رواية فصلية مرتين ✌ الفصل السادس عشر 16 - بقلم Mortahela-مرتحلة

روان :

صار الفجر ، اني گعدت سبحت و تطهرت و ارتاحيت حيل و توضيت و صليت كأي يوم من الايام العادية و بعدين رحت خليت ملابس لمهند بالحمام حتى يدخل يسبح .
صارت ساعة ستة ، رحت گعدت مهند هو نومه ثگيل لذلك لازم يومية اصيح يالله يگعد .
گعد راح غسل و سبح ، اني نزلت سويت ريوگ النا و رحت على غرفة شروق حتى اگعد بكر لان أريده يسبح و يجهز روحه .
هي ينام وياي بالغرفة بس مرات مهند علمود ال🚫 يخليه يروح ينام بغرفة امه و يخلينا وحدنا .
اليوم لازم نروح لبيت عم مهند ، و اخيرا راح اطلع و اغير جو 😆 ، من دگيت الباب طلعت شروق لابسة روب نوم .
اني استحيت بصراحة 😓 ، گلتلها الشيخ مهند يريد بكر ، هيه چانت نعسانة فـ گلتلي روحي انتي گعدي ادخلي .
اني دخلت گعدته بسته من خده و گعد ، هو باوع الي و باسني من خدي ، "ما عليكم قصة رومانسية بين الام و ابنها 😜"
طلعنا من الغرفة و هو راح يغسل وجهه و يتريگ ويانا ، اني صبيت الرويگ جوة و مهند نزل لابس تراكسوت .
تريگنا و خلصنا اني خليت بكر يسبح و رحت ارتب الملابس يلي راح ناخذها ويانا من نروح على طلب الشيخ مهند .
كملت و صارت الساعة ٨ و نص و نحن بـ١١ نروح ، مهند اخذ بكر وراح للحلاق و اني رحت لغرفتي .
خليت كحلة و حمرة و باودر و خليت اشكال المكياج من الانترنت ، (تتذكرون موبايلي ؟؟ … اني مخليته بالكنتور جوة 😉)
طبعا محد يعرف بموضوع الموبايل بس اني و ريناد و بكر ، ريناد هيه دخلتلي الباس وورد مال الشبكة .
خلصت و لبست احلى دشداشة عندي و هيه حمرة و بيها زغارف اخضر و مو طويلة ابد و لبست وياها شال اخضر نفس لون النقشة .
كل هذا علمود احرگ گلب شروق ، ما اعرف ليش هيچ اسوي بس هيه يلي بدت المشاكل و الحرب العالمية الثالثة 😏 .
باوعت على الساعة شفتها ٩ و ربع ، طلعت من الغرفة و شفت ريناد داتغسل وجها هسه گاعدة من النوم .

روان : صباح الخير يا گمر 😄
ريناد : يا خير 😩
روان : يا يمة شبيچ ؟؟ 😮
ريناد : البارحة ما نمت بالليل ظليت سهرانة احچي ويا خطيبي 😫
روان : يطبچ طوب منو گلچ !! 😂
ريناد : ولچ انتي تواسيني لو تبزعين روحي (تضوجيني).
روان : لا يالله حبيبتي تحميلها بس هاي السنة … صدگ اگلچ اني شلون طالعة اليوم !!؟؟ 😅
ريناد : بسم الله ما شاء الله عين الحارة باردة عليچ 😨 .. اللهم صل على محمد و آل محمد .

هيه باوعت لي و عيونها الا شوي ويطلعن من مكانهن ، اني استحيت من كلامها لان شبه تتغزل بية 😳 .

