عزيزي القارئ فضلاً وليس امراً أضغط تصويت لنشر المزيد من احداث الروايه،
فستان أحمر
تحسين لقمان
واكع بالكاع وجسمه كله يرجف كأنما واحد كاعد يهزه ورافع ايده عاصرهن حيل
ويروح بوجهه منا ومنا ويون مادري بشنو
عبير صاحت بعلو صوتهه : لك حجي يابه
حجي ناصح الحك حنظل جايته الحاله •
استغربت من كلام عبير باوعتلهه
كلتله : ياحاله هاي شبيج عبير
تركتني وراحت ركض وهذا حنظل ماعرف شنو بي شكله كلش يخوف ويصيح بعلو صوته بكلمات
مامفهومه رحت يم رفيق اخذته من ايده وطلعنه من الغرفه واني اقره سورة الفاتحه بكلبي
من الخوف، اول ماطلعت اجه حجي ناصح كبل دخل للغرفه وكفت بالباب اباوع لكيت حجي
ناصح يلزم بأيده ويضرب بوجهه
ويكله : حنظل ابني حنظل صحصح ابني حنظل يمك اني بسم الله بسم الله
عبير عبير بويه صيحيلي رقيه
اباوع لعبير ركضت ركض وتصيح :رقيه قيه لحكي لحكي الزلمه
واكع بالكاع يرعش •
وحجي ناصح : يفتح بيدين حنظل ويضرب بوجهه علكيفه علمود يصحصح ويفك
اخر شي لوه ايده وفرهه فر على حنظل رئسا هدء ورجع لوضعه الطبيعي , اني واكفه ولازمه ايد
رفيق متسغربه وخايفه وقلقه ومتوتره من الموقف الي كاعد يصير كدامي
معقوله حنظل مريض او بي شي •
اباوعله رفع راسه باوع يمنى ويسرى رئسا زوع بمكانه ذب كل الي ماكله وحجي ناصح يدك على
ضهره ويكله : ماصار شي ماصار شي أبني
اهدء هسه اطيب
سمعت الجامع بده يأذن والدنيا غربت , حجي ناصح كوم حنظل من الكاع اباوعله بالكوه واكف
مايكدر يمشي ولا يتحرك واحس باله كلش بعيد كتلني الفضول اريد اعرف شنو
شبي حنضل ليش هيج صار ويا •
باوعت لرفيق خطيه خايف بس يرجف ويسوي بصوت ناصي : جك جك جك
اخذت حسره ودرت وجهي اتمشى لغرفة عبير اشوف ملاك وين
اجتي رقيه هي وعبير يركضن ركض دخلن للغرفه وكفت اني بمكاني شفت رقيه
واكفه بصف حنظل ومادري شنو تحجي ويا
معقوله اكو شي مخفي ومامعلوم بي
عفت ايد رفيق وكتله : رفيق روح يمهم اني رايحه اكمل شغلي
مادري شنو كام يحجي تركته بمكانه ورحت لان تعبانه كلش اذا احط راسي على مخده اعتقد
مااكعد اله يمر عليه اسبوع كامل من وره التعب والهم والقهر والضيم
تمشيت بأتجاه الغرفه دخلت لكيت ملاك ممده بالكاع وصافنه على السكف والدمعه
تنزل من عيونهه ,
كلت بكلبي : ربي شوكت تفرجهه علينه لشوكت تضل دموعنه تنزل مو اختنكنه مو تعبنه
رحت تربعت يمهه بالكاع مديت ايدي علكيفي ومسحت دمعتهه حسيتهه حاره
ماكو داعي اسئلهه ليش كاعده تبجين لان كلشي واضح خالهه والدنيا لفو عليهه ووصلوهه لهنا
شحجي شكول ماعرف حتى كلمات المواساة
خلصن عندي بعد ماعندي اي شي ومابيه حيل
شوكت ينتهي كلشي ماعرف •
ملاك : اختي يمياده
مياده : اوف ياثريه شتسوي البنيه اختج لو ماخالج جان انتن بخير ونعمه
شتسون ماتكليلي حسبي الله ونعم الوكيل ,
ملاك : ليش هو السبب الاكبر من خالي لا يمياده سبب طشارنه
