تحميل رواية «فنجان قهوه» PDF

انا سميره محمد في اواخر الثلاثينات من عمرى متوسطه في كل حاجه الطول والجمال وحتى التعليم متجوزه من على اطيب واحن راجل في الدنيا بيحسسنى انى ملكه حتى ولو مفيش فى جيبه خمسه جنيه على بعض اصل مش عشان تعيشى ملكة يبقى تلعبى بالفلوس لأ ده بيراعينى ويخاف عليا وعمره مازعلنى وشايفنى اجمل ست في الدنيا ..أنا أم لثلاثة بنتين حنين ١٠ سنوات ملك ٨وسنوات وابنى الصغير احمد ٥ سنوات عايشه في بيت فلاحي قديم اصلنا من الريف

حياتى حلوه او بالاصح كانت حلوه بس دوام الحال من المحال.حتى شوفوا حكايتى وانتوا تعرفوا

على سطح بيت فلاحى بسيط كانت امرأة في أواخر الثلاثينات على السطح بتأكل طيورها.وصوت لعب اولادها وصراخهم مالى المكان

نزلت من على السطح ودخلت جوه وشافت الصاله اللى متبهدلة

سميره: إيه ده كله ! ايه اللى عملتوه ده كده تبهدلوا الصاله بعد ما كانت مرتبه

حنين بضحك: كنت بنلعب قفوشه الملك

سميره: طب كده ينفع بابا يجي يلاقى البيت بالشكل ده يالا رتبوها بسرعه على مااخلص الغداء

ودخلت المطبخ بسرعه تجهز الاكل وتعمل السلطه وفجاة سمعت صوت صراخ الاولاد وضحكهم العالى فعرفت ان على رجع من الشغل اصلوا دى حاجة اتعودت عليها اول مايدخل يجرى عليه الاولاد يحضنوه وهو كمان وكأنه غايب من سنين مش من كام ساعه

احمد: وحشتنى اوى يا بابا جيبت معاك إيه

على: انت بتدور على الحاجه الحلوه يا طفس بتاع مصلحتك وبس

ملك: وانا كمان

على بضحك: وانتى كمان طفسه وبتدورى على مصلحتك

ملك : بلاش نصب وطلع الحاجه الحلوه

حنين: هو مش هيطلع إلا لما نفتشوه يالا كتفوه وانا هفتشه

وفعلا مسكته ملك وأحمد من ايديه وحنين بتدور في جيوبه وعلى فطسان ضحك منهم وقال: الحقينى يا سميره ولادك بيقلبونى

سميره بضحك: تستاهل انت اللى مشجعهم على كده

حنين بفرح: لقيت الشوكلاته وخرجت ثلاث باكوات من الشوكولاتة من جيبه واحمد وملك بيطنطتوا من الفرحه في حين قعد على على الكرسي وهو بينهج وحاطت ايده على صدره فجريت عليه سميره بخوف وقالت: انت كويس فيه حاجه

على: لا انا كويس بس ولاد الكلب دول هبطونى .

فقالت سميره بغضب: شايفين اديكوا تعبتوا بابا كده ينفع

الاولاد بإعتذار: اسفين يا بابا

على بضحك: طيب مادمتوا اسفين هاتوا الشوكولاته

حنين: لا يا اخويا كله إلا الشوكلاته وبدأت تاكلها وعلى بيضحك عليها.

على: طيب صليتوا الظهر

بص كل واحد للتانى وسكنوا

على: اخص اخص اخص مش قلنا ميت مره إيه

الاولاد بصوت واحد: الصلاة الاول وبعدين اللعب

على: طيب مادمتوا عارفين ليه ماصلتوش شوفوا على ما اغير هدومى وماما تحط الاكل على الطبليه تكونوا صليتوا ماشى

الاولاد بصوت واحد: ماشى

على طيب ومستنين ايه يالا كله على الحمام واتوضوا.

جرى الولاد في حين دخل على اوضه النوم يغير لبسه وسميره دخلت المطبخ.

في الصاله كانت الاسره ملتفه حول الطبليه وهى بتاكل أرز وطبيخ بدون لحمه وسلطه

سميره: نسيت اقول لك أم أدم اقصد عمتى اقصد الاستاذه اختك اتصلت بك

على بضحك ': ده كله على ماتقولى اختى طب ماتقولى رحاب وخلاص

سميره ' : ماهى بصراحه محيرانى ان قلت رحاب بتزعل وتقول شايله ليه التكليف هو احنا قاعدين على المصطبه.وان قلت عمتى تزعل وتقولى ليه هو انا كبيره ده انتى عجوزه عنى وام قلت استاذه تزعل وتقولى ليه شايفانى ماسكه العصايا وجايه من المدرسة ولو قلت أم أدم

يضحك على ويقول: أهى تزعل اوى من ام أدم دى .

سميره: ده أنا لو شتمتها اهون من ام أدم.انا احترت مع اختك .

على: بس والله طيبه

سميره: عارفه والله انها طيبه وقلبها ابيض.

المهم هى اتصلت وبتسأل عليك وعايزاك تبقى تتصل عليها.

على ماشى هبقى اكلمها بالليل.الحقينى بالشاى

سميره: مبلاش الشاى بعد الاكل استنى شويه ولا خش ريح شويه عشان العصر هنروح الغيط

على: يا فتاح يا عليم ليه بقى

سميره: هنخف الدره ونرمى الكيماوي عشان نسقى الأرض

على: وليه الغلب ده نأجر حد يخف الارض ويرمى

سميره: على ايه هما من كتر الفدادين هناجر دول يادوب خمس قراريط يعنى احنا والعيال هنخلصها في ساعه واحده.يالا خش ارتاحلك ساعتين وبعد العصر نبقى نروح

ـ$$$$$$&&&&&&&&&&

فى المساء

قعد على على الكنبه وولع السبرتايه وحط البن و الميه في كنكة القهوه بعدها حط السكر وبدأ يقلب فيها.دخلت سميره الاوضه

على: العيال ناموا

سميره: أه مجتش إلا لما اطمنت عليهم كلهم واتاكدت انهم ناموا. وغيرت هدومها وقعدت جنبه

شغل على الراديو وبدأ يغير المحطات لحد ما سمع الست بتغنى (( دارت الايام))

على: على فين انتى هتنصبى وإلا إيه

سميره: ليه بس

على: هو احنا مش متفقين لما انا اجهز القهوه

يبقى انتى ترقصى.وانا جهزت كل حاجه وشغلت الراديوا على الست يالا ارقصى

(( وصفولى الصبر لقيته خيال

وكلام ف الحب يدوب يتقال))

سميره: مقولتش حاجه بس سامع الست بتقول الصبر ارقص على الصبر إزاى

على: ماليش دعوه يالا ارقصى

سميره: استنى بس اسمع كده.

((عينى على العاشقين & حيارى مظلومين ))

سميره: كده اقوم ارقص وبدات ترقص وعلى يصقف لها.بعدها قعدوا يشربوا القهوه ويكملوا سهرتهم.

(( الصلاه خير من النوم الصلاة خير من النوم

الله اكبر الله اكبر.لا اله الا الله))

سميره: قوم يا على صلى الفجر قوم .

على بكسل: حاضر لا اله الا الله صحى العيال عشان نصلى جماعة.

دخلت سميره ورجعت لقت على قاعد على الكرسي وساند راسه بإيديه

سميره: اسم الله عليك يا اخويا مالك

على: مش عارف فجأة كده حسيت الدنيا بتلف بيا

سميره: طيب ارتاح شويه

على: لأ خلاص بقيت كويس تعالى عشان مانفوتش الفجر.

وبعد الصلاة كان على يقرأ اذكار الصباح وسميره بتحضر الفطار ونادت: يالا يا على عشان نفطر

وعلى الطلبيه جلست العائله تفطر وبعدها قامت سميره ورجعت وهى شايله صنيه عليها اكواب اول ماشافها على بص للكوبايه بقرف وقال: استغفر الله العظيم يا رب إيه اللي انتى عاملاه ده

سميره: دى حلبه بحليب وعليها عسل أسمر

على: حلبه وعسل ليه قالولك والد

ضحكت سميره وقالت: الحلبه مش للوالدين بس دى مغذيه أوى حلوه لفقر الدم اللى عندك

سد على انفه بإيده وقال: شيلى البتاع ده ريحتوا وحشه

سميره: انت بس جربه ده والله حلو أوى

على: ياستى ربنا يديم النعمه بس انتى عارفانى مش بحب الحلبه ومش بطيق ريحتها

سميره: بس جرب بس

على بضحك: طب استنى اشهد عليكى اولادك

يا حبيبي ماما عايزانى اشرب حلبه بحليب ايه رايكم

الاولاد بصوت واحد: يع

ضحك على بصوت عالى وقال: شفتى حتى ولادك مش عايزين

سميره بغيظ: انت السبب انت اللى كرهت العيال في الحلبه وبعدين دى حلوه اوى ومفيده لك

على: ليه قالوا لك عيل ورايح المدرسه وحتى لو رايح المدرسة هاجيب ايه؟ اجيب إيه ؟

وحط سبابته على جبينه كأنه يفكر وهنا صرخ الأولاد بحماس ( شنطه شنطه)

حنين بحماس: الشنطه حمراء عليها سندريلا وكلها فراشات

ملك: لا لا لا الشنطة الخضرا اللى كلها جيوب وفيها مقلمه و..

أحمد: لأ شنطتى الدبدوب الصفرا

بص على لسميره وقال: شفتى شنطه مش حلبه وعسل

سميره: عندكوا شنط السنه اللى فاتت لسه سليمه مش هنجيب شنط.

على: ليه يا سميره

سميره: عشان خاطرى تروح تكشف عشان نتطمن عليك وبعدها

قام على من مكانه ودخل يلبس لبس الشغل وسميره وراه فقال لها: استنى بس اخلص من دخلت المدارس وبعدها هاكشف.

سميره: انت كل شويه تطلع بحجج عشان ماتكشفش مره استنى بعد رمضان وبعده استنى لبعد العيد وبعده شم النسيم وشويه لبعد العيد ودلوقتي بتقول بعد دخلت المدارس. عشان خاطري مش العيال عندهم كل حاجه مش ناقصهم حاجه تعالى نروح نكشف ونتطمن عليك.

على وهو بيغير لبسه وظهرت علامات حمراء على جسمه وخاصه في منطقة الابطين.

التفت لها وقال: يا سميره هو انتى بتحسبى العيال فرحانه للمدارس ليه عشان يتعلموا مثلا لأ ده متحمسين عشان الشنطه الجديدة والكوتشى الجديد ولبس المدارس الجديدة وأنا مش هاخلى فرحة المدرسة حسره في قلوبهم خلينا نخلص من حاجات المدارس وبعدها ابقى اروح اكشف.يالا تعوزى حاجه

سميره: ربنا يخليك ليا يا حبيبي

على: طيب لا إله إلا الله وسابها ومشى في حين بصت له سميره وقالت: ربنا يسترها وتكون حاجه بسيطه ويشفيك يا على يارب

الفصل الثاني من هنا

فنجان قهوه

بعد الشغل دخل على البيت وأول مادخل قابله الأولاد بصراخ وحماس لأنه كان جايب شنط المدرسة

على: باااااااس أهدوا واسكتوا عشان كل واحد ياخد شنطته

وقف الأولاد بهدوء وكل واحد منتظر شنطته

على بمرح: معانا إيه أول حاجه شنطه حمراء عليها.....

صرخت حنين بفرحه: سندريلا أيوه دى شنطتى

على بمرح: صح اتفضلى يا استاذه حنين خدى شنطتك

اخدت حنين الشنطه وهى طايره من الفرح وقامت بسرعه باست ابوها وقالت بسعادة: ربنا يخليك ليا يا بابا يا أحسن بابا في الدنيا.

على: طيب كده احنا خلصنا الاستاذه حنين نشوف بقا الشنطه التانيه اللى كلها جيوب وفيها مقلمه ولونها اخضر

أخذتها ملك بسرعه وقالت: هى دى شنطتى بحبك يا بابا

بص أحمد لابوه وقاله: طيب وأنا يابابا فين شنطتى

سميره: بجد يا على فين شنطة أحمد

على: انا جيبت شنطتين بس لحنين وملك أحمد مش مهم نبقى نغسل له شنطة حنين بتاعت السنه اللى فاتت وخلاص

سميره بزعل: ليه كده يا على ده احمد اول سنه له في المدرسة ده انت كنت تجيب له والبنات لا

على: زعلان يا أحمد

تجمعت الدموع في عيون احمد وإ

ختنق صوته من البكا وقال وهو بيحاول مايبكيش : لأ

على: ياخبر أبيض ده الباشمهندس أحمد زعلان وأنا عايش لأ مقدرش على كده واخد شنطة ملك وفتحها وخرج منها شنطه على شكل دبدوب أصفر

اتحولت دموع الزعل عند أحمد لضحكات عاليه وهو بيطنطط وبيدور بشنطة أحلامه البريئه

سميره: إخص عليك يا على كنت صدقت انك ماجبتش له

على بضحك: هو أنا أقدر المهم خدى دول وأخرج من جيبه ٥٠٠ جنيه .

سميره: إيه دول

على:العصر تاخديهم وتروحى عند مجدى بتاع الجذم وجيبى لهم احسن كوتشيات للمدرسة

بصت سميره للفلوس وقالت: ودول يعملوا إيه دول مابجيبوش حاجه انت عارف ولادك بيختاروا حاجات غاليه

على: أنا عارف اديهم انتى بس لمجدى ومالكيش دعوه أنا قلت له. ماشى

سميره: ماشى

على: وماتنسيش تجيبى لنفسك جزمه حلوه

سميره: ليه بس !؟ مش مهم

على: لأ إزاى انا عارف انك ماجبتيش حاجه جديده من زمان.ماشى

سميره: شالله يخليك ليا يا رب عمرك ما نسيتنى

على: طيب روحي وفرحي العيال وجيبى لهم كل اللي نفسهم فيه

-&&&&&&&&&&&&&&&&&

في المساء

رفعت الكنكه بسرعه من على النار قبل ماتفور القهوه ويضيع الوش. طفت السبرتايه قبل ماتصب القهوه في فنجان القهوه اللى اشترته مخصوص لزوجها وكأنه ماركه مسجله باسمه

اخد على الفنجان وغمض عيونه وهو يستمتع بطعم القهوه .

على: الله عليكى احلى فنجان قهوه اللى بشربه من إيدك

سميره: ياسلام يعنى بتشرب القهوه من إيد غيرى

على: هى القهوه اللى فى الشغل دى اسمها قهوه دى اسمها تقضية واجب أما القهوة الحقيقيه اللى بنشربها سوا.

سميره بضحك: اسكت جارتى أم ابراهيم قعدت تضحك عليا لما قلت لها القهوه بتزعل لو شربتيها لوحدك وبتقولى مين ضحك عليكى وقالك الكلام الفارغ ده

ضحك على وقال: وانتى بتقولى لها ليه

سميره بزعل: ياسلام يعنى هى عندها حق

على: طبعا لأ شوفى يا سمسمه تحبيها مظبوط تحبيها سكر زياده تحبيها زى ماتحبيها بس اعرفى ان الشرط الأساسي أنك ماتشربيش القهوه لواحدك القهوه لازم تشاركيها مع حد معاكى.

سميره باستفسار: طيب ليه؟ فهمنى عشان ابقى أرد عليها

على: لأ دى ماترديش عليها سيبيها على عماها احسن

سميره: طب قولى انا ليه؟

على: ياسميره انا على قد حالي ماعنديش حاجه أديها ليكوا.لاعندى أملاك ولا عندى فلوس .ونفسى اجيب حته من السما وأحطها وأديها لكم لكن العين بصيرة والايد قصيرة.

سميره: ربنا يخليك لينا وبعدين انت مش مخلينا محتاجين حاجه

على: الحمدلله انتى اللى قنوعه وراضيه بس لما بشوف غيري عايش إزاى ومعيش أولاده بيصعب عليا أولادى.بلاقينى مابملكش اى حاجه ألا شويه ذكريات ذكرى لمتنا الحلوه حوالين الطبلية بناكل لقمه سوا مش هيفتكروا طعمها بس هيفتكروا اللمه نفسها.

قعدتنا سوا في بيتنا مش هيفتكروا المكان أد ماهيفتكروا الضحكه اللى ضحكناها سوا .

خروجتنا واحنا بنفسحهم مش هيفتكروا صرفنا كام بس هيفتكروا فرحتهم بها حتى انتى قعدتنا سوا بنشرب القهوه. مش هتفتكرى طعمها اد ما هتفتكرى راحة البال اللى جمعتنا . واحنا بنرمى كل همومنا ورا ظهرنا وبنشرب قهوه وبنسمع اغنيه حلوه في الراديو

سميره بقبضة قلب: إنت ليه بتقول الكلام ده إنت بتخوفنى عليك

على: ملكة الفصلان في الدنيا يعنى بقول لمه حلوه وقعده حلوه وانتى بتقولى خايفه وبعدين خايفه ليه مش انا كشفت والدكتوره قالت فقر دم وكتبت لى على مقويات

سميره: دكتورة إيه بتاعت الوحده إللى لاطلبت اشعه ولا شافت تحليل .انا عايزه اطمن عليك بجد .طب اقول لك أنا عندى اقتراح حلو.

على: قولى يا أم العُريّف.

سميره: شوف يا سيدى انا هدبح دكرين بط من فوق واجيب خمسه كيلو دقيق وكيلوا سمن بلدى وكيلو سمن صناعى ونص كيلو قشطه.

على: ليه ليه دا كله!؟

سميره: اسمعنى بس هاعمل بهم خمس فطيرات حلوين وتاخدهم مع دكرين البط وتروح لأختك

على: ليه ان شاءالله.

سميره: تزورهم وبالمره تكشف

على: طيب اختى مديرة بنك وجوزها رائد في الجيش إيه علاقتهم بالطب اساسا.

سميره: وهما هيودوك تكشف انت عارف ان الدكاتره في مصر شاطرين.وأكيد عندهم معارف وأصحاب يعنى ي....

على بزعل: وانتى عايزانى اروح لجوز أختى اقول له ادفعلى تمن الكشف

سميره بسرعه: لا والله ماأقصدش الكلام ده

على: وبعدين يا ذكيه البط والسمنه والقشطه دول لوحدهم يدفعوا كشف خمس دكاتره مش دكتور واحد.وبعدين يا مفتريه عايزانى اروح لأختى لواحدى.من غيرك انتى والعيال

سميره: يعنى يومين ماكانش يستاهل نيجى معاك أنا مش برتاح هناك بصراحه الحاجة فهيمه بتكرهنى مش عارفه ليه

على:على اساس انها بتعشقنى دى تطيق العما ولا تطقينى

سميره: طيب انت ابن ضرتها وهى اتطلقت من ابوك بعد مااتولدت فلها حق انها تكرهك لكن انا تكرهنى ليه

على: عشان انتى مراتى يا فالحه. تعرفى لو ماكان ابويا موصى رحاب عليا وموصينى على رحاب كانت مرات ابويا كرهت رحاب فيا وخلتها تقاطعنى

سميره: انا مش عارفه هى زعلانه ليه ده يمكن طلاقها من أبوك كانت احسن حاجه حصلت لها

على: اخص عليكى بقى طلاقها من ابويا حاجه حلوه

سميره ': ماهى اتجوزت الحاج حجازى تاجر العطاره الله يرحمه وعاشت معاه في عز

تعرف لو ماطلقهاش أبوك كان زمانها قاعده في الأوضتين إللى بنربى فيهم الطيور فوقنا.

ضحك على بصوت عالى وقال: لأ وليل ونهار كانت هتسم بدنك بالكلام وانتى راحه وانتى جايه.

سميره بضحك: انت هتقولى ده احنا بنروح يومين بتحرق دمى بكلامها

على بضحك: بمناسبه الكلام مش سامعه شاديه بتقول ايه ؟قومى قومى

سميره: دى بتقول

ياتشوف لك حل في حكايتنا

ياتعزل وتسيب حتتنا

على: يعنى هاعزل وأروح فين على قلبك قومى يالا قبل ماتخلص الأغنيه

سميره: طب إيه رأيك تقوم معايا

على: لأ

سميره: بطل كسل وقوم وشدته من مكانه فإختل توازنه وغمض عنيه بسرعه وهو بيسند على الكنبه

سميره بقلق: اسم الله عليك مالك

على: مش عارف فجأة كده الدنيا لفت بيا وضلمت ومش عارف حسيت كأن روحى بتنسحب منى.

سميره بقلق: طيب ارتاح تعال ريح على السرير.

على: ماتخافيش أنا بقيت كويس

سميره: يا رب يجعل يومى قبل

قاطعها على: بعد الشر عنك قلت لك أوعى تدعى على نفسك أنا الحمدلله بقيت احسن والدوخه راحت.

&&&&&ـ&&&&&&&&&&

بعد شهر

كان على بيتكلم في التليفون

أيوه يا رحاب.... والله العظيم انا كويس.... ياحبيبتي والله أنا كويس.....اخص عليكى لا والله سميره مراعيانى ومهتمه بيا......اجى فين لا مش دلوقتي في اجازه نص السنه هبقى اجيب العيال ونيجى نقعد اسبوع بحاله بس دلوقتي مش هينفع عشان مدارس العيال ....

خلاص يا حبيبتي ماتقلقيش ماش مع السلامه ابقى سلمى لى على أيمن وأدم ..... محمد رسول الله.

سميره: دى رحاب

على: يعنى هقول لمين يا حبيبتي قدامك غيرها ولا انتى بتغيرى.

سميره: شوف الراجل المهم اخبارها ايه

على: حلوه وبتسلم عليكى

المهم بقولك ايه انا زهقت من القاعدة وعايز أرجع الشغل

سميره: دلوقتي لأ استنى كمان يومين عشان خاطري

على: يا سميره انا بقيت كويس وحاسس انى احسن

سميره: لأ يا على مش احسن انت خاسس ووشك اصفر ومفيش لقمه بتثبت في بطنك.

على: يا سميره انا خلقى ضيق سيبينى حتى اهوى نفسى شويه صدقينى لو تعبت هبقى أرجع عشان خاطري

سميره: بس...طيب استنى لما نتيجة التحليل تطلع والدكتور يطمنا.انا مش حمل تيجى وزمايلك ساندينك..

على: الله خير حافظا وهو ارحم الراحمين.وبعدين لسه يومين على نتيجة التحليل ماتطلع.وهاقولك كل اللى هيقول عليه الدكتور هاعمله ان شاءالله يقولى اشرب حلبه

ابتسمت سميره.وهى بتتابع على وهو خارج بره البيت وهى بتقول: يارب احفظه لي واحميه يارب.

&&&&&&&&&&&&&&&&&

بعد يومين

ركبت العربيه الأجره وانا ماسكه في إيدى كل الاشعه والتحاليل حاسه بخوف وبرعب دكتور التحاليل مرضيش يقولى فيها إيه بس وشه ميطمنش كل إللى قاله روحوا للدكتور هو إللى هيقول لكم التشخيص السليم.

قعدت أقرأ كل إللى حافظاه من القرأن وادعى ربنا ان مايكونش حاجه كبيره جسمى كان ساقع وقعدت ارتعش ودى عادتى لما اكون خايفه ولا زعلانه جسمى يبرد واقعد ارتعش

حط على إيده الدافيه على إيدى وضم إيدى في إيده ودى عادته لما نكون وسط الناس ويحب يحسسنى بالأمان.وقرب منى وقالى في ودنى (( ارمى همومك على الله وقولى يا رب))

سميره: يارب.

الدكتور: انا مش عارف اقول ايه

على: قول كل إللى عندك يا دكتور ومتخافش احنا ناس نعرف ربنا وراضيين بقضاؤه وقدره

الدكتور: التحاليل بتأكد للأسف أن دى حالة لوكيميا.

سميره: يعنى إيه؟

الدكتور: يعنى سرطان الدم

دارت الدنيا بسميره واغمى عليها.

الفصل الثالث من هنا

مسكها أدم وقال: فيه حاجه؟ مالك؟ راحه فين؟

سميره: في مصيبه تاخدنى وارتاح منكم.

وسابته وخرجت

ميرنا بسخرية: هى دى حمدلله على السلامه ولا شغل الضراير بدأ خلاص

أدم: أدخلى الشقه على ما أعرف فيه إيه؟

ميرنا: إزاى مش لازم اسلم على طنط الاول

أدم: خشى غيرى هدومك وابقى حصلينى

ميرنا بعدم اهتمام: ماشى

دخلت ميرنا الشقه في حين دخل أدم في بيت أمه وقال سميره خارجه زعلانه ليه

فهيمه: مش تقول إزيكوا ؟ عاملين ايه ؟:بدل مانت داخل حامى كده وبتسأل على سميرة

قرب منهم وسلم على أمه وجدته وقال: معلش اصلى استغربت انها خارجه زعلانه فحبيت اعرف حصل إيه؟

رحاب: محصلش حاجه ماتاحدش في بالك المهم احكى لى عملت ايه في شهر العسل مبسوط مع ميرنا

أدم: الحمد لله تمام بس حصل إيه حد يفهمني

فهيمه: عرفيه عشان يبقى على نور.

أدم: ماتقولى يا ماما

رحاب: ابدا اصل سميره سمعتنى وانا بتكلم مع جدتك

أدم: وكنتوا بتتكلموا في ايه ؟

رحاب بلجلجه: كنا بنتكلم يعنى فى

أدم: في إيه يا ماما ماتتكلمى

رحاب: يوه كنا بنتكلم في جوازك منها وانك اتجوزتها عشان تبعدها عن سكة أبوك

وقف أدم بغضب وقال: ليه يا ماما ليه هو احنا مش كنا قفلنا الكلام ده ليه بتفتحيه ليه بتعيدى فيه ..

رحاب: وانا إيه اللى عرفنى انها واقفه تتصنط علينا وبعدين قلنا يعنى جريمه واتكلمنا فيها دى تحمد ربنا اننا بنصرف عليها وعلى أولادها

طنشها أدم واخد التليفون ورن عليها لكنها ماردتش.كرر الاتصال مره واتنين وعشره لكنها برضوا مش بترد

دخلت ميرنا عليهم وقالت: مساء الخير يا طنط إزيك

سلمت عليها رحاب وهى بتبص على أدم

أما فهيمه فسلمت بترحاب مبالغ فيه' أهلا بالقمر اللى نور بيتنا اهلا بعروسة الغالى اهلا بالغاليه بنت الغالين عروسه الغالى

ابتسمت لها ميرنا وقالت: ميرسي يا تيته

أدم: مش بترد طب انا هنزل ادور عليها

رحاب: هتنزل فين بس سيبها هى شويه وهترجع لوحدها هى لها مكان تانى تقعد فيه غير هنا.

&&&&&&&&&&&&&&&&&&&&&

كانت قاعده على كرسي في ركن متطرف من كافيه ودموعها بتجرى على خدها صعب أوى انك تعيش حياتك في كدبه والاصعب منها هو ان الكدبه دى ملهاش داعى كانوا سابوها في حالها تربى عيالها لو على الفلوس والدين كان هيتسدد والله كانت كل الديون هتتسدد ليه بيدخلوا حياتها ليه يحرموها من ابسط حقوقها انها تحزن على جوزها .كانت عايزه تحزن كانت عايزه تبكى عليه طول عمرها كانت عايزه تحتفظ بذكراه في قلبها . لكن غصبوها على كل شيء على حياة مش حياتها على شخص مش عايزاه على دنيا مش عايزاه ليه!؟

حست ببرود في جسمها ورعشة في لها هو ضمة إيده بإيدها .كانت الفرحه عندها في سهره حلوه يشربوا فيها قهوه وهما بيسمعوا لأغنيه.

كانت الحياة بسيطه لكنها كانت جميله كانت حلم واختفى.كانت الرغبه جواها بتزيد فقامت اتلفتت حواليها كان المكان شبه خالى بسبب الوقت لكنها قامت ومشيت لحد طاوله وقالت: لو سمحت

إلتفت لها الرجل اللى على الطاوله وقال: نعم

قالت له: ممكن اطلب منك طلب

بص لها من فوق لتحت نظره تقيميه وقال بسخرية: أه ومالوا اطلبى

سميره: ممكن اعزمك على فنجان قهوه.

&&&&&&&&&&&&&&&&&&&

أيمن بغضب: يعنى إيه خرجت ولحد دلوقتي مارجعتش انتوا عملتوا معها إيه حد فيكم زعلها إنطقوا

رحاب: يعنى هنعمل لها إيه يعني ماحدش قال لها حاجه

أيمن: ليه هو انا مش عارفكوا انتوا الاتنين تلاقيكوا نكدتوا عليها لحد ماسابت البيت وطفشت.

بص أدم للأولاد إللى بيبكوا وقال: هدى صوتك يأ بابا انت كده بتخوف العيال . وبعدها قال: ماتخافيش يا حنين ماما كويسه هى بس راحت مشوار وهترجع بعد شويه

أحمد: لا ماما راحت عند ربنا زى بابا وانتوا بتضحكوا علينا

قرب منه ايمن وأخدوا في حضنه وقال: لا يا حبيبي ماما كويسه وهترجع بعد شويه

ميرنا في سرها: إيه النكد ده بقى دى طريقه يستقبلونى بها وانا لسه عروسه .

$$$$$$$$$$$$$$$$$$$$$

سميره: ممكن اعزمك على فنجان قهوه.

بص لها نظره تقييمه وقال: ومالوا نشرب قهوه

قعدت على الكرسي المقابل له فبص لها (( سيده متوسطة الطول لبسها شيك وان كان متبهدل ملامحها عاديه وان كانت برضوا مبهدله ياترى تبقى إيه! ماظنش دعاره تبقى اكيد هتدخل من سكة التسول))

فقرب منهم الجارسون فقالت حضرتك قهوتك

فرد بهدوء(( مظبوط))

فقالت له وانا كمان عايزه قهوه مظبوط بس تكون بن تقيل وفي فنجان زجاجى أو كوبايه.

مشى الجارسون وهى سرحت في خيالها في حين كان الراجل المقابل لها بيبص لها بملل عشان زهق من الصمت منتظر هتبدأ بعرض التسول إمتى.لكنها كانت صامته

فقال::طيب اهى جت القهوه وبعدين.

سكتت شويه وبعدها قالت (( ليه عملوا معايا كده))

فإبتسم الرجل بسخريه وقال في سره: اهى بدأت في عرض التسول طيب نشوف اخرتها ايه.فقال بمجاراه لها(( وعملوا إيه))

فقالت(( ليه يلعبوا بيا ليه يجبرونى على حاجه انا مش عايزاه))

فقال: حطوا السكينه على رقبتك

فقالت: لأ

فقال: يبقى مش مجبره انتى اللى سبتيهم يلعبوا بك بمزاجك

سميره: هددونى بلقمة العيش قالوا هاتعيشى إزى وهتصرفى إزاى بالرغم انى دلوقتي اقدر اصرف عليهم كلهم مش محتاجه منهم حاجه.

فإبتسم بتسليه وقال: وياترى اكتشفتى ده بعد ما اجبروكى ولا قبله

فقالت بضعف: استغلوا طيبه قلبى وحرمونى من ابسط حقوقي

فقال: فيه فرق بين طيبة القلب والسذاجه وواضح انك ساذجه .طيب على الاقل عرفينى بنفسك انا ابقى

سميره: لا ماتقولش انا اساسا مش عارفه مالى وليه جيت هنا وليه اساسا قعدت عندك

فإبتسم وقال في سره(( ايوه كله بيبدأ بكده))

فقال: طيب اعرف انا بتكلم مع مين أو على الاقل اعرفك بنفسي يمكن تحتاجينى انا ابقى

سميره: مش عايزه اعرف انا هنسى اليوم كله واحذفه من حياتى. انا بس كنت عايز اشرب قهوه.

فضحك وقال: حلوه دى اقدر اسميكى استاذه قهوه

فإبتسمت سميره وقالت: عشت عمرى كله مصدقه ان القهوه بتزعل لو شربتها لوحدك القهوه تحب اللى يتشارك فيها.وبعدها قالت: فكره هبله صح

فبص لها وقال: مين قالك انها هبله يمكن اللى قالك كده كان عايز

فقاطعته وقالت: كان عايز يعمل ذكرى حلوه وكأنه عارف انه مش هيعيش كتير فحب أنه يملى حياتنا بالذكريات..تعرف كانت قهوته سكر زياده أوى وكل حاجه كانت زيادة عشان كده لما راح الدنيا كلها بقت ماسخه ملهاش طعم

بص لها الرجل وقال:اهدى مالك يا ست انتى إيه اللى مزعلك للدرجه دى ليه شايله الهم كده

فقالت بوجع: مش عارفه مالى بس حاسه ان الدنيا كلها اتهدت على راسى والمشكله ان ماعنديش حل تانى.

الرجل: طب احكى يمكن اساعدك.

مسحت دموعها وقالت: مشكلتى ملهاش حل

فقال: جربينى و ان شاءالله هتلاقى عندى الحل.قولى بس وشوفى انا هاعمل إيه

فقالت بسخريه : طيب لو قلت لك مشكلتى في فلوس هتساعدنى

فقال الرجل بشهامه: قولى كام وانتى هتشوفى

فكملت بنفس السخريه : معلش هو مبلغ كبير شويه هتسده

الرجل: كام

سميره: ٣٠الف جنيه

الرجل بس كده استنى وخرج دفتر الشيكات وقال قولى اسمك عشان أسيف لك الشيك

فضحكت سميره ضحكه عاليه وقالت بمرارة: يارتها كانت واقفه على الفلوس كانت بقت هينه انت طيب اوى يا استاذ و بصراحه سهل ينضحك عليك

فقال لها بضحك: تعرفى اول ماجيتى وانا شاكك انك يانصابه يا متسوله بس لما قعدت شويه مش عارف ليه بقيت اقول ياريت اللى فيها يكون بس احتياج للفلوس.

