رواية عشقتها ولكن الفصل الثاني عشر 12 - بقلم دينا دخيل

عبدالرحمن مع سالم ومحمد وريان في القاعة بيتابعوا العمال. سالم باستغراب: هي القاعة دي مش صغيرة يا عبدالرحمن؟ عبدالرحمن: لا يا بابا، عشان دي للرجالة بس. محمد: اومال البنات والستات هيبقوا فين؟ عبدالرحمن: في القاعة اللي جنب دي وفي باب بينهم. مالك عامل دي مفاجأة لأمل عشان عارف إنها مش بتحب الأفراح المختلطة، فحجز قاعتين عشان تبقى خطوبة إسلامي. سالم: الحاجات دي مكلفة عليه أوي.

محمد: فعلاً يا سالم، بس واضح إن مالك شاري أمل وبالغالي. ربنا يسعدهم. سالم: يارب يا محمد. عبدالرحمن: المعازيم زمانهم على وصول، هاتروح تجيب العرسان أنت يا ريان، صح؟ ريان: آه يا عبدالرحمن. أنا خليتهم يزينوا العربية عشان أجيبهم بيها. عبدالرحمن: ماشي، وأنا هنا مكانك على ما تيجي وهروح أجيب أمي ومرات عمي. ريان: تمام. عند ريان، وصل لمالك وكان لابس بدلة زهرية وكان زي القمر. ريان بفرحة: إيه الحلاوة دي يا مالك؟

ربنا يحميك يا حبيبي. مالك بهزار: هااااا إيه دا؟ بتعاكسني كدا ويوم خطوبتي؟ دي أمل تقتلك. ريان: هههههه، أنت رايح خطوبتك وبرضه لسه ما عقلتش؟ مالك: أنا فرحان أوووي يا ريان. ريان: ربنا يسعدك يا صاحبي، ويلا بقا نروح نجيب العروسة وبنت عم العروسة. مالك: عقبال ما تبقي مكاني. ريان: قريب إن شاء الله. مالك: يا واثق أنت يا جامد. ريان: هههههههه، يالا يا بني بقا.

عند إسراء وأمل، كانت خلاص جهزت وكانت لابسة فستان زيتي، كان واسع وطويل جداً، وخمار زيتي درجة أفتح من الفستان، وتاج ورد على الخمار، وكانت زي القمر. إسراء: بسم الله ما شاء الله، إيه الحلاوة والقمر دا يا أمل؟ أمل: بجد يا إسراء؟ إسراء: بجد يا قلب إسراء، عسل أوووي. ربنا يحميكي من العين يا روحي. أمل قامت حضنتها: أنا مبسوطة جداً يا سوسو، عقبالك يا روحي. إسراء: حبيبتي تسلميلي. ويلا، شكل عريسك وصل.

ودخل مالك الكوافير وشاف أمل ووقف مكانه وهو بيبصلها ومش بيتحرك ولا يتكلم. أمل: احم... مالك. مالك: إيه القمرررر دا يا أمل؟ ربنا يباركلي فيكي. أمل كانت مكسوفة جداً، وشها أحمر، وده زاد جمالها أكتر. مالك: لا وحياتك، كل ما تتكسفي تحلوي أكتر وأنا مش هستحمل. أمل بكسوف: مااالك، أنت بتقول إيه؟ مالك: عيون مالك. إسراء: نحن هناااا يا بشمهندس. مالك: ههههه، منورة. إسراء: بنورك، يالا بينا ولا إيه؟ مالك: آه يالا.

وطلع مالك وأمل ومعاهم إسراء، اللي خطفت قلب ريان أول ما شافها. وكانت لابسة فستان أسود رقيق أوي وواسع وعليه نقاب وخمار كشمير. ريان لنفسه: يخربيت جمالك... يالهووي، يعني لو خطفتك دلوقتي واتجوزتك هترتاحي بأم حلاوتك دي. ريان كان لابس بدلة سوداء وكان وسيم جداً. ركبت أمل ومالك في عربية ريان ورا. وركبت إسراء قدام جنبه ريان، وكانت حاسة إن قلبها هيوقف من سرعة دقاته.

