_ فارسي العاشق _
( بقلم بسمة البياتي)
_البارت الثاني والأربعون _
خلصت أجازة هشام وباجر لازم يداوم
هشام.. حبيبتي اذا اعوفج وحدج خوما تخافين اذا تريدين اخذج الاهلج او اهلي والظهر من يخلص دوامي اجي أخذج
ريتال.. لا عادي هي دنيا نهار مو ليل حتى اخاف انت تروح الصبح ترجع الظهر
الصبح كعدت ويا هشام سويتلة ريوك تريكنا سوى
راح للدوام واني رجعت نمت فزيت على صوت الفون يرن
الووو
هشام... الووو حبيبتي شنو جنتي نايمة؟
ريتال.. اي والله
هشام... لعد ارجعي كملي نومتج
ريتال... لا شكمل هم زين كعدتني اكوم انظف واسوي غدا
شتحب اطبخلك
هشام.. كلشي من ايدج طيب
ريتال.. ممممم ماشي عود اشوف شسوي
نهيت الأتصال وكمت نظفت كملت دخلت للمطبخ
اوووف والله حيرة شراح اطبخ
اخير شي سويت تبسي دجاج بالفرن وسويت مقبلات
خلصت طبخ رحت سبحت رتبت نفسي وكعدت انتظرة
من رجع أول مشافني حضني ويبوس بيه عبالك مشايفني صارلة سنين
تغدينا ونمنا العصر كالي اكيد اليوم ضجتي لان بقيتي وحدج امشي نطلع
من يكولي نطلع عبالك اجة العيد ههههههه
بعدها بخمس ايام باليل كلتلة باجر جمعة اريد اروح ابات يم اهلي
هشام عقد حواجبة
ماكو مبيت اخذج الصبح ارجعج العصر
ريتال... لا شنو ترجعني مشتاقتلهم اريد ابقى يوم كامل يمهم
هشام... حبيبتي باجر عطلتي تريدين تعوفيني وتروحين
ريتال... لان بابا هم عطلة اختاريت الجمعة فدوة لاطلعلك سالفة ترى حتى اهلي يزعلون اذا ما ابات يمهم لازم تتعود كل عشر ايام اروح ابات
هشام... ماشي
ريتال.. ههههههه ليش تباوعلي هيجي هو يوم واحد ميحتاج كل هاي الضوجة
هشام... نامي لا ابتلي بيج
ريتال... هههههه اوك
الصبح اخذني البيت اهلي
من وصلنا كعد هشام شوية وياهم وترخص يروح
اهلي كالولة ابقى على الغدا
كال ما اكدر اهلي ينتظروني اتغدا يمهم
بابا كعد يسالني شلونة هشام وياج خوما يتعارك لو يضربج
جاوبتة لا والله ابد اصلاً يعاملني احسن معاملة
ماما... ههههههه هما مصارلهم شهر من مزوجين ودتسالها هذا السؤال
ثاني شي هشام درة مال الله
بابا... اني واثق من معدن هشام الطيب بس هم لإزم اسألها حتى اطمئن عليها
... المغرب يزن كال اجة هشام
عزااا هذا بس لا جاي يرجعني
دخل كعد ويا ماما ويزن بابا جان طالع مموجود
جيت كعدت و ياهم هو منطلق بالسوالف يشاقة ويضحك طبيعتة حلوة بسرعة يذب ميانة ويا اي واحد
ماما طلعت من الهول رحت كعدت يمة
همست هممم شعجب اجيت
هشام.. رفع حاجبة شنو متريديني اجي عادي هسه اكوم اروح
ريتال... يااا هاي شبيك موقصدي بس ستغربت لان قبلها بساعة جنت احجي وياك بالفون مكتلي راح أجي
هشام... جنت قريب منا كلت امر عليج واشوف بلكي غيرتي رايج وترجعين وياي
ريتال... ههههه والنبي جنت اعرف جيتك مو خالية اكيد جاي تريدني ارجع
رؤى.. اكول يا جماعة الخير مو جنكم زودتوها صارلكم ساعة تتبسبسون ونسيتو اكو مزهريتين كاعدين وياكم على الأقل شوية رفعوا صوتكم حتى نفهم اشدتكولون
يزن.. وانتي شكو حاشرة روحج فديوم فضولج يموتج
هشام... ههههههههه رئاوي بعدج صغيرة ميصير نحجي كدامج من تكبرين عود انكولج
