عزيزي القارئ فضلاً وَ ليس أمراً أضغط تصويت لنشر المزيد من أحداث الروايه،
فستان أحمر
تحسين لقمان
كمت على حيلي وصحت : لارفيق لا رفيق اوكف
حنظل : رفيق اهدء اهدء وگول يالله،
رفيق : لا لا لازم اي اي لازم نموت لان تعب تعبنه
اي اي تعبنه من الدنيا الدنيا
وما اي اي مابيها •
تقربت علكيفي بأتجاهه وكتله : اوكف باوع حاول تسمعني وتركز بكلامي تره اذا متنه
مو معناهه انُ احنه خلاص راح نرتاح بحياتنه ونخلص من كل الضيم والقهر وبعدين يارفيق
شفته رجع ليوره والمسدس حاطه على راسه صحت بي مره ثانيه : باوع باوع حاول حاول
تستمع اليه زين لازم تعرف يارفيق كل حياة بيهه متاعب ومشاغل وامور غيرهه بغيرهه
ليش هيج تفكيرك رفيق رفيق ركز ويايه حاول
حنظل : رفيق رفيق باوع مهما صار وياك لازم ماتستلم ابد حاول
حاول تتمسك بأرادتك واني الصار بيه اكثر منك•
رفيق رفيق اني خسرت امي وابويه بعمر الورد وماعرف لهذا اليوم وينهم هم شنو يسون شنو
ياكلون ميتين عايشين ماعرف
ماعرف اي شي يارفيق •
رفيق : اني اني اي اي اني خسرت امي امي اي اي امي طبا طبا
طبا فله له فله اي اي فله طا طا ,
حنظل كعد بالكاع منهار واني واكفه ومنهاره جسمي كله تعب وراسي راح ينفجر من
الضغط ماريد اخسر شي بعد , رفيق رفيق اسمعني وداعتك هسه امك وفله عايشين بالجنه
وبالنعيم لاتسوي بروحك هيج واذا جانت امك موجوده اني متأكده ماراح تقبل بلي كاعد تسوي
حاول تهدء وتترك الي بيدك ,
كاعده اتقدم عليه رئساً تحرك رفع المسدس ليفوك وكام يفتر داير مدايره ويصيح : جك جك جك
جك قطار قطار قطار روح
روح روح قطار جك جك
تقربت عليه بسرعه ولزمت السلاح من ايده وجريته عليه كتله : اي اي قطار جك جك جك
وضليت اكمز ويا علمود ينسى السلاح والسالفه كلهه
باوعت على حنظل منهار بالكاع ،رجعت باوعت على رفيق يگمز ودموعه تنزل على وجناته
أحس بطني فرغت بالكوه واكفه من الهبطه،
رحت لغرفة عبير ركض اريد اخلص من كلشي مابيه بعد لاهموم ولا اي شي ,
دخلت للغرفه لكيتهه كاعده تشيل الصينيه مال العشه باوعتلي وهي خايفه من السلاح الي بيدي
عبير : شبيج مياده خو ماكو شي يمعوده
شنو هذا السلاح ألي بيدج •
سكتت ماجاوبتهه اي شي رحت وين ماجنت كاعده بللت شفايفي وكتلهه بصوت مبوح
بالكوه طلعت مني الكلمه : فدوه فدوه عبير كلاص مي
اباوعلهه تركت الصينيه بالكاع وراحت ركض للباب جابت من وراهه دولكة مي صبتلي كلاص
وكالت : شو خلي اشوف السلاح هذا شيسوي عندج يمعوده انتي شنو من مصيبه
ماتكليلي
اخذت كلاص المي وانطيتهه السلاح رئسا
صاحت : لج يمعزايه هذا سلاح ابو سميه شيسوي عندج
لج عزه عزه بعينج بس لا داخله لغرفة ابو سميه •
شربتلي كمع من الكلاص وخرته عن حلكي وكتلهه : انطيني مجال اسولفلج جنت كاعده يم
حنظل وفجأه اجه خطيه هذا رفيق المخبل الي اجه ويانه شايل بيده السلاح
وهمزين ماضرب نفسه •
عبير : وهسه شلون يمعزايه شلون ارجع السلاح لغرفة ابو سميه انتي تدرين باجر
اذا مالكه سلاحه يلعب بينه لعب يمعوده •
