رواية فارسي العاشق الفصل السادس عشر 16 - بقلم بسمة البياتي

_  فارسي العاشق _
( بقلم بسمة البياتي)
_البارت السابع عشر _

فارس ما اعرف شبي من صعد لهسه صافن ما اعرف بشنو يفكر

شبيك اشو مو على بعضك

فارس... مابيه شي حبيبي

ريتال... ممممم اوك غمضت عيني اريد انام

فارس... ريتال اني باجر ابات يم صبا

ريتال... فتحت عيني باوعت عليه
اوك براحتك

فارس... يبعد الروح ما اريد اتضوجين بس هي هم حرمتي ولازم اعدل بينكم

ريتال.. لا ليش اضوج خطية لازم تروح يمها

فارس... اول مرة اشوف وحدة مقهورة على ضرتها وتكول خطية يولو اشو متغارين

ريتال... ههههههه قابل شكول
اني مو انانية ومن قبلت ازوجك اعرف انت مزوج غيري لازم اتقبل الوضع بروح رياضية

فارس... بس اني روحي هين يمج مو كادر ابات يم غيرج

ريتال... لعد شراح تسوي انت مو اتكول لازم تعدل بينا

فارس... نامي بنتي ما ادري هذا الثلج شوكت يذوب

ريتال... هاا يا ثلج

فارس.. ثلج الخلفوني نامي ابوية نامي

ريتال... اووووي هذا شبي يدور حجة عليه خلي انام احسنلي

ثاني يوم بالليل من خلصت غسل مواعين العشى
صعدت طلعت كتبي كلت خلي استغل هذا اليوم بالدراسة لان مستواية دينزل

فارس... صعدت فوك دحجت على غرفة ريتال تحسرت ما اكدر اروح اشوفها بس ادخل الغرفتها بعد ما اطلع

دخلت الغرفة صبا من شافتني تفاجئت بيه

صبا... هلا فارس شعجب اليوم جاي الغرفتي

فارس... هو شنو العجيب مو انتي طلبتي من امي اعدل بينج وبين الثانية

صبا... ها اي هو جان كلام عادي بيني وبين عمتي

فارس... شوفي يبنت عمي هالمرة راح اعديها الج ثاني مرة تروحين تشكين عليه يم امي لو احد ثاني لاتلومين الا نفسج
صرتي ادورين حقوق وانتي اسنين حارمتني من حقوقي من ازوجت صرت عزيز وبدء كيد النسوان

صبا... فارس والله مو اني حجيت هي عمتي كالت فارس اذا بقة يم حرمتو الثانية راح يعوفج ومو بعيد يطلكج

فارس... غمضت عيني واني اطلب الصبر من الله وتالي ويا وامي ماكاعد تجوز مني وتعوفني بحالي

باوعت على صبا بغضب وانتي شكو تسمعين الحجي اني لو رايد اطلكج جان طلكتج من زمان

على العموم سمعي هذا الكلام وخلي ترجيه باذنج
انتي جيتي ودورتي حقوقج واني مراح اقصر وياج بس قسما بالله اذا كلتي مريضة لو تعبانة لو اني بسببك تمرضت اگلب الدنيا على راسج

صبا... بخوف على كيفك فارس اشو صرت تهدد اذا تريد ارجع يم حرمتك الثانية

فارس... ههههه لا محزرتي اليوم اني يمج عليش هيجي خفتي

صبا.... لا عليش اخاف مابيه شي

ريتال... كعدت الصبح كمت غسلت وبدلت
جنت دالف الحجاب دخل فارس للغرفة

مثل الملهوف اجه حضني ويبوس بيه
بهذيج الدقيقة ما أعرف ليش نفسي لعبت منه من اذكرتة جان ويا صبا
بعدت وجهي عنة وابتعدت

