رواية فارسي العاشق الفصل السابع 7 - بقلم بسمة البياتي

_  فارسي العاشق _
( بقلم بسمة البياتي)
_البارت السابع  _

بقيت صافنة على ماما منطيت اي ردت فعل اصلاً من كثر الصدمات تعودت

بس ماما ليش مرتبكة وتباوع عليه بقهر معقولة جانت حاسه بمشاعري اتجاه غيث

صحيت على صوت رؤى وهي تناقش ماما ومتعصبة

رؤى... الله عليج ماما لاتكولين راح انعوف سفرة اربيل ونروح للحلة

ماما.. انتي وريتال روحوا للسفرة معليكم بيه

ريتال.. ماما جانت تحجي ومركزة عليه

ابتسمت الها وحجيت بثقة
لا ماما شلون يصير اذا ما اجينا وياج راح يزعلون ويبقون يحجون عليج

عيب علينا اذا  منروح

رؤى... لا ريتال دخيل ربج لاتكوليها
على اساس هما يحبونا شنو نسيتي شيسوون بينا

ماما... رؤى احترمي وجودي عيب تحجين على اهلي بهاي الطريقة

رؤى... دنكت راسي استحيت من ماما اسفة مو قصدي

ريتال... خلي رؤى تروح ويا عماتي واني اجي وياج

ماما... متاكدة بنتي تريدين تجين وياي

ريتال.. اي طبعاً صارلنة هوايه محاظرين عرس خلي نفرح شوية

ماما... ان شاء الله عكب باجر نروح ولاتخافين بس يخلص العرس نرجع منطول

باجر اخدج للسوك تشترين ملابس للحفلة

رؤى.. اني هم اجي وياكم اريد ملابس للسفرة

ماما.. انتي سدي حلكج و ما اسمع صوتج باب الحوش ما اطلعج وياي

رؤى... همست اي اعرف مو اني بنت البطة السودة

ماما... شنو شكلتي

رؤى... مكلت شي داكول عادي اني عندي كومة ملابس جديدات بعدني ملابستهم ما آريد اكلفج

ثاني يوم ماما اخذتنا اني و رؤى للسوك

بقيت افتر على المحلات بس ماكو شي يعجبني

دخلت محل جان هواية فساتين عندة شفت فستان اسود يجنن مخصر على الجسم ومن جوا سمكي ربع ردن وعلى الخصر حزام ذهبي عجبني وماما هم عجبها
اشتريتة للحنة

واخذت فستان ثاني لونة كريمي طويل ورادنة هم طويلة لان اكيد راح البس حجاب بالعرس

رؤى هم اشترت ملابس للسفرة بناطير وتشيرتات

رجعنا للبيت هلكانين من التعب

العصر رؤى راحت البيت عمة داليا لان احنا من الفجر نطلع

حظرت ملابسي واغراضي

بالليل نمت بفراشي وغمضت عيني
بقيت افكر اني شنو هذا البرود الصاير عندي ليش منقهرت عليه
اني دموعي بسرعة تنزل  بس منزلت ولا دمعة من عرفت راح يزوج 
زين اذا شفتة ويا زهرة هم راح انقهر
اوووي على شنو مدوخة نفسي ربي يسعدهم خلي انام احسنلي

الفجر اجت ماما كعدتني كمت بكسل سبحت وبدلت

اهلي كعدوا يتريكون اني ما اكلت شي
بس اخذت وياي نساتل وشبس وعصير بالطريق اذا اجوع اكل

وصلنة الظهر للحلة رحنا البيت جدي جانت مبينة اجواء الفرح بالبيت

خوالي وخالاتي كلهم مجموعين
لان باجر الحنة  وعكب باجر العرس

اكذب اذا اكول ما انقهرت ونعصر گلبي بس بسرعة رجعت قويت نفسي
اني وغيث ماكو بينا علاقة ولا هو وعدني بشي لو جان رايدني مجان اخذ غيري

سلمنة على جدي وبيبي وخوالي وخالاتي واولادهم وبناتهم خرب تعبت هلكد ماسلمت

هلمرة بيبي حضنتني وشبعتني بوس هههههه ولو هي كل مره هيجي تستقبلني بالاحضان وبعدين تشبعني رزايل

الكل باركلي على نجاحي ماعدا خالو حسين ههه

الحمدلله مشفت غيث
ولاخالة ميعاد

صبوا الغدة تغدينة من خلصنا كلت البنات خالي اريد مكان انام بي

اخذوني الغرفة البنات نمت بيها يبووو بس شلون نومه كل شوية افز على صوت ضحكهن وسوالفهن

