رواية فارسي العاشق الفصل الحادي وثلاثون 31 - بقلم بسمة البياتي

_  فارسي العاشق _
( بقلم بسمة البياتي)
_البارت الثاني و الثلاثون _

اليوم جمعة فارس ميروح للمعمل كعدنا ساعة تسعة نزلت سويت ريوك وتريكنا اني ويا

نسرين وشيماء جانن ديسوون دولمة

نسرين.. ريتال من تخلصين تعالي ساعدينة بلف الدولمة حتى اخلصها بسرعة واكوم اسوي التشريب والبرياني

ريتال.. اوك بس اخلص اجي اساعدكم

خلصت كمت غسلت وجيت الف وياهن

فارس طلع برا

حازم ومؤمن كعدو يتريكون

مؤمن.. شدعوة هلكبر الجدر مسوين هاي منو راح ياكلها كلها

نسرين...بيت عادل ورغد يجون على الغدى

ريتال... وصلنا النص الجدر باللف انتبهت على ايدي اليسار حلقتي ماكو عزااا وين راحت وجهي صوفر ظليت اگلب بالحشوة ادورلها

نسرين... يولي راح تكسرين التمن على شنو جاي ادورين لفي مثل الاوادم ولاظلين تلعوصين بنعمة الله

ريتال... انبلع لساني عزاااا اذا اكوللها يمكن تگلب الدنيا على راسي وبنفس الوقت ما اكدر اظل ساكتة

حلقتي ماكو مدري وينها

نسرين... شنوووو صخام بوجهج يولو وين زتيتيها

ريتال.. نسرين انخبصت ادور وياي وترزل بيه

نسرين...ادري ششششبيج مثولة حلقة شكبرها وشكدها ماحسيتي من انملصت من ايدج
عفيه بنية ماتسوين شغلة براسها خير

مؤمن... يييييييمه على كيييفج
قابل شصار اكيد تلكيها واكعة بمكان ماكو داعي الهذا الصياح

ريتال.. اني مبرطمة بس واحد يكولي بز ابجي

نسرين... شلون ما اكبر الموضوع الحلقة اكبد نلفت بالجدر فرضاً احد بلعها واختنك عود بهذيج الساعة شراح انسوي

فارس... خير ياربي شبيكم من صباحيات الله صوتكم واصل الباب الحوش

نسرين.. من عمايل حرمتك

فارس..عقدت حواجبي دحجت على ريتال وجها يبجي
خير شمسوية حرمتي

نسرين... ضيعت حلقتها بنص الدولمة وخربت جدر شكبرو وشكدو مكسور ظهرنا عليه اني وهاي المسكينة اشرت على شيماء

فارس... قابل هي متقصدة تزتها بجدر الدولمة شبيج گلبتي الدنيا الخاطر ربج
وفرضا انلفت بالجدر يعني الراح تجي بحلكو ماراح يحس
عود وصيهم ينتبهون

نسرين... مو عيب شكوللهم ديربالكم حلقة الخاتون لاتجي بحلوكم

فارس.. نسسسسسرين ترى زودتيها ليش تخليني اشيل الجدر وازتو برا

هو منو غريب حتى عيب ومستحية
الجهال اكثرهم ماياكلون الدولمة وابوية وامي موزينة عليهم

نسرين... هذا هو خوية مصار شي انسى السالفة

صار وقت الغدى وقبل لايبدون بالأكل فارس وصاهم

كملنا الأكل وماكو
حتى بالدولمة الزاد منها رحت دورت  وهم ماكو

استغربت يا الله هاي وين اختفت اني متاكدة من جنت الف وياهم شفتها بيدي وهي مو صغيرة حتى تنبلع
و من جنا نلف  جان بينت بالحشوة

من صعدنا

فارس... لاتضوجين تولي اني اجيبلج احسن منها

ريتال... احب هاي الحلقة مال خطوبتنا مكتوب بيها اسمك والتاريخ
وما اعرف ليش گلبي انقبض من ضاعت هذا فال محلو

