رواية في احضان الذئاب الفصل التاسع عشر 19 - بقلم الكاتبة قمر الجنابي

البارت السابع عشر🎉❤

بقلمي الكاتبة قمر 💁‍♀️💕

لاتنسون التصويت بالضغط على النجمه🌟🌸

تنويه!!!!

حبايب اي تعليق سلبي ينحذف تلقائيا فا لتعبون نفسكم وشي ثاني اني مجاي اتأخر هواي كل ما تنطيني البطلة الاحداث اجي اكتبها ونشرها والبارت الواحد الالفين كلمة ثابت وياخذ مني تلاث ساعات بالكتابه والنشر والتعديل واجي الكه التفاعل مو زين وفوك هذه تعليقات سلبية المهم اشكركم وشكر صبركم وحبكم للقصه ❤

لاچن ..!
ماتحن ياحيف
تصد وتعذب بـ هجرك ..!

تارة♤♤

رد عليه عمي بحركه ....ابوج بعد ما سمع بعملتج السوده ضربته جلطة ويريد يموت

ما ادري اصار بيه من سمعت ابويه صار بي هيج وبسببي والله ما اسامح نفسي اذا صار عليه شي

ابويه الشخص الوحيد البقالي بهاي الدنيا ابويه هو الي وصلني وسواني وكبرني وتعب عليه مستحيل اتخيل حياتي بدونه

ضليت ادك ولطم وصيح اريد اشوفه ما اريد يموووت ويعوفني ويه هاي الوحوش

لحد ما اجتي الممرضة ضربتني ابره وبعد ما حسيت ع شي

ما ادري شكد مر وقت بس فزيت باوعت للساعه بال2 بليل ومحد يمي بس الي قلقني صوت ركض بالممر
كام عقلي يخيلي ابويه يريد يموت وهذوله جاي يسعفوا

احس كلبي وكف حتى العرك كام ينزل مني رغم الدنيا بارده كلت لازم اكوم اشوف شكو كوه حركت رجليه جسمي كله ما احس بي من الضرب

شلعت الكانونه وكمت اول ما حطيت رجلي بالكاع وكعت ع وجهي كمت ازحف بالكاع ودموعي تجري

كل همي اشوف ابويه وطمن عليه وصلت يم الباب وبالكوه كمت فتحتها سمعت صوت فززني يكول ....ووووين رايحه

من الخرعه ضربت وجهي بالباب التفت شفتها مرة ابويه كاعده ع القنفه وحاطه ايدها ع ووجها كتلها ....من شوكت انتي هنا

ردت عليه بصوت مبحوح....يمته عفتج طول الليل كاعده هنا وعمج يم ابوج

تارة....اي رايحه اشوف ابويه كلبي يرف عليه

ايمان....لو صدك تخافين ع ابوج ما سويتي هاي عملتج منو هذه الجرجرج الهيج طريق مرتضى مو

تارة.....حرام عليج تحكمين عليه وانتي كلشي متدرين غير بس السمعتي من عمي النذل

ايمان....ولج يمكموعه شسمعت غير الشرطه كامشتج

عفتها تحجي وطلعت والله حتى مالي خلك ابرر لحكتني وكالت....تعاي ع الاقل ادليج ع غرفه ابوج وين تهبدين وحدج بهل ليل

وفعلا مشينه واشرتلي هاي الغرفة قبل ما افتح الباب سمعت صوت عمي يكول....همزين درينه من هسه حتى نكدر نسيطر عليه قبل مينتشر

فتحت الباب ودخلت التفتلي عمي وكال....هاي السا*** اجابها لهنا كله من وراها هاي البلاوي

اجاهلت وجوده وركضت ع ابويه كمت ابوس بأديه وبرجليه وتوسله يسامحني بس هو جان مينطي اي ردة فعل ولا يكلك ابويه اصلا حسيت روحي غريبه

وكعت يم رجله وابجي كتله....ع الاقل صيح عليه رزلني اضرررربني بس لتبقه ساكت والله تحرك كلبي فوك ما هو محروك

كام عمي جرني من راسي حتى يطلعني ضليت اصرخ وكول......بابا ليش مدافعلي مثل ما جنت قبل توكف بوجهه اي واحد يضووووجني

اباوعله ولا بحالي ولا اهتم اصلا
كمت ابجي وكول....زين بسسس جيبولي مووووبايلي وشوفووووا الرسائل وراح تعرفون اني مضلومه ....كام عمي حط ايده ع حلكي حتى يسكتني وكال....اسكتي فضحتينه والله اذا ما ادفنج انتي وعدله ميطلع اسمي لؤي ع هاي عمايلج