ريناد : هاي شنو ولچ شطالعة اليوم !؟ 😉
روان : شكراً هذا من ذوقچ .
ريناد : تخبلين الله يحميچ من الحسد و الحقد و الغل أن شاء الله ، وين رايحة اليوم حتى هيچ منورة ؟
روان : اممم … بصراحة الشيخ مهند گال راح نروح لبيت عمچ ببغداد اني و هو و بكر بس نحن لذلك جهزت نفسي .
ريناد : شنووو ؟؟ 😲 .. لااا عود أنه اجيت اروحن وياكم .
روان : ما اعرف گلبي من يجي الشيخ انتي احچي وياه و قنعيه اذا تريدين .
ريناد : ليش چا هسه هو وين !!؟
روان : اخذ بكر و راحو للحلاق حتى يزين لبكر و اله .
ريناد : اهااا ... چا خوش شكراً 😊
روان : اهلا و سهلا .

بس انداريت شفت شروق طالعة من غرفتها و لابسة دشداشة طويلة و حلوة لان هيه زوجة الشيخ و لازم مرتبة تطلع بكل وقت .
هيه باوعت الي و فتحت حلگها من الصدمة ، باوعت الي و خزرتني من الغيرة اكيد 😌 .
دخلت لغرفتي و اني ضحكت ، سمعت ريناد تضحك بصوت ناصي من انداريت عليها شفتها تضحك اكيد على شروق .
رحت لغرفتي دخلت بقيت العب بالموبايل و ما احس غير اجتني رسالة من رقم غريب .
فتحت الرسالة و چان مكتوب بيها …

:- (عندچ تلفون يا ام الاحمر !؟ 😉)

اني حيل استغربت بس بعدين شكيت أن هيه شروق لذلك جاوبتها .

روان : (اي عندي و بكيفي ... و لا تحاولين يا شروق تستفزيني !!)
... : (لا اني مو شروق)

اني خفت حسبالي ولد او هيچ شي لذلك جاوبت مرة ثانية حتى اعرف منو يلي يحچي وياي .

روان : (منو انت/ي !؟)
... : (اني فلاح يا ثولة 😂)
روان : (وييه شبيك فلاح وگعت گلبي حسبالي شخص غريب)
فلاح : (مهند يدري أن انتي عندچ تلفون؟)
روان : (لا ما يدري ، لان لو يدري چان اني هسه ميتة !!)
فلاح : (لا مايصير چا موش هو ريلچ !؟)
روان : (أن شاء الله من يرجع اگلة بس كون يتفهم و ما احصل كتلة)
فلاح : (هههه 😂 ام الاحمر شطالعة اليوم !!؟)
روان : (خجلتني ... هذا من ذوقك تسلم 😳)

فلاح و اني بقينا نحچي و نسولف على اشياء عامة مو موضوع ثابت يعني ، هو تكلم عن حياته و إن هو يحب وحدة و ما يگدر يگول لأحد .
و گلي لأن هو يثق بية ، گتلة أن اني راح اتكلم ويا مهند بهذا الخصوص بس هو مقبل گال خاف تنگلب ضدچ .
بمعنى شلون انتي تعرفين و ليش ما گلي و انتي مالچ دخل و راح يضوج خلگي حسب كلامه لفلاح .
عرفت الجهاز بعد ما خلصنا كلام ، باوعت على الساعة شفتها بـ ١٠ و خمس دقايق ، گلت خل انزل حتى تساعدهم و من يجون اجهز روحي و نروح .
من نزلت شفت عمتي و ريناد دا يسون غدى ، اني گمت اساعدهم إلى أن عمتي حچت .

ام مهند : عمو انتي تعرفين تخبزين ؟؟
روان : اني !؟
ام مهند : اي جاي احچي وياچ .
روان : اي اعرف بس مو كلش زين يعني 😅 .
ام مهند : تعالي خل اعلمچ لان تعرفين اني عيوز (عجوز) و بعد ما اگدر اشتغل و شروق ما تعرف من الأصل و ريناد ما باقية ويانا و راح تزوج .
روان : اي عادي عمة شتردين اني حاضرة .