فارس...شلج بهالخرافات
هاي عود انتي المثقفة وهيجي تحجين كلشي بيد الله بنيتي

ريتال.. ونعم بالله

فارس اخذ قياس اصبعي ورا يومين جابلي وحدة تشبها بس اثكل من القديمة  كاتب عليها اسمة ونفس تاريخ خطوبتنا 

دنيا ظهر فارس بعده بالشغل

عندي ملابس وسخة شغلت الغسالة غسلتهم من كملت طلعت للحمام دخلت للهول داروح الغرفتي صبا جانت كاعدة

صبا... ريتال تعالي اريد احجي وياج

ريتال... همست بگلبي خير ياربي
جيت كعدت مقابيلها

صبا... اكولج انتي ليش هلكد انانية ومتخافين  الله

ريتال... عقدت حواجبي يعني حضرتج صحتيني حتى تهينيني
شلون اني انانية وما اخاف من الله؟

صبا... عجل كل هذا التسوينة شتسمي
مااخذة الرجال بس الج ليل ونهار يمج

ريتال... هاي مو انانية انتي من البداية تنازلتي عن كل حقوقج لاتجين هسه تشمرين الصوج بغيرج وتكولين انتي اخذتي

صبا... اني مرتو الأولى والي حق عليه حالي من حالج اني متاكدة انتي الماتخلينو يجي يمي

ريتال... صبا خلي نحجي بصراحة كوليلي ليش هسه يلا فارس حلا بعينج وصرتي تريدينة مو سنين وانتي متباعين بوجها ولا فكرتي بحقوقة
اشو انتي بنفسج طلبتي منه يزوج

صبا... اي كتلو ازوج بس مو معناتو تنازلت عنو وعفتو الج

ريتال... اني من اجه فارس يخطبني وعرفت بي مزوج تخبلت كلت مستحيل ابني سعادتي على تعاست غيري زوجتة شنو ذنبها اخذه منها

كالولي لاتخافين لان زوجته هي بنفسها تريده يزوج وعلاقتة بيها منتهية زواجهم بس على الورق
واني لهذا السبب وافقت

من اخذتة هو ليل ونهار يمي
بعدها بفترة الشيخ طلب من فارس يعدل بينا ماحجيت شي ولا اعترضت وتقبلت الموضوع بروح رياضية

بس انتي الله يسلمج يومين وگلبتي الدنيا وسويتي مشكلة وتصيحين كدام البيت كله تمرضت بسبب فارس

صدكيني بهذيج الفترة لو متقبلة قرب فارس منج ومخليتة يعدل بينا

اني هم جان تعودت على الوضع وتعايشت ويا

رجع فارس بس يبقة يمي وهم سويتيلج مشكلة وردتي حقوقج

اجه يمج اقل من شهر وهم عدتي نفس الاسطوانة

صبا انتي بافعالج خسرتي فارس

راح يصير ثلاث سنوات فارس يمي
يوم  بعد يوم غيرتي عليه ازيد

لاتتوقعين بعد اكدر اشوفة ويا غيري
اعرف انتي مرتة واني النزلت عليج ضرة

بس كل هذا بسببج اذا تريدين تلومين احد لومي نفسج انتي بافعالج ضيعتي من ايدج

صبا... شوفي هذا كلامج كلو ما اشتري بفلس احمر
فارسسس زلمتي غصباً عليج
والصار بالماضي شي راح وانتهى اني عليه بهسه اريد فارس يرد الحضني
وادري بيج انتي المانعتو مخليتو مايندل دربو شتحجين يباوع على حلكج مستعد يوكف بوجه الكل علمودج

ريتال... اكولج عيني ترى الرجال اذا يريد شي يسوي واكبر واحد ميكدر يوكف بوجها
فارس لو جان يريد يجي يمج لاتتوقعين راح اكدر امنعة لان اول وتالي تبقين انتي زوجتة

وهو من يوكف كدام الكل علمودي لان يدري بيه هوايه دانظلم بهذا البيت الكل ضدي

احلفج بالله جاوبيني لو انتي بمكاني تتحملين كل هذا الذل والأهانه

والله عايشة بهذا البيت مثل الغريبة
هسه اني عندي عطلة مرات اختنك من الكعدة وحدي انزل شوية يمكم اسمع اشكال والوان الحجي

