمعات بيها بيوت يسموهن شقق مؤثثة
كل المجمعات اطل على سد دوكان

الشقة بيها غرفتين وهول صحيات ومطبخ صغير مفتوح على الهول

احنا البنات اخذنا غرفة والشباب بالغرفة الثانية
ارتاحينة شوية وتغدينا

وطلعنا على السد منظر الماي يجنن
نزلنا نلعب بالماي اخذنا صور

اكو قوارب تفتر اجرنا واحد وصعدنا

للمغرب يلا رجعنا  جنت ميتة من التعب غيرت ملابسي وتمددت

رؤى... رتوتة اريد اكولج شي بس لاتتعصبين عليه

ريتال.. عزاااا بس لا مسويتلج كارثة اي احجي ما اتعصب

رؤى.. اول البارحة جنت اتراسل ويا رهف على نيتي كتلها الخميس اروح سفرة الدوكان ويا ريتال وعيالها

ريتال.. عدلت كعدتي اي وبعدين

رؤى... ولج هسه صدمتني كالت اني واهلي اجينا انطيني اسم المجمع حتى اسوي مفاجأة الريتال والله انحرجت وانطيتها الأسم

ريتال.. گلبي دك سريع ياربي شهالورطة شراح اكول الهشام اعرف بي هوايه يتحسس من صداقتي برهف

باوعت على رؤى محبيت اضوجها كتلها عادي هلا بيها

رؤى... تنفست براحة يلا لعد اروح اشوفها

ريتال... طلعت دورت على هشام مموجود
سألت تبارك عليه كالت يمكن بالحديقة

رجعت للغرفة اتصلت عليه من جاوبني كتله تعال للغرفة

دخل للغرفة وهو مبتسم قفل الباب

هشام... ههههههه صايرة تتحارشين بيه

ريتال.. فتحت عيني منو متحارش بيك

هشام... لعد هذا شيسموا من شفتي الغرفة فارغة خابرتيني اجي يمج

ريتال... يااااا هاي من كل عقلك اشكد تفكيرك وسخ
ترى ردت احجي وياك لايروح بالك بعيد
وافتح الباب لاتسويلنة سالفة

هشام اجة حضني ويهمس ترى ملتهين يسوون العشى محد يجي لاتخافين

ريتال...هشام يمعود اكعد راحة جديات اريد احجي وياك

هشام... يلا احجي احد لازمج

ريتال... ترددت اوووف شلون اكوله

شجعت نفسي وحجيتلة كلام رؤى

هشام... عقد حواجبة وهاي صديقتج زوجها وياها

ريتال... هي زعلانة يم اهلها ما اعتقد وياها لان رؤى كالت هي واهلها جايين

هشام.. عادي شنسويلهم

ريتال... اعرف بيك ضجت بس والنبي اني ما ادري بجيتهم هسه من كالتلي تفأجئت مثلك

هشام... لاتبررين اني مصدكج  يلا اني رايح يم الولد

صبينا العشى وكعدنا بالحديقة نتعشى
من كملنا سالت رؤى

رهف بيا شقة ومنو جاي وياها

رؤى... ولج الشقة البصفنة وجاية ويا امها وخواتها واخوها وزوجتة

ريتال...بعدني دنحجي شفت رهف واختها

رهف بلهفة اجت بسرعة عليه

سلمت عليها وعلى اختها

رهف.. اوووف لوتدرين اشكد مشتاقتلج

ريتال... اني الأشوق ياعمري

عرفت تبارك ومنار  عليها كتلهن هاي صديقتي من ايام الجامعة سلمن عليها

كعدنا شوية وبعدين راحت كالت فدساعة ونرجع نلتقي اروح اتعشى

اكولج رؤى وصي رهف واهلها ما أريد يجيبون طاري فارس ويكولون زوج رهف اقارب طليق ريتال

رؤى... ههههه وصيتها من اول ما شفتها

بعد ساعة

اجتمعنا اني ورهف وخواتها وتبارك ومنار

ظلينا كاعدين نسوالف هم زين مجابوا طاري فارس واهله

تبارك ومنار راحن نامن

نور بقت كاعدة شوية وبعدين كامت 

رهف.. رتولة عندي الج مفاجاة

ريتال... شنو هي

رهف.. اني حامل

ريتال..صدووووك احلى خبر الف مبروك ياعمري ربي يتمملج على خير

رهف... الله يباركلج يوم الج ان شاء الله

ريتال... ولج اذا حامل لعد شلون اجيتي مخفتي من الطريق

رهف...هههههه عادي خليت اخوية يسوق على كيف

ريتال... مخبلة زين مؤمن يدري لو لا

رهف... مممم اي عرف وطار من الفرح هو عمتي نسرين ههههههه

ريتال... لعد ليش ما اجة يرجعج

رهف... اووو كاتل روحة يومية يريد يجي وما اقبل ومن عرفت حامل كتلة خلي ارتاح شوية وبعدين تعال اخاف هسه ارجع وهم انغث لان بيتهم صاير عبارة عن مشاكل وعركات واني مناقصة دوخت راس

