_ فارسي العاشق _
( بقلم بسمة البياتي)
_البارت السادس _
حاولت انسى موضوع ملاك وحازم ورجعت ركزت على القرأية لان مبقة شي للأمتحانات
حازم من يوم الرفضتة الحمدلله اختفى
والوضع جان شبه هدوء
اليوم كاعدين نتعشى اجة اتصال البابا من زوجة جدو وبلغتة جدو متخربط
بابا عاف العشى وعلى السريع بدل وطلع
ساعة وحدة باليل يلا رجعوا من المستشفى بابا جاب جدو البيتنا واصر عليه لازم يبقة يمنا
خطية جدو جان الضغط والسكر مرتفعات عنده
اني و رؤى اول مشفنا ركضنا عليه لان هواية نحبه
جنا محظريلة فراش اخذنا لفراشة اني غطيتة و رؤى تعدلة المخدة كعدنا وحدة يم راسة والثانية يم رجلة
رؤى... حبيبي جدو سلامتك ولو اني زعلانة منك
جدو... وليش حبيية جدها زعلانة
رؤى.. انت من ازوجت نسيتنا وصرت متجي علينا
جدو... ههههههه معاش الينساكم بس لازم اني أزعل مو انتوا هو منو لازم يجي على منو انتوا لازم تجون وتسالون عليه
اني اذا اجي ابوج وامج عدهم دوام وانتوا مدارس من تروحون خوما ابقة وحدي
ريتال... فدوة اروحلك والنبي بس اخلص امتحانات كل اسبوع تلكيني يمكم
جدو... ياروح جدج تعالي ابوسج انتي حنينة مثل بيبتج الله يرحمها
ريتال.. الله يرحمها شفايتلي لو مثلها
جدو... انتي نسختها نفس اطباعها وهدوئها حتى بالشكل انتي وداليا ورثتوا لون عيونها
ريتال... جدو جان يحجي وعيونه تلمع ومدمعة بعده لهسه يحبها
رؤى.. ياااااا هاي شنو جدو حتى انت صاير تفرق وتحب ريتال اكثر مني
جدو... هههههه انتي وياها احبكم حتى اكثر من ابوكم
ماما... يلا بنات عوفوا جدكم يرتاح وينام خطية تعبان
ثاني يوم بيتنا انخبص عماتي كلهن اجني يطمئنن على جدو
واني التهيت اساعدهم بالطبخ الشهادة لله عماتي من يجونا ابد ميكعدن يساعدونة بكولشي
داليا... ريتال عوفي البيدج وروحي ادرسي معليج بشي
ريتال.. والله يا دلولة ما اكدر لو حتى اروح اقرأ تبقة اذني يمكم ومراح اركز على شي
رؤى... ههههههه خرب وتكول عليه فضوليه
عمة غيداء... رتو بس تخلصين امتحانات راح اتفق ويا اهلج وخواتي ونروح سفرة للشمال حتى نفسيتج شوية ترتاح سودة عليه شوفي شلون ذبلانة
ريتال... يمه فدوة اروح للتفكر بيه
رؤى.. طبعاً هاي الايام جاي الاحظ كمية تفرقة بيني وبين ريتال مو طبيعية
اشو اني محد يعبرني ويخاف على نفسيتي ترى اني هم وزاررررررري
غيداء... اجيت لزمت رؤى من اذنها ولج هاي منو اليفرق
رؤى... هاي شبيج عمتو اني قصدي عمة داليا تفرق بيني وبين ريتال عوفي اذني راح انحول
داليا... عزااا بعينج هاي عليه بسيطة رؤى اني الج
ريتال... من ننجمع كلنا سوى نكضيها شقة وضحك عماتي سبورت ومثقفات كلهن خريجات طبيعتهم حلوة والكعدة وياهن متنمل
اني والبنات مدينا السفرة بالكاع لان ميز الطعام ميكفي وصرنا ننقل بالاكل جنا طابخين برياني وتشريب لحم ودجاج مشوي وطرشي و مقبلات ولبن وعصائر وخير من الله
من كملنا غدة خطية البنات هنا غسلن المواعين ونظفن المطبخ
عمتي الكبيرة سوسن عدها ثلاث بنات واولاد اثنين ابنها الكبير مزوج وبنتها نغم هم مزوجة
والباقي يدرسون
عمة هدى عدها بنية وحدة واولاد اثنين
البنية تبارك مزوجة والاولاد بعدهم طلاب
عمة غيداء عدها ثلاث بنات وحدة اصغر مني بسنة والباقيات وحدة بعمر رؤى والثالثة صغيرة
