رواية فصلية ل راهب الفصل التاسع والعشرون 29 - بقلم zena ali

مرحبا شلونكم شخباركم كل عام وانتو بالف خير الله يعودة عليكم بالصحة والعافية يارب
شلوني واني احدث فجأة 😁واخيرا كملت وتخرجت الحمد لله من اسباب انقطاعي جانت الدراسة والسبب الثاني كلام بعض البنات الي بصراحة مدري شلونة  يعني رجاءا الي ميحب يقرا هيج قصص يكدر يسوي سكيب ولا يقراها والقصة اصلا قديمة واني داضيف جزء ثاني يعني بطلو سالفة كرنج (مدري منين جاييبن هالكلمة) وقديمة وشهالقصة معاجبج لا تقرين تخيلو وصلت وياي ردت امسح القصة كلهة من التعليقات وغلط بعض البنات بس المقربين مني بقو يشجعوني وبصراحة اقتنعت لان كل انسان الة بدايات وبعدين يتطور
اقرو الملاحظة بالاخير

.

.

.

.

.

ترف

صار فترة و راهب مو على بعضة اجة فجأة للبيت واحس الدخان يطلع من راسة سبح ونام لا حجة ولا سلم ومن ذاك اليوم ولليوم صار اسبوع هوة على هالحالة وبدا يخوفني عليه ساكت لو صافن اطب الغرفة الكاهة صايرة مدخنة من الجكاير وميحس على روحة الا من يسمعني اكح وبعد ماراح للدوام من سألتة كال اخذت اجازة 

كملنة الغدة وصعدت اصيح راهب بس قبل مادخل سمعتة يحجي بالتلفون 

راهب: مثل ما كتلك عميد لازم ابينلهم اني اقتنعت وراح اعوف كلشي هيج يلا اكدر الزمهم 

: ...........

راهب: ان شاء الله اني باليل كلش امرلك حته نراجع كلشي ماريد اي غلطة عميد هاي اخر فرصة النة 

سمعتة سد المكالمة دخلت للغرفة سويت نفسي ماسمعت شي بس ليش راهب كال ماخذ اجازة وهوة جاي يشتغل وشنو قصدة يقنعهم هوة عاف كلشي شجاي يصير وياه!?? 

خليت ببالي اسألة من نكمل غدة

راهب: ها ترف رايدة شي!?

ترف: ها لا ماكو شي بس عمتي كالت اصيحك عالغدة وحسن هم موجود جوة 

راهب: ماشي جاي وراج 

عفتة ونزلت بس بالي ابد مو يمي ادعي ربي ماكو شي خطر عليه نزل راهب وكملنة الغدة وكلمن راح لغرفتة شفتهة فرصة احاجيه ولو هوة مندمج بالتلفون

ترف: راهب 

راهب وعينة بالتلفون: همم 

ترف: راهب جاي احاجيك 

راهب : هاترف 

ترف: شبيك!?

راهب: شبية !?

ترف: راهب صاير شي اكو شي ضامة علية!?

راهب: لا ماصاير شي ليش تسألين

ترف: ممكن تحاجيني مثل ماحاجيك شهالبرود راهب شصايرلك من يوم الي رجعت من دوامك ولليوم وانتة مو انتة واخر شي مكالمتك الغريبة وية صاحبك فهمني شكو 

راهب: جاي تدورين عركة مو!?

ترف : ادور عركة!?? لا مادور عركات بس واضح انك تريد تفر الموضوع وتدورلك على حجة 

راهب: انجبي لج شنو افر الموضوع خايف منج 

ترف: انجب!? اي ادلل 

عفتة وطلعت من الغرفة نزلت بالحديقة عيوني مغوركة وكلبي يوجعني ليش احس راهب القديم رجع ليش رجع برودة 

اول مرة من شهور طويلة يحاجيني بهالاسلوب حتى ماهتم لمشاعري ولا اني حامل شجاك راهب ليش هيج تسوي عندك مشكلة غير تحجيلي اني مرتك وحبيبتك سرك سري ليش تبعد روحك عني حتة حملي بعد ما سألني عنة حته موعد طبيبي ماسأل عليه ولا طلب يروح وياية معقولة تندم لان خلة زواجنة كامل ?! تندم لان اخذ فصلية !? تندم لان حيصير عندة طفل مني!? بس اني اعرف هو يحبني مستحيل يكون ندمان يمكن ضايج او زعلان بس هذا مو مبرر لتعاملة وياية اول فترة جنة منعرف بعض وجان بعدة حزين على اخوه بس هسة احنة صارلنة كم شهر  متزوجين ونحب بعض وحيصير عدنة طفل وهو تغير شصاير هسة!?