كعدت العصر بقيت اساعد البنات بالتحضيرات ما اريد يحجون عليه ويكولون ريتال جاية بس تتفرج متعرف تسوي شي

لليل يلا خلصنة

جنت بالمطبخ ويا البنات دخل غيث من شافني بسرعة نزل راسة

غيث.. شلونج ريتال

ريتال... الحمدلله تمام
الف مبروك ربي يتمملكم على خير

غيث.. بحسرة مشكورة بنت عمتي
وانتي هم مبروك النجاح

ريتال.. تسلم الله يباركلك

غيث عافنا ودخل
جنت مستغربة من نفسي منين اجتني هاي القوة معقولة گلبي مات من ورا الصدمات

ثاني يوم البيت انترس اقاربنة والله شفت ناس اقارب بحياتي مشايفتهم

جانوا ياهو اليشوفني يصلي على النبي ويكولون الماما هاي وين جنتي ضامتها علينا

جانت مرة خالي تجاوبهم ترى هاي راح تروح كلية لاتخلون عينكم عليها

ماما... ليش شبيها الكلية دتحسسيني عبالك الكلية وصمة عار

مرة خالي.. هههههه لا خية شبيج ضجتي قصدي هي تريد تكمل دراسة ما تريد تزوج

ماما... ترى محد جايب طاري الزواج ديسالون اسئلة عادية

الحنة بيت خالة ميعاد اني والبنات دخلنة نبدل من طلعت فستاني كل البنات نعجبوا بي

وهنا هم فساتينهن جانن حلوات بس مشلحات اني فستاني صح ضيق وربع ردن بس  مستور مو مثلهن

سرحت شعري ولو هو من كاعة سرح بقيتة مفتوح ولبست طوق كرستال ناعم اني شعري  مو كولش طويل يوصل النص ظهري

ما شاء الله بنات خالاتي وخوالي كل وحدها شعرها الجوة وركها

خليت مكياج خفيف بس كحل برز  لون عيوني ومسكارا  وحمرة برونزية

البنات ههههههه كل وحدة خلت كيلوا مكياج بوجها

جانون جايبين سيارة كبيرة صعدنا بيها. ورحنا البيت خالة ميعاد

من وصلنة بيتهم جان هوسة اهل زوج خالة ميعاد واقاربة والجيران

اني بس على الاعرفهم سلمت

جانت زهرة راجعة من الصالون
و كولش حلوة طالعة

بدت مراسيم الحفلة اني كعدت يم ماما متحركت من مكاني

البنات شبعوا ركص

هههههه هوايه نسوان اجوي يسالون عليه اذا مزوجة او لا
وتنطوها اذا تقدمنة عليها

ماما اتكوللهم لا هاي طالبة مننطيها اذا متتخرج

اجت خالة ميعاد كعدت يمنا

ميعاد... ههههه بعد شتريدين كل شوية تجي مرة تخطبج
خايبة شبيج دكولي هذا يوم بنت خالتي ملازم نطلع احلى منها حايرة شمسوية بنفسج

ريتال... انصدمت من كلامها هي سوت الموضوع بشقة

سجى... ليش هي شمسوية بنفسها لا رايحة صالون و لا لابسة قصير او مكشوف ومكياجها بسيط

خالة فاطمة... ميعاد شوفي بناتنا شلابسات وشمخليات جيتي على هاي المسكينة

ميعاد... شبيكم ههههههه جاي اشاقة فدوة العينها هي حلوة من كاعها

ريتال...متت قهر اباوع على ماما صارت نار من الاعصاب

بس هلمرة خالاتي دافعولي لان فعلاً اتعدت عليه وكلامها جان مثل السم

من رجعنا ماما من وصلت البيت جدي انفجرت بالكلام

ماما.. ترى ميصير ماكو جيه اجيت بيها اذا ما ميعاد سممتني وسممت بناتي بكلامها كل مره اكول اختي الكبيرة عيب ارد عليها بس كافي بعد ما اتحمل وصلت بيها الوقاحة كدام النسوان تهين بنتي

ريتال حظري نفسج وحظري يزن هسه نرجع

خالاتي يتوسلن بيها وماما قافلة

بيبي... استهدي بالرحمن لاتخربين عرس الولد

ماما... هو انتي مثل بنتج تهتمين بكل احفادج بس اني تكرهين بناتي وتفرقين بينهم
بس من اليوم انسوني وبعد مالي جية على هذا البيت