رؤى... عمي صلي على النبي صرت صيدلانية وتكولي بعدج اصغيرة
هشام... رجال ومرتة على كولت يزن حاشرة روحج بينا شكو
رؤى... يااااا اني صوجي كاعدة كبالكم اروح للمطبخ احسن
هشام بقى تعشى ويانة
بابا كالة ليش متبات اهنا شعندك راجع وحدك بهل ليل
بالبداية استحى بس بعدين قبل
الكل راحوا ناموا اخذتة الغرفتي
هستونا تمددنا تحركت يدة الباب
ههههههه هذا اكيد يامن كمت فتحت الباب
دخلتة للغرفة
هشام... ههههه شبي اشو يباوع عليه بحقد
ريتال... لان يحبك ههههههه
يموني حبيبي تريد تنام يمي
هز راسة بالموافقة
يلا لعد تعال نام
سحب راسي وشاورني
يامن... خلي هذا يطلع من الغرفة
ريتال... ههههه خرب
شاورتة لا حبيبي خطية وين يروح
هشام... اشجاي تتشاورون هسه يلا حسيت بحساس رؤى ههههه
ريتال... والله لو تدري يامن شيريد ههههه
هشام... شيريد؟
ريتال.. يريدك تطلع من الغرفة
هشام.. هههههه ولك وين اروح بهل ليل
ريتال.. يلا حبيبي تعال نام
يامن... مااه خلي يلوح منا
ريتال... افرشلة بالكاع وانت نام اهنا يمي على السرير خطية ماكو مكان وين يروح
يامن... خلي يلوح يم رؤى وبعد انتي ابقي اهنا لا تلوحين ويا
هشام... هههههههه خرب غيرتك
ريتال... ياااا عزاااا هههههههه عيب حبيبي بعد لاتحجي هيجي
يامن معاند ميقبل ينام اذا ميطلع هشام
هشام... اني لو راجع للشقة مو اشرفلي من هاي البهذلة
بنص الليل انطرد
ريتال... ههههههه امشي نام بغرفة يزن على سرير يامن سريرة كبير مو مال اطفال
هشام... ما اريد اسبب ازعاج اليزن
ريتال... يا ازعاج هو راح تنام قابل شمسوي
ردت اكوم يامن لزم ايدي
لاتلوحين بس هو يلوح
هشام... اكولج هو مو راح للثاني ابتدائي ليش هيجي لسانة
ريتال... ماما اخذتة للطبيب كال عادي بمرور الايام ينطق عدل
انطيت فوني اليامن وكمت ويا هشام
دخلنا للغرفة يزن حس علينا
يزون اليوم هشام ينام اهنا
يزن... ههههههههههه اكيد هاي سوالف يامن
هشام... وداعتك طردني من غرفة مرتي
يزن... ههههههههه لابربك
تعال نام بفراشي
هشام... لا حبيبي تسلم راح انام بفراش الجني
ريتال... طلعت بطانية جديدة انطيتة ورحت نمت
الصبح سمعت صوت ماما تحجي ويا يامن فتحت عيني
صباح الخير
ماما.. صباح النور حبيبتي ولج هذا شجابة يمج
ريتال.. ههههه باليل اجة
ماما.. ههههه ردت اكعد يزن فتت للغرفة شفت هشام نايم
يزن حجالنة اني وابوج كال يامن طاردة من غرفتج ههههههه
ريتال.... هههههههه اي والله
كعد هشام تريكنا ورجعنا للشقة
ثاني يوم الظهر
كملنا غدا وكفت اسوي شاي الهشام
صبيتلة وانطيتة
هو كعد يشرب واني بديت اغسل المواعين
هشام.. العصر أخذج البيت اهلي امي اليوم اتصلت عليه كالت جيب ريتال
صديقتي راح تجي تريد تشوفها وتسلم عليها
ريتال... امك شدعوة هلكد عدها صديقات والله مليت من المجاملات
هشام... ههههههه امي اجتماعية تحب الأختلاط والصداقات
يلا رايح اناملي فدساعة لان تعبان
ريتال... اوك
هشام.. شنو اوكي امشي وياي
ريتال.. انت مو نعسان وتريد تنام
شكو ماخذني وياك اني منعسانة نمت هوايه
هشام...لاتشلعين گلبي ورانا روحة يلا امشي كدامي
ريتال.. صارت ساعة بالأربعة اريد اكوم اجهز نفسي ما اكدر اتحرك مطوقني بيده ورجلة
