رواية فارسي العاشق الفصل الرابع عشر 14 - بقلم بسمة البياتي

_  فارسي العاشق _
( بقلم بسمة البياتي)
_البارت الخامس عشر _

فارس.. المغرب نزلت جوة تلكتني امي

ام فارس.. هلا بالعريس هسه يلا نزلت شجاك يمه رديت مراهق اليوم لا صلاة ولا عبادة

فارس... انتي كلتيها اني عريس وهاي الامور عادية

ام فارس...العرس خلص انت خوما تبقة مكابلها وكاعد

فارس... سالمين يمه ترى البارحة زفتي واليوم الظهر كلو اني جوة شبيج من هسه شادة الحبل عليها

ام فارس.. وشعندي وياها حتى اشد الحبل  مو صايرلك يوم من اخذتها وصرت تحجي هيجي ويا امك الظاهر راح تفر راسك مثل ما فرت راس اخوك وهججتو

فارس.. غديت نار من جابت طاري الموضوع
صحت بصوت عالي ييييييييمه هاي الجاي تحجين عليها صارت حرمتي وعرضي
اليجيب طاري هذاك الموضوع
أگلب عاليها واطيها مفهووووووووم
عفتها وطلعت الحرارة صعدت الراسي

رحت للجامع علمود الصلاة الولد ظلو يداهروني ويصنفون واني مو بحالهم روحي مو طايقها

من خلصنة صلاة صاحني ابوي رحت كعدت يمو

الشيخ.. شبيك من اجيت لهسه مو على بعضك يول فارس خوما صاير شي بينك وبين حرمتك

فارس... لا يابة مو صاير شي اطمن

الشيخ... عجل شبيك

فارس... شيخ اترجاك احجي ويا امي اتفك ياخة مني ومن حرمتي ولاظل اتجيب طاري الموضوع القديم

الشيخ... هاي امك كلما تكبر جاي تخرف بس هينة دواها عندي

فارس... فركت راسي بيدي اوف اشكد احاول انسى بس دائماً امي اذكرني
ظليت كاعد ويا الولد البعد صلاة العشاء

بعد الصلاة شغلت سيارتي وطلعت  جبت عشى الريتال اعرف الظهر استحت وما تغدت

ريتال... دخل فارس من شافني ابتسم رديتلة الابتسامة

فارس... جنت ضايج والدنيا طالعة من عيني من شفتها جدامي نسيت كل همومي

ريتال... اجة باسني من كصتي ههههههه هذا يطب ويطلع يبوسني من راسي حسيت نفسي علوية

فارس... رايح للحمام حظريلي هدومي

ريتال... هزيت راسي بالموافقة

طلعتلة ملابسة
شفت جايب علبة شميت ريحة بيتزا اويلي والله جوعانة

دخل للغرفة بس بالمنشفة استحيت منه درت راسي

فارس... ليش صادة ليغاد تعالي انطيني هدومي

ريتال... اشرتلة على مكان الملابس وبقيت دايرة راسي

فارس... هههههههه عليج سوالف عجيبة هو اني من البارحة بطرك السروال جدامج وهسه مستحية تصدين عليه

ريتال... ياااا هذا شبي اشكد يحب يحرجني

فارس... جبتلج عشى اعرف بيج ما اكلتي الظهر

ريتال... ليش كلفت نفسك

فارس.. يابة قابل شجايب هو اكل
بعد لاتحجين هذا الكلام انتي العين ترخصلج

ريتال... تسلم عيونك

فارس.. كعدي اكلي قبل لايبرد

ريتال... طلعت البيتزا وجان اكو ببسي هم

تعال اكل

فارس... ههههههههه يولو هذا الاكل وين يسند الگلب هاي السوالف انتو البنوات تشبعون بيهن
اني هسه يصعدون عشاية

ريتال...مجاوبتة ظليت اكل بهدوء

جابوا الفارس العشى تعشى اباوع على اكلهم كله دسومات ولحم هاي شلون يكدرون ياكلون هيجي اكل باليل

