رواية في احضان الذئاب الفصل الحادي والعشرون 21 - بقلم الكاتبة قمر الجنابي

البارت التاسع عشر🎉❤

بقلمي الكاتبه قمر💁‍♀️🌸

لاتنسون التصويت بالضغط على النجمه⭐💕

تنويه!!!

حبايب كلبي شكد ما اعتذر قليله ع التأخير الصار بس كلولي شبيدي اني الوتباد قفل وياي انزل البارت مينزل لحد ما مليت وتعبت نفسيتي لذلك قررت قررت اوقف القصه بس بسبب كم متابع الي الله لا يحرمني منهم ومن كلامهم الجميل همه الرجعوا واهسي واشكر احد الكاتبات هيه الصلحتلي الخلل الصار وهسه فضلا وليس امرا اقروا (البارت الثامن عشر ) حتى اذكرون الاحداث وشكرا الصبركم❤

چنت خايف
‏شفتَك وگربت يمَك
‏ردت اگُلك جيت اطمنَك
‏وآني خايف !
‏وخايف يطمنلة خايف
‏ردت اگُلك حتىٰ هذا البَلد غُربة
‏وصار مَوطن مِن هويتَك
‏ردت اگُلك
‏حتىٰ حيطان الدرابين القَديمة
‏ تتاني جيتَك

تنويه جدا مهم!!!

حبايب راح اغير اسم الروايه من (سراديب الماضي) الى (في احضان الذئاب) اتمنى تنتبهون ع هذه الشي ومتيهون الروايه

حور♤♤

ركضت الغرفتي كبل وقفلت الباب وتصلت ع محمد اول ما رد كتله واني ابجي.....محمد الحكلي يردوووون يزوجوني

رد عليه بصياح....شنووو يا كلب يفكر ياخذج مني

حور....ما ادري محمد هذه عمي جايب نسوان وجاي ويكللهن كبعوها وخذوها

محمد....صبريلي جايج اني اعلمه هذه الكو***

سديته منه وبقيت ارجف بمكاني وابجي ثواني واجه عمي يدك بالباب ويحجي بهمس ....فتحي الباب ولج لتفضحينه كدام الوادم .....ولج فتحي الباب مو احجي وياج ....ترى والله اكسرها وطب اطيح حظ حضج

هذه الحجي كله واني حاطه ايدي ع حلكي واشهك

ثواني وباب بيتنه اتفلش بسرعه ركضت فتحت باب غرفتي لان عرفته محمد من الدكه مالته

شفت عمي ركض يفتح الباب ويصيح....منو هذه ياشريف هيج يدك الباب

ونسوان طفرن من الخرعه واني ركضت للشباج اشوف شنو الفلم وجان يطلع عمي صاح بمحمد لان دك الباب هيج

ومحمد سحله من ياخته وصواتهم ارتفعت والجوارين التموا طبعا محمد جان جايب وياه ثنين ولد ضخمين كلش من ذوله الي يلعبون حديد حطولك عمي طيحوا صبغه

وهو صار مثل الدجاجه بنصهم ومحمد الكفو نتف ريشاته

ضليت اباوع وبداخلي فرحانه لان كله هل كتله حقير يستاهل

اجتي امي دفعتني حتى اشوف شكو وكل شوي تكفخني وتكلي ....كله من وراج

لهناك اجوا الشرطه شالولك عمي ومحمد

ونسوان طلعن وكالن....يداده امشينه عمي بنات بكد الزبل شعدنه جايين الهاي من بدايتها مفضوحه

حور....روحه بلا رده

رجعت كالت وحده بيهن....عزه شوفي لسانها همزين ما تورطنه بيها

حور....بررررره

عاد هنه طكطكن نعالاتهن وطلعن واني بالي ضل كله يم محمد معقوله راح ينسجن من وراي

ضليت ادك عليه بساعتين جهازه مغلق هدور ضليت اللوم بروحي كله من وراي اني الكتله تعال

زين وعمي شراح يسوي بيه بعد الصار وشحجه ويه محمد حتى هيج تعاركوا ضلت هواي اسئله ادور ابالي وجوابها يم محمد

صحيت من افكاري ع ضربه شلت راسي شفتها امي نزلت عليه ادك بيه واني من حركة كلبي دفعتها هيه تخبلت شلون ادفعها رجعت تضرب بيه وهذه كله واني بس ادافع عن نفسي