بالزور شلعت روحي منه سبحت وبدلت وتمكيجت وهو بعده نايم
جيت كعدتة هشام يلا كوم راح نتاخر
هشام بالكوة فاتح عينة كال صدك امي عدها سوالف
ريتال.. هههههههه هستوك دريت ديلا كوم
رحنا البيت عيالي جانت صديقة امه بعدها مجاية
منار وعصام هم موجودين
سلمنا عليهم وكعدنا وياهم بالهول
بعدين عفت هشام كاعد ويا أبو واخوانة كمت ويا نور الغرفتها
اجني ايات ومنار هم يمنا
نور... لوتدرين اشكد مشتاقة الاختج رؤى فدوة لله اشكد احبها
ريتال... هههههه حقج تحبينها انتي وياها نفس الطينة من تكعدن سوى متبقن سالفة متحجنها
نور... عابت يعني قصدج احنا نمامات
ريتال... لا حشاكم بس فضوليات
منار... والله صح هسه اذا تريدين تعرفين اخبار العشيرة كلها تلكيها يمها
نور... شوفوا نسوان اخواني العوبات اندارن عليه
ايات لزمت نور من اذنها وكالت
ولج نور منو عوبات اشو لسانح طولان
نور... هههه هاي شبيج اني قصدت منار وريتال مقصدتج
انتي مرة اخوي الكبيرة اشحده اليحجي عليج
بس فدوة هدي اذني راح تحوليني
دخلت ام هشام للغرفة
ام هشام.. صديقتي بالطريق لاظلن كاعدات اهنا
وانتي ريتال مثل موصيتج هذيج المرة ماأريد اتكولين انتي مطلقة
ريتال... هاي ثاني مرة تهيني حسيت الغصى وكفت بلاعيمي
منار وايات باوعن عليه بقهر مبين معجبهن كلامها
اني منطقت ولا حرف
من طلعت اجني البنات يمي
أيات.. حبيبتي رتولة لاتضوجين من كلام خالتي هي اكيد مو قصدها تجرحج لو تضوجج يمكن تخاف من صديقاتها لايحرجوج بالأسئلة عن حياتج السابقة
منار... والله عمتي گلبها طيب وعلى نياتها ما ادري شجاها وهيجي حجت
ريتال.. عادي بنات مصار شي لاتهتمون امشوا خلي نطلع
وصلن مرة وبنية دخلوهن للأستقبال
دخلت ويا ايات ومنار للأستقبال
سلمت عليهن المرة سلامها عادي بس البنية ردت من ورة خشمها
نور جابتلهن الكيك والعصير واجت كعدت يمي
المرة طول الكعدة نافشة ريشها وتمدح بنتها معدها سالفة غير بنتها
ام سارة.. عيني ام حسام لو تشوفين شباب الجامعة ذابحين روحهم على سارة يومية يجي واحد يخطبها
ام حسام.. حقهم ما شاء الله سارة ادب واخلاق وجمال ونزاكة
نور بهمس اشو ماما هم حمت على الواهس
ريتال.. ابتسمت من كلامها
ام سارة... اني ما انطيها الكل واحد
اريدلها واحد يلوكلها وعنده شهادة مثلها هي راح تصير محامية مو قليل
رجعت نور همست لعد لو عدها شهادة طب وهندسة شجان سويتوا
نور متحملت عافت الاستقبال وطلعت ههههههه مبين تضوج منها
وأخيراً البرنسيسة سارة حجت
سالتني انتي اشكد عمرج؟
جاوبتها اني عمري خمسة وعشرين راح ادخل بالستة وعشرين
سارة... يووو طلعتي اكبر مني بهواي اني عمري عشرين
ريتال... ابتسمتلها العمر كلة حبي
دارت وجها ولاجاوبتني هاي شبيها والله يا الله
ام سارة.. انتي مخلصة دراسة لو لا؟
ريتال.. اني مهندسة نفط
اشو الام وبنتها انگلبت خلقتهن والله وراهن سالفة هذني
نور مدت راسها من باب الاستقبال كالت
ريتال هشام يريدج
ام سارة.. هشام اهنا وينة اريد اسلم عليه والله مشتاقيلة
ام هشام... نور روحي صيحي اخوج يجي يسلم على ام سارة