كملنا شلت الاكل الباقي خليتة بالثلاجة وغسلت المواعين

ورحت فرشت اسناني ورجعت للغرفة

فارس...هاي وينج ليش تاخرتي

ريتال... متاخرت هو صارلي عشر دقائق من طلعت  بس غسلت المواعين

رحت يم الميز تواليت خليت مرطب الايدي وجيت للفراش  تمددت واخذت الموبايل اتصفح بي

فارس... رحمه الاهلج انتي راح تنامين هيج

ريتال.. استغربت ومفهمت قصدة
ليش شبيه

فارس... اكو عروسة تنام بهذا الثوب

ريتال.. بلعت ريك اي عادي شكو بيها

فارس... ريتال اني محروم ولاتحرميني
اريد وياج اعوض ايامي الراحت
اريد يومية تلبسين نفس الملابس البستيهن اول يوم

ريتال... والنبي ما ارتاح بيهن واستحي

فارس... بنيتي اني صرت زلمتج وستر وغطى عليج
استحي من كل الناس بس مني لا تستحين

ريتال... هزيت راسي بالموافقة وكمت فتحت الكنتور باوعت كومة سيات عندي بس شكلهن فضيحة اوف من عمة غيداء وداليا هذا اختيارهن

والمصيبة ما اكدر اكولة ما البس حتى من جنت يم اهلي شبكولولي انفذ ما ادري هذا ضعف لو عدم شخصية

طلعت سيت اخذتة ورحت للحمام

فارس... هاي البنية الله يحبني لان خلاها بطريقي مطيعة متعترض على شي حبيت فقرها بس جنت خايف عليها من صبا وامي

ريتال... لبستة وبقيت حايرة شلون اطلع بي هم زين الروب جان مستور لبستة فوكاه

رجعت للفرفة بسرعة دخلت للفراش ما اريده يبقة يباوع عليه

فارس.... يبعد الروح عليش جاي ترجفين بردانة

ريتال... هااا اي شوية

فارس... اخذتها الحضني تعالي ادفيج حبيبي

ريتال... فارس بقة سهران وياي للفجر مايقبل انام ولا هو ينام

بدء شيخ الجامع يقرأ قرآن

فارس... ههههههههه اشو ماكمزتي اليوم

ريتال... هههه لان بعدني كاعدة هو الصوت بالنهار زين بس الفجر قوي واني ممتعودة عليه

فارس... الايام الجاية جثيرة وتتعودين
اروح اسبح حتى انزل اصلي
يولي خوما تخافين تبقين وحدج

ريتال... لا اني متعودة انام وحدي

فارس... عجل خوش بست ايدها وراسها وكمت

ريتال... جنت مستغربة من تصرفاتة رجال شكبرة واشكدة هيبة وشخصية يلزم ايدي يبوسها حتى من يكون وياي ومن يبتعد هم يبوس ايدي وراسي

فارس نزل يصلي اني نعسانة نمت حتى محسيت عليه من راجع 

خلال هاي الأيام فارس دللني
هوايه حنين مجان يعوفني ابد حده يروح للجامع ويرجع حتى شغل ميروح

اليوم السبعة مالتي وراح يجون اهلي واقاربنة واقارب فارس يباركولي

جنت اليوم بقمة نشاطي  لان مشتاقة الاهلي بكد رحمة الله

البيت من الصبح انخبص والكل ملتهي يسوي شغلة
ناس تساعد نسرين بالطبخ وناس تجهز الحلويات والعصائر

طبيعتهم حلوة من عدهم مناسبة الكل تجي تساعد لان تقريباً نص العشيرة ساكنة بنفس المنطقة

جنت بغرفتي اجهز نفسي مخبوصة اروح منا واجي منا

فارس.. ول ياب شبيج راح توكعين عليش هلكد مستعجلة بعد وكت دنيا ظهر وهما العصر يجون

ريتال... والله ما ادري شبيه اشو متوترة

فارس... يبعد الروح اكيد مشتاكة الاهلج جثير

ريتال... من كال هيج خليت ايدي على وجهي وكمت ابجي

فارس... رحت يمها حضنتها يولو لاتبجين توجعين گلبي بهاي دموعج فدشوية يجون وتشوفيهم
وبعدها شوكت تريدين كوليلي اخذج الهم

