رواية فارسي العاشق الفصل الأربعون 40 - بقلم بسمة البياتي

_  فارسي العاشق _
( بقلم بسمة البياتي)
_البارت الواحد والأربعون _

اخذني هشام ورحنا البيت اهلة طول الطريق اني صافنة وافكر بكلام مؤمن
معقولة صاير بفارس شي بسببي
زين رهف وينها شلون تقبل مؤمن يحجي وياي بهاي الطريقة ويحظرني

وصلنا البيت اهلة
جانت خالتة ام أيات زوجة حسام موجودة هي وبناتها

احنا جنا مقررين منسوي سبعة لان اكثر الاقارب والمعارف جانوا موجودين بحفلة العرس

بس كم صديقة من صديقات ام هشام مكدروا يحظرون للحفلة اليوم راح يجون

ميادة وتبارك ومنار هم موجودات

عصام ومنار هم طالعين بيت وحدهم

بس حسام ويا اهلة لان امه وابو متعلقين باطفالة ميقبلون يتركهم منطينا الطابق الثاني كله اله

هشام سلم على اهلة وطلعوا هو وعصام

ام هشام.. ريتال من يجون صديقاتي لاتكولين كدامهم انتي مطلقة

ريتال... انغثيت من كلمتها
جاوبتها وشنو المناسبة حتى اكوللهم

ام هشام... اخاف يفتحون مواضيع ويزلك لسانج وتذكرين زوجج السابق لهذا دا انبهج

ريتال... صعدت كأبتي فول بالبداية مؤمن وهسه ام هشام مو اني ناقصة مغثة

اجني صديقاتها وبناتهن ظليت كاعدة وياهن اجامل هاي وابتسم الهذيج واجاوب على اسالتهن
للمغرب يلا راحن

رجعوا هشام واخوانة

جنت بس اريد ارجع للشقة ابو وامه مقبلوا كالوا تعشوا وروحوا

وكفت يم البنات بالمطبخ ردت اساعدهن مقبلن

هشام.. ريتال تعالي

ريتال... رحت يما اخذني من ايدي اكو غرفة دخلني بيها اعتقد غرفة نور  قفل الباب

يااا هاي وين جايبني عيب من اهلك

هشام.. هو شنو العيب ليش احنا شمسوين

ريتال.. كعدني بصفة على السرير

كال احجيلي شبيج ليش ضايجة

صفنت بوجهة هذا شلون عرف

جاوبتة مابية شي ومضايجة بس شوية تعبانة

هشام... شكلج يكول غير هذا الكلام

ريتال... مممم وشيكول شكلي

هشام... يكول يمكن مغثوثة او احد مضوجج

ريتال... ههههه متوهم كولشي مابية ويلا امشي خلي نطلع

اشو هذا تمدد وسحبني مددني بصفة

هشششام اشدتسوي اهلك واخوانك كلهم برى عيب خلي نطلع

هشام... مو تكولين تعبانة اريدج ترتاحين

ريتال... غيرت كلامي متعبانة يلا كوم

باسني من شفايفي اريده يهدني ماكو ميزحزح

من اندكت باب الغرفة يلا ابتعد

نور... هشام ريتال صبينا العشى يلا تعالوا

هشام.. رووحي هسه نجي

ريتال... برطمت والله عيب طلعوا يعرفون اني وياك اهنا

هشام... هههههه شبيج راح تبجين واذا عرفوا شنو يعني قابل بايكين
يلا كومي نتعشى حتى نرجع للبيت