ريتال.. عقدت حواجبي شنو هالميانة ومشتاقتلة
مكمت من مكاني ردت اشوفة من يدخل يسلم
اجة هشام وكف بالباب سلم على ام سارة
هي اكلتة بالسلام
هاي وينك وبالجذب مفديوم سالت علينا
سارة جانت تباوع عليه بدون مترمش وعينها تلمع بالدموع
همست الايات اكولج هاي سارة نفسها خطيبة هشام السابقة
ايات بهمس اي هي
ما اعرف شبيه جدآ انزعجت كمت من مكاني رحت عليه
هشام ترخص من ام سارة وطلع
باوعت عليه كول شرايد
هشام.. تنهدت اعرف بيج ضايجة وحقج وربي لو جنت اعرف هما الديجون مجان جبتج
ريتال . وعلى شنو اضوج
هشام.. حبيبتي تدرين بيه اشكد احبج لو لا
ريتال.. اي ادري تحبني هواي
وهسه كولي على شنو صحتني
هشام... مو بس هواي اموووت عليج والله بستها بخدها
راح اطلع ويا صديقي مااتأخر ساعة وارجع
ريتال... ماشي رجع باسني بخدي وطول بالبوسة
راح هشام واني رجعت للأستقبال
انصدمت بالمنظر سارة حاضنة ام هشام وغاصة بالبجي وامها هم تبجي
ما اعرف ليش بس اني حظي أعوج وين ما اروح لازم الكي شريكة
ردت اكعد حجت ام هشام
نور اخذي ريتال وروحوا الغرفتج
ريتال .. معت من الفشلة طردتني بس بادب
طلعت بسرعة توجهت للمطبخ باوعت من شباك المطبخ على الحوش بلكي هشام موجود بس ماكو
نور.. على شنو ادورين
ريتال.. ولا شي
اكولج وين جنطتي بيها فوني يمكن بغرفتج
جنت احجي وامشي بتجاه الغرفة لكيت جنطتي اخذت فوني وطلعت رجعت للمطبخ
اتصلت على هشام بسرعة جاوبني
هشام.. ههههه شبسرعة اشتاقيتلي
ريتال... الغصة حركت بلاعيمي بالكوة حابسة دموعي
هشام تعال رجعني للبيت
هشام... تغير صوتة وحجة بقلق شبيج ريتال خوما صاير شي
ريتال... مابيه شي بس تعبانة واريد ارجع ممكن تجي ترجعني
هشام... دقيقتين واكون يمج
ريتال.. سديتة رحت جبت جنطتي ووكفت بالحوش انتظرة
نور... ريتال هاي وين رايحة
ربتال.. ويا هشام
نور.. هاي ليش بس لاضجتي من هاي العوبة سارة
اجت منار يمنا
منار.. ليش واكفين اهنا
نور... ريتال تريد تروح
منار... والله عرفت بيها ضاجت
دخل هشام وبعيونة القلق والخوف
هشام... شكو شصاير
ريتال مصاير شي يلا خلي نروح
هشام... منروح قبل ما افهم شبيج منار نور انتوا كولولي شبيها ريتال خوما سارة وامها ضوجوها
ريتال... عفت هشام وطلعت برى
صاح عليه اوكفي وين طالعة وحدج
اجة فتحلي باب السيارة وصعدت
طول الطريق وهو يستفسر ويسال شبيج وشصاير واني ساكتة
دخلنا للشقة رحت للغرفة غيرت ملابسي وغسلت وجهي وجيت للفراش تمددت وهشام صافن عليه
هشام... ريتال ترى صبري بده ينفذ ليش متحجين شبيج شنو طفل كدامج ومجاهلتني
ريتال... كتلك مابيه شي وهسه عوفني اريد انام انت مو جنت تريد تروح الصديقك يلا روح
هشام... اوكي براحتج هو اني صوجي مهتم واسألج
ريتال.. غطيت راسي جنت ابجي جوة البطانية للمغرب هو يحوم يم راسي
الجو حار واني جوة البطانية انسلكت سلك
هشام تمدد بصفي وشال البطانية من راسي اني منطيتة ظهري
حضني شال خصلات شعري بعدهن عن وجهي وركبتي
هشام.. هههههه هاي شصاير بيج باعي العرك البركبتج وكصتج
ريتال.. دارني عليه جنت مغمضة ما اريده يعرف بيه جنت ابجي
هشام... افتحي عيونج اعرف بيج جنتي تبجين
