الفصل 23

انا البنت اللي بتدور عليها ... انا السبب في موت ابنك حكيم واديني قدامك تقدر تاخد تارك مني براحتك عزيز اتنفض السلاح في ايده وقال بذهول... لا..لا انتي كدابه ... اكيد اكيد هو قايلك ان ابني٠٠ اسمه حكيم وان الخدامه قتلته... اكيد حاكيلك وبتلعبي عليا روعه ابتسمت بسخريه وقالت .... من اربع سنين دخلت بيتك بنت غلبانه اسمها روعه كانت طالبه شغل وابنك رامي حاول يتحرش بيها...

ويومها ابنك حكيم انقذها منه وشغلها في البيت خدامه رغم ان رامي حاول كتير يطردها.... والبنت دي طلعت تبع الشرطه وبلغت عن بضاعتك اللي كانت ب نص مليار جنيه وقتها .... بس البضاعه كانت باسم حكيم لانه شغال معاك.... ولما الشرطه جات وكانت معاهم روعه وفهمتو انها هيه اللي بلغت رجالتك حاولوا يقتلوها ويومها حكيم انقذها للمره التانيه ووقف قدامها وفداها بنفسه ومات .... ورجالتك خافو منك و قالولك انها هيه اللي قتلته....

يومها البنت اختفت في الدوشه ومظهرتش تاني .... ياترى بقى يا عزيز بيه مختار يعرف كل التفاصيل دي اصلا علشان يحكيلي عنها عزيز ورامي بقم يبصو لبعض بصدمه لان التفاصيل اللي حصلت في البيت مختار ميعرفش عنها حاجه اما مختار كان متجمد مكانه زي لوح الخشب بيبصلها بصدمه متتوصفش ودماغه هتتشل حرفيا عزيز نطق وقال بصدمه.... ازاي... ازاي انا فاكر شكل البنت كويس.... مش شبهك ابدا روعه ابتسمت وقالت بقوه .... ازاي دي حاجه ملكش فيها ....

المهم اني انا البنت اللي بتدور عليها واديني قدامك ... بس خليك فاكر كويس ان مفيش قدامك وقت علشان تفكر اذا كلامي صح او غلط عزيز قال بتوتر من كلامها... قصدك ايه... ها... قصدك ايه .... يعني ايه مقداميش وقت وبص لمختار وقال بغضب.... انتو... انتو ناوين على ايه بتخططو لايه مختار كان ساكت وفي دنيا تاني دماغه مش قادره تستوعب اللي بيحصل روعه ردت بسخريه وقالت... قصدي ان الوقت ممكن يسرق اي حد يا عزيز بيه ....

لازم تفهم انك ملقتنيش ... انا اللي ظهرت من تاني عشانك وعامله حسابي اني هقابلك .... ولسه فيه بنا مقابلات كتييير لحد ما احط الحديد في اديك بنفسي او انت تسبقني وتحطني في قبري مختار كان مصدوم من القوه اللي بتتكلم بيها وكأنه ميعرفهاش مستحيل تكون دي البنت اللي كانت معاه طول الفتره اللي فاتت ... مستحيل تكون البنت البريئه اللي كانت تخاف من خيالها عزيز رفع سلاحه في وشها وقال.... انتي هتموتي متستعجليش...

بس مستحيل اقتلك غير لما اعرف انتي ازاي نفس البنت... انا.... انا تقريبا فهمت.... انتي مش روعه... انتي تعرفيها.... وهيه حكتلك كل حاجه ... روعه ضحكت بسخريه وقالت ... انا وروعه نفس الشخص... بس انا عذراك عارفه ان دي حاجه عقلك البسيط ميستوعبهاش ... بس دي الحقيقه رامي افتكر حاجه و قال بسرعه..... بابا انا... انا افتكرت البت اللي اسمها روعه عندها وحمه كبيره تشبه المنجا في ضهرها...

انا فاكرها كويس لما قطعتلها الفستان قبل كده شوفتها روعه بصتله بقرف وقالت... ومبسوط من نفسك وبتتباها هنا مختار بصلها بصدمه اكبر وجيه في باله وقت ما فتح عليها الحمام بالغلط..متاكد انه شاف نفس الوحمه اللي رامي بيقول عليها رامي قرب من روعه بغضب وقال..انا هكشف كدبك حالا وبقى يحاول يقطع فستانها من ورا وهيه بتشتمه وبتزعقله وبتقول... شيل ايدك يا حيوان ابعد بقولك هنا مختار زعق فيه وقال... سيبها واخد نفس وقال ....

