رواية فارسي العاشق الفصل الثالث وثلاثون 33 - بقلم بسمة البياتي

_  فارسي العاشق _
( بقلم بسمة البياتي)
_البارت الرابع و الثلاثون _

ماما... بنتي حقج تنقهرين وتضوجين بينكم عشرة مو يوم او يومين اكيد بمرور الأيام راح تكدرين تنسين وترجعين تعيشين حياتج وان شاء الله تتعوضين بالأحسن منه

ريتال... صرخت بوجع لا فدوووووووه بعد لحد يجيبليييييييي طاري الزواج ما اريد اي رجال يدخل حياتيييييييي

ماما... كافي اهدي محد يزوجج  المهم لاتنقهرين

ريتال... تعبت من البجي ظليت حاضنة ماما مغمضة عيني  حسيت على ايد تدفعني فتحت عيني شفت يامن يريد يوخرني من حضن ماما

ماما... يامممممممن مو وقت غيرتك هسه وخرررر من يمي

ريتال... مسحت دموعي بستة وكمت

ماما... وين رايحة

ريتال. اريد انام

دخلت الغرفتي مابية حيل اغير ملابسي بس نزعت الحجاب ودخلت لفراشي

غمضت عيني وصرت اعيد شريط حياتي اذكرت كل لحظاتي ويا فارس

اااااخ يا فارس وين راح حبك وخوفك عليه ليش بالحظة دمرت كولشي

جنت احسد نفسي عليك اكول ماكو رجال يحب زوجتة مثل ما فارس يحبني

شششلون راح اكدر انسسساك دخيلك ربي ساعدني مثل ما زرعت حبه بگلبي شيلة من گلبي
ربي انت ارحم الراحمين ارحمنييييي ياربي الغصة راح توكف گلبي

هلكد مابجيت تعبت ونمت

حسيت احد يمشي شعري على وجهي
فتحت عيني هذا يزن ابتسمتلة 

يزن... هههههه شنو رايج بهذا الأزعاج

ريتال... بس لا انعديت الاخبال من رؤى

يزن... اعوذ بالله يعني ضروري تذكرين هاي الجنية كدامي

ريتال... ما ادري ليش هيجي عداوة انت وياها

يزن... دمها ثگيل على گلبي ما اجرعها موبيدي

هسه عوفج من رؤى الجنية ويلا انطيني ايدج وكومي نتغدى سوى ترى ميت من الجوع

ريتال...حبيبي روح انت تغدى عافيات
اني مو جوعانة

يزن... ماكو هيجي حجي اذا متكومين وياي مراح اكل

ترضين ابقى جوعان واني هستوني جيت من يم المدرس وتعبان

ريتال... لا اكيد ما ارضى يلا امشي

كمت غسلت وجهي وكعدت اتغدى ويا

بقى يشاقة وياي ويضحكني فدوة رحتلة اشكد حنين يزن نسخة من بابا بالشكل وبالطبع الله لايحرمني منهم

كملت غدى رحت للهول بابا كاعد

بابا.. تعالي بنتي كعدي يمي اريد احجي وياج

ريتال... ابتسمتلة وجيت كعدت بصفه
حاوط كتفي بيده وباس راسي

بابا... اريد دائماً اشوف هاي الأبتسامة الحلوة ماريد بعد اشوف دموع بعينج

ريتال... هزيت راسي بالموافقة وكتلة ان شاء الله

بابا... ريتال  اعرف راح تكون هاي الفترة صعبة عليج ادري بيج تحبي وراح تعانين من البعد والأشتياق
بنتي اريدج تتقوين وتتشجعين
ساعدي نفسج حتى تنسي وتكملين حياتج من بعده

ثقي بالله لو جنت اعرف فارس يفيدج
جان بس سويتلة كرصت اذن ورجعتج اله

لكن هيجي بشر التخلص منه هو انسب حل
ترى الرجال اليمد ايده  مرة راح يمدها الف مرة ابو طبع ميغير طبعة
والاكثر من هذا شك بيج
الشك مرض وفارس راح يبقى يعاني منه طول عمره مراح يكدر ينسى اخو جان رايدج