ريتال..باوعت عليه بطارف عيني قبل لاتطلع روح باوع بالمرآية

كال بستغراب ليش شكوو وكف كدام المرآية

خرب هاي شنوو

ريتال... هههه تستاهل هاي الحمرة اصلية متروح بسهولة

هشام... اذا اصلية شجابها بوجهي وانتي ملكيتي غير هذا اللون

ريتال... هاي من وكاحتك
وترى لونها وردي بس شوية غامق لو مخلية لون احمر شجان سويت

كمت مسحتها اله وطلعنا

الكل كاعدين على العشى ويباوعون علينا من جوة ليجوى

كملنا عشى ورجعنا

  بالطريق هشام كالي

صدك حياتي العصر عمي اتصل كال باجر معزومين يمنا

جاوبتة منو عمك؟

باوع عليه ورفع حاجبة
ههههه شنو منو عمك ابوج شبيج

ريتال... ههههه والنبي معبالي بابا

هشام... غير هما عمي وعمتي لعد شسميهم

ريتال.. حجيت بقلبي فارس جان يصيحهم ابو يزن وام يزن

ثاني يوم ساعة عشرة رحنا البيت اهلي

هشام.. ولج والله بعد وقت شعدنا من هسه رايحيلهم

ريتال... مشتاقتلهم واريد اكعد وياهم   لان انت اتكول العصر نرجع

هشام.. لازم تريدين تباتين؟

ريتال... اي والله ياريت

هشام.. بربج مصارلنة ثمان أيام مزوجين وتريدين تعوفيني
ولاتنسين طلعي من هاي الثمان ايام ثلاث أيام جنتي مسوية عليه حصار

ريتال.. يااااا ولا تنسى ممغزرات بعينك بقية الأيام المسهرني بيهن للصبح

هشام... هههههههه شلون انسى هذن تسجلن بالتاريخ

وصلنا البيت اهلي سلمنا عليهم من احضن بابا وماما احس روحي ارجع طفلة

اليوم جمعة بابا معنده دوام عفتة كاعد ويا هشام واني رحت اساعد ماما و رؤى

شدعوة هلكد اكل مسوين هو بس اني وهشام

ماما.. بالعافية عليكم حبيبتي

يامن واكف اباب المطبخ اصيحى ميقبل يجي

اكولكم هذا شبي

رؤى... زعلان منج

ريتال.. عااا ليش

رؤى... لان ازوجتي وعفتي خابص الدنيا يومية يسال عنج ليش راحت وشوكت تجي حتى باليل يروح الغرفتج حتى ينام يمج من يشوفها فارغة يبجي

ريتال.. وليش من اتصل متكولولي

رحت شلتة يدفع بيه اخير شي طكها بجية مال واحد مهضوم اووووف حبيبي

حضنتة وابوس بي ودموعي تنزل ويا

رؤى... بس لو اعرف هذا خزين الدموع العندج شوكت يخلص

ماما... انجبي هي حساسة خوما مثلج عديمة الاحساس

رؤى... خلف الله عليج نبع الحنان سويتني عديمة احساس

ريتال... كعدت يامن بحضني حبيبي ليش تبجي من تريدني اخذ موبايل ماما  خابرني اجي عليك
وانت هم كوللهم اروح يم ريتال وهما يجيبوك يمي

يامن.. لا انتي ابقي اهنا بعد لا تلوحين

رؤى... يبوووو هذا قافل شراح يقنعى

ريتال... اني صوجي هوايه خليتة يتعلق بيه مجنت حاسبة حساب ازوج واعوفة

صبينا الغدى يامن يفتر وراية يخاف اروح انمرد گلبي عليه

هشام اشكد صاحة يكولة تعال يمي مقبل يباوع على هشام بحقد

بعد الغدى وأخيراً كدرت انفرد برؤى

دخلنا الغرفتها كمت قفلت الباب وكعدت مقابيلها

رؤى اعرف بيج يوميه تتواصلين ويا رهف وهي تحجيلج كولشي يصير يمهم

كوليلي شصاير اهناك؟

رؤى بهت لونها جاوبت
شنو شصاير كولشي مصاير

ريتال.. رؤى لاتكذبين كوليلي فارس شبي شنو راد يموت ؟

رؤى... ياااا وانتي منين عرفتي

ريتال.. ششوفي يعني صاير شي

رؤى... انتي منين عرفتي الكالج راد يموت ليش محجالج السبب

ريتال... بعدين اكولج منين عرفت هسه احجيلي اريد اسمع منج بداعتي احجي الصدوك وبدون كذب