ابويه اذا اريد اعتب اعتب بس على ابويه والدنيا الغبره
خالي ماطلب غير بس حقه راد فليساته الرجال علمود يطلع للخارج بس ابويه شسوه اخذ نفس
وصاح بينه لبسن ملابسجن وروحن وره امجن ليش هيج مياده ليش معقوله صرنه ثكال
على ابويه واحنه بعمر الورد مافكر بينه ماكال وين راح يرحن بناتي
حتى لو عندي ام وامي عدهه راتب بس
اوف مياده اني تعبت اريد انتحر واموت والله •
مياده : لا لا ملاك تموتين خاف عبالج
ترتاحين تره وراج عذاب شكده شكبره
ملاك : مياده الله غفور رحيم يرحمني ويغفرلي وداعتج تعبت يمياده اريد شي منج
استغربت من طلبهه كتلهه : كولي عيوني شنو شتردين انشالله
اذا كدرتله اكيد ماقصر وياج ياعيوني انتي •
ملاك : اريد حبايه فدوه فدوه لطولج اريد بس وحده ماتحمل ماكدر ماكدر اذا ماخذ وحده
حطيت ايدي على حلكي وكتلهه : ملاك انتي شنو كاعده تحجين شنو تردين حبايه
تخبلتي لو شنو السالفه ,
ملاك : ماتخبلت ومابيه شي بس اريد حبايه ماكدر ماكدر اني مدمنه مدمنه
اذا ماخذ وحده اموت وداعت ثريه •
مياده : يعني قبل شويه ردتي تموتين مو لان بس الدنيا غبره وياج لا لان ماماخذه حبايه لحد ألان
ملاك :الاثنين ياعيوني الاثنين راح انجن فدوه
مياده : انتي شنو كاعده تحجين وتردين اني مياده اطلبين مني اجيبلج حبايه كلش متوهمه
ملاك ماكدر اشارك بهيج شي نكس ولازم تعرفين نفسج ان الكاعده تسوي كلش غلط واختج ثريه
ماتقبل عليه واذا تسمع هذا حجيج كلش تتأذه •
ملاك : لج ماكدر تعرفين شنو كلمة مدمنه ماكدر اتخبل ,
مياده : لج ماما صحصحي اضاهر لاعبه بيج ام اموري لعب
ملاك : هاي الجلبه خلصت على حياتي كلهه
ماكدر مروتج ماعرف •
مياده : عذريني عذريني ماكدر لو تطلع نخله
براسج ماجيبلج اي شي
اباوعله دفنت راسهه بالمخده وكامت تبجي وتصيح : اني شنو ذنبي يمعودين ليش هيج
مياده اني كلشي خسرت بحياتي ماريد اعيش حبابه
مياده : كومي ملاك كومي كاعد يأذن كومي اجددي واوكفي بيد ربج يلا يلا ويايه لا تستلمين
ليش هيج ملاك ياعيوني
يلا لا تذبين روحج بضلمه يلا ويايه •
كمت على حيلي بسرعه رفعت اردان دشداشتي وكومته من مكانهه بالكوه ماقبلت
مشيت بيهه للمغسله الي موجوده بره وكفتهه على المغسله وكتلهه : يلا حاولي تصحصحين
يلا حبابه انتي •
غسلت وجهه حسيته شويه صحصحت
اباوعله لكيته بدت تجدد واني واكفه بصفهه لزمت راسي حسيته بده يوجعني
وضهري موتني احسه خلاص
راح يوكع من وره الالم ,
كملت تجديد وهي دموعهه تنزل
كتلهه : يلا اريدج توكفين على المصلايه وتبدين حياة جديده ماريدج تضلين بالتهلكه مالتج
ملاك : معقوله مياده راح اكدر استمر عليهه والله يغفرلي كلشي صار بيه
مياده : قبل شويه انتي كلتي الله غفور رحيم اكيد يغفرلج ويرحمج يلا ياعيوني انتي
اباوعلهه دخلت الغرفه وهي تمسح بدموعهه علكيفهه وتشهك وياهن رحت وراهه واني شبه