رحنا فوگ بالسطح لان التنور فوگ ، هيه گامت تعلم بية إلى أن اعطتني و گمت اني اسوي .
من خبزت الخبز مالتي حسبالي صار سنين اعرف اخبز ، حتى عمتي فرحت بس اني أصابعي و ادية حترگن من التنور .
خلصت و نزلت شفت الساعة بـ ١١ و ثلث اني استغربت لان مهند گال بـ١١ نروح اني عفت الخبز جوة اعطيته السماد و رحت فوگ أشوف مهند .
صعدت لگيته عصبي و لازم اوراق بيده ، رحت دخلت و وگفت گدامه ، هو انتبه الي و خزرني .
اني خفت لان ما يبشر بخير ابد من نظراته ...

مهند : وين چنتي !!؟؟
روان : عمة چانت تعلمني اخبز لان هيه بعد ما تگدر تعبانة .
مهند : و ليش تأخرتي ؟؟
روان : لان صعدت اخبز متأخرة شي بالعشرة و ربع يمكن .
مهند : كملتي لو بعد !؟
روان : اي كملت و بقى بس التمن ريناد هيه تسويه بعد شوي .
مهند : اريدچ بشغلة !!
روان : اي تفضل اي شي اريدة گوله .
مهند : تعالي شوفي هنا مكتوب اكو بيت لفظ واحد من عشيرتنا يم النهر و اكو واحد ثاني طريق الزرع مالته على نفس طريق البيت و الزرع مال ابن عشيرتنا لذلك اريد حل للطرفين يقنعهم اثنينهم .
روان : همممم … خل المساحة يلي يتعاركون عليها يقسموها !!!
مهند : يعني شلون يقسموها !؟؟
روان : خل يقيسونها و يقسموها بالنص كل واحد اله نص يعني ، و كل واحد يزرع بكيفه .
مهند : بس هو الطريق مال زلمتنا !؟
روان : لعد النص يلي راح يأخذه ذاك الرجال يعطي حقه من الفلوس أو الزرع حتى يكون بمثابة ايجار .
مهند : والله انچ ذكية يا فصليتي .
روان : اعرف اني ذكية !! ... راح ابدل لان تأخرنا .
مهند : لا ترانا نطلع بعد الغدة .
روان : يعني شي بالـوحدة الظهر نطلع ؟؟
مهند : اي بالوحدة و خل يعجلون بالغدة تراني جوعان .
روان : اي ان شاء الله .

عفته ورحت نزلت جوة حتى اخليهم يستعجلون بالغدة ، نحن كملنا بس حتى  يسرعون بالتمن .
سوينا عدة و كملنا و صبيت الهم چاي و ما احچيلكم عن شروق شنو مسوية بنفسها صايرة خريطة عود مخلية مكياج .
لابسة اخضر و طالعة مثل الخنافس الخضرة يلي تضحك اكبر واحد عود هيه تتحداني الثولة .
خلصت و رحت بدلت لبكر و جهزت ملابس مهند دشداشة و عگال و يشماغ و شيخ على حسب الأصول .
اني هم لبست صاية يعني جبة أو عباية خليجية أو شتحبون تسمونها انتم ، المهم لقيت الشال عدل و خليت بس كحلة و حمرة و باودر .
مهند ما يقبل اخلي مكياج طوخ يعني رميا و مسكارة و مورد خدود و ضلال عيون و هاي السوالف .
أخذت الجنط اني و مهند نزلنا للسيارة و صعدنا و انطلقنا و اشوف شروق ماتت من الغيرة ، حل تستاهل 😜 .
انطلقنا لبغداد العشق مالي 😍💋 ، مهند شغل قرآن و نحن وعينا من الملل استغفر الله 😂 .
اني طفيته و اخذت موبايل مهند طلعت اغنية لان مشغل انترنت على السيم كارت يعني على الرصيد .
طلعت اغنيتي المفضلة و يلي هيه "حبك يدگ بالراس" .
بقيت اغني وياها و مهند مبتسم و الابتسامة راح تشگ حلگه لان حسباله اني احبه بس ما يدري مدا كرهي اله .