ريتال... واكفة ارجف وابجي وين ما اروح المشاكل تركض وراية راح اموووت من القهر

بيبي.. كامت تبجي ولج هاي تاليها ترفعين صوتج على امج وسويتني اكره بناتج

اني بس ردت العرس يعدي على خير واني احاسب ميعاد

اجة جدي وخوالي وبابا

جدي... شكو شصاير صوتكم واصل للشارع

سجى... رحت وكفت كدام ابوية اني وبناتي تعبنا ماكو جية النه اذا ما تطلع من خشمنة

جدي... بوية اهدي وفهميني شصاير

سجى... حجيت الابوية كلام ميعاد كدام الناس
سحبت ريتال من ايدها وكفتها كدامة وفتحت صايتها

هاك شوف ملابسها ومكياجها هي الوحيده لبسها مستور ومكياجها خفيف

وهاي خواتي كدامك اساليهن اذا حبن يحجن الحق

خالاتي كلهن كالن كلام سجى صح

جدي عيونة صارت براسة حضن ماما باسها واجة مسح دموعي وباسني

جدي... اني مو ابوج اذا ما اخذلج حقج وحق بنتج بس هسه الخاطري والخاطر ابن اخوج اتحملي الحد ميخلص العرس

ماما هزت راسها بالموافقة

انداريت شفت بابا ساكت بس عيونه نار وميكدر يحجي شي الخاطر جدي

رحت وكفت يمه  جرني الحضنه وهمس باذني

بابا...حقهم يغارون من هاي العيون الحلوة مسحي دموعج باباتي بعد ما اخليج تجين اهنا

بالليل هستوني اريد انام اتصلت عليه رؤى

رؤى... هلو رتوتة اخباركم اشتاقيتلكم

ريتال... هلو عمري الحمدلله انتوا اخباركم شلونها سفرتكم

رؤى... ولج تخبل بس حرامات مكانكم فارغ هاي عمة داليا والبنات يمي راح افتح مايك

داليا.. ولج والله ممتونسة بدونج

ريتال.. ياروحي تونسي ان شاء الله غير مرة نروح سوى

البنات سلموا عليه وبقينا نسوالف

رؤى... صدوك شخبار الحنه زهرة شلون جانت طالعة

ريتال... حلوة الحفلة وزهرة هم حلوة طالعة

داليا... رتو شبيج ليش احسج ضايجة؟

ريتال....هاا لا مبيه شي بس لان تعبانة ونعسانة

داليا... ريتال عليه هذا الكلام اكص ايدي اذا مصاير شي مضوجج

ريتال... ما اكدر هسه احجي من ارجع اسولفلكم همست البنات يمي بالغرفة

رؤى...واني شراح يصبرني امشي طلعي بالحديقة وسولفيلنة

ريتال.. يااااا اكيد تخبلتي وشيطلعني للحديقة بهل ليل اشكد فضولية

داليا... ماشي حبيبتي يلا نامي ورتاحي

ريتال... سديتة منهم وبالكوة نمت

ثاني يوم خوالي خلوا جادر برة لان مسوين غدة للمعازيم

جانوا جايبين طباخ يطبخ
الذبايح من الصبح ذابحيهن ومن غير كارتونات الدجاج
كومة ناس اجوي معارف جدي هواية من غير الاقارب

من خلصوا الغدا البنات بدلوا حتى يروحون البيت العروس ومناك  يروحون للمصور وشوية يفترون وبعدين يرجعون يكملون الحفلة بالبيت

ماما... ريتال اني وياج منروح نبقة ننتظرهم اهنا

ريتال.. اوك ماما

خالاتي وخوالي هوايه حاولوا ويا ماما بس هي رفضت جدي كاللهم عوفوها براحتها
بيبي بقت ويانة بالبيت

اني لبست فستاني الكريمي ورهمت ويا شال ماروني ومكياج مخليت ولا قطرة ما اريد خالة ميعاد هم ترجع تنتقدني

جانن اكو نسوان كاعدات يم بيبي عافتهن واجت كعدت يمي

بيبي...هاي  امج العوبة مفهمتكم اني ما احبج انتي واختج وافرق بينجن وبين باقي احفادي

ريتال... لا والنبي ماما ابد متحجي هيج

بيبي... اني صح احجي عليج وعلى رؤى ام السان بس والله احبكم
خايبات انتن حلوات واني اذا امدح وحدة بيجن راح تنحسدن
يمه ترى العين تمرض و تكتل لوتفتحين گبور نص بني ادم راح تلكيهم ميتين من العين 