ميته شفتهه طلعت المصلايه وفرشتهه بالكاع
كاعده اكعد علمود امدد بس دخلت
رقيه وكالت : مياده تكدرين تجين تساعديني بالعشه
باوعت على نفسي وكلت : فوك مالاميني اني وابويه وما أساعدهم شفتهه كلش عيب وزحمه
اذا ماكوم وما أقوم بالواجب
كمت على حيلي وكتلهه : جايه وراج عيوني
راحت هي واني وراهه اتمشى دخلت للهول
وبعدين للمطبخ لكيت بنات يطلع عددهن خمسه والمطبخ صاير بوخه شنو هاي معقوله كلهن
شاردات وصايره وياهن سوالف يابه سوالف
والله مادري شكول ,
رقيه : لتصفنين شغلي ايدج ماصحتج علمود توكفين وتستكتين
باوعتله من فوك ليجوه وكلتلهه : اي شنو اسوي هو انتي كلتيلي وين اروح
رقيه : عشتو هم عدهه السان
ضحكت وكتلهه : ليكون الله خلق ألالسان بس الج انطيني عيوني وين شنو اشتغل
رقيه : روحي هاي اللهانه ثرميهه وحطيهه بالخل
رحت لميز الكاونتر اخذت راس اللهانه
غسلته بالسنك غسل زين ورجعت اخذت التخته والسجينه وكعدت اسويهه بشكل اصابع
واني مدنكه عليهه ومندمجه بيهه بشكل سريع مر شويه من الوكت واني كاعده عليهه
سمعت صوت حجي ناصح بالهول
صاح : رقيه بويه العشه وين يلا بويه عمج كريم تعبان
جاوبته رقيه : اي اي يعيوني بويه هسه شويه واصبلكم , حنظل شلون صار
ماعرف ليش اول ماسمعت اسمه رفعت راسي اريد اعرف شنو صار بي وشلون صار
جاوبهه حجي ناصح :عزليله عشاه ميتعشه هسه يتعشه بليل بين مايرتاح بويه
سمعت صوت الباب انطبك عرفت ان حجي ناصح طلع , اكو بنيه بصف رقيه
واكفه كالت : شبي الولد رقيه خاف مريض تره
عادي هسه اداوي مجرد اعشاب •
رقيه : لا ولج ياأعشاب الولد
مريض بصرع خطيه •
والله يستر من عنده والله يشافي •
ذبيت السجينه من ايدي وكمت على حيلي شنو بي صرع وشنو من مرض هذا ؟
ضليت بحيره جبيره
توجهت للسنك واني ساكته غسلت اللهانه بسرعه علمود اكمل شغلي من وكت كملت غسلهه
جريت سطلة الخل جانت ريحته طيبه ومبين طعمه طيب من ريحته
جبت اللهانه وحطيتهه بالسطله •
مياده : عيني رقيه كملت كلشي وين احطهه
رقيه : هاهي حبيبه ماكو داعي بعد بس كليلي تتعشين لو لا
مياده : اتعشه ويه عبير وملاك
اتعشوا انتو الف عافيه على كلبكم ,
ضليت شويه واكفه يمهن خاف يحتاجن شي شفت الوضع تمام جريت حسره
وطلعت من المطبخ رايحه لغرفة عبير اشوفهه وين
طلعت من الهول وكبل رحت لغرفه عبير فتحته رئسا لكيت ملاك واكعه بطولهه على المصلايه
والازواع واكع من حلكهه رئسا شهكت
دخلت بسرعه واني خايفه من وضيعتهه
الله يستر شنو شكاعد يصير اليوم
باوعت منا ومنا مالكيت احد لعد هاي شبيهه واكعه يربي ضربت وجهه علكيفي
ماكو ماتكعد بلعت ريكي عفتهه بمكانهه وركض طلعت من الغرفه علمود اصيح احد يجي
يشوفهه يربي خاف تموت وتصير براسي•
دخيلك ربي هسه اني اول تالي ادلي واحد
مخلص وبايع على الصلاه•
كاعده اروح لغرفة حنظل لاكتني عبير
عبير : ها ها وين ياستار