بس هند الوحيده تحجي وياي عادي والمرة اكثر الوقت ملتهية باطفالها وبيتها

حتى من يجي خطار تكعدون تحجون عليه

بس وجود فارس بهالبيت مهون عليه هاي العيشة

صبا... طلعنا وحوش وانتي المظلومة وبالحقيقة انتي اكبر حيه

اليسونو بيج تستاهلينو لان الكل يعرفج على حقيقتج بس فارس معمي بسحورتج

عمتي فلا تنلأم من اتكول ساطرة الرجال بالسحر مخليتو مايندل دربو

ريتال... اباوع عليها بصدمة ما أدري اضحك لو ابجي انوب طلعت اسوي سحورة

عفت السحر الاهلة حبيبتي الله فوك ويعرف اني شنو
حسبي الله ونعم الوكيل

صبا...  بنت الكلب شنو قصدج  احنا سحارات

ريتال... ابوية تاج راسج لاتغلطين افتهمتتتي

صبا... اني اعلمج بسيطة

ريتال... صبا عافتني ونزلت دخلت للغرفة والقهر يعصر گلبي الله ياخذها انوب تتهمني اسوي سحر 

دقائق واندفرت باب الغرفة دخلت ام فارس عيونها تجدح نار

ام فارس... هاي منوووووو التسوي سحر ياساقطة  ياعارررررر اليوم انعل ابوج لابو اليطلع وراج

ريتال.. شكوووووو جاية هادة فوك ما مطلعتني اسوووي سحر انتي جاية تتعاركين وتحجين

ام فارس  تريد تضربني اجت ام شيماء ل
زمتها
ام فارس... ولكم عوووووفوني هاي الكلبة الدايحة اتكول علية اسوووي سحر واعرف السحارات

ريتال... اني محاجيييييية هيجي مفهوووم انتي الي كايلة  ريتال مسوية سحر الفارس

ام فارس... سمعتووووو تريد تفر السالفة وتسوي نفسها فقيرة واحنا الحاجين عليها

ريتال... سمعنا صياح الشيخ جوة ام فارس خافت ونزلت

كاعدة بمكاني متحركت صافنة على وضعي
شلون راح اكدر اخلص هذا العمر وياهم وهما لوبيدهم يشربون من دمي

دخل  فارس وجها مدخن من الغضب شكلة يخوف

فارس... اني امي تسوي سحورة مووو

ريتال.. بلعت ريق والله مو هيج حجيت صبا هي...

فارس... سسسسسكتي لان تشوفيني ادافعلج جدام اميييييي عبالج مفضلج عليها
لج تروحين فدووووة الرجلها

ريتال... والنبي مكلت امك تسوي سحر
ليش متصدك صبا هي كالت عمتي اتكول ريتال مسوية سحر الفارس

فارس... وفوكاها كاعد اجذبييييين اخ لو ما منطي وعد الأبوية جان دفنتج بأرضج

كومي جداميييي

ريتال..وين
فارس جرني من كتفي من العصبية غرس اصابعة بكتفي

اخذني سحل عبالك جار خروف مو بشر
كل شوية اعثر على الدرج اريد اوكع

دخلني للربعة امه كاعدة دفعني يم رجل امه

فارس... يلا بوسسسسي رجلها واعتذري منها

ريتال..انصدمت هذا اكيد تخبل

ام فارس... ما اريد اشوفها جدامي بهذا عمري والشيب مالي راسي تجي زعطوطة تكول عليه تسوي سحر لو ميتة ولا جاي هاليوم

فارس.. اسم الله عليج  تروحلج فدوة اليحجي عليج اكص لسانو وانعل والديه
يلا ريتااااااال

الشيخ... كومي ريتال صعدي الغرفتج وانت بطل خبال

فارس...ماتصعد اذا ماتحب على رجل اميييييي

اذا صعدت ادفنننننها وهي عايشة 

ريتال.. جنت غاصة بالبجي اشكد ذلوني هذولة الناس
ممسسسوية شي حرااااام عليكم والله محاجية صبا هي كالتلي انتي مسوية سحر الفارس