لهناك انفجرت وركضت عنها وكمت اصيح.....كله من ووووراج مو انتي الجنتي تكليلي طلعي وياه وخلي يحبج وجنتي اطببي البيتنه حتى يشوفني وخليتيني احبه وتعلق بيه شووو هسه كمتي متردي لج هذه كله ما غزر بيج كعدنه بشقه مالته ومن رتي تموتين بالمستشفى هو الي ساعدنه بالعمليه والادويه وكعدنه ابيتهم من احترك بيتنه وسووانه شغلات لا تعد ولا تحصى

ضلت اتفرفرح وتأشرلي....محمد تنسي وطلعي من حياتج وبعد تحلمين اخليج اشوفي لو تحجين وياه افتهمتي لو لا حتى اذا لا استخدم وياج اسلوب الدك وخليج تفتهين واني وعمج الي نختارج منو التزوجي مو انتي بطول النعال تردين تمشينه ع مزاجج وانعل ابو لابو فلوسه وشقه مالته هسه اطلع منها لان عدي فلوس تخليني اشتري وشتري شقته

حور......ولججج حيااااااتي هاااااي اني الازوج مو انتي وعمي الخايس المادري مين طلعلي بعد كل هل سنين وصايرلي رجال براسي ادوسه بنعال هو وحجايته

بقيت اصيح وهيه اصيح وثواني ما احس غير وكعت امي بالكاع ركضت عليها وكتلها بصوت مبحوح ....يمه شبيج يمعوده كعدي اني اسفه

ضليت اتلفت بالبيت اريد شي يساعدني حتى اكعدها ركضت ع السنكي فتحت الماي ورشيته بوجها بس ما كعدت من خوفي طلعت بشارع اصيح لحكولي امي راح تموت

اجو ثنين زلم كبار رادوا يشيلوها استحوا كمت اني ركضت غطيتها بالعبايه وهمه شالوها حطوها بسياره واني كعدت وحطيت راسها بحضني

ركضنه بيها للمستشفى وكبل دخلوها بطوارئ ضليت كاعده اباب الطوارئ لان ما قبلوا يدخلوني والله حالتي بوكتها تصعب ع الكافر عبالك مكديه كاعده اباب المستشفى ووجهي اصفر وملابسي وشعري مبهذلين ورايح واليجي يباوعلي صفح

لحد ما اجه ابو الامنيه باوعلي وكال بستحقار....مو كلنه ممنوع تكدون هنا طلعوا بره الشوارع شكدها شكبرها الا بالمستشفى

صحت بي وكتله....مو مكديه انييييي

اجتي بنيه يطلع عمرها نهاية العشرين لابسه صدريه بيضه كلتله.....علكيفك عيني ويه الطفله اعتبرها بتك تقبل واحد يكلها مكديه دباوع زين شوفها شحلاتها وانته تكلها مكديه

وباوعتلي وكالت....تعاي وياي ماما

رحت وراها ودمعتي ع خدي دخلت للصيدليه واني دخلت وراها

جابتلي كرسي كعدت عليه ونطتني ماي وكالت.....ماماتي انتي شعندج هنا

حور....امي دخلوها للطوارئ وما قبلوا يدخلوني وبقيت برى

ردت عليه....زين بابا وين

حور....ما عندي ابو

حسيتها استغربت رجعت كلتلي....جوعانه اجيبلج شي تاكلي

حور.... لا شكرا بس شوفيلي امي بالي يمها

سئلتني عن اسمها وراحت كلتلي شوي واجي واني بقيت كاعده يم واحد صيدلاني يبيع وعينه عليه مستغرب مني

شويه واجتي الابنيه الحبابه نفسها كلتلي امج مابيها شي جانو شاكين عدها وريد مسدود بس الحمد الله طلع مبيها شي وهسه يطلعوها انتضري هنا بين ما تطلع ....ضليت اشكر منها هواي

صدك الماعدنه احد الله يهتفله بالناس الخيره اساعده

تقريبا نص ساعه وشفت من بعيد ممرضه تدفع بأمي بعربانه مال معوقين ركضت عليها شافتني الممرضه كلتلي....انتي بتها

كتلها ....اي

ردت عليه...جيبليها هاي الادويه من الصيدليه

خذت الورقه منها ورحت ع نفس هاي الدكتوره الحبابه انطتني الادويه وحتي مقبلت تاخذ فلوس واصلا اني معندي فلوس