فقالت: الله يلعن الفلوس اللى بتتحكم فينا

رد: وليه تسمحى لها تتحكم فيكى ارفضى قولى لأ انا اللى بعمل الفلوس مش الفلوس هى اللى بتتحكم فينا

قالت بوجع: كلام سهل بس الحقيقة مش كده

عن إذنك وشكرا جدا على القهوه وشكرا جدا انك سمعتنى انا كنت محتاجه حد يسمعنى من غير ما يلومنى ونادت على الجارسون ودفعت ثمن القهوه ومشيت وسابت وراها عيون بتتابعها.

&&&&&&&&&&&&&&&&&٥

أظلمت الدنيا والكل كان قلقان وخايف على سميرة وخاصه بعد ماخرج ايمن وادم يدوروا عليها في الشوارع والاماكن القريبه ورجعوا من غير مايوصلوا لها.

وبعد شويه اتفاجأوا لما لقوا سميره بتدخل من الباب فجري الأولاد يحضنوها بلهفه وهما بيبكوا حضنتهم سميره وهى بتقول: زعلانين ليه يا حبايبي انا كويسه والله العظيم انا كويسه وبخير

أدم: كنتى فين يا سميره: ؟

ردت سميره ببرود: يهمك تعرف

أدم: طبعا عايز اعرف كنتى فين ورحتى فين

أيمن: طمنيني عليكى يا سميره فيه حد زعلك فيه حد قالك حاجه زعلتك

بصت سميره لرحاب وبعدها قالت: مفيش حاجه بس كنت متضايقه شويه

أدم: طيب رحتى فين احنا قلقنا عليكى ودورنا عليكى كتير

بصت له وقالت: هكون فين يعنى أهو مرمطه بره ومرمطه جوا.ولفيت على أد مالفيت ورجعت لكم زى الجنيه الممسوح اللى يلف يلف ويرجع لصاحبه

أيمن: هى بتقصد إيه بكلامها

رحاب: سيبك منها ادينا اطمنا عليها

أيمن: طب كلى لك لقمه شكلك ماأكلتيش حاجه من الصبح

سميره: ماليش نفس لحاجه

أيمن: عشان خاطر ولادك دول مااكلوش حاجه من ساعة ما جهم من المدرسة

بصت سميره لأولادها وقالت: انا هدخل اسخن لكم الأكل.

ودخلت المطبخ فقام ادم وراها

أدم بصوت واطي: سميره أنا

سميره: هششش ماتتكلمش ولا كلمه

أدم: لأ لازم تسمعينى

سميره: ولما اسمعك هيحصل ايه ولا حاجه يبقى مالوش داعى.

أدم: فيه اسباب خلتنى

سميره: مهما كانت اسبابك ماكنتش عملتوا كده بس اقول ايه انا اللى عملتوا في نفسى

وخرجن الاكل وقعدوا كلهم على السفره ماعدا سميره إللى رفضت انها تاكل. وبعد الاكل انشغل الأولاد في الواجب في حين قام ادم واخد سميره في أوضه تانيه وقال لها: لازم تسمعينى يا سميره اللى حصل انى

سميره: عشان خاطري اسكت انا مخنوقه ومش طايقه نفسى ولا طايقه البيت

أدم: تحبى تخرجى

سميره: ياريت بس انا كنت بره طول اليوم

أدم: مش مهم تعالى معايا ومسك إيدها وخرج

فقالت رحاب: على فين

أدم: هاخرج انا وسميره شويه

بصت رحاب لميرنا وقالت: ماينفعش تخرج الوقت اتأخر

فبص أدم لميرنا وقال: روحى باتى في الشقه يا ميرنا انا النهارده هبات عند سميره .

يا اولاد اول ماتخلصوا واجباتكم خشوا ناموا على طول

وقبل مايسمع اعتراضهم اخد سميره وخرجوا

فقالت ميرنا: شفتى يا طنط مش بقولك حركات اهى عملت كل ده عشان تشغل ادم عنى

رحاب: معلش يا ميرنا اعذريه شفتى هى عملت له مشكله من قبل مايدخل البيت

بس اوعدك انه مش هيستمر كده

ميرنا: بس انتى قلتى لى يا طنط ان اللى بينهم كتب كتاب وبس يعنى ادم هيكون ليا لواحدى

قالت رحاب ببرود: انا عمرى ماقلت ان جوازهم صورى انا قلت لك انتى وشطارتك تقدرى تخلى أدم يبقى لك لواحدك .

&&&&&&&&&&ــــ&&&&&&&

فى مطعم راقي جلست سميره وأدم وهو بيبرر لها؛: ياسميره انا عارف اللى سمعتيه كان صعب بس الوضع كله كان صعب وانا بشوف أمى بتتوجع لما عرفت نية بابا في الجواز يمكن فكرت في مصلحتها بس صدقينى انتى لك معزه كبيره في قلبى يمكن من قبل موت خالى وانا بحبك يمكن كنت بحبك كأختى الكبيرة اللى بتسمعنى وبحكى لها كل همومي ومشاكلى بس الحب ده اتطور وبالعشره والأيام كتزيد المحبه مابينا

سميره: كل اللى انت بتقوله مش هيغير في حاجه .ليه يا أدم انا ماكنتش عايزه اتجوز ولا كنت عايز حاجه.انتوا غصبتوا عليا في كل حاجه واكتر حاجه وجعانى انى مابقتش عارفه نفسى انا تايهه والله العظيم انا تايه بعمل حاجات مش عايزاها عايشه في بيت مش عايزاه كل حاجه مش عايزاها انا كنت عايزه اربى عيالى وبس

أدم: انا عارف اننا جرحناكى بس

سميره: ممكن تسكت اوتغير الموضوع مش عايزه اتكلم فيه .تعرف انا عايزه إيه

أدم: عايزه إيه

سميره: عايزه اضحك.نفسى اضحك ضحكه من القلب تعرف تضحكنى يا ادم ضحكه من القلب.

هز ادم راسه وقال لأ

والغريبة ان سميره قعدت تضحك وتضحك وتضحك.ويمكن لفتت لها النظر من ضحكاتها فإلتفت لها الناس وكان من ضمن من إلتفت لها رجل بص عليها بدهشه وهو بيقول (( غريبه مش هى دى الست اللى كانت بتشرب معايا قهوه الصبح))

&&&&&&&&&&&&&&&&&&

مين الراجل ده وايه حكايته بالظبط ودوره إيه في القصه!!!!

طيب تصرف سميره انها تقعد مع رجل غريب ده طبيعي ولا منطقى ...

طيب بعد حالتها دى هل هتدنها في حالة الضياع والتشتت ده ولا هتتغير

اقول لكم إيه هتعرفوا البارت الجاي ان شاءالله

١٣

بص عليها بدهشه وهو بيقول (( غريبه مش هى دى الست اللى كانت بتشرب معايا قهوه الصبح فعلا بس غريبه الصبح كانت منهارة ودلوقتي بتضحك أوى كده

لعبه دى وبتلعبها

طب وبتستفيد إيه وهى مش بتطلب فلوس

ايه غرضها من اللعبه دى .ومين ده اللى قاعد معاها ده .

((فيه حاجه يا اونكل))

ابتسم لها وقال: لا يا حبيبتي مفيش

وبعدها بص مره تانيه وصوت جواهر قال(( ده مش ضحك حقيقي طالع من القلب ))

فى نفس اللحظه التفتت سميره فإلتقت عيونها بعيونه في لحظه واحده وبعدها اشاحت نظرها بعدم اهتمام.

أدم:الوقت اتاخر أوى تحبى نروح

سميره بلا مبالاة:ماشى نروح

دفع أدم الحساب وخرجت مع أدم.ومرت من جنبهم فقال الرجل (( صدفه غريبه انك تقابل شخص مرتين في يوم واحد والاغرب انها بصت لى وكأنها ماتعرفنيش))

-اونكل أونكل عبد الرحمن مالك النهارده بتسرح كتير..فيه حاجه مضايقاك

عبد الرحمن: ولا حاجه يا حبيبتي بس كنت بفكر في الشغل.

&&&&&&&&&&&&&&&&&

دخلو البيت فقامت ميرنا بسرعه وقالت: اتاخرت ليه يا أدم قلقتنى عليك .( وبغيره)رحتوا فين وليه تسهروا لحد دلوقتي

أدم: إنتى ليه سهرانه لحد دلوقتي وليه مش قاعده في شقتك

رحاب: انت هتزعق لها قدامى عشان قاعدة معايا

( بصت لها سميره بتهكم وسكتت)

ميرنا:: أنا سهرانه مع ماما

سميره: (ياقلب ماما )طيب تصبحوا على خير يا جوز العصافير

أدم: استنى يا سميره

ميرنا: لأ يا أدم ماينفعش

رحاب: مايصحش يتبنى أول ليله لميرنا في بيتنا تقضيها لوحدها

سميره بعدم إهتمام: فعلا مايصحش

ميرنا: إنت مش هتعمل كده فيا يا أدم (وبصت لسميره) إنتى عايزه مننا إيه عاوزه توصلى لإيه كنتى أجلى شويه شغل الضراير ده

سميره::لا لا لا انا لابعمل شغل ضراير ولا هعمله ولو على أدم حلال عليكى كله أنا لا فارق معايا أدم ولا أبو أدم ولا أم أدم انا بس نفسى اليوم الطويل ده ينتهى .انا داخله انام

رحاب: شفت قلة أدب زى كده تبقى في بيتى وبتستقل منى.

أدم: يا ماما لو سمحت كده كفايه خشى لو سمحتى أوضتك .وانتى يا ميرنا روحى شقتك انا هبات النهارده مع سميره.ودى كلمتى النهائية.

ومسك سميره من ذراعها و دخلوا الأوضه

ميرنا بدموع: شفتى يا ماما ماسابتنيش يوم واحد اتهنى به في بيتى

رحاب:معلش يا ميرنا روحى شقتك وبكره انا ليا كلام تانى معاه.

وكالعادة قعدت تبص لإنعكاس صورتها في المرايه بس الغريبة ولأول مره ماشافتش نفسها مشوهه بالعكس لأول مره تشوفهم هما المشوهين..

&&&&&&&&&&&&&&&&&

جهزت الفطور على السفره وغطت الاطباق وبعدها دخلت غرفتها تكمل لبس عشان تنزل للمخبز وكالعادة رن جرس الباب رن متواصل بطريقه مزعجه فمشيت بتثاقل لأنها عارفه ومتأكده من الضيف المزعج اللى بيأنسها كل يوم في نفس الميعاد

فتحت الباب وقالت: والله انا بسمه كانت رنه واحده كفايه

فهيمه: مانتى بتمشي على قشر بيض لو بتفتحى على طول ماكنتش رنيت وبعدين وسعى كده خلينى أدخل.(( ووقتها ودخلت))

سميره: بيتك ومطرح

فهيمه: غصب عنك شقة بنتى تبقى شقتى

سميره بسخرية: غريبه مش كنتى بتأنسينى في الشقه التانيه وتقولى شقه حفيدى إيه اللى جابك وإلا انتى بتحبينى بجد وماتستغنيش عنى

فهيمه: أنا أحبك ده أنا أطيق العما ولا أطيقك

سميره: ومادمتى تطيقى العما جيا هنا ليه

فهيمه: براحتى اقعد في الحته اللى تعجبنى يالا روحى اعملى لى فطار وعصير و

سميره: فيه فطار على السفره أما لو عايزه شاى قهوه عصير أى طلب من طلباتك اللى مابتخلصش فابقى اعمليها لنفسك أنا مش فاضيه لك.أه وياريت ماتعملى المزبله إللى بتعمليها كل يوم.عشان أنا لسه منظفه البيت ومش مستعده انظفه تانى

فهيمه: والله وبقى لك صوت كمان من امتى لعلمك انا اعمل اللى يعجبنى وأوسخ وابهدل وانتى تنظفى غصب عنك انتى بتشتغلى بلقمتك انتى وعيالك واحمدى ربنا ان اصلا بنتى مستحملاكى في شقتها .وأهو مش ده المكان اللى مرتباه أهو وبدات فى رمى المساند والمفارش في الأرض وفجأه تجمدت أيدها وهى بتسمع أيمن بيقول: بتعملى إيه يا ماما

إلتفتت فهيمه لتجد أيمن ورحاب وأدم بيبصوا عليها وهى بتفسد في ترتيب البيت

رحاب بكسوف: إيه اللى بتعمليه يا ماما .

بصت فهيمه لسميره اللى كانت بتبتسم بشماته وقالت: أصلى نسيت اقولك أن أبو أدم كسل يروح الشغل النهارده وماكانش عايز دوشه عشان يعرف ينام بس انتى صحتيه خلاص.

يالا عن إذنكوا انا راحه المخبز وياريت يا أم أدم تبقى تعملى لأمك عصير بعد ما تنظفى البيت.( وخرجت وقفلت الباب)

&&&&-&&&&&&&&&&&&

دخلت المخبز وهى بتضحك فقابلتها هاله وقالت: اللهم سكنهم مساكنهم غريبه انك داخله بتضحكى يا كئيبه

سميره بابتسامة: كئيبه في عينك وبعدين انا رايقه النهارده ومش عايزه نكد

هاله: يارب تدنك رايقه على طول بس إيه السر

سميره بضحك: أصلك لو شفتى منظر فهيمه وهى عامله زي الفار المبلول عند ابو أدم والله كنتى فطستى من الضحك.المهم إيه أخبار الشغل

هاله: زى الفل وفيه خبر حلو اربع محلات عايزه مننا طلبيه يوميه

سميره: حلو

هاله: لأ مش حلو ده قطع نفس وهدت حيل انا وانتى هنقدر على الشغل ده كله إزاى ده احنا مش ملاحقين على المخبز لوحده

سميره: سهله يا ذكيه هنشغل ناس تانيه معانا يعنى نجيب شابين يكونوا ولاد حلال وعايزين ياكلوا لقمة عيش بالحلال واللى يجى تدرببه وتعليمه على الشغل وإيد مع إيد تساعد

هاله: فكره حلوه اوي بس سؤال ليه انا اللى أدرب وانا إللى اعلم

سميره: عشان انا الريسه بتاعتك وشغلتى أامرك بس وإنتى تقولى حاضر وبس

هاله: ياسلام بقيتى شريره يا سميره الله يرحم لما كنتى بتمشى تتلفتى عشان ماتتوهيش .

سميره: فعلا يوم ماعلمت البيت بحماره

مسكت فيها هاله وهما بيضحكوا.وبعدها قالت: سبحان الله اللى يشوفك النهارده مايشوفش حالك امبارح

سميره: إمبارح كان أهم يوم في حياتى عارفه ليه.عشان عرفت أن مفيش حد له فضل عليا ولا على أولادى.

هاله: مش ده اللى بقولوا لك كل يوم يا فالحه

سميره: وهاقولها لأول مره يا هاله.انتى عندك حق وانا من النهارده هاعيش لأولادى ولنفسى وبس

هاله: وأدم

سميره: وضع واتحطيت فيه ولازم ارضى به هو وميرنا كمان.

هاله: الله عليكى إيه الكلام الحلو ده

سميره: وعشان أعرفك مزاجى عالى أد ايه

انا جيبت معايا وصفة باتيه محشي مربه فرواله فروحى زى الشاطره جيبى اتنين كيلو من الفكهانى عشان ليا مزاج اعمل كل حاجه طازه في طازه

&&&&&&&&&&&&&&&&&&&

بعد خمسة أيام بيسوق سيارته بسرعه وهو بيتكلم بغضب مع اللى جنبه : كده يا يحيى كده اقطع المسافه من العاشر لشبرا عشان خاطرك

يحيى: اسف يا عبد الرحمن بيه والله مش عارف نسيت أجيب توكيل العربية وأنا جاى الصبح

عبد الرحمن: يعنى عارف ان الزبون جاى النهارده وهنخلص النهارده تروح تنسى أهم ورقه وتوقف البيعه .

يحيى: والله غصب عنى مش عارف راحت عن بالى إزاى.خلاص اقف هنا على أول الشارع وأنا هاروح البيت عشر دقائق إجيب التوكيل والعقود وأجى.

عبد الرحمن::طيب بسرعه ماتتأخرش

نزل يحيى ومشى بسرعه في حين كان عبد الرحمن منتظر في العربيه وفجأه وهو منتظر لمحها كانت واقفه ماسكه صاجه كبيرة وعليها أصناف من المعجنات وبترصها على الطاوله

عبد الرحمن: غريبه اقابل واحده معرفهاش تلت مرات في اسبوع واحد.

فنزل من عربيته ومشى ناحيتها وقال: مساء الخير

إلتفتت له وقالت: مساء النور تحت أمرك يا فندم.

اندهش جدا إزاى بتتكلم وكأنها أول مرة تشوفوا

فقال: أخبارك

فردت بدهشه: الحمد لله حضرتك عايز حاجه.

حس بسخافة موقفه وخاصه من رده المختصر فكان هيتراجع بس فضوله خلاه يتلفت على المعروضات وقال: فطير

فقالت بإبتسامه: عندنا فطير حلو أوى يا هاله شوفى الأستاذ عايز ايه

هاله: عنيا أأمر يا باشا

فإبتسم لهاله و قال: لأ شكرا مش عايز من ده أنا عايز.....ممكن أقعد الأول

بصت سميره لهاله وقالت: اتفضل وشاورت على الكرسي جنب مكتبها وقالت: اتفضل

فقال بفضول: هو أنتى مش واخده بالك منى

سميره: اسفه أوى يا فندم بس بصراحه مش بركز أوى في الوشوش بس تحت أمرك حضرتك عايز فطير

عبد الرحمن: أيوه بس مش زى المعروض بره أنا عايز زى بتاع زمان اللى كانت جدتنا بتعمله ونشم ريحة السمنه البلدى من أول الشارع حاجه زى كده تعرفوا تعملوه

هاله: بس كده يا بيه لحسن الحظ معانا ملكة الفلاحين اللى الجاموسه بتاعتها بتحلب سمنه بلدى يعنى حاجه أصلى( ضحك عبد الرحمن)

نخستها سميره وقالت: اسكتى فضحتينا.

سميره: حضرتك عايز كام واحده وعايزهم امتى

عبد الرحمن : نقول خمسه وهاخدهم بعد يومين ماشى:

سميره: ماشى .بس ..

عبد الرحمن: أه اتفضلى وخرج من جيبه مبلغ ١٠٠٠ جنيه والكارت الخاص به وقال: ده الكارت بتاعى ابقى اتصلى بيا لما يجهز الفطير

سميره: ان شاءالله

وسابهم ومشى وهو نفسه مستغرب ليه راح لها

&&&&&&&&&&&&&&--&&&&&

بعد يومين.

هاله: الله الله ياروايح الزمن الجميل هفهفى إيه الحاجات الحلوه دي

سميره: تصدقى فرحانه اوى وأنا بعمل الفطير ده عشان كده عملت ثلاثه زيادة لينا اتنين وانتى واحده

هاله: تسلمى يا ام الكرم

سميره: على الله يطمر

هاله: مش عارفه لسانك اليومين دول بيحدف طوب اعوذ بالله المهم عملتى إيه مع ميرنا

سميره: ولا تفرق معايا في حاجة انا اخر همى ميرنا ودلع ميرنا.انا كل تفكيري هو ولادى وشغل وبس ...اسكتى شفت وصفه حلوه اوي امبارح على التلفزيون اسمها كيكة المليون دولار.إيه رايك نعملها هنا

هاله: مش قناة فتافيت قفلت بتجيبى الحاجات دى منين

سميره: دى ماكانتش على فتافيت دى كانت على الشرق الوثائقيه.

هاله وانتى اقعدى اتفرجى على الشرق وفتافيت وسيبى أدم لميرنا تفرجه على مليودى افلام وتوريه احاسيس

سميره: ربنا يهنى سعيد بسعيده سيبك منهم انا عملت كيكة المليون دولار تحب تدوقى حته بنص مليون.

ضحكت هى و هاله في حين دخل عبد الرحمن عليهم وقال: مساء الخير

هاله: ابن حلال والله عندنا كيكه ب...

سميره بهمس: اتكتمى ..أهلا يا عبد الرحمن بيه اتفضل

عبد الرحمن: الفطير جاهز

سميره: طبعا وهنلفه في ورق فويل عشان يفضل سخن .بس ممكن تنتظر عشر دقائق بس على مايرتاح عشان مايعجنش منك

عبد الرحمن: طبعا.

وقعد على الكرسي

سميره تحب تشرب إيه على ما الفطير يجهز

بص عبد الرحمن لسميره وقال: قهوه

سميره: انا اسفه مفيش عندى بن

هاله: ليه ده فيه سبرتايه هنا وعدت القهوه كلها .اعملى له

سميره بغضب: لو سمحتى يا هاله اسكتى

هاله بإحراج: انا اسفه

عبد الرحمن: مفيش مشكله ماتتعبيش نفسك خالص

هاله: اتفضل الفطير جاهز.

سميره: استنى فيه باقى حساب

عبد الرحمن: مفيش مشكله بس سؤال: انتى ليه مخبزك فاضى

سميره: فاضى إزاى حضرتك مش شايف

عبد الرحمن: شايفه عادى مفيش فيه حاجه مميزه زى أى مخبز في البلد مجرد مخبز عادى

وسابهم ومشى

هاله بغضب: ليه ماشتمتيه ليه ماقلتى له فين العادى ياعنيا ده احنا احسن مخبز في الدنيا

ليه مارمتيش الفلوس في وشه وقلتى خد الفطير زكا مننا

سميره: ليه ده كله مش يمكن عنده حق.

&&&&&&&&&&&&&&&&&&

بعد اسبوعين وقفت العربية أمام المخبز وابتسم وهو بيشوف الطاولات مرصوصه بأشكال واصناف كتيره من المخبوزات وفيه اتنين عمال واقفين يبيعوا للزبائن .فدخل لقى سميره وهاله بيسجلوا الواردات والمصنعات على الطاوله فقال : سلام عليكم

التفتوا إليه فقالت سميره : أهلا وسهلا عبد الرحمن بيه

عبد الرحمن: كويس انك فاكرانى

هاله: شفت المحل من بره عامل إزاى عشان تبقى تقول عادى مفيش فيه حاجه مميزه

ضحك عبد الرحمن وقال: اخدت بالى .

سميره: تحت امرك يا عبد الرحمن بيه عايز فطير تانى

ضحك عبد الرحمن وقال: لأ بصراحه انا عايزكم في حاجه تانيه وكنت حابب اشوف إمكانياتهم فقلت الجمله دى كتحدى وبصراحه عجبنى أوى ان عندكم روح التنافس وبتحبوا تطوروا نفسكم .ان تخلوا شغلكوا هو اللى يتكلم .ويعبر عن نفسه

ابتسمت سميره بفخر من كلامه.

وقالت: طيب انت عايزنا في شغل تانى إيه هو

جلس عبد الرحمن على الكرسي وخرج الموبايل بتاعه وقلب في المعرض وقال: دى صورة حفيدى مازن.( وعرض عليهم صوره طفل عنده ٥سنوات)

سميره::بسم الله ماشاء الله ربنا يحميه

هاله: شكلك صغير أوى أن تكون جد

ضحك وقال: انا مش صغير أوى انا عندي ٥٣ سنه . بس يمكن عشان رياضى وبحافظ على صحتى. المهم حفيدى ده من فتره تعب واكتشف الدكاترة ان عنده حساسيه جلوتين .

سميره بعدم فهم: ربنا يشفيه وده خطر

عبد الرحمن: لأ مش خطر بس ممنوع من الأطعمه إللى فيها أى جلوتين.( بص لهم وقال مستفسر) انتى عارفه الجلوتين موجود في إيه؟

سميره: بصراحه لأ

ضحك وقال: كنت متأكد على العموم الجلوتين موجود في الدقيق.عشان كده جيت لك

سميره: يعنى حفيدك عنده حساسيه جلوتين طيب جاى عندنا هنا في المخبز إللى كل شبر فيه مليان جلوتين

عبد الرحمن: بالظبط انا جاى لكم هنا وعايز المخبز يكون هو المسؤول عنه.

سميره: بس احنا بنستخدم الدقيق يعنى الممنوع منه

عبد الرحمن: انا عايزكم تشوفوا بدايل للدقيق يكون خالى من الجلوتين وتستعملوه يعنى مهارتكم دى مع منتج خالى من الجلوتين

سميره: ماشى بس عايزنا نعمل إيه بالظبط

عبد الرحمن: كل حاجه تخلى طفل عنده ٥سنوات مايحسش انه محروم يعنى والدته دكتوره ومعندهاش وقت تجهز له احتياجاته واحنا بنلجأ لأفران كتيره بس معظمها بيرفض

سميره: عشان مسؤلية طب لو حفيدك اكل حاجه فيها جلوتين هيحصل له إيه

عبد الرحمن: هيتعب طبعا وممكن يدخل المستشفى.

هاله: الله يطمنك.

عبد الرحمن::المشكله دى احنا بنواجهها بقالنا فتره وانا متعشم انكم هتوافقوا وتساعدونى.

سميره بتردد: بس الموضوع صعب

عبد الرحمن: بس مش مستحيل وصدقينى انا حاسس انكم هتقدروا تساعدوني والمطلوب

سميره: طيب ممكن تدينا مهله أسبوع اشوف ممكن أعمل إيه.

عبد الرحمن: اتفقنا.واتفضلى

سميره: إيه ده كله

عبد الرحمن: خمس ألاف جنيه

سميره: ليه ده كله

عبد الرحمن: عشان سمعت أن بدائل الدقيق غاليه فإصرفى زى ما تحبى

&&&&&&&&&&&&&&&&٥

كانت قاعده في المخبز مشغوله بتجربه نوع من بدائل الدقيق لما دخلت عليها ملك

سميره: اهلا يا ملوكه تعالى ياسكره

قعدت ملك وهى مكشره

سميره: زعلانه ليه يا حبيبتي

ملك: مش زعلانه بس جعانه

سميره: ياقلبي اتغدوا انتوا انا هتأخر شويه

ملك نتغدى إيه هو فيه أكل في البيت

سميره: مفيس أكل ازاى مش طنط ميرنا فوق وعملت أكل

ملك: لأ بتقول امكم اتاخرت ومعملتش الاكل ومفيش أكل

سميره بغضب: وهى قاعده بتعمل ايه

هاله: مش قلت لك بتستهبل عليكى وانتى تقولى عروسه خليها تتدلع شويه

سميره: وخلاص خلص شهر العسل والدلع وشلتها الايام اللى فاتت بس خلاص تفوق بقى لنفسها

هاله: تفوق ليه وانتى زى الهبله بتطبخى البيت كله حتى لأهلها لما جهم يتغدوا عندكوم شوفى بقى اهى قاعدة ومستنياكى تيجى تأكليها

سميره: هاله هو انتى بتسخنينى عليها

هاله: بصراحه أه

سميره:طيب كفايه عشان أنا سخنت أنا طالعه ومش هنزل النهارده

هاله بفرحه: هتعملى إيه

سميره: هطين عيشتها وأوريها العسل بجد

الفصل الرابع عشر من هنا

هنا

مر ثمانية أشهر واتبدل فيهم الحال غير الحال

البيت إللى كان مليان ضحك وهزار وصوت لعب الأولاد في كل ركن بقى ساكت وساكن والحزن مرسوم على كل الوجوه

بعد مااتأكدوا من اصابة على بسرطان الدم واكتشفه ان حالته كانت متأخره دخلت العائله في دوامة فحوصات واطباء وتحاليل وجرعات الكيماوي المؤلمة.

دوامه كبيرة ملهاش نهايه.ولأن التأمين الصحي لايغطى ربع تكاليف العلاج والأدويه فاضروا لبيع الأرض وللاسف اتباعت بثمن بخس لأنها أرض زراعية مش مبانى ولأنهم مزنوقين ومحتاجين الفلوس فباعوا الخمس قراريط بحوالى ١٧٠ ألف جنيه.تلت الفلوس من نصيب اخته رحاب لكنها رفضت تاخدهم وسابتهم لأخوها أصل فى ستين داهيه الفلوس المهم اخوها.

خرجت سميره من أوضة النوم واضطرت انها تبتسم بمجامله وهى بترحب برحاب وزوجها وتسلم عليهم

سميره: حمد لله على السلامه يا استاذه رحاب

منور والله يا ابو ادم

رحاب: الله يسلمك المهم طمنيني على عامل ايه دلوقتي والدكاتره قالوا إيه

بصت لهم سميره بهم وقالت: هيقولوا إيه وهو كل شويه بحاله حبه كويس وحبه تعبان

رحاب: أنا هدخل اسلم عليه.

سميره: بلاش دلوقتي استنى شويه

رحاب بغضب: ليه بقى ان شاءالله هتمنعينى اشوف اخويا

سميره بإعتذار: لا والله ماأقصد انا بس بقول تستنى شويه أصله طول الليل صاحى وماصدقت انه نام

رحاب: هادخل براحه ومش هاصحيه وقامت دخلت الأوضه

أيمن: معلش يا أم حنين ماتزعليش من رحاب انتى عارفه انها قلقانه وخايفه على اخوها أوى

سميره: مش زعلانه والله .المهم انت عامل إيه وأدم كمان ليه ماجاش معاكم.

أيمن: احنا الحمد لله كويسين وآدم في الشغل

سميره: ماشاءالله هو اشتغل

أيمن بسخريه: أيوه سمى وصلى يمكن يقعد

ي فيها شويه بدل ماهو مابيقعدش في شغل اكتر من خمس شهور وياريت حتى بيشتغلهم عدل

سميره: معلش انت عارف انه متدلع شويه بكره يكبر ويعقل

أيمن: يكبر اكتر من كده فين ده داخل على تلاتين سنه يعنى بقى شحط ده اللى قده متجوز وعياله في المدارس.يعنى حتى الجواز مش فالح فيه

قامت سميره من مكانها وهى بتقول: لأ في دى انتوا اللي غلطانين حد يجوز ابنه وهو لسه في سنه اولى جامعه .

شفت ادينا خادنا الكلام ونسيت اعمل لك حاجه تشربها

ايمن: لا خليكى مستريحه هما فين العيال ماشفتش حد منهم بره

دخلت سميره المطبخ وخرجت وهى شايله صنيه عليها كوبين عصير.وقدمت له كوبايه وقالت: العيال بيلعبوا مع العيال في أخر الشارع عشان انت عارف على بقى خلقه ديق وبيتضايق من صوت العيال.

أيمن: ده كان روحه في العيال يالا ربنا يكمل شفاه على خير المهم ( حط إيده في جيبه وخرج ظرف حطه في إيدها بسرعه)

سميره بسرعه: بتعمل إيه يا ابو أدم

أيمن: بقولك خدى من غير كلام قبل ما رحاب تخرج

سميره بإحراج ؛: والله العظيم معايا فلوس خير ربنا كتير

أيمن: انا عارف ربنا يزيدك بس عارف المرض ده بينسف الفلوس . وبعدين انتى اختى زى ما على اخويا بالظبط .المهم ابعتى حد ينادى على العيال يقعدوا معانا شويه قبل ما تمشي

سميره: حاضر من عنيا.

خرجت رحاب من أوضته اخوها وهى بتمسح دموعها وقالت: اخويا واجع قلبي اوى يا أيمن.

أيمن: إدعي له يا رحاب ربنا يكمل شفاه على خير.

في العربيه وطول الطريق ورحاب بتبكى

أيمن: خلاص يا رحاب عشان خاطري كفايه دموع

رحاب: غصب عني يا أيمن ده اخويا الوحيد.

أيمن: ليه وهانى ولبنى دول مش اخواتك

رحاب ،: إنت بتهزر يا أيمن.وبعدين دول اخواتى من أمى أما على الوحيد إللى اسمه على اسمى

ايمن: عايزك تفوكى شويه.وهاتخافيش ان شاءالله هيكون بخير

رحاب: مش باين يا أيمن قطع قلبي وهو بيوصينى على مراته وعياله.حتى وهو عيان بيفكر فيهم.

أيمن: عارف إن سميره مقطوعه من شجرة وان العيال ملهومش حد غيرك

&&&&&&&&&&&&&&&&&&

في المساء دخلت الاوضه تتسحب بشويش وهى خايفه لعلى يصحى وراحت للكنبه ولسه هتنام سمعت صوت على الضعيف وهو بيقول:

ليه يتنامى على الكنبة يا سميره

قامت بسرعه وقال: انت صحيت ده انا بمشى بشويش عشان ما تصحاش

على: أنا صاحى مش عارف أنام

سميره: ليه فيه حاجه وجعاك

على بضعف: كلى واجعنى يا سميره كلى واجعنى أنا تعبان اوي

قربت منه سميره واستلقت حنبه على السرير وقالت: اسم الله عليك يا حبيبي ووضعت إيدها على راسه الخالى من الشعر وبدات تقرأ عليه أيه الكرسى والمعوذات والرقيه الشرعيه

وبعد فتره قال على: ماتبعديش عنى يا سميره

خليكى جنبى

سميره وهى بتجاهد عشان ماتبكيش: انا جنبك دايما يا على بس بنام على الكنبه عشان ماأوجعكش.بس

على بتعب: العيال فين بقالى زمن ماشفتهمش

سميره: نايمين ٠

على: روحي صحى العيال وهاتيهم يناموا معانا هنا.

سميره: ليه يا على .

على: عايزهم جنبى عايز أشبع منهم قبل ما أم.

سميره: ماتكملش أبوس إيدك . ربنا يديك الصحه وطوله العمر

على: طب ريحينى وهاتى العيال يناموا هنا.

سميره بقلت حيله قالت حاضر وراحت أوضه اولادها وبدأت تصحيهم وبعدها فرشت بطانية في الأرض للاولاد

على: لأ هيناموا جنبى

سميره: لأ انت ماتتجملش رفصهم وهما نايمين أنا سمعت كلامك وجيبتهم معانا أهو لكن معاك على السرير لأ.

نام الاولاد على الأرض واستلقت سميره جنبه وكعادتها حطت إيدها البارده تحت إيده وبالرغم من انه نايم إلا انه ضم أصابعها بإيديه.