ريتال... برطمت ورجعت ابجي
هشام... هسه غير تحجين مو شليتي حالي
اوكي ظلي ساكتة اني راح اعرف بطريقتي
ريتال.. اخذ تلفونة ما اعرف على منو اتصل
انت على منو دتتصل؟
خرب غلس مجاوبني
هشام... هلا عصام اكول انت وين؟
اهاا اي زين يعني رجعتوا البيتكم
لعد انطيني منار اريد احجي وياها
ريتال.. لزمت ايده انت اشدتسوي
مباوع بوجهي فتح المايك
وحجى ويا منار
هشام.. منار بروح ابوج احجيلي الصراحة ريتال شبيها
منار.. هاا ليش هي محجتلك؟
هشام... لا متقبل تحجي واني متاكد صاير شي
منار.. هشام احسن شي خلي هي تحجيلك
هشام... منار لاتشلعين گلبي مثلها
منار... راح احجي بس امانة ماأريد عمتي تعرف اني كتلك
هشام... لاتخافين اكيد ما اجيب طاريج
ريتال.. منار حجت الهشام كلام امه من طلبت مني ما اكول اني مطلقة وكالتة هاي مو اول مرة هيجي اتكوللها
وحجتلة على موقف سارة وامها من كعدن يبجن وشلون امه فشلتني وطلعتني من الأستقبال
هشام تشكر منها ونهى الاتصال
هشام.. كل هذا وتكوليلي مصاير شي
ريتال.. انفجرت عليه اذا امك متحبني ومتتشرف بيه لان مطلقة ليشششش اخذتني اني من اول يوم عرفت بيها مو طايقتني بسسسس مالها حق تفشلني كدام جناينها. وانوب الخاطر مشاعر سارة طلعتني من الاستقبال عبالك دطلع طفلة
هشام...حبيبتي انتي جان لأزم من اول مرة طلبت منج متكولين انتي مطلقة
اتكوليلي حتى اخلي النقط على الحروف
ريتال... اذا احجي هسه يكولون هاي مصارلها ايام مزوجة وبدت تسوي مشاكل
هشام.. محد راح يكول شي لان انتي مغلطانة
ريتال كرامتج من كرامتي اليهينج ويجرحج كانما هاني اني
حبيبتي ترى الحياة الزوجية مو بس فراش واكل وشرب وتوفير طلبات
اساس العلاقة الزوجية هو الاحترام اني اذا اقبل احد يحجي عليج ويقلل من قيمتج راح الكل يباوعلج بعين صغيرة ومراح يبقالج احترام يم اي بشر
ريتال.. انسى الموضوع حظي واعرفة ابد ميتغير
هشام طلع يجيب عشى
اني كمت سبحت لان جسمي صار ماي من حرارة البطانية
كملت ورجعت للفراش
رجع هشام كالي كومي تعشي
جاوبتة ما اريد
هشام... انتي زعلانة من امي اني شكو كالبة خلقتج عليه شوكت تبطلين هاي السالفة كلما احد يضوجج تخلين قهرج بيه
ريتال.. على شنو ازعل منك
مو جوعانة نفسي مسدودة خوما بالكوة اكل
هشام... هاي وين جانتلي مو جنت عايش وحدي ومرتاح اني جبت الدوخة الراسي
ريتال... باوعت عليه بحقد رجعت غطيت راسي
هشام... ههههههه شلت الغطى منها يمعودة وربي اشاقة وين الكي احلى من هاي الدوخة
ريتال... والنبي اذا متوخر من يمي اروح انام بالغرفة الثانية
هشام... اريد اروح اشتكي عليج يم عمي اشوف يرضى بهاي حركاتج الطفوليه
ريتال.. اي عادي روح احد لازمك
هشام... اوووف انام احسنلي
اثنينا نمنا بدون عشى جنت نايمة بطارف السرير حتى لايجي يمي
كعدت ساعة خمسة ونص الصبح شبعانة نوم
اداريت على الصفحة الهشام نايم
بيها
نايم على ظهرة مخلي ايد على بطنة وايده الثانية على عينة
صفنت عليه والله خطية اني شبيه هيجي اتعامل ويا
اقتربت منه شلت ايدة الي على بطنة خليت راسي عليها وحضنته
حس بيه دار جسمة عليه وحضني صار وجهة مقابيل وجهي
