رواية فارسي العاشق الفصل الرابع وثلاثون 34 - بقلم بسمة البياتي

_  فارسي العاشق _
( بقلم بسمة البياتي)
_البارت الخامس و الثلاثون _

حازم بقى بالمستشفى أيام الى ان استقرت حالتة وتجاوز مرحلة الخطر
وبدء يستعيد صحتة
الله رحم بحالة وطلعة منها سالم بلكي هذا الصار يكون درس اله حتى يبطل مشاكل

فارس طول هاي الفترة بعد مشفتة
مؤمن رجع يداوم

بعد اسبوعين من حادث حازم
طلعت من الكلية شفت فارس واكف

اووووف هسه روحي ردتلي جانت نظراتنا واللهفة الموجودة بعيونة تعبر عن مدى اشتياقنا البعض

خلصت السنة وتم التخرج
يمكن بهذا اليوم الأزم اكون اسعد وحدة لان كدرت احقق هدفي واحصد ثمار تعبي

لكن اني كان جو الحزن مخيم عليه ما اعرف شلون راح اكدر افارك رهف ومؤمن
هذولة الأثنين لو شما اوصفهم ما اكدر اوفيهم حقهم وكفو وياي باصعب ظروفي جانوا الي ونعم الأخوة والاصدقاء

رهف كلما تجي البيت جدها تجي عليه حتى مرات تبات يمي

اني علاقتي قوية حتى ويا امها و خواتها دائماً من اتصل على رهف ونفتح كام يكعدون يمها ونظل نسوالف

واكثر من مرة ملتقية بيهم من يجون البيت جدهم

الوضع يمنا بدء يدهور الخوف والقلق سيطر علينا

داعش سيطروا على هواية مناطق بتكريت

صار التهجير واكثر الناس تركو بيوتهم وحلالهم وطلعوا بروحهم العزيزة

احنا هم قررنا نترك محافظتنا بابا اتفق ويا جدي وعماتي
نروح للحلة

بابا اتصل على أهل ماما وطلب منهم يأجرولنا بيوت هناك

جدي ابو ماما رفض كال بيوتنا مفتوحة الكم احنا نطلع وانتو تبقون
لكن بابا اصر على موقفة لان  منعرف هذا الوضع لشكد راح يستمر

منكدر ناخذ راحتنا اذا مو مكان خاص بينا

سافرنا للحلة سكنا كل عائلتين بيت

احنا وجدي وبيت عمة داليا سوى

من وصلت للحلة جنت متلهفة على شوفة جدو وبيبي لان من يوم الزوجت فارس بعد مشفتهم

بيت جدي استقبلونة احسن استقبال

خوالي وخالاتي رفعوا راس ماما كدام عماتي وازواجهن
فعلاً معادن الناس تبين بهيجي مواقف

من دخلنا للبيوت المأجريهن النه لكيناهم منظفيهن وجايبين فراش ومجهزين الاغراض الضرورية النحتاجها

كاعدة يم بيبي

بيبي... تعالي كعدي يمي خلي احجي وياج
خايبة اني مو من البداية كتلج مراح تتحملين حياة الشرج بس انتي واهلج الله عماكم

ريتال...خطية بيبي عبالها اطلقت بسبب ضرتي

جاوبتها بيبي هاي قسمتي بعد منكدر نغير الصار

بيبي... لاتنقهرين هو الخسران لويدور كل عشيرتة مايلكى مثلج

ريتال.. ههههه فدوة للترفع معنوياتي

رؤى... بيبي ترى هاي نفسها ريتال الجانت تروح تكطع تين من الشجرة وانتي تشبعيها رزايل

بيبي... غضب الله عليج كلما تكبرين لسانج يكبر وياج

ريتال... دخل غيث سلم علينا طول ماهو واكف مانزل عينة مني
كبر هذا شبي صاير جرئ ولا يخجل