&&&&&&&&&&&&&&&&&

عدت فتره وساءت حالة على والاسوء ان الفلوس خلصت ولأن سميره تعليمها متوسط فمفيش اى فرصه لأى وظيفه أو شغل وخاصه أنهم في الأرياف يعنى مفيش مصانع ولا مكاتب فإضطرت انها تخرج كل فتره ساعتين أو تلاته تتأجر في الأراضي أو تخبز العيش في الفرن البلدى أو تساعد بعض الستات في شغل البيت والمية جنيه إللى بتجيبها أحسن ماتمد إيدها وتستلفها من الناس.

على بصوت ضعيف: سميره يا سميره

دخلت عليه حنين: أيوه يا بابا

على: فين ماما.

حنين: ماما خرجت

على بضيق وتعب : خرجت فين دلوقتي

اتلجلجت حنين شويه وبعدها قالت: راحت مشوار مع خالتوا ناديه ها...اهى ماما جت

سميره: فيه إيه

على: كنتى فين يا سميره دلوقتي

سميره بتردد كنت..كنت ..كنت مع أم إبراهيم في مشوار ورجعت على طول

على بزعل: كده يا سميره تكدبى عليا هو خلاص مبقاش ليا لازمه عندك

سميره: لا والله ماقصد يتقطع لسانى لو قال كلمه تزعلك.بس مش عايزاك تشيل الهم.

على: هو أنا ورايا حاجه غير شيل الهم

سميره: لا يا حبيبي عشان خاطري احنا عايزين نفستك تبقى حلوه عشان العلاج ماتقلقش علينا احنا كلنا كويسين

على: سميره خدينى بره يا سميره نفسى اقعد على المصطبه نفسى اشوف إللى رايح واللى جاى

سميره بصوت مخنوق: حاضر يا على هاخدك بس استنى احط بطنيه عشان تقعد عليها.

وبعدها سندت سميره على لحد ماقعد على المصطبه بره البيت وهى بتدعى ربنا ان مفيش حد يعدى ولا ياخد باله وهى مش عايزاه يحس بشفقه الناس عليهاصل نظرة الشفقه بتوجع.

مرت نسمه هوا بارده على وش على فابتسم وهو بيبص للسما وبعدها قالى نادى على الأولاد يا سميره خليهم حواليا

قعدت حنين وملك عن يمينه وأحمد عن شماله وسميره جت جنبهم.

على: سميره تعرفى نفسى فى إيه؟

سميره: في إيه يا على؟

على: نفسى فى كوبايه قهوه

سميره: ماينفعش يا على انت صحتك ماتستحملش

على: اعملى القهوه يا سميره عشان خاطرى انتى شايفانى بتحسن انا خلاص.قومى يا سميره اعملى القهوه وخليها زى ما بحبها سكرها زيادة أوى زى أيامى معاكم

سميره بدموع: ماتقلش كده احنا اللى ايامنا معاك عسل.

على بوجع: يبقى تروحى تجيبى السبرتايه وتعملى ليا قهوه ومش هنشربها على صوت الست كفايه عليا لمة حبيبي حواليا وضم اولاده لحضنه.

كان على سريره في بعد ماوقف الدكاترة العلاج.واكتفوا بالمسكنات لأنهم عرفوا ان مش فاضل إلا ايام والأعمار بيد الله والاحسن انه يرتاح في بيته.كانت سميره ملازماه في حين اخدت رحاب اجازه من شغلها وقعدت معاهم كل شويه تدخل تطمن على اخوها وتخرج ودموعها ماوقفتش .أما سميره كانت في حالة جمود غريب بتمر عليها ساعات وهى بتبص عليه وبس وفجأة هدا وسكن النفس الضعيف قامت سميره من مكانه واستلقت جنبه وعيونها على وجهه الضعيف نادت عليه فلم بجيبها مدت إيدها وحطتها على راسه وبدات تقرأ قران والرقيه الشرعيه لكنه مااتخركش حطت ايديها البارده تحت أيديه البارده وانتظرت إنه يضمها وانتظرت لكن المره دي ماضمش ايديها ماطمنهاش .مرت ساعات وهى فى حاله جمود غربب ماحستش برحاب لما دخلت ولا بصراخها ولا بالبيت إللى امتلأ بالناس.ولا بالمعزيين لتمر أيام اللى مرت من بعده الليل شيه النهار.وامبارح شبه بكره

&&&&&&&&&&&&&&&&&

مر شهر غربب وقاسى وأدى شهر كمان عدى لكن الدنيا بتستمر مش بتقف على حد .

دخلت رحاب البيت هى وأدم فوجدت الأولاد..فسألت حنين.: فين ماما يا حنين؟

حنين : ماما خرجت يا طنط.

رحاب بغضب: إيه خرجت إزاى تخرج هى اتجننت

أدم: اهدى شويه يا ماما تلاقيها.راحتةتشترى حاجه وراجعه

رحاب بغضب وبصوت عالى: وتخرج ليه معندهاش عيال يشتروا لها تخرج ليه وهى فى العده ولا اللى مات ده مالوش قيمه

دخلت سميره عليهم وقالت: سلام عليكم يا أم أدم حمد لله على السلامه

رحاب بغضب: سلامه إيه وزفت إيه إيه إللى يخرجك من البيت.كنتى فين

سميره: ده انا كنت في الشؤون الاجتماعية كانوا عايزين منى اوراق عشان...

رحاب: عشان إيه مستعجله على إيه الراجل مات وبتدورى على الفلوس مش قادره تستنى لحد ما تخلصي عدتك وبعدها ابقى روحي ودورى

سميره: بقى انا بدور على الفلوس الله يسامحك

ادم:: معلش يا أم حنين هى بس زعلانه عشان.....

رحاب: انت بتبرر لها طب والله ماانا قاعده في البيت وخرجت بسرعه سميره وآدم وراها.

سميره: والله غصب عني يا ام أدم دا هما اللى بعتوا ليا كام مره فرحت أنا وام ابراهيم والموضوع ما اخدتش اكتر من عشر دقايق بس والله

رحاب: خلاص يا سميره انا مش زعلانه وانتى كمان ماتزعليش منى أنا مش عارفه انا اتعصبت كده ليه بس مش عارفه انا بقى خلقى يضيق دايما

سميره: حصل خير استغفرى ربنا وبعدين اهى ضيقة الخلق عندنا كلنا يالا بقى خشى عشان اعرف انك بقيتى كويسه

رحاب: لأ معلش أنا حلفت وهاروح المقابر أقرأ الفاتحه على اخويا وهسافر

سميره: ليه انتى مش قلتى هتباتى خميس وجمعه.

رحاب' : لا خلاص انا هروح انا مخنوقه من البلد كلها.

$$$$$$$$$$$$$$$$

في حى شبرا العريق فيه بيوت قديمه ومبانى عريقه وفيه عمارات حديثه ومبانى جديده ومن بين المباني الحديثه بيت كبير راقى مكون خمس ادوار في الدور الثالث في الانتريه كان ايمن جالس مع اخوه الاصغر منه رضا.

رضا:طيب ومراتك قالت هتيجى إمتى

أيمن: هتبات هناك ليلتين.اهى بنهون على أم حنين شويه

رضا: طيب ورحاب عامله ايه

أيمن:أهى رحاب عايشه بتروح وتيجى وبتشعل نفسها في الشغل والدنيا أما المسكينه بجد هى أم حنين.

رضا: صعبانه عليك أوى كده

أيمن: أوى كل ما افكر هتعبش إزاى وهتصرف على اولادها منين قلبى يوجعنى عليها دى شايله مسؤلية عيالها التلاته هتأكلهم منين وهتعيشهم إزاى وهى لا وظيفة ولا معاش عدل ختاخده من الحكومه..تعرف أنا بفكر أعمل لها مبلغ ابعته لها كل شهر بس المشكله ان نفسها عزيزه مش هترضى ناخد منى حاجه وحتى لو رضيت هبعتهم لها إزاى من غير ما ياخد باله أو يطلع عليها كلام .

رضا: طيب وهو المبلغ ده هو الحل

أيمن: تقصد ايه

رضا: اقصد أن الفلوس مش كفايه انا من الكام مره اللى شفتهم عرفت هى أد ايه غلبانه وضعيفة مش هتقدر تربى اولادها لوحدها

أيمن: طب والحل

رضا: تتجوز

أيمن: انت اتجننت ده على لسه ميت من شهرين وانت عايزنى ادور لها على عريس

رضا: أنا بقول تتجوزها مش تدور لها على عريس.

أبمن بصدمه: إيه!!!!!

في نفس اللحظة كانت رحاب مصدومه وهى واقفه على الباب.....

الفصل الرابع من هنا

أيمن: انت اتجننت ده على لسه ميت من شهرين وانت عايزنى ادور لها على عريس

رضا: أنا بقول تتجوزها مش تدور لها على عريس.

أبمن بصدمه: إيه!!!!!

في نفس اللحظة كانت رحاب مصدومه وهى واقفه على الباب.....

رضا: بقول تتجوزها انت هتستفاد وهى هتستفاد

أيمن بصدمه: هستفاد

رضا: طبعا هى غلبانه ومحتاجه حد يربى عيالها ويصرف عليهم وانت ربنا موسعها عليك وعندك خير ياما وماعندكش غير آدم فدى فرصة يمكن ربنا يرزقك بعيل ولا اتنين يشيلوا اسمك.

أيمن: طيب ورحاب.هتقول عليا إيه؟!!

رضا: مالها رحاب هى مراتك الأولى وهتعيش معززه مكرمه وانت هتراعيها زى الأول واكتر وسميره تعيش هنا في دور من البيت ولو مش عايز مشاكل تأجر لها بيت هى وعيالها .ويمكن ربنا يرزقك بعيل ولا حاجه وبعدين إنت راعتها وحرمت نفسك من الخلفه تانى عشان خاطرها بعد ماقالك الدكتور ان عندها مشاكل في الرحم ومش هتعرف تخلف لك تانى .

صدقنى انا فكرت في الموضوع ده وخاصة بعد ما مات اخو مراتك

أيمن بتفكير: طب وسميره ترضى .... لأ ماأظنش دى كانت بتحب على أوى دى كانت روحها فيه

رضا: ماهو مش هتجوزها دلوقتي لا بعد ما تخلص عدتها وتلاقى نفسها وحيدة ومش عارفه تصرف على ولادها ساعتها هترضى عشان خاطر عيالها

(( في نفس اللحظة ماقدرتش رحاب تستحمل تسمع باقي الكلام فخرجت بسرعه واتجهت لبيت امها المجاور لبيتها))

أيمن: وترضاها لى انى استغل ضيقة واحده واحتياجها وأجبرها عليا ولا حتى واحده تتجوزنى عشان فلوسى

رضا: ماهى العشره مابينكم هتخليكم تقربوا من بعض و...

أيمن: لا يا عم ولا نقرب ولا نبعد انا بحب رحاب ومش بعد عشرة ٣٥ سنه تكونى مكافأتى لها إنى اقهرها واتجوز عليها انا مش عارف مشيت وراك إزاى في كلامك ده

&&&&&&&&&&&&&&&&&

في نفس الوقت دخلت رحاب بيت أمها وهى منهارة من العياط مش معقول جوزها وحبيبها يخونها بعد الحب الكبير مابينهم وبعد العشره الطويله يعمل فيها كده. لقت لبنى في وشها

لبنى: مالك كده دخله زى القطر مش تسلمى ولا...

قاطعتها رحاب بغضب:انا مش فايفه لهبلك هى فين ماما..

لبنى: فيه ايه مالك داخله عليا كده ليه ؟ هو أنا قلت حاجه ؟

رحاب: يا ستى حقك عليا انا مقصدش بس أنا روحى فى مناخيرى سيبينى دلوقتي وهى فين ماما

خرجت على صوتهم فهيمه وهى ست عجوز في الخامس والسبعين من عمرها لكنها لسه بصحتها.وعافيتها.:

قالت بصوت عالى: مالكوا صوتكوا خارج لبره ليه

رحاب: إلحقينى يا ماما أنا في مصيبه كبيرة

لبنى بقلق: فيه ايه يا رحاب قلقتينى.

رحاب: مفيش حاجه يا لبنى بس زعلانه مع أيمن شويه

لبنى: انتى وأيمن اهى هى دى الجديدة ده انتوا كنتوا دايما سمن على عسل شكلكوا اتحسدتوا ده أنا هاجى ابخركوا من عيون الناس

صرخت رحاب في وشها بغضب وقالت: اسكتى انا مش فايقه لك

فهيمه: اهدى يا رحاب شويه وعلى الله بعد كل الصوت ده الاقيكى زعلانه على حاجه ماتستاهلش.

رحاب: يا ماما أنا مش طايقه نفسى بس أنا عايزة اكلمك لواحدى

فهيمه: طب استنى يا لبنى..

لبنى خلاص أنا همشى قبل ما انطرد أنا كنت كده كده مروحه بس يا رحاب طمنيني عليكى

رحاب: أنا كويسه يا لبنى الموضوع ان نفسيتي وحشه من بعد موتة على وبقيت اتضايق وأزعل من اقل حاجه

لبنى: الله يرحمه طيب انا هامشى تعوزى حاجه

رحاب: لا يا حبيبتي أبقى سلمى لى على العيال

خرجت لبنى وقعدت رحاب وفهيمه في الأنتريه.

فهيمه: يا رحاب هدى نفسك واستغفرى ربنا عشان عصبيتك دى تهدى انتى.

رحاب: أنا ايه يا ماما أنا في مصيبه

فهيمه: يا ستار يا رب مصيبه إيه هو الواد أدم عمل حاجه تانى

رحاب بهم: يارتها كانت من ادم كانت بقت هينه انا مصيبتى اكبر

فهيمه: خوفتينى يا رحاب ماتنطقى

رحاب: أيمن يا ماما أيمن عايز يتجوز عليا

ضربت فهيمه صدرها بإيدها وقالت: بتقولى إيه دى مصيبه سوده

رحاب: لأ المصيبه الأسود لما تعرفى عايز يتجوز مين عايز يتجوز سميره مرات اخويا

فهيمه: بتقولى إيه هو أيمن اتهبل ولا يمكن انتى سمعتى غلط

رحاب: لأ مسمعتش غلط انا دخلت لقيته هو واخوه رضا إلاهى ينشك في قلبه ورضا بيقوله اتجوزها

فهيمه: طيب وأيمن قال إيه؟

رحاب: قال إيه ؟! أيمن بيسأل هترضى ولا لأ

فهيمه: مش قلت لك دى مش ست سالكه دى نيتها وحشه واهى قبل ماتخلص عدتها وهى بترسم على جوزك تسرقه منك

رحاب بتفكير: لا يا ماما مااظنش دى كانت بتحب على أوى سميره ماتعملهاش

فهيمه: ده انتى هبله لأ دى تعملها وتعمل ابوها كمان والدليل اهو رسمت على جوزك ووقعته

رحاب: دى ترسم عليه إزاى دى لا منظر ولا تعليم ولا شكل يعنى دى صفر وبقت صفر على الشمال بعد مامات على نشفت وزبلت ومبقاش فيها حاجه عدله ده أنا اللى اكبر منها ب٢٠ سنه بقيت شباب عنها ده انتى شباب عنها تقولى رسمت على ايمن طب ليه ؟ وإزاى؟ وإمتى؟

فهيمه: ده انتى هبله دى ممكن تكون رسمت على جوزك قبل ما اخوكى يموت عشان تخلص عدتها من هنا وتتجوزه من هنا مش انتى كنتى بتشوفيهم قاعدين مع بعض وانتى بتزورى اخوكى

فكرت رحاب وقالت: صح كنت بدخل لأخويا وأخرج ألاقيهم بيتكلموا سوا وأوقات كانوا يسكتوا أول ما أقعد معاهم أو حتى يغيروا الكلام.

فهيمه: عشان تبقى تصدقينى لما كنت بقولك انها خبيثه وانتى تقولى أخويا ومراته

رحاب: ده أنا هروح اطين عشته وعيشتها انا مش هبله عشان يلعبوا من ورايا.

فهيمه: أوعى تعملى حاجه لتندمى بعد كده

رحاب: طب وأنا هاعمل إيه دلوقت.

فهيمه: تروحى بيتك وتبينى انك ماتعرفيش حاجه لحد ما أفكر لك في حل

&&&&&&&&&&&&&&ــــ&&&&

كانت سميره كعادتها من شهور سرحانه ودموعها بتجرى على خدودها بدون توقف وكل افكارها عن ذكرياتها مع على والأيام الحلوه إللى مش هترجع تانى .

خبط الباب ففتحت ملك الباب لقت جارتهم ام ابراهيم اللى دخلت ولقت سميره في دنيا غير الدنيا

أم إبراهيم: وبعدين يا سميره معاكى حرام عليكى نظرك هيروح من كتر الدموع لو كانت الدموع بترجع اللى مات كان زمنا كلنا ماوقفناش دموع بس إللى بيروح مابيرجعش

سميره: أنا عارفة يا أم إبراهيم ة بس على الأقل بتريح

أم إبراهيم: لأ مابتريحش عمر الدموع ماريحت دى بتوجع القلب اكتر وتشيلك الهم اكتر واكتر وانتى عليكى حمل تقيل مش هتعرفى تشيليه وانتى كل شويه تعيطى وتوجعى في قلبك

جه أحمد قعد جنبهم وهو زعلان

أم إبراهيم: مالك يا حبيبي فيه حد مزعلك

هز أحمد راسه وهو ساكت

ام إبراهيم: ماله ياسميره

سميره: سيبك منه ده بيتدلع

أم إبراهيم: مالك يا حبيبي زعلان ليه

بص أحمد لسميره وسكت

أم إبراهيم: ماتقولى لى انتى إيه اللى مزعله

سميره: أصله راح يلعب مع صاحبه وشافهم عاملين ورق عنب وعايزنى أعمل له ورق عنب وملوخيه

ام ابراهيم: طب ماتعملى له

سميره: انتى اتهبلتى عايزانى محشي وأتفضح في البلد

أم إبراهيم: هو فين الفضيحه دى واحده وعملت أكل لأولادها .مفيش فيها حاجه والناس خلاص بطلت الهبل بتاع زمان وكلامهم الفارغ

سميره: الناس مابطلتش الكلام الفارغ الناس بتحب تطلع كلام على الفاضي ولو عملت له

هيقولوا فرحانه في موته

أم إبراهيم: لا إله إلا الله بقى فرحانه في موت جوزك عشان طبختى ملوخيه . بطلى هبل

سميره: وياسلام بقى لما أعملها وتيجى رحاب من مصر أهى هى دى الفضيحه بجد

أم إبراهيم: لا دى متعلمه وعارفه ان البلد دماغها فاضى

سميره: أهى دى دماغها افضى انتى مش شفتى لما بهدلتنى عشان رحت أنا وانتى الشؤون الاجتماعية وبعدها المرتين اللى فاتوا كانت بتيجى بس عشان تتخانق على الفاضيه والمليانه.

أم إبراهيم: معلش هى أعصابها تعبانه واحنا لازم نستحملها ونفوت لها

سميره: ماقلتش حاجه بس الظاهر إنها نسيت أن أنا كمان تعبانه أنا خسرت كل حاجه حلوه في حياتى بموت على وإنى كمان اعصابى تعبانه وعايزه ارتاح

دخلت حنين عليهم وهى بتمسح عيونها بكسل من أثر النوم وقالت: ماما بطلى عياط

سميره: نعم بتقولى إيه ؟

حنين: بابا بيقولك بطلى عياط

بصت لها سميره وقالت: بتقولى مين

حنين: بقولك بابا

أم إبراهيم: انتى شفتيه فين؟

حنين: كان لسه معايا دلوقتي

سميره بفرح لأول مره : بجد يا حنين ولا بتضحكى عليا

أم إبراهيم: تعالى هنا يا حنين يا حبيبتي وقولى لى شفتى ايه؟

حنين: شفت بابا كان هنا في الصاله وكان ماسك إيد ماما وواخدها معاه

حطت أم إبراهيم إيدها على قلبها وقالت: أستر يا رب وبعدين

حنين: قلت له واخد ماما ورايح فين يا بابا

راح زق ماما فإتخبطت في الحيطه وبعدها قال قولى لماما تبطل عياط عشان صوتها مضايقنى ومخلينى مش عارف أنام وبعدها خرج بسرعه من البيت.

بصت سميره لأم ابراهيم وقالت يعنى ايه الحلم ده تعرفى تفسيره

بصت لها أم ابراهيم بقلق وقالت: يعنى تبطلى عياط عشان هو مش مرتاح في قبره بسبب عياطك وتروحى تعملى ورق عنب لإبنك.

سميره: مش عارفه حاسه إنك مخبيه حاجه

أم إبراهيم: قومى إعملى لإبنك إللى نفسه فيه

سميره: والله ما هعمل أبدا إلا لما تخلص العده وبرضوا مش هاعمل

أم إبراهيم: والله انتى دماغك فاضيه انا هاروح اعمل لهم عندى وهاجيبه هنا مستوى ويبقى حد يتكلم عشان أطين عشته.

&&&&&&&&&&&&&&&&&&

في معرض للمنسوجات دخل أيمن عند أخوه رضا وقعد جنبه وقال: منك لله يا شيخ

رضا: ليه هو أنا عملت حاجه ؟

أيمن: ده إنت برجلت لى مخى.

رضا : ليه بس هو أنا كلمتك حتى النهارده كلمه واحده.؟

أيمن: لأ بس بقيت عمال أفكر في كلامك ودماغى انشغل بيه.

رضا: كلامى! كلام إيه؟

أيمن: بتاع سميره أرملة على.

غمز رضا بعينه وقال: أعترف جه كلامى على هواك صح.

أيمن: يمكن الأول كنت مستغربه بس دلوقتي مش عارف حاسس إنى متقبله أوى وبفكر فيه.

رضا: يبقى على خيرة الله.

سمعوا صوت رحاب من وراهم بتقول: على خيرة الله في إيه يا رضا.

بص رضا لأيمن بإرتباك وقال: أم أدم

أيمن: انتى هنا من بدري

بصت لهم رحاب وقالت: لأ انا بس سمعت على خيرة الله فبسأل بس

رضا: أصل... أصل....أه افتكرت عندى صفقة كبيرة باله سجاد جايه من السعوديه انما ايه نمره واحد ومكسبها حلو أوى وكنت عايز أيمن يشاركنى فيها.

بصت رحاب لأيمن وقالت: وهتشاركوا.

أيمن: وليه لأ مادام مكسبها حلو فهشاركوا فيها

رحاب بجمود: طيب . هتروح ولا هتقعد مع اخوك

أيمن: ليه فيه حاجه. ؟

رحاب: لأ عشان هاروح أقعد شويه عند ماما

&&&&&&&&&&&&&&&&&&&

دخل ادم البيت فوجد أمه وجدته كعادتهم بيتهامسوا فقال بمرح: نفسى اعرف انتوا الاتنين بتتكلموا في ايه

رحاب: ابعد عنى يا أدم دلوقتي عشان مش فايقه لك.

أدم: ليه بس النفسيه الوحشه دى الله يكون في عون اللى بتتفقوا عليه اكيد عمله وحش عشان وقع بينكم

فهيمه: لا والله مانت ابن ابوك

أدم طيب انا هدخل انام شويه هلكان تعب من الشغل بفكر أكوت يومين كده واروح شارم مع أصحاب

رحاب: تكوت فين بقولك ايه انا ما صدقت انك اشتغلت وبقالك شهرين منتظم في شغلك بس والله العظيم لو مابقيت راجل وحافظت على شغلك لأشيل إيدى منك خالص واسيبك لأبوك هو اللى يتصرف معاك.

قام أدم بسرعه وقال: خلاص خلاص ماكانتش كلمه.وسابهم ودخا أوضته

فهيمه: بصى انا كل ماافكر ماألاقيش غير حل واحد يخلصنا من الزفته دى

رحاب: وإيه هو

فهيمه: انها تتجوز وتغور من وشنا هى وأولادها

رحاب: تتجوز

فهيمه: أيوه أهى عدتها فاضل فيها يجى شهر يعن انتى بقيتى في خطر يعنى ممكن في أى وقت بعد الشهر ده تلاقى جوزك داخل وساحبها معاه ويقولك دى مراتى

رحاب: منه لله رضا دنه يزن على ودانه لحد ما شغله بها.وبعدين يفكر بس أيمن وأنا والله ماهقعد له في بيت تانى ويبقى يورينى هايعيش إزاى من غيرى

فهيمه: ماتبقيش هبله وتغلطى غلطتى أول ماعرفت إن أبوكى اتجوز عليا سيبت له البيت وقلت لازم يطلقنى ويشوف هيعرف يعيش إزاى من غيرى .وهو عاش وانبسط وخلف .وأنا اللى اتطلقت.

رحاب: مش عارفه ليه حاسه انك بتندمى من طلاقك من أبويا بالرغم من إنك اتجوزتى وخلفتى.وعمى كان حلو معاكى

فهيمه: الطلاق وحش أوى طعمه مر مهما حصل بعده الست لايمكن تنسى مرارة كلمه انتى طالق . دى ولاوجعها

رحاب: عشان كده كنتى بتكرهى على

فهيمه: سيبك من على ومن أبوه الاتنين ماتوا وميجوزش عليهم غير الرحمه المهم هتعملى إيه مع سميره.

رحاب: قصدك تتجوز مستحيل وبعدين تتجوز مين أصلا .

فهيمه: مفيش حد معاكى فى البنك أرمل ولا مطلق يرضى بها

رحاب: زمايلى أنا لا طبعا دول ناس راقيه تعليم وشياكه ومستوى عالى هيبصوا لها على إيه ؟ لا لا لا مستحيل وبعدين إزاى هاقول لها انا جايبه لك عريس وأقنعها بالجواز وأنا طينت عيشتها عشان بس خرجت في العده.

رجع أدم وقعد جنبهم وقال: أفهم مين اللى هاتقنعيها بالجواز.

رحاب بغضب: انت كنت بتتصنت علينا

أدم: ماتهربيش بالكلام انا سامعكم من بدرى عمالين تتفقوا على واحده وعايزين تجوزوها مين دى. وبعدين انتى مالك من امتى وانتى شغاله خاطبه تجوزى الناس ماتفهمينى

بصت له فهيمه وقالت : هاقلك

رحاب: ماما

فهيمه: ماهو أدم مش عيل صغير ده كبير ولازم يبقى عارف كل حاجه.الموضوع ان أبوك عايز يتجوز مرات خالك

أدم: مين سميره

رحاب: أيوه زفته واحنا شفنا ان احسن حل عشان نخلص منها اننا نجوزها عشان نقفل السكه من ناحيه أبوك بس المشكله مين اللي هيرضى ويتجوزها.

أدم: أنا عندى حل يريحكوا كلكوا ويقفل الباب على بابا من ناحيتها بالضبه والمفتاح.

رحاب: حل إيه يا أبو العريف؟

أدم: أتجوزها أنا.......

الفصل الخامس عشر من هنا

سميره: هاله هو انتى بتسخنينى عليها

هاله: بصراحه أه

سميره:طيب كفايه عشان أنا سخنت أنا طالعه ومش هنزل النهارده

هاله بفرحه: هتعملى إيه

سميره: هطين عيشتها وأوريها العسل بجد

طلعت فوق ووراها ملك دخلت الشقه لقت أولادها قاعدين وميرنا بتتفرج على التلفزيون.

سميره: ميرنا هو مفيش أكل فى البيت.

ميرنا: لأ

سميره: ليه

ميرنا: قولى لنفسك خرجتى ونسيتى تجهزى أكل ودلوقتي ماما رحاب وبابا أيمن هيجوا ومش هيبلاقوا أكل وهيطينوا عشتك

هزت سميره رأسها بتأكيد وقالت: وإنتى ماجهزتيش أكل ليه؟

ميرنا: وأنا مالى أنا مش مسؤله أجهز أكل لحد

سميره: ياسلام وأنا المسؤوله

ميرنا: طبعا ده شغلك إنتى مش شغلى أنا

سميره: أه ومين اللي ضحك عليكى وقالك الكلام الفارغ ده.بصى يا ميرنا الساعه دلوقتي

١ ونص على ماتيجى ٣ الاقى الأكل جاهز على السفره وإلا مش هيحصل لك طيب

ميرنا: هتعملى أيه يعنى ؟ فرجينى.

سميره: قومى يا ميرنا جهزى الأكل العيال جعانه

ميرنا: لأ . وبعدين دول أولادك إنتى أنا مش مسؤوله عنهم

هزت سميره رأسها بالايجاب وقالت: صح عندك حق.وفجأه وبدون مقدمات مسكت ميرنا من شعرها وسحبتها بقوه و سحبتها على المطبخ وأولادها بيتابعوها بذهول فقالت لهم: لو سمعتوا ان فيه قتيل بينقتل جوا ماتدخلوش سامعين

هز الأولاد رأسهم مع بعض

ميرنا بخوف: إنتى هتعملى أيه يا مجنونه

دخلتها المطبخ وقفلت الباب بالمفتاح وسحبت المفتاح.

سميره بأمر: أطبخى الغدا

ميرنا:أدم مش هيسكت

سميره: مش مهم أطبخى

ميرنا: طنط مش هتسكت لك

سميره: عادى يالا أطبخى

ميرنا،: عمو

سميره: بصى يا ميرنا عشان نبقى على نور هتطبخى يعنى هتطبخى حتى لو فيها طلاقى من أدم .ومش هتخرجى من هنا إلا بعد ماتخلصى حتى ولو جابوا فرقه قوات خاصة.يالا ابدأى

ميرنا: أنا هقول لمامى ت

صرخت فيها سميره هو أنا هتحايل عليكى طيب انا هوريكى ( وفتحت درج المطبخ و..)

ميرنا بخوف: إنتى هتعملى إيه هتموتينى.؟

مسكت سميره المقص وقالت: لأ بس هندمك طول عمرك

بصت ميرنا للمقص وقالت::إنتى هتعملى إيه بالمقص.أوعى تقربى منى.

سميره: انا مش مقرب أنا بس هاحلق لك شعرك إللى إنتى فرحانه فيه .

مسكت ميرنا شعرها وقالت: لأ إلا شعرى ماتقدريش

سميره بشر: بتتحدينى ماشى وانا موافقه وسحبتها بقوه ومسكت شعرها وقربت المقص

فصرخت ميرنا : خلاص خلاص هاعمل إللى إنتى عايزاه بس سيبى شعرى ابوس ايدك

سابتها سميره وجلست على الكرسى وقالت بأمر: أطبخى

ميرنا ببكا: أنا مش بعرف أطبخ

سميره بسخرية: واتجوزتى ليه وإنتى خايبه مالكيش في الطبخ ولا قالوا إنى هشتغلك خدامه . جتك خيبه..بطلى عياط وخرجى اللحمه من الثلاجه.وجيبى طنجرة الضغط عشان مفيش وقت.

ميرنا: اللحمه أهى

سميره: طب تعالى عشان أعرفك تطبخى ازاى واهو كله بثوابه

رجعت رحاب من الشغل وشافت الأولاد بيبصوا على المطبخ فقالت: فين ماما

فشاوروا الثلاثه على المطبخ

فقالت: طب فين طنط ميرنا

شاور الثلاثة على المطبخ

فنادت: ميرنا انتى فى المطبخ

استنجدت بها ميرنا: إلحقينى يا ماما دى حبسانى في المطبخ وعايزنى أطبخ

رحاب: افتحى يا سميره

سميره: لأ والله العظيم ماهافتح الباب ولا هاخرجها من هنا إلا وهى بترص الاكل على السفره.

دخل أيمن وآدم وقالوا واقفه كده ليه

رحاب: شفت يا أيمن شوف يا آدم سميره خاطفة ميرنا وحبستها في المطبخ لحد ما تجهز الغدا

بص أيمن لأدم والاثنين انفجروا بالضحك وهما بيضربوا كفهم في بعض

أدم: مانتيش سهله يا سميره

رحاب: عجبك تصرفها ده

أدم: بصراحه أه.

خرجت ميرنا وهى ماسكه طبق الرز وقالت بدموع: يرضيك يا أدم إللى عملته سميره فيا

خرجت سميره وقالت: بصى يا ميرنا إحنا في بيت واحد ومفيش حد احسن من حد عشان كده كل واحده هتطبخ وتعمل شغل البيت أسبوع.( بصت لرحاب وقالت)وإلا إيه رأيك يا أم أدم

بصت لها رحاب وسكتت.

أيمن: كده صح أنا عاجبنى النظام ده

بصت سميره لرحاب وقالت: وياريت تبقى تعلمى مرات ابنك عشان انا مش فاضيه لها .

&&&&&&&&&&&&&&&&&&

في المساء كانت العائله كلها قاعدين في شقه رحاب

قربت ميرنا من أدم وقالت بدلع: إيه رأيك يا أدم في شعرى تحبه سايب كده ولا أعمله ديل حصان

أدم: لأ شعرك كده حلو أوى أنا بحبه كده

ميرنا: شوف كانت واجده متوحشه عايزه تقصه.(بصت لسميره تشوف رد فعلها لكن سميره كانت مشغوله بالتليفون)

رن جرس الباب فتح أحمد وقال: ده الدليفرى جايب حاجات

قامت سميره بسرعه وراحت حاسبته وجت.

ميرنا : إيه رأيك أغير لون شعرى حابه أوى اخليه اشقر اظن هيبقى خطير

بصت لهم سميره بصدمه وقالت: تصدقوا كيلو الكينوا ب١٩٠ جنيه.

رحاب: إيه الكينوا دى.

سميره: ده دقيق بس خالى من الجلوتين

أيمن: وإنتى عايزاه في إيه

سميره: ولا حاجه بس كنت بجرب أصناف جديدة

وبعدها قالت لأولادها: أنا داخله المطبخ خلصوا الواجب انتوا

الأولاد: ياماما احنا زهقانين وعايزين نخرج

أدم: خلاص إلبسوا وتعالوا نخرج كلنا

ميرنا: انت مش قلت هنخرج لوحدنا

أدم: مش مشكله المره دى تخرج كلنا سوا وانتى هتنبسطى أوى

(نفخت ميرنا بضيق)

أدم: يالا يا سميره إلبسى وتعالى نخرج نفسح الأولاد

سميره: لأ معلش روحوا انتوا انا مشغوله شويه.

الأولاد بضيق: ليه يا ماما...عايزين نخرج... متضايقين يا ماما.