فتح تك عين
هشام... عبالي حلمانة وحضنتيني طلعتي كاعدة سبحان مغير الاحول نمتي بحال وصبحتي بحال
ريتال... شنو تورطت لان حضنتك ترى اعوفك واكوم
نعسان وبالكوة فاتح عينك واكلتني لو مصحصح شسوي
هشام.. لو مصحصح جان اكلتج
ريتال... لازم جوعان لان نمت بدون عشى
هشام.. اي جوعان واريد اتريك
ريتال... ههههه كسرت خاطري هسه اروح اسويلك ريوك
هشام... وين رايحة اني ريوكي كدامي
ريتال... يااا ولايكعد راحة ابن ليلى
باسني بشايفي بادلتة البوسة ههههه اشو هذا تخبل
قررت انسى كولشي يتعلق بالماضي واهتم بهشام مثل ماهو مهتم بيه
طيبة هشام وتعاملة الحلو وياي خلاني اتعلق بي
راح للدوام كمت نظفت وسويت غدا
والظهر من رجع اول مادخل للشقة حضني بلفهة وشوق
كملنا غدا هشام كال اروح ينام مقفل من النعاس
اليوم بالدائرة لوبيدي اخلي راسي على المكتب وانام صديقي كالي لازم سهرتك جانت صباحية
مايدري الليل كلة المرة زعلانة واحاول اراضيها
ومن نمت شوية كعدتني الفجر
ريتال... احلف اني كعدتك اني بس دخلت بحضنك انت ردتها من الله وكعدت
هشام...هههههههه ياريت لو يومية تسويها
ريتال... لا عيني بعد توبة ولا اكررها
هشام... هههههه صدك طلع قرص حفلة العرس وجبتة باليل نتفرج عليه
ريتال... ماشي
من كعدنا العصر طلعنا اني ويا مرجعنا غير لليل تعشينا برا وجنت محتاجة اشياء للبيت اشتريناهن
هشام.. يلا تعالي نتفرج على العرس
ريتال... كعدنا بالاستقبال شغلة بالأبتوب وظلينا نتفرج
اكولك معقولة هذا عرسنا اشو اني ما اذكر منا شي
هشام... يمكن جنتي بعدج تحت تاثير الوكعة ههههههههه
ريتال... ضربتة على شنو دتضحك والله بسببك وكعت كايللهم غطوها وهنا مقصرن حتى وجهي غطنا
هشام.... هههههههه هنا شغلتين بهذا اليوم مينسن وكعتج ومن انطيتيني ظهرج وخليتيني انام جفي على وجهي
ريتال.... هششششام راح اعوفك واكوم
هشام... ههههههههههه سكتت خلي نكمل
ريتال... هشام كعد يعرفني على المعازيم الجانوا حاظرين
وعلى الموظفين الويا بالدائرة
ريتال... مممم اقاربك هوايه بنات عدهم شعجب معجبتك وحدة منهم
هشام...ما احب زواج الاقارب
اقل مشكلة بين الزوج وزوجتة العلاقات بين اهل البنية والولد راح تتوتر والمشاكل اذا كبرت حتى صلة الرحم تنقطع بينهم
ريتال... بس اذا قلبك دك الوحدة مراح تكدر تتحكم بمشاعرك
هشام... سبق وكتلج اني كضيت حياتي بين الكتب والدراسة والدوام لهذا كنت قليل التقي باقاربنا
ريتال... شفت بنية كولش حلوة سالتة هاي منو؟
كال موظفة وياي بالدائرة
بس تدري هوايه حلوة
هشام.. اي صح
ريتال... خزرتة اي مبين مركز على ملامحها وحافظ شكلها
هشام.... ههههه هو منو كال حلوة اني لو انتي
ريتال... اي بس انت اكدت على كلامي وكلت اي صح
هشام... قبل لاتگلبين خلقتج وطلعيلج مشكلة من جوة الكاع
خلى اكولج هاي مزووووجة وعدها اطفال والبنية جدآ محترمة
ريتال... الحفلة جانت بس ناقصتها سارة وامها وتصير تووب
هشام... انوووووب سارة
اني شورطني جبت القرص وكعدت اتفرج وياج
ريتال... شبيك ضجت من سمعت باسم الملكة سارة
هشام... ههههه الله يشفيج حبيبتي