هيه بتضحك عليكم انا شوفت ضهرها قبل كده.... مفيش الوحمه دي... هيه بتقول كده علشان تطلعني من هنا مش اكتر بقلم.... زهرة الربيع روعه قالت بذهول... مختار انت بتقول ايه... متوديش نفسك في داهيه... محدش يصدقه هو اللي عايز ينقذني بس رامي بصلهم بغضب وقال... احنا ولا هنصدقك ولا هنصدقه ... احنا هنشوف بعنينا ورجع تاني يشق فستانها بس فجأه سمعوا صوت ضرب نار شديد من بره

عزيز اتصدم وطلع جري من المخزن على القصر واتفاجأه برجاله كتير مسلحين وتبادل ضرب نار بينهم وبين رجالته وقزاز القصر كله بيقع على الارض رامي اتخض جدا وطلع سلاحه وهو بيقول... ايه ده... مين دول يا بابا عزيز مردش عليه ووقتها بس اتاكد ان فعلا اللي جوه دي روعه ولسه هيرجع ياخدها قبل ما يهربوها اتفاجأ بواحد ملثم جيه من وراه و حط السلاح في ضهره وقال بزعيق ..... نزلو سلاحكم كلكم عزيز اتصدم وشاور لرجالته ينزلو سلاحهم....

وكلهم نزلو ورامي كمان الراجل فضل مثبت عزيز بالسلاح وشاور بدماغه لواحد دخل المخزن وبقى يفك روعه تحت نظرات الزهول من مختار اللي كان هيتجنن من اللي بيحصل اول ما فكوها الشاب شدها من ايدها علشان يخرجو بس هيه وقفته و قالت بسرعه.... لا استنا يا ماهر.... لازم اخد مختار معايا ماهر قال بذهول ... يا فندم بس عمك قال..... بس روعه جريت على مختار وبقت تفكه وهيه بتقول لماهر ايدك معايا ..... مش هخرج من غيره لو هموت هنا

ماهر اتنهد بيأس وبقى يفك معاها واول ما فكوه مسكت ايده وقالت بسرعه واستعجال ..... يلا يا مختار مفيش وقت مختار دفع ايدها بذهول وقال ... انتي مين روعه اتنهدت بحزن من نظراته وقالت..... مش وقته علشان خاطري مختار ابتسم بسخريه وعيونه بيلمعه بالدموع وقال.. انا معرفكش علشان يبقالك خاطر عندي ولسه هيخرج لوحده روعه شاورت للشاب اللي معاها بعينها طلع جهاز صاعق من جيبه وضربه بيه في رقبته مختار اتنفض مكانه ووقع فورا على الارض

وروعه نادت لواحد تاني من الرجاله سندوه مع بعض وطلعوه من باب الجنينه وهيه معاه وكانت فيه عربيه مستنياهم بره ركبوا فيها والسواق طلع بسرعة البرق وباقي الرجاله انسحبوا من البيت بهدوء ومعاهم عزيز تحت انظار رجالته اللي كانو واقفين بعجز لانهم اخدوه معاهم واول ما كل الرجاله ركبو العربيه دفعو عزيز منها وووقع على الارض وهما كملو بالعربيه موقفوش لحظه وكانت طلقات رجالة عزيز وراهم لحد ما اختفوا

عند حمزه كان في المطبخ بينضف اطباق الفطار ويرتب المكان لانه بيعشق النظام ومبيحبش يسيب حاجه وراه نسيم راحت وراه ومعاها طبقها وقالت.... احم..... عنك انا هكمل وبقت تشتغل في المطبخ وهيه بتفكر في حاجه تانيه خالص حمزه ابتسم وهو شايفها رايحه جايه قدامه وقال .... تعرفي اني ياما حلمت باللي احنا فيه ده .... يعني مش بنفس الشكل بس قريب منه.... ياما كنت افكر في شكل حياتنا لما يجمعنا بيت على قدنا ولوحدنا .... ونعمل كل حاجه مع بعض

نسيم اتنهدت وقالت بحزن..مش لوحدك ... دي كانت نفس احلامي... بس الحياه علمتني ان مش كل اللي بنحلم بيه بناخده ... فيه فرق بين الحلم والواقع حمزه قرب منها وقال.... بس انا كان عندي احلام كتير وخليتها واقع ..وان شاء الله هكمل احلامي بيكي واخليكي اجمل واقع قدام عيوني نسيم اتوترت من قربه وكلامه وكانت هتتهرب منه زي العاده بس شافت سلسلة المفاتيح في جيبه نازل طرفها من الجيب ابتسمت بتوتر وقربت منه اكتر وقالت..... ولو مقدرتش

حمزه قال بلهفه وسعاده من تجاوبها معاه... هقدر وهتشوفي انتي بس خليكي واثقه فيا .... انا مش هسيبك ابدا يا نسيم نسيم ابتسمت ابتسامه جميله سحرته ولمست القميص بتاعه بتوتر وقالت برقه تقتل.... الزرار ... اتقطع حمزه بلع ريقه بارتباك من قربها المهلك ونسي الدنيا كلها ومسك ايدها وسند جبينه على جبينها وقال ..تحبي تخيطيه نسيم قربت اكتر وهزت راسها بالموافقه وهيه بتبص في عيونه بطريقه دوبته