مياده : اوي والله خبصتيني ابو سميه وابو سميه شسويله يعني قابل اني جايبته ولمن هو حريص
على سلعته وشغلته شكو ذابه منا ومنا
عبير : شنو ذابه منا ومنا غير هو رفيق داخل على غرفة الزلمه وماخذه من عنده
مياده : وانتي شمدريج رفيق داخل للغرفه
وماخذ السلاح جوز هو منطي السلاح •
كاعده تجاوبني جان ملاك ترفع راسهه
كالت : هاي شكو شصاير هنا ,
من شفت ملاك كعدت شويه حسيت براحه جبيره لان كلبي وكع عليهه
صاحت عبير :اسمعي ملاك مياده سولفتلي كلشي أياج وبالج ان تفكرين تعيدين الحجي سواء
على مياده او عليه وعلي وعلي الزمج واحطج بيد حجي ناصح وخلي هو يلعب بيج لعب
ملاك : انتي لا تدخلين بيني وبين مياده لعد اذا هيج انتو عيشتكم اني ماريد ابقه هنا
رجعوني لبيت سعد حبايه ماريد كلشي منكم ,
رئسا صحت بيهه : ملاك اصحي عاد شنو ترجعين لسعد حبايه انتي شلون قابله لنفسج تعيشين يم
هيج حيوان ومستفزز ومستغلج استغلال معدل اصحي اصحي ملاك الي كاعده تسوي اكبر غلط
خطيه اختج هناك تفكر شلون ترجعلكم وشلون تلم وضعكم وتخلص من حجي مطلك
انتي تسوين هيج بأختج بغيابهه •
اباوعله حطت ايدهه على وجهه وكالت : انتن تعرفن شي اسمه أدمان لو لا
اني مدمنه مو شغلة اختي ولا شغلة احد اني اني مدمنه اذا ماخذ حبايه اتخبل شسوي ماتكلولي
لعبت بيه لعب ام اموري
وخلتني ماكوم وماكعد اذا مابلع حبايه •
عبير : اني سامعه هواي ناس مدمنين على الحبوب تعالجوا وصاروا ناس طبيعين وماكو
اي شي تكدرين تتعالجن وها احنه من نصيح عليج اني ومياده مو كرهاً بيج ومو مانحبج لا
بالعكس نحبج ونريدج بس لازم تصحين
مو ترجعين لسعد حبايه
الي هو ناقص شرف وماعنده غيره •
ملاك : وليش تعتبرين الي يشتغل شغله
مو خوش انسان وطايح حظه وماعنده غيره
صحت بيهه : لج خبله غبيه كاعده
ادافعين لهيج انسان وصخ
ملاك : اني ماشفته سوه شي غلط علمود
اكعد مثلج انتي وياهه واغلط عليه ,
مياده : لج ملاك هذا راد يفجر ابويه لج ملاك يعني الله الله الوحيد يعلم ان سعد حبايه جم
عملية تفجير قبل ابويه مسوي وبمعنى اخر اوضحه الج يعني الله يعلم جم واحد مات
من وره عمليات سعد حبايه
لتصيرين انانينه وتفكرين بنفسج ,
ملاك : وانتي ليش تعتبرين هذا الشي غلط غير ذوله الناس يندكون بي طبهم مرض لجهنم يولون
لطمت على وجهي وصحت بعلو صوتي : لج يمعزايه انتي غاسلين عقلج غسل بحيث
ماكاعده تتقبلين فكرة ان ذوله ناس اكثر المجرمين
ملاك : وبعدين اذا مافجرو
منين يعيش ومنين احنه نعيش •
صاحت عبير : لج لعد احنه مو كتلنه الجوع يمه اقسم بالنبي محمد اجتي ليالي نمت ميته جوع
لعد ليش ماسويت مثل سعد حبايه
ورحت فجرت العالم •
ملاك : فاهيه انتي ماتكدرين ادبريهه ,
كمت على حيلي و تقربت يمهه لزمت ايدهه وكتلهه : مع الاسف انتي اخت ثريه والله العظيم مع الاسف لج اختج طيب واخلاق
رغم تشتغل دنبكجيه بس ما راضيه على اي شي لج ملاك اصحي ملاك اختج
بالضيم وانتي هنا تردين ترجعين •
ملاك : ماجاوبتيني منين يعيش
اذا مايفجر اكو راتب اكو صخام
او لطام كلشي ماكو ها ها منين يعيش ,