وريان كان حاسس إنه بيملك الدنيا كلها وهي بس راكبة جنبه، وحسم قراره إنه لازم ياخد خطوة في علاقتهم ويريح قلبه. مالك: عاملك مفاجأة على فكرة لما نوصل. أمل: مفاجأة إيه؟ مالك: شوفي أنتِ كان نفسك في إيه لما تتخطبي. أمل بتفكير: إن الخطوبة متبقاش مختلطة. بس بتسأل ليه؟ مالك: عشان أنا معنديش غيرك أحققله اللي بتحتاجيه. أمل بفرحة: قصدك إن الخطوبة إسلامي وحجزت قاعتين؟ مالك: آه، مستحيل يبقى نفسك في حاجة وما أعملهاش.

أمل: ربنا يخليك ليا يا مالك. وفي سرها: بحبك بحبك بحبك. أمل: بس عرفت منين المعلومة دي؟ مالك: بصراحة، في حد ساعدني. أمل: حد مين؟ أكيد إسراء؟ إسراء: آه أنا يا حبيبتي. أمل: ربنا يخليكي ليا يا إسراء، أنتِ أجمل أخت في الدنيا. إسراء: ويباركلي فيكي يا روحي. مالك: وريان بقا هو اللي عرف يوصل لحجز القاعتين ورتب كل حاجة. أمل: متشكرة جداً يا بشمهندس ريان. ريان: متقوليش كدا، أنتي خلاص تعتبري مرات أخويا.

مالك: يااه، امتى بقا تبقي مراتي. أمل اتكسفت وبصت من شباك العربية. والكل ضحك على كسوفها ده. ووصلوا مكان الخطوبة. وكان عبدالرحمن وسالم ومحمد وحنان وليلي ونجوى واقفين برا مستنيهم. ودمعة فرح نزلت من عين عبدالرحمن لما شاف أخته الصغيرة بقت عروسة. عبدالرحمن حضنها: مبروك يا مولتي، كبرتي وبقيتي عروسة وزي القمر. أمل: الله يبارك فيك يا عبدالرحمن، تسلملي. مالك بهزار: إيه يعم كفاية أحضان، أنا راجل دمي حامي وبغير على خطيبتي.

عبدالرحمن: هههههههههههه، اسكت يالااا، دي أختي قبل ما تبقى خطيبتك. الكل ضحك على كلامهم وسلموا وباركوا لبعض وكانوا فرحانين جداً. وبعدها دخلت البنات في القاعة الخاصة بيهم، ونفس الكلام للرجالة. وكانت أمل وكل صحابها معاها وفرحانين وبيرقصوا ويباركولها. ونفس الكلام عند مالك وصحابه. وبعدين دخل مالك لأمل عشان يلبسها الشبكة. فأمل لبست دبلتها وهو لبس دبلته، كل واحد لوحده عشان مش يلمسها، ولبست الإنسيال. وبعدها لبسها السلسلة.

وبدأوا يتصوروا مع قرايبهم ويتصوروا مع بعض بعد الشبكة و... مالك: مبروك عليا أناا. أمل: الله يبارك فيك. مالك: فرحانة؟ أمل: جدااا جدااا. مالك: أعيش وأقدر أفرحك. ورجع مالك عند صحابه. راحت نجوى ومعاها إلهام وسميرة يباركوا لأمل. نجوى: دي سميرة مامت ريان. سميرة بتكبر: أهلاً يا أمل، مبروك. أمل: الله يبارك في حضرتك. نجوى: ودي يا سميرة إسراء بنت عمها وبتشتغل مع ريان. سميرة اتعصبت لما عرفت إن دي اللي ريان معجب بيها و...

