رواية في احضان الذئاب الفصل العشرون 20 - بقلم الكاتبة قمر الجنابي

البارت الثامن عشر🎉❤

بقلمي الكاتبة قمر💁‍♀️🌸

لاتنسون التصويت بالضغط على النجمه 🌟💕

تنويه!!!

حبايب فضلا وليس امرا المامتابعني خلي يتابعني حتى تكبر عائلتنه 🥰💕

طيـور الخيـــر هجن عافن البيت
وغراب الفكـــر بمچانهن صـــاح

حور♧♧

ضل يبوس بيه مبين مو طبيعي وبي ريحة غريبة كمت اصرخ بعلوا صوتي بس شنو الفائدة منو يسمعني هيه بس امي ومتسمع وحتلو جانت تسمع ما ضن كلبها يحن عليه

ضليت ادفع وضرب بي بس شنو الفائدة حالي حال الفريسة بأحضان ذئب ما عنده رحمة

كمت اصيح يالله ساعدني شيريد يسوي بيه هذه طفله او ع كد عقلي وكلشي ما افهم

رب العالمين ميترك عبد حاشه الي صار بوقتها اعتبره معجزة اجتي امي جرتي من قميصه حتى انشك بيدها وهوه يطوطح ويصيح ....عوووفيني ولج كح*** خلي اخذ راحتي مليت منج انتي عجوووز

كامت اجر بي رجع عليها دفعها بالكاع ونام عليها ضربها راشدي وكعد يخنك بيها

كمت ابجي ورجعت اجرجر بي عسه ولعل يزحزح بس هو ضخم جنه ثور واحنى نسوان وين نكدرله عاد بالكوه هد امي من شافها صارت زركه واجه عليه وكال....ولجن كح**ب اصبرلي الا اكرهجن عيشجن انيييي لؤؤؤي هيج اسون بيه

كمل جملته وما احس غير اتكوم بالكاع

باوعت امي شايله مزهريه ضربته بيها ع راسه صاحت بيه حتى اساعدها جرينا وذبينا بشارع وسدينا الباب

ما احجيلكم حالنه بهذيج الليله ثنينه نرجف لا يموت ونبتلي بي بعدين كلت الامي ....خلي نطببه جوه ونقفل عليه الباب اذا مات احنى نروح بيها

ردت عليه بعصبيه....سكتي العار ميموت

كتلها بعصبيه وحركة كلب....لا وفوكاها معاجبج هو منو الدخله البيتنه غيرج وفوكاها يطب الغرفتي بنص الليل ومدري شيريد يسوي بيه اذا واحد ميأمن بيته لعد وين ووووين يرتاح

ام حور....اسكتتتين لا ادزج وراه

حور....اكلج انتي شلون سمعتيني وجيتي

ام حور....ما ادري شلون سمعت صوتج اول مره بحياتي يصير وياي هيج

حور...وهسه اسمعيني

باوعتلي صفح وغمتني وراحت الغرفتها

واني هم كمت رجعت الغرفتي وما كدرت انام من الخوفه الاكلتها تمنيت اكو شخص اشكيله همي شخص جبير يفهمني وينصحني مثل ابو او اخو اي شي ولا هل وحده الجاي تكتلني

يمكن غفيت نص ساعه وفزيت بسبعه الصبح وصوت واحد يدك بالباب ويصيح طفرت من فراشي خفت افتحها بس وكفت قريب عليها حتى اسمع

وجان اسمع عمي يكول....فتحن الباب وووولجن كح**ب شلون الج عين اذبني بشارع اني الجن اذا ما احرك الشقه ع راسجن وذلجن ذلت الجلاب شواربي مو عليه

عشر دقايق يدك بالباب بعدها سكت مبين تعب وراح من وحده

هدور دوامي صبحي وخفت اروح للمدرسه من ورا بعدين اشجعت وكلت خيولي شنو فد قندره وخاف منه والله اذا وصلي الا افضحه كدام الناس هل منحط هذه

رحت بدلت وطلعت واني عود مسيطره وهيج

وصلت للباب اجتني الخوفه رجعت مثل المطي ع امي اركض كعدتها وضليت اتوسللها توصلني للمدرسه خذتلي كفختين منها