داليا عدها ولد وبنية
كاعدين نشرب شاي اجة علي ابن عمة هدى عمره 12 سنة
علي... خالو رافد جنت رايح اشتري من المحل القريب من البيت من رجعت اكو ولد موكف سيارتة مقابيل بيتكم من شافني سالني كال اليوم شعدهم بيت ابو يزن ليش بيتهم هوسة وسيارات هواية يم الباب
كتلة جدو مريض واجينا عليه
بابا اترخص وطلع برة
اني باوعت على ماما وعمة داليا وجهي صار اصفر عرفت هذا حازم
رجع بابا كعد يم ازواج عماتي بس شكلة جان ضايج
العصر راحوا عماتي بس بقة جدو وزوجتة وعمة داليا
ريتال... عمة هذا الولد اكيد حازم شلون ورطة اني مو رفضتة ليش ميعوفني بحالي
داليا...لاتسبقين الاحداث بعدين اسال رافد يجوز مو هو
اجت ماما كعدت يمنا
سجى.. سالت رافد
يكول من طلعت للباب شفت حازم وهو الحقير من شافني مشغل سيارتة ومنهزم
داليا...ورافد شراح يسوي لازم يوكفة عد حده ترى هذا مصخها
سجى... خابر صديقة نقيب بالشرطة كالة اكو واحد مكابل بيتي وديضايق عائلتي
محمد كايلة بس اتشوفة يجي بلغي اطلع عليه دورية واجي اخذة
ريتال... رجع حازم اختفى بابا انطة خبر العلاء واخوانة
والاولاد ابو رائد اي واحد بيهم يشوف حازم يجي يكوللنة
بدت امتحاناتي جنت شايلة هم شلون راح اروح وارجع وحدي لان ماما طلعت المراقبة مالتها بغير مدرسة واني امتحاني بنفس مدرستي
بس الحمدلله لكيت اهلي لازميلي خط يوديني ويرجعني الحد متخلص الامتحانات
كملت امتحانين
اليوم رجعت تعبانة ونعسانة لان من الفجر اكعد
تغديت ورحت نمت
رؤى... رتو رتووووو
ريتال... فتحت عيني هياتني كعدت
عبالي كعدتني حتى اقرأ
رؤى.. ولج سمعي الاخبار
ريتال... جنت بالكوة فاتحة عيني لان نعسانه
شنو يا اخبار
رؤى... اجتي الشرطة اخذت حازم
ريتال... بس كالت حازم وشرطة كل النوم طار من عيني عزااا شنووو شوكت شصاررر
رؤى... على كيفج لاتنجلطين شبيج وكفتي كعدي واني احجيلج
ابو المحل اليمنا شايف حازم جاي واكف كدام بيتنا هو و ولد من المنطقة
بابا جان موصي بس يشوفة يتصل عليه وهذا من شافة اتصل على بابا
وبابا بسرعة اتصل على صديقة واقل من نص ساعة اجوي الشرطة اخذوا هو وصديقة
ريتال.. ما أعرف افرح لو اخاف ممرتاحة ابد
رجع بابا للبيت
بابا.. اتصلت على محمد طلبت منه يطلع الولد الجان ويا حازم لان ابو اجة للاسواق يتوسل بيه
ماما.. اي خطية هو ماله اي ذنب ليش يتعاقب على شي ممسوي
بابا... لا خلي يولي هذا هم عار مثل حازم ينقلة اخبار اني الخاطر ابو خليتهم يطلعوا
ريتال.. بابا اني خايفة
بابا.. من شنو خايفة بنتي
ريتال... اخاف من يطلع يسويلي مشاكل
بابا... لاتخافين اني هذا البيت بعتة
ولكيت بيت بغير منطقة راح اشتري بس تخلصين امتحانات ننتقل
ريتال.. حازم بقة يومين بالسجن بس للاسف اهلة واسطتهم قوية كدروا يطلعوا
باقيلي امتحانين واخلص اليوم رحت امتحن بس والله من كثر المشاكل والقلق والخوف حتى جوابي ما ادري شلونه
كملت الامتحان سلمت الورقة طلعت من القاعة للساحة بقيت واكفة ويا صديقاتي نراجع الاجوبة الحد ميجي ابو الخط لان اتصلت عليه
رمش ابو الخط سلمت على صديقاتي وطلعت
وصلت للباب وجان اشوف حازم واكف انتهيت من الخوف و الرعب
رجلي صارت تنضرب وحدة بالثانية بس اريد اوصل للسيارة
صعدت بسرعة واني ارجف
السايق..بنتي شبيج انتي مريضة