الله يشهد عليه اشكد احبكم واشتاكلكم بس هذا طبعي ارزل واحجي على الكل

ريتال... بست ايد بيبي وكصتها
بيبي اني لو ازعل جان ماجيتكم بعد والله اشكد تحجين عليه صح انقهر بالبداية بس بعدين انسى

ماما من شافتنة اجت حضنت بيبي واثنينهن كامن يبجن
انقهرت عليهن واني هم على الواهس دموعي نزلت

اجتي الزفة وخالة ميعاد اجت تعتذر من ماما وعادت نفس الاسطوانة اني جنت اشاقة ومو قصدي 
ماما بقت زعلانة ومحجت وياها

خلص العرس والكل راح البيتة حتى خالاتي وخوالي

اني من شفت غيث و زهرة سوى ابد منقهرت وصرت متاكدة اني اكيد مجنت احبه

بابا... سجى تحظروا الفجر نطلع

جدي...ماكو طلعة ورا الغدا روحوا

بابا...لا والله ما نكدر، منلحك نوصل من وكت وخصوصاً ازدحامات الشوارع

جدي...لعد ورا الريوك وبعد لاتناقشني

بابا سكت مكدر يعترض
هاي اول مرة جدي هيجي يلح علينا  لان هو يعرف اهلي عدهم دوام لهذا السبب عايفنة براحتنا

الصبح كعدنا نتريك وجان تجي خالة ميعاد جايبة الريوك للعرسان

جدي... ميعاد اخذي ريوكج وطلعي، برة بعد مالج فوتة على هذا البيت

ميعاد... هاي شنو يابة معقولة جاي تطردني

جدي... اي معقولة يلا طلعي واذا بعدتجين اكسر رجلج

ميعاد... كامت تبجي هذا كله علمود سجى وبنتها موووو

جدي...لاجيبين اسمها على لسانج لا اكصة الج طول عمرج تغارين من خواتج كلت كبرت وزوجت وصار عدها احفاد اكيد عقلت بس ذيل الچلب مينعدل يظل اعوج

خالة ميعاد تبجي وتتوسل بس جدي قافل

هسه عرفت ليش جدي صمم لازم نبقة

رجعنا التكريت
ماكو احلى واريح من بيتنا
رؤى جانت بعدها بالسفرة ثاني يوم رجعوا

هي وعمة اول مشافوني بقوا يحققون وياي شصار اهناك حجيتلهم بقوا متعجبين

قدمت الانسيابية وخليت هندسة النفط اول شي وبقيت انتظر القبولات

ماما اليوم جانت مداومة من رجعت

ماما... ملاك مزوجة

ريتال...شنو هاي شوكت منو كالج

ماما... مدرسة وياي كالتلي اكو بنات من منطقتنا القديمة ياخذون دروس خصوصية يمها هما حاجيلها

مزوجة ابن عمها

ريتال... عزاااا هي جانت تموت من عمامها هاي شلون قبلت

ماما... يمكن ابوها جابرها لان عارف بسالفتها ولازميها هو واخوها مشبعيها كتل امها طالعة تستنجد بالجيران حتى يجون يخلصوها من ايدهم
وبعدها بفترة مزوجيها ويمكن حتى دوام بعد مداوم

ريتال... خطية والله انقهرت عليها

ماما... على شنو تنقهرين  هي سوت هيجي بنفسها

ريتال طلعت القبولات واسمي طلع بكلية هندسة النفط
صح هذا مجان حلمي بس الحمدلله على كل حال
بده الدوام اهلي لزمولي خط ويا كم طالبة من المنطقة بنفس الجامعة

جنت محترمة نفسي ملابسي طويلة ومحتشمة وحجابي كامل

تعرفت على كم بنية وياي بنفس قسمي صداقتنا عادية لان اني طول الوقت ادرس

هوايه جنت اشوف نظرات اعجاب من الطلاب واكو بيهم يدور حجة حتى بس يجي يحجي وياي جنت اجاوبهم بحترام وما انطي مجال الاي طالب

اكو بيهم جانوا يسموني المعقدة او المغرورة

اليوم داومت وبالريست طلعنة اني وصديقتي نشتري لفات من الكافتريا

واكفين دنشتري اخذنا طلبنة اندريت دارجع وجان اشوف حازم واكف....

يتبع...