سميرة: اها، أهلاً. ومشيت وسابتهم هي وإلهام وراحوا قاعدوا على ترابيزة. وإسراء ما ارتاحتش لطريقتها ولا نظراتها، بس مفكرتش كتير ورجعت تقعد جمب أمل. نجوى: معلش، هي طريقتها كدا مع كله. إسراء: ولا يهمك يا نوجااا. نجوى: حبيبتي. إلهام: شوفتي يا طنط، هي دي بقا إسراء؟ نجوى: بيئة أووي، شكل العيلة كلها كدا. والفرح كمان لوكال أوي، مش عارفة مالك ملقاش غيرها. إلهام: فعلاً. شوية ونمشي. سميرة: آه أحسن.

وأنتم بقا وشطارتكم وتبعدي إسراء عن ريان. إلهام: حاضر. متقلقيش. عند ريان راح لعبدالرحمن. ريان: مبروك يا عبدالرحمن وعقبالك. عبدالرحمن: الله يبارك فيك يا بشمهندس. ريان: لا قولي ريان من غير قابه. عبدالرحمن: ماشي يا ريان. ريان: كنت عايزك في موضوع. عبدالرحمن: أؤمر. ريان: تسلم. احم...

أنا كنت عايز أتقدم لإسراء بنت عمك. طبعًا عارف إن ده مش وقته أفتح الموضوع، بس قلت أقولك، وانت زي أخوها، عشان تبقى تفاتح باباها. وكمان عشان خايف تروح من إيدي. عبدالرحمن مبتسم: انت فاجأتني، بس ده شرف لينا. ريان: تسلم يا عبدالرحمن. عبدالرحمن: هههههههههههه انتو على آخر الزمن شغلتوني خاطبة. ريان: هههههههههههه معلش يا عم. عقبالك. عبدالرحمن: يارب 😂.

ريان: ما تنساش بقا على بكرة كده تقول لعمك وبابا، وتبلغني. وأنا هجيب أختي وجدتي وأمي وأجي أخطبها. عبدالرحمن: أنت عندك إخوات بنات؟ ريان: آه... سما أختي، بس هي مسافرة بقالها فترة بتكمل دراستها برا. وإن شاء الله هتيجي الأسبوع الجاي. عبدالرحمن: معلش مكنتش أعرف. ريان: لا محدش تقريبًا يعرف، حتى إسراء وأمل، عشان مسافرة دايمًا. عبدالرحمن: تمام. استووووب. سما الأسيوطي تبقى أخت ريان.

قصيرة وبشرتها بيضاء وشعرها بني وقصير. مش محجبة، بس لبسها محترم جدًا، وده بأوامر ريان. بتدرس برا في كلية طب. عندها 23 سنة. بتحب أكتر حد في حياتها ريان، وهو بالنسبالها قدوة وبتفتخر بيه جدًا. وهو بيحبها زي بنته ومش بيخليها تحتاج حاجة. وسميرة بتحبها أوي وفرحانة إنها هترجع مصر وتفضل جنبها. خلصت الخطوبة وريان ومالك وصلوا الكل لبيتهم. والكل طلع يرتاح. في أوضة أمل وإسراء.

أمل وهي بتبص لدبلتها: هيييييح، أخيرًا دبلته بقت في إيديا. إسراء: هنبدأ وصلة المحن بدري 🙂. أمل: بكرة أما تتخطبي ابقى أسمعك يا أختي. إسراء: لما بقا 😂. ويالا ننام، ده في شغل بكرة. الواحد كان مرتاح بقاله أربع أيام. مش عارفة كانوا ادونا بكرة إجازة كمان عشان الخطوبة دي. أمل: ده مالك بيقولي حالي هيوقف بسببك. إسراء: دلوقتي بقا مالك كده من غير بشمهندس 😉. أمل: آه مالك حبيب قلبي. إسراء: طب أنا هنام عشان مرارتي.

أمل: هههههههههههه تصبحي على خير. أمل: وانتي من أهله. وأمل كان مالك بيكلمها واتساب يعرفها إنه وصل. مالك: ها هتيجي الشغل بكرة؟ أمل: آه إن شاء الله. أنا أصلًا هموت وأنام. مالك: بعد الشر عليكي من الموت. خلاص هسيبك ترتاحي. أمل: تصبح على خير 🌼. مالك: وإنتي من أهلي 🧡. ونامت أمل وهي فرحانة. تاني يوم الصبح. وصلت إسراء وأمل الشركة وكل واحدة راحت على مكتبها. عند أمل. مي: عروستنا القمررر... ألف مبروك.

