مساء الخير، قبل لانبدي بالبارت تعالوا نسولف شويه؟ ألتميتوا داير مدايري ؟ .. تمام . فائدة التصويت للبارت يساعد على تصعيد الرواية و ما يندفن تعب الكاتب وتتم هاي العملية بثواني من خلال نجمة بالاخير . وبنفس الوقت القارئ يطلب بارت وهو ما متعاون ويايه ..! اذا نلاحظ نسبة مشاهدات البارت اكثر من نسبة التصويت وهذا الشيئ محزن لكن لا مو مشكلة راح يكون اتفاقنا ك الاتي أنشر البارت بأي وقت من دون تحديد موعد وبدون زعل .. الى أن الكل تترك العجز وتضغط تصويت ومتضيع تعبي .. تقبلوا مودتي
فستان احمر
تحسين لقمان
غمضت عيوني وتسارعت انفاسي ..
: چا بگاع ياسين تزنون , شني عمي انت بايع ومخلص ؟
والثاني يغلط عليه : غسل اي والله , عارات الوكت
جاوبتهم وانا القلق ماخذ كل جسمي: يابَ يازني ماتشوفون سلاحنة شنو انتو عميان ؟
يجاوبني منهم : هذا الحجي انطي لعمنا ياسين
مهرة كعدت و هدت عليهم بعلو صوتها: تضربوني ولكم انا مهره !!
اجاهم رجال من بعيد يصيح : دخلوهم دخلوهم للبيت وستروا عليهم
صحت بيهم : يابَ يابيت ياطرگاعه شني اليدخل كاعكم حرام والسيف يحل عليه بالقطع ؟
ولا كأنه حجيت اي كلمة اخذونا انا ومهرة للبيت , صغير وحلو ومرتب على طريقة اهل البدو القدامى
لو وياية وتشوفين شكل مهرة شصاير بحالها يابوسة المابيها حظ وانا مغمض عيوني وعايش الدور وياها .
ما اعرف شلون راح تكونين من تعرفين وحده غيرج لمستني و وشوية وتختلط انفاسنا سوية . ..
دخل علينا رجال جبير العمر وبيدة السبحة مذهبة على اللون الاصفر .
يباوع بخزرات كأنه لازم حرامية باكو ونهبوا , هو وتقرب علينا مهرة وكفت على حيلها وانهالت
بالبجي : ترضاها يتهموني بالزنى يبن الاوادم
جاوبها: وتاليها تكضيها سكرانة دوم , يمرة وينج
جاوبته وحده من وره الباب,كلها: رحبي بمهرة ديرتنا
وفتح الباب لمهرة وراحت باوعلي وانا مامفتهم شي . اي كلمة ماحجة وياية , كمت على حيلي وكال: وين
جاوبته:زين الطابوك يحجي , سلامتك اتوكل لدربي
ياسين: من شوكت الّي يدخل بيتي يطلع من دون ضيافة , استجن يوليدي ؟
كعدت وانا اباوع علية واترقب حركاته: مشكور عمي بس وراية طريق
ياسين: وحرمتك جا تتركها وتروح ؟
عقجت حواجبي وكتله :يامرتي ؟
ياسين: تتزوج الحرمة وتروح , جا مافكرت من تنام عليها وتكسرها
صحت بي : يابَ لاخر مرة اكول احترموا نفسكم , يا نومة ياصخام
عمي سلاحنة ويانة وجايين ندرب
كال: شنهي انت ياهو
رجعت كعدت و حجيت: عمي وياك حنظل , واجينة اهنا نتدرب على السلاح لان عدنة مخطط سرقة
ياسين: انت من جماعة مهرة والبروف ؟
جاوبته : اي يابَ اي
نهض على حيلة ومد ايده اليه: عمي نطلب منك السموحة الديرة ديرتكم جا شمدرينة من ربعنا انت
حنظل : يابَ هو غير مرمرتو كلبي . بس صيح مهرة خلينا نمشي كلشي مانريد
راح صاحها واجتي مصحصة وياحلاتها ..
ياريت اعرف السبب الي يخلي عيوني تتفتح فتحة الزهرة بكل صبحية جديده
وتشوف غير جمالج وكيانج .