فارس... بشك شبيج

ريتال... مابيه شي بس اريد اكمل بسرعة لان تاخرت

فارس بدون ميحجي شي عافني وراح تمدد على السرير
مبين من شكلة ضاج من تصرفي

يلا باي اني رايحة
اخذت جنطتي وكتبي وطلعت

بالكلية اليوم ما ادري شبيه دايخة وصداع
رهف سالتني شبيه كتلها يمكن ضغطي نازل

راحت للكافتريا جابتلي ملح ولبن شربتة

رجعت للبيت واني بعدني مسطورة
وكالعادة المواعين تارسة المطبخ

طلعت روحي الحد ما كملتهن وصعدت نمت وجريتها نومة الحد اذن المغرب

من كعدت انصدمت خرب هاي اشكد نمت هسه شيخلصني من خالة

استغربت فارس اشعجب ماكو ومكعدني

نزلت جوة واني محظرة نفسي للرزالة بس هاي اول مرة يصير عندي حظ ام فارس مموجودة

جان الوضع متوتر بالبيت ما اعرف شبيهم

بعدني بالمطبخ جان تجي خالة و صبا

ام فارس... فوتي يمه بيتنا جان كل الخير بي من يوم الي لفتنى ما لفى الخير علينا

ريتال... هاي شبيها منو قصدها جانت تحجي وتباوع عليه

وصبا عيونها حمر مبين باجيه

نسرين... هلا صباوي يمعودة عليش كبرتي الموضوع قابل جديدة عليج كونات فارس

ريتال... اني مثل الاطرش بالزفة حرام اذا مفتهمة شي

صبا صعدت الغرفتها واني ظليت اضرب اخماس باسداس بس اريد اعرف شصاير وفارس وينه

اني اخجل من نسرين ومعندي ميانة وياها  حتى استحي اصيحها باسمها اسميها ام مؤمن
استحيت اروح اسالها شصاير

شفت هند صعدت البيتها رحت وراها

دكيت الباب ودخلت للهول

هند... هلا والله تعالي فوتي يولو عليش واكفة

ريتال... جيت كعدت يمها اكول هنودة عندي سؤال والفضول قتلني هو شصاير اليوم

هند... ههههههههه يبووو عليج الدنيا محتركة وانتي نايمة ورجلج بالشمس

ريتال... عااااا ليش شصاير

هند... اليوم فارس وصبا تكاونو وصبا راحت زعلانة الاهلها

ريتال... ياااا هاي شوكت اي احجيلي بالتفصيل

هند... اني سمعت هو البارحة جان بايت يمها

ريتال... اي صح

هند... اي اليوم الصبح من نزلت جوة جانت تعبانة و وجهة غادي مثل النومية
نسرين تورطت على عمرها وكالتلها ليش وجهج اصفر

هاي هيج سمعت لو گلبت الدنيا بالبواجي

صبا... مو اكولكم الزواج ياذيني انتو متصدكون هذا فارس يريد يموتني

هند... نحاول نهديها ماكو فايدة سوت عمل مصاير

ريتال... اكولج اخاف صدوك كلامها وفعلاً تتمرض بسبب العلاقة الزوجيه

هند... هههههههه هاي عود انتي بنت المدارس المتعلمة وهيجي تحجين عجل شبقيتي النه

شوفي حبيبة هساع انتي اذا خفتي من شي وظليتي توسوسين مو راح تتمرضين من الخوف والتفكير

ريتال... اي فعلآ واني هذا طبعي بس اخاف اسخن وانام بالفراش

هند... شفتي عجل واني هذا قصدي هي بسبب الخوف من المرض والتفكير  من صدك تتمرض

ريتال... ترى موزين تبقة هيجي لازم تراجع طبيب نفسي اذا تبقة على نفس وضعها راح تتاذى اكثر

هند... شحدو اليكوللها روحي دكتور نفسي تگلب الدنيا عليه اتكول شنو اني مخبلة حتى اروحلو

ريتال... ههههههه شلون تفكير ليش الطبيب النفسي بس للمجانين
على العموم الله يشفيها

بس مكتيلي ليش جانت رايحة الاهلها

هند...فارس من رجع من الشغل هو و وسام
عمتي استقبلتوا اتكولو هاي شمسوي بحرمتك
انت متقصد تاذيها حتى بعد لانكولك روح يمها

وفارس من سمع عيونو نطت الراسو

صعد تاكون وياها وضاربها

ريتال... من كالت ضربها شهكت وفزيت عزاااااااا شنو ضربها

هند... يولو خرعتيني شبيج

ريتال...يعني اني هم اذا تعصب عليه يضربني عزاااااا

هنذ... ههههههههه والحمزة ابو حزامين انتي فلم هههههه وهو عليش يضربج

ريتال... اذكرت الصبح شلون دفعتة مني وهو ضاج

هند...يولي وين صفنتي مو كاعد احجي وياج

ريتال... هاااا هياتني داسمعج
يلا حبي اني نازلة اشوف ام مؤمن شمحتاجة

التهينة نحظر العشى لان خلصت الصلاة وراح يجون

دخلوا من باب المطبخ الشيخ والولد
باوعت على فارس الحواجب معقودة من العصبيه صايرات مثل السيوف