ريتال... راسي جان يوصل النص صدرة رفعت راسي باوعت عليه
زين راح تخليني ابات يمهم

فارس... والله مو هين عليه تنامين بعيد عني بس يجرالج التريدي بس المهم ما اشوفج تبجين

ريتال.. باوعت عليه بفرح تسلم ربي يحفظك

فارس... هههههههه هاي كل قوتج بس يلا راضين شيطلع من هذا الحلك عسل 

شراح تلبسين اليوم ترى ما اقبل شي مكشوف ويبين جسمح

ريتال... مستور والله هسه اشوفه الك
جنت مشترية قفطان لون كريمي مال هيجي مناسبات شوفتة اله

فارس... اي هذا زين مستور وحلو بس لو تلبسين حجاب يطلع احلى

ريتال... ياااااا لا عفيه هي الكعدة بس نسوان

كملت كلامي لكيت نفسي طايرة بالهوا
فارس نزلني مظل وقت اريد اكمل تجهيز نفسي

فارس... مو كتلج لاتكولين يااا اتحملي اليجرالج

ريتال... رجعت سبحت واني احجي بگلبي عليه هففف ولا يشبع حتى الكلمة العادية مسويلي بيها سالفة

جهزت نفسي شسورت شعري وبقيتة مفتوح
خليت مكياج غامق وخليت حمرة احمر قاتم احب اخلي هذا اللون من البس لون كريمي

فارس جان بالحمام من طلع جان يبدل ويباوع عليه بتك عين مبين معاجبة الوضع

فارس... كملت تبديل اخذت كلينكس ورحت وكفت  جدامها لزمت راسها من ورا بيدي وبيد الثانية مسحت الحمرة من شفايفها

ريتال... خرب وخرررررر شبيك

فارس... هيج احلى

ريتال... الدمعة لمعت بعيني
كتلك بس نسوان ليش هيجي دتسوي

فارس...ابوية ما اريد هيجي مكباج حتى لو بس نسوان

ريتال... عفته ورحت يم المرآية اعدل شفايفي

فارس... اني طالع محتاجة شي

ريتال... مجاوبتة

فارس... يولو مو احجي وياج ليش ماتردين

ريتال... مو طايقة احجي ويا لان بديت اضوج من غيرتة

فارس... جيت وكفت وراها وحضنتها ما اكدر اعوفج وانتي زعلانة
ميخالف ارجعي خلي بس رحمه الأهلج لاطوخيها

ريتال... ما اريد

فارس... يولو ترى ابطل ما اطلع واحبسج يمي بالغرفة واقفل الباب

ريتال... فزيت خفت لاصدوك يسويها
لا لا والله مزعلانة

فارس... ابتسمت يا الله اشكد فطيرة هالبنية
بستها من راسها وطلعت

ريتال...من نزل فارس صعدن يمي البنات رغد وهند وهالة وشهد

هنا هم وكفن يرتبن نفسهن

اجت شيماء كالت اهلج اجوي

يبوووو من فرحتي طلعت اركض الدرج نزلتة ركض اطبك كل بايتين سوى

دخلت للربعة شفت ماما وعماتي والبنات وخالة امل

ركضت على ماما حضنتها وابجي وهي هم تبجي
لا اني اعوفها ولا هي تعوفني

عماتي حجوا كالوا كافي سجى احنا هم نريد نسلم عليها 

سلمت عليهن كلهن
رؤى.. رتو ولج البيت مينطاق بدونج

ريتال... ياعمري والله اني هم ميتة عليكم

يزن... رتو ارجعي ويانة للبيت وخلي رؤى تبقة اهنا

رؤى... ياااااا عزااااا ولك يزن اشو جاي تتبرع بيه

يزن... اني ما احبج بس احب رتو

الكل جانوا يضحك على عركة يزن و رؤى

اخذت يامن خليتة بحضني فدوة اشكد مشتاقتلة

اقارب فارس بدو يجون حتى الجيران اجوي ظليت اسلم عليهم  مكدرت اخذ راحتي وياأهلي

عماتي كل وحدة جانت جايبتلي قطعة ذهب هدية
حتى جدي دازلي هدية محبس ويا خالة امل
وماما هم هدتلي محبس ومن بابا دازلي تراجي