وبالكوه يله كامت وضلت ادردم عليه يكلك ماخذتها للعدام

وصلتني للمدرسه ورجعت واني هم دخلت للمدرسه لكيت البنات واكفات علمود الاصطفاف واني هم نزعت جنطتي ورحت وكفت وياهن شويه واجتي ازهار سلمت عليه اني هم رديت السلام بشكل طبيعي شويه وكلتلي......شو عيونج حمر شبيج

حور...ما نمت زين البارحه

ازهار.....اي والله تعلمنه ع السهر ولو انتي ما عندج موبايل ع شنو اسهرين

حور....لا عيني عندي

ازهار....يا شعجب بس لا جايبلجيا محمد

باوعتلها صفح ....اي غير حبيبته لو اريد روحه هم ينطينياها

ازهار....لعد لزمي بأديج ورجليج ليروح يطير من عندج

حور...لا حبيبتي ميحتاج هو المجلب بيه بأدي ورجليه

قطعت حديثنه المعاونه كالت....مااااكو اصطفاق اليوم يله كلمن الشعبتها

وفعلا افترقنه وكلمن راح الصفه اني وجاي امشي صاحت بيه المعاونه التفت كتلها ....نعم ست

خزرتني وكالت بصوت عالي خلت البنات كله تلتفت علينه....اكلج انتي وين جايه العرس الخلفوج شنووو هاي صدريتج بعد ما عندج اصغر منها

ضليت ساكته استحيت اكلها معندي غيرها رجعت صاحت بيه....اذا باااااجر اجيتي بهاي الصدريه اشكهاااا ع راسج ادبسززيات بعجن بطول النعال

وضلت اترزل بيه شلت راسي شفت ازهار واكفه وتضحك تشمت بيه باوعتلها المعاونه وكالت....ولججج وانتي الثانيه تعاي يمي شنو هاي حاطه حمره

ازهار وجهها صار احمر واني طفرت وكلت اللهم لا شماته صدك الله ميحارب بحجار حيل وياها

دخلت للشعبه شويه واجتي المدرسه وزهار ماكو تقريبا خمس دقايق وجتي ازهار شفتها زركه مبين جالفه حلكها كلتلها المدرسه ...وين جنتي

ازهار...بالادره

اشرتلها تدخل اول ما دخلت خزرتني عشتوووا لعد اني شعليه

ضلت المدرسه تشرح نص الدرس وباوعتلي وكالت....وين كتابج

حور...ست مو

صاحت بيه وكالت.....من تحاجيني اوووكفي وحجي

كمت ع حيلي وكتلها...ست احترك بيتنه وكتبي كلهن احتركن

ضحكت بصوت عالي وكالت....والله خوش عذر جديد بعده بالباكيت

حور....والله ست مو عذر هاي ازهار جوارينه وسئليها

ازهار كامت ع حيلها وكالت....اي ست صح احترك بيتهم واني شاهده

المدرسة....يله كعدن وانتي بالفرصه شوفي المديرة بلكي عدها كتب قديمه

اشرتلها براسي بمعنى اي ورجعت تكمل الشرح وبعد العناء الطويل دك الجرس اجتي ازهار يمي وكالت....اني ساعتج مو السواد عيونج بس حتى ابيلج اني احسن منج وكلبي ابيض وميشيل حقد

حور...وقابل اني اسويتلج انتي الي بتعتي

ازهار....حور اخووويه سيف يحبج وانتي كسرتي كلبه

فتحت عيوني بصدمة مدري اضحك مدري ابجي كتلها.....شبيج متأثره بالمسلسلات يحبني شنو

ازهار....والله يحبج ويموت عليج حتى مرات بليل اسمعه يبجي ويصيح بأسمج

حور....لعد تعاي اسولفلج التوكلين عنه يحبني شسوه بيه....وسولفتلها من عبر ع السطح مالتنه وشراد يسوي وياي واكيد لان اخوها مصدكتني واني عفتها براحتها وكتلها بعصبيه....سمعي كلي الاخوج حوور مخطوبه وتحب محمد وتموت عليه ومستحيل تفكر بغيره وبس اصير فرصة يزوجون وخلي يبتعد عني وبنسبه الج اني مشايله اي شي بكلبي عليج تردين نرجع مثل قبل اهلا وسهلا متردين وتكولين اخويه وخويه وتخلي يأثر ع صداقتنه فا الله وياج