مهرة حليانة وكبرانة و ان تقربت منها اكيد تعذريني ؟
ماكدر اضمن نفسي كدام كل هذا , مابين صيحات كلبي ينط عقلي و يصيح لاتنسى السوته بيك
وتنطفي هاي المشاعر السريعة .
كعدت مهرة بصفي:عمي اعذرنا ولو احنا اجينا لا علم ولادزينه خبر الك
ياسين: الديرة ديرتكم : وحياكم الله بكل وكت
مهرة: اعرفك على حنظل , الولد جديد وهو المفتاح لكل بيت
ياسين: اهم شي يكون عودة قوي , وعقلة اقوى ليكون زلمة خشن
جاوبته : وليش القوة عندك رجولة ؟
ياسين: ومحلى الزلمة بقوته وعقلة.
حنظل: ويا محلاه من يكون رزن و مرتب و مثقف!
مهرة : اوي يمه عيوناتي , انسطر راسي هاي من شوكت انتو هيج , عمي عيوني اسمعني تحضر
عشرين زلمة هم يالله يدربون على السلاح وهالله هالله ماوصيك بعودهم و ترتيبهم
حط ايده على لحيته : ابشري ولا يهمج
مهرة : احنا نترخص ورانا تدريب يم كوم السيارات مالتك .
ياسين: عذرينا بوية على الصار ترة زلمنا الحراس هم جدد ومايعرفون كل بنات شغلنا
سوتله على راسها بعلامة ممتنه من كلامه , اترخصنا منا وطلعنا كتلها: الباقي عليه انا اتكفل السلاح بس نرجع افضل
جاوبتني وهي تطلع باكيت الجكاير من جيبها : من شنو خايف
جا غير اليوصلنا ازوعة حليب امه اخذ ورث
ابتسمت على جرائتهه واسلوبها , وراح بالي يسأل ليش هيج هاي البنية مامهتمة لأي شي ..
مشينا ورجعنا وين ماجنه نايمين ورجعت اعادت التأشير على السيارة ونمت بالكاع وصوبت عيوني
على التاشير . نزلت يم راسي وهمست: ركز على هدفك وبس , بداية الطلقة صعبه بس بعدين تتعود ويصير كلشي تمام
تذكر حجي مطلك وشصار بيك , اتذكر حبك اتذكر كل عزيز عليك , كل موقف سوادي
ببالك واضرب ولتخاف ولتتردد , ما اجه ببالي غير دموعج يروحي كلشي صار وياج اجه وتربع ببالي
بواهسي يميادة اصوب فتحة القناص واخذ روحي بروحي , رجف اصبعي وضغط على زناد وراحت الطلقة محمله بكل وجع كلبي عليج ..
مهرة صفكت وتفتر عليه وتصيح . زلمة ومعدل حنظل , نفضت راسي ونهضت على روحي وتركت
السلاح بمكانه وتركت مهره صافنه عليه وتوجهت للعام وانا ماعرف شنو صارلي
ميادتي معقولة هذا الحب يفقد عقل الواحد ويجردة من كلشي ؟ معقولة هذا يسمو جنون الحب ؟
تعالي انا حاير وضايع بدونج !! لزمتني مهرة من ايدي وسحبتني الها وهي تتلمس وجهي : المكان الموجو
دة بي انا فكر بيه وبس لا تخلي عقلك وفكرك يشرد منك لناس مايستاهلون
شلون افهمها هذوله الناس اليركض الهم فكري هم الهوى ! وخرت ايدها من وجهي وكتلها: خلينا نروح
مهرة: نكعد على الشط شوية نتنفس شرأيك ؟
رفضت باول مرة , صدكيني رفضت خفت اي اكعد وياها و اميل على وجناتها واروح بيها واخونج !
بس تعرفيها لمهرة واسلوبها ماكدرت ارفض مرة ثانية , لزمت ايدي ومشينا للسيارة صعدناها وراحت السيارة تفرنه على الطرق العامة
اباوعلها بكل تمعن ولكيتهه صافية وفارغة مثل كلبي من بعدج !
وصلنا الشط ونزلنا صارو على يساري عشاق الحب , اثنين حلوين واحد شابك الثاني ومتناسين هوسة
الشارع , اخذ ورده ومسحها بركبتها من علامات وجهها تسأله شنو كاعد تسوي؟
جاوبها اعطر الوردة بعطرج !