فعلاً هداياهم جانت ترفع الراس كدام عيالي واقاربهم

اشرت الرغد تجي يمي
رغد.. كولي حبيبة

ريتال.. رغودة فدوة العينج اريد اكعد ويا اهلي شوية
بس مثل مدتشوفين هوسة ومماخذة راحتي

رغد... ولايهمج عوفيها عليه

رغد راحت يم ماما وحجت بصوت عالي

ريتال كومي شوفي اهلج وعماتج غرفتج اكيد مو شايفيها

ريتال... بسرعة كمت اخذتهم وصعدت

ماما... ما شاء الله البيت حلو ومعزول عن الطابق الجوة

ريتال...بس وقت الاكل الكل ينزلون جوة ياكلون سوى والمصيبة خطارهم هوايه ماكو يوم مايجيهم خطار

هدى... حبيبتي هذولة عرب هاي طبيعتهم

ريتال... والله جاي احاول اتاقلم ويا وضعي الجديد واتعود على اطباعهم

سوسن... ام فارس شلونها وياج

ريتال.. الحمد الله زينة كلهم زينين وياي

ماما.. مرتة لعد وينها

ريتال... والله يا ماما بعدني لليوم مشايفتها

داليا... اخاف هاي زعلانة عد اهلها

ريتال... ما اعرف بس هما يكولون لا هي هاي طبيعتها اكثر الايام تبقة يم اهلها

ماما.. عكب باجر معزومين عدنا وراح نعزم عيالج كلهم حتى ولدهم

ريتال... اي اريد اجي اشوف بابا مشتاقتلة

ماما.. هسه اني اعزمهم وابوج هم يتصل على الشيخ ويعزمة

ريتال... ظلينة كاعدين شوية وبعدين نزلنة

اهلي راحوا واقارب فارس هم اكثرهم راحوا

نسرين... اخذي راحتج بنتي اذا تريدين صعدي الغرفتج

ريتال... من واحد يكولي صعدي الغرفتج يجيني الفرج
هستوني اريد اكوم جان يدخلن نسوان
مرة كبيرة واربع بنات وياها

اجوي سلموا عليه بس وحدة منهم متقربت مني سلمت عليه من بعيدة

جانت تباوع عليه من فوك ليجوة

ام فارس... توة نور البيت تعالي جنتي الحلوة خلي ابوسج

ريتال... من كلام ام فارس عرفت هاي صبا
باوعت عليها بتمعن مرة بالثلاثين من عمرها سمراء ملامحها حلوة مبيها اي شي يتعيب