اني الوم نفسي الغلط بيه وين جان عقلي من قبلت ازوجج اله

انتي طيبة وعلى نياتج الله اكيد راح يعوضج 
برجال يصونج ويحترمج ويخاف الله بيج

ريتال... اني جربت حظي بالزواج وفشلت بعد ما اكرر هاي التجربة خلوني عايشة بوسطكم ومرتاحة

باليل ارتفعت حرارتي وتمرضت رجعتلي نفس حالتي القديمة من اخاف لو اضوج اسخن وانام بالفراش

خطية رؤى للصبح كاعدة تسويلي كمادات

ظليت مريضة اربع أيام عماتي وبناتهن يومية يجونا
يكعد يحجن وياي ويشجعني حتى اقوي نفسي وانساه

عبالك عندي دكمة ادوسها وراح انسى بسهولة
حب فارس مغروس بگلبي رغم اذيتة الي ما اكدر اطلعة من گلبي

متمددة بفراشي وصافنة

رؤى... رتولتي عندي مفاجأة الج

ريتال.. مالي خلك مفاجأتج احسن شي سدي الباب وطلعي

رهف... ممممم واني اطلع لو ابقى

ريتال.. كمت من فراشي متفاجئة رهووووووفة

حضنتها والله مشششتاقتلج

رهف... اووووف مو بكدي  لاتبجين ياعمري شوفي شصاير بحالج

ريتال... رهف مجاي اكدر انساه راح امووووت

رهف... ما اعرف شلون اواسيج لو شكولج
الله يساعدج حبيبتي

ريتال.. مسحت دموعي كعدتها كبالي
كوليلي شلون اجيتي انتي مو جنتي يم اهلج

رهف... صديقتي واختي تمر بكل هاي الظروف وتريديني ما اجي اشوفها واوكف وياها بمحنتها
البارحة خليت اخوية يجيبني بس وصلنا المغرب ومكدرت اجيج

ريتال.. عابت لعد ليش البارحة باليل من اتصلتي مكتيلي انتي اهنا

رهف...  ردت اسويها الج مفاجأة

ريتال... ياعمري واحلى مفاجأة فدوة الگلبج

رؤى... مبقى شي للدوام راح تبقين لو ترجعين

رهف... عكب باجر ارجع لأن اخوية بقى وياي
قبل الدوام بيومين أجي

رؤى... ممممم مؤمن يعرف انتي اهنا

رهف.. اي اكيد

ريتال...  من جابوا طاري مؤمن غمضت عيني اي احد من طرف فارس من ينذكر يفز گلبي

همست بصوت مخنوك فارس شلونة

رهف... تحسرت ريتال انسي كلما راح ادورين ورى اخبارة راح تتأذين اكثر

ريتال... هو اني متأذية من كاعي
هسه كوليلي شلونة

رؤى... اي اي احجيلنا اخبارهم ادري بمؤمن وكالة انباء ينقلج الأخبار اول بأول

رهف... امداج يالفضولية دأشوفج متحمسة اكثر منها

رؤى..عوجت حلكي شوف منو التحجي على اساس انتي مو فضولية

ريتال... رهف احجي عاد مو شلعتي گلبي

رهف... ولج بيوم طلاقج من راجعين فارس واخو للبيت

فارس حالتة جانت صعبة ممتحمل يحجي ويا احد بسرعة صاعد فوك

ام فارس لأزمة وسام وسالتة طلقها لولا

وسام كايللها اي

اشو هاي كومي وهلهلي
الشيخ مموجود بالجامع
وسام متخبل ظال يحجي على امه
ثواني ونازل فارس عيونة حمر صاير نار

كايللها على شنو هلهلتي مكيفين على هجمان بيتي

مؤمن يكول فارس تخبل شكو غراض كدامة كسرهن يريدون يلزمونة ميكدرون

اخير شي عايف البيت وطالع

الشيخ من راجع للبيت وعارف بسوايت ام فارس طاردها من البيت
رايحة زعلانة يم بيت ابنها عادل
باقية يومين وبالكوة عادل و وسام متوسلين بابوهم يلا قابل ترجع

وفارس من طالع من البيت لليل يدورولة ماكو ميعرفون وينه حتى تلفونة مغلق

باليل رايح للمعمل والحراس متصلين على وسام ومبلغي لان جان موصيهم بس، يشوفوا يبلغونة