ريتال... اي مو مخبلة حتى الله يشفيني
بعيني شفتها شلون تشهك وتبجي عليك
امها اتكول شباب الجامعة ذابحين روحهم عليها يومية واحد جاي يطلبها وهي ترفض
وامك اتجاوبها اي حقهم وين يلكون هيجي جمال ونزاكة
حسيتهم ديوصفون لميس التركية مو سارة العوبة
لا والقهر كعدت تسالني وهي تتنعوص انتي اشكد عمرج
ومن جاوبتها اتكولي هاي شنو انتي كبيرة
مو هازة كاروكها وما ادري
هشام.... ههههههههههه زين سؤال ليش مرزلتيها وبردتي گلبج احسن مكاعدة تحركين بدمج
ريتال... اني مو همجية حتى انزل المستواها واتعارك وياها
وثاني شي اذا ابقى كاتمة بگلبي اطك واموت قبل جنت من اضوج احجي الرهف هسه بعد ما اكدر
ماكو احد غيرك احجيلة لازم تتحملني
هشام... ليش متكدرين تحجين الرهف؟
ريتال... لا صعب بعد اكدر احجي عن حياتي الخاصة الها
هشام... هاي خطوة حلوة معتبرتني اقرب شخص الج و تحجيلي البگلبج
ريتال... ههههه اذا ليل ونهار مكابلتك لازم اعتبرك اقرب واحد الي
حسيت هشام يريد يكولي شي بس متردد
اكولك اكو بحلكك حجاية ليش متكولها
هشام.. هههههههه اليوم جاي انصدم بيج طلعتي حافظتني
ريتال.. يلا احجي
هشام حك رأسة وكال
حياتي باجر معزومين يم اهلي تجين وياي
ريتال.. ابتسمت طبعاً اجي ميحتاج تسالني شوف هشام اني صح انغثيت من امك بس مزعلانة منها
هشام... فدوة الهذا الگلب الطيب
ثاني يوم العصر رحنالهم
دخلنا سلمنا تفاجئت بأم هشام استقبلتني احضان وبوس والوجه يضحك
عاا هاي شبيها شنو هذا التغيير المفاجئ
ميادة وتبارك جانن موجوداك وبعدها اجوي عصام ومنار صارت خوش لمة
ساعدت البنات بتحظير العشى كملنا وصبينا كعدنا كلنا سوى
ام هشام جانت تسوالف وياي وتشاقة ولا عبالك هاي نفسها الفشلتني هذاك اليوم
كملنا عشى دنشرب شاي
عصام... هشام نريد نروح سفرة الدوكان تجي انت وريتال ويانة
هشام... السفرة كم يوم
عصام... يومين وبالثالث نرجع
هشام... لا صعبة ما اكدر اخذ اجازة ثلاث ايام مينطوني لاتنسى قبلها جنت ماخذ اجازة للعرس
عصام... نروح الخميس ونرجع السبت يعني اخذ بس على الخميس واذا منطوك
داوم نص دوام واطلع
هشام... اذا هيج عادي شنو رايج حبيبتي
ريتال... ما اعرف ليش اخجل من يكولي حبيبتي كدامهم خصوصا هالمرة حتى ازواج خواتة كاعدين
جاوبتة بكيفك
هشام.. اوكي ان شاء الله نجي بس منو بعد راح يجي
عصام... محمد وتبارك ومازن ونور
هشام... والبقية
حسام... الخميس معزوم العرس صديقي ما اكدر ما احظره كلت الايات تروح وياكم متقبل
أيات.. لا عيني اجي وياك للعرس رجلي على رجلك عرس مختلط وبقاعة وتريدني اعوفك وحدك
حسام... هههههه استلموا شوفوا عقلها
تبارك... ميادة وانتي ليش متجين
ميادة... لا ياسفرة اريد اشبع نوم يومية من الفجر اكعد علمود الدوام واريد اسوي حملات تنظيف على البيت
عصام... وابوية وامي هم يكولون مالنا واهس للسفر
نور... رتولة الله عليج جيبي رؤى وياج
منار... صدوك ريتال كولي الاهلج اذا يحبون يجون ويانة
ريتال... اسالهم واشوف
قبل لانرجع للبيت
ام هشام صاحتنا اني وهشام الغرفتها
ام هشام... تعالي ريتال اريد احجي وياج كدام هشام واوضحلج بعض الأمور.