نسرين... ريتال هاي حرمة فارس الاولى صبا

ريتال.. اهلا وسهلا

صبا.. هلا بيج

ام فارس... هاي مو بس حرمتو هاي بنت عمو وهي الأصل

ريتال... مفهمت شنو قصد ام فارس

جنت مركزة على نظرات صبا الي تباوع عليه  وكل شوية تتحسر

جنت اريد اكوم بس استحي

اخير شي متحملت استاذنت وصعدت
غيرت ملابسي وظليت كاعدة بالغرفة وحدي

سمعت صوت نسوان بالهول اكيد هاي صبا وخواتها

اخذت موبايلي اتصلت على رهوفة

رهف.. هاي وينج يا بذاتة ولج مشتاقتلج

ريتال... اذا مشتاقتلي ليش متسالين عليه

رهف... غير اكول عروس عيب ازعجها

ريتال... ايبااااه قابل العروس لازم تنعزل عن العالم وممنوع احد يحجي وياها

رهف...اليوم السبعة مالتج مووو

ريتال.. اي واهلي وعماتي جانوا يمي
شوكت ترجعين التكريت بعد اربع ايام للدوام

رهف... عكب باجر ان شاء الله

ريتال.. ان شاء الله حبيبتي توصلين بسلامة
اكولج قبل شوية شفت صبا

رهف... عااااا وأخيراً اجت اي احجيلي شسويتي من شفتيها وهي هم شسوت

ريتال... كولشي مسوينة حتى سلام سلمت عليه من بعيد مبينة مو طايقتني

رهف... لعد مو كالوا هي موافقة وكالتلة روح ازوج شنو هسه صار عزيز

ريتال... اوووف والله ما ادري خايفة تبدي تسويلي مشاكل وبصراحة اني مناقصة

رهف... معليج منها واذا سوت شي كولي الفارس حتى هو يصرف وياها

ريتال... هواية حجينا اني ورهف خلصنا المكالمة

من الملل نعست وما ادري بنفسي غفيت

فارس... رجعت للبيت لكيت صبا واهلها موجودين

صبا سلمت عليه وباركتلي
كعدت يمهم بالربعة بقينا حجي وسوالف
بعدين ترخصت منهم كتلهم اصعد ابدل ملابسي

نسرين... لاتتاخر خوية راح انصب العشى من تنزل صيح حرمتك وياك

فارس... دخلت للغرفة لكيت ريتال نايمة

غبرت ملابسي وجيت تمددت بسدها لعبت بشعرها اريدها تكعد

ريتال.. فتحت عيني فارس يمي

فارس... يبعد الروح اشو نايمة

ريتال... جنت نعسانة لان منايمة الظهر

فارس.. يولو اخاف احد مضوجج

ريتال.. لا لا ابد والله على شنو يضوجوني

فارس... يلا كومي ننزل نتعشى

ريتال... اوك كمت خليت شال على راسي ونزلت ويا

دخلنة للربعة جان الاكل مصبوب والكل كاعدين واهل صبا بعدهم موجودين

كعد فارس كعدت بصفة
بهاي الايام من ينصب الاكل فارس يكعدني يمه ويظل كل شوية يخلي شي كدامي لان يعرف بيه استحي

صبا واهلها اكلونة بعينهم حتى اللكمة كمت بالكوة ابلعها

كملنا الاكل رحت للمطبخ اساعدهم بغسل المواعين مجنت اريد ارجع اكعد يمهم

ساعدت البنات ومن كملت صعدت الغرفتي ورا شوية اجة فارس ظل يسالني على السبعة وعلى اهلي

فارس... عكب باجر معزومين عند اهلج

ريتال.. اي اعرف ماما كالتلي

فارس... هم حجبتي ويا صبا

ريتال... لا بس سلام عادي 

فارس... من باجر لازم ارجع للشغل اطلع ساعة تسعة ارجع بالاربعة لان الطريق بعيد ما اكدر ارجع الظهر واحنا عدنا شغل جثير بالمعمل
من تضوجين روحي يم هند ونسرين

ريتال... هو اني هم بعد كم يوم يبدي دوامي وراح التهي بي

فارس... اووف من هالسالفة دوامج شايلو هم شكبرو

ريتال... عزاااا لا فارس كولشي ولا دوامي انتو من البداية قبلتوا بشرطي

فارس... يابة هسه اني شحجيت قابل منعتج اداومين

ريتال... شوكت تخليني اروح ابات يم اهلي

فارس... بعد العزيمة اني اخذج الهم

ريتال... صار يوم العزيمة رحنا البيت اهلي

اهلي عزموا حتى بيت عادل و وسام ورغد 
صبا من الصبح راحت يم اهلها مقبلت تجي ويانة

جنت متلهفة شوكت اوصل حتى اشوف بابا گلبي طاك عليه

من وصلنة بابا وجدي وعمو مصطفى و زوج عمة غيداء استقبلوا الشيخ واولادة

من كملوا سلام رحت على بابا حضنتة غصيت بالبجي
بابا عيونة مدمعة وبالكوة مسيطر على نفسة

بعدها رحت سلمت على جدي والبقية

عمة غيداء وداليا من البارحة يم اهلي حتى يساعدون ماما بالطبخ
اهلي ممبقين شي ممسوي جميع انواع الاكل مسويها