روان : حبك يدگ بالراس .. ماليني حب و احساس .. غير انت تاج الراس .. و هذا مكانك 👈💟👉 ...
حبك سوالف ليل .. و شفاك طعم الهيل .. و بگلبي عادي تعيل .. و هذا مكانك 👈💟👉 .
و اريدك يا غالي .. يلي منور الليالي .. اريدك تجيني .. غيرك فلا يحلالي 💟 .

مهند ضحك على الأغنية و علية لان أردد وياها و اشر و شبه ارگص گلي ايا خبلة گتلة طالعة على اختك غير 😂 .
هو ضحك و طفى الأغنية و شغل غير وحدة ...
شغل : (بيمن احلفلچ بعد و تصدگين 😉❇)

اني ابتسمت و دنگت هو ظل يقرا وياها لحد ما خلصت و طفاها و بكر لگيناه نايم لان نحن مملين .

مهند : الشامة و عيونك سودنني .. اني اول تالي ارد للبيت اغني 😏 .

اني خجلت انوب رديت عليه بالاكثر منه ...

روان : وجهك يشع چن نجم بوسط ليل .. شفته اعثرت و ما ظل بعد حيل 😳

مهند : ترة من تدخل و كلها توگف و انه گاعد مستريح .. لا مو ما منتبهلك بس خاف من اوگف اطيح 😉 .

روان : يحدثني الحبيب حديث ودٍ .. فاطلب منه أن يعيدا .. ليس صعوبةً بالفهم .. لكن احب حديثه حباً شديدا 😊 .

مهند : جمال البيك ما اظن جمال انسان .. يالخلقك ملاك و هيبتك ايه .. فرهدت (سرقت) الحسن و الناس داخت بيك .. يعني انت الحسن و كلها شرايه
روان : يا نشوة خمر تذهب عقول الناس .. يا صافي الخمر ما بيه دغش مايه .. تصفن و العيون بغيض مشدوهات .. و مصور غضب و براسك الغايه .

مهند : گول شما ردت تلگاني طوعك دوم .. صوب يا ورد تلگاني الك ثايه ..

روان : هيچ أحنه النحبه و النموت عليه .. يلگانه أمر للدوم فدايه

مهند : يا شگة گمر ضيفنه عندك يوم .. ليلة يا بدر و احسبنه عطايه ..

روان : فدوة لطلعتك يا عزوة العشاگ .. يا غنوة و قصيدة و حزن فختايه .. يا راعي بمسيه و يا وحشة محبين .. يعزف و الحزن يتوسل بنايه ..

مهند : مهضومه الليالي تريد بزغة نور .. تاهت يا حلو و الناس شچايه .. يا طير الجبل عزفك يهد جبال .. غم راية الجزاك و الف غم رايه .

روان : الف هيهات يلي ينتظرك بالشعر يا شيخنا 😳
مهند : اشعر بس لايستحق الشعر و تسلط عليه ابيات من كيفها 😊 .

سكتنا شوي انوب هو رجع يحچي بس مو يشعر 😂 .