رؤى... هسه انتي شلج بهالسالفة

ريتال.. رؤؤؤؤى

رؤى... رهف كالت بيوم حنتج جانوا كاعدين رهف ومؤمن ونسرين
صاير حجي مؤمن كايل كدام امه اليوم حنة ريتال

امة سالتة شوكت العرس ومؤمن كايللها فلان يوم

بيوم عرسج تقريباً ساعة عشرة باليل فارس مموجود

رهف اتكول يومية ام فارس تنام من وقت بس اليوم تحوص كل شوية تتبسبس ويا شيماء وامها وتسال فارس ليش تاخر شوكت يجي

للساعة 11 ونص يلا راجع  شايف الكل كاعدين كاعد يمهم

ام فارس عليش هلكد تتاخر انت  عريس عايف عروستك المسكينة وسهران برى

فارس.. يعني انتي سهرانة اليوم حتى تسمعيني هالكلمتين

ام فارس...يمه غير اني گلبي عليك اريد اشوفك مرتاح
من يوم الطلكت الحية وانت مزوهر لا ليلك ليل ولا نهارك نهار وطول الوكت طالع من البيت
حتى من ازوجت هملت حرمتك وهي بعدها عروس

فارس... هسسساع انتي شرايده فهميني اكوووووم اولي من هيييين أشرفلي

رهف اتكول فارس راد يكوم امه حجت خلتة يجمد بمكانة

ام فارس... ظل بهاي حالتك حتى  الأمك ماعندك احترام وترفع صوتك عليها كلو الخاطر المسمومه
وياريتها لو تريدك هي بحضن زلمتها عايشة بالعسل وانت  أمووت روحك عليها

فارس مباوع على امه وسالها بشك شنو بحضن زلمتها

ام فارس... شنو ماتدري اليوم عرسها

فارس عيونة جدحت نار مندار على رهف ومؤمن وسالهم

احجوووو صدك هالحجي اليوم عرسسسسس ريتال

مؤمن مدنك راسة ومجاوبة اي

فارس صاير مثل الثور الهايج متخبل هاجم على مؤمن يريد يضربة يكولة ليش ما كتلي

اكو صينية استكانات دافرها رهف اتكول فرفح

عايفهم وصاعد فوك

نسرين... انتي ضروري تكوليلو  شفتي شصار بحالو

ام فارس.. خلي يعرف بلكي ينساها ونخلص منها

رهف اتكول اني ومؤمن نريد انام سمعنا صراخ شيماء الكل طلعوا يركضون صاعدين فوك
لاكين فارس متخربطت صاير مثل الجنازة

بالكوة حازم ومؤمن كادرين يشيلوا ونزلوا ماخذي للمستشفى وهناك عارفين مضروب جلطة

ريتال.. ششششنو

رؤى... اي بس الحمدلله خفيفة وعدت على خير

ريتال... همست بغصى يعني انجلط بسببي

رؤى... يااااا وانتي شعليج بسبب امه ولج من متخربط باقية تدعي عليج اتكول ابني راح مني بسبب المسمومه

ريتال... الحمدلله عدت على خير الله يحفظة الاهلة وزوجتة

رؤى.. هسه كوليلي انتي منين عرفتي

ريتال... ولج اتصلت على رهف وجاوبني مؤمن رزلني رزاله من هاي التسوى يكول بعد لاتتصلين ما اريدج تتواصلين ويا مرتي  اخير شي حظرني

رؤى... ياااا عزاااا بعينة هاي العائلة كلها فيوزات
اكول ليش رهف من البارحة مختفية بس لا منعها مني هم

ريتال... اني بعد ولا اتصل عليها

رؤى... هههههههههه اشتتصلين وانتي محظورة

ريتال... عابتلج قصدي اذا فتحت الحظر امداج بس تريديلج سالفة اضحكين عليها
اكوم احسنلي