رؤى.. بفضول  منو يتعارك

رهف... صبا وشيماء وهسه شيماء هم حامل وصايرة متنجرع
وهناك صايرين احزاب نسرين ويا صبا  وأم فارس  ويا شيماء

افين.. زين وفارس شنو موقعة ليش يقبل بالمشاكل

رهف... يمعودة فارس فاصل فيشة لو الدنيا تحترك ميدخل هو من يوم الطلق ريتال هيجي صار

ريتال... رهف سدي الموضوع الله يهديهم

رهف.. ههههه يمعودة خلينا نسوالف
ولج رتولة فارس متخبل ميجي للبيت غير وقت الأكل والنوم

مؤمن يكول كلما اشوفة الكي مطلع صورتها وعيونة حمر

ريتال... رهف ترى ماله داعي هذا الكلام اني شسويلة فارس صفحة قديمة وانطوت

انزعجت من كلام رهف اكوللها اسكتي وهي مستمرة تحجي اخير شي كتلهن  نعست عفتهن وكمت

رؤى اجت وراية جانت هي هم ضايجة من كلام رهف

دخلت للشقة الكل نايمين
هشام متمدد على التخم بالهول

جيت كعدت يما صح مغمض بس اعرف بي كاعد

سالتة ليش نايم اهنا

جاوبني بدون ميفتح عينه
لعد وين اروح اهنا احسن من الغرفة

من طريقة كلامة عرفتة ضايج اوووف

عفتة ورحت للغرفة نمت فزيت الفجر

كمت من الفراش رحت يم هشام جان بسابع نومة

لزمتة من كتفة على كيف وحركتة همست بصوت ناصي هشام

بالكوة فتح عينة

يلا كوم اكعد كافي نوم

هشام باوع على الشباك ورجع باوع عليه
كال ليش هسة اشكد الساعة

ريتال... اربعة ونص

هشام... اي وشعندج مكعدتني من هسه

ريتال.. كوم نطلع نفتر هسه الجو حلو وهدوء

هشام... هاي من كل عقلج ارجعي نامي حبابة وعوفيني انام انتي رومانسياتج ماتطلع غير وقت الفجر

ريتال... يااااا شنو رومانسيات هو بس كتلك نفتر
كوم الله عليك ترى اطلع وحدي

هشام.. والله ابتليت بيج بلوة

ريتال... خطية بالكوة كام راح غسل وطلعنا كل شوية يثاوب نعسان هههههههه

رحنا كعدنا يم الماي الجو بي برودة

نزلت رجلي بالماي فزيت من برودتة

شبكت ايدي بايدة  كتله شوف المنظر شلون حلو احسن من النوم

هشام... ههههههه حضنتها اني حالياً كدامي الماء والخضرة والوجة الحسن اكيد مدلل

تعالي نسبح

ريتال.. عاااا عزاااا اني بالكوة خليت رجلي بالماي

هشام... هو بس بالبداية بارد بعدين يصير عادي

ريتال... عوفك من البرودة زين اذا غركنة منو يطلعنا بهل فجرية دشوف الماي اشكد عالي ويجري قوي

هشام... إذا غركنة نصير شهداء الحب

ريتال... ايباااه واني ارمي نفسي بالتهلكة علمود اصير شهيدة الحب

هشام... ابقي كاعدة اني اروح اسبح

ريتال.. لزمت ايده عزاااا لا هشام لاتخليني اتندم لان طلعتك وياي

هشام... شنو خايفة عليه لا اغرك

ريتال... اسم الله عليك اي اكيد اخاف

هشام... زين اذا شفتيني غركت كدامج شسوين

ريتال... كافي هشام شبيك اليوم لوباقية نايمة مو احسنلي

هشام.. هههههههه هو مجرد كلام شبيج خايفة
يلا جاوبي

ريتال... لاسامح الله اذا شوفك تغرك  اظل اصرخ
وبعدين بدون شعور راح انزل للماي حتى اساعدك واني اصلاً ما اعرف اسبح اكيد راح اغرك وياك وتالي على كولتك انصير شهداء الحب هههه