أيمن: ماتلبسى وتروحى معاهم

سميره: لا مش المره دى

أدم: تعالى العيال متضايقين

سميره بعدم إهتمام: روحوا انتوا وبعدها بصت لأولادها وقالت (( إيه رايكوا تيجوا نعمل سوا كوكيز بالشكولاته

الأولاد: بجد يا ماما ....هييييي يالا

بصت سميره لأدم وقالت: روح انت وانا هخلى أولادى يساعدونى

خرج أدم وهو متضايق في حين دخلت سميره وأولادها المطبخ

&&&&&&&&&&&&&&&&&&

في المخبز

هاله بتهليل: أيوه يا سميره يا جامد أحبك وانت مسيطر

ضجكت سميره وقالت:والله العظيم البت دى طلعت بؤ على الفاضي أول ما مسكت لها المقص كشت وبقت زى الفار المبلول

دخل عبد الرحمن: صباح الخير يا مدام.... تصدقى مااعرفش اسمك

سميره: أم حنين .أهلا يا عبد الرحمن بيه

عبد الرحمن: انا جيت حسب الميعاد إللى بينا طمنيني.

سميره: بص يا عبد الرحمن بيه أنا عملت بحث على النت على موضوع حساسية الجلوتين ده ودورت على بدايل لقيت فعلا فيه بدايل غاليه زى الكينوا وبدائل غاليه بصوره مبالغ فيها زى دقيق اللوز وفيه بدائل بسعر مهاود يعنى سعر مقبول زى دقيق الرز ودقيق الذرة

كان منصت لها بتركيز وبعدها قال: كل ده كويس اوى بس وبعدين

سميره: تقصد يعنى انا عملت إيه

عبد الرحمن: بالظبط

سميره: ثانيه واحده وقامت وجابت له صاجه عليها انواع من المخبوزات وقالت: أنا جربت أنواع كتيره اوي فيه انواع نفعت وكانت حلوه وانواع لأ بس ده إللى قدرت أعمله.

بص عبد الرحمن الصاجه وقال: كويس انتى راضيه عن شغلك

بصت له وللصاجه وقالت : بصراحه لأ

عبد الرحمن: ليه

سميره: إنت قلت عايز حفيدك مايحسش إنه محروم من حاجه. وحفيدك اصغر من إبنى يعنى لما اتخيل إبنى بيحب إيه وبيكره إيه اجد ان اللى عملته مايكفيش الاطفال بيحبوا حاجات كتيره لو ماقلتش بيتزا وكريب وهامبورجر فهقول بسكويت وويفر

عبد الرحمن: وأنا طلبت ان حفيدى مايحسش إنه محروم

سميره: طب ممكن كمان أسبوع لو ما عملتش إللى احس بالرضا ناحيته فخلاص مش هستمر

عبد الرحمن: مفيش مشكله

سميره: أنا اسفه جدا

بعد اسبوع دخل عبد الرحمن فقابلته سميره بابتسامة حلوه وقالت: أهلا وسهلا عبد الرحمن بيه اتفضل

عبد الرحمن: : واضح إنك مجهزه حاجات كتير

سميره: فعلا ثانيه واحده وجابت صاجه نانيه وقالت: بص حضرتك ده فينو وكايزر عشان المدرسه ولو حبت تاخدوا ياكل همبرجر تاخد معاها خبز البرجر وتخليهم يجهزوا له الساندوتش منه زى أى طفل عادى.

عبد الرحمن: كويس

سميره: حتى لو حب يشترى كريب انا عامله حسابه في عيش كريب وكمان عملت له كوكيز برقائق الشوكلاته وويفر محشى بالفرواله.

عبد الرحمن: هايل. بجد هائل وياترى تقدرى تعملى له كام مره في الاسبوع

سميره: اظن مرتين أسبوعياً هيبقى كويس جدا والمخبوزات ممكن تفضل طازه له معظم الوقت.

عبد الرحمن: طيب والسعر النهائي

سميره بتردد: يعنى السعر هيبقى عالى شويه

عبد الرحمن: مدام ...س

سميره: أم حنين

عبد الرحمن: يا أم حنين اوعى تترددى في عرض السعر لازم تقوليه بثقة وتكونى عامله حسابك في هامش ربح كويس ده لو عايزه تستمرى في شغلك وتطورى.دى نصيحه منى لك.

هزت سميره راسها بالايجاب

عبد الرحمن: يبقى الحساب كام وخدى بالك إننا هنمضى عقد بكده وفيه إلتزام اسبوعى منك بالمنتجات دى وفيه كمان شرط جزائي.موافقه

هزن سميره راسها بالايجاب وهى خايفه من الخطوه دى.

&&&&&&&&&&&&&&&٥&&

إيثار: أهلا اهلا يا أونكل وحشتنى

عبد الرحمن: يا نصابه لو وحشتك كنتى سألتى عنى

إيثار: اتفضل يا أونكل

عبد الرحمن: فين مازن وحشنى أوى

إيثار: ثانيه واحده ودخلت وجابت مازن من جوه إللى جرى على جده يحضنه

عبد الرحمن: إيه الأخبار مرتاحه مع المخبز

إيثار: أوى أوى أوى انا كنت مستغربه الاول ليه تتفق مع مخبز بعيد أوى كده بس بعد مااتعاملت معاهم عرفت بصراحه شغلهم حلو أوى ومازن مبسوط اوى وخاصه من المفاجأة بتاعت كل مره

عبد الرحمن: مفاجأة إيه

ضحكت إيثار وقالت: اصل المخبز عامل كرتونة مفاجآت كل مره بتحط حاجه مختلفه مره بسكويت شاى مره بسكويت محشى مره دونات يعنى كده

ابتسم عبد الرحمن وقال: كويس

إيثار: لأ مش كويس عشان مازن بيجننا مش بيخلى حد يقرب من حاجاته وخلى اخته تغير منه وعايزه هى كمان صندوق زيه

ضجك عبد الرحمن بصوت عالى وقال: خلاص نتفق لها على صندوق هى كمان

هو فين عماد .

إيثار: لسه ماجاش من الشغل هيتأخر شويه يعنى على ماتشرب قهوتك يكون جه

ابتسم وقال: يعنى هشرب القهوه لوحدى لأ بلاش اعملى شاى.

&&&&&&&&&&&&&&&&&&

في المخبز دخلت : دخلت حنين ومعاها أحمد عند سميره وقالت: إزيك يا ماما

سميره: اهلا يا حبيبتي تعالى اقعدى

قعدت حنين في حين راح احمد عند هاله

سميره: يعنى نزلتوا هنا اكيد فيه سبب صح

حنين: بصراحه زهقانين وجعانين

سميره: اوع تقولى ميرنا ماعملتش أكل

حنين: لأ عملت بس انتى عارفه اكلها وحش أوى.

ضحكت سميره وقالت: في دى عندك حق

( وبحماسه) إيه رايك تندهى لملك ونخرج كلنا نتغدى بره

حنين: بجد ياريت يا ماما احنا ماخرجناش مع بعض من زمان خالصى

سميره: طيب روحى ناديها وتعالى

خرجت حنين بسرعه وهى متحمسه

شويه وجت هاله وهى شايله احمد وبتقول: خدى بلوتك دى من وشى

سميره بضحك: بلوه في وشك حد يقول على الباشمهندس أحمد باشا بلوه

هاله' : انتى اقعدى انفخى فيه وهو يطلع عينى

ضحكت سميره وقالت : احسن انا فرحانه فيكى اخيرا فيه حد قدر عليكى.

مسكته هاله من لبسه وقالت: شوف يا واد إن ماسمعت الكلام انا هاكلك

أحمد: متوحشه انتى زومبى

سميره: لأ بتاعت قرص يا خفيف وممكن

دخل عبد الرحمن وبص لها بدهشة وقال: انتى بتعملى إيه في الطفل ده

انتهز احمد الفرصه وخبطها في رجلها وجرى بسرعه وسميره بتضحك عليهم أوى

هاله: شفت يا عبد الرحمن بيه الطفل المتوحش ده لأ وأمه بتشجعه يخبطنى.

سميره: انتى غلطانه حد قالك تحطى عقلك بعقل طفل صغير. تعال يا احمد

عبد الرحمن: ده ابنك

سميره: ايوه ده أحمد اخر العنقود

عبد الرحمن: ماشاء الله المهم انا جايب لك الشيك بفلوس الشهر ده

سميره: طيب كويس.بس فيه سؤال: هو حضرتك ساكن قريب من هنا

عبد الرحمن: انا ساكن في المعادي وأولادى قريبين منى

سميره: بس ده مشوار طويل صح

عبد الرحمن: يعنى لو الطريق كويس من الكورنيش يبقى حوالى ٢٠ دقيقه لو زحمه يبقى ممكن اتأخر لساعه إلا ربع.

دخلت حنين وقالت: احنا جاهزين يا ماما يالا

بص لهم عبد الرحمن بسعادة وقال: دول بناتك

سميره: دى حنين ودى ملك.

عبد الرحمن: ماشاء الله زى القمر .

حنين: يالا يا ماما احنا جعانين أوى

سميره: ماشى بس هاخلص مع عبد الرحمن بيه ونخرج

عبد الرحمن: لو فيه مشوار مهم ممكن أمشى

سميره: لأ ده انا هفسحهم شويه ونتغدى بره

ابتسم عبد الرحمن وقال: طيب انا عارف مول حلو اوى ممكن تاخديهم فيه يتغدوا ويتفسحوا وفيه كيدزإريا للاطفال يعنى هيلعبوا وينبسطوا وسعره كويس اوى

سميره بفرحه بجد

عبد الرحمن: ممكن اوصلكم ده في طريقى

سميره: أ....

دخل أدم وقال: إنتوا لابسين كده ورايحين فين ؟ ... ومين الاستاذ ده؟

أحمد: ده عمو هياخدنا المول

بص لها أدم بغضب و....

&&&&&&&&&&&&&&&&&ــ

٠

دخل أدم وقال: إنتوا لابسين كده ورايحين فين ؟ ... ومين الاستاذ ده؟

أحمد: ده عمو هياخدنا المول

بص لها أدم بغضب : نعم هيعمل ايه هياخدكم فين؟

سميره بهدوء: أهلا يا أدم

أدم: أهلا إيه وزفت إيه إبنك بيقول ايه ؟

بصت سميره لأدم بتحزير وقالت بهدوء : ولا حاجه ده عبد الرحمن بيه عميل عندى.وكان بيقترح مكان أخرج أولادى فيه

أدم: عميل عندك ليه هو أنتى في بنك ده إنتى بتاعت فينو وقرص.أمال ابنك بيقول

ردت بسرعه: إنت عارف أحمد لسه صغير ومش فاهم بيقول ايه

بص أدم لعبد الرحمن من فوق لتحت وقال: طيب مش هتعرفينا بالاخ

بصت له بعدم الاهتمام بكلامه وقالت لعبد الرحمن: ده الباشمهندس أدم جوزى

بص له عبد الرحمن من فوق لتحت بعدم تصديق انها تكون متجوزه الشاب ده

أدم: هو العميل بتاعك خلص و لا لسه هتتشاوروا

بص له عبد الرحمن وبعدها قال لسميره: اظن كده احنا متفقين خلاص استأذن

سميره: استنى يا عبد الرحمن بيه انت ماقلتش على عنوان المول عشان الأولاد

ابتسم عبد الرحمن وقال: فعلا نسيت اقولك عنوانه(.... )

سميره: شكرا يا عبد الرحمن بيه

خرج عبد الرحمن وقال ادم بغيظ : تحبى أجيب لكم اتنين ليمون بشفاطه

بصت له سميره وبعدها ضحكت قوى وقالت: اشمعنى ليمون فيه فراوله فيه مانجا

أدم بغضب: إنتى بتتريقى ولا مش عاجبك كلامى

سميره: اكيد مش عاجبنى كلامك وياريت تاخد بالك شويه لأنك بتلمح لحاجات أنا لا هقبلها ولا هسمح بها

أدم: ياسلام والمفروض لما ألاقى مراتى واقفه تضحك مع راجل غريب أعمل إيه أقف لهم إريل.

سميره: أولا انا ماكنتش بضحك مع حد ثانيا تنتبه من كلامك كويس أصل مش أنا إللى يتقال عليها كلامك ده وياريت تنهى الكلام ده عشان بتضايق منه وطبعا تكون فاكر عنوان المول

أدم: ليه إن شاء الله

سميره: عشان أنا وعدت الأولاد إنى أخرج أفسحهم وأغديهم بره

أدم: واستاذنتى من مين؟

سميره: مش محتاجه أستأذن عشان إنت إللى هتخرجنا

أدم: ماينفعش أنا تعبان ولسه جاى من الشغل

سميره: بس هنخرج وانت هتخرجنا ودلوقتي حالا يعنى تطلع تغير هدومك وتنزل عشان نخرج وياريت بسرعه عشان جعت أوى

اتنهد أدم وقال: خلاص أمرى لله هى ميرنا هتزعل عشان الأكل إللى عملته بس مش مشكله .

سميره: طب بسرعه

طلع أدم وضحكت هاله وقالت: احبك يا مسيطر ده أنا قلبى وقع في رجليا أول ماابنك

قال هيخرجنا قلت خلاص سميره الله يرحمها وكنت بجهز القرص على روحك

سميره: بعد الشر وبعدين أدم طيب وإللى يفهمه يكسبه

صفرت هاله .

سميره: يخرب بيتك فضحتينا.

نزل أدم وقال: يالا أنا جاهز بس هنستنى خمس دقايق على ماميرنا تنزل

بصت سميره له بضيق وقالت : هتنزل ميرنا ليه

أدم: هتيجى معانا

سميره: لأ ميرنا مش هتيجى معانا

بص لها أدم وقال: ليه

سميره: انت وهى بتخرجوا سوا وخرجتوا بدل المره عشره وأنا كل مره بسيبكم تخرجوا لوحدكم يعنى بقول عروسه جديده وتاخد راحتها وتدلع فعلى الأقل وذوقيا المره اللى هنخرج فيها مع اولادي تسبنا نخرج لوحدنا .

صح ولا انا غلطانه.

أدم: بس ميرنا بتلبس وهتزعل

سميره: مش مشكلتى وزى مابراعى احساسها تستذوق وتراعى احساسى

أدم: يعنى

سميره: وزعها يالا.

ميرنا: أنا جاهزه يالا عشان ماتتأخرش

بص لها أدم وبعدها بص لسميره إللى فهمت إنه مش عايز يزعلها

سميره: زى ما نزلتى اطلعى تانى

ميرنا : أطلع

سميره: ايوه عشان انا وأولادى اللى هنخرج النهارده .

ميرنا: ماشى بس هاجى معاكم

سميره::لأ هترجعى فوق ومش هتيجي معانا

بصت لأدم .

سميره: ميرنا اطلعى فوق ولو عايزه تقعدى هنا براحتك بس مش هتيجى معانا وده أخر كلام عندى وياريت زى مابراعيكى راعينى شويه .يالا بقى يا أدم

أدم: معلش يا ميرنا اطلعى المره دى يالا يا سميره يالا يا اولاد

قربت منها هاله وقالت: شريره

ردت سميره وقالت: زهقت من مراعات شعور الناس.فكفايه أوى كده.انا هنبسط وأبسط ولادى وطظ في الدنيا كلها

&&&&&&&&&&&&&&&&ــ

طلعت ميرنا وهى زعلانه وبتبكى فقربت منها رحاب بخوف: مالك يا ميرنا بتعيطى ليه

ميرنا: شفتى ياطنط سميره رجعتنى مرضيتش إنى اخرج معاهم شوفتى

رحاب: وليه تمنعك تروحى وأدم عمل إيه

ميرنا: ولا حاجه سكت ومشى معاها.سابنى وراح معاها

رحاب: لأ أدم زودها أوى إزاى يسكت

ميرنا: لا وإيه استذوق وأسيبهم يخرجوا لوحدهم يرضيكى كده يا طنط

رحاب: بصراحه هى عندها حق يعنى على طول بتخرجوا سوا مش هتيجى من مره

ميرنا: يعنى انتى عجبك إللى عملته ده يا طنط

رحاب: لأ طبعا بس مش عايزاكى تزعلى كده من مره وخدى بالك ان المواقف دى هتتكرر كتير

ميرنا: يعنى إيه يعنى هايخرج معاها ويسيبنى

رحاب : طبيعى هو مش جوزها زى ماهو جوزك وطبيعى انه يبخرج معاها أنا بقولك كده عشان لازم تتعودى مش تعيطى وتعملى حركات العيال دى لازم تكبرى وتعرفى ازاى تسيطرى على مشاعرك وبرضوا تعرفى إزاى تسيطرى عليه وتخليه مايفكرش في غيرك مش تعيطى زى الهبله.

&&&&&&&&&&&&&&&&

بعد فتره طويله كانت ميرنا راحه جايه وهى متغاظه وبتتحرق من جواها

والغريبه ان رحاب كانت متغاظه أكتر منها بس حاولت إنها ماتظهرش غيظها

ميرنا بضيق: شفتى يا ماما الساعه داخله على ١١ بالليل والبيه والهانم لسه مارجعتش لحد دلوقتي

رحاب: واللى غايظنى برن عليه وعليها ومحدش راضي يرد .

ميرنا: لأ ده كتير كتير أوى

رحاب: معلش استنى بس لحد ما يجيى وشوفى انا هاعمل فيهم إيه.

شويه وسمعوا صوت العربية بتقف وصوتهم على السلالم وهما بيتكلموا وبيضحكوا كلهم

فتح أدم الباب فهاجمته ميرنا بعصبيه وبغضب:: مابدرى يابيه كل ده سهر بره مش تراعى ان فيه ناس مستنينك في البيت ولا إن فيه كلبه قاعدة قلقانه عليك

أدم بضحك': طب ندخل الأول وبعدها ابقى زعقى واتخانقى.

ودخل أدم وسميره والاولاد والكل كان شايل اكياس كتيره.

رحاب: حمد لله على السلامه يا استاذ كل ده سهر بره

سميره: سهر إيه دى الساعه لسه ١١ مش يعنى نايمين بره البيت.

رحاب بغضب: انتى بالذات ماتتكلميش عشان حسابك تقل أوى

سميره بضحك: أنا فعلا مش هتكلم عشان تعبت أوى النهارده وعايزه انام يالا يا حبايبى كله يخش يغير لبسه وينام عشان فيه مدرسه بكره ولو سمعتوا الكلام وذاكرتوا كويس وبقيتوا شاطرين ليكم منى خروجه حلوه زى دى كل اسبوع يالا كله يقول لعمتو ولطنط تصبحوا على خير

كل الأولاد قالول تصبحوا على خير ودخلوا وسابتهم سميره ودخلت

ميرنا: شايفه يا طنط بتغيظنى إزاى

رحاب:سيبك منها وانت يا أدم إيه إللى إنت بتعمله ده

نفخ أدم بضيق وقال: عملت ايه يا ماما واحد وخرج مع مراته فيها إيه بس؟

رحاب بصوت عالى: وميرنا دى مش مراتك إزاى تكسر بخاطرها وتزعلها وانت بتخرج مع سميره وسايبها هنا وياربت رحت ورجعت بعد ساعه وإلا اتنين لأ ده انت قعدت لحد نص الليل كأنك قاصد تقهرها وتوجعها

أدم: اقهر مين ولا أوجع مين أنا طلعت ولما ميرنا شبطت تيجى معانا قلت وماله تيجى تتفسح وتغير جو بس سميره قالت جمله خلتنى اسكت عارفه قالت إيه يا ميرنا قالت انا بسيبك انت وهى تخرجوا سوا وخرجتوا بدل المره عشره وأنا كل مره بسيبكم تخرجوا لوحدكم يعنى بقول عروسه جديده وتاخد راحتها وتدلع فعلى الأقل وذوقيا المره اللى هاخرج فيها مع اولادي تسبنا نخرج لوحدنا .

لما سمعت كلامها ده اتكسفت من نفسى اصل اكتشفت انى فعلا بخرج دايما مع ميرنا اما سميره لأ

ميرنا: انا عروسه من حقى اتدلع مع جوزى

أدم: وسميره من يوم مادخلت البيت ده ماتدلعتش عليا ولا مره ومادام من حقك يبقى برضوا من حقها يالا تصبحوا على خير وياربت يا ميرنا تروحى تباتى في شقتك عشان انا هبات عند سميره.

بجد يا ماما هو فين بابا

رحاب بعدم اهتمام: بايت بره واحد صاحبه عنده حاله وفاه وهما هيباتوا عنده يومين

أدم ؛:أنا ملاحظ ان بابا بقى يبات بره البيت كتير

رحاب: تقصد ايه

أدم: ولا حاجه تصبحوا على خير

&&&&&&&ـــ&&&&&&&&&ـ

في المخبز

هاله: ده انتى فظيعه بجد لأول مره تصعب عليا ميرنا وهى بتعيط.

سميره بعدم إهتمام: يا حنينه ومن امتى بتصعب عليكى . وبعدين يابقى هبله واخد على دماغى يا معجبش

هاله: أنا مقصدش..المهم سيبك هتعملى أيه بالفلوس دى

سميره: مش عارفه بس بفكر اروح احطهم في البنك

صقفت هاله بعربجيه: ايوه يا سميره يا اجمد بيزنس ومن والله وهيقى عندنا رصيد في البنك ومحدش هيعرف يكلمنا

سميره: اسكتى ياهبله وإلا والله اقول لمحمود انك مجنونه وعندك عرق متخلف.يعنى ولادكوا هيطلعوا متخلفين زيك

هاله: مش هيصدقك اصلا

سميره: طيب جربينى وأنا هاجى في مره وهاكشف له كل فضايحك

هاله: اخص عليكى يا سميره بقى عايزه تفضحينى قدام الواد ده أنا ماصدقت إنه جه

سميره: عارفه ده من فرحتك عايزه تكتبى الكتاب على طول عشان مايعرفش يهرب صح

هاله: والله فكره كتب الكتاب حلوه بس لأ لازم ابان إنى تقيله وأعمل بريستيج لنفسى

سميره: بس أهو من الأول يقول أنا عايز مراتى في البيت وماتشتغلش أموته

هاله بفزع مزيف: ليه حرام عليكى انتى عايزانى أترمل قبل مااخش دنيا مش تسيبينى اتهنى الأول

سميره: أيوه تفهميه من الأول أنا مانستغناش عنك

هاله: حبيبتي يا سميره والله لأبوسك

وحضنت سميره وباستها .

( السلام عليكم)

إلتفتوا الاتنين وبعدها ردت سميره بإستغراب

: عليكم السلام.؛عبد الرحمن بيه!!!! غريبه حضرتك هنا ليه فيه حاجه ؟

عبد الرحمن: لأ مفيش بس بصراحه انا خفت عليكى

سميره: أفندم

عبد الرحمن: ماقصدش انا اقصد يعنى تكون حصلت لك مشاكل امبارح بسبب

فكرت سميره وقالت: وتحصلى مشاكل بسببك ليه

عبد الرحمن: عشان امبارح

فكرت سميره وقالت: مفيش حاجه حصلت امبارح ولو على كلمت ابنى فده حاجه مش مستهله ومحصلش اى حاجه ماتقلقش

عبد الرحمن: طيب الحمدلله ماشى طب انا هاستأذن.

هاله: ماتسأليه احسن

عبد الرحمن: فيه حاجه ؟

سميره: لأ بس بصراحه يعنى اتوفر معايا مبلغ وكنت هاحطهم في البنك بس كنت عايزه اعرف يعنى اي بنك احسن

عبد الرحمن: معلش ممكن اسألك سؤال هو المبلغ كام

سميره: ٧٠ ألف

ضحك عبد الرحمن بقوه وقال: بتسألى عن البنك الاحسن وانتى كل اللى معاكى ٧٠ ألف ده مبلغ مايتحسبش ده مش مبلغ اصلا

بصت سميره لهاله بغيظ وهى بتقول: شفتى أهو جيبتى ليا الكلام ده لو أنا بسأل رحاب ماكانتش هزقتنا كده

إنتبه عبد الرحمن لنفسه وقال: اسف ماقصدش وبعدين ٧٠ الف مكسب شهر حاجه كويسه

سميره: لأ ده مكسب ٣شهور

فكر عبد الرحمن وقال: بصى يا مدام....

سميره:أم حنين

عبد الرحمن: تسمعى نصيحتى بلاش تحطيهم في البنك

سميره: واعمل بهم إيه

عبد الرحمن: شوفى يا أم حنين تعرفى تكملى الفلوس ل١٠٠ ألف لو مش هتعرفى أنا ممكن ادفع لك الباقى واعتبريهم فلوس ماذن لكام شهر مقدم

سميره : لأ انا اقدر اكمل ١٠٠ الف بس أعمل بهم إيه؟

عبد الرحمن: هتدفعيهم مقدم عربيه.

سميره: عربيه...بس انا مابعرفش اسوق وهاعمل بالعربيه إيه؟

هاله: لأ فكره حلوه العربية تبقى زى الستات إللى بنشوفهم كده راكبين عربياتهم وتخرج راسها وتبص للغلابه إللى في الميكروباص من فوق لتحت.

ضحك عبد الرحمن وقال: لأ مش كده خالص انتى مش هتشترى عربيه ملاكى انتى هتشترى عربيه ( van )يعنى زى العربية الربع نقل المقفوله

ابتسمت سميره بحماس وقالت: بجد ياريت انت مش عارف احنا بندفع أد ايه فلوس اجرة العربيه واحنا بنوزع بضاعتنا على المحلات

عبد الرحمن: بالظبط يمكن هتتزنقوا في اقساط فتره بس بعد ماتخلصى تمنها هترتاحى وبرضوا مش هتخسر يعنى فلوس مجمده تقدرى تبيعها وقت ماتحبى

سميره: واتفف مع ناس من بتوع الدعايه يعملوا لوجوا كبير ونلزقوا على العربيه ويبقى دعايه لنا وكمان اخلى حد من الصنايعيه يطلع رخصه ويبقى يسقوها بس ١٠٠ الف يكفوا مقدمه للعربيه

عبد الرحمن: ١٠٠ الف مايكفوش لو عربيه جديده بس انا لو جبتيها مستعمله يكفى

هاله: بس المستعمله وحشه

عبد الرحمن: لا انا هديكى رقم واحد صاحبي فاتح معرض للعربيات المستعمله يقدر يجيب لك واحده تكون سعرها مناسب قلتى إيه

لمعت عيون سميره بحماس وقالت: ماشى موافقه

عبد الرحمن: على بركه الله.

&&&&&&&&&ـــ&&&&&&&&١

كانت قاعده في الصاله بتذاكر مع أولادها لما دخل ايمن وهو شايل اكياس وهدايا فجرى عليه الاولاد يسلموا عليه

أيمن: اهلا يا حبايبى وحشتونى أوى

( وانت كمان وحشتنا يا عمو)

رحاب وهى بتسلم عليه: ماهو لو وحشناك كنت تقلل سفرياتك دى وتقعد معانا في البيت

أيمن: شغل يا رحاب ودى مش أول مرة اسافر

رحاب: كنت بتسافر يوم يومين في الشهر دلوقتى بتسافر كتير اوى ده انت بقيت تسافر اكتر من قعادك في البيت معانا

سلم أيمن على ميرنا وسميره وعدها قعد

سميره: اكيد انت جعان هدخل اعمل لك أكله ميه ميه.

أيمن: أه يا ريت عشان مصرينى نشفت من المعلبات

رحاب: فين دى ده انت وشك مورد وصحتك ردت

أيمن بضحك: انتى هتقرى ولا إيه.

بجد يا سميره انا شفت عربيه قدام المخبز

سميره بفرحه: عربيتى إيه رأيك فيها

رحاب: انتى اشتريتى عربيه

أدم: ماقلتيش إنك اشتريتى عربيه

سميره: انا لسه يا دوب مستلماها من ٤ايام وكنت هافاجاكم مجرد مااخلص اجراءات نقل الملكيه .

ميرنا بإندهاش: هو المخبز مشروع ناجح للدرجه دى انك تشترى عربيه.

سميره في سرها ( ومن شر النفاثات في العقد ومن شر حاسد إذا حسد) .

وبعدها قالت: كله بتدبير ربنا وكله رزق ونصيب. انا هدخل اجهز الأكل

&&&&&&&&&&&ـــ&&&&&

دخل المحل لقى سميره واقفه جنب الفرن

اول ما شافته ابتسمت وقالت: اهلا يا أدم

أدم: يعنى عندك ماشاء الله يجى ٨عمال غير هاله وانتى اللى واقفه قدام الفرن

سميره: الطلبيه دى مخصوص ولازم أنا اللى اقوم بها من اول خطوه لحد التغليف بنفسى

أدم: ياسلام واشمعنى الطلبيه دى مخصوص

قفلت سميره الفرن وقالت وهى بتسحب الصاجات : لأن دى طلبية مازن حفيد عبد الرحمن بيه

أدم بضيق: يا سلام وعشان حفيد بسلامته تهتمى بحاجته للدرجه دى

سميره بغضب: خد بالك من كلامك يا أدم لأن كلامك تطير فيه رقاب.انا بهتم بالطالبية دى مخصوص عشان ماذن حاله خاصه عنده حساسيه جلوتين ولو اتلخبطت وحطيت حاجه فيها جلوتين ممكن يتعب ويوصل به الحال انه يدخل المستشفى.

أدم: للدرجه دى

سميره: وأكتر.عشان كده انا المسؤله عنها

أدم: طيب افرضى اتلخبطى في الطلبيه او صاجه جت مكان صاجه تانيه

سميره: ببيع دى هنا عادى وبعمل طلبيه تانيه من اول وجديد.

قعد ادم على كرسي المكتب وهو بيقول: تعرف عاجبنى أوى شغلك ده وشجعنى انى افكر في حاجه كده

سميره: تفكر في إيه غرب اصدمنى

ضحك أدم وقال: لا مش صدمه ولا حاجه بس بفكر انى أعمل مشروع زيك

سميره: مشروع إيه ان شاءالله

أدم: مش عارف بس بفكر افتح المحل إللى جنبك واعمل فيه أى حاجه.ولا إيه رأيك نكبر بيه المشروع بتاعك ونتشارك

سميره: انت عايز تشاركنى في المخبز وياترى هنتشارك بقى ازاى واساسا هنتشارك ليه

وانت لا بتفهم فيه ولا تعرف فيه حاجه

أدم: بصراحه انا زهقت من شغلى مش بحس انى بستمتع فيه زى مانتى بتنبسطى في شغلك

سميره بسخريه: لا والله.

أدم: بجد أنا عاجبنى انك بتحبى شغلك وبتبدعى فيه وهو ده اللى انا مش لاقيه

سميره: أدم مش لاقى إيه يا حبيبي ده انت بتغيب اكتر مابتشتغل ده انت نص مرتبك بيتخصم من كتر غيابك وبتقول مش حاسي به . اعرف سغلك الأول عشان تعرف تحس به مش ماشاء الله نايم ومانتخ وبتقول شغلى.

يا أدم ربنا بيبارك في الفلوس اللى بتتعب على ماتجيبها وانت من ساعة ماتخرجت من الجامعه وانت ماشاءالله بتغير شغلك اكتر مابتغير لبسك وأوقات كتيره عايش عواطلى يمكن الفتره دى اللى مستقر في شغل بس استقرار مالوش لازمه عشان بتشتغل شويه وبتستهبل كتير

أدم: عشان مش بحبه

سميره: طيب وانت بتحب إيه بقى

أدم: مش عارف

ضحكن سميره اوى٥

أدم: بتضحكى لي

سميره: أصلك بوضعك ده ومتجوز إتنين

أدم :؛وإيه يعنى

سميره: أصل المثل بيقول جوز الاتنين يا قادر يا فاجر.

أدم: وانا أيه منهم

سميره: انت ولا واحد فيهم انت دلوع ومش حاسس بالمسؤولية لو انت شايل مسؤلية بيت بجد ماكنتش إتدلعت أوى كده.

أدم: طيب قلتى إيه هاتشاركينى ونكبر المشروع

سميره: طبعا لأ

الفصل السادس عشر من هنا

هنا

أدم: أنا عندى حل يريحكوا كلكوا ويقفل الباب على بابا من ناحيتها بالضبه والمفتاح.

رحاب: حل إيه يا أبو العريف؟

أدم: أتجوزها أنا..

رحاب: انت بتخرف وبتقول إيه؟

آدم : مش بخرف انتى عايزة تجوزيها عشان تبعديها عن بابا فأنا انجوزها

رحاب: وبدل ما ابعدها عن سكه ابوك اجوزهالك و أحطها في وشه ليل

فهيمه: ده هو ده الحل المظبوط

رحاب: بتقولى إيه يا ماما التخاريف دى تبقى الحل المظبوط.

فهيمه: صح جبتها إزاى ياواد يا أدم صح

رحاب: إيه اللى صح بزمتك

فهيمه: لما أدم يتجوز سميره كده تبقى متحرمه على جوزك لأنه أبو جوزها يعنى حماها يعنى لو قدامه ليل نهار مش هيعرف يبص لها من أساسه أما لو اتجوزت أى راجل تانى هيبقى فيها خطوره عليكى عشان لو اتطلقت من جوزها يقدر جوزك يتجوزها

فكرت رحاب شويه وقالت: صح ...بس لأ ماينفعش دى أكبر من أدم

أدم: وإيه يعنى عادى

رحاب: ووحشة يعنى الأول كان فيها الرجل بس دلوقتي دبلت وبقت زى إللى عندهم ١٠٠ سنه . وبعدين أنا مرضاش ان ابنى تكون دى مراته وأول فرحته

فهيمه: على أساس أن ابنك ماتجوزش قبل كده ده ابنك مطلق مرتين وخطب يجى عشر مرات

رحاب: لأ المره الأولى كان صغير وماتتحسبش.

فهيمه: طيب المره الاولى ماتتحسبش والتانيه

رحاب: التانيه كانت البت شايفه نفسها عليه معرفش على إيه تستاهل بنت ال

فهيمه: ماهو كلامك ده هو اللي بيقويه على بنات الناس وبعدين بعد ما يتجوزها ابقى جوزيه واحده تانيه تكون صغيرة وحلوه بس على الله تعقل يا أدم وماتخربش بيتك

أدم: لأ خلاص مانتوا شايفين بقيت بشتغل بجد أهو

أدم: طيب احنا كده قدامنا مشكله كبيره.