العصر رجعنا من بيت اهلي
جنت نعسانة  اريد انام رن موبايلي

باوعت رهف تتصل احتاريت اجاوبها لو لا

اخذت الفون وطلعت لان هشام هستوى غفى

فتحت الخط
رهف.. بصوت تعبان هلو حبي شلونج

ريتال... هلو عيني شعجب فتحتي الحظر

سمعت صوت بجيها

رهف... ريتال والله ما ادري بي حاجي وياج وحاظرج

جنت كاعدة ويا امة وموبايلي بالغرفة من رجعت انصدمت من كالي حجيت ويا ريتال وحظرتها

ريتال... رهف اذا الاتصال عليه يسببلج مشاكل ويا زوجج لاتتصلين واني راح اقدر وضعج

رهف... ليششش هو بكيفة انتي صديقتي شلون اتركج اني هسه بيت اهلي اليوم اجيت زعلانة

ريتال... عااا بس لا تعاركتوا بسببي

رهف... لا مو بس بسببج ريتال اني مختنكة عيشتهم متنطاق لج انتيييي شلون تحملتيهم ثلاث سنوات

ريتال... فهميني شبيهم وياج

رهف..كولشي عدهم عيب وممنوع غيرت لبسي غيرت تصرفاتي طلعة الباب الحوش ما اطلع حتى وظيفة كالي لاتفكرين بيها ماعدنا مرة تتوظف
كل هذا ساكتة ومتحملة

تالي تجي وحدة مثل شيماء تتامر عليه ومحاربتني

ريتال... هههههه شنو شيماء طلعلها صوت

رهف... اي ولج عبالك الاميرة ديانا
ولان تعرف بيه اني صديقتج شدت وياي تخاف لا اخليج تحجين ويا فارس

ريتال... هاي من كل عقلها على شنو احجي ويا على صخام وجهم

رهف... اكول المؤمن احجي وياها وكفها عد حدها يكول لا عيب هاي صار مرة خالي مايصير احجي عليها

ريتال.. . زين ونسرين شنو رايها بالديصير

رهف... نسرين مرات من تشوف شيماء شلون تنتر بيه وتتامر

تحجي عليها اتكولها جنتي مو خدامة يمج وهيجي تحجين وياها
وكم مرة تعاركن

ريتال... عجيب الهدرجة صايرة وكحة

رهف... اي والمصيبة ام فارس صافة ويا شيماء 

ريتال... ههههه من جنت يمهم جانوا صافين ويا صبا هسة ويا شيماء

رهف... صبا هم رجعت للبيت من فارس تمرض ابو صبا واخوانها اجو عليه وتراضوا ويا

ريتال... ممممم حلوو الله يزيدهن
وانتي شوكت ترجعين

رهف... بصراحة ولا اريد ارجع

ريتال... الله يهديكم بس تريدين الصراحة مؤمن وكع من عيني
هو باي حق هيجي يرزلني ويحظرني حتى لو جان خايف ومقهور على فارس هذا الشي مينطي الحق يجاوز عليه قابل اني مرضتة 
جنت معتبرتة اخوية وصديقي بس للاسف طلع حاله من حال فارس

هشام... منو مرزلج؟

ريتال.. جنت منفعلة واحجي بعصبيه من سمعت صوت هشام فزيت  عزااا بعيني هذا بس لا جان يسمعني

جاوبتة هااا جاي احجي ويا صديقتي

رهف... يبوووو على حظج صرت اشك بنفسي اني فكر عليج
يلا حبي باي وعود طمنيني

ريتال... باي حبيبتي

جنت كاعدة بالاستقبال هشام اجة كعد على التخم مقابيلي

هشام... جاوبيني منو رزلج؟

ريتال... اذا جنت واكف دتسمعني اكيد عرفت منو

هشام... ليش اني زعطوط لو معندي رجولة حتى اوكف اتصنط
جنت رايح للحمام سمعتج تحجين بعصبية وكلامج جان واضح