مهند : انتم ببيت اهلچ كلكم هيچ عيونكم حلوات ؟؟
روان : لا بس اني و واحد من اخواني طالعين على امي الله يرحمها .
مهند : امچ ميتة !؟
روان : اي من چنت صغيرة جابتني و توفت و بس اني بنية بالبيت ، بس بابا تزوج مرية كلش حبابة و تحبنا كلنا تموت علينا و ما عندها جهال .
مهند : هممم .. الله يرحمها .
روان : اريد اگلك شي بس لا تصير عصبي و تتسرع و تضربني .
مهند : گولي هسه أنه مرتاح يعني احتمال أن اصير عصبي بعيد حيل 😓
روان : اني بصراحة ... عندي .... موبايل و صامته عنك .
مهند : شنهوووو !!!!؟؟؟؟ 😨
روان : الله عليك لا تعصب بس لا تعصب تهدأ تهدأ مصار شي 😫
مهند : شلووون ليش ما گلتيلي من البداية ؟؟؟؟ .... يعني معقول لهاي الدرجة اني ضاغط عليچ ؟؟؟؟
روان : تريد الصراحة !! .. اي انت تضغط علية دائما لذلك أحياناً تصير وياي اشياء ما اگولك عليها !!!
مهند : اهلي الدرجة بعد ؟؟؟
روان : اي ... و اني گتلك لان فلاح گلي أن احچي وياك بهذا الموضوع و ما اخبيه عنك ابدا .
مهند : لا اله الا الله 😵 .... يالله عادي مصار شي بس لا تعيديها بعد .... وينه هسه الموبايل !!؟
روان : وياي بالجنطة مال الملابس .
مهند : لا تخلين شروق تعرف لان حتى شروق ما عدها موبايل بس ريناد و هم خطيبها جابه الها لان نحن ما عدنة هيچ اشياء !!!
روان : اوكي 😊 شكراً على تفهمك الي
مهند : اهلا و سهلا .. و ترة اني مو قصدي اضغط عليچ بس انتي لسانچ طويل و ما تفكرين قبل ما تتصرفين .
روان : ما تعيدها بعد اوعدك ، زين ؟؟
مهند : خوش .

خلصنا كلام و اول مرة ينتهي كلامنا بدون عركة لو ضرب ، ورة شوي باوعت على مهند شلون مندمج ويا الطريق و مركز .
ظليت صافنة عليه ، هو كلش حلو يخيل و هاي مو اول مرة انتبه عليه يسحرني بس مشكلته العصبية الزايدة عن اللزوم .

مهند : تراني صدگ حلو بس مو مال تظلين صافنة علية 😉
روان : لا أنت حلو تخبل 😍
مهند : هاااااااا !!!؟؟ 😜 .... شنو هاي تتغزل بية مو ؟؟
روان : لا لا منو گلك انت اصلا ....  😳
مهند : ماكو احلى منچ ترة يا ام عيون البحر 😏 .
روان : 😳 .
راحت نص ساعة و لا اكو شي بس ملل إلى أن نمت 😴 على الجامة مال السيارة .

٩٩٠٠٩٩٠٠٩٩٠٠٩٩٠٠٩٩٠٠٩٩٠٠٩٩٠٠٩٩٠٠٩٩٠٠٩٩٠٠٩٩٠٠٩٩٠٠٩٩٠٠٩٩٠٠٩٩٠٠٩٩٠٠٩٩٠٠

الكاتبة 😉 :