ريتال.. هااا لا عمو مبيه شي بس عفية وصلني بسرعة
رجعت للبيت رؤى صارت كدامي
لج رؤى لحكيني حازم جان يم المدرسة
رؤى... كذب دتتشاقيييين عزاااااا بعينه هذا شنو من بشر ولا صارلة درس
من اجوي اهلي كتلهم
اهلي خطية حايرين مثلي
العصر كاعدين كلنا عمة داليا وعمو مصطفى هم يمنا
اجه يزن بركض بابا
هذا الولد الاخذوا الشرطة هم اجة وعلاء جاي يتعارك ويا
بابا وعمو مصطفى طلعوا يركضون
اني بقيت كاعدة بمكاني اهلي كلهم طلعوا يباوعون واني جامدة ما اكدر اتحرك
جنت اسمع صوت الصياح برة
كمت دخلت الغرفتي وبقيت ابجي كل الديصير بسببي
ربع ساعه واجوي عمة و رؤى يمي
داليا... ليش تبجين ماكو شي راح ولى الله لايرده
ريتال... عمة اهلي تعبوا وانفضحوا بسببي طول عمرهم محد سمعلهم صوت وهسه صاروا حديث المنطقة
داليا... وانتي شعلييييج شنو بسببج هو واحد ارعن وطايح حظ
ريتال... شصار بره
داليا... علاء من شايفة رايح مرزلة وهذا الحقير متهجم على عليه وصايرين يضاربون
ولج لو تشوفين مصطفى فدوة العينة جاكي شان مو مثلة شلون دمه حازم يمه من شفتة يضربة مي بارد نزل على گلبي
رؤى..هههههههه خرب فرحانة رجلها ديتعارك
داليا... اي والله فرحت ولكم هاي اول مرة اشوفة يضرب واحد
اي خلي اكملج
وشباب الجيران هم اجوي ضربوا سوو دوشك مال كتل بالكوة الزلم الاكبار خلصوا من ايدهم
والجبان اخذ سيارتة وانهزم
رؤى... يستاهل ديسوي تحدي جاي يشوفنا عود هو ظهرة قوي ومحد يكدر يسجنة
ريتال قراية بعد مكدرت اقرأ
باليل قبل لايروحون بيت عمة داليا
مصطفى.. رتو باجر لاتروحين ويا الخط اني اجي اوصلج وراح ابقة انتظرج الحد متخلصين وارجعج للبيت
ريتال... فدوة العينك عمو والله حتى ويا الخط صرت اخاف اروح
بقيت الليل كله اريد اقرأ ما اكدر اخير شي سديت الكتاب ونمت كلت اكعد الفجر اراجع
كعدت ساعة اربعة كمت غسلت وصحصحت جيت فتحت الكتاب وهم نفس الحالة ما اكدر اركز شكو فكرة مصخمة تجي براسي
ساعة سبعة ونص اجة عمو مصطفى وصلني للمدرسة
دخلت للامتحان واني مسطورة والنبي ولا اعرف شنو جاوبت لو شكتبت
طلعت ضايجة حتى مسلمت على صديقاتي صعدت بالسيارة وبقيت ساكته
مصطفى... شلون جاوبتي
ريتال.. ما أعرف
مصطفى... شنو متعرفين
ريتال... والله ما اعرف شجاوبت عقلي مخربط اشكد جنت ضابطة المادة بس اليوم طارن كل المعلومات من راسي
مصطفى.. بقهر الله يساعدج لاتنقهرين الله ميضيع تعبج ان شاء الله
رجعت للبيت كتلهم بس اريد انام جنت احس كولشي بيه تعبان جسمي عقلي نفسيتي لوبيدي انام نومة اهل الكهف
بابا اشترى البيت الجديد
عماتي اجوي هما وازواجهن ساعدونة بنقل الاثاث وترتيب البيت الجديد
جيرانة جانوا مصدومين لان محد يعرف راح انشيل تفاجئوا من شافوا سيارة نقل الاثاث كدام بابنا
اهلي حتى مدلوهم على العنوان الجديد
انتقلنا للبيت الجديد وأخيراً راح اخلص من حازم
بس بقة خوفي الوحيد هو النتيجة
ملابسي مكومات بالكاع كاعدات نسفطهن اني و رؤى
ماما... بنات كوموا بسرعة ساعدوني نسوي عشى ابوية هو وحسين بالطريق راح يوصلون
رؤى. عاا جدو حيجي شعجب
ماما... جانوا باربيل يم دكتور وقبل لايرجعون للحله راح يجون اهنا
ريتال. كمنا ويا ماما للمطبخ
ماما شراح نسوي عشى
ماما.. ابوكم راح يجيب اكل من برة سمك مشوي وكباب واحنا نسوي تمن احمر ومقبلات