اني من فرحتى ما اكلت شي جنت مشتاقة البيتنا والجمعتي ويا اهلي

قبل صلاة العصر رجعنا للبيت جنت طول الطريق ساكتة بس واحد يطخني ابجي

فارس يباوع عليه من مرآية السيارة لان اني وامه كاعدين ورا والشيخ كاعد بصف فارس

من دخلت الغرفتي اطلقت العنان لدموعي

فارس... اني مو وعدتج يومين واخدج تباتين يمهم

ريتال... باوعت عليه بتوسل خليني اروحلهم باجر
لان بعد باجر يبدي الدوام

فارس... صار يبعد الروح باجر قبل لا اروح للمعمل اخذج الهم

ريتال... من فرحتي رحت حضنته بعدين حسيت على روحي هههههههه

فارس... هنيالهم اهلج هالكثر تحبيهم واني المسكين كلمة حلوة مومحصل منج

ريتال... ثاني يوم من ساعة سبعة كعدت رحت سبحت من طلعت لكيت فارس بعدة نايم

فارس حباب يلا كوم مظل وقت

فارس... فتحت عيني ليش بيش ساعة هسه

ريتال... سبعة ونص

فارس... خرب غيرتج ساعة سبعة ونص وتكولين مظل وكت

ريتال... اي الحد متجهز نفسك وتتريك تصير ساعة تسعة يلا كوم

فارس... كايم وامري لله

ريتال... متريكت ويا فارس
جنت اريد اتريك ويا ماما و رؤى

من وصلت البيتنا جنت طايرة من الفرح حسيت نفسي رجعت ريتال القديمة اتصرف بحريتي بدون تقييد
الظهر اجه بابا

بابا... اني اكول البيت اليوم ليش منور طلعت حبيبة ابوها اهنا

ريتال... البيت منور بيكم انت وماما

الظهر اتصلت على عمة داليا حتى تجي تبات يمنا اليوم

حتى فارس نسيتة لا راسلتة ولا اتصلت عليه العصر هو اتصل يعاتبني يكول من شفتي اهلج نسيتني

هههههه واني فعلاً جنت ناسيتة

اجت دلولة

رؤى... عمة داليا صايرة خاينة لان انتي ماكو بطلت تجينا عبالك احنا مو بعينها

داليا...لج هي ريتال مصارلها عشر ايام من ازوجت واني قبل العزيمة بيوم جنت بايتة يمكم عيني عينك دتكذبين

رؤى... من جانت ريتال اهنا كل يومين او ثلاث ايام انتي يمنا

ريتال... فديتها اكيد تضوج من تشوف مكاني فارغ

رؤى... اكولج رتو صبا شلونها وياج

ريتال.. اني بحالي وهي بحالها لاتختلط بيه ولا اختلط بيها

ماما... اي احسن خليج بعيده عنها حتى لاتصير مشاكل

ريتال... هي مبينة مو من النوع الدور مشاكل لان تخاف على صحتها

باليل كعدنا بغرفتي القديمة اني وعمة ورؤى

ريتال... اويلي اشكد مشتاقة الغرفتي وفراشي

رؤى... ردت اخذها بس ماما وبابا مقبلوا كالوا هاي تبقة غرفة ريتال

ريتال... امداج طلعتي مستعجلة تريدين تورثيني من هسه

رؤى... هو انتي مو زوجتي وصار عندج غيرها احسن متبقة فارغة اني استفاد منها لان هاي اكبر من غرفتي

ريتال.. همزين بابا وماما مقبلوا تاخذيها

رؤى.. صدوك اشو سمنانة

ريتال.. عزااا صدوك تحجين غير بسبب اكلهم ولج كله دسومات وثريد ولحم حتى بالعشى وفارس يجيب ويخلي كدامي يجبرني اكل

داليا...هههههه لعد جية الثانية راح اشوفج مثل الباندا

رؤى... كوليلهم اني ممتعودة اتعشى

ريتال... اخجل منهم وانجبر اكعد اكل

داليا.. ريتال اكو موضوع مهم لازم تفكرين بي

ريتال... يا موضوع

داليا... انتي هسه طالبة وبعدلج ثلاث سنوات يلا تتخرجين اذا صار عندج طفل شلون

ريتال... عزااا بعيني جنت ناسية هذا الموضوع اني دراستي صعبة وين اكدر ادبرها اذا صارلي طفل