صحت بيهه : لج ماما اكعد اجدي ولا أفجر اكعد ابيع كلنيس ابيع ورد ابيع كلاصات ابيع نفاخ ابيع
ابيع ابيع اي شي بس ولا افجر شنو ذنبه ابن الخايبه يموت في سبيل اني اشبع بطني
يعني اكتل غيري علمود اعيش روحي وبعدين تعالي شنو راح يربح سعد حبايه من يفجر
وين الربح بالموضوع معقوله ربحه الارواح
الي راح تموت وتتطشر بالشوارع ,
ملاك : ربحه من المسؤل الاكبر
يورقله دولارات على كل تفجير •
مياده : ماعرف شنو أكلج الله يهيدج ويبعدج عنهم ويبعدج عنهم بحق حبيبنه محمد
وحاولي تصحين واتركي هاي سوالفهم
تره توديج لطريق مسدود ومحكم واني بلغتج ,
ملاك : المهم هسه مايهمني حجيكم
اذا متنطوني حبايه ارجع لسعد حبايه
وتخلصون مني واخلص منكم
والي يكول حلال وحرام هذا شي راجع
اله معليه اني ,
اباوع لعبير درات وجهه من عدنه وراحت شالت الصينيه من الكاع وتوجهت بناحية الباب قبل لا
تطلع دارت وجهه وكالت : حبايه ماكو
وطلعه منا ماكو
ملاك : انتي مو تحجين بالحلال والحرام
الي تسوي بيه حرام ومامقبول
عبير : صح مامقبول بس مو اكثر من ما اعمالكم القذره الي تسوهه بعموم الناس
اخر كلام عندي هذا
واذا تكولين اموت وماتحمل اي موتي عادي
موت جلاب السود •
استغربت من كلام عبير هاي شبيهه الثانيه ,
كمت من يم ملاك رجعت للدوشك مالتي
كلت بكلبي : جهنم الي تكرفكم كرف بحق النبي محمد وساعه السوده الي تعرفت والي اجيت بيهه
الكم وشافتكم عيوني كدامهه •
حطيت ضهري على الدوشك ومصرت روحي شويه حسيت عضامي اطكطكن وتكسرن كلت بصوت
مسموع : افيش افيش يابويه ربي ساعدني وخلصني من هذا التعب كله
ملاك : انتي ترتاحين وغيرج يموت
جاوبتهه رئسا : اذا يموت على الغلط
والحرام طبه مرض شسويله •
درت وجهي على حايط وغمضت عيني بلكت انام اريد انام شهور شهور طويله علمود
مارجع على هاي الدنيا كلهه •
نمت نومه عميقه ورحت لعالم معزول كلياً عن المحيط مالتي
فزيت على طكطكه قريبه عليه وعاليه رفعت راسي لكيت الغرفه ضلمه وعبير وملاك نايمات
مادري منو تشوخر بيهن لعد منو هذا الي يطكطك هيج وجماله بهيج وكت كمت على حيلي
وتوجهت بأتجاه الباب علمود اعرف منو فتحت الباب علكيفي مديت راسي شويه باوعت يمين
يسار مالكيت احد رئسا طلعت كل جسمي هم ماكو احد كلت بكلبي : اعوذ بالله من الشيطان
منو هذا لعد الجان هنا , رحت للمغسله علمود اغسل وجهي بلكت شويه اصحصح واشوف دربي
سمعت واحد يتحرك منا ومنا باوعت زين تقربت ليكدام لكيت واحد لابس دشداشه سوده عرفته
ابو سميه رئسا رحت باتجاهه جريت حسره وذبيتهه بالهوى
مياده : ابو سميه شنو مانايم
اباوعله وكف بمكانه رفع راسه بأتجاهي وباوعلي من فوك ليجوه واني واكفه كدامه
بلعت بريكي من الخوف خاف يصير شي شفت وجهه انكلب كلت بكلبي هاهيَ راح يكب عليه
كال : مره ثانيه من توكفين كدامي تلبسين عبايه وتجين مو هيج عاريه مفرعه تفرع فاهمه لو اعيد
استغربت من تصرفه شعليه هو ويتحكم بيه : عيني ابو سميه بس انت شكو
هاي العصبيه والحده تكدر تكلي بكل هدوء