باوعتلي صفح وراحت بدون متحجي شي كتلها بكلبي....الله وياج درب الجلب ع الكصاب

كلت خلي اروح للمديرة بلكي تنطيني كتب طلعت برى الشعبه اني وجاي انزل الدرج مطرت الدنيا اباوع للبنات هاي التطفر وهاي التفتر هيه وصديقاتها وهاي المكيفه بالمطر وعايشه اللحضه وهاي الجايبه الموبايل بسكته وصور وافلام صايرة بس صدك اجواء اجنن مطر ونسمة هوى بارد تضرب الوجهه وريحة المطر تطلع من الحيطان والارض

تمنيت عدي صديقة وفيه ونسولف اني وياها وحجيلها اسراري ونتونس بس اضاهر بكلهن معندي حظ يمكن بس بالحب الله انطاني حظ ودزلي ملاك اووف شكد مشتاقتله جريت حسره ورحت اريد ادخل للادارة صاحت بيه الفراشة

كتلها....بس اريد احاجي المديرة علمود الكتب

كوه قبلت ادخلني يكلك داخلة للخضراء

طبيت جوه دكيت الباب ودخلت باوعتلي المديرة بنضرة رادت تموع روحي وسولفتلها احترك بيتنه وهيج وهيج بعد ما ذلتني بالحجي دزتني ويه وحده من المدرسات ودتني ع مخزن مال كتب اول ما فتحت الباب اجه التراب بوجهنه باوعتلي وكالت ....دوري هنا بلكي تلكين كتب اول متوسط انتي وحضج ومن تكملين قفلي الباب ونطيني الفتاح

اشرتلها براسي بمعنى ...اي

ودخلت جوه الغرفة صايرة فلم رعب عبارة عن جبل مال كتب وكلهن مشككات وتراب والوصخ موضوع ثاني

ضليت صافنه بيمن ابدي ودور بهل هوسه والوصخ لهناك جريت نفس وكعدت ادور بالكتب كتاب كتاب وكلهن مال سادس وخامس ملكيت مال اول اني وجاي اشيل بالكتاب طلعتلي فارة طفرت وصرخت احس كلبي وكف

رجعت ادور بالكتب بالكوه لكيت اسلامية ورياضيات ومشككات هم

خذتهن وطلعت قفلت الباب ورحت الغرفة المدرسات انطيت المفتاح وكتلها....ست مكليت بس اسلامية ورياضيات

ردت عليه....اي ماما شسويلج هذه الموجود روحي دوري بالمكاتب بلكي يبيعون كتب

كتلها....ماشي ...ودنكت بخيبة امل رجعت ع الصف اول ما دخلت ضلن البنات صافنات عليه اجتي وحده كلتلي...وين جنتي بمعركه

حور....ليش

ردت عليه....ملابسج كلهن تراب

انتبهت ع حالتي حتى المكديه احسن مني رحت لحمامات غسلت ومشه باقي اليوم بشكل طبيعي ورجعت ع البيت اركض مثل المخبله خايفه لا يطلعلي سيف لو عمي

لعناك سمعت صوت يكول....ليش مستعجل يالماخذ كلبي

التفتت بخوف وجان اشوف محمد

شعوري بوقتها مثل الابنيه الابوها جان مسافر فد خمس سنين وهستوه رجع ضليت اباوعله من فوك لجوه وعيوني تريد تاكله ما ادري شسوي بوقتها احضنه اصيح ابجي صدك هوواي اشتاقيتله وحسيت روحي يتيمه بدونه

محمد....بالاول بعدين حسابج ع هذه لبسج شفتيني ماكو كمتي تلعبين بذيلج وثانيا شلونج حوريتي اشتاقيتلج هواي بس تدرين انتي هل طولج بس شسويتي بحالي بحيث اول مرة اخلص شغلي بهل سرعه ورجع بس حتى اشوف حضرة جنابج