أمل: الله يبارك فيكي يا حبيبتي. أحمد: ألف مبروك يا آنسة أمل. أمل: الله يبارك فيك يا بشمهندس... عقبالك. أحمد: شكرًا. وقعدت أمل على مكتبها تشتغل، وبعدين أخدت الملف ودخلت لمالك يوقع عليه. أمل: صباح الخير. مالك: صباح الورد. عاملة إيه النهارده؟ أمل: الحمد لله. أنا خلصت الملف الحمد لله أخيرًا. تقدر توقع عليه يا بشمهندس دلوقتي. مالك: أمل... هي إيه اللي في إيدك اليمين دي؟ أمل باستغراب: دبلة خطوبتنا.

مالك: ولما انتي فاكرة دبله خطوبتنا... إيه لازمتها بشمهندس بقا؟ أمل: اااه... لسه على ما أتعود. مالك: اتعودي بسرعة بقا. أمل: بس على فكرة كنت ممكن تقول إن مقولش بشمهندس على طول، بدل اللفة اللي قولتها دي. مالك: نحن نختلف عن الآخرون 😌. أمل: هههههه طب شوف الملف ووقعه يالا، عايزين نشوف شغلنا. مالك: أمرك يا باشا. ووقع مالك على الملف وعطوهالها. هروحك انتي واسراء معايا لما نخلص. أمل: بس ملوش لازمة.

مالك: والله. أومال تتبهدلوا في المواصلات. وبعدين أنا قولت لعبدالرحمن متقلقيش. أمل: خلاص ماشي. وخرجت من المكتب. عند إسراء وريان. إسراء: أنا خلصت يا بشمهندس كل الشغل المتأخر. ريان بابتسامة: إيه الشطارة دي. كويس أوي يا بشمهندسة. إسراء: بنتعلم من حضرتك. ريان: شكرًا على الثقة دي. انتي خلصتي وهتمشي صح؟ إسراء: آه همشي دلوقتي. في حاجة تاني أعملها؟ ريان: لا مفيش. آه صح، في مفاجأة هتعرفيها لما تروحي.

إسراء باستغراب: مفاجأة إيه وبخصوص إيه؟ ريان: هتعرفيها، متقلقيش. يالا روحي عشان متتأخريش. إسراء: حاضر. وخرجت إسراء وهي مستغربة وراحت لأمل ومالك وصلهم وطلع سلم على أهلها ومشي. محمد: إسراء. إسراء: نعم يا بابا. محمد: ريان حبيبتي متقدملك. إسراء بصدمة: إيههه... نعم. حنان: رأيك إيه؟ عبدالرحمن: هو إحنا سألنا عليه وكويس ومحترم جدًا. ليلي: وكفاية إنه صاحب مالك. إسراء اتكسفت وبصت في الأرض،

وقالت: اللي حضرتك تشوفه يا بابا. وطلعت تجري على أوضتها وهي مكسوفة أوي بس فرحانة جدًا وقلبها بيدق جامد أوي. وعرفت معنى كلام ريان وإن فيه مفاجأة ليها. وفعلاً مفاجأة وأحلى مفاجأة كمان. أمل: إيه يا عم 😉. شكلنا هنتخطب قريب. إسراء: أنا مش بتخيل صح يا أمل؟ أمل: لا يا حبيبتي مش بتتخيلي. عبدالرحمن قالي إنه اتكلم معاه وقاله إنه عايز يتقدملك يوم خطوبتي وقاله يكلم عمي. وأهو سألك عن رأيك. وكل دا حقيقة.