وعلى يميني واحد يوكل الثاني الكيكة لتلعب حلاوة الالسن بفم الاخر
شوكت نتوسط الشط انا وياج يعمري بوكتها التهم شفايفج من دون رحمة ..
طكت اصبع مهره يم راسي وكالت: ابو الشباب يلا نكعد على المصطبة
تدري حنظل شوكت اخر مرة اجيت لهنا ؟
جاوبتها : ماتوقعت تطلعين هيج اماكن , ولو جوز ايام شربج هنا
باوعتلي وضحكت رجعت كتلها : اي وداعت البروف يكولون تكسرين بقواطي البيره تكربعين
لحد ميكول الله بس وتذبين بالشط
كالت: والبروف شنو يسوي
حنظل: يكيت عليج
ضحكنا من كل كلبنا .
مهرة: هذا الهوى حلو تره، بس مايحس بحلاوته غير بس المتولع بالحب
حنظل: ليكون متمرغلة بالحب وسوالفه؟
مهرة : انا انسانة وحالي حالك يحنظل
حنظل: انسانه والنعم منج بس يامحلاج من تكونين طاهرة وشريفة ونقية ؟
مهرة : وكانه الشرف الرقي والنقاوة وبس ؟
حنظل: متحسين بجمال الشرف الي حافظتي عليه غير بس بليلة عرسج !
مهرة : شكد اكره الاغبياء الي يربطون الشرف بجم قطرة دم ماصخة !
حنظل: هو هذا الشي الي تتميز بي البنية الشريفه ان محافظة على كل داخلها
مهرة : ترضى والا تزعل انت غبي والي مثل تفكيرك اغبى ماشي يعيوني ؟
حنظل : شلون غبي ؟ عفت الذكاء الج
صفكت ايدها وكالت : هذا لا شرف ولا بطيخ هاي شغلة علمية يالفهيم، النفاخة دخل بيها دنبوس
تنفجر بوجهك مو صح ؟
هذا الغشاء نفس الحالة رقيق ميتحمل اي شي مجرد نغزة وينفجر ويطلع دم
ماله علاقة بشي اسمه شرف
هذا اسم زرعة بيك الي يدك وينوح ..
عقجت حواجبي على جوابها وكأنه الجواب نابع من استاذه مو عاهرة , كتلها : شنو الشرف بعينج لعد ؟
مهرة : الشرف ان تكون حر , صادق , نبيل , عندك حرية التعبير عن تصرفك ورأيك , هنا ماكو احلى
من هاي الميزات , بس مال شرف يرتبط بكم قطرة دم لا شيلها من بالك , هسة اروح وبكل سهولة
اسوي عملية جراحية ويرجع كلشي نفس ما جان سابقا , بس سؤالي الاهم يعيوني , صرت شريفه ؟
حنظل: شنو المانع ان تعبرين عن رأيج وترفضين كل انواع الاستبداد وتحافظين على غشائج الي عندج ولا فلس !
مهرة: جسمي ملكي , من حقي اسوي الّي اريده بي مو صح ؟
حنظل : اسلام احنا يا اسلام
مهرة : والاسلام مو يحترم الفرد ؟
حنظل: سكتي فدوة , انت الحجي وياج غبي
مهرة: لتناقشني بعد . لأنك متعصب و غبي اكثر من غبائي التتهمني بي
حنظل: وفوكاها انا الغبي صرت هالله !
مهرة :اسكت عيوني اسكت فهم علم انت و لتربط الشرف بهيج مفهوم معفن..