صاح بصوت مسموع : واي شتردين اسويلج انگلبلج صباح فخري لو انگلبلج سيد مكاوي
شو انتي ماتعرفين تحجين ستري روحج وتعاي اوكف كدامي اني زلمه غريب عليج
مايصير هيج روحي يبت كريم •
كمل كلامه و دار وجهه على الجهه الثانيه وبده يكمل مشيه كلت بكلبي : عشتو اي والله كون انت
يم مهره اله تسويك علج بسته والله يالله ,
اني هم درت وجهي وكلت ارجع لغرفة عبير احسلي بس باوعت لباقي الغرف كتلني الفضول
انُ هسه اروح لابويه واكعد ويا مو طول هدوء وشويه اني اخذت راحه واكيد ابويه هسه مرتاح ,
رحت تمشيت بأتجاه الغرفه دكيتهه علكيفي محد فتح دكيتهه مره ثانيه ماكو صوت كلت خاف نايم
خطيه فتحته على علكيفي ودخلت ليجوه لكيت ابويه وحنظل نايمين سويه ,
وابويه متغطي بجرجف علمود ما تتلوث الجروح رحت كعدت يم راسه علكيفي مديت ايدي اليمنى
وبديت العب براسه شويه و صافنه على وجهه اتامل بي اشوف شلون التجاعيد ماكله وجهه اكل
وشلون الجروح مقتحمه وجه اقتحام قوي ,
جريت حسره وذبيتهه على راسهه ردت اكوم جان يجيني صوت من عنده : بنتي مياده مو
جاوبته واني مبتسمه : اي اي بنتك مياده
يابه ارتاح ارتاح
كريم : اريدج تسامحيني بنتي وتبريني الذمه تره اني فقير ومسكين وهاي شوفة عينج لا ايد
ولا رجل مكسر تكسر شسوي ماتكليلي ,
نزلت دمعتي على كلامه مرات الكلام مانكدر نتحمله من كثر ماهو قوي ومن كثر ماهو معبر
وبي احاسيس, جاوبته رئسا : يبويه المن اسامح ماتكلي اسامحك الك لو امي لو اسامح الدنيا
الي مشت ويايه بالمگلوب ماتكلي شسامح
تعبت تعبت يابويه ,
كريم : وداعتج بنتي كل انسان تطلعله متاعب ومادام انتي عراقيه خلاص لازم تعيشين
وتشوفين انواع العذاب كدامج •
مياده : وبويه شنو ذنبي يعني مو طول اني عراقيه لازم اعيش واتحمل شنو يطلع كدامي
هذا مو منطق يابويه
كريم : بويه مياده باجر دازج لحجي مطلك مو تكولين لو تفكرين ان ابوج مارادج وميريدج بعد
بس يبويه يبويه اختج هيماء بحاجتج تره ذوله وحوش ذوله عذاب حقيقي الله يعلم هسه اختج
شنو حالهه انتي تكدرين ترديهم اما اختج منغوليه يبويه مثل ابوج لاحول ولا قوه ,
ولا تتوقعين طول العمر راح تبقين هناك لا بويه بس تقوه عظامي راح اسوي المستحيل
والمستحيل في سبيل اطلعج انتي وهيماء مناك واني متاكد راح أكدر مو طول ربي
كتبلي اعيش مره ثانيه •
مياده : ليش انت ميت قبل علمود
تعيش مره ثانيه
جر حسره وكال : حياتي يابويه الي عشتهه يم حجي مطلك ومهره جانت كلهه
عذاب بموت ماتكليلي شنو اسوي
مياده : زين بابا اني حايره بشي واحد
امك ابوك وين
ضحك بسرعه وويا ضحكته نزلت دمعته كال : امي و ابويه يمياده ماتو ماتو وراحوا لدارهم
الثاني مابيدي بعد شي بس ها ها صح ماتو بس قصة حبهم ابد ماماتت ولا راح تموت واني متاكد
القريب من عدنه كاعد هسه يردده
للبعيد لان قصة حبهم عضيمه ,
مياده : الله يرحمهم يابه بس ماكتلي
شلون ماتو المكاريد ,
جر حسره وكال : اخ يابه اخ
عقجت حواجبي وكتله : بويه شنو الي يوجعك كول
كريم : تاهه عليه ألوجع يبنيتي وجع جسمي وجع كلبي ,