زهرة تباوع عليه وتخزرني خرب بعدها لهسه تكرهني

غيث وزهرة صاير عدهم ولد

استقرينا بيتنا الجديد

صارلي هواية مشايفة فارس گلبي طاك عليه

جانوا بعدهم بتكريت الشيخ ميقبل يترك بيتة

جنت ميتة من الخوف عليه

من الوضع متازم الشيخ خايف على ولده

مأخذهم ورايح  الكركوك

ارتاحيت من عرفت بيهم طالعين 

باليل اتصلت عليه رهوفة

رهف... شنو رايج ندخل مؤمن ويانة على الخط لان مشتاقلج دائما يسال عليج

ريتال... ماشي اني هم مشتاقتلة والله

مؤمن... هلا حبيبة گلبي

رهف... احم ترى ريتال ويانة على الخط

ريتال... ههههه جان عفتي يكمل

مؤمن.. هههههه ها يالبذاتة بالجذب فدبوم سويها وكولي خلي اسال على مؤمن

ريتال...وربي كلما اتصل على رهف اسال عليك

مؤمن... يولو شلونج مشششتاقين يابة

ريتال... الحمدلله بخير انت شلونك
واني الأششششوق يابة

مؤمن... دائماً اكول الرهف ريتال بس لا راح تاخذلها واحد من الحلة وتنسانى

ريتال... اعوذ بالله شنو هالسالفة التغث بهاليل يازواج يابطيخ

مؤمن... لأزم الجماعة بعدهم بالگلب

ريتال... انت هسه قريب من رهف ليش متخطبها

رهف... هههههههه شوف اللوتية شلون غيرت الموضوع

مؤمن... ههههههه خلي تغلس اعرف الجواب

ريتال.. عابتلكم ترى اسد الخط

مؤمن... اني قبل التهجير حجيت ويا جدي وخليت امي تقنعوا حتى اخطب الخاتون

بس على حظي المصخم دخلوا داعش

ريتال... هههههههه خرب شلون حظ

رهف... حتى بعد لاتكولين انتي معندج حظ طلع حظي مصخم اكثر من حظج

ريتال... لا عمري ان شاء الله حظج حلو
ولك مؤمن على الأقل هسه بس روح اخطبها

والزواج عود بعدين

مؤمن.. ان شاء الله اني هيجي مقرر

ريتال... سمعت صوت فارس

فارس... يول مو ابوية اذا لكفك تخابر يعلكك بالبنكة

مؤمن... شنو جاهل ويعلكني بالبنكة لا ممقبولة منك ابو الفوارس

هساع اني عاشك وسهران انت شعندك كاعد

فارس...المسهرك مسهرني

اسأل رهف شخبار ريتال

مؤمن.. اي رهف جاوبي شخبار ريتال

ريتال... ساكتة وبس الدموع تنزل 

رهف... الوووو رتوتة وين راح صوتج

ريتال...همست موجودة

رهف... كول الفارس ريتال ازوجت وراح يصير عدها طفل

ريتال... يااااا عزااا هاي من كل عقلج

مؤمن... ههههههه حتى فارس  يصبح  بالحلة

فارس.... شكوووو شنو السالفة 

رهف... بربك كولة خلي نضحك شوية

ريتال... ياااا وانتي ملكيتي غير هاي السالفة تريدين تضحكين عليها

رهف.. رتوتة راح اسد الخط فدشوية واتصل عليج ماشي

ريتال.. اوك حبي
نهيت الأتصال ظليت بمكاني متحرك

رن موبايلي عبالي رهف خرب هاي شبسرعة اتصلت

باوعت هذا مؤمن استغربت هذا شعندة يتصل مو قبل دقيقة  جان يحجي وياي

الووو...