المغتصبيها هم مو شريفة؟
حنظل: حالة خاصة هاي
مهرة : عذرك انگس من الثاني
حنظل: المهم من شوكت واكعة بالحب , ولو وجهج بعيد كل البعد عن مشاعر الحب
مهرة: مادري ليش ماخذ نظرة عن التركص متحب ولاغير ولاغير
حنظل: زين التحبي , يدري بحالج ؟
مهرة : جوز هو من وصلني لهذا الحال شمدريك ؟
حنظل: ما اعتقد اليحب من صدك يتمنى الشينه للمحبوب
مهرة: جنت حالي حال اي بنية تكشخ كل جمعة وتنزل للسوك ومن نزلتي للسوك بدت قصتي ويا
شاب حلو ومرتب ومناقصة شي
حنظل: وفجأة يروح هلصبغ كله ويطلع لونة الحقيقي؟
مهرة: كلكم هيج بما فيهم انت , مو صح ؟
حنظل: انا ماخنت ولاتركت المهم كملي
مهرة: انت مو بس خاين لا انت متمرغل بيها
حجيك وياية ولا لا الاهم تركك لميادة اقذر من الخيانة لتحاول تطلع نفسك كدامي نبي مفهوم ؟
حنظل: كملي شنو صار وياج بعدها ؟
مهرة: الصار ضحك عليه وانا فريتها عليه
ضحكت وكتلها : شلون يعني ؟
جاوبتني : لازم تتعلم الحب نفس الاحتلال , اكو عقول تجبرك تقتنع بمشاعرهم وتزرع مخيله الهم
بعقلك فهذا يسمو احتلال , وبعدها طق طاق متحس الا نهبوك وراحو , الكدامك يحنظل بنت خير
الاب والام واصلين وفلوسهم داير مدايرهم , وهذا ماشبعان وخوفك من الي ماشبعان ياكل الاخضر واليابس
راد يلتف عليه ويقنعني ويوهمني بحبه بس ياويله ماكدرلي
حنظل: بس هو وصلج لشدة الشال والى اخره ؟
مهرة: مانكر هو وصلني لهذا الحال , جان صديق اسمه رافع عرفني عليه ومناك اقترح عليه عزيمة
وانا بوكتها متحرره ماعندي تعاي ووين رايحة ومدري شنو و عيني من اروح
على گولت اهلنا هي الروحة روحة ومامنها جيه بعد .
وفعلا مارجعت لاهلي الا بعد اربع سنوات .. اغتصبت وانهانيت وتعذبت وطلعت روحي وتوسلت وبجيت وشفت الماشافته عيونك يحنظل
حنظل: وضحي اكثر , ليش لهاي الدرجة حاقدة وشنو هو بالضبط سواه الج من رحتي لصديق حبيبج
دنكت راسها وكالت: الاثنين اجتمعوا عليه..
واغتصبوني بلاية رحمة ولا ندم ولا اي شي , عود حالهم مثل حال اليخطفون ؟ يطلبون فديه من اهلي لا لا متوهم
مشروعهم جان اكبر وهواي اكبر من انت ماممتخيل ! لعبوها صح وياية تقيدت يمهم وضليت اكوم واكعد ادخن حشيشة وابلع بالحبوب
لحد ماوصلت مرحلة ارجف واتوسل بأي واحد في سبيل ينطيني حباية ويشفق عليه وبعد ماكملوا
مخططهم ببالي صرت افتر على الملاهي اركص واهز الخصر والصدر وازق بحلوكهم فلوس اشكال والوان
جوز تكلي ليش ماشردتي ؟ كتلك صرت مثل العمية اذا ما اخذ حباية ماكدر اتخبل للاخير
و العرض مالتهم اركص واكمل انطيهم حصتهم من الفلوس وينطوني حصتي من المخدرات والحشيشة
وحتى ان جنت صاحية فتره وتروح مفعولها لهاي الحباية ف بوكتها محد راح ينطيني مرة ثانية .
ومحد انتشلني من حالتي هاي غير الصابونجي عيسى , اخذني من ملهى روانق وعرض عليه شغل ببيته وفهمته ان انا مدمنة
كعد يراعيني وحجاية الحق تنكال هو عالجني وخلاني اتفتح واصحصح اكثر
بس شسوي تعودت ومو بيدي يحنظل تعودت..
استخدمني الصابونجي خدامه لبيته وونسته ونباعيت بثمن لناس كبار ماريد اذكرهم
ومناك تعرفت على مطلك , جان طالب جديد عند اهل الخبرة وشوية شوية نفض ريشه وصار يحجي
ويتامر بس هو كلش غبي , اما انا ماعرف شنو نهايتي راح اهتدي راح استمر على هلطريق ماعرف اي شي يحنظل
كل الرجال حاقدة عليهم والعنهم كل مسى وصبح لان يستاهلون كلش وصخين وقذرين متتخيل شكد !