يماااا زاد خوفي من شكلة
هسه اني ليش خايفة منه ما ادري
بس كلما اذكر ضارب صبا انرعب

سلموا ودخلوا جوة
فرشنا السفرة وبدينا ننقل بالاكل

وبهاي اللحظة اجة الططوة مؤمن

مؤمن... خالي اليوم العصر اتصل عليه المصور كال الصور طالعات من زمان ليش ماتجون عليهن واني جنت قريب منو جبتهن وجيت

فارس من سمع بالصور غمض عينة بغضب عبالك اذكر شكلي بالصور

نسرين... اشو انطيني خلي اشوفهن

هند ونسرين وكفن يتفرجن واني اباوع عليهن واسب حظي

الله يلعنك يا مؤمن ملكيت غير هذا اليوم تروح تجيبهن

فارس... يعني شششششلون منتعشى اليوم اظلن واكفات هيجيييييييي

رييييييتال اخذي النعل صعديهن فوك

ريتال... فزيت من عاط بيه اخذت الصور وصعدت اركض

حتى نسرين وهند هم طلعن بسرعة يصبن الاكل

دخيلك ربي هذا شراح يسوي بيه اليوم

كعدنا نتعشى اني كعدت بعيد منه اخاف اقترب عليه هو شوية اكل وكام

كملنا وشلنة المواعين رحت اغسلهن

سمعت صوت مؤمن ورايه
اويلي اجة والله جابة

اخذت الجفجير واندريت عليه

ضربتة على زندة خليتة يكمز

مؤمن... الله ياخذج شبيج يولو

ريتال.  وياخذك وياي على الواهس كول امين
لك يابومة انت تشوف الجو متوتر اليوم وخالك عالن الحرب تصخم وجهك وتروح تجيب الصور ليش

مؤمن... هاي فوك زينتي صدك لو كالوا سوي خير وذب بالشط

ريتال.. هذا الخير ما اريده متنازله عنه

مؤمن... وانتي عليش خايفة هالكثر

ريتال... لك عمتي جبرت فارس اخذ صور بدون حجاب والمصيبة رجال اخذلنة الصور مو مرة

مؤمن... ههههههههههههه خرب واكول فارس شبي انعقج وصرخ على امي وهند هههههههه

ريتال...وسم ولي من كبالي ما اريد اشوف خلقتك

مؤمن... دروحي على اساس اني حاب شوفتج يالبومة

ريتال... ردت ارجع اضربة انهزم وهو يضحك

خلصت المواعين وطرت الغرفتي  بقيت رايحة جايه   ما اعرف شسوي اخاف فارس يصعد ويتعارك وياي

بهيجي مواقف دائماً اذكر نصائح عماتي غيداء وداليا

كالوا بس تشوفين زوجج متعصب وزعلان البسي شي مغري وتمكيجي هو من يشوفج راح ينسى كل غضبة

رحت للكنتور ظليت اگلب بملابسي
لكيت سيت نوم اسود شفاف شجعت نفسي واخذتة لبستة

رحت لطخت وجهي مكياج وهالمرة كثرت
هو يتخبل من اللون الاحمر اذا اضربة خارج الغرفة
خليت حمرة احمر ناري

باوعت على نفسي اني اكيد مخبلة هاي شسويت بروحي هو اني جاي استحي اباوع على نفسي

بس يلا المهم تعدي هالليلة على خير

ظليت انتظرة هسه يجي شوية ويجي اشو هذا ماكو
للساعة 12 وهو ماكو مليت ونعست عيوني شكلت من النعاس صايرة هوايه احب النوم

كمت فتحت باب الغرفة على كيف مديت راسي بالهول جان كاعد يشرب اركيلة مشافني لان منطيني ظهرة

سديت الباب ورجعت المكاني
هذا بس من يضوج ويتعصب يبقة يدخن يبووو مبين اليوم الفيوزات ضاربة

فارس... اليوم روحي بخشمي
كعدت ادخن اريد بس شوية اهدي البركان البداخلي

اني متعود على هاي مشاكلي ويا صبا بس اليوم من امي ادخلت بيني وبيها وحجت عليه جدام الكل دين مابقة براسي لوبيدي اهد البيت فوك روسهم