كتلها عفت السحر الاهله ليششششش متصدكوني

الشيخ... كومي صعدي الغرفتج واريد رجال يمنعج

ريتال... فارس شايط من الغضب بس ميكدر يحجي شي يخاف على صحة ابو

صعدت اركض
صعد فارس وراية يفتر بالغرفة ويسب ويغلط كل شوية يهد عليه يريد يضربني وبالكوة يلزم روحه

جنت مكرفصة وارجف من الخوف

حتى خفت اكوله اريد اروح الاهلي

فارس هالمرة گلبة جداً قسى عليه ثلاث ايام ميحجي وياي ولايباوع بوجهي

يجي للغرفة بس وقت اليريد ينام اني هم عفتة براحتة
بعد ما حاولت ابررلة

اما علاقتي ويا اهلة شبه مقطوعة لا احجي وياهم ولايحجون وياي

جنت انزل جوة بس من اجوع او انزل اشتغل

خلصت غسل مواعين العشى جنت مختنكة والدنيا ضايقة بيه

طلعت كعدت بالحديقة خليت الهيتفون باذني شكلتة على الموبايل ظليت اسمع اغاني

اجة مؤمن يمي

مؤمن.. هااا يولو شعندج كاعدة هين وحدج

ريتال... شلت الهيتفون وجاوبتة
لعد وين اولي ضايجة

مؤمن.. حدرت يمها لاتضوجين ماكو شي يسوى

ريتال... كل هذا الديصير بيه وتكولي ميسوى
مؤمن اني بس بهذا البيت عرفت شنو معنى الذل

مؤمن... حقج يولو بس الله منطينة نعمة النسيان حاولي تنسين جدتي مرة جبيرة لاتاخذين على كلامها

ريتال... زين بيبيتك مرة كبيرة والبقية شنو فلمهم
وحق الله محجيت شي غلط
حجيت المؤمن كل الدار بيني وبين صبا

مؤمن... وروح ابوية مصدكج وحتى قبل لاتبررين ادري بيج ماعندج هالسوالف

ريتال... كمت ابجي لعد ليش فارس ممصدكني ومتغير عليه

دنحجي اجة حازم يمنا ظليت كاعدة متحركت من مكاني

حازم... كلما اشوفج كاعدة بالحديقة لازم الكيج تبجين

ريتال... شسوي هذا حظي اليعيش اهنا ميحصل غير الدموع

حازم... طنشششي وانتي ترتاحين

ريتال... اكو امور صعب واحد يطنشها

انفتح باب الحوش دخل فارس من شافنة بقى واكف بمكانة

اني استمريت بالكلام ويا حازم

فارس دخل جوة اجاني مسج من فارس

كومي صعدي الغرفتج

مجاوبتة نص ساعة يلا صعدت

فارس متمدد بالفراش وشكلة مدلغم

وكفت كدام المرآية مشطت شعري وضربت كريم الأيدي

فارس... صارلي نص ساعة من كتلج صعدي ليش ماصعدتي

ريتال.. مجاوبتة

فارس.. مو كاعد احجي وياح ليششش كاعدة ويا حازم وماخذة راحتج بالسوالف

ريتال.. مكاعدة ويا وحدي مؤمن جان ويانة وعادي واذا سولفت ويا قابل انگلبت الدنيا
اصلاً خلف الله عليه وعلى مؤمن كاعدين يحجون وياي قبل لا حبالي الصوتية تيبس واصير خرسة من السكوت

فارس... هذا اخر انذار الج اذا اشوفج بعد كاعدة تسوالفين ويا لاتلومين الا نفسج

ريتال.. صار تدلل اكو اوامر ثانية

فارس... مبين الحجي مو عاجبج

ريتال... هسه انت موتريد بعد ما احجي ويا خلص مراح احجي تصبح على خير انطيتة ظهري

اجة يريد يحضني عطت بي
وخرررررر والنبي اذا جيت يمي اعوفلك الغرفة واطلع

فارس... صارلنة ثلاث ايام منتحاجة مو كافي 

ربتال...هههههه والله ضحكتني تزعل وترضى بكيفك واني لأزم اتقبل تقلبات مزاجك

فارس اني كرررررررهتك ولاعبالك راح انسى السويتة بيه

فارس... طبج مرض اني صوجي مكبر راسج

ريتال... يومين بقة فارس يحاول يراضيني واني رافضة ما اكدر انسى شلون شمرني يم رجل امه ويكولي بوسيها