هسه فهميني منو الرزلج وحظرج
وشنو طلع مثل فارس

ريتال... هذا مؤمن زوج صديقتي رهف

هشام.. لاتحجين كلمات متقاطعة

ريتال ما احب الكذب احجي الصراحة منو هذولة

ريتال... حجيت واني ميتة خوف من ردت فعلة خفت لايضربني

فارس طليقي ومؤمن ابن أختة

البارحة رهف جانت متصلة عليه واني بالحمام من طلعت رجعت اتصلت عليها

جاوبني مؤمن ظل يصيح عليه ويرزلني كال بعد لاتتصلين واقطعي علاقتج برهف

هشام عاقد حواجبة
جاوبني زين منو المتمرض بسببج

ريتال... فارس متمرض واشو مؤمن ذبها براسي

هشام... بما ان انفتح الموضوع كوليلي شنو جان سبب طلاقج

ريتال.. المووت عليه اهون من هذا السؤال
جاوبتة انت ليش مسالت هذا السؤال قبل لاترتبط بيه ليش دتسالة هسه

هشام... عادي اذا قبل الزواج او هسه المهم اريد اعرف السبب

ريتال... ما اعرف ليش بهاي اللحظة انقهرت على نفسي وحسيت بحجم الاهانة الهانها الي فارس

اريد اجاوبة ما اكدر غصيت بالبجي واني اذكر منظري من سحلني وشبعني ضرب وهو يسب ويغلط ومن سحب عليه السلاح يريد يقتلني

هشام... ريتال هسه هذا بجيج شنو افسرة!

ريتال... اطلقت لان ضربني

هشام... وشنو السبب

ريتال... دخيل الله شحجي شكول شك بيه ويا اخو

جاوبتة بسبب غيرتة جنت لابسة ملابس خفيفة واخو صاعد فوك باب المشتمل مفتوح واخو نازل عبالة شافني بهاي الملابس

اضطريت اكذب لان صعبة احجي الحقيقة

هشام.. وانتي وين جنتي

ريتال... بالغرفة واخو المسكين جان بمشتمل اخو الثاني ديسوي المبردة

هشام...بعدها هم حاول يرجعج

ريتال... هواية مبقى احد مجابة حتى شيوخ جاب

هشام... هذا مستحيل يكون رجال اليضرب زوجتة ويتهمها اخو شايفها بمنظر غير لائق هذا مريض

ريتال... انصدمت من هدوئة يوم بعد يوم يكبر بعيني
هذا لو فارس  جان بدون ميستفسر مني  شبعني كتل

هشام.. ريتال اني من البداية كتلج الماضي ماعليه بي واليوم لو ما سامع الكلام هم مجان سالتج
ومن هاي اللحظة اي علاقة بهذولك الناس ما أريد وحتى اسم طليقج ما اريده يجي على لسانج

ريتال.. بس رهف صديقتي من ايام الجامعة شلون اعوفها

هشام.. عادي احجي وياها بس بوجودي اني مو ما اثق بيج بس ما اثق بيهم هما

ريتال... هزيت راسي بالموافقة

هشام.. انطيني موبايلج

ريتال... كمت انطيتة اله
كال تعالي كعدي يمي

غير القفل خلى بصمتي وبصمتة

هشام.. موبايلي هم راح اخلي بصمتج بي

ريتال... تقربت منه وحضنتة دفنت راسي بصدرة ما اعرف ليش هيجي سويت بس فعلاً جنت محتاجة احضنه
هو حاوطني بايدة دفن راسة بركبتي همس باذني الله يقدرني واخليج اسعد انسانة بهاي الدنيا
بربي خلال هاي الفترة القصيرة حبيتج

يتبع

مساء الورد حبايبي

اعرف راح اتكولون البارت قصير 
بصراحة بالكوة كتبتة بسبب بعض التعليقات واهسي جدا خربان

هوايه داشوف يكولون القصة فشلت القصة صارت محلوة البارتات مبيها احداث
طولتيها بدون معنى
انهي القصة بعد على شنو مستمرة بيها

حبايبي القصة هاي احداثها ما اكدر اغير شششي 

واذا تريدون انهيهة معندي اعتراض احاول اختصرها بارت واحد وتنتهي المشكلة

تحياتي للجميع