افكارهم ووجوهم وكلامهم وتناقضهم وصخ وصخ
ابسط مثال الرجل يعبر عن ضوجته بعصبية بلغة الحيوان من دون تفاهم لان يكره التفاهم
يعبر عن رأيه ومبدأه بوحشية ومن يعارضه احد يسحق عليه بقندرته في سبيل يكون هو وبس .
الرجل انسان وحشي ومتسلط وغير سموح وغير طيب انسان مزدوج وكوكتيل مخادع من كل عبارات الحيونة , ميستحق الرحمة ابدا
وغير تحرشهم ونظراتهم لكل البنات
ضحكت وكتلها: وكأنه انتِ الملائكة ؟ اذا الرجل يتحرش ويغتصب فالسبب الرئيسي انتي وغيرج
مهرة : تايبه ماحجي , وليش السبب مني ومن غيري لان حافة حواجبي ؟ لان لابسة ضيك وقصير
لان اطك علج بنص الشارع ؟لان صوتي عالي , هذا الشي يدفعك للتحرش بيه او تتلون بعدة اوجه علمود تثبت روحك وبس !!
لا لا يحنظل كول انا وحشي كول انا شهواني انا متمرد انا حاقد كل عنك كل الصفات الحيوانية مفهوم ؟
احنا مابينا اي سبب السبب تدري وين ؟ السبب بوعيك وحجم عقلك السبب بلي صفكلك وكلك اذا تحرشة وذبيتلك كلمة لبنيه
معناها صرت سباع وبطل وزلمة ومحد يلحكك متدري انت دتنزل من قيمة رجولتك
طبعا اذا انت عندك ذرة رجولة
عندك تكتل وتذبح وتصلخ بأسم رجولتك لا لا كلش متوهم انت فقط متاثر بأبوك او اي شخصية همجية مرت كدامك وبس !
باوعلتها و سكتت , بلعت ريكها وتحركت تفاحتها وخرت شعرها ليورة كتلها: اهدي اهدي مهما كلتي راح اتقبلج لان ناتج عن ضغوطات نفسية
صاحت بيه فجأة : هو عندكم البنية الي تكول حجاية الحق عندها ضغوط نفسية ومتفتهم ومريضة يا اغبياء يا حقراء
حنظل: لعد من تعالجتي وكملتي وصحيتي ليش مارجعتي لأهلج , لتكليلي تعودت تره فراك الام مو هين يمهرة ؟
معقولة حباية وغيرها وغيرها اثرت بيج ؟
مهرة : كان بامكاني ارجع لاهلي , بس ياحسافة الوكت الاغبر الي خله الاهل يتمادون على ابنائهم
لدرجة القتل والتعذيب , واول ما ارجع راح انكتل تحت مسمى طمة العار وين جنتي ووين رحتي
وانا منا متغصبيني تريدني ارجع ؟ ثق يحنظل لو كل اب وام ينطي حضن الامان لابنائهم جان محد انحرف
ابد , بس شنسوي واقعنة ايدهم والسلاح او السجينة او السجن بالغرف وكانه مرتكبين جرائم , من دون تفاهم ابدا
حنظل: مثلا ابني اجاني سكران تالي الليل شترديني اصفكله تره حقهم اهالينه يعصبون ويكتلون علمود يأدبون لاغير
ضحكت ضحكة عالية وكالت: وليش تحصر التربية بجانب الكتل والتعذيب ؟
شنو فرقك عن اليغصتب بنية؟
التربية يحنظل تحضن ابنك وتحاجي بابا اليصير وياك تجي تبلغني, بابا هذا الشي صح وهذا غلط
وتنطي اسباب مقنعة موجودة بواقعنة علمود يفكر وينتج من عقله التفكير الصحيح وبس
وها ان استخدمت الدين وسويتله الله يعذبك ويقتلك ويحركك نفس ماسوو اهلي وياية ثق بوكتها الذنب كله يصير عليك
لان بسببك ابنك اخذ فكرة عن الله هو معذب البشرية والى اخره وهو على العكس ارحم الراحمين
ولا راح تصير الطامه الكبرى ان ابنك راح يمشي عدل ويسوي الصح خوفا من الله مو حبا بفعل الصحيح .