رؤى.. ههههه ماما شبيج مخبوصة روحي كعدي احنا نحظر كولشي
ماما... زيارات ابوية البيتي تنعد على الاصابع حقي انخبص
ريتال.. اكيد مشتاقلج مكدر يكون قريب منج وميجي يشوفج
ماما.. فدوة العمره اني هم گلبي طاك عليه يلا كملوا بين ميجي ابوكم
ريتال.. طبخت التمن و رؤى مثل كل مرة عليها المقبلات
اجة بابا جاب الاكل خليتة بالفرن حتى لايبرد
وصل جدي وخالي
عمو مصطفى جان وياهم بابا اتصل عليه راح جابهم لان ميندلون بيتنا
تفاجئت من شفت غيث وياهم
سلمنا عليهم ودخلانهم جوة يرتاحون
غيث بعده نفس نظراتة الي
رادوا حمام حتى يسبحون لان الجو برة حار
من كملوا صبينا العشى اني مكعدت وياهم
جدي... بنيتي ليش متجين تاكلين ويانة
ريتال... بالعافية عليكم
بس اني صارلي فترة تاركة العشى اكل شي خفيف عصير وكيك لو فواكه اريد ابقة رشيقة
جدو... ههههه بوية شلون يصير بيج حيل اذا متاكلين وتتقوين لاتخافين ماتسمنين انتي عودج ترف
ريتال.. هاي الخاطرك راح اجي اكل رحت كعدت بصفة
خالو حسين... اخذتي النتيجة لو بعد
ريتال... من جاب طاري النتيجة انسدت نفسي
لا خالو بعد
خالو حسين... خوما هم بعد تريدين تكملين
بابا... طبعاً تكمل لعد هي ليش درست وتعبت
حسين... اخذت شهادة سادس كافي هي طلابة البنية مكانها البيت تجي قسمتها وتزوج
بابا... لا بالعكس البنية شهادتها سلاحها تتخرج وتتوظف حالها حال الرجال
حسين... يعني عادي عندك بنتك تروح كلية بين الشباب والله اني حتى سجى مجنت اقبل تكمل بس لان هي على ذمتك ابوية كالي لاتدخل
جدو.. حسين عوف البنية براحتها اهلها اعرف بمصلحتها انت عليك بناتك وبس
ريتال... اسمعهم واني ساكتة جدو من حجة الكل سكتوا
كملوا عشى شلنة المواعين رؤى وكفت على السنك تغسلهم واني حظرت الشاي صبيتا واخذتة قدمتة الهم
رجعت حظرت فواكه وزعتها بالمواعين وهم رحت قدمتلهم
جدو وخالي جانوا تعبانين مطولوا بالسهر فرشنالهم ناموا بس بقة غيث يحوص ما ادري شبي
اهلي هم راحوا ناموا
اني ورؤى بعدنا بالمطبخ اجة غيث بحجة يشرب مي
اني جنت كاعدة اجة سحب كرسي من مال ميز الطعام وكعد مقابيلي
غيث.. احم اكول ريتال يعني انتي اذا طلعتي معدل راح ادومين كلية
ريتال... اي اكيد بس كون اطلع معدل عالي
غيث... انتي شسوين بالكلية ترى شهادة السادس كلش كافي
رؤى... هو شنو الكافي وين راح تكدر تتعين بيها
غيث... وشسوي بالتعيين مثل مكال ابوية البنية مكانها البيت ومن تزوج زوجها يكون مسؤول عليها ويوفرلها كل احتياجاتها
رؤى... لا غلطان المرة حالها حال الرجل حلوة اذا جانت صاحبة شهادة وتساعد زوجها
مثل ماما وبابا
غيث... هذا الكلام يمكم بس يمنا الرجال هو المسؤول عن زوجتة وهو اليصرف عليها مو يعوفها تفتر بالدوائر
رؤى... انت كلتها يمكم مو يمنا وهي ريتال شراح يجيبها عدكم بس ارجع واكولك انت غلطان هواية نساء بمحافظتكم خريجات وموظفات هذا التفكير بس عد عشيرتنا
غيث... يلا بنات تصبحون على خير
... وانت من اهل الخير
رؤى... ههههههه انهزم مكدر يجاوبني
ريتال... بدون زحمة انتي اشكد عمرج جاي انصدم بيج
رؤى... لعد شعبالج اني رؤى رافد بكل فخر
ريتال... ونعم منج ومن رافد يا سنيورة رؤى
رؤى...انتي شبيج خجلانة ومتعرفين اجاوبينه