وسام و زوج اختهم رايحين عليه بالكوة قانعي يرجع بس مقابل يروح للبيت رايح البيت اختة

وبعده لهسه هو اهناك 

مؤمن يكول يومية اروح اشوفة حالتة تقهر مايحجي شي بس يتصفن حتى اكل يتوسلون بي يلا يكعد ياكل

ريتال...رهف تحجي واني دموعي تصب ما اعرف انقهر عليه لو انقهر منه

رؤى... اووووف رغم السوى انقهرت عليه

بس هاي ام فارس اشكد حاقدة اكو وحدة تسوي سوايتها

ريتال... فهموني اني شمسويتلها ليش هلكد تكرهني

رهف... لاضوجين عمري الله خلصج منهم

هسه اني اشكد احب مؤمن بس من ينفتح موضوع الزواج والأرتباط اخاف من اهله
اذا ازوجة  ماعرف شلون راح اكدر اعيش وياهم

ريتال...لا تخافين نسرين عدها استعداد تحارب الدنيا علمود سعادة مؤمن اذا صرتي جنتها راح ادللج

رهف.. تدرين رتوتة مؤمن كال اول بارحة جنت سهران ويا فارس

يكول اول مرة اشوف دموع بعيون خالي

ريتال... حضنت رهف ورجعت ابجي

بدء الدوام
داومنا اني و رؤى ولا وحدة من صديقاتي تعرف بموضوع طلاقي بس رهف

كاعدة ويا رهف اجنا مؤمن سلم عليه بحرارة

مؤمن...يولو والله الج وحشة بس انتي كاطعة حتى اتصال ماتتصلين تسألين

ريتال... هسه عوفك من العتاب كولي شخبارك الأهل شلونهم

مؤمن...الحمدلله بخير والأهل دوم يسالون عنج

ريتال..لا عاد بهاي كذبت منو هذولة اليسالون عني اصلاً ماصدكوا خلصوا مني

مؤمن... هههههه يولو شو صايرة ثولة فكري زين وراح تعرفين منو قصدي بالأهل

ريتال... تحسرت سكتت مجاوبتة

خلصنا الدوام طلعنا اني و رؤى ورهف دنروح للخط

رؤى... ريتال باعي منو واكف اهناك

ريتال.. رفعت راسي انتفض گلبي فارس موكف سيارتة بالجهة الثانية من شافني نزع النظارات

اريد امشي بعد ما اكدر ااااااخ اشكد مشتاقتلة اويلي شصاير بحالة ضعفان مبين التعب عليه

رؤى...جريت ريتال من ايدها ومشيتها

ريتال... صعدنا بالسيارة فارس بعدة واكف يباوع علينا
دموعي كامت تنزل جنت امسح بيهن ما اريد ابو الخط لو البنات ينتبهون

رجعنا للبيت ماما واكفة بالمطبخ تحظر الغدى لان هي ترجع قبلنا

يادوب سلمت وفتت بسرعة الغرفتي

سمعت ماما تسأل رؤى
شبيها ريتال

رؤى.. مابيها شي اكيد تعبانة

ماما مقتنعت بجواب رؤى بس غلست

فارس صار يومية يجي يوكف كدام الجامعة
ومرات بين يوم ويوم يجي تعودت على شوفتة

يوم المايجي اضوج
من اشوفة واكف احس بالراحة واعرف اني بعدني موجودة بگلبه

كاعدة ادرس بغرفتي اجتي رؤى

رؤى.. لج ريتاااااال

ريتال... شكوو شبيج خوفتيني

رؤى... ولج فارس و عادل وابن عمهم اهنا

ريتال... كمت مفزوووووعة شنو شيسوون
انخبصت كل شوية اوصل يم باب الغرفة وارجع جسمي يرجف ما اعرف شصار بيه

رؤى... لج شبيج اثبتي بمكان مو راح تموتين

ريتال... بس كوليلي ليش جاين شيريدون

رؤى... والله ما اعرف انتي اهدئي وتعالي كعدي بمكانج هسه اني اروح اجيبلج الأخبار وارجع