عندك والدي من انا وصغيرة زرع بيه فكرة الصلاة لازم اصلي بس وان ماصليت العذاب والنار تنتظرني
وصرت اصلي خوفا من النار مو حبا بيها وانا اصلا ماعرف عنها شي .
تضرب ابنك تحصل مقابيلة الانكس منه واكثر من السابق
صفنت عليها , تنفست سريع وباوعت للشط كتلها: اذا اهلج واصلين ليش هيج ميتقبلوج اذا رجعتي ؟
مهرة : مو كل واصل وموظف هو واعي ومثقف ويتقبل كلشي!
ردت احجي بس دك تلفونها , جاوبت وماسمعت منها غير بس , بالطريق راح نوصل .
مهرة : كوم عيني كوم ورانه شغل وردح ودبج .
حنظل : خير شكو الله يستر من الدبج مالتج
كامت على حيلها وراحت بأتجاه السيارة , نهضت من مكاني عدلت عقجات البنطرون ومشيت وراها .
صعدنا السيارة وكالت:اليوم راح نطلع المغرب ونبات بالبيت الاول
جاوبتها: جاهز ومعندي شي , بس خلينا نكمل
تدرين ميادة ليش ردت نكمل بسرعة , لان شوگي الج راح يفضحني كدام الخلگ كله
معقولة هاي الايام البسيطة الي جمعتني بيج خلتني ماشوف اي شي غير بس كلبج الطيب وابتسامتج السحرتني سحر ..
وصلنا للبيت وتلگانا البروف : مسيو حنظلو مهرة اهلا
ابتسمت على طريقة كلامه: بيك اكثر بروف
مهرة: بروف عيوني من فدوة اروح للبروف مالتك اليوم تطلع ويانا لو تبقى هنا
جاوبها وهو يأشر براسه يمنى ويسرى : انا ماكدر اروح
خليني هنا وانتو روحوا وراية مشاغل
مهرة: حنظل , بروف , كاظم كاظم وينك
اجه ولد اول مره اشوفه كلها : ها مهورتي
كالت: المخطط كامل جوه ؟ نسوي مراجعة اله سريعة ونتوكل يلا
وفعلا دخلنا ليجوه للغرفة وكعد كل واحد من عدنه على كرسيه حنحن البروف وكال: نبدا جلستنا حبايب قلبي باسم الاب الروحالقدس
تفاجات من عنده مسيحي! لتجاوبة مهرة: خططنا وتعبنا وهاي نهايتنا ناخذ المقسوم وكلما طريقة
جاوبهم كاظم: و بعدها ان صح اللقاء نلتقي بالخارج يم اميرة ونلتم .
صفنت عليهم شلون يتوادعون ويتهامسون بيناتهم شمحلاهم بس ياقذارة ثوبهم بوك وتجارة والى اخره
كالت مهرة: حنظل صح شفت المر من عدنه بس ثق سوي اخر خطوات ويانه وبعدها لاتشوفنا ولا نشوفك
هزيت راسي بمعنى اي , اتجنب الكلام وياهم ماريد اكشف شي ..
بدو يعيدون الخطة وماكو اي تغيير عليها مجرد يزيدون عدد الزلم ويحاوطون المنطقة بكل معارفهم لتتم العملية بنجاح
بين كل سالفة وسالفتين مهرة عينها علية متدري ماتكدر تاخذني منج بس اخ مياده الشيطان شاطر
مااعرف اخاف اوكع وياها وماتغفريلي ابد , كملنا كل حجينا وكمنا على حيلنا اتفقنا نجتمع عند
الباب الرئيسي ساعة خمسة وبعدها الكل راح لمكانه , ومالكيت مكان يحتويني غير غرفتي
صعدت الها ونمت على بطني وخليت راسي بنص المخده وصحت بعلو صوتي اخ يابوية ياااايمه ..
نمت شوية وفزيت على دكة الباب كمت وفتحته طلعت مهرة : صح النوم افندي , يلا بدل وتفضل السلاح
باوعت لايدها تلمع لمع وضوه العصر يضرب على ايدها الانثويه اخذت السلاح منها وانا اتفحصه من كل جانب
وهاي انا بدونج شلت قناص والله يستر بعد . كالت: شني ماتكلي دخلي جوه , وغمزتلي
ضحكت وزلك الساني يمياده وكتلها تفضلي ..