احس الخجل كتلني اول مره بحياتي هيج اخجل ونسطر قبل جانو بالمنطقه يصيحولي جبار من كد ما لساني طويل وبس اتعارك

كتله واني مدنكه وخدودي طماطه....محمد ارجع للبيت ونسولف عيب منا الناس تباوع

محمد....اخخخ ولشوكت نضل هيج اكلج خلي نزوج واخذ راحتي بس انتي تعاندين

حور...كلشي بوقته حلو يله باي

محمد....لتركضين امشي مثل الاوادم

باوعتله صفح وكمت امشي سريع عرفته ديمشي وراي بس خفت التفت وصلت للبيت فتحت الباب بالمفتاح الجابليا محمد كلي حتى مضلين تعبرين بالباب عبالك ولد متحول وهمزين هواي فادني هل مفتاح

دخلت جوه وحس روحي فوووك الغيم معقوله هذه الحب هيج يسوي صعدت الغرفتي اني وبعدني بملابس المدرسة حاجيته ضلينه نسولف للعصر واني الابتسامه شكت حلكي من سوالفه الحلوه وغزله لحد ما غفيت وحدي

تقريبا كعدت بالثمانيه بليل ع صوت موبايلي رديت بصوت مبحوح....ها حبيبي

محمد....يله كعدي كافي نوم وراج قرايه

حور....يا قرايه كابتن كتبي كلهن احتركن ومعندي كتب جديدة والمدرسة ما بيها كتب

محمد....هسه اشوفلج كتب اختي من جانت بالاول

حور....لا ما اريد اتعبك

كبل سده بوجهي ... ياا شبي هذه شكتله قابل

كمت غسلت وجهي ورحت الامي لكيتها جاي تعزل كتلها شوفيلي صدرية وهيج وهيج صار وياي كلتلي ميخالف

تفاجئت شو بسرعه تغير اسلوبها وصار حلو تقريبا لليل وخابرني محمد كبل رديت اجاني صوته يكول....حوري الكتب بالباب خليتهن فتحي الباب وخذيهن

حور....شكرا والله انته انقذتني

محمد...تدللين جم حور عندي

نزلت جوه خذت الكتب علاكه شثكلها شلعت ايدي ونتبهت اكو علاكه ثانيه طببتهن جوه كبل وركضت الغرفتي حتى مشوفني امي

فتحت الكتب لكيتهن انضف من مستقبلي مجلدهن ومرتبهن ضليت صافنه اول مره بحياتي الزم هيج كتب حلوه

راح نضري ع العلاكه الثانيه فتحتها وجااان انصدم من شفت صدرية اذا اكول عنها اجنن قليل بحقها من فوك مخصره ومن جوه عريضه وبيها من وره فيونكه اجنن

بعدين صفنت محمد شمدري اني احتاج صدرية كبل خابرته وسئلته رد عليه....الطيور وصلتلي خبر

حور....منوووو بس لا تحجي ويه وحده هناك اكتل روووحي وكتلك والله

ضحك وكال....ولج هنه عيوووني ايشوفن غيرج اصلا

حور....لعد منو التوصلك هل اخبار

محمد....مالج غرض هسه شنو رأيج حلوه

حور...اي كلش حبيتها

محمد....بالعافيه

ضلينه نسولف شويه وراح لان تعبان من وره السفر

ضليت كل شوي اللبس الصدرية ونزعها ممصدكه صارت عدي هيج صدريه حلوه طبعا محمد من دخل حياتي تغيرت 180 درجه مو بس ع الاشياء الي يجيبها ويسويليها بس هووواي ساعدني نفسيا ومعنويا وكلشي حتى من وراه التزمت بصلاتي وكمت اندعي الله ميراويني يوم بدونه

مرة الايام وماكو شي جديد عادي علاقتي حلوه ويه محمد وبالمدرسة ملتهيه بس بدراستي بس الشي الغريب الصار انو تعامل امي فجئه تغير وكامت متضربني وحجيها حلو وياي وهواي تلمحلي ع الزواج وشلون حياتي اصير حلوه اذا ازوجت واني صافنه ما ادري وين تريد توصل لحد ما اجه ذاك اليوم المشؤوم