هشام لمعت عينة باوع بوجهي وكال يعني اضحين بنفسج علمودي

ريتال... انت زوجي خوما اعوفك تغرك كدامي وابقى واكفة اتفرج
والأهم من هذا اليموت غركان  يعتبر شهيد
وبالجنة راح تحصل حور عين فااجي وياك حتى اكتم على انفاسك

هشام... هههههههههههه هاي من كل عقلج يعني حتى بالجنة ما اكدر اخذ راحتي

ريتال...متخلص مني ابد على گلبك  وين متروح

هشام باسني من شفايفي دفعتة
عزااااا يمعود ترى احنا برى

هشام... لج بسوالفج جاي تخليني احبج اكثر من قبل

ظلينا كاعدين للساعة ستة بعدين  رجعنا نمنا 

من كعدت تريكت وطلعت افتر ويا البنات تونست كولش

العصر اجتي رؤى

لونها مخطوف باوعت عليها اشرتلي بعينها حتى اكوم

كمت طلعت من الغرفة  اجت لزمتني من ايدي باوعت بالغرفة الثانية شافتها فارغة دخلتني بيها وسدت الباب

حجيت وياها بستغراب ولج شكو مو خوفتيني شبيج

رؤى... ولج هاي رهف الحقيرة اتصلت عليه اتكولي مؤمن وفارس اجوي اهنا تسوي نفسها على اساس مصدومة بجيتهم

ريتال.  من كالت فارس احس دخت ورجفت مبقى بيه حيل كعدت على السرير

حجيت بصوت يرجف ولج رؤى اشدتحجين صخام بوجهي  هسه اني شسوي فرضاً هشام يطلع شايفة ويعرفة متاكدة تصير مذابح بينهم
وهشام نفس اللحظة يطلقني

وهاي رهف ليش هلكد نذلة  شنو متعرف بجيتهم

ولج مو كدامج البارحة كالت هي تتواصل ويا مؤمن واكيد يعرف بجيتها مستحيل تكدر تجي بدون علمه
وثاني شي شلون عرفوا اسم المجمع اذا هي ممنطيتة الهم

رؤى... اهدي حبيبتي ان شاء الله ميصير شي اووف كله بسببي

ريتال... لج فهميييني اني ليش معندي حظ بالصديقات مو وثقت بيها ليش تغدرني
ليش اتريد تهجم بيتي

رؤى.. ريتال اذا تبقين هيجي الكل راح ينتبه عليج قوي نفسج
وهسه اني اروح الشقة اهلها والعب بيهم طوبة والله

ريتال... بجيت بقهر اذا تروحين هسه يكولون هما جايين على رهف اختج شعليها

رؤى... امسحي دموعج وعوفيها على الله انتي ممسوية شي غلط لاتخافين

ريتال.. مسحت دموعي ورجعت للغرفة

منار.. يلا ريتال غيري ملابس احنا كملنا بس انتي و رؤى بقيتوا

ريتال... حجيت بگلبي مستحيل اطلع باب الشقة واخلي يشوفني
كتلها روحوا انتوا اني ابقى اهنا

منار.. ريتال شبيج ليش جاي ترجفين

ريتال... يمكن اخذت برد
تمددت بالفراش وتغطيت

راحوا صاحوا هشام اجه يمي

هشام... حبيبتي شبيج شنو يوجعج

ريتال... اريد اجاوبة مكدرت صار عندي غثيان كمت سريع رحت للحمام تقيئت غسلت ورجعت للغرفة

تبارك.. رتولة يمكن انتي حامل

ريتال... لا مو حامل مو كتلج اخذت برد لان الفجر اني وهشام طلعنا كعدنا يم الماي

تبارك.. ولا يكعد راحة روميو شعندك من الفجر مطلعها

ريتال... هشام صافن على اختة ومجاوبها

كتلها ترى اني كعدتة من النوم وخليتة يطلع وياي

تبارك.. عابتلج واني استلمت اخوية

هشام... اخوج دوم مظلوم

ريتال كومي اشوفلج عيادة لو مستشفى اخذج الها

ريتال.. لا ما أريد هسه بس شوية انام اصير احسن انتوا طلعوا معليكم بيه

رؤى.. روحوا اني ابقى يمها

هشام... لا رئاوي طلعي و ياهم اني باقي اهنا

ريتال...جنت اريدها من الله هشام ميطلع
كتلها روحي هشام يبقى يمي

هشام همس بأذني بس لا جاي ازحلكينهم حتى يخلالج الجو وياي 

ريتال.. اني هم همست مو اكولك تفكيرك وسخ هذا يا جو واني بهاي الحالة

ما اريدك تطلع دوكان متروسة بنات وكلهن لابسات بناطير ضيقة وبرمودات ما اكدر اخليك تطلع واني مو وياك