ريتال..لا ما اكدر اكعد جاية وياج

طلعنا اني و رؤى
جانوا كاعدين بالأستقبال وبابا وياهم

ماما بالمطبخ

رؤى راحت وكفت يم باب الاستقبال تصنط عليهم

يااا عزاااا ولج ليروح ينفتح الباب ويشوفوج

رؤى... اششش لا لاتخافين محد يفتحة وهسه سكتي خلي اسمع

ريتال... متحملت جيت وكفت بصفها
سمعت صوت فارس غمضت عيني

فارس... ابو يزن احنا بشر وماكو انسان كامل الكمال لله وحدو اني غلطت وأعرف غلطي جبير ويشهد الله ندمان والندم ياكل بگلبي
صارلي اشهر لا ليلي ليل ولا نهاري نهار  مسلوبة راحتي والدنيا ظلمة بعيني
ردلي ريتال ولاتحرمني منها

بابا... فارس البينك وبين ريتال انتهى انت ليش جاي تخليني وتخلي نفسك بموقف محرج
اني لو اريد ارجعها الك جان رجعتها من زمان

رجعت ريتال الك من سابع المستحيلات ترجية وطلعها من اذنك

عادل...  خوية عليش هلكثر معقد السالفة
اعرف انت اب وخايف على بنتك وتهمك مصلحتها والصار ابنتك مو قليل

بس مادام فارس معترف بغلطو ومستعد يتعهد جدام الكل بعد مايمد ايدو عليها  واي شي تطلبو انت وبنتك راح ينفذو بس المهم ترجعلو

خوية صدكني لو ما اعرف بفارس يحب بنتك وندمان على السوى ثق بالله فلا جان جيت ويا
والله من يوم التطلكو وهو هايم وروحو لايبة صار يكضي يومو كلو بالشغل ومن يرجع للبيت يصعد الغرفتها ومانشوفو بعد
صرنا نتحسر على الكعدة ويا

ابو يزن... خوية الي خلق بنتي خلق غيرها هو عنده زوجة ويكدر بعد ياخذ ثلاثة
الدنيا مراح توكف على ريتال
جيتكم على عيني وراسي ويعز عليه اردكم
لكن كلشي قسمة ونصيب
ونصيب فارس وريتال انتهى من يوم النفصلوا

ريتال... خليت ايدي على حلكي اكتم شهكاتي
بسرعة رجعت الغرفتي ختلت جوة البطانية وغطيت راسي شبعت بجي

ثاني يوم بالدوام مؤمن اتصل على رهف كاللها تعالوا للحديقة

طلعنا اني وياها وصلنا للحديقة

شفت فارس ويا مؤمن

عزاااا هذا فارس امشي خلي نرجع

رهف... وين ترجعين ابقي واكفة لاتخلين الطلاب ينتبهون اهنا الكل يعرفون هذا زوجج

اذا عرفوا بيج مطلقة الشباب راح يضايقوج ويومية يجيج واحد يدور علاقة

ريتال.. فارس ومؤمن اجوي يمنا

فارس سلم على رهف وحجة وياي

فارس... ريتال اريد احجي وياج

ريتال... جنت مدنكة ما اكدر ارفع عيني بعينة
جاوبتة بصوت يرجف عفية روح ماكو كلام بينا

مؤمن... ريتال لاتصعبين  السالفة بس يحجي وياج ويروح

فارس... تعالي نشوفلنا مكان نكعد بي

ريتال... اخذني فارس المكان بعيد عن الطلاب

يلا احجي بسرعة وياريت تكون هاي اخر مرة

فارس... لهدرجة كارهتني ومو طايقة الكعدة وياي

ريتال... تنهدت فارس احجي شرايد؟

فارس... شلونج بدون فارس؟

ريتال.. باوعت عليه اجت عيني بعينة
مثل متشوف عايشة الحمدلله

فارس... بس فارس ميت بدونج

ريتال... انساني اني وياك دروبنا بعد متلتقي

فارس... بهاي السهولة تحجينها وتكولين انساني
اي ممكن انساج بس بحالة وحدة من اصير جسد بارد بدون روح