رجعني سحل المكاني ومرة ابويه تركض ورانه ودك ع راسها..... ولكم احير بيكم احير برجلي الراح يمووت احير بجهااالي الله ينتقم من كل ضالم ياهو الحط عينه علينه وحركنه

طبينه للغرفه الجنت بيها وعمي دفعني وكال....اكعدي استغفري ربج وصلي بلكي يغفرلج ع الشي السويتي

تارة....ايباااه منو اليحجي عبالك ما ادري من جبت بنيه البيتنه وغتصبتها من جانوا اهلي مسافرين لو من تضحك ع البنات وتهددهن بصورهن ترى كلشششي ادري وساكته لان ما احب المشاكل ويمكن كل الي جاي يصيرلي من وراك الله جاي يطلع حوبة ذني البنات الضحكت عليهن بيه

اجه عليه وكال....ولج كحب** والج عين تحجين بعد

راد يضربني دخل الدكتور وياه ممرضين وكام يصيح ...شنووو هاي اصواتكم طالعه هنا مستشفى محترم وناس مريضه وروحها بخشمها واحنى تعبانين وانتوا جاي تتعاركون وين كاعدين بشارع

احنى كلنه سكتنه وعمي طلع واشرلي حسابج بعدين

ومرة ابويه باوعتلي بنضرة احتقار وكالت....اني رايحه يم ابوووج ولطلعين بعد كعدي كافي فضايح ...وطلعت

ضليت صافنه وكول بكلبي اني شعدي عايشه بعد ابويه كرهني عمي بس يكتل بيه وفهد بعد ما يسمع بالي صار يكرهني ويعوفني حتى دراستي خسرتها ومستقبلي وسمعتي وكلشييي

الشيطان لعب بعقلي كمت ادور ع شي حاد بس ملكيت باوعت اكو مجموعة ادويه ع الجرارات طلعتهن كلهن حطيتهن بأيدي وقريت الشهادة وكلت ....ربي سامحني بس بعد معندي طاقه....وشربت الادويه كلهن

ورجعت ع السرير نمت وتغطيت وضليت اكول بكلبي ...جايه يمج ماما جايه

تقريبا نص ساعه والالم صار حااااد كمت اتلوى مثل الطير المذبوح وصيح من الالم شويه وجوا الاطباء فوك راسي اسمع واحد يكول راح تموت والثاني يكله شيلوها صارت زركه والثالث يكله خنسويلها غسيل معده وبعد ما حسيت ع شي

ما ادري شكد ضليت نايمه بس من فزيت كلها اجتي عليه سمعت وحده تكول....الله كتبلج عمر ثاني هاي معجزه خلتج تعيشين حمدي ربج وابدي بداية جديدة

كتلها....هو هذه هم حضي حتى بالموت معندي حظ

ردت عليه وهيه اسوي بالمغذي ...لتكولين هيج ماما بعدج صغيره والعمر كدامج متدرين باجر الله شضاملج واذا انتي مضلومه فا لابد الله ينصرج لتخافين وخلي ثقتج بالله جبيره

بعدها شويه واجه واحد كال ضابط التحقيق يريدج
باوعت لا مرة ابويه ولا عمي كلت شسوي هسه بعدين كتله...ماشي خلي يدخل .... وعدلت حجابي

شويه ونفتحت الباب دخل واحد طويل وعده شوارب ثخان واسمر كبل اذكرت هذاك الضابط الحقير الاسمه جلال الي ساومني ع شرفي الله لينطي

الضابط....سلام عليكم حضرتج مقدمة شكوى بسبب تعرضج التعنيف منو هذه الشخص الي اذاج وليش اريدج تحجيلي كل التفاصيل

اذكرت كلام عمي وتهديده والله مالي خلك مشاكل جديده كلت خلي استسلم وفوض امري الي هو اكبر مني ومنه وهوه الي ياخذ حقي كتله....لا اني ما اتعرضت الاي تعنيف بس جنت تحت تأثير البنج وكلت هيج

الضابط....وشنو سبب الكدمات الي بجسمج

تارة....وكعت من الدرج

تقرب عليه وكال بشك....خاف اكو احد مهددج لتخافين واحجي كلشي لتخلين حقج يروح بالرجلين

تارة....لا سيدي هاي الحقيقه ومحد مهددني

الضابط...هذه جوابج الاخير

اشرتله براسي بمعنى ...اي

الضابط...ماشي بالسلامة ....وطلع

شويه واجتي الممرضه انطتني ابره بالعضلة من طلعت دخل عمي شمر عليه الاكل وكال....هاج اسممي