اليوم الجو نار والكهرباء زفت بس المبردات تشتغل على المولدة

من الحر حتى هواء المبردة نار

اني من يوم المشكلة ما اكعد وياهم على  الإكل

اليوم الشيخ دز عليه وخلاني اكعد اتغدى وياهم

كملنا اكل دنلم المواعين

وسام... حازم انت ومؤمن تعالو عاونوني نغير حلفة المبردة مدري شبيها  وهواها يبخ سم الجهال ماتوا من الحر

حازم... انت من كل عقلك اصعد فوك بهل شمس اخذ مؤمن يعاونك

مؤمن.. مو مؤمن ابنك الصغير جاي تتبرع بي

وسام... بدون كلام زايد يلا امشو جدامي حتى نخلصها بسرعة

مؤمن.. هساع خلي نكمل الجاي بعدين  نجي وياك

ريتال.. عفتهم وصعدت الطابق الثاني حار اكثر من الجوة لان الشمس تضرب عليه 
طلعتلي دشداشة خفيفة فوك الركبة
الردن تعلاكة  لونها بنفسجي فاتح

اخذتها ورحت للحمام ذبيت ماي بارد على جسمي لبستها وطلعت
شمرت نفسي بنص السرير، بطريقة عشوائية دقائق واخذتني النومة

فارس... اليوم وسام والولد رجعوا قبلي للبيت اني هم خلصت شغلي بسرعة ورجعت الجو حار مو مال ابقة بالشمس

وصلت للبيت جنت الهث من الحر دخلت للمطبخ البيت هدوء الكل نايمين وكفت يم البراد اشرب ماي

الدرج صاير بالجهة الثانية مقابيل باب المطبخ

دحجت حازم نزل سريع من فوك وهو بطرك الشورت وفانيلتو بيدو يسمح بيها العرك
على السريع فات للحمام

من شفت منظرو الماي طلع من خشمي  عقل ودين ماظلن براسي اني مانعوا يوصل للطابق الثاني هذا شصعدوا وشنو هذا منظروا

صعدت اركض سويت الدرج خطوتين

دخلت للغرفة انصدمت من شكل هاي الثانية ثوبها خفيف ومرفوع وجسمها كلو برة
ملابسها وطريقة نومتها تخلي اكبر واحد يشك بيها

الشيطان بهذيج اللحظة تربع براسي

هجمت عليها جريتها من شعرها نزلتها سحل للكاع

ريتال.. نايمة وجان انجر من شعري فزيت مثل المخبلة انسحلت بالكاع اريد استوعب الديصير ما اكدر هذا فارس لالا مو فارس هذا وحش

نزلني للكاع صرت بين السرير والكومدي مالت السرير

الرفس والدفرات تجيني من كل جهة بوكسيات كفخات  جنت اصرخ من كل گلبي حسيت خلص هاي نهايتي فارس معمي ميشوف كدامه يسبني بابشع الألفاظ

فارس.... ولج اليووووووووم اموتج ياساقطة ششششيسسسسوي حازم  هيييين

ريتال.. اشكد متاذية بس من كال حازم جان اهنا انرعبت معقوووولة حازم داخل الغرفتي واني ما ادري

على صوت صراخي وصياح فارس انفتحت الباب ودخلوا وسام ومؤمن وهند وصبا

وسام ومؤمن من شافوا منظري ولبسي، لابيهم يتقدمون ولابيهم يرجعون

اجه وسام  على السريع جر فارس
وهند سحبت شرشف السرير غطتني بي

فارس...ولكم عووووووفوني اموت هاي الساقطة

فارس... دفرت وسام وتوجهت للكنتور عندي رشاشة  طلعتها

ريتال.. من شفتة طلع السلاح كمت اصرخ صوتي انجرح من الصراخ

وسام ومؤمن يتلون ويا فارس يريدون ياخذون السلاح منه

الكل صعدوا للغرفة حتى الشيخ رغم ممنوع عليه صعدت الدرج وميكدر بس لكيتة فوك اجه وكف كدام فارس