فهيمه: مشكله إيه؟

أدم: إزاى نقنع سميره إنها تتجوزنى

رحاب بإندفاع: هى تطول بنت المقشفه دى مش كفايه انها لا شكل ولا تعليم وهتاخد مهندس أد الدنيا طول بعرض بشباب وجمال

فهيمه: لأ أدم عنده حق. هترضى به إزاى لازم طريقه نقنعها بها.

فكرت رحاب وقالت: صح إزاى هاقنعها انها تتجوز بعد أخويا وانت عارفه في الفلاحين الموضوع ده مش سهل وخاصه إنها عندها أولاد يعنى هتقول عايزه أعيش وأربى أولادى.

طب يا ماما مادامت عايزه تربى عيالها تبقى مش هترضى تتجوز أيمن كمان

فهيمه: وإيه إللى يضمن لك آدم بالنسبة لها عيل مش هيقدر يشيل المسؤلية لكن لو جالها واحد زى أيمن راجل ومقتدر وهيربى لها عيالها وهى فى وضعها ده لايمكن ترفضوا

رحاب: صح طب هاقنعها بأدم إزاى

فهيمه،: مش تلت البيت بإسمك

رحاب: أيوه

فهيمه: غير تمن أرضك اللى سيبتيه لهم

رحاب: أيوه

فهيمه: وانتى لما تطالبيهم بحقك فى البيت والفلوس هتعمل ايه

رحاب: هتضطر تبيع البيت عشان تسد الديون ليا وللناس

فهيمه: وساعتها هتعيش فين هى وأولادها وأصلا هيفيض لهم إيه يعيشوا منه

رحاب بتفكير: ولا حاجه

فهيمه: يبقى ساعتها هتسمع كلامك وترضى بكل حاجه تقولي عليها وإلا هتحرميها من عيالها .

بصت رحاب لأمها بصدمه

&&&&&&&&&&&&&&&&&

كان صوت لعب الأولاد وضحكهم عالى أوى فراحت لهم لقتهم قاعدين على الطبليه وبياكلوا وبيضحكوا أوى بصت لهم بابتسامة حلوه.لقته بيبص لها بشوق وفرحه وضحكته الحلوه منوره وشه..بصت له بفرحه وقالت: على

اختنق صوتها واتجمعت الدموع في عينيها

بص لها بضيق وقال: طيب بتعيطى ليه بقى

سميره: عشان انت ميت.

ضحك بصوت عالي وقال: مين ده اللي ميت ماأنا عايش وبضحك أهو.مش انا اللى ميت انتى اللى ميته .وضحك والاولاد بتضحك معاه

قربت منه سميره وقالت: طيب والأدوية دى أعمل بها إيه؟

شاور على الأدويه بقرف: إرمى إرمى انتى شايفانى دلوقتى محتاج لدواكى.

بصت له واتأملته كان شاب صغير في العشرين شعره كله اسود ووشه منور

سميره: لأ انت مش محتاج

ضحك على مع الاولاد وقال: يبقى تعالى اضحكى معانا.اضحكى يا سميره وافرحى.

ابتسمت سميره وشويه واتحولت ابتسامتها لضحكات...

سميره: اللهم اجعله خير يارب

ملك: ماما انتى كنتى بتضحكى وانتى نايمه يا ماما

سميره بابتسامة حلوه: أصلى شفت بابا في الحلم وكان بيقولى اضحكى

ملك: بابا في الجنه يا ماما صح

سميره: ان شاءالله يا ملك ان شاءالله

&&&&&&---&&&&&&&&&-

بعد أيام دخلت عليها أم إبراهيم وماجده لقوها قاعده وحاطه إيدها على خدها

ماجده: يا فتاح يا عليم ليه التكشيره دى ده احنا ماصدقنا نلاقيكى بتضحكى وتهزرى معانا رجعتى تكشرى تانى ليه

سميره: أقعدى يا ماجده اقعدى يا أم إبراهيم

ام ابراهيم ؛ مالك زعلانه ليه

سميره: هو في الدنيا دى حاجة تفرح لو ربنا ياخدنى ويريحنى

ماجده: استغفرى ربنا يابت

سميره: استغفر الله العظيم بس أعمل إيه من غلبى.

ماجده: ربنا مايجيب غلب مالك يا سميره

سميره: هاقول ايه الشكوى لغير الله مذله

ماجده: ياستى فضفضى يمكن ترتاحى ولو عندك مشكله يمكن نلاقى لها حل .

سميره: حل إيه على مشى وساب لى الدنيا متطربقه فوق راسي مش لاقيه لها حل ولا عارفه هتمشى إزاى

أم إبراهيم: ليه ده كله

سميره: أقولك إيه الديانه مش سايبنى كل واحد عايز فلوسه وقالوا مش هنصبر اكتر من كده.

ماجده: وهما لهم فلوس كتيره

سميره: يعنى ألف من ده وألفين من ده وخمسه من ده كده يعنى.بس لما يتجمعوا هيبقى مبلغ كبير.بس الدين الكبير بتاع رحاب.

أم إبراهيم: اخت جوزك ودى لها أد ايه ؟

سميره: لها كتير اوى.. ده لها أكتر من ٥٠ ألف بتوع الارض غير اننا كنا بناخد منها في الأخر كتير.هى وجوزها

ماجده: طب وانتى هتعملى أيه

سميره مش عارفه واللى زاد وغطى انى خرجت يمكن حد يأجرنى في غيطه ولا حاجه مفيش وحتى الستات اللى كانت بتشغلنى في بنها مارضيوش

ماجده: مارضيوش ليه

سميره: مش عارفه ده حتى واحده الله يسامحها لما رحت لها لقيتها بتحط ٥٠ جنيه في إيدى وتقولى ماتجيش تانى.

أم إبراهيم: خايفين على رجالتهم منك

سميره: على إيه بعنى من حلاوتى هيخافوا على رجالتهم منى

أم إبراهيم: الرجاله عينهم زايغه .حتى لو متجوزين ملكات جمال

المهم عملتى معاها إيه الوليه دى

سميره: هاعمل إيه رميت ال٥٠ جنيه في وشها وسبتها ومشيت. ياناس أنا عايزه أكل عيش انا وأولادى مش عايزه احسان من حد

أم إبراهيم:فعلا وجود الراجل نعمه حتى ولو كان شويه عضم في قفه..طيب انتى هتعملى أيه ؟

سميره:: معرفش والله العظيم ماأعرف.

&&&&&&&&&&&&&&&&&&

أيوه ياللى بتخبط ثانيه واحده

فتحت سميره الباب لقت رحاب وأدم معاها فرحبت بهم بفرح شديد وسعاده: أهلا اهلا يادى النور اتفضلى يا استاذه رحاب وحشتيني أوى

سلمت عليها رحاب ببرود وقالت: الله يسلمك.

سميره: اتفضلي ادخلى منوره اتفضل يا أدم .

دخلت رحاب وبصت للبيت الكئيب ودخلت جوه

سميره:إيه الغيبه دى كلها أمال فين الأستاذ أيمن مجاش معاكوا ليه

ردت رحاب بغضب: وانتى مالك بتسألى عليه ليه؟

سميره بدفاع: مقصدش بس بطمن عليه عشان بقالوا كتير مابيجيش معاكوا

بصت رحاب لأدم وكأنها بتقول له شايف أهى لسه مخلصه العده وبترسم على أبوك

أدم: بابا مشغول شويه.٠أمال فين العيال

جرى عليه أحمد يسلم عليه في حين راحت البنات تسلم على عمتهم بأدب.

&&&&&&&&&&&&&ـ&&&

كانت سميره فى المطبخ بتجهيز الغداء فدخل عليها أدم وهى سرحانه ومش منتبه له

أدم: إزيك يا أبو سمره.

بصت له سميره وابتسمت فضحك وقال: يبقى اقتكرتى صح

سميره: هى دى حاجه تتنسى كان على بيغير منك لما بتنادينى سمسمه ويقول لك انا اللى ادلعها بسمسمه بس.

ضحك أدم وقال: عشان كده اخترعت أبو سمره كل ما احب أغيظ خالى أقول لك يا أبو سمره.

سميره بهم: الله يرحمه اخد كل حاجه حلوه معاه ومشى.

أدم: مالك فيه حاجه مزعلاكى

سميره بهم: قول فيه حاجه مفرحاكى ده كل حاجه مزعلانى وكأن الهم قالى شيلى لحد ماتموتى.

أدم: احكى لى يمكن اساعدك مش احنا أصحاب وكل فضايحى ومصايبي بحكيها لك

سميره: واشيلك الهم ليه

أدم: وافرضى عايز اشيل معاكى

سميره: هتشيل إيه ولا أيه

أدم: هشيل كله وجربينى

سميره: لا يا عم لاتشيل ولا تحط سيبنى في حالى

أدم: انا بتكلم بجد تتجوزينى يا سميره.

بصت له سميره بزهول وبعدها انفجرت في الضحك وقالت: هههههه الله يحظك يا أدم ضحكتنى.

أدم: ليه هو أنا بقول نكته.

سميره: أمال بتقول فظوره طبعا بتقول نكته.وسع كده خلينى أهدى على الرز ليتحرق

أدم بجديه: سيبى الرز وكلمينى انا بتكلم بجد أنا عايز أتجوزك.مش بهزر

سميره: لا ده انت دماغك فاضى.وشكلك مش فايق خالص ابقى ارتاح شويه بعد الغداء

دخلت رحاب وقالت: مالكوا

سميره: ولا حاجه

أدم: لأ فيه

سميره: مفيش حاجه الظاهر أدم مابينمش كويس عشان كده مش مركز وبيخرف

أدم: هو عشان عايز أتجوزك ابقى بخرف

بصت لها سميره وقالت: شفتى بيخرف وبيقول إيه.

رحاب: أنا مش شايفه أى تخاريف

بصت لهم سميره وقالت: فيه إيه انتوا مالكوا إيه الهزار الرخم ده.فيه حدود يا أدم مش كده.ماينفعش كلامك ده وانتى بدل ماتقولى له عيب بتقولى فيها إيه؟

أدم: عيب ليه هو أنا قلت حاجه حرام أنا عايز أتجوزك على سنة الله ورسوله

سميره: تتجوز إيه فوق لنفسك يا أدم انا ابقى مرات خالك

أدم: وخالى الله يرحمه مات وانتى عدتك خلصت خلاص فإيه المانع

بصت سميره لرحاب بدهشة وقالت: بيقول إيه المانع ردى عليه إنتى

كانت رحاب متغاظه أوى بس غصب عنها ردت بهدوء وقالت: أنا مش شايفه أى مانع

طفت سميره النار وقالت: انتوا مالكوا النهارده

انتى موافقاه على تخاريفه ولا دى حركه ومتفقه فيها مع ابنك عشان تختبرينى تشوفى ان كنت بفكر في الجواز بعد أخوكى ولا لأ طيب انا مش بفكر ولا هفكر خلاص اتطمنتى

رحاب: ومين قالك انى بختبرك انا طول الوقت بفكر فيكى انتى وأولادك هتعيشوا إزاى وهتربي عيالك إزاى

سميره بإستهزاء: ولقيتى الحل انى أتجوز أدم

رحاب: وفيها إيه يعنى هو أدم مش راجل ولا مش مالى عينك

سميره: أنا مقصدش والله العظيم ما أقصد بس ...بس ..أدم ده عيل..ده صغير ده لو حنين بنتى كانت كبيره شويه كنت جوزتها له وبقيت حماته نقولى ليا فيها إيه

رحاب بغضب: أنا ابنى مش عيل ابنى راجل وسيد الرجاله كمان

سميره: على راسى والله بس ماينفعش ده عايز شابه صغيره ٢٢ ولا ٢٥ حتى بنت يبنوا حياتهم سوا.

أدم: عشان يعنى انتى اكبر منى الفرق مش كتير حوالى ٨سنين مش فرق كبير

سميره: مش بس فرق العمر أنا خلاص اكتفيت ومش بفكر فى. رجاله لا من قريب ولا من بعيد.

رحاب:' وهتعيشى فين وهتربى عيالك إزاى

بصت لها سميره وقالت: قاصدك إيه؟

رحاب: أنا الديانه اتصلوا بيا عايزين فلوسهم وانتى بدل ماتسدى الديون استلفتى اكتر واكتر هتسدى كل دول منين وإزاى.

سميره بتبرير كنت في العده ومعرفتش أشتغل وبعدين أنا خلاص اقدر اشوف أى شغله وان شاءالله هبقى أسدد كل الديون

رحاب بسخرية: شغله إيه دى اللى هتصرف على عيالك وتسد الديون المتلتله دى .ده غير فلوسى.وياترى الديانه هتصبر لحد ماتشتغلى وتسيديهم ١٠٠جنيه في ١٠٠ جنيه ده اصلا لو فاض حاجه.

سميره: يعنى ايه ؟

رحاب: يعنى الديانه قالوا هيرفعوا عليكى قواضى بفلوسهم وخاصة انك ماضية على نفسك شيكات .

لفت الدنيا بسميره وقالت: طب والحل

رحاب: الحل اننا نبيع البيت ده وتسدى كل الديون اللى للناس.. وبصراحه انا كمان عايزه حقى وفلوسى وجايه مخصوص عشان ابيع البيت

سميره: ولو بعناه هنعيش فين أنا وأولادى ده أنا مليش حد أنا مقطوعه من شجرة.

رحاب: أنا هاخد ولاد اخويا بعيشوا عندى

سميره: طب وأنا هاعيش فين

رحاب: مش مشكلتى أنا هقدم طلب اخد وصايه العيال منك

سميره برعب: ليه

رحاب: لما نبيع البيت لا هيكون عندك مكان تعيشيهم فيه ولا شغل تصرفى عليهم منه والمعاش مش هيأكلهم عيش حاف فهاخد ولا أخويا عندى اربيهم وانتى اتصرفى بعيد عنى

سميره بدموع: ليه حرام عليكى انا عملت إيه وبعدين أنا مقدرش أعيش من غيرهم

طب خدينى ان شالله أكون خدامه عندك بس ماتبعدنيش عن عيالى.

رحاب: اخدك فين وفيه اتنين شحوطه في البيت راجلين كبار جوزى وابنى تقعدى مابينهم بصفتك إيه كنتى زمان بتيجى مع أخويا زياره وتمشى دلوقتي ماينفعش

قعدت سميره بهده على الكرسي ودموعها مغرقه وشها: ..وقالت يعنى إيه؟

ابتسمت رحاب وهى حاسه انها خلاص وصلت لهدفها وقالت : لازم يكون لك صفه شرعيه ماهو أنا مش هاحطك بين جوزى وابنى وانتى مش محرمه عليهم.

سميره: ولو اتجوزت ابنك

رحاب: بقى لك صفه مابينهم وبعدين احنا هنكتب الكتاب بس عشان الحرمانيه بس

((قربت منها وهى بتلعب بتفكيرها )): انتى لك إيه في البلد عشان تتمسكى بها احنا هنبيع البيت ونسد كل ديونا وتيجى معانا أولادك هيعيشوا في بيت أنضف من ده مليون مره هيتعلموا في مدارس أحسن مليون مره من البلد.هيعيشوا حياة راقيه مش عيشة الفلاحين دى ولو عليكى وعايزه تشتغلى هاسعدك تتوظفى في اى مؤسسه ولا اقول لك احنا عندنا في عمارتنا مخزن كبير هاديه لك يبقى بتاعك.

بصت لها سميره وقالت: مخزن

رحاب: ده بيتأجر بحوالى خمس آلاف كل شهر عايزه تأخدى الاجار ماشى عايزه تعملى مشروع فيه وماله هساعدك وتبقى بتشتغلى وبتثرفى على اولادك فكرى يا سميره انا في كل الحالات هاخد العيال فإختارى إما يجوا لوحدهم ولا تيجى معانا.

$$$$$$$$$$$$&&&&&&&

بعد اسبوع دخل ايمن البيت فلقى سميره وأولادها في البيت فإبتسم وهو بيرحب بهم

أهلا اهلا يا أم حنين اخيرا جيتى مع رحاب

انتى تسمعى كلامى اقعدى عندنا شويه حلوين تغيرى جو انتى والعيال

وطت سميره رأسها بخزى من غير ماترد عليه

ردت عليه رحاب وفي عيونها نظرة انتصار وقالت: ماتخافش هتقعد معانا على طول

أيمن: احسن بدل بهدلة البلد أنا هشوف لك شقه صغيره تعيشى فيها انتى وأولادك

رحاب: ليه وشقه ابنك موجوده

أيمن: شقه أدم مؤقته انا هاشوف لها

رحاب: مين قالك مؤقته دى شقتها من دلوقتي

ايمن: تقصدى إيه؟ مش فاهم

رحاب بابتسامة كلها شماته: اقصد ان دى شقتها مع جوزها عشان أدم اتجوز سميره

أيمن بغضب: انتى بتخرفى

رحاب: ليه ان شاءالله

أيمن: إزاى ابنك اتهبل إزاى يتجاوزها

رحاب: وفيها إيه يعنى هو ابنك صغير

أيمن: لا مش صغير بس مين اللي لعب في دماغك ودماغوا عشان تعملوا العمله دى

رحاب: بقى الجواز عمله وبعدها...

في وسط ماكانوا بيتخانقوا قعدت سميره على الأرض وهى فى حالة زهول وقعدت تقول: إيه إللى عملته في نفسى ده إيه اللي عملته في نفسى ده.وفجأه تاهت عن الدنيا وفقدت وعيها

الفصل السادس من هنا

مر اسبوع غريب كانت سميره ملتزمه شقه أدم مع أولادها لابتخرج ولا حد بيدخل بس.أدم بيشترى لهم الاكل وياخدوا الاولاد أما هى فكل يوم تتلفت حواليها وتردد نفس الجمله (( إيه اللى عملته في نفسى ده)) وكأن عقلها حتى الآن مش مستوعب إنها أصبحت زوجه لرجل تانى غير على.

جلست سميره على الكرسي بضيق ودموعها مغرقه وشها وأولادها حواليها وهم مهمومين أهمها

احمد: احنا هنروح بيتنى امتى يا ماما انا مش عايز اقعد هنا

ملك: بجد يا ماما أنا مش عايزه أدنى هنا مش بعرف ألعب هنا في الشقه أنا عايزة أروح بيتنا.

بصت لهم سميره ولسانه عاجز مش عارفه ترد عليهم وبصت لحنين اللى بتبص لها وهى ساكته وقالت: ساكته ليه يا حنين..

حنين: ليه يا ماما!؟

سميره: ماتلوميش عليا يا حنين عشان خاطري ماتلوميش عليا وعشان خاطرى ماتحاسبينيش

أنا مش عارفه مالى عملت إيه ولا إزاى أنا حاسه انى بدور والدنيا بتدور معايا لاأنا عارفه ابطل ولا الدنيا بتقف

ملك: لو زعلانه يالا نرجع بتنا ومانقعدش هنا تانى

سميره بوجع : ماعدش ينفع يا ملك احنا مبقاش لنا أى حاجة في البلد لا أرض ولا بيت ولا أى حاجة.

حنين: طب وبابا

سميره بوجع: الله يرحمه بصى يا حبيبتى مش انتى بتحبى بابا

حنين: أوى

سميره: يبقى إدعى له كتير وافتكرى كل حاجه حلوه كان بيعملها لنا . وابقى شاطره واطلعى الاولى على المدرسة زى ما كان بيقولك عشان يبقى مبسوط منك وهو في الجنه ماشى

حنين: ماشى

سميره: وانتى يا ملك انتى وأحمد بكره هيبقى لكم اصحاب كتير هنا وهتحبوهم اكتر من البلد بكتير بس ابقوا شاطرين واسمعوا الكلام وماتضايقوش طنط رحاب عشان ماتزعلش منكم ماشى.

قام الاولاد وسابوها ترجع تانى تغرق في أفكارها وحزنها

&&&&&&&&&&&&&&&&&&

أما في الشقه المجاوره كان الوضع ملتهب مابين أيمن من جهه ورحاب وأدم من جهه

أيمن: أنا سكت لحد دلوقتي مستنى حد يفهمنى المهزله دى بس مفيش حد قال حاجه

رحاب ببرود: وأنت عايز تفهم إيه وأساسا هو فيه حاجه مش مفهومه

أيمن بغضب: كل حاجه مش مفهومه إزاى يعنى تروحى البلد على اساس هتقعدى مع مرات اخوكى ترجعى وهى مرات ابنك

رحاب: فيها إيه دى .ابنى اتجوزها وخلص الكلام.اى كلام تانى ملوش اى لازمه

أيمن بغضب: ليه على اساس انى مليش وجود في البيت بتجوزى ابنك من ورايا وكأنى رجل كرسي في البيت وبتقولى كلامى مالوش لازمه

حست رحاب بغضبه الشديد فعرفت ان العند معاه مش نافع فلجأت لاين وقالت ببعض الحزن : هاقولك يا أيمن ماعاش ولا كان اللى يقول عليك ملكش لازمه ده انتى حبيبي وعشرة عمرى كله

اتأثر أيمن بكلامها وقال: قولى انا سامعك

رحاب: كان غصب عني يا حبيبي مرات اخويا والديون متجمعه عليها من كل ناحيه ومش عارفه تصرف على عيالها ولا عارفه حتى تخلص ورق المعاش ورحت البيت لقيتهم مش لاقين العيش الحاف كنت عايزنى أعمل إيه أسيبها هى واولادها لما يموتوا من الجوع ولا لما تتحبس بسبب الشيكات اللى كتبتهم على نفسها.ماكانش قدامى غير انى أبيع البيت واسد ديون اخويا

أيمن بإقتناع: طيب إيه علاقة الديون بإنك تجوزيها لأدم

رحاب: طب قولى اعمل ايه وهى لوحدها في الشارع اسيبها ولا اجيبها معايا

أيمن: كنتى جبتيها إيه لازمه الجواز

رحاب: يعنى هاتعيش مابينا في وسطنا إزاى وهى ملهاش أى صفه شرعيه قولى يا ايمن ياللى بتخاف من الحرام كانت هتقعد مابينا إزاى وانت وأدم مش محرمين لها

أيمن: تروحى تجوزيها لأدم

رحاب: أمال كنت اجوزها لك.

أيمن باضطراب ،: أنا مقصدش بس على الأقل كنتى راعيتى حالها

رحاب بصوت عالى: وماله حالها ان شاءالله ماهى زى الفل اهى

أيمن: دى بزمتك زى الفل دى عامله زى اللى سرقته السكينه ومش حاسس بنفسه

قامت رحاب وقالت بغضب تنهى الحديث: يعنى سقيناها حاجه أصفره ولا جوزناها وهى نايمه أهو كل حاجه برضاها وبعدين تحمد ربها اننا جوزناها ابننا شاب ملو همومه طول بعرض بجمال وفوق كده متعلم ومعاه شهاده عاليه يعنى تحمد ربنا عليه .

أيمن: طيب انتى راحه فين

رحاب::هنزل تحت عند ماما عشان بصراحه اتخنقت من اول ماجينا وانت مستلمنا تحقيق ورا تحقيق حسيتنى انى عملت جريمه وانا مش داريه الجريمة الحقيقيه انى جوزت ابنى الشاب ده لواحده زيها المفروض نزعل عليه عشان احنا كده ظلمناه هو.

وسابته وخرجت

&&&&&&&&&&---&&&&&&

رن جرس الباب ففتحت ملك وقالت:عمو أيمن أهلا يا عمو

ابتسم لها أيمن وقال: أهلا يا سكره فين ماما

ملك: ماما جوه أندها

ايمن: أيوه خليها تيجى انا مستنيها في الأنتريه

دخل وقعد وبعد شويه جت سميره وهى موطيه راسها بخجل وقعدت على الكرسي المقابل

أيمن: يعنى هنا من اسبوع وماشفتكيش ولا مره يا أم حنين.

كانت اسه بتبص للأرض وقالت بصوت واطي: بصراحه خزيانه

أيمن: من إيه

سميره: يعنى من.... من كل حاجه

أيمن: فيه سؤال عايز اساله لك بس تجاوبينى بكل صراحه وماتخافيش. هى رحاب هددتك بحاجة ؟ خوفتك بحاجه ؟

سميره: لا والله

أيمن: طيب رضيتى بأدم ليه

سكتت سميره وهى مش عارفه ترد .

أيمن : انتى لا تناسبى أدم ولا أدم ينفعك ليه توافقى عليه خوفوكى بإيه؟

ماعرفتش سميره ترد عليه فبكت .

أيمن: طب انتى بتعيطى ليه انا ماقصدش أزعلك بس بصراحه متضايق.ياام حنين انا مش متضايق انك اتجوزتى ابنى بس صعبان عليا حالك أدم طايش وحاله مش مظبوط وخايف عليكى لتتعبى منه

سميره بإندفاع: أدم طيب والله

أيمن بسخريه: كويس أديكى بتدافعى عنه من دلوقتي.

سكتت سميره فقام أيمن وقبل مايخرج لقى أدم في وشه

أدم بتعمل ايه هنا يا بابا

أيمن: كنت بتطمن على أم حنين

وسابه وخرج

&&&&&&&&---&&&&&&&&&&

في بيت فهيمه

فهيمه: كنتى بتزعقى كده ليه يا رحاب؟

رحاب: كنت بزعق لأدم عشان يتحرك شويه انا زهقت

فهيمه: ليه هى بسلامتها لسه شايفه نفسه عروسه وبتتدلع

رحاب: قال إيه بتتكسف ومش قادرة تبصلنا

فهيمه: لتكون بتحسب نفسها لسه عيله وعايزانا ندلعا شويه هى مش شايفه نفسها

رحاب: ماانا زعقت له عشان كده انا زهقت وتعبت ومش هلاحق على شغلى ولا على شغل البيت وطلباته ولا على خدمتها هى وعيالها.

خلاص احنا صبرنا عليها اسبوع كفايه أوى كده المفروض تخلى في عينها حصوه ملح وتساعدنى في البيت وقرفه

فهيمه: أيوه كده خليكى ناصحه وأوعى ترخى لها الحبل خليكى ناصحه اهى تعمل بلقمتها

&&&&&&&&&&&&&&&&&&

دخل أدم بعد خروج والده وكانت سميره لسه في مكانها.قعظ على نفس الكرسي وبص لها وقال: عامله ايه دلوقت يا سميره ؟

سميره: الحمد لله بخير

أدم،: كويس انا كنت في الإدارة التعليمية من شويه.

بصت له سميره باهتمام وقالت: وعملت إيه؟

أدم: لسه القرار وماوصلش بس انا متابع بس

سميره: كده السنه هتروح على العيال

أدخ: خالص هو الموضوع هياخد شويه أيام مش أكتر اعتبرى انهم في أجازه ويزاكروا في البيت على مانخلص اجراءات التحويل ويدخلوا المدارس

سميره: ماشى كتر خيرك

بص لها أدم بعمق وبعدها قال: أظن كفايه اسبوع يا سميره أنا سبتك لحد ما أعصابك ترتاح بس كده كفايه

سميره بعدم تركيز: كفايه...مش فاهمه

أدم: لأ فاهمه وعلى العموم هاقولها لك انا من النهارده هاجى ابات هنا.

سميره بفزع: ليه ؟ هتيجى تبات هنا ليه؟

أدم بسخرية: طبيعي بيتى وطبيعي أبات فيه.

سميره: طب واحنا

أدم: انتوا ايه هتباتوا معايا طبعا

سميره: ماينفعش حرام انا مرات خ...

أدم بسخرية ،: ماتكملى...مرات خالى واضح انك نسيتى انك دلوقتي مراتى

سميره بتوتر: بس....بس احنا متفقين على

أدم: اتفقنا على إيه؟. هنعمل زى العيال الصغيرة ونقول جواز صورى ولا جواز مؤقت هو فيه فى شرع ربنا حاجه اسمها الكلام ده.ردى عليا فيه الكلام الفاضي ده

هزت سميره رأسها بلأ

أدم: كويس وانتى مراتى بشرع ربنا

سميره: طب سيبنى أمهد للعيال بس عشان مايتصدموش

أدم: يتصدموا منى وبعدين هيفرق إيه النهارده من الاسبوع الجاي واداموا هتيصدموا في كل الاحوال.ولا انتى اللى مش عايزانى أجى

انفجرت سميره في البكاء وقالت: مش هينفع مش هاقدر أنا مش هاقدر إزاى عايزنى أدخل راجل غريب بيتى

أدم: ألظاهر انك اللى اتجننتى أنا مش راجل غريب.انا جوزك وياريت تقعدى تردديها في عقلك ١٠٠ مره كل ساعه عشان تقتنعى بها انا حوزك ومش بعمل حاجه حرام .

سميره بنحيب شديد: طب سيبنى لبكره سيبنى بس لبكره ابوي إيدك سيبنى انا مش هستحمل.

قام من مكانه بغضب بعد ماجرحت رجولته برفضها الغريب له بس قبل ما يمشي طلع من جيبه مبلغ وحطه على الطاوله جنبها وقال: اظن انتى مش صغيره عشان تعيطى بالشكل ده وعلى العموم انتى مش صغيره عشان انبهك انك دلوقتي في بيت وفيه حياة وإلتزامات مطلوبه منك وابسط حاجه انك تهتمى بالبيت وكفايه أوى على ماما لحد كده أظن ابسط حاجه أطلبها منك ان نيجى ونلاقى أكل حلو وبيت نظيف.وزى مابنراعيكى وبندور على مصلحة اولادك ياريت تراعى انتى كمان البيت.

وسابها وخرج

$$$$$$$$$$$$$$$$$$$$$$$

في اليوم التالي خرجت سميره من البيت ومعاها الفلوس أصل أدم احرجها بجد زى ماهم شايلين همها هى أولادها لازم حاجه في المقابل.المشكله انها مش عارفه المكان كويس كانت زمان بتيجى مع على كل سنه مره أو مرتين بتقعد في الشقه مابتخرجش وان خرجت يبقى مع أدم أو مع على لكن لوحدها ماتعرفيش .

وقفت أمام العماره تتلفت يمين وشمال وهى مش عارفه تمشى فين ولا تروح منين .والمشكله الكبيرة أنها عايزه حاجات كتير البيت تقريبا فاضى ومش معاها مفتاح شقه رحاب يعنى لازم تشترى كل حاجه من بره وترجع بسرعه تجهز الأكل لأنهم هيرجعوا الساعه ٣ العصر.مشيت شويه وكل شويه تتلفت لتتوه وبعدها رجعت تانى وهى كمان بتتلفت .: يادى النيله هو أنا هاروح شمال ولا يمين ده إيه التوهه دى بس ياربى

فجأة حست باللى مسكها من هدومها وقال: انتى إيه حكايتك بالظبط ؟!.....

بعد الجزء ده لأختى وحبيبتى ( نعمه عبد العظيم)؛وهى لما هتقرأ البارت هتعرف لوحدها بهديه لها ليه؟

فجأة حست باللى مسكها من هدومها وقالت: انتى إيه حكايتك بالظبط ؟!.....

سميره بخضه لقت شابه في الخامسه والعشرين من العمر أطول منها بشويه بيضاء وجميله ؛ بسم الله الرحمن الرحيم انتى مين ؟

البنت: أنا اللى مين ولا انتى راحه جايه راحه جايه وعماله تتلفتى زى اللى عاملين عامله انتى مين يابت وإيه حكايتك بالظبط

سميره بخضه: مفيش حكايه والله أنا كنت راحه اشترى خضار

البنت: أمال عماله تتلفتى زى الحراميه كده ليه انتى تبع مين ؟

سميره : يعنى إيه تبع مين؟

البنت: يعنى بتشتغلى عند مين؟

سميره بدهشة: بشتغل ليه ان شاءالله انتى بتحسبينى خدامه.؟ليه شايفانى شايله شنطه السوق في إيدى.

البنت: الله وفلاحه كمان أمال انتى ماسكه إيه يعنى لاب توب مثلا. بلاش خدامه نقول هوس كيبر ولا مديره منزل ان كان خدامه بيدايقك

سميره بغضب: خدامه في عينك قليله الأدب وبعدين انتى مالك اروح ولا ارجع انتى مالك كان شارع أبوكى.

البنت بضحك: الله ده احنا بنعرف نرد أهو وبعدين ماتضحكيش عليا انتى بالكلام وقولى بتدورى على إيه .خوفتينى معاكى ولوحتى رقبتى ولا عايزه مين يمكن اساعدك بصى أنا أعرف المنطقه دى كلها بيت بيت وواحد واحد.بتدورى على منين.

سميره: ياست انا مش بدور على حد انا كنت عايزه اشترى طلبات للبيت خضار وفراخ وحاجات من دى

البنت: طب ماهو بتاع الخضار هناك أهو

سميره بتريقه: ماعجبنيش خضاره وحش وغالى هاروح أجيب من السوق عندك مانع

البنت: لماضة فلاحين وخلاص لا يختى ماعنديش اتكلى على الله اقولك آخر الشارع على اليمين هتلاقى بياعين فرشين روحي جيبى منهم ((سابتها سميره ومشيت.))(فكملت البنت بصوت عالى شويه وبسخريه )وابقى علمى الشارع بطوبه لا تتوهى

بعد ساعه رجعت سميره وهى شايله اكياس الخضار ومعاها طلبات البيت ووصلت لحد مدخل العمارة وقفت شويه وفجأة رجعت وراحت للمكتبه وقالت للبنت: أنا جيبت كل طلباتى ورجعت بس ماعلمتش الشارع بطوبه عارفه ليه

البنت : ليه

سميره: عشان كنت معلماه بحماره واقفه قدام مكتبه .( وسابتها ومشيت)

خرجت البنت بسرعه وقعدت تتلفت تشوف فين الحماره دى ولما مالقتش حاجه فكرت شويه وهى بتقول: مفيش حماره بره هى تقصد ايه!!

وبعدها استوعبت وقالت: يابنت اللذين دى هزقتنى.!!