إسراء: تعرفي إنه قالي هلاقي مفاجأة لما أروح. وأحلى مفاجأة. بس هو واثق كده ليه إن بابا هيوافق وأنا كمان؟ أمل: هيقول مين يرفض ريان الأسيوطي 😂. إسراء: مغرور بس بحبه. أمل: إمسك عندك... انتي اعترفتي انك بتحبيه الله الله اسراء: هههههههههههه اه هو ايه اللي هيحصل بقا امل: كدا عبدالرحمن هيبلغه الموافقة وهو هيظبط مواعيده ويجي يخطبك في معاد محدد يعني زي اسبوع ولا حاجه عشان تقريبا ليه اخت مسافره هتيجي

اسراء: اول مره اعرف ان عنده اخت انتي بتجيبي المعلومات دي منين امل: مصادري الخاصة عبدالرحمن بيحكيلي كل حاجه المهم أخته دي مسافره وهتيجي قريب اسراء: ماشي يالا بقا ننام عشان شغل بكره انا اصلا هتكسف لما اشوفه بعد ما أتقدم امل: هههههههههههه معلش اسراء: بتضحكي يالا نامي يا رخمه امل: هههههههههههه حاضر عند ريان دخل البيت وكانت مامته ونجوي قاعدين ريان: كويس إن لقيتكم هنا عايزكم في موضوع نجوي: خير يا حبيبي سميره: موضوع ايه

ريان: انا ناويت أخطب أن شاء الله نجوي وعرفت انها اسراء بس ومين بقا سعيده الحظ سميره كانت متوقعه يقول إلهام بس انصدمت لما سمعت ريان: إسراء نجوي بفرحه: يازين ما اختارت يحبيبي مبروك سميره: مبروك ايه اسرااااااااااء مين دي اللي ريان الاسيوطي يخطبها نجوي: ومالها يعني ادب واخلاق وجمال وأهلهم طيبين وحالتهم كمان كويسه جدا سميره: بزعيق هي كلمه يا ريان البت دي مستحيل تتجوزها انت فااااهم ريان: ليه .... مالها اسراء

سميره: مش عارفه اصلا انت عاجبك فيها ايه وبعدين بدل ما تقولي اتجوز الهام تقولي اسراء ريان بعصبية: اااه إلهام قولتيلي بقاا عشان كدا خليتيها تشتغل معايا سميره: اه ومالها يعني قمرر وشياكه وعز وبتحبك ريان: بزعيق اللي زي إلهام دي بتحب الفلوس وبس ولو هي اخر بنت في العالم مش هتجوزها سميره: بعصبية وانا قلتها كلمه اسراء لا وهتتجوز إلهام ريان بزعيق ووجع: انتي ليييييه كدا لييييه بتكرهيني كدا نجوي: اهدي ي حبيبي مفيش

ام بتكره ابنها ريان بحزن: مش لما تكون أم أصلا هي عمرها ما كانت أمي ولا حسستني أنها امي هي طول عمرها مهمله معاياااا اناااا بس من يوم ما بابا مات وانا في ثانوي وماتت كل حاجه حلوه هو اللي كان بيهتم بيا هو اللي كان بيفرحني وبيشجعني ... هي بقا هااا قوليલી كدا انتي تعرفي عني ايه ولا سألتيني اخبار دراستي ايه في يوم! كل اللي بيهمك مستواكي بين صحبااااتك كل اللي بيهمك النادي والحفلات وبزعيق: حفلاتك ومكااانتك اهم عندك من ابنك

لما كنت بتعب مكنتش بلاقي غير جدتي اللي جمبي ولا كنتي حتي بتطمني عليا طول عمرك قلبك قاسي عليا اناااا بس ....... وحتي كان نفسي ادخل كليه اعلام بس انتي صممتي إن ادخل هندسة عشان الشركه اااه انااا بعدها حبيتها ونجحت فيها ونجحت الشركه علي ايدي بس بردو مكنتش باختييييياري وانا علي الاقل خليت سما بعيد عنك وحققتلها حلمها ودخلتها الكليه اللي بتتمتاها كمان عايزاني اتجوز اللي انتي تقرريها