فارس... لاتسدين الخط اريد احجي وياج

ريتال... ارتبكت اريد احجي ما اكدر اخرسيت

فارس... الوووو كاعد تسمعيني لو لا

ريتال... اي اسمعك كول شرايد

فارس... رايدج

ريتال.. تنهدت انت متمل من هاي السالفة

فارس... صاير گلبج قاسي ماجنتي هيجي

ريتال... اي صح گلبي قسى بيوم التهمتني بشرفي وخليتني فرجة لليسوى والمايسوى

فارس..كوليلي شلون اكدر اخليج تنسين وتسامحين

ريتال... لاتعب نفسك مراح انسى ولا اسامح

فارس...بس اعرف بيج بعدج تحبيني والدليل هذا صوتج اليرجف وانتي تحجين وياي

ريتال... لا هذا صوتي لان نعسانة

فارس.. ههههههه يولو اني فارس ماتكدرين تضحكين عليه حافظج على گلبي

ريتال... اكولك انت شعندك عايف مرتك وكاعد تحجي وياي

فارس... ههههههههههههه مرتي مو هين يم اهلها

ريتال...لهذا السبب ضايج وسهران لان مموجودة يمك

فارس... هههههههه اشكد اشتاگيت الغيرتج

ريتال... ياااا وعلى شنو اغار انت متوهم هاي مو غيرة مجرد كلام عادي

فارس... اي واضح مو غيرة بس هم راح اريح گلبج واجاوبج

صبا ما اجت ويانة الكركوك راحت ويا اهلها الاربيل متكدر تفارك أهلها

ريتال... ههه لعد مو جانت خابصة الدنيا عليك وتريدك وطلعتني اني انانية و ما اخاف الله ومسويتلك سحر

فارس...يولو صبا الجانت تسوي مو حب بيه هاي غيرة منج وتريد تهججج من البيت

ريتال... وبالأخير الهججني هو انت

فارس... اوووووف جان يوم اكشر ولج والله جنت معمي الحد هاي اللحظة ما اعرف شلون سويت هيجي يولو حتى ضغط صار بيه من القهر

ريتال... كمت اشهك وابجي انت جنت من قبلها متغير عليه

صوت فارس اختنك بالكوة يحجي

فارس...بنيتي احلفج بكل لحظة حلوة بينا ردي الگلب فارس 

ريتال..  رجعتي الك صارت مستحيلة تعرف يعني شنووووو مستحيلة بابا حالف يمين عظيم ميرجعني الك 

فارس...بس اوكفي وياي ولاتتخلين عني مستعد اجي على ابوج مرة وثنين وعشرة الحد ما اخلي يردج الي

بس هساع ريحي گلبي وكوليلي سامحتك وبعدني احبك واريدك

ريتال... انت مو اتكول حافظني  لعد ليش دتسالني

فارس... اريد اسمعها من حلكج حتى تبرد النار الموجرة بگلبي

ريتال... ما اكدر ما أسامحك لان احبك فارس

فارس... ااااااخ

ريتال.. فارسي شبيك انت دتبجي؟
لا فدوة حبيبي ما اريد دموعك تنزل بسببي

فارس...  يبعد الروح والله مو مصدك انتي الكاعد تحجين وياي خايف يطلع هذا حلم

ريتال... فارس اذا بابا مقبل يرجعني لك شراح نسوي اني مستحيل اكدر اكسر كلام بابا

فارس...كتلج راح ابقى اجي على ابوج الى ان يوافق

ريتال... احبك 

فارس...اعشكج يابعد فارس 

ريتال.. اني وفارس صرنا مثل العشاق الي مسوين علاقة بدون علم اهلهم ويتواصلون بالختلى
ظليت ايام اتواصل ويافارس بدون علم احد حتى الرؤى وعمة داليا مكتلهم

فارس اتصل عليه وكالي راح يجيب اخوانة ويجي للحلة

طلبت منه ينطي خبر البابا قبل لايجون

وفعلاً عادل اتصل وبلغ بابا بجيتهم

بابا بيومها صار اعصاب لان انحط بموقف محرج ومكدر يكوللهم لاتجون لان كالولة احنا بالطريق

ماما اقترحت على بابا يرجع يتصل على عادل ويكولة من تجون ما اريد تحجون عن سبب طلاق ريتال وفارس لان جدي وخوالي ميعرفون السبب الحقيقي