وكفت على السريع كتلهه : فدوه فدوه لحكي بسرعه هاي ملاك واكعه وماعرف شبيهه
اباوعلهه نزلت الصينيه مال الخبز بالكاع وركضت على الغرفه وهي تصيح يامحمد يامحمد
رحت وراهه وصلنه للغرفه دخلت عليهه
باوعتلي وكالت : البنيه شنو تبلع
عقجت حواجبي وصفنت عليهه شلون عرفت تبلع حبوب كتلهه : شنو شلون عرفتي
صاحت : سئلتج سؤال تبلع لو لا جاوبيني بسرعه
مياده : اي اي تبلع وكلتلي اريد حبايه لان اموت ماكدر بلياهه واني مانطيتهه لان شي غلط وحرام
باوعتلي بعصبيه رجعت باوعت عليهه وكالت : مابيهه شي بس شويه ارهاق صاير عدهه
ومره ثانيه حبابه من تصير هيج سوالف تعالي بلغيني هنا البنات كلهن مسؤليه مو هيج هيته
مياده : شمدريني اني متكليلي من عيوني اول مايصير شي بعد
رئسا اجي اكلج وافض السالفه •
وكفت اباوعلهه لكيتهه تجر حرام الصلاه وتمسح زواعهه و سحلتهه من مكانهه لمكان الدوشك
ونومته عليهه كالت : هسه شويه وتكعد وهمزين مانطيتيهه شي هسه اسويلهه زنجبيل وتصحصح
عقجت حواجبي و بلعت ريكي تقربت منهه كتله وكتلهه : انتي شنو دكتوره عبير
يعني شمدريج انتي بهاي المعلومات ,
عبير : احنه هنا يايمه عباره عن كل واحد دكتور يعالج مريض
عقجت حواجبي مافتهمت كلامهه كتلهه : شنو كل واحد دكتور يعني غير تكملين دراسه وهيج شي
ضحكت وكالت : عيني اقصد نختص بالاعشاب يعني نعالج العالم بالاعشاب
تعلمنه هذا الشغل من حجي ناصح الله ينطي الصحه والعافيه والحمدلله والشكر
هسه هماتين اكو بنيه اسمهه ايمان تضرب ابر حجي ناصح علمه والبقيات تعلمن
طب الاعشاب نسوي خبطات للعالم ونبيع ومن غير شغل الكاع والحلال
مياده: زين ليش هيج حجي ناصح مسوي بيجن شنو يعني استغلال يعني هاي الفلوس كلهه اله
كالت : لا لا عيوني بس فلوس الحلال اله اما الكاع والاعشاب لا كلما يشتغل ويبيع ويعتمد
على نفسه سواء ان جان مره او زلمه وابد حجي ناصح مستحيل يفكر بشغلة الاستغلال
رجال خير ومامعتاز وحده بينه تجيبله ربع دينار •
تقربت عليهه وكتلهه : لنفرض بقيت هنا يمجن شنو اول شي اتعلمه يعني منين ابلش
عبير : اكيد من الكاع تبدين
مياده : وليش من الكاع ؟
عبير : علمود تتقوه عضمتج وتصيرين سباعيه
وبعدهه تتعلمين اعشاب لو انتي بكيفج تردين تلزمين مكينه وتبيعين لو تردين
تلزمين الحلال لو تردين تندفين مخاد براحتج •
مياده : زين هاي وين ابيعهن لحد الان مافتهمت
عبير : عيوني زلمنه ياخذوهن للسوك من
صباحيات الله ويه طكة البريك يتحركون يبيعون على المحلات الي متفقين وياهم
واكثرهم ابو الجمله •
مياده : كل وحده بيجن معتمده على نفسهه كلش زين
عبير : اي اكيد كلش زين وخاف انتي مترغبين لشي
حجي ناصح مايقبل لان يكلي انتي لاب ولام واني عكبه ميت هاي شغلهه حطيهه بيدج
مو طول اني يمج •
علمود للمستقبل هيج يفكر الزلمه ,
مياده : الله يوفقه ويخلي خيمه على روسكم بحق الحبيب محمد