يوم الجمعه اني جنت كاعده بغرفتي اقره العصريه

شويه وسمعت الباب تندك رحت الامي كتلها تفتحها اول ما فتحتها سمعت صوت عمي كبل الخوف مشه بدمي ركضت الغرفتي وقفلت الباب بس الي لفتني وياه نسوان

شوي واجتي امي ادك بالباب رحت فتحتها واني ارجف كتلها ....شكوو

ام حور....بدلي وتعاي

حور...ما اريد اخاف

ام حور.....لتخافين اني يمج ميسويلج شي لصيرين طفله

صرت كدام الامر الواقع غيرت ملابسي وعدلت شعري ورحت للنسوان سلمت عليهن وكعدت وهنه يباوعلي ويبسبسن بينهن شوي وامي اشرتلي اجيب عصير رحت للمطبخ لكيتها محضرته شلته وبكلبي ادردم

قدمتلهم وكعدت شوي وكالت وحده من النسوان....والله الابنيه حلوه ومبينه اخلاق فا اذا انتوا موافقين نتوكل نقرة الفاتحه وراها تجي الزلم

لؤي....نشرف بيكم ومنلكه احسن منكم اني بمقام ابوها وهاي امها وكدامكم الابنيه كبعوها وخذوها

حور .....شنوووو وين ياخذوني

ردت عليه المره....ماما نزوجج الابنه خوش ولد واستاذ بالمدرسة وبيته وحده متلكين هيج قسمه بعد

كمت ع حيلي وصحت....مستحيييل ما اريد ازوج اكتل روحي ترى

لؤي....اسكتي ادبسزز نصي صوتج وتزوجين وغصبا ما عليج

ركضت الغرفتي كبل وقفلت الباب وتصلت ع محمد اول ما رد كتله واني ابجي.....محمد الحكلي يردوووون يزوجوني

تارة♧♧

ردت اروح لبويه شفت شي خلاني مصدومه رسالة من ميساء الصالها اشهر مختفيه مكتوب بيها.... الدمرلي حياتي نفسه دمرلج حياتج ؟! .....فتحت المحادثه وشفت رسائل كلش هواي صدمني صدمة عمري

ميساء.....هلو تارة شلونج اسفه لان اختفيت كل هل فترة بس بسبب ضروفي او بالاصح لان حياتي ادمرت راح احجيلج كلشي صار وياي بأخر فترة تذكرين من كمت امشي ويه زهره فا هيه ضلت اتلمحلي ع انو مرتضى ابو الخط معجب بيه واني جنت طايشه او ع كد عقلي وبصراحه اني هم جان عاجبني بس مو بالي ادخل علاقه وهيج بس هيه شجعتني

وفعلا دخلت وياه بعلاقه بس حذرني ما اكلج واني من حبي اله وما اريد اخسره مسولفتلج شي جان قبل يوصلج ونبقه اني وياه نفتر

حار اسوالي وجابلي من هداية دللني دلال عمر كله محلمت بي

واني كمت احبه وشيريد اكله حاضر جنت ادزله صور وفتح ويا كامره ومن نطلع ناخذ صور سوه

لان ثقيت بي ثقه عمياء لحد ما كمت اكله تعال اخطبني بس هو لو يغير الموضوع لو يتحجج

والى ان بيوم ضل يطلب اشياء مثل اروح وياه للشقه او ادزله صور بملابس النوم

ومن رفضت كام يهددني بالبدايه راد فلوس وجنت ابوك من هذه وذاك والله حتى وصلت مرحلة بكت من بيت خالتي في سبيل ما انفضح

تحول حبي اله الى اكبر كابوس بحياتي لحد ما كلي لو تجين وياي للشقه لو افضحج كدام كل طلاب القسم

وما جان كدامي غير اروح وياه وتقرب مني وخذ شرفي واغلى شي عندي

حاولت اكثر من مره انتحر بس من افكر منو راح يبقه الامي وخويه الصغير اتراجع الى ان كلت كافي لهنا وصلت حدها غيرت كل حساباتي وارقامي وقررت اترك الجامعه هل سنة وبعدها الله كريم

وقنعت امي ورحنه كعدنه يم عمامي بناصرية واني هسه معلكه خسرت اغلى شي عندي وخسرت مستقبلي من وره هذه النذل