&&&&&&&&&&&&&&&&&

دخلت سميره البيت وكان صوت لعب اولادها عالى فابتسمت لأول مره عليهم لأنهم كانوا دايما ساكتين.

سميره:بتعملوا ايه؟

احمد: بنلعب

سميره: طب ينفع تبهدلوا الدنيا كده يالا رتبوا المكان قبل ما أب....وافتكرت ان الماضي كان حلم حلو وراح فقالت: قبل ما عمتكوا تيجى

ملك: هانلعب شويه يا ماما أصل لما عمتوا بتكون هنا مش بنعرف نلعب ولا نتكلم حتى هى مش بتحب الدوشه

هزت سميره راسها بتفهم واسف على حال أولادها.وقالت: خلاص العبوا شويه على مااجهز الاكل وبعدها ابقوا رتبوا المكان.

على الساعه ثلاثة العصر دخلت رحاب البيت فوجدته زى ماهو فنادت على أدم وهى غضبانه جدا: ينفع كده يا أدم أروح وأرجع ومفيش حاجه تتعمل في البيت.

أدم: استنى بس يا ماما أفهم

رحاب: تفهم إيه: البيت مش نظيف والمواعين وسخه ومفيش أكل ولاحاجه اتعملت وبتقول اهدى

خرج أدم بسرعه وراح بسرعه الشقه المجاوره كانت سميره في المطبخ

أدم بغضب: مش قلت لك ان فيه إلتزامات انتى مسؤله عنها

سميره بخضه: بسم الله الرحمن الرحيم خضتنى في حاجة

أدم: فيه انى قلت لك عليكى إلتزامات وانتى طنشتى كلامى.

سميره: أنا ما طنشتش وأهو أنا محضره الغداء وهابعت لأمك

أدم:أولا مفيش حاجه اسمها هابعت لأمك

إحنا كلنا بنتغدى وبنتعشا مع بعض يعنى الأكل كله بيبقى هناك مش هنا ثانيا ليه ما نضفتيش الشقه ورتبتيها

سميره: أنا مرتباها مره وعدت عليها من شويه هو العيال لحقوا يبهدلوها

أدم: انا بقول على شقه ماما مش شقتى دى .

سميره بعدم فهم: عايزنى أ..

أدم: مش عيب إنك تخدميها وتشوفى طلباتها ياسميره إحنا عايزين المركب تمشى والحياة تستمر والوضع اللى ماكانش ينفع زمان دلوقتي خلاص الدنيا اتغيرت ولازم نساير الدنيا عشان تمشي ماشى

هزت سميره راسها وقالت ماشى وأخدت الأكل وراحت الشقه التانيه.

&&&&&&&&&&&&&&&&&&

بعد الغداء كانت سميره بتشطب المطبخ وبتعمل لهم الشاى.خرجت وهى بتقدمه لهم سمعت أيمن بيقول: بقولك يا أم حنين أنا هاخد العيال بعد الشاى ننزل تحت فيه مكتبه جنب البيت فيها شنط حلوه هاخدهم يختار كل واحد شنطة حلوه للمدرسه ماشى يا أولاد

هز الأولاد رأسهم بدون حماس وقالوا: ماشى

هزت رأسها له وقالت: شكرا كتر خيرك

أيمن: إيه كتر خيرك دى ده حقهم .يالا يا حبايبى.

وبعد شويه رجع الأولاد وكل واحد شايل شنطه واضح انها غاليه جدا بس الغريبة ان فرحة الأولاد عاديه مش زى ماكان بيجيب لهم أبوهم كان بيبتكر لهم كل مره طريقه يفرحهم بها.

في المساء فتح أدم الباب ودخل فاتخضت سميره لأنه دخل بدون استئذان وجريت بسرعه تلبس الحجاب لكنه مسكه من إيدها وقال: أظن خلاص مالوش لازمه . انا مش غريب.

سميره: قصدك .

أدم: أنا في بيتى وإنتى مراتى.وبص للأولاد اللى بيتابعوا الموقف بدهشة من حنين وعدم فهم من ملك وأحمد وقال: الوقت إتأخر يالا كل واحد يدخل ينام .

قام الأولاد ودخلوا غرفتهم وقفلوا الباب في حين جرت سميره رجولها جر لحد ما دخلت الغرفه ودخل وراها أدم وقفل الباب بالمفتاح.

&&&&&&&&&&&&&&&&&&

على استنى يا على سايبنى. ورايح فين ؟طب استنى شويه..... كلمنى ....بص ليا ليه مدينى ظهرك

قال على من غير ما يبص ناحيتها: خلاص يا سميره ماينفعش أشوفك . خلاص...وبدأ يمشي وسابها لوحدها وهو بيقول خلاص ماينفعش خلاص ماينفعش.

انتفضت سميره في مكانها وبدأ عقلها يستوعب فنزلت دموعها على خدها بصمت (( خلاص دلوقتي بجد ماينفعش أفكر فيك خلاص انت بجد انتهيت من حياتى حتى ابسط حقوقى فيك فقدتها دلوقتي))

وقامت ودخلت الحمام الملحق بغرفة النوم وأخدت دش.خرجت من الحمام وشغلت اضاءه خفيفه ومسكت فرشاة الشعر وبدأت تمشط شعرها في عنف.وقفت لحظه وهى بتشوف انعكاس صورتها وانعاكس صوره أدم في المرايه فرق كبير أوى مابينهم فرق كبير هى بوشها الذابل وملامحها المراهقه والهم الكبير اللى شالته فتره مرض على وموته اثر على وشها وجسمها جعلها أكبر من سنها الحقيقي حتى الشعر الابيض اللى فى مقدمة رأسها دليل على كلامها أما أدم المرفه اللى ماشافش في شقى ولا شال أى مسؤلية..شاب في مقتبل حياته وجعل صورتهم مع بعض مشوهه مش منطقيه مش طبيعيه بالرغم ان الفرق مابينهم مش كبير اوى فى السنين لكن الفرق واضح.وكأنه التقاء الخريف بالربيع.

خرجها من دوامة أفكارها صوت أذان الفجر فقامت من مكانها ولبست لبسها وخرجت عشان الصلاة وكمان لازم تواجه أولادها عشان ماتتشوهش صورتها في عيونهم كفايه أوى أن صورتها مشوهه أمام نفسها

دخلت أوضتهم وبدات تصحيهم : قوم يا أحمد اصحى يا ملك قومى يا حنين الفجر بيأذن

قام الأولاد بكسل ودخل احمد يتوضأ فقالت

حنين:أدم لسه هنا صح؟... ليه يا ماما

أخدت سميره نفس عميق وبعدها قالت: مكانه الطبيعي مابينا يا حنين انت عارفه انه اتجوزنى

ملك: طب وبابا

سميره: بابا الله يرحمه في الجنه خلاص يا ملك.

حنين: يعنى هتنسى بابا صح

سميره: اكيد لأ عمرى ماهنساه أبدا بس خلاص أدم له حق عليا وحرام عليا إنى اظلمه

حنين: بس أنا بحب بابا ومش عايزة أدم

ملك: وأنا كمان

سميره: عمرى ما هقول لكم اكرهوا بابا أو انسوه ولا هقول حبوا أدم بس هقول لازم تحترموا زى ماكنتوا بتحبوه وتحترموه زمان .قرب منهم احمد فقالت سميره لأولادها: يا حبيبي الدنيا في أوقات بتجيرنا نعمل حاجات مش بنحبها بس لازم نعملها عشان نقدر نعيش والدنيا تستمر أنا عارفه أن الوضع ده صعب وغريب عليكم بس خلاص احنا لازم نتعود عليه ونعيش لازم نتعود على الحياة هنا زى ما لازم نتعود ان مفيش بابا دلوقتى بس اعرفوا واتأكدوا من حاجه واحده انى بحبكم أوى وانتوا أغلى الناس على قلبى ومفيش حد في الدنيا كلها أغلى عندى منكم .

بعد الصلاة حست بالذنب انها ماصحتش أدم للصلاة فدخلت عنده وبدأت تصحيه: أدم يا أدم قوم

أدم بكسل: إييييه عايزه إيه

سميره: قوم يا أدم صلى الفجر

أدم بكسل وبنوم: أوف أنا عايز أنام سيبينى

سميره: ماينفعش يا أدم قوم إلحق الفجر

أدم:؛يوووووه قلت سيبينى أنام واطفى النور

خرجت سميره بعد ما يأست منه وقالت: فرق كبير بجد.

&&&&&&&&&&&&&&&&ـ&

خرجت من مدخل العمارة شافتها البنت في المكتبه فخرجت بسرعه ناحيتها وقالت: بقى فيه حماره جنب المكتبه .

سميره بضيق: استغفر الله العظيم اصطبحى وقولى ياصبح عشان أنا مش فايقه لك

البنت: إيه ده المزاج مش مظبوط ليه بس

سميره بغضب: انتى عايزاه ايه يابت انتى

البنت: طيب بتزعقى ليه ياستى بناغشك يا اختى بتشاكل معاكى.عايزه اتكلم معاكى

سميره: وانا مش عايز لا أتشاكل ولا أتكلم

البنت: لا دى مقفله معاكى خالص تعالى معايا

سميره: بتعملى إيه انتى كمان سحبانى معاكى على فين

البنت: يعنى هاخطفك مثلا هاخدك المكتبه أنا خلاص حطيتك في دماغى ومش هسيبك إلا لما تروقى.

ودخلتها معاها المكتبه

البنت أقعدى بقى تشربى إيه عندى كل حاجه شاى قهوه سحلي قرفه كل حاجه

بدأت سميره تهدا وقالت: شكرا ولا حاجه

البنت: إيه شكر دى هو أنا بخيله أقعدى بقى وأنا هاعمل لك احلى كوبايه شاى. وشغلت الكاتل وقالت: مش هنقولى اسمك إيه؟

سميره: اسمى سميره.

البنت: اسم فلاحين بجد

سميره بغضب: هو انت كل شويه تقولى فلاحين هو احنا مضايقنك في إيه

البنت ' بهزر معاكى فوكى بقى وبلاش الكأبه دى

سميره: هو إنت مجنونه والله انا ماشفتش زيك

البنت: هافوتها لك عشان الصحبيه اللى مابينا

سميره بتعجب: صحبيه إيه هو أنا أعرفك ده أنا حتى ماأعرفش اسمك

البنت: بس كده اسمى هاله.

سميره: وعماله تتريقى عليا وتقولى فلاحين فلاحين وفى الأخر اسمك هاله ده انتى اسمك أقدم من الجبنه الحادقه يعنى مش بس اسم فلاحين لأ وقديم كمان داحنا عشنا حياتنا من صغرنا على بنتفرج على مسرحيه هاله حبيبتي

هاله: الله يسامحك يا بابا ياللى خليت الفلاحين يتنمروا على اسمى

قامت سميره وقالت: أنا هامشى أنا مش فاضيه لهبلك ده

هاله: استنى بس ياستى بهزر معاكى بقولك ايه عشان نبقى حلوين مع بعض لازم تفوتى لى عشان أنا كده هشبط فيها وهادنى ارخم عليكى كل شويه.

سميره: ياسلام ليه ان شاءالله

هاله: أنا كده مابحبش اقعد ساكته لازم حاجه تشغلنى وبما أن الشغل في المكتبه بيبقى الصبح والعيال رايحين المدرسه أو العصر لما يرجعوا.وصاحب المكتبه الذكى عايزنى أفتح المكتبه دايما فبقعد كده ساكته يرضيكى اكلم الحيطه ولا الكراسات ويقولوا مجنونه.

ضحكت سميره عليها وقالت: روحى كلمة جوزك احسن فاستبشرت هاله وقالت مادام ضحكتى يبقى بقينا أصحاب . وبعدين هو فين ابن اللذين يجى بس وأنا مش بس هاكلموا ده أنا هربطوا بحبل عشان مايهربش

ماقدرتش سميره وانفحرت من الضحك عليها

قدمت لها هاله الشاى وقالت: طب مانتى بتضحكى وضحكتك حلوه أمال مكشره ليه

سميره: مش مكشره بس انتى رخمه عماله تقولى فلاحين فلاحين.

هاله: هى فلاحين دى شتيمه وبعدين أنا اساسا بحب الفلاحين

سميره: ياسلام

هاله: أه والله طب هاقولك مش الراجل بيبقى لابس الجلبيه والطاقيه وماسك الفاس وعمال يعزق في البرسيم..وانتى بتبقى راكبه الحماره وشايله البلاص وفوقه المشنقه اللى كلها بقى خيرات ربنا فطير وعسل ومش وتروح له الغيط عشان يتغدوا سوا وهو يكسر فحل البصل بإيده عشان ياكل

انفجرت سميره في الضحك على كلام هاله وقالت: مش قادره بطنى وجعتنى من الضحك

هاله: ياسلام ليه بقى ان شاءالله

سميره وهى لسه بتضحك وقالت: برسيم إيه إللى بيتعزق

هاله: هو البرسيم مابيتعزقش

سميره بضحك: لأ

هاله: ولا وهو صغير ولا وهو كبير

سميره: عمره من اول مايتبدر لحد مايتحش مابتلمسوش الفاس.لأ وشوفى انا هاركب حماره وأنا شايله بلاص وفوقه مشنه هو أنا راحه الغيط ولا راحه السرك..إزاى اساسا البلاص هتحطى فوقه مشنه هو اساسا مفيش بلاليص.

هاله: ياقلبى مفيش بلاليص طب بتشربوا ميه إزاى طب فيه قله

سميره بضحك: ليه مفيش اختراع اسمه ثلاجه

قعدت هاله بصدمه وقالت: طب على الاقل عندك جاموسه وبتحلبيها وبتعملى الزبدة والقشطه والجبنه

ضحكت سميره بتسليه وقالت: مين قالك الكلام ده

هاله بصدمه: ده كمان غلط بوظتى صوره الفلاحين في عنيا أمال إيه الصح

سميره بتسليه: ضحكوا عليكى احنا مش بنصنع الزبده والقشطه

هاله بدهشة: ياسلام أمال بتعملوا إيه؟

سميره: مابنعملش بصى هى الجاموسه لها اربع اضرع صح

هاله:صح

سميره: واحد بينزل لبن والتانى بينزل قشطه والتالت بينزل زبده والاخير ده بتاع الجبنه

هاله بتصديق: بجد

سميره بجديه مزيفه: أيوه واحنا لما نعوز جبنه نروح نحلب بتاع الجبنه ولما نعوز قشطه نحلب بتاع القشطه.

هاله: والزبدة من بتاع الزبده واللبن من بتاع اللبن بجد العلم نور

قامت سميره وقالت:شاطره عليكى نور خليكى كده وانا هاقوم أجيب طلباتى عشان اتاخرت .

خرجت سميره وهى بتضحك وبتقول: هبله بس دمها خفيف.نستنى الهم اللى كنت فيه.

الفصل السابع من هنا

كانت سميره في المخبز وابتسمت لما سمعت صوته داخل عليها

سميره: ياأهلا يا اهلا إيه النوره كله

قعد على الكرسي المقابل وقال: اهلا بكى

سميره: طيب ليه الغيبه الطويله دى بقالك فتره طويله مادخلتش المحل

أيمن: أعمل إيه شغل كتير ومسؤوليات المهم مش هتقدمى لى حاجه ولا انتى بخيله

سميره: اخص عليك ده أنا أم الكرم كله تحب اجيب لك إيه.

أيمن: كوبايه شاى ودوقينى من حاجاتك الحلوه.

سميره: بس كده المحل كله تحت امرك ثانيه واحده( يا محمد اعمل احلى كوباية شاى وظبطتنا من عندك ماشى.)

وبصت لأيمن وقالت: تصدق إن بقالى كتير جدا ماأكلتش حاجه من اللى بنعملها

ضحك أيمن وقال: ليه هو باب النجار مخلع

ضحكت سميره وقالت: شكله كده بس بصراحه من كتر مابتعامل مع المخبوزات نفسى قفلت منها .

ضحك ايمن وهو بياكل باتيه الجبنه وقال: بس الباتيه ده تحفه بجد تسلم ايدك ماتوقعتش انك ممكن تقدرى تقومى بالشغل ده ولا ان المحل نفسه يمشي توقعت ان المشروع ده هيفشل بس انا فرحان انك خالفتى توقعاتى

سميره: الحمد لله كله بفضل الله

تتنهد أيمن وقال بضيق: سمعت ان أدم طلب منك يشاركك في المخبز صح

هزت سميره راسها بضيق وقالت: صح

أيمن: وانتى قلتى له إيه؟

سميره: بصراحه قلت له لأ

أيمن: وهو طبعا زعل وعملها حكايه صح

سميره: اكيد طبعا وطبعا راح اشتكانى لأمه اللى قومت عليا حرب ملهاش داعى

أيمن بمراره في كلامه: أنا مش عارف هيكبر ده امتى ويبقى راجل.انك تكون بار بأمك شئ عظيم بس مش لدرجه انك تكون دلدلول لها كلمة توديه وكلمه تجيبه .

سميره: أم أدم مش عاجبها انه عايز يسيب الشغل بس هى بتعاندنى حتى ولو على مصلحة ابنها

أيمن: نفسى اعرف هى ليه بتكرهك اوى كده تعرفى زمان ماكانتش بتكرهك كده هى بصراحه ماكانتش بتحبك أوى بس كانت كويسه لكن دلوقتي بتدور على الحاجه اللي تضايقك تعملها

سميره في نفسها( اقولك ايه وانت السبب في اللى هى فيه)وبعدها قالت:سيبها على الله

دخلت عليهم المحل سيده أربعينيه أنيقه وقفت تتفرج على المكان وبعدها قربت منهم وقالت: صباح الخير

أيمن وسميره: صباح النور

السيده: ممكن أقابل صاحبه المخبز ده

سميره: أنا ام حنين صاحبه المخبز

ابتسمت السيده وقالت: أنا ابقى جيهان عطيه رئيسة جمعيه سيدات المعادى .

فقامت سميره تسلم عليها وترحب بها: أهلا وسهلا بك شرفتينا

جيهان:أهلا بك انا كنت عايزة...

أيمن: طيب عشان مااعطلكيش على شعلك هامشى أنا ونبقى نكمل كلامنا بعدين عن إذنكم.

وبعد ماخرج ايمن شاورت سميره لهاله إللى جت وقعدت معاهم

جلست جيهان وقالت: انا جايه لك مخصوص بعد ماشكرت فيكى الدكتوره إيثار ومدحت في شغلك.

سميره: أه دكتوره إيثار دى زبونتى وحبيبتي ومازن ابنها زى إبنى بالظبط

جيهان: أنا عارفه وهى عضوه في الجمعيه معانا عشان كده هى رشحتك .

سميره: وانا تحت امرك

جيهان: الأمر لله بصى الجمعية هتحتفل بعد اسبوع بالعام التاسع على إنشائها واحنا كل سنه بنعمل احتفاليه كبيرة بيجى فيها كل الاعضاء مع عائلاتهم وكمان بنستضيف وفد كبير من رجال الأعمال والمستثمرين السياسين والإعلاميين بيشهدوا على الاعمال الخيريه إللى بنقوم بها في الجمعية دى زى كفالة يتيم وتزويج اليتيمات وفك كرب الغرامات وبنعمل بعض المشروعات والاعمال اليدويه اللى بنساعد بها الأسر المحتاجة. وحاجات كتيره من هذا النوع

سميره بإنبهار: ماشاء الله انتوا بتعملوا كل ده

جيهان:؛الحمد لله واحنا بنعمل إللى علينا والتوفيق ده من عند ربنا.المهم في الاحتفالية دى بنقدم وجبات كتيره وبنطلب كميات كبيرة جدا عشان الاطفال إللى بيحضروا الاحتفالية دى وكمان بنطلب انواع تانيه من المعجنات عشان نقدمها للضيوف.

ابتسمت هاله وقالت بسعادة: واحنا تحت امرك وأمر الضيوف

جيهان: عشان كده انا جيت هنا وانا واثقه انكم هتقوموا بالشغل المطلوب ومش هتقصروا برقبتى في الاحتفالية دى

سميره: اكيد طبعا ان شاءالله بس إيه هو المطلوب مننا

خرجت جيهان ورقة كبيرة وقدمتها لهم وقالت : ده هو كل المطلوب

فتحت سميره الورقه وقرات المطلوب وهاله بتقرأ معها بعيونها وبعدها قالت: بس دى طلبيات كبيرة جداً وحاجات كتيره اوي.

خرجت جيهان من شنطتها روزمه كبيرة من الفلوس وقالت: المبلغ ده تحت الحساب والباقي هيكون بعد ما تنتهى الاحتفالية عشان بصراحه لو قصرتوا في شغلكم انا مش هدفع باقي الفلوس أظن ده من حقى صح

سميره: وان شاءالله هنرفع راسك ونشرفك امام ضيوفك.

قامت جيهان وقالت: اتمنى كده فعلا وأكيد انتم مش محتاجين عزومه معانا

هاله بسعادة طفوليه: يعنى هنحضر الحفله معاكم

ضحكت جيهان وقالت: طبعا وتقدروا تجيبوا أولادكم كمان احنا هنعمل الاحتفالية دى فى قاعة الاحتفالات اللى تبع نادى(... ) بالمعادي وهيكون فيه فقرات حلوه والعاب الأطفال يعنى تقدروا تجيبوا أولادكم كمان

ابتسمت سميره بفرح وقالت: ان شاءالله وأوعدك اننا هتبقى عند حسن ظنك فينا

مشيت جيهان فقالت سميره بفرح: شفتى شفتى شفتى انتى عارفه يعني ايه الاحتفالية دى

هاله بفرحه: يعنى فلوس كتيره وبرضوا قطمة وسط

سميره: لأ يا غبيه يعنى لو انبسطوا منا وعجبهم شغلنا يبقى وصلنا بسرعه الصاروخ

واسمنا هيتعرف في الاحتفالات والمناسبات الكبيرة شوفي فيه كام ألف مخبز في البلد لما مخبزنا يتعرف ما بينهم دى حاجة عظيمه بجد

هاله: عشان قلبك ابيض ونيتك صافيه.بس ممكن ن

تبطلى الفرحه الهبله دى وتركزى معايا عشان فيه طلبات عجيبه عايزنها منا

سميره: طلبات إيه دى

هاله: فيه حاجات مفهومه زى الكايزر والفينو وشوية حاجات عجيبه زى استنى كده مش عارفه اقرأها يادى النيله مش عارفه اقرأها هاعملها ازاى اسمها ياختى ( كوكو....امبوش)

سميره: كروكمبوش ياجهله.

هاله: وتبقى إيه دى يا مثقفه:

سميره: دى يا جهله نوع من العجينة بتعملها كرات ولما بتستوى بنحشيها ونغلف اجزاء منها بالكرامل

هاله: لا والله طب أدينا خلصنا من التهمه الأولى شوفى عايزنا نعمل لهم مكرونه

سميره بدهشة: ازاى دى

هاله: هو أنا هاضحك عليكى أهو شوفى

بصت سميره في الورقه وقالت : ماكرون ياأم جهل قبل ما تخرفى دى مش جوز المكرونه

دى حاجة تانيه خالص دى حلو على الطريقه الفرنسيه

هاله::بارك الله فى قناة فتافيت هى مش قفلت

سميره بتريقه: بس سى بى سى سفره لسه فاتحه .قومى قومى لمى الجميع عشان نحدد شغلنا هيمشى إزاى عشان مانتعطلش وكمان مايتلخبطش شغلنا

هاله: ماشى بس لازم كل واحدة تشترى طقم حلو كده وشيك ونشترى مكياج عشان نتظبط قبل مانروح

سميره: ومين قالك انى هاخدك اساسا معايا

هاله بصوت عالى: نااااعم ده أنا قتيلة المشوار ده ده انتى تقعدى في بيتكم وانا اروح

&&&&&&&&&&&&&&&&&&&&

بعد اسبوع وقفت العربية أمام النادي وفتح العمال الباب وبدأوا ينزلوا المنتجات وسميره بتتابع معهم وتعلم على الجزء اللى وصلوه أما هاله فمع العمال في المكان التانى بتتابع رص المنتجات وتسليمها .

عبد الرحمن بدهشة: أم حنين إيه الصدفه الحلوه دي

سميره: عبد الرحمن بيه أهلا وسهلا فعلا من بعد ما جبنا العربية مابقتش تظهر خالص انت بتعمل ايه هنا

عبد الرحمن: إيثار مرات ابنى هنا واتحايلت عليا اخد باللى من الأولاد علشان هتكون مشغوله شويه هما اتفقوا معاكى.

سميره: أيوه الحمدلله.هى عندها حق أنا لو كنت اعرف ان حجم الشغل كبير أوى كده ماكنتش جبت أولادى

عبد الرحمن: ليه دول هينبسطوا أوى النهارده

ولو هتتشغلى فماتقلقيش عليهم انا هبقى اخد بالى منهم

مرت عدت ساعات والكل مشغول بالاحتفاليه وكانت فرحتهم لما حضر المحافظ إللى أشاد بمجهوداتهم في خدمة المجتمع وأشاد بالاحتفاليه الجميله دى وتبرع عدد كبير من رجال الأعمال لهم بمبالغ كبيرة.

إيثار: لا انا رجليا ورمت خلاص مش قادره

فريده: وأنا كمان رجليا انكسرت هو فاضل إيه

إيثار: ولا حاجه الحمدلله الاحتفالية حلوه والكل بيشكر فيها تعالى نقعد مع بابا ونشوف الأولاد اكيد جننوه.

فريده: تعالى.

إيثار: استنى اعرفك بأم حنين دى اللى شالت كل حلويات ومخبوزات الاحتفالية كلها على أكتافها

فريده ،: أهلا يا أم حنين انا مش عارفه اشكرك ازاي على مجهودك الكبير ومنتجاتك المميزة دى

سميره ' : بالعكس ده أنا إللى عايزه اشكركم على انكم جعلتونى جزء من احتفاليتكم بجد انا فرحانه اوي اوي النهارده

إيثار: انتى وراكى حاجه دلوقتي

سميره: لأ العمال بتوعى هيقوموا بالباقي

إيثار: طيب تعالى معانا نقعد مع بابا

سميره: اتفضوا انتوا انا هشوف أولادى

وبعد قليل كانت بتنادى على أولادها الفرحانين بالألعاب

سميره: حنين احمد ملك يالا بقى عشان نروح

أحمد: لا يا ماما مش عايزين نروح

سميره: ماينفعش أنا اتصلت بأدم وقال نص ساعة وهيجى .

ملك: طب سبينا نلعب على مايجى

نادى عليها عبد الرحمن:: سيبيهم ياأم حنين هما بيلعبوا وأنا واخد بالى منهم

سميره: شكرا يا عبد الرحمن بيه بس عشان هنروح

فريده: وتمشى ليه تعالى اقعدى معانا.انت تعرفها يابابا

إيثار: طبعا دى هى اللى حلت لنا أزمة مازن

سميره: بس العمال

إيثار' : سيبى العمال يخلصوا شغلهم وتعالى لو فيه حاجه هيجوا يقولوا لك .

شاورت سميره لهاله وبعدها قعدت معاهم

هاله: عبد الرحمن بيه إيه الغيبه الطويله دى

عبد الرحمن: شويه مشاغل اخبارك ايه يا هاله

هاله: تمام هتخطب الأسبوع الجاى

عبد الرحمن: والله ألف مبروك وهتتخطبى لمين حد معاكم.

هاله: لأ طبعا هو هيبقى كبت في البيت وبره

هو بيشتغل محاسب.

فريده: ألف مبروك لك

هاله: الله يبارك فيكي لازم تيجوا تشرفونا في الخطوبه

عبد الرحمن: اكيد ابقى عرفينى الميعاد وانا هاجى لك

هاله: بجد يا عبد الرحمن بيه انت طيب اوى

فريده ،: بابا ده اطيب واحن راجل في الدنيا.

عبد الرحمن: ربنا يخليكي يا فري يا ملكة قلبى

ابتسمت سميره وهى بتتابعهم

هاله: بجد يا عبد الرحمن بيه احنا نعرفك من زمان أوى بس مانعرفش حاجه عنك ده أنا اتفاجأت ان عندك بنت كمان

نخستها سميره وهمست لها: وانتى مالك

ردت لها هاله النخسه وقالت بنتكلم هو الكلام حرم.

عبد الرحمن: طيب عايزه تعرفى إيه ؟ اقول لك حكايتى كلهها في خمس دقائق.انا ياستى كنت طيار.

هاله بصدمه: طيار طيار إللى بيركب طياره وبيضرب قنابل

ضحك عبد الرحمن وقال: لأ انا كنت طيار مدنى مش حربى المهم كنت حاسس انى مالك العالم والدنيا كلها بشوفها من فوق فوق السحاب.

الكل كان منتبه له وهو بيحكى.

كنت شايف نفسى ملك والملك مايلقش عليه غير ملكه فإتجوزت رندا ملكة جمال مصر السابقة

هاله: قمر واتجوز قمر

ضحك عبد الرحمن وقال: عشت معاها اجمل ست شهور في حياتى بس أنا كان فيا عيب خطير.

سميره باهتمام: إيه هو.

عبد الرحمن: كنت طيار في الأرض زى الجو متخيل إن الدنيا كلها لازم تقف وتوسع لى الطريق .المهم كنت مسافر مع رندا وكنت متحمس بزيادة فماشى على سرعه ١٨٠ في طريق مايسمحش بأكتر من ١٠٠

سميره: وبعدين اوع تقول عملت حادثه.

عبد الرحمن: طارت العربية في الهوا بعد مانقلبت ٣مرات .

هاله بخضه: يالهوى وبعدين حصل لك حاجه

عبد الرحمن بأسف: ماتت رندا وعرفت من الدكاتره انها كانت حامل

بصت سميره بصدمه في حين كمل وقال: فجأة فى لحظه واحده خسرت كل حاجه مراتى وابنى والشغل صحتى وفوق كده احساس بالذنب دنه ملازمنى.وان ذنب رندا في رقبتى.

سميره باهتمام: وعملت إيه؟

عبد الرحمن: عشت الوم نفسى فتره طويله وأتمنى الموت فتره أطول وأطول وأطول .بس فى النهايه بدأت اعيد تنظيم حياتى من أول وجديد وبنيت نفسى من الاول بعد ما خسرت حلمى كطيار وادى النتيجة بقيت من اهم تجار السيارات في مصر وعندى توكيل ماركه شهيره أوى . وربنا رزقني بأم عماد احن واطيب ست في الدنيا ورزقنى منها بعماد وفريده.

فريده: الله يرحمها

عبد الرحمن: الخلاصه ان الدنيا مش بتقف على حد وان مهما حسيتوا ان الدنيا قفلت في وشك وان ملهاش حل اعرف ان ربنا بيحيب اليسر بعد العسر وانه لما بيقفل باب بيفتح غيره عشره بس احنا الاغبيا إللى بنركز بس على الباب المقفول وبننسى نبص على الابواب التانيه

سميره: في دى عندك حق

فقامت فريده وباست رأس ابوها وقالت' ربنا يخليك لينا يا بابا يا رب

إلتفتت سميره فلمحت أدم جاى عليهم فشاورت له ونادت عليه.

قرب أدم وهو بيبص لعبد الرحمن.وقال: مساء الخير

الكل: مساء الخير

سميره: إتأخرت كتير يا أدم

أدم: معلش الطريق بس يالا نروح

قامت سميره هى والأولاد وطول الطريق و أدم:

بيحقق معاهم: مش غريبه أنى اشوف الراجل ده معاكم؟.مين سمح لكم تروحوا تقعدوا معاه؟ انتى لو محترمه كنتى رفضتى تقعدى معاه وحدكم .؟.

ردت سميره بعصبية: انت اتجننت قعدت مع مين لوحدنا ليه مااخدتتش في بالك بنته ومرات ابنه وهاله وركزت فيا انا

أدم: وليه تقعدى معاهم اصلا

سميره: ناس محترمه كانت بتراعى أولادى وأنا في الشغل المفروض اعمل إيه اتخانق معاهم عشان تنبسط وبعدين هى دى مبروك بتاعتك

يا ادم ارجوك مش عشان رفضت الشراكه مابينا تعمل معايا كده انا تعبت أنا محتاجه ارتاح ممكن عشان خاطرى لو فيه ليا غلاوه عندك حتى ولو شويه صغيرين ممكن .

بص لها أدم وقال: انا اسف يا سميره مش عارف مالى.

بصت سميره من الشباك وسكتت شويه وبعدها قالت : مش هتنجح يا أدم

أدم: نعم

سميره: هتفشل ومش هتنجح عايز تعرف مالك اقولك وماتزعلش وإلا إزعل انت اتوقعت ان مشروعى يفشل واقفل المحل بس توقعك جه غلط ومشروعى نجح وكبر وبدات اتعرف ويبقى لى زبون فعجبتك اللعبه قلت أما أجرب بس بقولك وهاقولهالك هتفشل ولو سيبت لك المخبز شهر واحد هيتقفل وهتفلس

أدم: ليه شايفانى فاشل للدرجه دى

سميره: لأ انت مش فاشل انت شبطان عامل زى العيال إللى عاجبها محمد صلاح عاجبها انه تحت الاضواء ومعاه ملايين بس ياترى فيه حد هيتحمل إللى اتحمله محمد صلاح لحد ماوصل اقولها لك لأ مش هيتحملوا ولا هيقدروا يكملوا.

وانت كمان لأنك مهندس اتعلمت تبقى مهندس لالك في العجين ولا لك في وقفة الفرن

أدم: ده رأيك فيا إنى فاشل

سميره: لأ انت مش فاشل بس ربنا هيأ كل واحد لحاجه وانت ربنا هيأك لحاجه تانيه بعيد عن الفرن والخبز انت مهندس

أدم: مابحبش شغلى بكرهوا

سميره: عشان ماتعرفوش والله لو تعرفه هتحبوا انت بتشتغل شهر حلو وشهرين دلع وخمس شهور استهبال عايز ربنا يبارك لك فيه إزاى وانت عمرك ماإديت شغلك حقه اتعب في شغلك عشان ربنا يجازيك ويبارك لك في رزقك

أدم: انتى بتقولى المحاضره دى كلها عشان ماتشاركينى صح

سميره: لأ اقولك حاجه فكر في حاجه تخصك وانا هساعدك واقف جنبك بس فكر بجد

&&&&&&&&&&&&&&&&ــ

دخلت سميره الشقه لقت ميرنا في وشها فإبتسمت وقالت في نفسها (كملت)

ميرنا: اتاخرت أوى يا أدم

أدم: على ماخلصت سميره.