ومدت ايدها في نفس الوقت في جيبه وسحبت سلسلة المفاتيح حمزه كان ناسي نفسه وهيقرب اكتر بس بعدت فجأه وقالت بتوتر..... الخيط حمزه قال باستغراب..ايه بعدت عنه اكتر وقالت بضحك... عايزه خيط يا دكتور .... هخيطلك الزرار..... فيه دكتور وجراح وميعرفش الخيط حمزه فاق لنفسه وكأنه صحي من حلم جميل قال بتنهيده جامده..اه... اه الخيط نسيت..احم..حالا هشوف لو فيه خيط هنا وراح على الاوضه وهو مش مصدق الثواني اللي عده عليه في قربها

نسيم اخدت نفسها بقوه وبصت للمفاتيح في ايدها براحه وجريت على الباب بسرعه... رغم انها كانت حزينه جدا لانها هتسيبه وتكسر بخاطره بس مش شايفه قدامها حل تاني في اوضه صغيره على سطح عماره عاليه.... كانت قاعده ست كبيره في السن وجمبها شاب حوالي ١٥ سنه بيذاكر بهدوء وفجأه الباب بقى يخبط جامد الست اتخضت وقالت...... بسم الله الرحمن الرحيم..... مين اللي بيخبط كده روح افتح يا على الولد راح يفتح واتفاجاه بجمال في وشه قال بخنقه ...

يا فتاح يا عليم يا رزاق يا كريم ... كان نفسي اسالك خير.... بس وشك مبيجيش منه خير جمال دفعه بغضب وقال... غور يلا من وشي مش نقصاك وقرب من الست وقال بغضب ..... بنتك فين يا وليه ... جات هنا الست خافت وقالت برعب... بنتي... هيه نسيم مش معاك ..هو فيه ايه يا جمال يا ابني جمال قال بغضب شديد..بنتك الفاجره هربت مع عشيقها... تربيتك الوسخه بانت عليها الشاب علي قال بغضب وانفعال..... اخرس ... انا اختي وامي اشرف منك ومن عيلتك كلها

جمال بصله بغل و ضربه برجله في بطنه بقوه.... الولد لبس في الحيط وبقه نزل دم من شدة الضربه بقلم.... زهرة الربيع ام نسيم جريت عليه بصدمه وصراخ وهيه بتقول..... يا مصيبتي علي علي قوم يا ضنايا..... يا لهوي ... يالهوي.... منك لله يا مفتري ...... منك لله .... الاهي يبتلك في شدتك اللي بتفتري بيها على الخلق وبقت تبكي بقوه وقهر جمال مسكها من فكها وقال بغضب... لمي لسانك يا وليه .... انا مش جاي ارغي معاكي....

ولا حتى ههد واحذر ..... بس قسما بالله لو عرفت ان بنتك الواطيه جات عندك ولا كلمتك ومقولتليش لاطربق الدنيا على نافوخك ونافوخها وارجعهالك على نقاله سامعه ولا لا الست هزت راسها بالموافقه بضعف ودموع وجمال دفعها وقال بزعيق.... هجبها لو تحت الارض وهندمها..... لو كلمتك وصليلها الرساله دي هيه وعشيقها السافل ... وديني ما هحلهم قال كده ومشي بمنتهى الغضب وام نسيم حضنت ابنها اللي كان بيكح وبيتالم وبقت تبكي بخوف وقالت بدموع ....

يا مصيبتك يا كريمه..... انتي فين يا نسيم .... روحتي فين يا بنتي عند مختار فاق من اثر الصاعق واتفاجا بانه في بيت غريب جدا مشافهوش قبل كده وقف وهو حاسس بتعب ودوخه وافتكر كل اللي حصل معاه عند عزيز وكان هيتجنن وبيقول بصدمه..اكيد حلم اكيد... مستحيل يكون حقيقه وفتح باب الاوضه وهيطلع لقى روعه قاعده على الكرسي ومنزله راسها بحرج وواقف قصادها راجل في الخمسين.... نفس الراجل اللي كان مع اخوها فايز

وبيزعق ويقول بغضب..اقدر افهم الشحط اللي جوه ده هنعمل بيه ايه... جبتيه معاكي ليه... ده مجرم زيه زيهم جيباه ليه .... مش كفايه انك عرفتيهم شخصيتك الحقيقيه وحطتينا كلنا في خطر علشانه روعه قالت بسرعه وتوتر... يا عمي مختار مش زيهم ده..... عمها قال بزعيق ... انا مش عمك .... احنا في مهمه وانا هنا حضرة اللواء عدلي الجندي ... وانتي الرائد روعه الجندي وتتعاملي على الاساس ده وبس مختار اتسعت عنيه بصدمه وقال... رائد....

وطلع من الاوضه وهو بيزعق وبيقول... رائد ..... مين دي اللي رائد... السحليه العيانه دي رائد .... هو انا الخبطه اثرت عليا ولا حد مشربني حاجه ... ولا فيه ايه !!!!