ريتال... بدون شعور  اسم الله عليك
انتبهت على نفسي رجعت دنكت راسي

فارس... يولو ادري بيج تحبيني
بنيتي رحمي بحالي ورديلي ترى كاعد اموووت بلياج

ريتال... نزلت دمعتي فارس حتى لو بعدني احبك واريدك
رجعتي الك صارت مستحيلة اني امري موبيدي

فارس... بس وافقي واوكفي وياي مستعد اخذج واترك العراق كلو

ريتال... انت من كل عقلك تحجي فارسسسس اني لو اموت ما اكسر كلام بابا
اترجاك عووووفني

فارس... لاتكوووولين اعوفج انتي الييييي فهمتتتتتي لو يبقى اخر يوم بعمرج تبقين الي

ريتال... نصي صوتك منا طلاب راح تفضحني

فارس... شوفي ريتال وركزي على كلامي وحق الحق اذا فكرتي يوم من الأيام ترتبطين بغيري طلقة اخلي براسج
تتوسدين الگبر عندي ارحم ما تروحين لحضن غيري

ريتال.. فارس عافني وراح
مهتميت الكلامة لان اني اصلاً مستحيل افكر اخذ واحد غيره

حياتي مشت عادية التهيت بالدراسة
فارس دائماً اشوفة يم باب الجامعة

كاعدة ويا رؤى بالمطبخ نشرب شاي
رن فوني رهف تتصل

ريتال...قبل ساعتين جنتي كبالي لحكتي تشاقيلي

رهف... ولج جبتلج اخبار خطيرة

ريتال... صوتج ميطمئن احجي شصاير

رهف... مو تدرين مؤمن من البارحة مختفي واليوم ممداوم اتصل عليه ميجاوب

ريتال... لج احجي راح اموووت مؤمن خوما بي شي

رهف... لا اسم الله عليه
قبل شوية اتصلت وجاوبني جان صوتة تعبان ومخنوك

ريتال... ررررررهف دخلي بالموضوع مو راح تجيني سكتة قلبية من الخوف

رؤى لازكة بيه ومخلية اذنها على التلفون

رؤى... رهف احجيييييي

رهف... البارحة باليل حازم متعارك ومضرب سكينة بكتفة اليسار والضربة صايرة قريبة من قلبة وحالتة خطرة

ريتال... اني و رؤى شهكنة مفزوعات يااااااا عزاااااا
خطية هسه وينة وشلونة

رهف... حالتة موزينة بعده بالعناية وامه وابوة اثنينهم من سامعين
متخربطين وهسه هما هم بالمستشفى

ريتال... يااااا هاي شصاير بيهم الله يكومهم بسلامة ان شاء الله

والله انقهرت على حازم

رهف... اي اني هم انقهرت مصارلة ايام من زوجتة ولدت ملحك يفرح بأبنة

ريتال... سديتة من رهف
رحت على بابا وماما بالهول

حجيت وياهم
صديقتي قبل شوية اتصلت عليه كالت حازم ابن الشيخ مضروب سكينة وحالتة موزينة

ماما... ياااا خطية هاي شوكت

ريتال... يمكن البارحة باليل

بابا... الله يكومه بسلامة ان شاء الله
بس صديقتج منين عرفت؟

ريتال.. بابا جان يباوع عليه بشك
من مؤمن ابن نسرين هو زميلها وعنده صداقة وياها

بابا اريدك انت وماما تبرون حازم الذمة على كولشي سوى قبل

بابا... ابتسمت بدون متكولين اول ما سمعت الخبر بريتة الذمة

ماما... مبري الذمة ربي يشافي ويرجعة الزوجتة واهلة بسلامة ان شاء الله

ريتال... ابد ما انسى دفاعة عني بيوم الضربني فارس هوايه كبر بعيني

بابا من تشوف علاء كوله خلي يبري حازم الذمة ويسامحة
لان متاكدة بيوم الوكع علاء بالشارع رفع راسة للسماء ودعة عليه

بابا... ان شاء الله فدشوية من اروح للأسواق اكولة

ريتال... ظليت على تواصل ويا رهف حتى اعرف اخبار حازم
بس للأسف وضعة نفسة وماكو تحسن......

يتبع....
فعلاً شردت منك الغزالة يافارس سمعوا الاغنية حلوة