صافنة وية روحي وحسيت احد يكعد يمي انداريت لكيتة راهب اتدنى علية وخلة راسة على جتفي وغمض عيونة 

راهب: مو قصدي ازعلج بس ترف اني هالايام حيل مضغوط تحمليني بس جم يوم اخلص الي بيدي 

ترف: واني مقدرة تعبك والضغوط الي عليك بس راهب لازم تحجيلي لا تكلي تفاصيل بس عالاقل ريح نفسك وريحني ليش تبقى شايل كلشي لوحدك وتنظغط تالي تفقد اعصابك 

راهب: صار بعد بيتي هاي اخر مرة يلا كومي الكاع باردة مو زينه عليج وعلى فهد 

ترف: همزين تذكرت فهد 

راهب وهو يبوس راسهة: شعندي غير فهد وام فهد يلا امشينة 

ترف: هههه يلا 

ما مرتاحة بس ان شاء الله خير ..

راهب

ادري مقصر و ترف محتاجتني وادري زعلتهة مني بس مو بيدي لازم اخلص هالشغلة صار تحدي بالنسبة الي 

المفروض الخطة الي مخليهة اني القي بيهة القبض على اكبر شبكة اتجار مخدرات داخل ميسان وللاسف بنفس اليوم الي المفروض تتنفذ الخطة غيرو كل تحركاتهم ومع ذلك اصريت عالخطة وحاولت الحكهم قبل ميتحركون وينفذون التغييرات بس للاسف مالحكت والي عرفتة من عميد اكو جاسوس هو الي موصل الحجي والخطة الهم وهالشي خلاهم يغيرون كل مخططاتهم

اتفقت وية عميد وحسن وكم ضابط ثقة راح نمشي الوضع طبيعي واني علساس اخذ اجازة كم يوم من الشغل بحجة تعبان وضايج لان الخطة فشلت حتى الجاسوس يتاكد اني نسيت هالموضوع ومادور وراهم بعد بس بالحقيقة اني جاي احضر ضربة تكسرهم وتنهي وجودهم لازم ينتهون وينتهي وياهم شرهم والي يسوونة بالعالم 

طلعت عصبيتي على ترف واني مو قصدي بس من الضغط الي علية ماحس شحجي 

ورة مانزلت حسيت على روحي شسويت وشلون زعلتهة نزلت وراهة لكيتهة صافنة بالحديقة كعدت يمهة وراضيتهة وام فهودي كلبهة طيب 

صعدنة وبقينة نسولف لحدما نامت صايرة تنام هواي من ورة فهد بدلت ملابسي وخابرت عميد كتلة جايك باجر راح ننفذ الخطة لازم اكمل وية عميد وارجع بسرعه للبيت احاجي ترف لان راح اغيب جم يوم وماريد يضل بالهة وهي بوضعهة هذا...

غدير 

الليل كلة ما نايمتة وهسة ساعه 9الصبح سمعت ترف دكت الباب وماجاوبت 

ترف وهي تدخل الغرفة: غدير ..غدورة شعجب نايمة لهسة

غدير بصوت مبحوح: تعبانة شوي 

ترف كعدت بصفهة وبقت تمسح على شعرهة: سلامتج من التعب حبيبي ..ما صار الوكت حتى تحجين وتطلعين الي بكلبج حرام عيونج شصاير بيهن هاي اول مرة هيج اشوفج تعبانة وذبلانة 

غدير وعيونهة تغورك بالدموع: بس ارتاح شوي و وعد احجيلج كلشي انتي و جوري لان محتاجة احد يسمعني 