تعبت من العصبيه والتفكير شلت النركيلة خليتها بالمطبخ
رحت للحمام غسلت وجيت للغرفة حتى انام توقعت تكون ريتال هساع نايمة

فتحت الباب ونصدمت بالغضب الجدامي هاي شمسوية بروحها
يشهد الله بهاي اللحظة نسيت كل مشاكلي وعصبيتي يولو حتى نفسي نسيتها

ريتال... ياااا هذا شبي واكف يم الباب وصافن حتى مايرمش

الووو فارس راح تبقة واكف يم الباب

فارس... من حجت وياي انتبهت على نفسي اني صدك بعدني يم الباب

جيت  يمها واني عيني تتنقل على كل شبر بجسمها

ريتال... خرب خجلت من نظراتة بس اشو هذا بدون مقدمات اخذ وضعية الهجوم

 
فارس... تدرين يبعد الروح شنو الفرق بينج وبين صبا

ريتال...بستفهام اي وشنو هو

فارس... وحدة ترفع الضغط والثانية تنزلو

ريتال... واني ارفعة لو انزله

فارس... انتي مثل المهدء اليرخي الأعصاب ويهديها يولو اريدج اظلين دوم هيج وماتتغيرين

ريتال... هههههههه هذا ميدري اني سويت هيج لان جنت خايفة منه
صار تدلل وهسه خلي انام باجر وراية دوام

بعد ثلاث ايام جنت راجعة من الدوام جانت رجلي بالكوة شايلتني هاي الايام ما اعرف شبيه ليل ونهار عندي نحول بجسمي ودوخة لوبيدي بس انام

من دخلت للمطبخ وشفت المواعين الدمعة وكفت بطارف عيني السنك والكاونترات متبين من المواعين اكيد خطار هوايه جانوا يمهم

بدلت ونزلت واني اندب حظي وانعل اليوم الزوجت بي

من التعب والوكفة احس رجلي ماتت والدوخة زادت و ظهري من الوجع يريد ينقسم

وصلت مرحلة بعد متحملت كمت ابجي
من خلصت عفتهن على الكاونتر بدون ما اخليهن بمكانهم لان بعد ما اتحمل حسيت راح افقد الوعي

توجهت للدرج وصلت السادس باية
من الدوخة والتعب رجلي التوت فقدت التوازن وكعت على ظهري ودحرجت ليجوة

من الوجع صرخت بعلوا صوتي ثواني ولكيت الكل يمي

نسرين... اسم الله بنتي خوما بيج شي

ريتال... اني مفرفحة من الوجع وهاي اتكولي خوما بيج شي

الشيخ... يولو هساع كوميها مو وكت هالحجي

هند...  نسرين شوفي ملابسها هذا الدم منين

ريتال... من كالت دم تخبلت اريد ارفع نفسي من الكاع داشوف شكو ما اكدر ظهري ذبحني من الوجع

نسرين... مؤمن امشي شغل السيارة واتصل على خالك

الشيخ... بنيتي لاتخافين ماكو شي هساع ياخذونج للمستشفى

ريتال... هند ونسرين بالكوة كوموني باوعت الكاع وملابسي كلها دم

نسرين دخلتني الغرفتها

نسرين... هند صعدي جيبلها ملابس حتى اغير ملابسها

ريتال.. غيرولي ملابسي ولبسوني صاية واخذتني صعدتني السيارة مؤمن

الطريق كله فارس يتصل

مؤمن... خالي راح يجي للمستشفى

وصلنة للمستشفى من شافوا وضعي دزوني الطبيبة نسائية
من عرفت بيه انزف كالت سوي سونار

خطية مؤمن جابلي كرسي متحرك كعدت عليه
رحت سويت سونار
وانصدمت من عرفت اني عندي اسقاط