لااااااا يا مدام سميرة لحد هنا وكفاااايه اووووي المره دي لااا وألف لااا ... لان اسراء البنت الوحيدة اللي حبيتها واللي عمرها ما هتجرحني ولا هتسيبني ومهما عملتي مش هتجوز غير اسرااااااااااء مهما كانت الخساير وهروح اتقدملها الاسبوع الجاي سواء وافقتي ولا لااا سميره: بزعيق: مش هتتجوزها يا ريان ريان: انتي لسه كمان هتتكلمي ارحميني بقا حرااااام عليكي انا ابنك ..... حرام عليكي

وهتجوزها حتي لو هخسر كل حاجه في الدنيا حتي لو انتي شخصيا وطلع علي أوضته وقعد يعيط لأول مره ريان الاسيوطي يعيط بسبب ظلم وقهر ووجع وإهمال امه ليه ونجوي عيطت من كلام حفيدها وازاي هو موجوع وسميرة ولا اتأثرت أصلا وطلعت أوضاعا وكلمت إلهام إلهام: ازيك يا طنط سميره: مش وقته يا إلهام ريان قرر يتجوز اسراء إلهام: نعممممممم يتجوز البتاعه دي سميره بعصبية: وشكله متمسك بيها وجدا انا حاولت معاه وزعقت بس هو مصمم الهام: طب وهنعمل ايه

سميره: مفيش حل غير تنفذي اللي كنا متفقين عليه وبكرا الهام: بس دا مش هيقتل اسراء دي حاجه بسيطه سميره: اااه بس هتقعد في المستشفى وفي بيتها فتره نكون شوفنا حل ونلغي الجوازة قبل ما تبتدئ إلهام: حاضر يا طنط بكرا هعمل كل حاجه وهبلغك وقفت سميره مع الهام ههههههه قال اسراء تبقي مرات ابني قال نجوم السماء اقربلك يا ريان منها ومن اللي هعمله فيها ونامت إلهام وهي بتفكر في خطتها تاني يوم الصبح

وصلت الهام من بدري عشان تستغل الفرصه في أي وقت ومالك وصل امل واسراء للشركه وراح مشوار للشغل وماطلعش معاهم وطلعت اسراء وامل كل واحده لمكتبها و.... دخلت إسراء لريان وكان باين عليه الزعل والارهاق ريان: خدي الورق دا اطبعيه من المطبعه اللي في الدور اللي تحت يا اسراء ٥ نسخ اسراء: حاضر هو .... حضرتك كويس يا بشمهندس ريان بابتسامه باهته: اه يا اسراء الحمد لله المهم قوليلي عجبتك المفاجأة اسراء بكسوف: احم .... اظن

عبدالرحمن قالك رأيي ريان: هههههههههههه ماشي مش هكسفك اسراء: طب انا هروح اطبعهم ريان:, ماشي وكانت إلهام سمعتهم وعرفت انها هتنزل تحت المطبعه ومن الطبيعي تاخد السلم مش الاسانسير لأنها أصلا بتخاف منهم وكمان الدور اللي تحت مش بعيد وراحت إلهام و فتحت ازازة زيت ووقعته كله علي السلم عشان لما اسراء تنزل تتزحلق ورجليها تتكسر الهام: هههههههههههه وريني بقا هتيجي الشركه تاني ازاي

وراحت دخلت مكتبها ومستنيه تسمع صوت صراخها كمان شويه وهي فرحانه اسراء طلعت من عند ريان واخدت الورق عشان تنزل تطبعه وراحت عند السلم و... امل: إسراء.... معلش ممكن تبلغي ريان إن في اجتماع مهم لازم يتعمل دلوقتي بسرعه مالك قالي كدا من شويه علي الموبايل اسراء: بس انا نازله اطبع الورق امل: هاتي هطبعهم انا علي ما تقوليله اسراء: تمام يحبيبتي ٥ نسخ امل: اشطا ونزلت امل درجتين سلم ورجليها جات علي الزيت واتزحلقت امل: اااااااه

اسراء بصريخ وهي شايفاها بتقع: ااامللللل