ترف: ماشي حبيبتي ابقي بفراشج واذا سأل احد اكلهم مالهة خلك بينما ترجع جوري من امتحانهة ونجي نقررج ونخليج تعترفين بكلشي 

غدير بضحكة باهتة: ههه تعلمتي من رجلج تحققين وية العالم

ترف: فدوة لهالضحكة اي عيني غير رجلي واتطبع بطبعة يلا كلبي نامي وارتاحي عيونج مورمة من البجي والسهر 

غدير: ماشي 

يمكن احلا هدية من رب العالمين ترف وجوري الله عوضني عن الخوات والصديقات بيهن

اريد انام ماكدر احس كلبي يوجعني ليش هيج سوة بية شنو الغلط الي سويتة ,البارحة رحت لبيت عمي ردت اشوف محمد ليش ميرد علية صار فترة ليش مبتعد عني ومتغير مادري اكول ياريتني مارحت لو الحمد لله لان رحت واكتشفت كلشي 

بعدما دخلت وسلمت على مرة عمي كلت همزين محد موجود وكالت محمد جاي يسبح لان يريد يطلع واستأذنت مني تروح تشوف الغدة بس راحت للمطبخ نزل محمد من فوك 

محمد: السلام عليكم 

غدير: وعليكم السلام شو احسك ماجنت رايد جيتي ولا شوفتي 

محمد: لا ابد غير بت عمي شلون احجي هيج 

غدير: بس بت عمك?!!

محمد: ليش اكو شي ثاني

غدير: محمد انته بيك?

محمد: لا سلامتج

غدير: محمد لا تخبلني شبيك متكلي صارلك جم يوم مترد علية وهسة تحاجيني من ورة خشمك عندك شي احجيه 

محمد: اول شي لا تعلين صوتج ثاني شي لا متغير ولا شي بس الي ببالج انسيه احسلج

غدير: شنو الي ببالي وانساه?!

محمد : انتي تعرفين قصدي كلش زين واذا مرة ثانية دكيتي علية اكل لراهب وهو يتصرف وياج

غدير بصدمة: انتي شجاي تحجي محمد 

محمد: الي سمعتيه واني طالع ماريد اشوفج من ارجع افتهمتي لولا

غدير : اوكف محمد بس فهمني شصار لكل هذا شنو الي تغير

محمد: جنت منبهر بيج لا اكثر بت الشيخ واخوج راهب وهسة بصراحة احسج ما تستاهلين 

بقيت بصدمتي وهو عافني وطلع من حلاة روحي مانتظرت احد يجي ياخذني اني طلعت لوحدي حتى ما سلمت على مرة عمي والحمد لله من رجعت لكيت محد موجود اذا احد سأل اكللهم وصلني احد من ولد عمي

ماعرف اوصف احساسي يعني حب ومشاعر سنة و اكثر هيج مسحهن بكل سهولة زين ليش من البداية علقني بيه ليش تقربلي ليش ماعافني بحياتي وروتيني ليش وليش بس بعد ميفيد ال ليش كلشي انتهى حاولت اكون على طبيعتي وكسرت السيمكارت وسديت الواتس والتلفون قفلتة وضميتة وبقيت كاعدة من البارحة لحد هسة ...

راهب 

كملنة كلشي اني وعميد وراسلت حسن كال اليوم وباجر هو مو خفارة وهالشي راح يسهل عليه شغلة ويانة لازم كلشي يتم باجر 

خابرتني ترف وكتلهة اتأخر لا ينتظروني 

رجعت كلش متأخر للبيت صعدت لكيت ترف بعدهة كاعدة

راهب و هو يدنك يبوسهة: ليش لهسة كاعدة مو زين عليج

ترف وهي تكوم تنزع ساعتة: ماكدرت انام ابد كلت انتظرك 

راهب: سلامتج خوما بيج شي گلبي

ترف: لا مابية شي بس شوية ارق ..تحب احضرلك اكل 

راهب: لا والله شبعان بس جوعان نوم باجر عندي شغل مهم ولازم اكعد من وكت 

ترف: الله يوفقك ويسهل طريقك ويحفظك الية بدل ملابسك وتعال حتى تلحك تنام وترتاح

راهب وهو يحضن خصرهة: وليش مابدل هنا عود بعدك تستحي مني يحلو جا والي ببطنك منين 

ترف بخدود حمر: رااهب بدل وتعال نام 

راهب و هو يگرص خدودهة: اروح فدوة لهالخدود يلا نامي بينما ابدل واجيج

بدلت ملابسي خمس دقايق  واجيت لكيتهة بسابع نومة مددت بصفهة واحذتهة لحضني صافن بوجهة 