نامت روان بالسيارة من الملل و بكر هم نايم و استاذ مهند 😂 بس مركز ويا الطريق .
وصلو لبيت عمه و هو اندار عليها بس شافها نايمة و ما حاجة يگعدها بس يشيلها و يدخلها گبل هيه و بكر .
نزل من السيارة و راح دگ الباب گللهم أن يفتحون الباب و يجهزون الغرفة والأهم بس علمود يجيب بكر و روان ينامون بيها .
هم مجهزين الهم غرفة و كاملة بس يفتحوها حتى يدخلهم ينامون أو بالأصح يكملون نومتهم مال الظهر .
هم نفذو يلي گاله الهم و فتحة باب الغرفة طلع ابن عمه و شال بكر وياه و هو شال روان 😉 .
دخل هم للغرفة و نامو على الچرباية روان و بكر ، زوجة عمه ضحكت على شكل روان گالت چنها طفلة بس مبينة وكحة .
مهند ضحك و گللها هاي ام ليان ترة مو حسبالچ فقيرة ، ضحكة و نزلة لان الغرفة فوگ يا عيوني .
عمه سأله اذا زوجته شروق صارت حامل لو لا بس هو گله لا مو حامل بس هاي الفصلية حامل هسه عمه ما قبل .
گله شلون تگول عليها فصلية مهما يكون زوجة الشيخ ، هو مهند حس بالخطأ و تعذر من عمه لان مهما يكون هو مثل ابوه و يعرف مصلحته .
زوجة عمه گلتله شلون حامل هيه صغيرة حيل ، هو ضحك گللها عمرها ١٥ بس ناعمة حيل و ما مبين عليها .
هيه گلتله الله يحميها الك ، هو ابتسم ، ورة شوي اجو ابناء عمه أربعة وياهم الصغير يلي شال بكر صاروخ خمسة و بنات ثلاثة .
الكبير اسمه ماجد و عمره بگد مهند ٣٠ و الاصغر اسمه حامد و عمره ٢٧ و الاصغر ثنين توأم ميتشابهون حليم و كريم عمرهم ٢٦ و الاصغر منهم علي عمره ٢٤ .
البنات : رحيمة العمر ٣٢ متزوجة و سعاد ٢٢ مخطوبة و ابتهال ١٨ اخر العنقود و single 😂 حديقة كلهم حبابين حيل و محد يكره أحد
الاب : نهيل عمره ٥٦ و الام سليمة عمرها ٥٢ .
راحو كلهم و بقت بس سليمة و بناتها الاثنين الان الثالثة متزوجة اكيد 😌 .
گعدت روان محبوسة من كابوس شافت أن ابنها مات و شروق دفعتها من الدرج گالت بنفسها يجوز الله حذرني من يلي راح تسويه صدگ .
شافت بكر نايم سمها على الچرباية هيه باستخدام و گامت فتحت الباب و نزلت جوة شافت سليمة و بناتها .

روان : السلام عليكم 😊
سليمة : و عليكم السلام حبيبتي گعدتي ؟
روان : اي خالة گعدت .. وين الشيخ مهند !؟
سعاد : يااا لا تگولين الشيخ بعد هو مو زوجچ شلون هيچ تحچين رسمي !؟؟
روان : متعودة گدام المطار و الأخطار ميخلصون لذلك صارت عندي عادة اگول الشيخ أو شيخنا مو مهند .
ابتهال : شوف شگد نازكة و مرتبة حتى بكلامها مو مثل ذيچ الحية شروق .
سليمة : اي والله حية و ام راسي هم .. تعالي خل نگعد نسولف .
روان : اي ان شاء الله بس خل اغسل وجهي تصحيح لان عيوني مقفولات .
ابتهال : اي و صدگ مهند راح ويا اخواني بشغلة مالتكم بالمحكمة .

روان گبل اختلست حسبالها يطلگها مثل ما گالت شروق .

//\\//\\//\\//\\//\\//\\//\\//\\//\\//\\//\\//\\//\\//\\//\\//\\//\\//\\//\\//\\//\\//\\//\\//\\//\\//\\//\\

روان :

روان : شنوو ؟؟ 😮 .. اي شغلة !!؟؟
سعاد : شبيچ تعقدون محكمة مال زواجكم حتى من تجيبين يصير ابنه باسمه مو بدون اب او اسم اب بالجنسية أو يصيح له ابن الفصلية يگلوله ابن الشيخ أو بنت الشيخ .
روان : صدگ ؟؟ ... 😳
ابتهال : يمة الحب يمة شوف الخجل !!!
روان : يا خجل يا حب هو زواجنا و علاقتنا هم تعتبر حب .
سعاد : على كيفچ ترة هو گلنا كل شي صار بالسيارة 😉 ... مو ابتهال !؟؟
ابتهال : اي صح فاعترفي احسن .
روان : اهووو هو بدأ يحچي بالشعر و اني بس اكمل حسب ما يخطر على بالي  وبس يعني شنو بيها 😫 ؟؟
ابتهال و سعاد : ههههههههه 😂😂
روان : ليش تضحكن ؟؟
ابتهال : يا غبية فضحتيني روحچ نحن اصلا ما حچينا ويا مهند هو گبل سلم و طلع بس . 😂
سعاد : و انتي الثولة صدگتي !!😂 .