ضليت اقره برسائل ودموعي اصب لهناك كتلها....بس شمدريج دمر حياتي ...كبل ردت عليه وكتبت....لان هو جان حاط عينه عليج

تارة.....وليش ما حذرتيني ع الاقل ما صار الي صار

ميساء....تارة ادري بيج انسانه واعيه وصعبه ومستحيل تقلبين بي فا لذلك جنت شبه مطمنه

تارة....لعد خلي اسولفلج شلون ضحك عليه وبيا طريقه ....حجيتلها كلشي من اول يوم اعترفلي لحد هذه اليوم

ميساء....ايا حقير هذه شغله يضحك ع بنات الجامعه ويحصل منهن فلوس واكيد متفق هو وهاي الحيه زهره

تارة....ما ادري شكلج بس الله يصبرج واني اكثر وحده حاسه بيج لان مريت بالي مريتي بي بس اكو شي شايلته بكلبي اتجاهج

ميساء...ادري والله وحقج تمنيت اسولفلج قبل ميفوت الاوان بس شسوي الفات مات ومنكدر نغير شي بعد

تارة....ع كولن اني عدي كل التهديدات والمكالمات وراح اراويهن الابويه وسولفله كلشي

ميساء...اي فضحي الهذه الحقير سوي الي ما كدرت اني اسوي بس ديري بالج

بقيت محادثات ميساء كلت هم يساعدني وضميت الموبايل وكلت باجر احاجي ابويه الصبح لان هسه عمي ع جيه واكيد راح يوكف بوجهي

سديت الموبايل وكضيت الليل كله افكر بحياتي وبكلام ميساء وبفهد لحد ما دخت وغفيت كعدت ع صوت المنبه كبل رحت غسلت والحمام بغرفتي

وطلعت فتحت باب الغرفة لكيتها مقفوله ضليت ابجي شسوي يربي الى متى يضلون حابسيني مثل الكاتله واحد ضليت ادك بالباب اجتي مرة ابويه ضربت وجهها وكالت....شبيج انتي تخبلتي والله اذا كعدلج عمج يذبحج

وخرت عنها وطلعت اركض رحت الغرفة ابويه لكيته حاط الاكل ع الجربايه او ع ميز وكاعد يتريك وشكله تعبان ووجهه اصفر وشيب تارس لحيته وشعره

سديت الباب وكتله ....بس حباب بس اسمعني واذا معجبك كلامي اعتبر نفسك مسمعته

احمد...طلعي بره

ركضت عليه بست ايده وضليت اتوسله وهو ضل يطرد بيه لحت ما حلفته بروح امي يله قبل يسمعني

سولفتله كلشي صار وياي وما جذبت بحرف واحد وروايته المحادثات وتهديدات وحتى رسالة ميساء راويتهيا

احمد....حتلو جانت هاي الحقيقه انتي خطأتي من ضميتي عليه وصرفتي وحدج
جان كتيلي من اول مره هددج بيها جنت طكيت ضهره ولا خليته يوصلج او يضايقج وهذه الكلب اني اصرف وياه اما انتي تنسين الجامعه احسلج لان تحليمن اخليج اداومين بعد

تارة....بابا حباب لتضلمني اني احب دراستي وما اريد اخسرها هيج انته جاي ادمرلي حياتي

راد يحجي بس لزمته الكحه اجتي مرة ابويه طردتني وكالت....لج انتي حالفه تموتين الرجال

صعدت الغرفتي ودموعي ما وكفن

ومرة الايام واني نفس وضعي وأيست ارجع الدوام والحياتي القديمه

اما الحزن بده يخيم ع ايامي وبنسبه المرتضى عرفت من مرة ابويه انو ابويه وعمي كلبوا الدنيا عليه بس فص ملح وذاب وهنا عرفت حقي راح برجلين

لحد ما بيوم كاعده اكلب بموبابلي لان صار مصدر ونستي الوحيده وتفاجئت من شفت رسالة مكتوب بيها اني فهد ردي

بأنتظارك خلصت عمري انتظار
و عاشرت ليل المحطة
و ارتجي ايجيبك قطار

يتبع....