واول مادخلت غلقت الباب وسحبتني وراهه, بللت شفايفها ورفعت صدرها تقربت عليه بسرعه وعصرته يم حنجي
غمزتلي وهي تبتسم وانا ماعرف شنو اسوي صافن وبس باوعتلها زين قربت حلكها على ركبتي
وطبعت بوسة عليها ,كاعده تكلي انا ملكك وروحك تعال واخذني الك وبس ,
دفعتها وابتعدت عنها طردتها من الغرفة بالمدافع وهي تضحك ولايهمه, قفلت الباب وراها ووكعت وره الباب .
راسي بين رجليه وانا افكر شلون راح تعذريني وتسامحيني !! كمت على حيلي رحت للمراية
وبالكلنيس مسحت كل اثار بوساتها
ركبتي وخدي ملكج وبس ماكو اي شبر لغيرج يروحي .
رشيت عطر وبدلت ملابسي و السلاح بين ايديه ونزلت جوه وانا اباوع بالوجوه البروف بيده البيره
ويكول:حنظل ماوصيك مو تتهور وتطبك مهرة وام البيت هناك
ضحكنا كلنا و جاوبته: لا بروف اطمئن ذوقي ارقى
طك اصبع: شوف الادبسزز, الضاهر ذوقه تفاحي
طلعت بره لان ماكدر اتحمل قذارتهم ابدا
تقرب عليه رجال جبير بيده صوندة الحديقة كال: الخانم تكول ركز بشغلك
جفلتني مهرة من وره وكالت : يلا نروح
طلعنا بحدود اربع سيارات وكلنا تفرقنا بين الافرع نزلنا انا ومهره , بيدها اسلاحين الها والي تحت ملابسها
ومابيدي غير بس عبوة سم للحشرات الصغيرة , تمشينا من جهة اول بيت باوعتلي مهره بنظره معناها
مستعد اشرتلهه اي , دكت الباب انتظرنا شوية وحجه الجهاز المعلك على الباب: منو ؟
جاوبتها مهره: من مركز البيئة تعقيم المنزل من الحشرات الصغيرة اذا ممكن تتعاونون ويانه
باوعت ليفوك البيت فخم وعال العال والكاميرات تحاوطه من كل جهه
شوية ونفتحت الباب كالت البنية: تفضلي خالة
كتلها: لو سمحتي طريق علمود ندخل
جاوبتني: عمو ماكو احد بالبيت بس انا واختي ماكدر
مهره جاوبتها: اي عيوني وذا هو نكمل شغلنا ونطلع
اباوع للبنية ترددت دارت وجهه ليورة وماحس الا مهره دخلت ودارتها عليه وايدهه على حلكهه
ذبيت الترمز وطلعت السلاح من جوه عباية مهرة
وهمست بأذنها: حرف واحد ترحين يم ربج ..
سديت الباب بسرعة , طلعت اسلاحي وانا الفظ انفاسي بسرعه اراقب منا ومنا جان البيت هدوء واي بشر ماكو
دخلنا للبيت والبنية ترافس بين ايد مهره
شمرتها عليه
وصاحت: ياعالم يا ام محمد لحكيني
لازمهه وايدي ترجف تقربت عليه مهرة وبحافة المسدس وعلى راسها من وره
ذبت روحها عليه و اندك الجرس . انفتحت باب من الغرف . رجعت مهره عليه وانا صرت وراها رفعت سلاحها بأتجاه باب الغرفه
والجرس يدك بكل قوة
طلعت بنية من الغرفة , دنكت راسي على البنية اوخرها مني علمود اساعد مهره
مهرة بصوت مصدوم كله قلق: سجى !
وكعت البنية من ايدي رفعت راسي واشوف سجى كدامي !
يتبع ....
_______________
للمتابعة في الانستكرام: tahsin_luqman
ولمتابعة بيج الرواية على فيس بوك الرابط في بايو صفحة الواتباد
ألتقيكم بألف خير في بارت جديد .
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!