نسرين... يولو ليش مكلتي انتي حامل

ريتال... ما اعرف ليش بهاي اللحظة كمت ابجي
والله ما اعرف بنفسي حامل هسه يلا عرفت

نسرين.. لاتبجين بنتي الله يعوضكم ان شاء الله المهم انتي بخير

رجعت للدكتورة كالت متحتاجين كورتاش لان الحمل بعده بدايتة والجنين كله نزل

حولتني على اشعة الظهري لان بعده يوجع مال وكعة

من طلعت من الدكتورة فارس جان موجوده من شكلة مبين عرف بالخبر

اني جنت مستمرة بالبجي

فارس ساكت محجة وباي شي
رحت سويت اشعة والحمدلله طلع مجرد رضوض

جان ضغطي نازل شكلولي مغدي ومن خلص رجعنا للبيت

دخلت للبيت اجني يمي رغد وهند اخذوني الغرفتي وتحمدولي بسلامة

ام فارس حتى مكلفت نفسها تسال شبيه

تمددت بفراشي واني جسمي يون عليه من الوجع

رغد... العوض بسلامتج حبيبتي

هند... لاضوجين يولي البطن التشيل مرة تشيل غير مرة

ريتال.. الحمدلله على كل حال

رغد.. ولج شلون مجنتي تدرين بنفسج حامل انتي موتعرفين موعد شهريتج من شفتيها تاخرت ليش محجيتي

ريتال... والله مجنت اعرف عبالي ضغطي دينزل من التعب واني من جنت بنية موعد الدورة مخربطة عندي لهذا مشكيت

هند... خطية فارس جثير مقهور

رغد... عليش ينقهر الله مكاتبو الهم الحمدلله هي بخير ومصار بيها شي

ريتال... اخذت تلفوني جان اكو اتصالات من ماما و رؤى اليوم ممتصلة عليهم اكيد ظال بالهم

اتصلت على ماما من سمعت صوتها كمت ابجي وهي تخبلت بس تريد تعرف شبيه

بالكوة كدرت اكوللها وكعت وصار عندي اسقاط

سديتة منها وبقيت بفراشي فارس ماكو ما اجة يمي ابد

ساعة وجان اشوف ماما وعمة داليا كدامي

ماما... سودة عليه حبيبتي هاي شصار بيج

ريتال... مابيه شي لاتخافين

داليا... الحمدلله على سلامتج رتوتة

ريتال.. الله يسملج عمري

ماما... شنو رايج اخذج ويانة حتى ترتاحين فديومين وحتى احجزلج يم دكتورتي حتى اخذج الها

ريتال... اي والله ياريت بس اخاف فارس ميقبل

ماما... هسه اني وابوج نكوله

ريتال.... ليش بابا وينه

ماما.. كاعد جوة يستحي يصعد فوك

ريتال.. ماما حجت ويا فارس وهو وافق كال عادي خلي تروح
عمة داليا حظرتلي الملابس الاحتاجهم وساعدتني انزل جوة

شفت بابا سلمت عليه خطية مبين خايف

طلعت حتى اصعد بالسيارة فارس جان واكف ويا بابا بس ابد مباوع عليه

رحت البيت اهلي استقبلوني رؤى ويزن من الباب يبوسون بيه

اخذوني الغرفتي القديمة

عمة ليش متبقين يمي إليوم

داليا...مو يدلل الحلو بس هسه احجيلي شلون وكعتي

ريتال... حجيتلها كولشي

داليا.. عقدت حواجبي يعني انتي ترجعين من الدوام تعبانة تكعدين تنظفين ليش هما قليل  نسوان عدهم اشو البيت متروس

ريتال... اني عايشة ويا عيال لازم اشارك بالشغل

داليا... بس مو هيجي هذا انتقام مو شغل عود هذوله ناس متدينين ليش ميخافون الله بيج

ريتال... فدوة عمة سكتي ما اريد اهلي يعرفون ويضوجون

داليا... لا حول ولا قوة الا بالله
الخاطر ربج شوكت تبطلين فقر دشوفي الناس كامت تاكلج

ريتال... عمة يمكن الله عاقبني ومخلى هذا الطفل يصير عندي

داليا... استغفر الله شنو هذا الكلام

ريتال... اني قبل كم يوم طلبت من فارس منسوي طفل مجنت اعرف اني حامل
ويمكن الله عاقبني واخذة مني

داليا... لا ماما لاتكولين هيجي هذا الله مقاسمة الكم  وانتي بعدج صغيرة ان شاء الله يصير عندج غيرة

ريتال... الله كريم

ثاني يوم عماتي كلهن اجني شافني واطمئنن عليه

بقيت بيت اهلي يومين رحت للدكتورة ويا ماما والحمدلله كالت رحمج نظيف والجنين كلة نازل

فارس ابد متصل عليه
واني هم عفتة براحته

ثالث يوم اضطريت اخابره حتى يجي ياخذني لان امتحاناتي راح تبدي

كالي من ارجع من المعمل امر عليج
وفعلا العصر اجة اخذني

جان يتعامل وياي بكل برود

سلمت على اهلة وصعدت الغرفتي هو دخل يسبح حتى يروح يصلي

رجع للغرفة لبس دشداشتة وكف على المرآيا يمشط ويتعطر
اني صافنة عليه محتارة بامره هذا شبي