من كملت سندتها وصعدنه بالتكسي ورجعنه للبيت كوه صعدتها الدرج وصلتها الغرفتها وشمرت عليها الادويه وكتلها.....عاد كون يغزر بيج

هيه سكتت كلشي ما حجت واني ركضت للموبايل كلبي يرفرف ع محمد اول ما فتحته لكيت خمس مكالمات فائته من محمد

اتصلت عليه طلع معندي رصيد راسلته معنده نت ضليت حاطه الموبايل وصافنه عليه متانيته يتصل او يدز رسالة

تقريبا نص ساعه وتصل عليه بسرعه رديت وحجيت قبل ميحجي....حبيبي وينك انته طمني عليج

جاوبني بعصبيه.....طاحظ حبيبج وطاحضج

حور....هاي شبيك ليش تغلط

محمد....اني جم مره كتلج خلي اخطبج يبت الناس هيج احسلج بس خلي يكون بعلمج اذا رحتي الغيري او صارت حتلو غصبا ما عليج اكتل الكو*** التاخذي وكتلج ودمر حياتج افتهمتي لو لا

ردت احجي سده بوجهي .... ضليت صافنه اول مره محمد يحجي وياي بهل طريقه ادري اني شعليه شنو ذنبي قابل اني طفله واخاف من الزواج ومن مسؤولياته اريد شوي اكبر وتعلم من هاي الحياة يله بعدين ازوج حتى ميفشل زواجي مع انو اني احب محمد وموت عليه ولو يكلي انطيني روحج انطيهيا ولان احبه جاي ااخر هذه الموضوع

ضليت ابجي واشهك مثل الطفله لحد ما خلصت دموعي كمت غسلت ورحت ع امي انطيتها ادويتها وكتلها....اكلج ما عرفتي الصار

باوعتلي صفح واشرتلي....الافندي مالتج جايب سلاح ورايد يكتل عمج وشرطه اخذتهم وعمج بقه بالحبس وهذاك عنده معارف طلعوا مثل الشعرة من العجينه

حور...وانتي شمدريج بهل تفاصيل

ضلت اتأشرلي بأيدها بمعنى ....طلعي برى

وهيج مرة الايام بحزنها وبؤسها وبصعوبتها

ومحمد ميحجي وياي حاضرني من كل البرامج واني حال الضيم حالي اربعه وعشرين ساعه ابجي لان محد يمي ويفهمني

شعور الوحده كتلني بس دائما اكول لا حور انتي مو وحدج رب العالمين يمج وكعد اسولف ويه ربي عن قسوة الحياة وياي (انما اشكوا بثي وحزني الى الله)

بالنسبه العمي ما شفته بعد الي صار بس مره امي كلتلي محمد رايحله ومهدده ومن وكتها وعمي اختفى من حياتنه وهنا اكتشفت هو شكد جبان وكدرته بس ع النسوان

بالنسبه الازهار علاقتي رجعت بيها نفس قبل او احلا بس سيف دائما يسويلي مشاكل من جوه الكاع واني اغلس عليه

طبعا امتحنت اخير السنه وجان معدلي 80 من وره المشاكل الصارت اثرت عليه هواي وبالخص غياب محمد خذه كل حيلي بس الحمد الله صرت ثاني متوسط

وهم اجتي عطله اخير السنه هاي العطله الكلش اكرها لان اضل بس كاعده بالبيت

قبل بالمدرسه صح لعبان نفس بس ع الاقل اطلع اشوف وادم

العصريه جنت كاعده اكلب بالتلفزون وحاطه يمي جاي او كعك و اغمس بالجاي

اجتي امي وصتني اجيب كم شغله للبيت من الاسواق خذت الفلوس من عدها وعدلت شعري وتوجهت للمحل اشتريت الغراض الوصتني عليهن ودفعت الحساب وطلعت

اني وبطريق الرجعه شفت زينب واكفه ويه ولد يسولفون ضليت اباوعلهم لان كفه الولد اعرفه لحد ما صرت قريبه عليهم

وهنا جانت الصدمه من شفته محمد احس الغيره اشتعلت بداخلي هيج مثل النار التحرك روحي من جوه شعور ابد مو حلو

فوكاها زينب حاطه مكياج ع اخر حبه وطالعه كلش حلوه والافندي واكف يسولف وياها والابتسامه شاكه حلكه