جنت كلش جوعانه لو مطيني حجار هم اكله بوقتها

فتحت العلاكه لكيت كباب شوي ضليت اكل مثل المخبله وهوه يفتر ع راسي ويدردم....فوك عملتج السوده تردين تنتحرين لا انتي حالفه الا تفضحينه كدام اليسوه والميسوه

شويه وطلع واجتي مرة ابويه استلمتني هدور حجت حجايه كلش زرفت كلبي بيها كالت....اكلج انتي بعدج بنيه لو انفتحتي

من الصدمه احس اللكمه وكفت ابلعومي كتلها بغصه....ما اكول شي غير بس الله يسامحج

كملت الاكل حطيته ع صفحه واجتي الممرضه ساعدتني حتى ادخل للحمام طبعا لان مستشفى اهليه كلشي متوفر بيها حتى تعاملهم حلو ونضافه وترتيب لان بفلوس احنى بلد بس الي عنده فلوس يعيش بكرامه

دخلت للحمام احس نفسي كامت تلعب ضليت استفرغ كلت بس لا صدك وسوواها عمي وحطلي سم بالاكل ذبيت الاكل كله الي اكلته

وحس حرارتي ناااار ودنيا تفتر بيه هذه يمكن اسوء سبوع مر عليه كبرني الف سنه لكدام

الممرضه ضلت ادك بالباب بالكوه فتحتها شافت حالتي وجها انخطف ركضت صاحت للدكتور كبل نقلووني للعنايه المركزه وجيبه ورده او ابر وتحاليل شفت الموت بعيوني اثاري هاي الابره الي انطتنياها الممرضه عندي تحسس منها وسوت بيه هيج

تقريبا يومين اني بالعنايه المركزه باليوم الثالث تحسنت حالتي وكتبولي خروج طبعا اهلي بهل يومين مو اهلي الغريب انكسر خاطره عليه وهمه ولا بحالي صح بنضرهم اني صرت عار بس مهما يكون الاضفر ميطلع من اللحم

يومين مشفت وجه واحد بيهم

باليوم الي ردت اطلع اجه عمي سندني ومشاني وسمعه يكول....شكد عار اشكال صار بيج وما متي

اجاهلت كلامه البيه مكفيني كوه وصلوني ع السياره وصعدت

من ردنه نطلع انتبهت ع السياره تشبه سيارة دكتور فهد باوعت للرقم مالتها نفس رقم سيارته متأكده هيه لان بأخر فتره حفظت كلشي متعلق بي حتى رقم سيارته بس شعده هنا معقوله علمودي لا قابل شدراه بيه هنا اجاهلت هاي الافكار كلت يمكن جاي اتخيل وبعدين كافي الي صالي من وره جنس ادم كرهتهم كلهم

جانت مرة ابويه كاعده بصفي كتلها....ابويه وين

ردت عليه من وره خشمها....طلعوا قبلج

تارة....اريد موبايلي

ايمان....لكوا مكسور

ضليت احوص بمكاني يربي شلون الموبايل هو الي راح يكشف مرتضى لان من جان يهددني جنت اسوي سكرينات وحفضهن وحتى الاتصالات جنت اسجلهن

لازم الكه موبايلي وكشفت هذه الحقير وخلي حياته تدمر مثل ما دمرلي حياتي

شويه وصلنه ع البيت كبل رحت الغرفة ابويه حتى اشوفه بس مرة ابويه صاحت بيه كالت...ميريد يشوفج الخاطر الله ونبيه عوفي ليموت الرجال من وراج

رديت عليها وعيوني دمعت....بس ردت اشوفه

لؤي....صعدددددي الغرفتج يالشريفه

باوعتله بحتقار وصعدت الغرفتي ذبيت روحي ع السرير جسمي نحلان من الادويه وكلبي مكسور وروحي تريد تطلع كمت ردت افتح الباب لكيتها مقفوله عجيب شوكت قفلوها ولا انتبهت

وستمر هذه الوضع سبوع كامل قافلين عليه الباب ومرة ابويه اجيبلي الاكل وترجع تقفل الباب مرة من المرات نست الباب مفتوح ما ادري متقصده بس جانت فرصتي طلعت ورحت الغرفة عمي لان احساسي يكلي موبايلي هناك فتحت الباب واني اندعي من كل كلبي الكه موبايلي ضليت ادور وفعلا رب العالمين ما خيب ضني حاشه لله لكيت الموبايل خذته ورجعت للغرفه يكلك حرامي وبايكله بوكه

لكيته مطفي حطيته ع الشحن ونتضرته يشحن حسيت روحي كاعده ع نار شويه وصار بي شحن فتحته ولكيت كلشي التهديدات والاتصالات فرحت من كل كلبي وكلت اي اخيرا راح يبين كلشي