الله يحفظكم الي رغم الي صار بيناتنه وشكد زعلتج بس گلبج ابيض حبيتيني بكل الي بية بشيني قبل زيني 

ماحسيت على روحي شوكت نمت فزيت على صوت المنبه بسرعه طفيتة خاف تكعد ترف سبحت وتوضيت كملت صلاتي وبدلت اريد اطلع وكعدت ترف ماردتهة تكعد وتشوفني 

ترف وهي توكف كدامة: راهب ليش لابس هاللبس!!?

راهب وهو يبوس راسهة: صباح الخير بعد گلبي كتلج اليوم عندي شغل 

ترف: بس هاي مو ملابس الشغل 

راهب: ترف عندي مداهمة على ناس ثگال ادعيلي الله يوفقني

ترف بجت: الله يوفقك يارب ويحميك وينصرك عليهم 

راهب رجع باس راسهة: لا تبجين ترف راح تخلين بالي يمج هيج كافي ابوية شلون اطلع هسة 

ترف وهي تمسح دموعهة: لا هاهية سكتت بس بداعتي دير بالك على نفسك 

راهب: صار يلا ارجعي كملي نومتج بينما تكعدين اني راجع

عفتهة وطلعت نزلت جوة لكيت ابوي وامي كاعدين منتظريني امي مبلغ ابوي بكلشي هذا موت ومحد ضامن عمرة وحسن ما عافني الا حلفتة بامي و جوري مايصير اثنينة نروح 

راهب باس راس امة وابوه: يابة وصيتي الك مرتي وابني 

شيخ حاكم: توكل على الله وليدي محروس باسم الله 

عفت امي تدعي وعيونهة مغوركة وترف واكفة عالدرج هم عيونهة حمر من البجي 

طلعت من البيت خابرت عميد واتفقت وياه يلاكيني بالموقع الي اتفقنة عليه بعد ساعه من هسة رحت للمقر وقابلت سيادة العقيد ركن الي جان ويانه بكل التخطيط وبكل سرية تممنة كلشي وحاليا احنه بالطريق لموقع الشبكة والي موجود بيهة بعض اهم اعضائهةوالمسؤليين عنهة 

وصلنة اني والفريق ولكينة عميد وفريقة بدينة بتنفيذ الخطة 

اول شي أكدنة عالقناصة متخذين مواقعهم وثاني شي بدينه بالتسلل لداخل المقر بعدما تم تعطيل الكاميرات وقتل الحرس الواكفين برا 

خلال اقل الساعه تمت مداهمة المكان والقاء القبض على اثنين من اهم العناصر المسؤؤلة عن هاي الشبكة والثالث جان بنية غطينة روسهم وطلعناهم بس للاسف انصابيت برجلي واضطريت اعوف مهمة نقلهم على عميد واني اخذوني للمستشفى وماشايل هم لشي بس لترف و امي من يعرفون بضربتي وصلت المستشفى وطالعو الطلقة و خيطو الجرح والحمد لله ماكو شظايا ولا كاسرة العظم ماحسيت على روحي من نمت يمكن من المخدر والادوية 

.

.

.

.

.

.

.

.

.

.

.

.

.

ممرضة: دكتوور دكتوور المريضة نبضهة توقف 

التحديث راح يكون سريع لان اريد اختم هالقصة حتى ابدي انزل القصة الجديدة جنت اكتبهة كل ميصيرلي مجال او احب افصل من الدراسة شوي سوو متابعه للصفحة حتى يجيكم اشعار من تنزل