بس اني حور اسكت لا ما اسكت ذبيت العلاكه بالكاع ورحت وكفت بنصهم وكلتهم بنبره حاده...يا هلا بصديقتي وحبيبي شنو واكفين بنص الشارع مسويها حفلة تعارف

زينب باوعتلي بستغراب وكالت....شبيج حور شنو هل حجي

رادت تكمل قاطعتها....وانته استاذ محمد ليش فاضح روحك بنص الشارع ترى هيه عايشه بس ويه امها وخوها صغير روحهلم للبيت اسهلك بهواي... وغمزتله

طبعا ادري بروحي تماديت بالكلام بس والله من حركة كلبي وغيرتي وحبي وفوكاها عقلي كام يخيلي اشياء خلتني احجي هيج

محمد مبين عصب باوعلي بطرف عين وكلي....وانتي شعدج تفترين بشوارع يله كداااامي للبيت

حور....ايباه وانته شعليك ابويه اخويه خليك وين زينب خلي تفيدك

ردت اروح جرني من ايدي وخزرني والله حسيت روحي راح اموت بمكاني وكال....اني جم مره كايلج لسانج لطولي ع الاكبر منج ليش تخلصني اكسر سنونج بحلكج

بسرعه جريت ايدي منه ورجعت اركض لان ما ردت اصير ضعيفه كدامهم وتنزل دموعي وصلت ع البيت خذتلي كتله من امي لان ضيعت العلاكه

بس اني اذكر ذبيتها يمهم كلت خلي ارجع بلكي محد شايلها لان امي هسه تاكل كلبي رجعت النفس المكان والحمد الله العلاكه ع نفس مكانها شلتها

اني وجاي ارجع صارت بوجهي زينب ومبينه ضايجه مني كلتلي....يا غبيه ترى محمد جان يحجي وياي علمود يصالحج ويريد يسويلج مفاجئه وجاي ياخذ رأيي يا ثوله لو عدنه شي منوكف بنص الشارع والله عفيه عليج خوش اضنين الخير بصديقتج

ضليت صافنه احس اللساني انبلع صدك استحيت وستعجلت وضلمتهم

رجعت كلتلي ....اذا بيج خير حافضي عليه لا اطكه بسحر واخذه منج ....وغمتني وراحت

اني كبل طكيتها بركضه للبيت اول ما وصلت صارت بوجهي امي تريد ترزلني شمرت عليها العلاكه ورحت الغرفتي لكيته شايل الحضر عن الفيس كلش فرحت وراسلته وضليت اعتذر بس شاف الرسائل وما ارد

صح تصرفي غلط بس غير احبه وغار عليه مو هو هذيج المره لعب لعب من شاف سيف يحجي وياي

عاد ضليت كاعده وحايره بزماني شوكت حياتي اصير حلوه مثل باقي الناس

من الضوجه كلت خلي اكوم اسبح طلعت ملابسي وطبيت للحمام اني وجاي اسبح لاحضت طبقات بيضه ع افخاذ رجليه ميوجعني بس منضرهن مو حلو ويحكني

وحتى براسي مثلهن بالبدايه عبالي قشره بس من شفت مثلهن برجليه تأكدت مو قشره هاي

طلعت من الحمام وركضت الامي سولفتلها طردتني وكلتلي هذه وصخ لان مسبحين

ضليت اتوسل بيها تاخذني للدكتور لان جاي الاحضه ينتشر بجسمي عاد بالكوه قبلت وكلتلي نروح باجر الصبح للمستوصف حتى نكص وصل بخمسميه حتى ما اخسر عليج بالعياده

كتلها ميخالف لان ما اعرف شنو الفرق اصلا

رحت كبل كلت المحمد راح اروح للدكتور شو هذه بنفس الدقيقه رد

محمد...ليش شبيج

استحيت اكله شنو بيه بالضبط كلت خاف هم يكلي مثل امي وعباله وصخه اني فا كتله....ضهري يوجعني

محمد...وليش مترحين هسه ليش باجر

حور....لا امي كلتلي باجر

محمد....اي حضري نفسج اني اوديج هسه

حور...لا حباب مالي خلك امي اضل اصيح عليه

محمد...استغفر الله زين ماشي روحي باجر بس الدكتوووورة مو الدكتور واذا سمعت بيج رايحه الدكتور نخرب فوك ما احنى خربانين من وره تصرفاتج