ظلن يضحكن علية و اني هم ضحكت على نفسي ، اني كلش فرحانة لان راح ابني يصير اله اسم و نسب و مو يظل هيچ ابن الفصلية و بس .
گعدنا سولفنا لحد ما نايمة هنا سولفن عن حياتهن و اني هم ، للحد ما دخل بكر و گلي ماما اني جوعان هنا استغربت من الماما .
سولفتلهن كل شي صار ويا بكر و وياي اني هم و هم فرحت گالن احسن ما يتربى عند ذيچ الحية .
گمت اني و ابتهال سوينة اكل لبكر ، سويت طماطة و بصل و بتيتة و ولحم أو إذا تسموها حميسة 😂 أو مخلمة يمكن ما اعرف بعد .
هو گعد ياكل و اني اباوع عليه و مبتسمة هو سوى لگمة و مد أيده الي بمعنى اكلها من أيده بس اني اخذتها و رعتها اله خليتني يأكلها هو لأن هو جوعان و گلب الام ما يعطيها تأمل و الابن جوعان .
هو كمل و اني غسلت المواعين صعدت للغرفة شفت الجنط گمت اصفط و ارتب  بالملابس بالكنتور لان عايفين غرفة كاملة لمهند كل ما يجي .
ينظفوها و هو من يجي الغرفة هاي اله ، بكر گام يرتب وياي لان معدل 😂 ، خلصنا و گعدت اگلب بالتلفون .
العب بيه لأن بيه العاب و بكر هم يلعب وياي هو عندة واحد و أمه ما عندها 😂 ، هو يلعب بمالته و اني بمالتي .
مرات نتصرف مثل الاطفال نتعارك و مرات مثل ام و ابنها بس اكثر الاوقات مثل آلام و الابن و الهرم ما تخليه يطلع بيرة الغرفة .
تصدگون اني اكبر من بكر بس ب ٩ ما اعرف ٨ سنوات ؟؟ ههه أنه أكبر منه بشوي و الله تضحك هاي السالفة .
شوي و حسينا بواحد فتح الباب نحن خفنا و بعدين طلع مهند .

مهند : هلو يا حلوين 😊 .
بكر : هلو بابا .
روان : هلوات .. وين چنت ؟؟
مهند : تعالي انزلي اريچ و خلي حجاب على راسچ .
روان : صار هسه ثواني .

لفيت الحجاب و نزلت وياه شفت سبع زلم و مرية بس مو چبيرة يعني عمرها زين .

مهند : هذول عمي وابنائه و هاي البنية والولد جايين ياخذون توقيعچ لان اني گلتلهم انتي تعبانة و متگدرين تروحين للمحكمة .
روان : ليش تريد توقيعي !؟
مهند : علمود عقد الزواج مالتنا .. و عمي راح يكفلچ بما أن ابوچ ما حضر .
روان : بس منين جبت جنسيتي ؟؟
مهند : رحت لبيت حسين الشيخ ابو نصير يعني و اخذتها منه لان چانت عنده
روان : اهااا خوش لعد .

البنية اعطتني ورقة و اني وقعت عليها و بصمت گلتله بيها نقص الصورة مالتي و توقيع الاب لان الكفيل غير معترف بيه هواي .
هو هز رأسه و شكرهم و راحو اني اخذت العقد و صعدت فوگ تضمه و انزل اتعرف عليهم .

٥٥٤٤٥٥٤٤٥٥٤٤٥٥٤٤٥٥٤٤**٪٪**٪٪**٪٪**٪٪**٪٪**٤٤٥٥٤٤٥٥٤٤٥٥٤٤٥٥٤٤٥٥

يتبع ... 💟❇

(بالنسبة لريناد طردها و صاح بوجهة الشيخ مهند و الا شوي يقتلها لان تريد تروح بدون علم خطيبها 😂)