داليا... احجي ويا فارس واجلوا الموضوع هسه الحد متتخرجين

ريتال.. والله استحي افتح هيجي موضوع ويا اني بعدني الحد هسه اخجل منه

داليا... ماما المصلحتج لازم تحجين وعوفي الخجل على صفحة

ريتال.. تنهدت ومنو يكول يقبل

داليا.. جربي كوليلة واشرحيلة اسبابج بلكي يقدر وضعج

ريتال... هذا الموضوع شغل بالي بقيت اتكلب بفراشي حتى النوم طار من عيني

وصلني مسج من فارس

فارس.. كاعدة لو نمتي

ريتال.. لا بعدني كاعدة جنت سهرانه ويا عمة و رؤى

فارس... هنيال عمتج و رؤى يولو ماجاي اكدر انام وانتي مو بحضني

ريتال... ليش مرحت يم صبا

فارس... تصبحين على خير

ريتال... ياااااااا هذا شبي
وانت من اهل الخير

ثاني يوم فارس من رجع من المعمل قبل لايروح للبيت اجة عليه حتى يرجعني ويا

اهلي اشكد لحوا عليه حتى يبقة مقبل كاللهم تعبان

طول الطريق هو ساكت ابد محجة وياي مبين ضايج

دخلت للبيت سلمت عليهم وصعدت الغرفتي فارس راح يسبح حتى ينزل يصلي صلاة العصر

حظرتلة ملابسة بدل وطلع بدون ميحجي شي

عشتووو شسويلة حتى ما أعرف على شنو زعلان

اني رتبت الغرفة واخذت الملابس الوسخة خليتهن بالغسالة غسلتهن ونشفتهن

رجع فارس راح للفراش ينام

فارس.. طفي الضوة

ريتال... طفيتة وجيت تمددت بالطرف الثاني اخذت الموبايل اتصفح بي تراسلت ويا رهف اتفقنا نداوم باجر

اخير شي اني هم نعست جنت متمددة حتى بدون غطى

غمضت عيني حسيت بي غطاني جان قريب مني لزم خصل شعري خلاها ورا اذني وباسني

والله هذا الانسان غريب يزعل ويرضى بكيفة

متحملت الفضول موتني درت راسي عليه وسالتها
انت ليش زعلان

فارس...منو كال اني زعلان

ريتال... مبين حتى متحجي وياي

فارس... ريتال مو فارس الي يقبل مرة تكولو شيسوي لو وين يروح اني لو اريد اروح يم صبا ما اخذ اذن منج هي هم مرتي اروحلها الوكت اليعجبني 

ريتال... فتحت عيني هذا اشديحجي
لا اكيد انت فهمتني غلط  اني مجان هذا قصدي والنبي قصدت ليش تبقة وحدك روح يمها

فارس... كافي تحجين يولو مشتاكلج بعد ما اقبل تباتين يم اهلج

ريتال... لا فدوة لاتكولها
الله عليك لاتحرمني منهم

فارس... عجل عوضيني عن البارحة واريد الضعف

واذا معجبني العوض راح امنعح تباتين اهناك

ريتال... اليوم داومنا اني ومؤمن

اول موصلت للقسم رحت ادور الرهوفه
جانت بعدها مجاية اجني صديقاتي سلمن عليه وباركنلي وحتى زملائي هم اجوي باركولي

اجت رهف بقت حاضنتني عبالك متفاركين صارلنة سنين

رهف... ولج رتو صايرة تخبلين مبين الزواج يخلي الوحدة تحلى لعد دوريلي عريس

ريتال... منين ادورلج اشو حتى اخواني اصغار
شنو رايج اخذج للشيخ وتصيرين ضرة ام فارس

رهف... اوووويلي على الشيخ اخرب واتكهرب عليه اي ياريت

ريتال.... هههههههههه حتى ام فارس تشنقنا اني وياج بنفس الحبل

رهف... ههههههههه اي ادري بيها لج صح عجوز بس كل الحيل بيها من تحجي عبالك الاميرة ديانا

قبل لا يخلص الدوام اجة مؤمن سلم على رهف

ما اعرف ليش احس اكو نظرات اعجاب بين رهف و مؤمن

رجعنا ساعة ثنتين ونص للبيت جنت ميتة تعب دخلت للمطبخ باوعت المواعين مكومة اول مرة تبقة مواعين الغدى وسخة الهيجي وقت