عبير : اجيب العشه واجي لو ماتردين
مياده : لا لا جيبي لان ميته جوع
راحت بسرعه عني واني توجهت لمصلاية ملاك لميهه بسرعه من الكاع ورحت على الدوشك
حطيت راسي عليه ومددت ورخيت ضهري علكيفي حسيت كل تعبي راح وخلص
حسيت بهدوء كلش حلو كلت بكلبي : يارب كون الحياة تبقى هيج ويايه واخلص من كلشي
شويه ودخلت للغرفه عبير وبيدهه صينيه : يلا تعاي تعشي ويايه
باوعت على ملاك لكيتهه ماكو نايمه كمت على حيلي وبديت اكل على السريع
لان كلش تعبانه اريد ارتاح مابيه حيل بعد
عبير: علكيفج يمعوده شبيج مستعجله
مياده : يمعوده خلي اكمل علمود انام ورايه باجر روحه لحجي
مطلك ومهره و لعبان النفس مالتهم ,
عبير : حسبي الله ونعم الوكيل عليهم شتسوين
ياحبيبتي اتحمليهم شلون ماجان الله الي يحميج ويخلصج منهم ,
بلعت اللكمه وشربت كلاص مي كامل
, كتلهه : شبعت الحمدلله الف عافيه
عبير : يمعوده هو انتي شنو اكلتي ماتكليلي
مياده : لا الحمدلله كايمه اغسل شويه لان لازم انام ارتاح ,
كمت بسرعه منهه بدون ماسمعهه شنو كالت لان بعد ماريد اسمع شي طلعت من الغرفه تمشيت
بأتجاه المغسله البره غسلت بسرعه
شلون ماجان وعيوني مغوشه ,
درت وجهي ردت ارجع لغرفة عبير سمعت واحد يبجي بس هذا البجي مال رجال مو مال مره
اتبعت الصوت وين ماهو وصلت ليجوه بالبستان لكيت حنظل كاعد على الثيل ومدنك راسه ويبجي
باوعت للسمه جريت حسره وذبيتهه بكل قوه رحت يمه علكيفي
كتله : اي احنه العراقيين شخلينه للحزن
والبجي ياحنظل
حنظل : تعبنه مياده تعبنه
مياده : اذكر ماما منى تجتمع بينه احنه بنات الميتم تكول من تشوفن رجال كاعد
وحده ويبجي معناهه لازم تعرفن ان هموم الدنيا ثكلن بي ومستعد يموت علمود يخلص من كلشي ,
حنظل : كون امج منى كدامي وابوس راسهه والله صدك يامياده تعرفين انتي كل الضرب الي اكلته
من حجي مطلك حاطه بجف وحده
بس بس يامياده امي ابويه وين وين وين•
استغربت من كلامه كتله : وين هم حاليا اهلك ؟
حنظل : لو اعرف يابه جان مابجيت جان ماكعدت هاي الكعده ليش هيج ربي اخذت مني كلشي
بس مروتك ربي امي امي مره جبيره ابويه رجال كاتله الشيب مروتك
ربي بس ذوله خليهم اليه مروتك الهي ,
حط وجهه بنص ايديه وبجه وشهك شهكه عاليه ,
حطيت ايدي على جتفه
وكتله : علكيفك حنظل اهدء الله اكيد يستجيب دعائك اهدء هسه واكيد الله وياهم هسه
حنظل : ماعتقد مياده ماعتقد امي راحت وابويه راح اني افتريت بين البيوت الواكعه والفارغه
اصيح بأساميهم ماكو اريد واحد يكلي تعال هاي امك تعال هذ ابوك بس ماكو
مياده ماكو ماهم مالكيتهم
مياده : حنظل اهدء وكافي تبجي ربك كريم
بس شنو وين راحوا يعني ضيعتهم
من ايدك لو شنو الموضوع
اباوعله وخر ايده وكال : ايام القصف الامريكي على العراق ابويه اجانه يركض حنظل