اجدادج ماتو بأنفجار حالهم حال باقي
العراقيين المكاريد الي راحوا بالانفجارات •
مياده : بويه لشوكت تضل هيج الناس تروح
ماعرف ولشوكت سلسلة الانفجارات
تضل مستمره بيناتنه هم ما أعرف •
كريم : بويه مياده اني هسه من كثر مامشتهي الموت كمت اكولن بكلبي : نياله المات من وكت ,
مياده : ليش هيج تفكر وليش هيج تكول
كريم : لان يبنتي مرات الموت يكون رحمه ونعمه على بشر اي نعمه مو شرط بويه
الموت يكون حزن ولطم وعويل وغيرهه °
مياده : والله مادري شنو اكلك
شال ايده اليمنى وحطهه على جتفي وكال : كومي بنتي كومي نامي باجر وراج روحه منا
وبيج وماصبرتي بنتي بالصبر ثقي بالله ينحل كلشي مو بالهوسه والاستعجال
مياده : بويه انت ماشايف البنات الي هناك شلون نصهن بايعات نفسهن بربع دينار ونصهن لا والله
شريفات وطيبات وانجبربن اجن لهذا الطريق
كريم : بنتي لتحاولين تقتنعيني بذني السوالف مال ان انجبرت وهيج شي تره الانسان عنده عقل
وهذا العقل هو الي يمشي الانسان من ناحية الافكار واخذ القرارات اذا هنه جانن بعازة شغل
ومالكن شغل غير بس هذا فهذني مايستحقن ان اكعد وياهن
مياده : لعد وين يولن اذا وحدتهن مريضه لو ابوهه ميت لو ابوهه عايش وطارده من البيت
وين يولن ماتكلي ,
كريم : انام بالشارع واجدي وماامد ايدي على الحرام لحد مالله يفرجهه عليه مو منطقي كلامج
ان اني اذا دارت عليه الدنيا ومالكيت شي بعد لا خلاص لازم امد ايدي للحرام ابدا ابدا
مو صحيح يابتتي •
مياده : جوز انت وحنظل تكدر لان زلم بس ذني بنات شلون يكدرن ينامن بالشارع
وانت تعرف الشارع شبي مابي
وبعدين صعبه يابويه البنيه تكون بالشارع
باوعلي صفح بالكوه وكال : يعني تنام يوميه بحضن واحد وتشربله كلاص ويسكي هذا الشي
عندج عادي ومابي اي اشكال بس نومة الشارع والشين الي بي
ب اشكال كلش جبير •
مياده : اي بي اشكال كلش جبير على الاقل هنا وحدتهن محفوظه جوه سكف صح
نفس الطينه سواء بالشارع او بالبيت
كاعده اكمل كلامي جان يقاطعني : اذا جنتي بالشارع وحافظه نفسج حفظ محد يوصلج
ومحد يتحرش بيج ومحد يتقرب عليج بس اذا جنتي انتي انسانه منحطه وعلى
الاخير فشنو تتوقعين من المار يسويلج ؟
مياده : وليش ماهذا الي يمر من عندي يتغاظى البصر ويسكت لو اله يتحرش
كريم : بنتي الشارع بي اصناف اصناف من الناس بي الواعي وبي الاديب وبي الي مستوى خريطي
وكلشي ماكو هذا كلامج يتقبله الواعي المثقف بس اذا يسمعه انسان مستواه صفر
فشنو تتوقعين راح يتقبله اكيد لا ,
مياده : ماشوف الثقافه اله دور هنا برأي
هذا الشي يعتمد على غريزة الانسان •
كريم : اها اها ومنو يكدر يسيطر على غريزته يابنتي اني ابوج واكللجياها من جنت شاب شنو
وين ماكو بنيه لابسه تنوره حصر ماتشوفين اله ابوج يركض وراهه وبس التراب يطاير وراه
ضحكت وكتله : محد يلحكك بويه
ضحك وكال : اي غير هاي الحقيقه يابنتي كل انسان بشبابه عنده سوالف ماتنحجي جنه
اني وحجي ناصح نركض وره بتول ونرد ليوره
عقجت حواجبي وكتله : ومنو هاي بتول يابه ؟