شوفي بنتي اني طول عمري صريحة والبگلبي على لساني ما اعرف اجامل او اتصنع
لهذا راح اشرحلج سبب تصرفاتي وياج
بكل صدق وامانة اني مجنت راضية على هاي الزواجة وهشام يعرف بهذا الشي
هشام... يوم شنو لزوم هذا الكلام
ام هشام... رجاءا خلوني اكمل كلامي بدون متقاطعوني
هسه اكيد بگلبج تكولين ليش جنتي رافضتني وانتي اصلاً متعرفيني وراح اتكولين يمكن لان مطلقة
واني راح اكولج الطلاق مو شي عيب ولا حرام وكلنا معرضين لهذا الشي لان كلشي قسمة والمرأة المطلقة حالها حال اي بنية من حقها بفرصة ثانية حتى تكمل حياتها
اني الكان مخوفني هو سبب الطلاق
هوايه افكار اجت براسي
يمكن تكون وكحة يمكن لسان يجوز مأذية الولد واهلة يمكن ميصير عدها اطفال وهواية افكار ثانية
ترى اني حالي حال اي ام اريد القسمة الزينة الأبني
ومن اجينا نخطبج وشفتج زاد خوفي اكثر
بنية حلوة ومثقفة صاحبة شهادة من عائلة محترمة شنو الي يخلي طليقها يفرط بيها بهاي السهولة
هشام... نبع الحنان مدتلاحظين نسيتي وجودي وفتي زايد ترى هسه اني زوجها مو صنم كاعد كدامج
ام هشام.. موكلت لاتقاطعني اعرف كلامي يغث بس لازم احجي كل البگلبي
ريتال... اني ساكتة ومركزة وياها اريد اشوفها لوين تريد توصل
ام هشام... من رجعنا للبيت طلبت من ابو حسام يسال عن سبب الطلاق
لكن رفض كال احنا دناخذ من بيت ابو يزن الي الناس كلها تحلف براسة ومتاكدة بناتة متطلع منهن العيبة
ومسالة طلاقها شي خاص مو من حق اي بشر يحجي بي
وحتى اريح راسج ابو يزن كال طلاقها بسبب مشاكل بينها وبين طليقها لان ماكو اي توافق بينهم ومن يتعصب يضربها
واذا تذكرين اني قبل الحنة بكم يوم سالتج شعجب مصار عندج طفل منه
كتيلي صار بس وكعت وسقطت
من سمعت جوابج شوية ارتاحيت من هاي
الناحية بس بقت المخاوف الثانية
هشام... يوم انتي مكعدتني اهنا حتى تحركين دمي لو تغثيني كافي رحمه الاهلج مو روحي طلعت
ام هشام... هههههه شوفوا الغيرة
بس لازم انهي كلامي للأخير
تم زواجج انتي وابني ومن طلبت منج متكولين انتي مطلقة كدام صديقاتي
صدكيني مجان قصدي اغثج او استعار منج
بس اني اعرف صديقاتي شنو تفكيرهن خفت يحرجوج بالأسئلة وبنفس الوقت اعرف بيهن وين ما راح يكعدن راح يحجن واول وحدة يحجن يمها ام سارة وهذيج ادري بيها بس تجي راح تجرحج بالكلام
ومن طلعتج من الأستقبال مراعات المشاعرج مو مشاعرها صعبة بعدج عروس تشوفين وحدة وهي تبجي على زوجج وترى هي الذبت روحها بحضني مو اني حضنتها
ريتال الله يشهد هذا كان قصدي وابد مفكرت أستعار منج
اني عندي بنات يمكن الصار بيج لاسامح الله يصير بوحدة منهن الله يمهل ولا يهمل
ريتال... حبيت صراحتها ابتسمتلها
عادي خالة انتي مثل امي واني مضايجة ولا زعلانة منج الصار نسيتة
ام هشام... كوليلي عمة لان اعرف بيج اشكد تحبين عماتج
ريتال.. ههه ماشي عمة
ام هشام... ريتال اريد دوم اشوف هاي السعادة على وجه ابني
ومو لان ابني وامدح بي بس والله هشام ماكو منه
ريتال... هشام زوجي وابو بيتي الله يقدرني واسعده
ام هشام... ههههههه شوفي شلون ضايج وگالب وجهة اويلي عليك ابني طلعت غركان
ريتال... هههههه باوعت عليه وجهة مايكصة السيف من العصبيه......
يتبع
مساء العسل حبايبي
مشاقتلكم كووومات
حبايبي الأشتراك خلصان وميسوى نشترك وهو النت ديجي كم ساعة وينقطع
هسه اشتركت على الخط حتى انشرلكم البارت
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!