ومبين جان عدهم خطار لان هواية مواعين وجدورة

مؤمن راح الغرفتة ردت اصعد سمعت صوت ام فارس تصيحني

هاي شعجب منايمة هي متعودة تنام الظهر

نعم خالة

ام فارس... روحي بدلي وانزلي اغسلي المواعين

غسبل المواعين من اليوم عليج بس مواعين الريوك شيماء تغسلهن

ريتال...انصدمت عزاااااا راح اغسل كل هذن وحدي

ام فارس... شبيج واكفة يلا روحي

ريتال... صعدت الغرفتي بدلت ونزلت دورت صدرية مطبخ ماكو

اني ايدي تتحسس من مساحيق التنظيف يم اهلي جنت البس كفوف

اهناك مواعينة قليلة واني ورؤى جنا نشارك بغسلهن

وكفت اغسل واني روحي طالعة حسيت ظهري من التعب يريد ينقسم بالنص

الحد ما كملتهم طاح حظي
رتبتهم بمكانهم ونظفت المطبخ

صعدت الغرفتي واني اسحل بروحي سحل ايدي كامت تحكني وصارت حمرة

خليتلها مرطب وشمرت روحي بالفراش

اول مخليت راسي على المخدة نمت

فارس... رجعت من المعمل دخلت للغرفة جانت ريتال نايمة مبينة تعبانة من الدوام
ماكعدتها اني حظرت ملابسي بدلت ورحت صليت
من رجعت نمت بسدها

كعدت قبل اذن المغرب وهاي بعدها نايمة

حبيبي راح ياذن المغرب مايجوز النوم الهيجي وكت

ريتال... هياتني كعدت

كمت غسلت وصحصحت ونزلنة اني وفارس جوة
فارس طلع يم جماعتة واني رحت للمطبخ

اويلي السنك هم متروس مواعين واستكانات

فات مؤمن للمطبخ يريد يطلع

مؤمن ممكن طلب

مؤمن... امري

ريتال... ميامر عليك ظالم اريد تشتريلي صدرية مطبخ وكفوف

مؤمن... سحبتها لا امري ولا بطيخ بربج رجال شكبرني وشكدني اروح اشتري صدرية مطبخ

ريتال... عابتلك واذا قابل شكو بيها

مؤمن... مو عندج زلمة وصي هو يجيبلج

ريتال... لاتصير خبيث فارس طلع ونسيت اكوله

مؤمن... واني وين اعرف منو يبيع هاي السوالف

ريتال... ترى موجودات بكل مكان بس انت  تعب نفسك شوية

مؤمن... ماشي اشوف وامري لله
فارس يزوج ومؤمن يبتلي

ريتال... هههههههه طلع مؤمن وهو يدردم

وكفت اغسل المواعين دخلت ام فارس وهي صايرة نار

ام فارس... اني من كتلج غسلي المواعين شنو تضحكين عليه بس مبللتهن وشايلتهن

ريتال.. انصدمت خالة والله غسلتهن وصعدت

أم فارس... وهذا تسمي غسل كلهن زفر

هذا الغسل يم اهلج مو اهنا لازم تتعلمين على النظافة

ريتال... اختنكت من كلامها وجمالة الكل اجوي للمطبخ

وعمتهم  هم جانت موجودة وشيماء وامها وصبا ونسرين وهند

وام فارس كدامهم تحجي وترزل
عمتهم اتكولها البنية بعدها جديدة على كيفج عليها

ام فارس اتكوللها اني ما الفي وسخة بيتي

نسرين بالكوة اخذت امها وطلعت
متحملت ابقة واكفة صعدت اركض الغرفتي.......

يتبع

مساء الورد حبايبي

لعيونكم راح اسوي النشر يومين بيوم

بس اتمنى مو بعدها هم ترجعون وتكولون البارت قصير
وياريت متنسون التصويت وبدربكم سوو متابعة الحسابي

اكو هواية طلبوا صور تشبيهية للابطال

تعبت واني ادور بالكوة لكيت

تقريباً فارس وريتال نفس هاي الملامح