كريم: بنيه مجديه جانت يمنه بالمنطقه بس شنو بويه مياده جمالهه طيح حظ عمج حجي ناصح
جان يحبهه يموت عليهه هسه
لو انزعه تشيرته تلكين اسمهه
مدكوك على الصدر ,
مياده : والله عاد يگولون علساس بشبابك
باتمان مايلحكك •
ضحك ضحكه قويه وكال : بويه مهما صار ويصير سامحيني هاي حياتي كلهه كدامج شنو بيدي اني,
مياده : الله كريم يابه الله كريم , اترخص اني
كمت على حيلي باوعتله اخر نظره نزلت دمعتي بسرعه ماعرف شنو افسر هاي النظره وماعرف
شنو افسر هاي الدمعه , طلعت من الغرفه واني مهزوزه ماعرف وين اروح باوعت للسمه وكلت
بصوت مسموع : الهي اني جوه رحمتك ارحمني
تمشيت ليكدام لكيت ابو سميه يروح ويجي ويسوي تأشيرات مال سلاح
اي انت شراح يصير بيك بعد ياأبو سميه ماعرف ,
رحت للغرفه ودخلت جوه اللحاف ونمت نومه عميقه ماريد افكر بأي شي او اذكر اي شي ,
كعدت على صوت صياح رفعت راسي لكيت ملاك تبجي كمزت على حيلي و
كتلهه : ها ملاك شنو شبيج ولج ,
ملاك : سعد حبايه والجماعه هنا ,
عقجت حواجبي وصحت : و ياجماعه أحجي فضيني
ملاك : حجي مطلك ومهره وبعد زلم ماعرفهم ,
كمت على حيلي لكيت شال بالكاع اخذته بسرعه وطلعت , اول ماطلعت لكيتهم كدامي صاحت
مهره : اي اي عيني صلوات عيناي على نبي طلعت الجوهره يلا لج ام الجعج كدامي
حجي ناصح : بنتي مياده اذا ماتردين ترحين بس كولي والله اسويهه دم وياهم لاتسوين
شي انتي ماراغبه اله ,
كتله : لا حجي لازم اروح وابويه
وملاك امانه يمك
دخلت لغرفة عبير بسرعه بوست ملاك وكتلهه : حافظي على روحج ولاتسوين شي بنفسج
وضلي هنا احسلج تره اختج ثريه هناك متحمله كلشي في سبيل توصلج , مع السلامه يعيوني
عفتهه وطلعت بسرعه وصلت للباب الخارجيه باوعت منا ومنا مالكيت لارفيق ولا ابويه ولا
حنظل ماعرف ليش صارت غصه بكلبي طلعت من البيت ورحت بأتجاه السياره لكيت حجي مطلك
واكف يم الباب كال : ها يبت كلبي كتلج انتي الي وبس
ماصدكتي وشردتج بنصاص الليالي •
اطلعهه من عيونج كدامي يلا
بلعت ريكي وفتحت الباب لكيت مهره كاعده بالسياره وبيدهه قوطيه كاعده تشر
كالت : والله تتفنكحين تكمزين منا ومنا شلون زلم عدنه ينكرطون بس اضاهر
تحبين زلم العرب •
سكتت لان الي بيه مكفيني
كالت : بيره بيره هاج كمع اخذيلج
كتلهه : انتي من الصباحيات شلون الج هيج نفسج تشربين ,
هزت ايدهه وباوعتلي صفح اني هم ماهتميت الهه , صعد حجي مطلك وحركت السياره واني
عيني على البيت ودموعي متجمعه بطارف عيني ,
ضلت السياره تمشي بينه مسافات بعيده حطيت راسي على الجامه كلت بلكت انام
بس رئسا الطخ راسي بيهه لان وكفت السياره بسرعه ,
شلت راسي باوعت اريد اعرف شكو
لكيت حنظل واكف بنص الشارع
وموجه السلاح علينه ,
حجي مطلك صاح : لك ابن الكلب اليوم امردك مرد
اخليك ترفس جوايه
جر السلاح ونزل واني فتحت الباب بسرعه
حجي حجي أوكف
يتبع ...
لاتنسوا التصويت وَ التعليق •
للمتابعه في ألانستكرام:tahsin_luqman
خالص مودتي لكم
تحسين لقمان
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!