ميرنا: هو كله سميره سميره خلاص مفيش فى حياتنا غير سميره

سميره: انتى بتلبخى فيا قدامى وبعدين فيه غير سميره ميرنا ورحاب وأولادى

ميرنا: لا ياختى بقت سميره وبس واحنا مبقاش لنا لازمه .

سميره: هقولك حاجه يا ميرنا والله العظيم انا مش شايفه قدامى ممكن نأجل النقار والمشاكل لبكره عشان اكون فايقه لك

رحاب: ولا فايقه لها ولا لغيرها ميرنا روحى شقتك وانتى يا سميره لو ماتعشتوش اتعشى وخشى ارتاحى وكل واحدة تقفل عليها بابها خلاص زهقنا من المشاكل والخلافات عايزين نعيش في جو هادي.

سميره في سرها: هى مالها اتحولت ولا ده ملعوب منها ان كان ملعوب يارب اكفينى شرها وان كانت اتحولت يارب دايما.

&&&&&&&&&&&&&&&&&

هاله : بس بصراحه اليوم كان حلو أوى

سميره: فعلا عشان كده انا بشكركم كلكم على شغلكم الحلو ماتعرفوش انا كنت فخوره بكم أد ايه وراسى كانت في السما وانتوا يا رجاله كنتوا رجاله بجد وماحستش بأى مشاكل خالص امبارح عشان كده فيه مكافأه ٥٠٠ جنيه لكل واحد منكم النهارده.

العمال: (تسلمى يا ام حنين)(يدوم الكرم ياأم الكرم)( مفيش حاجه جنب المكافاه)

سميره: يعنى ٥٠٠ جنيه مش عاجب عايزين حاجه تانيه

العامل: الغدا النهارده على حسابك

هاله: انا حبيتك على كلامك الحلو ده هسبب محمود واتجوزك( ضحك الكل)

العامل: لو فيها هاله يبقى انا صايم النهارده

هاله: اخص عليك هو انا وحشه خلاص مش هتجوزك فينك يا محمود تشوف خطيبتك وهى بتتهزق

سميره: حلو خليه يجيي ويشوفك وانتى بتبيعيه في اكله

العامل بمرح : سيبك من هاله وركزى في الغدا

سميره: أمرى لله عايزين إيه

هاله: عايزين

سميره: بمرح لأ هنتفق الأول حد يحدد عايز ايه غير هاله

هاله:: اخص عليكى بعد العشره دى كلها بتهربى منى

سميره: ماانا عارفاكى كويس أوى هتطلبى اكل هاقعد أطبخ فيه اسبوع

( ضحك الكل )

عامل: خلاص احنا نجيب سمك مشوي وانتى تظبطي الرز والسلطات وخلافه.

سميره بضحك: ان كان كده ماشي. نخليها سمك وجمبرى كمان من عندى .انا هتصل احجز وهاروح اجهز الغدا.

طلعت فوق كانت ميرنا دموعها بتسيل وهى بتخرط البصل ولما شافتها سميره فإنفجرت من الضحك عليها

ميرنا: بتضحكى على إيه ولا هتقولى انك مش بتعيطى من البصل

ضحكت سميره وقالت: لا والله انا كبيره أهو بس برضو أوقات اعيط من البصل.وسعى وسعى

ميرنا: أوسع فين وسعى انتى خلينى اشوف هاعمل إيه.

سميره: وانتى بتخرطى البصل قبل ماتعرفى هتطبخى إيه ياخببتك يا ميرنا .

ميرنا: انتى جايه تضايقينى وخلاص

سميره: ابدا والله انا بقولك وسعى عشان الغدا عليا النهارده.

ميرنا: ياسلام اشمعنى

سميره: ولا حاجه العمال عايزنى اعزمهم على الغدا ومادمت هجهز فخلاص يبقى اكلنا واحد

هو فيه في الفريزر جمبري شوفى كده

ميرنا استنى هاشوف فيه بس كيسين

سميره: حلو هاتيه عشان هاعمل شويه شوربه انما ايه عظمه.

ميرنا: انتى اتعلمتى تطبخى فين

سميره: يعنى إيه فين

ميرنا: يعنى اللى عرفته من طنط انك كنتى فقيره ومش لاقيه تاكلى اتعلمتى الحاجات دى فين وإزاى

سميره بحنين لذكريات حلوه: فعلا انا كنت فقيره بس كنت مرتاحه.

ميرنا: اكتر من هنا

سميره: أكتر مليون مره يا ميرنا الراحه مش بالأكل ولا بالشرب ولا بالفلوس دول كلهم مالهمش أى قيمه مادام قلبك مش مرتاح انا كنت عايشه ملكه عارفه يعنى إيه ملكه حتى لو كان في بيت قديم سقفه من خشب

ميرنا بغضب: يعنى شايفه انك مش مرتاحه هنا وحابه بيتك القديم.بالرغم. من كل اللى عملوه عشانك انتى وأولادك.

سميره: انتى عايزة إيه بالظبط

ميرنا: ولا حاجه

سميره: يبقى اخرجى وسيبينى اخلص شغلى.

خرجت ميرنا ورجعت بعد شويه وقالت بصوت قوى: قولى لى بصراحه إنتى بتجبى أدم

ضحكت سميره وقالت: بسم الله الرحمن الرحيم مالك هبيتى كده ليه

ميرنا: ردى عليا انتى بتحبى أدم

سميره: بتسألى ليه أصل كلامك ملكه ومش ملكه يخلينى اسألك وياربت تجاوبى بصراحه انتى بتحسى بإيه ناحيه أدم

قعدت سميره على الكرسي وقالت:و تصدقينى وتفهمينى

ميرنا: هفهمك بس قولى

سميره: كنت وأدم اصحاب اشكيله ويشكى لى كنت اعرف كل فضايحه وبلاويه

ميرنا: ده لما كنتى مرات خاله انا بسألك لما اتجوزتيه كنتى بتحسى ناحيته بإيه

سميره : أول ما اتجوزت أدم كنت تايهه كنت بحسب ان جوازى من أدم صورى مجرد حبر على ورق بس أول ما.... يعنى انتى فاهمه

ميرنا: حسيتى بإيه

سميره: بقرف...حسيت انى مقروفه من كل شيء وأولهم نفسى.إزاى اسمح لعيل يقرب منى يلمسنى والقرف الأكبر انى كنت محتاجه احس بالحنان احسن بالعطف احس انى ست ومرغوبه وفيه حد محتاجنى

مسحت سميره دموع نزلت من عيونها وقالت : بس الوضع اتغير مع العشره والأيام أدم طيب وابن حلال هو بس لو يهتم بشغله شويه ويبطل يمشى ورا كلام أمه شويتين هيبقى حلو أوى.زيك انتى كمان انتى طيبه وهبله بس لو تبطلى حركات العيال دى هتبقى كويسه ونعرف نعيش في راحه سوا .

ميرنا : وانتى متخيله انى ممكن اعيش معاكى فى سلام اعيش مع ضرتى اللى خطفت منى جوزى

سميره: مين اللي خطفت يا هبله ده انتى جايه عليا يعنى انتى اللى خطفاه

ميرنا: بس بيحبنى انا وانتى اللى جيتى ولعبتى عليه بعد ما مات جوزك

سميره: أهو هو ده الكلام اللى ملت به رحاب دماغك . بقى انا ابقى لسه أرمله واروح ارسم على حتة عيل. ماكانش فالح في حاجه غير معاكسة البنات

ميرنا: ورضيتى به ليه مادمتى مش شايفاه راجل

سميره:: ماكنتش في وعيى ولا دريانه بحاجة وبعدين انا قلت لك ان رأيى في أدم اتغير مع العشره والأيام.وبعدين مادمتى مش فهمانى ولا فهمه انا اقصد إيه يبقى اتكلى على الله واقعدى بره على مااخلص الأكل

&&&&&&&&&&ــ

في المساء دخل أدم الشقه وهو بيجرى بغضب ومش شايف حد ونده سميره يا سميره

كانت سميره بتذاكر مع أولادها فقالت : نعم يا....

مسكها من هدومها بغضب وقال : تعالى معايا

ودخل الأوضه وقفل الباب وقال بغضب: بقى انا مش راجل بقى أنا مش مالى عنيكى

سميره: إيه الكلام الفارغ ده

أدم: ردى عليا انا مش راجل شيفانى مش راجل

سميره: طبعا لأ مين اللي قال الكلام ده

أدم: انتى

وشغل الموبايل على التسجيلات....

الفصل السابع عشر من هنا

هنا

مسكها من هدومها بغضب وقال : تعالى معايا

ودخل الأوضه وقفل الباب وقال بغضب: بقى انا مش راجل بقى أنا مش مالى عنيكى

سميره: إيه الكلام الفارغ ده

أدم: ردى عليا انا مش راجل شيفانى مش راجل

سميره: طبعا لأ مين اللي قال الكلام ده

أدم: انتى

وشغل الموبايل على التسجيلات....

سمعت صوتها وهي بتقول

((بقى انا ابقى لسه أرمله واروح ارسم على حتة عيل. ماكانش فالح في حاجه غير معاكسة البنات انى مقروفه من كل شيء وأولهم نفسى.إزاى اسمح لعيل يقرب منى يلمسنى))

أدم: هو ده رايك فيا مش ده صوتك ولا بتبلى عليكى

سميره بلخبطه: مش كده إيه ده انا مقولتش كده انا ماكنتش اقصد

أدم بغضب: ده صوتك ولا مش صوتك

سميره: صوتى بس انا ماقصدش الكلام ده وبعدين احنا كنا بنتكلم كلام عادى بس...

أدم بغضب وألم: بس إيه ضحكوا عليكى وخلوكى قلتى كلام غلط ولا ماكنتيش في وعيك زى ماقلتى

قربت منه سميره وقالت : لا والله يا أدم انا قلت كلام كتير بس

أدم: بس إيه يا سميره ده رايك فيا مجرد عيل مش مالى عينك صح لأ وبتحسى بالقرف منى ومن قربى مش ده كلامك

سميره: انا قلت الكلام ده كنت بقصد

أدم: بتقصدى إيه.. ...انطقى ... يالا فهمينى بتقصدى إيه

سميره: طيب ممكن تهدأ وأنا هفهمك

أدم: مش محتاج اهدأ ان كنتى بتتقرفى فأنا كمان بتقرف منك انتى بتحسبى نفسك إيه شايفه نفسك على إيه احمد ربنا انى ببص لك وبتحملك

سميره: أدم إنت بتقول ايه

أدم: بلا أدم بلا قرف وان كنتى شيفانى عيل فلأ يا سميره انا راجل وراجل أوى وأقدر أثبت لك وشدها من ملابسها بقوه ورماها على السرير

سميره: ادم انت هتعمل ايه

أدم: حقى وأنا حر

-&&&&&&&&&ـــ&&&&&&

كانت ميرنا قاعده على كرسي الأنتريه وعيونها بتتابع غرفة النوم المقفوله وكلها سعادة بسبب صوت أدم القوى والغاضب وبعد فتره سكت الصوت فبصت لرحاب وقالت: هما بطلوا خناق ليه مش كان أدم بيزعق ليه سكت ولا هيضربها دلوقتي.

بصت لها رحاب بعدم اهتمام وقالت لها: طول عمرك غبيه وكل مدى بتأكدى لى غباءك

ميرنا: انا يا طنط

رحاب:أيوه انتى يا روح طنط بتظنى بغباءك انك لما تسجلى لسميره كلامها ده وتسمعيه لأدم أنه هيتعصب ويضربها ويمكن يطردها صح .

ميرنا:-----

رحاب: عشان غبيه جايه لواحد حاسس بالنقص قدام مراته وانتى بغباءك بتأكدى إحساسه بتسجيلك ده فتتوقعى منه إيه يعنى غير انه يثبت لها انه راجل مش عيل وطبعا ماعندوش طريقه يثبت بها رجولته إلا....

ميرنا: تقصدى إنه..؟

رحاب: اكيد طبعا ماهو مفيش أى حاجه تحسسه بالسيطرة إلا كده

ميرنا ودموعها بتسيل: انتى مش فارق معاكى

رحاب بعدم اهتمام: مابقاش حاجه تفرق معايا

حتى انتى وأدم

ميرنا: يسلام من إمتى كلامك ده

رحاب: من دلوقتي

بعد فتره خرج أدم من الغرفه وهو غاضب بس المره دي من نفسه ومن غير ما ببص على حد

فتح باب البيت وخرج

-&&&&&&&ـــ&&&&&&&

في اليوم التالي في المخبز رفعت هاله سماعه التليفون الارضي وردت : أيوه مين؟ سميره..... بتقولى مش هتنزلى النهارده.... أيوه يا عم الله يسهل لكم اكيد السهره كانت صباحى .....طب بتشتمى ليه بس دلوقتي... ألوه ..ألوه قفلت السكه...

ماشى يا سميره إما وريتك مابقاش أنا.

بعد شويه دخلت الدكتورة إيثار وقابلتها هاله: أهلا اهلا يا دكتوره منوره

إيثار: أهلا بك يا هاله هى فين أم حنين

هاله: مكسله تنزل النهارده اظاهر كانت سهرتها صباحى

إيثار: أفندم

هاله في سرها: هى الناس مالها بطلت تهزر كده ليه ؟ وبعدها قالت ولا حاجه .على العموم انا هنا تحت أمرك

إيثار: الأمر لله بس فعلا انا محتاجه ام حنين

هاله:هل فيه حاجه تخص الطلبيه بتاعت كل اسبوع

إيثار: لأ حاجه تانيه بس لازم تكون موجودة عشان الاتفاقية كبيرة ولازم اتفق معاها

هاله : طيب ثانيه واحده على ما يجيب لك عبدالله الشاى تكون نزلت عن إذنك

في نفس الوقت كانت سميره في غرفه النوم أمام المرايه بتبص لنفسها بتشتت بعد ماخلاص كانت اتصالحت مع نفسها ورضيت بحياتها رجعت تانى لنقطه الصفر رجعت لاحساسها القديم بالقرف من كل شىء ورغبه شديدة للتقيؤ فجريت على الحمام وكأن الدنيا مصره على جرحها

رن الجرس فمشيت بتثاقل وفتحت الباب لقت هاله في وشها فقفلته . في وشها

رنت هاله مره تانيه وهى بتخبط

ففتحت سميره وقالت: هو أنا مش قلت مش هانزل بتتطلعى ليه ولا انتى مابتفهميش

هاله: حيلك حيلك وزيره الزراعه على غفله اجرى أجرى

سميره: يا هاله انا مش فايقه لك وقلت مش نازله عشان بجد لا عايزه اشوف حد ولا عايزه اكلم حد

هاله: ياستى ولا انا عايزه أكلمك بس انا جايه عشان الشغل يا سميره

سميره: يولع الشغل

هاله: أيوه هو ده أول الخراب انك تتبطرى على رزق ربنا.

سميره: انا مش بتبطر انا تعبانه

هاله: مالك يا سميره انتى بجد مش كويسه

سميره: تعبانه وقرفانه ومش طايقه نفسى

هاله: طب هقولك حاجه تعالى تحت الدكتوره إيثار مستنياكى وعايزاكى في حاجه مهمه شوفى هى عايزه إيه وبعدها نخرج انا وانتى وفكى نفسك

نزلت سميره وحاولت تبتسم وهى بتستقبل إيثار: أهلا وسهلا بك يا دكتوره

إيثار: أهلا بك يا أم حنين معلش شكلك تعبانه بس الموضوع ماكانش ينفع من غير ماتكونى موجوده

سميره: لا ولا يهمك قولى أنا تحت امرك

إيثار: الأمر لله المهم بعد اللى شفته منك في احتفالية الجمعية جيت لك وأنا مطمنه انك مش هاتخزلينى وهاتقومى بالمطلوب على أحسن طريقه

سميره: شكرا يا دكتوره بس إيه المطلوب

إيثار: عيد ميلاد مازن بعد عشرة أيام

سميره بابتسامة: العمر كله يا رب كل سنه وهو طيب.

إيثار: وانتى طيبه المهم أنا عايزاكى تتولى حفلة العيد ميلاد كلها من الألف للياء يعنى التورته والجاتوه وكل مايخص عيد الميلاد وخاصه هيكون فيه أطفال وضيوف كتيره

سميره: يا دكتوره احنا مخبز مش حلوانى والحاجات دي مش اختصاصنا

الدكتوره إيثار: لأ ده صميم اختصاصكم انتى عارفه ان مازن بسبب حساسية الجلوتين ماينفعش نعمل له أى حاجة من دى إلا إذا اتفقنا مع حلوانى مخصوص

سميره: طيب ملتتفقى معاه زى ما بتتفقى معانا

إيثار: بصراحه الكل بيرفض أصل مش هيقعد يجرب ويوقف شغله عشان طلب مخصوص وفيه احتماليه الخطأ

سميره: صح

إيثار: عشان كده انا جيت لك احنا بقالنا فتره طويله مع بعض وبقى عندك خبره كبيره في مجال البدائل دى

هاله: ماشى بس احنا بنفهم كويس في المخبوزات مش شغل الحلوانيه

إيثار: الموضوع مش تورته وجاتوه بس لأ انا عايزه تحضيرات كامله برضوا هيبقى فيه بيتزا وكريب وهامبورجر وحاجات كتيره واناعايزه كل المصنوعات دى من بدائل الدقيق يعنى كل حاجه بدقيق خالى من الجلوتين..

سميره: بس ده شغل ٠كتير أوى

ايثار: وانتى قدها وقدود

سميره: احنا نقدر نعمل كل حاجه ماعدا التورته والجاتوه

إيثار: ليه بس

سميره: عشان الموضوع مش بس كيك ولا عجين التورته دى يعنى حشوات وعجينه سكر وكريمه وألوان وحاجات كتيره واحنا ماعندناش إمكانيات لكل ده

ضحكت إيثار وقالت: انتى مش سامعه نفسك انتى عرفتى كل ده منين مش اكيد عملتى تورته قبل كده

سميره: طبعا بس دى ل..

هاله: خلاص يا سميره خلاص يا دكتوره احنا موافقين

سميره: هاله

هاله: إيه مالك النهارده ملكة العالم في التردد ليه احنا على طول بنغامر وبنشتغل وربنا بيراضينا فخلاص نشتغل برضوا

سميره: يا هاله انتى مش فاهمه يعنى إيه طفل يلاقى في عيد ميلاده تورته وحشه حاجه مش هينساها أبدا

سميره: ومين قالك انها هتكون وحشه

إيثار: واضح انك مش مركزه معانا النهارده يا ام حنين وماتنسيش أن كل حاجه هتكون ببدائل الجلوتين يعنى ملعبك وبعدين ده انتى كل اسبوع بتفننى له في صندوق المفاجأت مش هتغلبى إنك تجعلى كل تفنيناتك دى فى عيد الميلاد قلتى إيه

سميره: خلاص على بركة الله

إيثار بابتسامة: يبقى اتفقنا.

بعد ما خرجت إيثار

هاله: مش هتقولى مالك

هزت سميره راسها بلأ

هاله' بس انتى مش طبيعيه

سميره: ده العادى بتاعى انا من امتى جيت البيت ده وكنت طبيعيه .

بقولك ايه احنا عايزين نعرف اسم حلوانى يكون شاطر

هاله: ليه ان شاءالله

سميره: إدى العيش لخبازه هنستلف منهم عامل يساعدنا في التزيين والتشكيل

هاله: بس هيطلب مبلغ كبير أوى

سميره: مش مهم المهم يكون شغلنا جامد انتى عارفه انا بفكر نعمل ايه

هاله: إيه

سميره: مسابقه لتزيين الكب كيك

هاله: إزاى يعنى

سميره: يعنى هنعمل كمية كبيرة من الكب كيك وناخدهم كده من غير أى زينه وناخد معانا كميه كبيره من كريمات التزيين باشكال وألوان وأطعمه مختلفه وكميه كبيره من الفرمسيان وكل طفل ياخد الكب كيك بتاعته ويختار الكريمه اللى تعجبه ويحط الزينه اللى تعجبه.

هاله: الله عليكى يا سميره عيونك بتلمع لما بتتكلمى عن الشغل .

سميره: الظاهر عمرها ما هتلمع إلا في الشغل بس المهم سيبك منى واحكى لى عامله ايه مع خطيبك

هاله: هو أنا المفروض اتقمص منك عشان قفلتى الباب في وشى بس اعمل ايه بحبك ومقدرش استغنى عنك

ابتسمت سميره وقالت: حقك عليا وبعدين يعنى هى اول مره ده انتى جلدك نحس من كتر ما هزقتك

هاله: كده طب مش هاحكى لك حاجه

سميره: كده يا هاله ده انتى حبيبتي

هاله: اعمل ايه قلبى الصغير لا يتحمل اقولك شوفى يا ستى امبارح جالى و.......

&&&&&&&&&&&&&&&&

٢

في المساء دخل أدم البيت وأول مادخل قامت سميره ودخلت الاوضه وقفلت الباب بالمفتاح وهى دى عادتها من بعد الموقف الأخير اصلها خلاص قرفت من لعب العيال ده

في المحل كانت بتمارس هوايتها المفضله وهى تزيين المخبوزات لما دخل عبد الرحمن المخبز: مساء الخير

إلتفتت سميره وقالت بابتسامة: عبد الرحمن بيه نورت المحل إيه الغيبه الطويله أوى دى

عبد الرحمن: ماهو خلاص حسيت ان زياراتى ملهاش اى قيمه بعد ما بقى عندك عربيه بتوصل المخبوزات وعملتى محفظه على الموبايل ويعنى مالوش داعى

سميره: لأ إزاى يا عبد الرحمن بيه انت تشرف وتنور في أى وقت

عبد الرحمن: انا جيت النهارده مخصوص عشان بصراحه مازن مابطلش الكلام على عيد ميلاده وانه كان مبسوط اوى وبصراحه الكل كمان كان بيشكر في شغلك أوى

سميره: الحمدلله فعلا الكل بيشكر في الحفله دى لأن مدرسه مازن بعتت لى جواب شكر بسبب اعجاب التلاميذ بالحفله وأنهم بيتكلموا عنها.

عبد الرحمن: المدرسه بعتت لك جواب شكر

سميره: أيوه لأن زمايل

عبد الرحمن: سمعت بس انتى عملتى إيه لما المدرسه بعتت جواب شكر

سميره: ولا حاجه هاعمل إيه

عبد الرحمن: تسمحى لى اقولك ان ردك ده أغبى رد سمعته يا أم حنين مادام زمايل مازن حبوا شغلك العقل بيقول ايه تروحى زى الشاطره على مدرسه مازن وتطلبى من المديره انك تقدمى للاطفال عرض عن حساسيه جلوتين وعن طريقتك في استخدام البدائل

سميره: انت عايزنى استغل مرض حفيدك

عبد الرحمن: طبعا لأ بس دى فرصه والعقل بيقول تستغليها وبعدين مدرسه مازن مدرسه انترناشيونال والاولاد من الطبقه الراقيه جدا يعنى ممكن تفتحى لنفسك مجالات جديدة لشغلك.

خرج عبد الرحمن وكانت بتفكر بتركيز شديد ( فعلا عنده حق دى فرصه وممكن يفتح لنا مجالات مع أولاد الطبقه الراقيه وممكن تكون سكه لشغل جديد)

مانتبهتش لدخول أدم إللى قعد مقابل لها

أدم: وبعدين يا سميره هندننا كده لحد امتى

بصت له سميره وسكتت

أدم: انا ماغلطش ولا عملت حاجه حرام عشان تزعلى أوى كده

رفعت حاجبها بدهشه

أدم: فعلا ماعملتش حاجه غلط ولو على الغلط فده منك انتى

سميره: لأ ده مش منى ده من عقلك إللى مش عايز يستوعب حاجه

أدم: بقى اسمعك بتقولى...

قاطعته سميره وقالت: تسجيل عارف يعنى إيه تسجيل للدرجه دى واقفين نطعن بعض من الضهر نقف نسجل لبعض

أدم ،: بس انتى قلتى

سميره: قلت كلام كتير بس ماسمعتش منه إلا اللى هما عايزينك تعرفه يعنى بيغدروا بك وهما عارفين ومتأكدين انك متسرع مابتستخدمش عقلك وأدى النتيجة

أدم: مين هما اللى بتقولى عنه

سميره: دى اكيد افكار الست الوالده بإشراف من جدتك وتنفيذ حبيبة قلبهم ميرنا وكل هدفهم اننا نفترق وينكدوا عليا عيشتى وحياتى واهو برافوا عليهم حققوا هدفهم

أدم:ياسميره انا معملتش

قاطعته سميره: معملتش حاجه غلط ولا حرام بس عملت حاجه مهينه انا حسيت بالاهانه . أدم: ده رأيك فيا

سميره: ده رأيي في تصرفاتك يا أدم انا تعبت بجد تعبت عايشه حياه مارتحتش فيها كلها تعب وشك و مشاكل يا أدم انا بجد

( وبعدها ماقدرتش تتحمل فجريت على الحمام تفرغ مافي معدتها)

في حين قام أدم وخرج من المخبز وهو غاضب.

&&&&&&&&&&&&&&&&&

دخلت المخبز الصبح ولقت سميره بتفطر فقالت : بنت حلال والله انا لسه مافطرتش

ياقرفك إيه العك اللى بتعمليه ده

سميره: عك ياحماره ده سندوتش اختراع المفروض يعمموه على الأولاد في المدارس ده أنا اكلت اربعه منه ولسه جعانه

هاله: أربعه جتك القرف بقى حاطه في الفينو بطاطا مشويه وعليها كاتشب وتقولى اختراع ده انا قرفت من شكله بس

سميره: بس يا هبله دى ريحة البطاطا تهبل عم فرحات كان بيشويها وانا ريحتها هبلتنى رحت جيبت كميه كبيره

هاله: اعترفى العك ده وراه حادث سعيد صح

سميره: لأ غلط يابنتى انتى مش فاكره الدكتورة قالت اللى بيحصل عندى حاله نفسيه

هاله: مش كنتى بطلتى وبقيتى كويسه

سميره: الظاهر مش مكتوب لى الراحه المهم

اعجنى خمسه كيلو دقيق عشان عبد الرحمن بيه طلب فطير زى اللى احنا عملناه زمان فكراه

هاله: ايوه كانت فتحت الخير لنا

هاله: ايوه وقال هيجى ياخدهم هو عشان عازم صديق له جاى من بره ونفسه في الفطير المشلتت.

هاله: طيب هتيجى نفرده سوا

سميره: ماشى بقولك ماتزودى كمان اتنين كيلو

هاله: ليه ان شاءالله

سميره: بفكر اعمل اتنين حلوين وابعتهم لحماتك

هاله: بجد

سميره: على الله يطمر يالا اجرى عشان ورانا شغل كتير

وبعد عدت ساعات دخل عبد الرحمن وقال: والله شامم ريحة الفطير من على مسافه

هاله: اهلا يا عبد الرحمن بيه ده احنا شغالين فيهم من بدرى .

سميره لمحمد: طلعهم من الفرن وسيبهم يتهوا شويه قبل ما تلفوهم في ورق فويل عشان يفضلوا سخنين. وخلى عبد الله يعمل كوبايه شاى لعبد الرحمن بيه .ولا تحب يعمل لك حاجه تانيه

عبد الرحمن: لأ الشاى كويس .المهم خليهم يلفوهم حلو عشان صاحبى ده هيموت على الفطير

سميره: ياسيدى بالهنا والشفا المهم سيبك من صاحبك وركز معايا شويه

عبد الرحمن: واضح ان الموضوع مهم أوى صح

سميره: طبعا مش عايز تعرف نتيجه نصيحتك ليا

عبد الرحمن: نصيحه إيه مش واخد بالى

سميره: نصيحتك انى اروح مدرسة مازن

عبد الرحمن: هو انتى رحتى

سميره: ده أنا رحت ومديره المدرسه خلتنى عملت زى فقره كده في مسرح المدرسة

عبد الرحمن: كويس

سميره: تحب تشوف النتيجة

عبد الرحمن: اكيد

خرجت سميره كشف وقدمته له وقالت: ده كشف باسماء حوالى اكتر من ١٥٠ طالب في المدرسه وكلهم طالبين اعمل لهم كام نوع بسكويت عادى وويفر لهم

عبد الرحمن: هايل عظيم

سميره: طيب وشوف ده طفل عنده انيميا الفول

عبد الرحمن: يعنى إيه انيميا الفول يعنى عنده نقص في الفول وكل أكله فول في فول

ضحكت سميره وقالت: لأ العكس ده ممنوع من الفول ومش الفول بس ده ممنوع من أى حاجة خلقها ربنا بتنقسم نصين زى الفول والعدس والفاصوليا واللوبيا وكل المكسرات سوداني لب ترمس حمص فزدق جوز كاجوا واكيد السمسم .

عبد الرحمن: ياااه طب ولو اكل منها يحصل له إيه

سميره: بيتكسر كرات الدم البيضاء في الجسم وبيحتاج يتعلق له محاليل وممكن يدخل العنايه المركزه.

عبد الرحمن: ياخبر أبيض

سميره: ودى حاله حساسية شوكولاته ودى حساسية ألبان بس

عبد الرحمن: وانتى هتعملى طبعا لكل حاله نوع البسكويت اللى يناسبها صح

سميره: لأ طبعا لأن بالطريقه دى فى احتمال كبير جدا ان يحصل اخطاء وخاصه ان المخبوزات لما بتستوى بتبقى نفس الشكل واللون والريحه ابقى اعرف إزاى ان دى خاصه بأنيميا الفول وان دى خاصه بحساسية اللبن

عبد الرحمن: صح ودى مشكله وانتى هتعملى أيه

سميره: ولا حاجه هنعمل نوعين أو ثلاته من المخبوزات والبسكويت اتنين حلوين وواحد مالح وهاخليهم يناسبوا كل الحالات وبكده حتى ولو اتلخبطت مفيش حد هاينضر لأن البسكويت يلائم الكل

ابتسم عبد الرحمن بإعجاب وقال: هاقولك حاجه انتى بقالك فتره وتفكيرك بيعجبنى إلا المره دي ولأول مرة هاقولها ابهرتينى

ابتسمت له سميره وجواها احساس جديد بالفخر والثقه في نفسها.

فنجان قهوه

حياة محمد الجدوى

الجزء الأخير

كانت في المطبخ بتمارس شغلها بطريقة آليه بعد ما اعتزلت كل البيت واتجنبت تتكلم مع حد دخلت عليها ميرنا وقالت: إزيك يا سميره

بصت لها سميره وماردتش

ميرنا: أنا عارفة انك زعلانه منى صح

ابتسمت سميره بسخرية وماردتش

ميرنا: أنا عايزة اتكلم معاكى بصراحه

سميره بسخرية: والله طب وياترى بتسجلى ولا لسه ياترى حاطه الموبايل في جيبك ولا مخبياه في الحله

ميرنا: لا هنا ولا هنا انا مش بسجل لأنى انا اللى هتكلم

سميره: طب استنى انا اللى هسجلك واختار الكلام على مزاجى عشان أوقع مابينك وبين جوزك.

ميرنا: غصب عني

سميره: كان حد ضربك ولا ماسك لك عصايه

ميرنا: لأ بس أنا غرت انا ست وبحب جوزى وبغير عليه ومش متحمله وجود ضره في حياتي.

سميره: تبقى دى مشكلتك انتى دخلتى البيت ده وانتى ضره يعنى انتى اللى جيتى اخدتى جوزى منى مش العكس.وبعدين زعلانه ليه ماانا سيباه كله حلال عليكى عايزه ايه تانى

ميرنا: أدم مش مرتاح

سميره: مش مشكلتى دى مشكلته هو

وسأبتها ومشيت

&&&&&&&&&&&&&&&&&٥

في المخبز

هاله::انا خلاص تعبت مش مستحمله

سميره: احنا ورانا إلتزامات كتير يعنى طلبات المخبز العاديه وطلبات مازن و البسكويت اليومى لطلاب المدرسه .

هاله: بالرغم من انى بروح مقتوله ومش بقدر اتحرك بس بصراحه ببقى فرحانه اوي

ضحكت سميره وقالت: أنا بقى كرهت الفانيليا وريحة الفانيليا والزبدة والسكر والحليب

هاله: ومين سمعك ده محمود جاب لى برفيوم غالى اوى بريحة الفانيليا شميتوا وقلت له إيه القرف ده

ضحكت سميره وقالت:: حرام عليكى دايما محبطه الراجل انا حاسه إنه هيطلع عنيكى الاتنين بعد الجواز

هاله: على مين هو انا هاسكت ده أنا هاوريه

حست سميره بالدنيا بتدور بها فسندت على المكتب

هاله: مالك يا سميره بقالك فتره مش كويسه

سميره: مش عارفه يمكن عشان برهق نفسى فى الشغل ومش بنام كويس

هاله: طب إرتاحى ولو زاد التعب روحي اكشفى

سميره: أنا كويسه بس محتاجه ارتاح شويه

هاله: اطلعى ارتاحى وزى ما قلت لك لو لسه تعبانه روحي إكشفى

سميره: ان شاءالله

طلعت سميره فوق عشان ترتاح شويه

لقت رحاب في الصاله سابتها وراحت ناحية اوضتها لكن رحاب وقفتها وهى بتقول:داخله خارجه كأنه بيت ابوكى حتى مفيش أى احترام لصاحبة البيت

سميره ببرود: مش بيت ابويا بس اكيد بيتى

رحاب: بيتك بأمارة إيه؟

سميره: بيت جوزى يبقى بيتى

رحاب: جوزك إللى مقاطعاه ومش بتكلميه من غير داعى كان عملك ايه عشان تقاطعيه كده

سميره: شيء مايخصكيش دى حاجة خاصه بيا وبيه .