حور...محمد كافي زعل خلي نصالح والله انشلع كلبي بهذيج الايام وانته تدري بيه مالي غيرك بهل دنيا

محمد...زين ليش متقبلين اخطبج كليلي اكو احد ابالج

حور....شنو هذه كلامك انته شلون هيج تكلي بصراحه كلش جرحتني بهاي حجايتك ولك اني احبك وعيوني مشوف غيرك ليش متفهم

محمد....واني زلمه ومن اعشك لازززم اخذ الاريدها خاوه ع الدنيا كلها لذلك جاي اشوفيني اصرف هيج

حور.....اني الك يبعد بيبان كلبي وين اروح قابل لو محمد لو الكبر

محمد.... هو اني ليش احبج لان طفله وخبله هم

ضلينه نسولف ونضحك وكلش فرحت لان اصالحنه لو ادري هيج من زمان كايلته مريضه

عاد خلص باقي اليوم بشكل طبيعي وصبح رحنه للمستوصف وبالكوه وصلنه السره كلش ازدحام من دخلنه يم الدكتورة شرحتلها كلشي وشلون جاي ينتشر كتبتلي وصفه وكلتلي .....عيوني انتي بيج داء اسمه الصدفية وهذه المرض يجي الاسباب اهمها وراثيه وماله علاج بس اكدر انطيج دوه يخفف منه

حور.....شنوووو

تارة◇◇

لحد ما بيوم كاعده اكلب بموبابلي لان صار مصدر ونستي الوحيده وتفاجئت من شفت رسالة مكتوب بيها اني فهد ردي

احس كلبي كام يرفرف من سمعت بأسمه طبعا فهد من كد ما احبه ما اريد يدخل الحب بعلاقتنه ويخربها اريد علاقتنه تبقه طاهره وكبل نخطب نزوج

رديت عليه بسرعه كتبتله....اهلا استاذ

فهد....وينج انتي ليش مختفيه وليش حاضرتني اذا مترديني كولي ليش تلفين ودورين

تارة....اعتذر بس والله ضروفي

فهد....شنووو شنووو ضروفج غير افهم حتى اكدر اساعدج ليش تخليني هيج ضايع لا اني بجنه ولا اني بالنار واربعه وعشرين ساعه افكر بيج وبالي يمج وكول خاف صايرلها شي

تارة....اني اقدر هل شي بس صدكني ضروف اكبر مني ومنك وما اكدر احجيهن

فهد....ماشي بس رجعي داومي ترى راح يفصلوج لان بعد اعذاري خلصت ترى كل يوم اروح للعماده وطلعلهم عذر اكول عسه ولعل باجر اداوم

تارة....اني اشكرلك بس خلص تركت الدراسه

فهد....شنووو بابا انتي مستوعبه الجاي تكولينه

تارة....كتلك ضروفي اكبر مني ومنك

فهد....لا مو بكيفج خلص ترى اني بده صبري ينفذ كليلي احد مضايقج بجامعه والله اخلي اخر يوم اله بدوام

تارة....لا ابد واني ما اريد اصير انانيه بس اتمنى متحب غيري

فهد...تاره كوليها وريحيني انتي تحبني؟؟

خذتلي صفنه وياها نزلت دمعتي وكتبتله وعيوني مغوشه بدموع كوه اشوف الكيبورد....ما ادري حب اعجاب انجذاب ما ادري بس اكو شي بداخلي جبير اتجاهك

قره الرساله وما رد واني من خوفي من عمي وبويه رجعت حضرته

تنويه جدا مهم!!!

حبايب راح اغير اسم الروايه من (سراديب الماضي) الى (في احضان الذئاب) اتمنى تنتبهون ع هذه الشي ومتيهون الروايه

وهيج مرة ايام سوده ع حياتي كضيتها كلها بغرفتي لو ابجي لو كامشه القران وندعي الله يهدي مرتضى وميسوي السواه ويه وحده غيري لان الشي اصالي ما اتمناه العدوي

شخصيتي صارت كلش ضعيفه كمت اشتاق النفسي القديمه تارة الجانت تضحك للهوى الطاير

اشتاقيت الدراستي وجامعتي كل مره اطلع ملازمي احطهن وكعد ابجي

وحتى الصابون الجنت انحته ع شكل اسنان اثناء التطبيق العلمي وهم احطهن وكعد ابجي

بحيث بليل ما انام اذا ما ابلل المخده مالتي وكعد ثاني يوم عيوني مورمات جني ذوله الكوريين