حنظل انت وامك بسرعه بويه نروح لحسينية الخالدي بسرعه يولدي صار القصف قوي
ومن المحتمل نتأذه يلا بويه ألحك،
ضليت اتلفت منا ومنا معقوله راح نموت معقوله راح نتاذه شنو كاعد يصير مياده جانت اوقات
صعبه وقويه علينه ورعب
بس هذا رعب بالواقع من اسمع صياح النسوان و صوت الاطفال شلون يبجون وشلون
يركضون متوجهين لحسينية الخالدي
اخذنه امي وطفرنه للحسينيه ادخل للحسينيه ماكو مكان الحسينيه عباره عن خنكه وناس تون
من الوجع وناس تون من الخوف وناس تصلي على النبي اريد افتهم شي مااكدر بس كل الي
اعرفه ان كل الموجودين هنا جوه رحمة الله ماعرف اي شي امي وابويه كعدوني يم رجال
جبير مشيب يون من وجع ضهره وكالو : راح نروح للبيت نجيب الاكل الي عدنه ناس هنا كومه
ضل هنا ولا تتحرك مهما يصير *
ضليت بمكاني جسمي كله يعرك ومحتر وابلل بشفايفي من الخوف لان حسيت راح يصير
شي ماعرف ماعرف مياده •
هم وطلعوا مرت دقايق قليله على طلعتهم وصار قصف كلش كلش قريب يبعد عن الحسينيه هيج
بكيلو على ماعتقد الناس الي بالحسينيه صاروا طشار كلهه كامت تصيح نص طلع ونص بقه
ماكاعد افتهم شي من اي واحد بس
صياح وبجي ونار بالشوارع مشتعله شعل
بالي يم امي وابويه وين وين ضليت اباوع منا
ومنا ماهم ماهم وينهم رحت طلعت من
الحسينيه ضليت اتمشى بالشارع ويه الناس ساعه امشي وساعه اركض واوكع
ماعرف ماعرف وين اروح بس اريد اعرف اهلي وين امي ابويه وين من كثر الدخان من كثر
الفوضى من كثر البجي والصياح
تاهت عليه كلشي كمت ماعرف طريقي منين
ضليت كاعد بالشارع لفجر الصبح بلكت تمر امي بلكت يمر ابويه ويشبكني
بلكت يمر احد يعرفني بس ماكو ماكو مياده
جر حسره وحط ايده على وجهه وكام يبجي بكل حركه
كلت بكلبي : شنو بيج بعد يادنيا ماتكليلي شنو بيج شمسويه بالعالم انتي ,
حطيت ايدي على جتفه كتله: الله كريم بلكت يطلعون عايشين
رفع راسه ضحك رغم الدموع الي تنزل على وجناته كال : بعد هاي السنين يامياده يطلعون
عايشين ماعتقد ماعتقد محد يحس اي اي محد يحس بالوجع والضيم غير راعيه يامياده
الي شافته عيوني جانت كفيله ان تحطمني وتخليني اعتقد ماتو اي ماتو
مياده :ماعرف شكول يحنظل لان تعرف بعد اني ماكدر اسوي اي شي تعبت بس لتفقد الامل
لتخاف بس شلون كملت حياتك بعدهه ؟
ضحك وكال : المرحوم
ابو كرار هو الي اتكفل بيه
الي فقد ابنه بنفس الحادثه ••
نزلت دمعتي بسرعه كاعده احاجي
رئسا سمعنه صوت رفيق باوعتله
لكيته شايل مسدس حاطه على راسه
باوعلنه وصاح : اي بحر بحر بحر دم دم اي دد دم
دم لا لازم اي اي لازم نم نموت
بحر بحر فف فله طبا طبا
كمت على حيلي وصحت
بصوت عالي : لا رفيق لا رفيق اوكف
يتبع ...
لاتنسوا التصويت والتعليق لنشر المزيد •
نلتقي في بارت جديد،
للمتابعه في الانستكرام: tahsin_luqman
خالص مودتي لكم
تحسين لقمان
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!