رحاب: كل حاجه في البيت ده يخصنى وبعدين انتى بتكلمى بثقه كده على إيه وشايفه نفسك على إيه المفروض واحده زيك تحمد ربها وتبوس إيدها ليل ونهار إن فيه واحد زى أدم بيبصلك

بصت لها سميره وقالت: خلصتى وصلت كل يوم عن اذنك عشان أنا تعبانه وعايزه أرتاح

ردت رحاب: اكتر حاجه مستغرباها منك الحب إللى كنتى بتحبيه لأخويا كل ما افتكر شكلك لما مات واشوفك دلوقتي استغرب بقى دى اللى كانت هتموت على اخويا اتارى كل حاجه تمثيل في تمثيل الحب تمثيل والحزن كمان تمثيل

سميره: تمثيل ده رأيك فيا

رحاب: اكيد تمثيل مجرد ماخلصتى عدتك جريتى رميتى نفسك في حضن عيل أصغر منك

سميره: إنتى مصدقه نفسك مصدقه كلامك ده انتى بتكدبى الكدبه وبتصدقيها

رحاب: كدبه فين الكدبه دى اتحداكى ان كان في كلامى أى كدب

سميره بذهول: انتى بتخرفى والله العظيم بتخرفى وبتحرفى الكلام على مزاجك بقى انا بمثل طيب وانتى فين في الفيلم ده

رحاب: هو ده مبررك انك تدخلينى في حياتك عشان تبررى لنفسك بس الحقيقة انك جريتى ورا أدم لحد ما اتجوزتيه

ردت عليها سميره بغضب: انا جريت وراء أدم ليه نسيتى نفسك عملتى إيه

رحاب: أنا معملتش حاجه

سميره: فعلا لما تيجى انتى وابنك ليا وتهددينى بحرمانى من عيالى يبقى ماعملتيش حاجه لماتصرى انك تبيعى البيت اللى ساترنا

رحاب: بعته عشان تسدى ديونك

سميره بصوت عالى: وعشان أسدد ديونى أترمى في الشارع مع عيالى وانتى عارفه كويس إنى لابيت ولا أهل ولا ليا حد

كنتى عايزانى اعمل ايه أنا كنت مش لاقيه أأكل ولادى وانا متداريه ورا حيطه وانتى جيتى بعتى الحيطه.وقفلتى كل حاجه في وشى منتظره أعمل إيه غير انى اتعلق في اى قشايه وأتمسك بها

رحاب: والقشايه دى تبقى إبنى

سميره: تبقى أى حد وبعدين انتى ليه مصورانى انى كنت بجرى ورا ابنك ليل ونهار مع ان انتى وابنك إللى حاصرتونى واستغليتوا انى مش في وعيي عشان اقبل به

رحاب: مش في وعيك سقيناكى حاجه اصفرا

سميره: انتى عايزة توصلى لإيه بالظبط

رحاب: مش محتاجه أوصل لحاجه وكل حاجه واضحة زى الشمس مفيش اخلاص مفيش وفاء وفاءك الوحيد لأخويا انك بطلتى تشربى قهوه وتبقى كده رضيتى ضميرك انك كده وفيه لعلى صح .مع انك محيتيه من حياتك من زمان

سميره: انا مستغرباكى بجد مستغربه انتى زعلانه ومموته نفسك من الزعل عشان نهيت سيره على من حياتى انتى زعلانه إنى براعى شعور إبنك وبحترمه فمش بجيب سيره جوزى الأول قدامه حتى ولو كان خاله .انتى زعلانه إنى بخاف على ابنك ومش عايزة اجرحه انتى اكيد مجنونه

رحاب:انا مجنونه عشان كشفت حقيقتك انك انسانه خاينه هانت عليها العشره

سميره: انتى زعلانه على حالى ولا على حالك

رحاب: حالى أنا

سميره: اكيد حالك انتى وان كنتى مش شايفه حواليكى فده عشان مركزه معايا انا بس بالرغم انك لو ركزتى شويه هتشوفى انك بتخربى بيتك بإيدك بس انتى بدل ما تفكرى في حياتك كل تركيزك مع أدم وبس

رحاب : ماله أدم شاب زى الفل بتحسدنى الناس عليه بس عيبه الوحيد انه متجوزك بس زى ما جوزتك له اطلقك منه وأجوزه ست ستك

سميره: بطلى بقى انتى مش هتفوقى لنفسك إلا لما تخربى الدنيا كلها من حواليكى قعدتى تدلعى في ابنك لحد ماخربتيه خلتيه مايحسش بقيمه اى حاجه واهو لاهو نافع في شغل ولا عارف يعيش وبدل ماتوجهيه يصلح حاله جوزتيه بالتانيه ودلوقتي بتفكرى في التالته انتى إيه يا شيخه حرام عليكى سيبينا في حالنا وابعدى عنا

رحاب: ابعد عن مين ده بعينك عمرى ماهنولها لك ده ابنى انا وانا اللى عارفه مصلحته

سميره: وإيه هى مصلحته انه يعيش عاله على اهله وفيه اتنين متعلقين في رقبته انا مش عارفه ميرنا الغبيه رضيت به على إيه

رحاب: أيوه كده بانى على حقيقتك انتى بترسمى تخلصى منها عشان يفضى لك الجو صح بس بحبة عينك مش هنولها لك أنا وراكى يا سميره

سميره: انتى اتجننتى والله العظيم انتى اتجننتى انا بقولك ايه وانتى بتفكرى في إيه انا بقولك سيبى ابنك يشيل المسؤلية سيبيه يبقى راجل يحس بقيمة البيت وانتى كل تفكيرك فيا انا خرجينى بقى من حياتك طلعينى من دماغك شويه ياشيخه بصى لنفسك وسيببنى اربى عيالى.

في نفس الوقت كان أدم طالع السلم فسمع صوت الخناق مابين سميره ورحاب فجرى بسرعه وأول ماشافته رحاب نادته وقالت: تعال يا ادم تعال شوف أمك المجنونه أمك إللى بتتشتم وبتتهان في بيتها بيتها إيه ده بقى بيت الست سميره واحنا مبقاش لنا مكان فيه

أدم: إيه الكلام الفارغ ده.ده بيتك غصب عن الكل واللى مش عاجبه الباب يفوت جمل

رحاب: ده كلام الست الهانم إللى مش عاجبها وجودى في حياتك

سميره بغضب: لأ مش عاجبنى ابعدى عننا سيبينا نعيش

أدم بغضب: انتى بتقولى الكلام ده لأمى قدامى

رحاب: اتفرج اهى بتطردنى من بيتى قدام عنيك.

سحب أدم سميره من هدومها وقال: مش أمى إللى تتهان وأنا عايش والبيت ده ملكيش مكان فيه اطلعى بره البيت ده ارجعى للشارع إللى لميتك إنتى وعيالك منه اخرجى

سميره وهى بتقاومه: مش هاخرج ده بيتى وأنت لازم تسمعنى مش كل مره تتسرع وتظلمنى

أدم: وانا مش عايز أسمع حاجه خالص إنتى طالق والبيت إللى لمك مش هتحطى رجلك فيه تانى .

اتجمدت سميره وقالت: بتطلقنى يا أدم

أدم:ومش عايز اشوف وشك هنا تانى وزقها بقوه وهو بيقول بره مش عايزك هنا بره ودفعها عند السلم فإختل توازها ووقعت من على الدرجات ولحسن حظها أن عدد الدرجات قليل وبعدها باسطه عريضة قعدت فيها في حين كان داخل أيمن مع الاولاد

في نفس الوقت خرجت ميرنا من شقتها على صراخه وقالت بغضب ': إنت عملت ايه إنت مجنون وجريت بسرعه لعند سميره في حين جرى أيمن بسرعه يلحقها أما الأولاد فجريوا لأمهم وهما بيبكوا

ميرنا: سميره إنتى كويسه

جرى أيمن بسرعه ودخل البيت وهو غاضب وصرخ في أدم:إيه اللى إنت هببته ده إنت مجنون

رحاب: عشان دافع عنى يبقى مجنون

أدم: مش أمى إللى تتهان

أيمن: اهانت امك في إيه انطق

صرخت ميرنا: إلحقنا يا عمى إلحقنا

خرج أيمن بسرعه ووراه أدم ورحاب

كانت سميره بتصرخ: ضهرى ضهرى هيتكسر مش قادره

( ٢)

طلعت هاله بسرعه وقالت: سميره مالك حصل إيه

ميرنا: مش وقته إلحقنا يا عمى

اتجمد أدم في مكانه لما شاف الد،م يسيل بين رجليها وملابسها اللى اتلوثت

فتحت رحاب عيونها بفزع من شكل سميره في حين كان أولادها بيبكوا بشده على أمهم

أيمن: بسرعه اسندوها لحد العربية

أدم: هو أنا قت،لتها.

رحاب:: ربنا يستر

وصلت العربية للمستشفى إللى خرج بسرعه الأطباء ووضعوها على الترولى ودخلو بها بسرعه

كان الكل في حالة صدمه وزهول والخوف والرعب على وجوههم

بعد نصف ساعة خرجت الدكتوره وقالت::للأسف دى حالة اجهاض والمدام عندها نزيف شديد

أدم بزهول: اجهاض.... هى كانت حامل

الدكتوره : انتوا ماكنتوش تعرفوا

رحاب: لأ

الدكتوره: إزاى دى تقريبا في الشهر الرابع إزاى مااخدتش بالها.

هاله بدموع: كانت كشفت زمان والدكتوره قالت حاله نفسيه بس النهارده كانت تعبانه اوي فقالت هترتاح شويه ولو مااتحسنتش هتكشف.

الدكتوره: يالا ربنا مش كاتبه لها بس فين زوج الحاله

وقف أدم ووشه اسود من الحزن وقال: ايوه انا

الدكتوره: عايزينك تمضى على الورقه دى

أيمن: ورقه إيه دى

الدكتوره: دى عشان نعمل لها عمليه كحت وتنظيف.

مضى أدم على الورقه وبعدها قعد على الأرض وحط راسه بين كفيه وبدأ يبكى بصوت عالى.

أيمن: بطل عياط زى النسوان وقولى عملت ايه احكى لى بالظبط إيه إللى حصل

رحاب: مش وقته دلوقتي يا أيمن

أيمن: لأ وقته وأنا لازم اعرف كل حاجه دلوقتي.انطق يا أدم سميره عملت ايه عشان تعمل فيها كده

أدم: ......

صرخ فيه أيمن: إنطق

أدم:..........

أيمن: انطقى يا رحاب غلطت فيكى في إيه قالت لك إيه انطقى

رحاب: ......

أيمن: ماتسكتوش أنا لازم أعرف دلوقتي المسكينة إللى جوه عملت ايه عشان يحصل لها كده عملت ايه عشان تطردها وترميها بره البيت بالطريقة دى انطقى يا رحاب

رحاب: ماعملتش حاجه

بص لها أدم بغضب وقال: ماما

أيمن: والله ماعملتش حاجه وأدم مجنون انطقى يا رحاب قولى كل حاجه.

رحاب:........

مش راضيه تنطقى ماشى ميرنا انتى احكى

رحاب: ميرنا كانت في شقتها ماشافتش حاجه

ميرنا: انا ماشفتش حاجه بس سمعت كل حاجه

رحاب: اخرسى يا ميرنا

أيمن: اخرسى إنتى يا رحاب انطقى يا ميرنا سمعتى إيه؟

ميرنا: طنط كانت بتتخانق مع سميره عشان مابتجبش سيره جوزها الأول

أيمن: نعم

ميرنا: وسميره كانت بتزعق وتقول لها انتى زعلانه عشان براعى شعور إبنك

رحاب بغضب: اخرسى يا ميرنا ده كان في الأول بس بعد كده كانت سميره بتزعق لى

ميرنا: كانت بتقولك سيبى ابنك يبقى راجل ويشيل المسؤليه وانتى كنتى بتقولى ابنى وانا حره فيه وهخليه يطلقك واجوزه ست ستك

بص أدم لأمه وعيونه غرقانه دموع وقال: هو ده السبب.

بصت له رحاب وسكتت

رد أيمن ' : قت،لت ابنك بإيدك عشان السبب ده إيه رأيك يا أدم ارتحت

بص أدم لأمه وقال: قولى حاجه إدينى سبب واحد يخلينى ماأندمش على إللى عملته

بصت رحاب له ولأيمن وقالت: احنا كنا بنتكلم إنت بتدخل من غير داعى

أدم ببكاء: من غير داعى طلقت مراتى وخسرت ابنى من غير داعى

أيمن: إنت بتقول طلقتها

أدم: خسرت مراتى وابنى من غير داعى

( حط إيديه على راسه وبدأ يبكى بصوت عالى))

بعد ساعتين بدأت سميره تفوق وهى بتتألم فوقفت هاله جنبها وهى بتهديها: اهدى يا سميره اهدى يا حبيبتي هتبقى كويسه

جت الدكتوره وفحصتها وإدتها حقنه منومه عشان ترتاح كان أدم على الكرسي حزين ودموعه مانشفتش لما ميرنا جت جنبه وقالت: ليه يا أدم ليه؟

أدم: سيبينى في حالى دلوقتي يا ميرنا انا مش فايق لك وبعدين زعلانه ليه مش ده إللى كان نفسك فيه

ميرنا: لأ يا أدم مش ده أنا بغير عليك عشان بحبك بس مش ده إللى كنت عايزاه عمرى ماتمنيت الأذيه لسميره حتى لما كنت بأذيها كانت حركات ضراير لكن إنى اوصلها لكده لأ انا مش وحشه اوي كده يا أدم

أدم: اسكتى يا ميرنا

ميرنا: لأ انا النهارده كنت فرحانه والدنيا ماكانتش سيعانى من الفرحه لما قالت لى الدكتوره إنى حامل

بص لها أدم وقال: حامل

هزت ميرنا رأسها وقالت في شهرين لكن فرحتى راحت وأنا شايفه سميره بتخسر ابنها حسيت إنى أنا إللى بخسره فإتوجعت أوى.

وأنا مش مستعده اضيع ابنى منى انا هاطلع من هنا على بيت ماما

أدم:ليه يا ميرنا انا مقصدتش

ميرنا: فعلا لكنك كالعاده متسرع ومستنى الكل يسامحك بس أنا مش مستعده اخسر ابنى انا هروح و مش هرجع تانى

أدم: لا يا ميرنا ارجوكى أنا مقصدش

ميرنا: فعلا بس سبت طنط تلعب بك بكلمه توديك وكلمه تجيبك وانا مش عاوزه ابقى لعبه تلعب بها

أدم: يا ميرنا ماما بتحبك

ميرنا: وبتكره سميره وأنا مش لاقيه سبب لده وياريت ماعرفوش عشان لو سبب تافه زى اسبابها انا هكرهها وهكرهك انت كمان عشان كنت بتساعدها بسلبيتك .وسابته وقامت

وعيون أدم عليها.وبعد فتره فاقت سميره وكانت احسن فدخلت عليها الدكتوره: حمد لله على سلامتك

سميره: انا حصل لى إيه

الدكتوره: انتى كنتى تعرفى انك حامل

بصت سميره للدكتوره وهزت راسها بلأ

الدكتوره: مالكوش نصيب فيه المهم تهتمى بنفسك عشان تقدرى تقومى بالسلامه

سميره: يا دكتوره انا كنت في الشهر الكام

الدكتوره: كنتى خلصتى الثالت وبداتى في الرابع

سميره بدموع: كان ولد ولا بنت

الدكتوره: مالوش لازمه

سميره: ارجوكى قولى

الدكتوره: كان ولد

كان أيمن وادم بيتابعوها بصمت لحد ماسمعوا كلمه ولد فنزلت دموع أيمن على حفيده إللى راح قبل مايجى

الدكتوره: انتى بقيتى كويسه بس هتباتى هنا النهارده وبكره هاكتب لك على خروج مين هيرافق الحاله

سميره: مش عايزه حد

هاله: انا هاقعد معاكى

سميره: لأ انتى هتاخدى أولادى يباتوا عندك النهارده

أيمن: إيه الكلام ده يا سميره اولادك هيقعدوا عندنا في بيتهم

سميره: مبقاش بيتهم بعد ما طلقنى أدم وطردنى وطردهم من البيت

أدم: أنا هردك يا سميره لعصمتى وننسى كل إللى فات وأوعدك إنى مش هاعمل أى حاجة تزعلك( بص لأبوه وقال): أقول لها إيه عشان ترجع لعصمتى

أيمن: ماينفعش يا أدم إنت طلقتها ونزل إللى في بطنها وبكده هى ملهاش عده

رحاب: إزاى ملهاش عده دى بتقعد ثلاث شهور عده

أيمن: كان الجنين مخلق وربنا قال(( وأولات الاحمال اجلهن أن يضعن حملهن)) وهى بالسقط خلصت عدتها يعنى لو أدم عايز يردها لازم يكتب عليها من أول وجديد

أدم: انا موافق وهاروح اجيب المأذون

سميره:لأ سامع يا أدم لأ ارجع لك ولبيتك لأ اعيش معاك لأ امك ترجع تتحكم فيا وفى عيالى لأ

رحاب: اهدى يا سميره وفكرى انتى مالكيش حد غيرنا

سميره: هاقولك الكلمه إللى لو كنت قلتها زمان ماكنتش سيبتك تتحكمى فيا وفى عيالى ولادى ربنا هو إللى خلقهم وهو مش هينساهم اخرجى من حياتى انتى وابنك وجوزك انا مش عايزه حد فيكم وان كنتى بتظنى انى هاموت من الجوع فلأ انا رزقى بإيد ربنا مش بإيدك انتى.خدى جوزك وابنك وابعدى عنى كفايه أوى إللى خسرته بسببك .

هاله: معلش يا جماعه سيبوها هى تعبانه ومش داريه بنفسها

سحب ايمن رحاب وادم وخرجوا في حين كانت سميره بتبكى

هاله: خلاص يا سميره عشان جرحك مابنفتحش

مسحت سميره دموعها وقالت: هاله أنا عايزاكى تشوفى لى شقه ولو اوضه وحمام عشانى وعشان عيالى

هاله: يعنى انتى مش هترجعى لهم تانى

سميره: عمرى ما هزل نفسى لحد تانى بس يا هاله عشان خاطرى شوفى لى أى شقه اعيش فيها مع اولادي.

&&&&&&&&&&&&&&&&&&

٣)

بعد ثلاثة شهور وصل عبد الرحمن المخبز واتصدم بالمنظر إللى شافه كان المخبز متكسر والواجهات الزجاجية متحطمه وطاولات المعرضات متهشمه وحتى مصابيح الإضاءة كانت متكسره كان كل شيء متحطم بطريقه شديدة .كان بيشوف المنظر ده بصدمه شديدة وبعدها سأل الناس فرد عليه البعض إن أدم ابن صاحب البيت هو إللى حطم المخبز بالصوره دى.

خرج الموبايل واتصل على سميره لكن تليفونها كان خارج الخدمه.فإتصل بهاله إللى جت له بعد عشر دقائق

عبد الرحمن بذهول: إيه إللى حصل للمخبز ده

هاله: خربه إلاهى ربنا ينتقم منه

عبد الرحمن: ليه عمل ده كله ليه

هاله: عشان مارضيتش ترجع له فخرب المخبز عشان ماتلاقيش حل غير ترجع له

عبد الرحمن: ترجع لمين وإزاى انا مش فاهم حاجه

هاله: أه ما إنت مش عارف الحكايه استنى وانا هاحكى لك

وبعد ساعه: ومن ساعتها وهو زى المجنون شويه يهددها وشويه يعيط لها ويعتذر عشان ترجع له لكنها رافضة.

عبد الرحمن: وعشان يضغط عليها يحطم لها المخبز طيب عملتوا محضر في القسم

هاله: لأ سميره مارضيتش واصلا الأستاذ أيمن جه وعرض عليها فلوس تعويض عن كل حاجه بوظها بس هى مارضيتش وقالت له ابعد ابنك عن سكتى وانا مش عايزه حاجه

عبد الرحمن: طيب هى فين دلوقتي

هاله: مأجره شقه جنب بيتى

عبد الرحمن: طيب ممكن تودينى لها

&&&&&&&&&&&&&&&&&&

كانت قاعده في البيت هى وأدم لما دخل عليهم أيمن ومعاه واحده وقفت جنبه

أدم: مين دى يا بابا

أيمن: اقعدى استريحى يا رنا

رحاب: رنا مين دى وتخش فين

أيمن: تخش تستريح في الانتريه على مانجهز لها اوضه

رحاب ،: ياسلام ليه إن شاء الله ماتقعد في بيتها

أيمن: ماهو ده يبقى بيتها

رحاب: بيتها منين وليه اساسا

أيمن: عشان دى مراتى وده بيتها

رحاب بصدمه: بتقول ايه مرات مين؟

ايمن: مراتى رنا تبقى مراتى يا رحاب

قعدت رحاب بصدمه وقالت: اتجوزت عليا يا أيمن

ضحك ايمن بسخريه وقال: إنتى لسه مكتشفه ده دلوقتي أنا متجوز عليكى من سنه غريبه انى بسمع عن الستات إللى بتحس بجوزها اول مابيتغير لكن انتى ماشاء الله تركيزك في أدم وبس

رحاب بدموع: أنا يا أيمن تتجوز عليا هنت عليك ليه يا أدم ليه وجايبها هنا ليه.

أيمن:عجبنى دفاعك عن حق ابنك انه يتجوز واحده تانيه قلت طب وماله يعنى حلال على أدم وانا لأ وأنا كنت سايبها في شقتها وعاجبنى وضعى كده بس الوضع اتغير

رحاب بدموع: وإيه إللى اتغير عشان تجيبها هنا عشان تكيدنى وتذلنى وتحرق دمى

أيمن: لأ يا رحاب عشان رنا حامل وانا مرضاش ان ابنى يتولد في السر عشان كده جيبتها هنا لأنها هتعيش في بيتى وتحت نظرى

رحاب بدموع: دى مش هتعيش في بيتى لحظه واحده

أيمن: حقك عشان كده أنا فضيت لها شقه فوق هتعيش فيها. لأنى بصراحه ماامنش عليها تقعد معاكى .وانت يا أدم هتدنك كده قاعد وسايب مراتك كده

أدم: انا رحت لسميره وهى مش راضيه ترجع لى

أيمن: سميره مين خلاص سميره دى تنساها وتشيلها من حساباتك خالص ده ربنا رحمها لما خرجها من هنا انا بقول على ميرنا إللى فى بيت أبوها بقالها شهور إيه هتستنى لما تولد وتبقى خسرت اولادك الاتنين

أدم: هى مش راضيه تيجى معايا

أيمن عشان ماتغيرتش قاعد ولازق في امك يا ادم انك تبر بأمك شئ عظيم بس لازم تفرق بين البر وبين انك تكون طيشه وتسيب أمك تتحكم فيك

رحاب ببكاء: إنت مالكش دعوه بإبنى ده ابنى وأنا حره فيه

صرخ فيها أيمن: انتى تخرسى خالص انا سيبتك تديرى البيت ده وكانت النتيجه انك دمرتى ابنك بس خلاص مش هاسمح لك تدمرى ابنك أكتر من كده سامع يا ادم تروح تراضى ميرنا وترجعها أما سميره مالكش دعوه بها تانى وتحافظ على شغلك وتبقى راجل أد المسؤلية وإلا والله لو ميرنا اشتكت وطلبت الطلاق لأطلقها منك وأطردك من البيت وهى تعيش في شقتها يالا أخرج وأوعى ترجع من غير مراتك وبعدها يسحب رنا وقال: تعالى بقى افرجك على شقتك

رنا: يالا يا حبيبي

سابها أيمن وطلع أما رحاب كانت بتبص لهم بدموع وهى بتقول: لأ لأ ايمن ماتجوزش عليا ايمن بيحبنى ايمن مايعملهاش

أدم: اهدى يا ماما

رحاب: مش شايف كان ماشى معاها وسايبنى إزاى أنا أنا.....انا عارفه ايمن ايمن بيحبنى دى بس مأجرها عشان يغيظنى ...صح ا.....انا مايعملش معايا كده

أدم: اهدى يا ماما عشان خاطرى

بدأت رحاب تضرب وجهها بإيديها وتقول: أيمن مايعملهاش أيمن مايعملهاش وفجأه دارت الدنيا بها وفقدت وعيها

&&&&&&&&&&&ـــ&&&&&&

دخل عبد الرحمن وقعد على الانتريه الصغير في الشقه المتواضعه إللى قاعدت فيها سميره

وقعدت مقابله له سميره هى وهاله

عبد الرحمن: هاله حكت لي عن إللى حصل معاكى

سميره: انا عارفه يا عبد الرحمن بيه إنى انأخرت عليك في طلبات مازن كتير بس غصب عني

عبد الرحمن: بس أنا مش هنا عشان كده انا هنا لحاجه تانيه خالص

سميره: حاجه إيه إللى انت عايزها

عبد : الرحمن شوفى يا أم حنين انا شفت المخبز وشفت إزاى اتكسر وضاع تعبك بتاع الفتره الكبيره إللى فاتت

سميره: هاعمل إيه أدى الله وادى حكمته اللهم لا اعتراض

عبد الرحمن: وانا عندى اقتراح هيساعدنا احنا الاتنين انا عندى مكان كبير هو مش كبير أوى حوالى ٦٠٠ متر مربع فإيه رأبك نستغله ونتشارك فيه أنا بالمكان وانتى بالعمال والشغل وانتى تديريه قلتى إيه

بصت سميره لهاله إللى ابتسمت وعملت لها علامه ميه ميه بإيديها

فقالت سميره بابتسامة: عبد الرحمن بيه انت عايز تشاركنى ونفتح مخبز.

ابتسم عبد الرحمن وقال: ليه مخبز وانتى بقى لك خط انتاج وزبون بيدور على منتجاتك مخصوص.

فتحت سميره عيونها بدهشة وقالت: إنت عايزنى افتح مصنع عايزنا نتشارك في مصنع.

&&&&&&&&&&&&&&&&&&&&&

وبعد مرور سنه

زقزق العصفور صحانى

قمت انا وناسى وخلانى

قمنا شفنا بلدنا عروسه

عايقه بالحسن الربانى

دخل عبد الرحمن المصنع فقابلته كالعاده ريحه الفانيليا مخلوطه بالذبده ريحه بيشمها من سنه بس كل مره بيحس بالدفا مع ريحه البسكويت السخن وهو خارج من الفرن.

لقى كالعاده هاله بتبرطم وهى متضايقه شئ اتعود عليه وهو هاله ومرحها وخفة دمها المعتادة

عبد الرحمن: يافتاح يا عليم ليه الكأبه دى على الصبح.

هاله: كده كتير والله العظيم كده كتير انا تعبت انا عايزه اجازه انتوا كده بتضحكوا عليا

عبد الرحمن: اجازه ليه انتى مش لسه راجعه من شهر العسل

هاله: ارجع من العسل على الفرن ده حتى غلط على وبعدين بيقولوا شهر العسل مش عشر ايام عسل انا ماليش دعوه

ضحك عبد الرحمن: فرن مين يا نصابه ده انتى مشرفه على ورديه يعنى لا بتخبزى ولا بتعجنى

هاله: وليكن عايزه اجازه برضوا

ضحك الرحمن وقال: خلاص ماشي فين بقى أم حنين وننتظر عشان تديكى اجازه

هاله: الشريره دى مش هتدينى حاجه لكن انت قلبك ابيض وهتوافق على طول قلت إيه

عبد الرحمن: امور الاداره ده اختصاصها فاحسن لك تقولى لها

هاله: بقيت شرير زيها حرام عليكوا انا لسه عروسه المفروض اتدلع

عبد الرحمن: طب هى فين دلوقتي

هاله: لسه مخلصه الحسابات مع المحاسب وسمتنى الورديه وقالت هتاخد البريك بتاعها في الكافية إللى جنب الجنينه إللى في أول الشارع

عبد الرحمن: يعتى انتى لسه مستلمه الورديه ومش عاجبك والله حلال إللى بتعملوا فيكى

هاله: بقيت شرير زيها إنت رايح فين

عبد الرحمن: رايح اشوف أم حنين عشان عايزها في حاجه مهمه

وفى الكافيه كانت بتتكلم في التليفون وبتقول: خلاص يا حنين دى مهما كانت عمتك...... إنسى بقى اللي فات بس هى مريضه وبتسأل عنك .....لأ مالكيش دعوه بيا دى عمتك وصلت الرحم بتقول تزوريها وتطمنى عليها ماشى..... ياستى هيا اعتذرت ليا كتير بس .هاقولك حاجه يمكن كانوا وحشين معايا بس شهادة حق عند ربنا إنهم راعوكى انتى واخواتك ولولا وجودهم كان زمانكوا متشردين في الشوارع بتبيعوا مناديل وانا بلف في البيوت اشوف حد اغسل له ولا اطبخ له . ياحبيبتي انتى ماتعرفيش ربنا كاتب لنا إيه ...... خلاص زى ماقلت لك روحى انتى واخواتك ان شاءالله عشر دقائق وبس عشان تراضوها يا حبيبتي عشان خاطر بابا الله يرحمه ماشى.....شاطره يا حبيبتي يالا مع السلامه.

(( أنا سميره فى الاربعين من عمرى متوسطه في كل حاجه الطول والجمال وحتى التعليم كنت متجوزه اطيب واحن راجل في الدنيا كنت عايشه زى الملكه بس كل حاجه اتغيرت وأديكوا شفتوا وسمعتوا حكايتى وانا حاليا شريكه في مصنع البسكويت والحمدلله مصنعنا شغال بصوره هايله والطلب على منتجاتنا بيزيد كل يوم لدرجه إننا شغالين ورديتين ومش مكفيين وكل ماافتكر الأحداث إللى فاتت استغرب واقول انا ازاى قدرت اعيش واتحمل كل ده بس في النهاية بحمد ربنا سبحانه وتعالى و فعلا ربنا مابيقفلش باب إلا لما بيفتح غيره الف باب بس احنا نقول الحمد لله))

(مساء الخير)

إلتفتت له وقالت: عبد الرحمن بيه أخير جيت ده أنا كنت مستنياك من بدرى

عبد الرحمن: على الله تكون حاجه مهمه

سميره: انت كل شهر بتهرب من الحسابات وتسيبنى اقفل حساب المصنع بس المره دى لازم تكون موجود عشان نحسب الارباح بتاعت السنه

عبد الرحمن: حرام عليكى يعنى تبقى قاعده في المكان الحلو ده ونسمت الصيف البارده اللى لطفت الجو الحار وتقولى حسابات طب استنى حتى اشرب حاجه وبعدين نبقى نتكلم في الحسابات

سميره: ماشى تحب تشرب إيه

عبد الرحمن: عيب عليكي ده أنا اللى عازم

سميره: ماشى هتعزمنا على إيه

عبد الرحمن: قبل ما أطلب ممكن اسألك سؤال

سميره: طبعا اتفضل

عبد الرحمن: اسمك إيه؟

ضحكت سميره وقالت: انت النهارده غريب جداً بقى احنا شركا من سنه واشتغلت لكم في المخبز اكتر من سنه وفي الاخر بتسأل اسمى إيه انت بجد ماتعرفوش

عبد الرحمن: لأ اعرفه طبعا بس انتى دايما تقولى ام حنين بس أنا المره دي عايزك تقولى اسمك انتى ها هتجاوبى

ابتسمت سميره وقالت: اسمى سميره

ابتسم عبد الرحمن وقال تعرفى انا عايز اعزمك على إيه .انا نفسى نشرب سوى قهوه

راحت ابتسامه سميره وقالت: قهوه

عبد الرحمن: ايوه قلتى إيه ؟

سميره: بس... بصراحه انا عشت سنين طويله عندى اعتقاد غريب شويه إن القهوه

كمل عنها عبد الرحمن: بتزعل لو شربتها لوحدك القهوه تحب اللى يتشارك فيها

سميره: صح عرفت منين

عبد الرحمن: وعشان كده أنا بعرض عليكى يا سميره توافقى انى اكون شريكك وإنى اكون امنك وامانك توافقى إنى اعمل معاكى زكريات حلوه تجمعنى بك وبعد تعب اليوم كله نجتمع مع بعض نضحك وننسى همومنا سوا

بصت سميره للأرض في خجل وبعدها قالت: إنت عارف إنى مريت بظروف وحشه الفتره إللى فاتت

عبد الرحمن: وسيبتك سنه كامله عشان تداوى نفسك منها من غير ما اضغط عليكى ولا أأثر فيكى سيبتك تعملى لنفسك اسم ومكانه وتكبرى بتعبك عشان تعرفى انى مش هذلك بلقمة العيش ولا هتحكم فيكى قلتى إيه يا سميره موافقه على طلبى

ابتسمت سميره له وهزت راسها بأه.

فإتسعت ابتسامه عبد الرحمن وشاور للجارسون يجيب لهم ( فنجان قهوه)

لما الدنيا تكون بريحة الڤانيليا. وتدوب همومك واحزانك زى الشوكولاته وتحس بالدفئ مالى قلبك زى الكيكه لما تخرج من الفرن فاعرف واتأكد انك في اللحظه دى محتاج (( فنجان قهوه)) قهوه مره عشان تعمل توازن او قهوه مظبوطه لاصحاب المزاج العالي او قهوه سكر زياده للى يحبها احلى واحلى ايا كان نوع قهوتك المهم انك تعرف ان المبدا الاساسي

للقهوه بيقول أوعى تشربها لوحدك القهوه تتشارك فيها مع حد بتحبه

وهى دى تبقى حكايه (( فنجان قهوه))

اتمنى تكون عجبتكم

القصه كلها مستمده من أغنية

(( فنجان شاي مع سجارتين)) وهى من الأغانى النادره إللى غناها الملحن محمد الموجي بصوته وكلمات الاغنيه بتقول

فنجان شاي مع سجارتين

مابين العصر والمغرب

ونظ

رت شوق جمع قلبين

مع السكر بيتقلب

وصورة حب مرسومه فى قعدت صيف

ماتعرف مين كان الداعى ومين الضيف

فنجان شاي مع سجارتين

تمت