بنسبه الابويه من هذاك اليوم الهذه اليوم ميحجي وياي هو هيج طبعه من يضوج من احد ميحجي وياه ولا يباوع الخلقته وهذه جان اكبر عقاب الي

صديقاتي خلصن مرحلة ثانيه وصارن ثالثه وكل يوم اشوف منشوراتهن بسفرات وطلعات ومن يرحن يطبقن بالعيادات

واني اضل احرك بروحي ع ذنب ما ارتكبته

فد يوم كاعده بغرفتي كالعاده وجاي اباوع مسلسل وسمعت العيطه كبت جوه

كبل طفرت من الجربايه ونزلت جوه اشوف شكو وجان اشوف مرة ابويه وبويه يتعاركون وبويه يصيح وهيه اصيح وكلشي ما افتهمت ما ادري ع شنو اتعاركوا لحد ما ابويه شمر ملابسها وهيه راحت شالتهن وخابرت ع اخوها اجه خذاها وراحت

احس هنا اجتلي فرصه اتقرب من ابويه تقريبا لليل ونزلت جوه لكيت ابويه كاعد يباوع اخبار كتله...بابا

كال....ها....وعينه ع التلفزون

تارة...اسويلك عشى

احمد....ما اشتهي

ادري بي جوعان ويسوي هيج لان ماخذ موقف مني فا اني كبل رحت للمطبخ سويت كباب عروك وسويت حلاوة جزر لان هو كلش يحبها وكليت الطماطه وحطيت الصمون ورتبت الصينيه وحطيتها كدامه

عاد هو رفع عينه باوعلي صفح وكال...مو كتلج ما اشتهي

تارة....يله بابا لتردني والله تعبت

عاد هو صدك جر الصمونه ومسح الماعون اني هم كيفت ورحت جبتله ماعون الحلاوة مال جزر بس كلي ما اريد سويلي جاي واني صرت بيب بيب سويتله جاي حتى من كثر ما تحمست حركت الجاي

وراها عزلت المطبخ وصعدت بس شنو احس ضهري انكطم بنص صالي هواي ممشتغله

ثاني يوم هم سويت الغده بس ابويه ماهوه بالمستشفى بس بالعشه شفته وهيج مره اسبوع واني اهتم بأبويه بأكله وبملابسه وبكلشي

لحد ما بيوم بليل تقريبا بال12 لكيته جاي يصلي لان ابويه يصلي صلاة الليل ابد ميعوفها لذلك من واحد يشوفه يحس وجهه نوراني

عاد من كمل كتله...قبل الله

احمد....اعمالج بنيتي

من كلي هيج احس كلبي رفرف صالي هواي مسامعه هل كلمه وهل شي شجعني رحت وكعت عليه بست راسه وايده وحتى ردت ابوس رجله بس جرها وضليت اتوسله وكله....بابا حباب سامحني والله اني انضلمت هواي والله تعاقبت هواي والله بجيت هواي والله تعبت هواي والله بابا اني معندي غيرك امي ماتت وضليت بس انته الي ارجوك لتبتعد عني بعد والله ما اتحمل ترى هذيج الايام شبه العايشه جنت

صفن شويه بوجهي احس عيونه دمعت جرني الحضنه وباسني براسه اني ما اتحملت بقيت ابجي وهوه يسكت بيه لهناك كتله...ها بابا سامحتني

تارة....ليش شعندي غيرج بنيتي الله يوفقج ويحفضج ويبعد عنج ولد الحرام

احس كلبي كام يرفرف هيج هم ونزاح عني ضلينه نسولف وشويه وعفته يرتاح وصعدت فوك فرحانه اول مره افرح هيج بعد كل هذيج الاشهر المرت عليه

لحد ثاني يوم الصبح سمعت صوت صياح كلت يا ستار شكو من الصبح ردت انزل سمعت صوت غريب بقيت يم الدرج مديت راسي وجان اشوف اخو مرة ابويه كاعد ويصيح ويعتب ع ابويه لان عايف مرته يمهم صارلها سبوع وبويه يكله خلي تحترم نفسها بالاول لهناك كله اخوها.... خاف الله الحرمه حامل

يتبع....

تنويه جدا مهم!!!

حبايب راح اغير اسم الروايه من (سراديب الماضي) الى (في احضان الذئاب) اتمنى تنتبهون ع هذه الشي ومتيهون الروايه