هشام... هههههههه اشم ريحة غيرة

ريتال... وداعتك بعدك مشايف شي من غيرتي

فزينا اني وهشام من عيطت رؤى

رؤى.. كم مرررررررة كايلتلكم لاتتهامسون من اني موجودة شششششنو انتوا تسوون عناد وياي

نور... ههههههه عبالي بس اني محموسة واريد اعرف شيحجون

هشام...انتي وياها شوفوني عرض كتافكم يلا بسرعة

الكل  طلعوا بقينا بس اني ويا جنت كل شوية اروح اتقيئ حرارتي ارتفعت

هشام يتوسل بيه اكوم  اروح ويا للمستشفى مقبلت

المغرب  من رجعوا كالي اني اروح ادور صيدلية اجيبلج منها علاج

رؤى اجت يمي همستلها
هم شفتيهم

رؤى... اي شفت فارس يم الماي جان يباوع عليه حتى نور انتبهت كالت هذا يباوع عليج

ريتال.. راح امووت من الخوف شوكت يصير الصبح ونرجع

رؤى... لاتخافين محد يعرف هذا طليقج حتى هشام اكيد ميعرفة قابل هو وين شايفة

ريتال... خايفة والله موبيدي

رجع هشام جايب علاج اخذتة ونمت

كعدت باليل كمت من الفراش جنت عركانة طلعت للهول جان صوتهم بالحديقة رحت للحمام غسلت ورجعت لفراشي

منار.. صح النوم ياحلوة هاي شنو صايرة ماي كومي غيري ملابسج

جابتلي دشداشة لبستها
وين رؤى

منار... كاعدة برى جنا نتعشى

اجوي هشام و رؤى يمي

هشام.. عمري شلون صرتي

ريتال... الحمدلله احسن

هشام.. رؤى جيبلها العشى حتى تتعشى

ريتال... لا ما اريد هسه يلا معدتي شوية استقرت ما اكدر اكل اي شي

هاي الليلة ما اعرف شلون خلصت حسيتها اطول ليلة بحياتي

ثاني يوم ساعة بالعشرة تحظرنا حتى نرجع

طلعنا من الشقة دنروح للسيارة سمعت صوت رهف صاحتني غمضت عيني لوبيدي اشرب من دمها

انداريت عليها اجت يمي البنات طلعوا قبلي

نعم شرايدة

رهف... ريتال حبيبتي فدوة لاتزعلين مني صدكيني مجنت ادري بجيتهم

ريتال.. بعدج مصرة تكذبين ولج مو انتي حامل خافي من ربج
بس مع الاسف عليج الظاهر عشرتج وياهم خلتج تصيرين مثلهم

رهف.. بدموع ريتال لاتكولين هيجي تدرين بيه اشكد احبج اني صح كتلة احنا بدوكان بس ما ادري راح يجون

ريتال.. هاي دموع التماسيح بطليها
وزوجح العار جان استحى على نفسه جايب خالة وجاي الهدرجة صاير نذل لج اني مزوجة شيريدون مني

رهف.. ريتال لاتجاوزين هو مجاي عليج هاي منطقة سياحية كل الناس تجي تتونس وتغير جو

ريتال.. هه قنعتيني على العموم بلغي فارس وكوليلة ريتال اتكول طلعنييييي من راسك
اني هسة احب زوجي سسمعتيني اشكلت احبببببة وما ابدلة بالدنيا كلها
وانتي من اليوم بعد ما أريد اشوف شكلج وديربالح تتثلين عليه

انداريت اريد امشي صار فارس كدامي واكف باب شقتهم نظراتة مثل السيوف اتجاهي

اريد امشي ما اكدر من الخوف
باوعت هشام وعصام ومازن واكفين يم السيارة

الحد موصلت للسيارة متت من الرعب

مازن كال اني اسوق وهشام كعد بصفة

فارس من بعيد واكف مقابيل السيارة يباوع بعين صلفة ولا نزل عينة

الحد ما طلعنا من المجمع احس روحي طلعت

من صرنا بعيد عن المجمع شوية ارتاحيت خليت راسي على كتف رؤى وكضيت الطريق كله نوم

يتبع....