راد يطلع صحت عليه
اوكف فارس قبل لاتطلع كولي شبيك

فارس... برود مابيه شي

ريتال... كمل طريقة وصل للباب جيت بسرعة كطعت عليه الطريق صرت كدام الباب

فارس...يابة بلا هالحركات تاخرت على الصلاة

ريتال... والله متطلع اذا متكولي شبيك من يوم الوكعت وانت متغير عليه

فارس... بعصبيه رييييييتال المصلحتج سدي الموضوع وخليني اولي

ريتال... شسد شبيك انت اريد افهم اني شمسويتلك هاي بدال متكولي سلامتج وتخاف عليه مقهور على الطفل اكثر مماتخاف عليه

فارس... على ششششششنو انقهر عليج
على صخام وجهج يولي انتي هم الج عين تحجين

ريتال... فزيت من عيطتة بس جاوبتة
وليش مالي عين هذا قضاء الله وقدرة

فارس.... هههههههه ابوية هاي السوالف قشمري بيها غيري شنو شايفتني جاهل جدامج

ريتال... نزلت دموعي فارس الخاطر الله فهمني شبيك اني شمسويتلك

فارس... يابنت الناس اشتري روحج و وخري من جدامي

ريتال...بجيت بشهكة والله متطلع اذا متكولي اني شمسوية

فارس صار مثل المخبل يفتر بالغرفة ويصيح

فارس... متعرفين شبيه موووووو
زتيتي نفسج من الدرج حتى يوكع الطفل وتصيرين جدام الكل مسكينة مووووو

ريتال... شهكت وخليت ايدي على حلكي عزااا بعيني
لا فارس وحق الله مجنت اعرف بنفسي حامل

فارس..... لاتحلفييييييين جذب
جان جيتي كتيلي اريد انزلو عليشششششش هاي الحركات اني جان اخذتج تنزلي احسن مايصير بيج شي وتبلينة بيج

ريتال... فارس حرام عليك لاتظلمني

فارس... حرمت عليج عيشتج هاي الدموع بعد متاثر بيه
ريتال... تقدم عليه من خوفي خليت ايدي على وجهي خفت لايضربني

فارس... شفتيني حبيتج استغليتنيييييييي
بس وعد يا ريتال من اليوم راح اشوفج وجه فارس الثاني

ريتال... اشكد توسلت بي وحاولت اشرحلة وافهمه ابد منطاني فرصة عقلة قافل

ضرب الباب قوي وطلع
ومن هذا اليوم فارس بعد ماوصل الغرفتي

الكل بالبيت عرفوا اني وفارس على خلاف لان صار يبات يم صبا وهي مكيفة تنزل تتباها  اني اعرف ميتقرب منها بس هي مجرد وجوده بغرفتها يسعدها

جانوا محد يعرف شنو السبب المشكله بيني وبينه لان فارس كاللهم ما اقبل احد يدخل بمشاكلنة الخاصة

بدت الامتحانات ويمكن الشي الوحيد الفادني بهاي المشكلة هو صار عندي وقت حتى اكدر اسهر على دراستي
وصدوك لو كالوا رب ضارة نافعة

حتى صلاتي رجعت التزمت بيها لان من يوم الزوجت جنت يوم اصلي عشرة ما اصلي

الشغل بعده نفسه عليه حتى ملابس فارس صبا تكومهم الي بالحمام
واني انجبر اروح اغسلهن واكويهن

مرات اندار صدفة اشوف فارس يباوع عليه بس من يشوفني انتبهت يدير راسة

تعبت حيل هم قهر وضغط الامتحانات وسهر للصبح وشغل حتى من اكعد على الاكل بالكوة اكل

جانت تجي نسرين جايبتلي اكل جاهز وعصير  اتكول هذا من مؤمن بس اعرف كذب فارس هو يدزة الي

روحي طكت وقررت بس اخلص امتحاناتي اروح الاهلي وبعد ما ارجع على شنو اني ذلة روحي الهاي الدرجة صايرة مثل الخدامة الهم وفوك هذا كله ام فارس معايفتني بحالي
ارجع الاهلي والحياتي القديمة احسنلي.........

يتبع