الكل بس يريدون يعرفون فارس شبي

فارس.. لازميني درت راسي شفت حازم  فلتت روحي من ايدهم وكمزت عليه

حازم.. شششششبيك تخبلت

فارس... ياكلب ياعاررررررر اليوم اشرب من دمك لك شششسوي جنت فوك
لك شفتك بعيني وانت نازل بطرك الشورت

وسام... لا عاد محد عارررررررر غيرك لك جان يمي هو مؤؤؤؤؤؤمن اني جدام الكل اخذتهم يسوون المبردة وياي
وحازم جدامنا نزع تشيرتو من الحر

لك تشك بحرمتك ويا اخوك

حازم... هجمت على فارس لك هاي من كل عقلك اذا اني واحد طايييييح حظ شلون تتهم مرتك ولك هاي اشششششرف مني ومنك
بحياتها مارفعت عينها بعيني

الشيخ كعد على السرير

الشيخ... الله لو ماخذ عمري ولا شايف هاليوم حرامات تعبي وكسرت ظهري بيكم

ولك فارس سودت وجهي كون مكسورة ايدك قبل لاتمدها على بنت الناس
كل اليصير بالبنية بسببي اني جبتها يم ناس ميخافون الله
خطيتها بركبتي اليوم الدين

دحجت على ريتال اني ريحة الجنة ما اشمها بسبب الظلم النظلمتي من اهل بيتي

ريتال.  اني شبه فاقدة مجاي استوعب الديصير  اريد اتحرك من وجع جسمي ما اكدر خشمي وحلكي يصبون دم صوتي ميطلع عجزت عن الكلام

فارس جامد بمكانة مايحجي شي مثل الواحد المصدوم

وسام اخذ فارس من ايده وطلعة من الغرفة

الشيخ راد يطلع

ما اعرف شلون كدرت انطق وحجيت

عمو لحظة

الشيخ باوع عليه بانكسار
انت و عدتني بس يصير شي تاخذني الأهلي وهسه اني اريد اروحلهم

الشيخ... بنيتي مابيها مجال تغيرين رايج يولي شكول الاهلج اذا شافوج هيجي شلون اكدر احط عيني بعين ابوج وهو بيوم عرسج امنج يمي

ريتال.. جنت بالكوة احجي عمو اذا ما اخذتوني اكتل روحي وابليكم

الشيخ... هساع اخلي وسام ياخذج الهم

نسرين.. هند امشي جيبلها ملابس

ريتال.. لا ما اريد بس انطوني صاية وشال

نسرين... يولي هدومج كلها دم

ريتال.. تهستر بالبجي اني اريد اهلي يشوفوني بهذا منظري خلي يشوفون بنتهم المدلله شصار بحالها

هند... لا حول ولا قوة الا بالله عجل بس تعالي غسلي وجهج من الدم

ريتال.. بالموت كدرت اتحرك من مكاني  الألم ذبحني

وصلت يم باب الغرفة صبا جانت واكفة

حجيت وياها واني ابجي

راح اعوفلج فارس اشبعي بي بس ثقي بالله مراح اسامحج على كل تهمة تهمتينيها ومراح اسامح اي واحد بيكم
الله ياخذ حقي منكم

طول عمرج تخافين من المرض بس من تكذبين وتلفقين كلام عادي متخافين 

صبا ساكتة مجاوبتني

كملت طريقي رحت غسلت وجهي ولبسوني الصاية

هند ساعدتني انزل الدرج

هند.. اني وسام راح نوصلج

ريتال... مابيه حيل اجاوبها سمعت صوت فارس بالربعة ويا ابو جلبت بايد هند من الخوف
وسام جان ينتظرنا بالسيارة
صعدت ورجعت راسي ليورا طلعت من هذا البيت بالملابس العلية......

يتبع