ريتال... هههههه اخجل من احجي ويا وارتبك
رؤى... عززززززززا ريتال
ريتال... فزيت وكمزت شكوووو
رؤى... ولج اخاف تحبي
ريتال...حبتج حية وكعتي گلبي عبالي شوف شبيج
ريتال ارتبكت من كلام رؤى حبيت انهي الموضوع
لاشحب منه بس انتي تعرفين بيه خجولة
وهسه كافي لغوة زايدة امشي خلي انام
ثاني يوم جدي وخالي سافروا
واني جنت كلما يقترب موعد اعلان النتائج اموت من الخوف
اليوم راح ينزلوهن على النت
بابا مكابل اللابتوب وكاعد ينتظر
بابا... اي وأخيراً نزلوهن
ريتال... حسيت گلبي راد يوكف
بابا صار يبحث بالاسماء طلع نتيجتي تغيرت ملامح بابا
ماما... بشر شنو النتيجة واشكد المعدل
بابا.. نزع نظارتة وباوع عليه مبروك بنتي ناجحة ومعدلج 93
ريتال... هو كال هيجي واني انفجرت بالبجي
اجت ماما حضنتني
ماما... بنتي كولي الحمدلله اكو غيرج يتمنون الخمسين انتي حايبة 93مو قليل ليش تبجين
ريتال.. اشهك واحجي بس مو هذا الاتمنى تعبت هاي السنوات كلها وجنت متفوقة وهسه طلعت هيجي معدل
حتى صيدلة ميدخلني
عفتهم ورحت الغرفتي
بهذا اليوم الكل جان ضايج علمودي
شبعت بجي
عمة داليا من عرفت بمعدلي اجتي يمي
داليا.. رتو والله معدلج زين ليش هاي الدموع دشوفي اهلج شلون مقهورين عليج
ريتال... عمة ليش هيجي ديصير بيه اول شي سمعتي راحت ثاني شي تركنة بيتنا وهسة حلمي هم ضاع
داليا... حبيبتي والله لو غيرج وحدة على هاي الهبطات والمشاكل جان رسبتي
انتي بطلة كدرتي اجيبين هيجي معدل
ريتال.. بالكوة كدرت عمة تسكتني بس الغصة والحركة بعدها بصدري
باليل اجه بابا عليه
بابا... ماكو شي بهاي الدنيا يستاهل هاي دموعج انتي مو تريدين صيدلة اني راح ادخلج صيدلة ماكو شي يغلى عليج
ريتال.. حضنت بابا بقهر
فكرت بيني وبين نفسي اعرف كلية الصيدلة اقساطها عاليه هو شنو ذنبة هلكد يدفع خطية يطلع من الفجر للشركة حتى ميشبع نوم ويرجع الظهر هلكان من التعب علمود الراتب وحتى بيتنا باعة بخسارة
مسحت دموعي لا بابا حبيبي ما اريد اني راح ادخل اي كلية تطلعلي بهذا معدلي
بابا... ليش بنتي اذا على الفلوس معليج ولاتفكرين بالموضوع
ريتال.. لا بس اني اريد اروح حكومي مو اهلي
بابا.. زين اني عندي اقتراح
ريتال.. اي وشنو هو
بابا... قدمي على هندسة النفط واني وعد من تتخرجين لو اعرف بفلوس اخليج تتعينين وياي بالشركة
ريتال... مممم خوش فكرة اوك راح اقدم
والله كريم بس اخاف هم ميقبلوني لان معدلات هندسة النفط عاليه
بابا.. لاتخافين ان شاء الله يقبلوج
عماتي خطية اجوي علينا مسويلي كيكة وجايبلي هداية
فديتهن فعلآ طلعوني من جو الكابة الاني بي وحتى جدو اجة باركلي وجابلي سوار ذهب
بابا جابلي هدية قلادة بيها اسمي
وماما جابتلي خلخال
ماما وعماتي اتفقوا ناجر سيارة كبيرة ونروح الاربيل قبل لا تخلص العطلة
لكن قبل سفرتنا باربع ايام اتصل خالو حسين على ماما
اجت ماما كعدت يمنا جانت مرتبكة تريد تحجي شي بس مترددة
رؤى... ماما خالو شراد منج بقيتي كومه تحجين ويا
ماما... اي مو اتصل علمود يعزمنة
ريتال.. على شنو يعزمنة
ماما باوعت عليه وحجت بتردد
ماما... على عرس غيث هو وزهرة بنت ميعاد
ريتال...فتحت عيني ممصدكة بقت كلمة غيث يزوج ترن باذني.......
يتبع....
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!