بابا كايللهم فارس دائما يضربها لهذا السبب طلقتها منه

بابا رجع اتصل وبلغ عادل بهذا الكلام

جنت خايفة ومتوترة لان شكل بابا ميطمئن

من وصلوا عمو مصطفى وابن خالي راحوا عليهم جابوهم لان جانوا ميندلون

بيت جدي قريب علينا

جدي وخالي حسين وغيث اجوي البيتنا

حتى يستقبلوهم

جانوا جايين فارس وعادل و وسام وجمال

دخلوهم للأستقبال اجة غيث اخذلهم ضيافة 

اني جنت احوص اروح منا واجي منا ميتة من التوتر والقلق

رؤى... ريتال ما اعرف ليش هالمرة احسج تريدين ترجعيلة

ريتال... وفري احساسج النفسج ومعليج بيه

داليا... تريدين الصدوك اني هم عندي نفس الأحساس

ريتال.. عايفتلكم المطبخ وطالعة

صارلهم ساعة كاعدين يحجون
متت من الأنتظار والترقب

رؤى... هسه هما ليش عافوا الباب مفتوح جان رحت سمعتهم

سمعنا صوت صياح فزينا كلنا وكمنا من مكانة

ريتال... عفيه هاي شكووو

نباوع عمو مصطفى بالدفع جاب غيث للمطبخ

مصطفى... ادري ششششبيك تخبلت

غيث... دعوفي اليوم اذا ما اشرب من دم هذا العار ما ارتاح

ريتال.. من الهبطة اريد اوكف ما اكدر لوني اخطف ودخت

فارس واخوانة طلعوا راحوا واني الحد هاي اللحظة ما اعرف شصار

اجة جدي رزل غيث
وغيث يسب ويغلط على فارس

خالو حسين اخذ ابنة وطلع

ماما.. هسه بس فهمونا شنو صار وشبي غيث

بابا عافنة ودخل للغرفة

مصطفى.. يمعودة هذا غيث عبالك زعطوط فضحنا كدام الزلم يجفص ولا يعرف يحجي

داليا.. ليش شبي شسوى؟

مصطفى.. عادل فتح موضوع فارس وريتال وكعد يقنع ابو يزن حتى يوافق على رجعتهم

كال احنا جاينك من طريق بعيد ونتمنى هالمرة ماتردنا

ظلوا عادل واخوانة يقنعون برافد 

وتقريباً رافد وافق

غيث نط من يمه

انت ضربتها وبكل عين صلفة جاي تريد ترجعها شنو هي ما وراها زلم

والله ابو يزن لو مخابر  علينا بيوم الضربتها مجان بقيناك عايش

فارس صار اعصاب بس الخاطر الموجودين ماحجة شي

غيث كل شوية يحجيلة سالفة اكبر من راسه

فارس واخوانة على اعصابهم كاعدين

اخير شي وسام ماتحمل  كال انت شبيك ماعندك احترام الاحد صارلك ساعة تحجي وتجاوز واحنا ساكتين

احنا عرب والضيف اذا داس ابساطنة نخلي على رؤوسنا حتى لو جان عدونا

احنا خطاركم ومتعنين عليكم من مكان بعيد مو حلوة منك كل شوية معلي صوتك علينا

كلمة من غيث وكلمة من وسام تعاركوا

غيث كوم  وطردهم

فارس هد على غيث يريد يضربة بالكوة لزمنا
عادل اخذ اخونة وطلع زعلان

ماما... يااااا هذا شبي تخبل هو شعليه ليش يدخل بشي ميخصة ابوها موجود هو المسؤول عنها

مصطفى.. والله حيل تفشلنا كدام الزلم

ريتال... عفتهم ودخلت للفرفة ظليت ابجي على حظي المصخم منين طلعلييييي هذا غيث العاررررر......

يتبع...

مساء الورد

اسفة على التاخير جنت طالعة ورجعت متاخر
يادوب كدرت اكتب هذا البارت اعذروني على التقصير...