بعدين لهناك لفتتني رسائل هواي من دكتور فهد فتحتهن لكيتهن كلها رسائل يطمن بيها عليه وبالاخير شفت شي صدمني صورة المستشفى الجنت بيها وحتى صورة الغرفة الجنت نايمه بيها وكاتبلي ...ما ادري اصار وياج بس كلبي نار عليج تارة انتي كسرتيني بهذه غيابج وكمت ما اتخيل حياتي بدونج اني رجال شكبرني شكدني عمري راح يصير بالثلاثين عمري ما عشكت بنيه وجنت اضحك ع اليعشكون لج بس انتي خليتيني احب الدوام ونتضر الصبح يجي حتى اشوف عيونج اني كل يوم اجي للمستشفى واطمن عليج من بعيد لان ما اريد اسويلج مشكله اذا شفتي رسائلي طمنيني عليج

ضليت اقره برسائل ودموعي اصب بس مو بيدي اني ادمرت وفهد يستاهل وحده احسن مني كتبتله....اتمنى منك تنساني وشوف حياتك اني بعد ما افيدك....وحضرته لو احس واحد وداس بنص كلبي ومسحت كلشي يخصه

ردت اروح لبويه شفت شي خلاني مصدومه رسالة من ميساء الصالها اشهر مختفيه مكتوب بيها.... الدمرلي حياتي نفسه دمرلج حياتج ؟! .....فتحت المحادثه وشفت رسائل كلش هواي صدمني صدمة عمري

حور♤♤

من كثر ما بجيت ضليت اشهك والحجي كوه يطلع من لساني كتله....ع عم عمييي ضر ضربني

محمد....شنووو عمج منو هذه انتي مو ما عندج كرايب وليش ضربج

حور...جنت يم صديقتي زينب ورجعت لكيته بالباب اول ما شافني ضل يضرب بيه

محمد....حور لتكفريني ترى والله هسه احجز وجيج

حور....ما ادري مين طلعلي امي تكلي هذه عمج واني عمري مشايفته

محمد....ومنو كلج اطلعين وليش مكتيلي

حور....يووو محمد هدور انته عليه ترى خابرتك طلعلي مغلق

محمد....ماااشي ارجع للعراق ويصير خير ويه هذه الكلب يتقوه ع مره العار سمعي حور بعد ممنوع اطلعين وكعدي بغرفتج واذا وصلج بس كليلي

حور....ماشي

وضلينه نسولف وطمنت عليه وهو ضل بس يوصي بيه احسه يخاف عليه اكثر من امي

مرة الايام مثل ما هيه ونستي الوحيدة بس الموبايل والتلفزون ونزلت برنامج علمتني عليه زينب اسمه برنستا مدري انستا كلش حبيته خلاني اطلع ع العالم الي طلع اكبر من ما اني متخيلته

جنت كل ضني العالم كله بي بس العراق

ومحمد قليل كلش يحاجيني حتى كمت هواي اضوج من هل شي واكضي الوقت بس ابجي

لان شفت مسلسل مال واحد يخون حبيبته ويه وحده وكمت اتخيل محمد لكاله وحده هناك حلوه وجاي يخوني وياها

بحيث كمت كل ما يخابرني اتعارك وياه وهوه يعصب عليه ويكلي شغل صخام قابل رايح اتونس

بس اني ما اصدكه حتى كام يضوج مني وميخابرني

بيوم امي رادت تطلع جلبت وياها كتلها وديني البيت زينب راح يصير بيه توحد من الكعده بالبيت

عاد كوه قبلت وصلتني البيت زينب وهيه مدري وين راحت دكيت الباب طلعتلي زينب فرحت هواي بشوفتي

زينب....اشرقت وانووورت تعاي ست حور دخلي شدعوه هل كد لا سئلين لا تكولين عندج اخت اسمها زينب

حور...عاد مسئلين انتي وتجيني الا اني اجيج

زينب...خيه وين اجيج حتى بيتكم ما اندله

ردت اجاوبها بس انصدمت من شفت ازهار كاعده ضليت صافنه وهيه هم صفنت حرت اسلم عليها لو اسكت

زينب.....شبيجن وحده صفنت بوجهه الثانيه جنجن الهنود بالمسلسلات

كامت ازهار اجتي يمي كالت....هلو حور شلونج

اني كلبي اغبر وبسرعه يسامح كتلها...هلو حبيبتي زينه وانتي

ازهار....وينج شو مختفيه حتى بالمدرسه اسوين روحج متعرفيني

حور.....اني لو انتي

ازهار....شسوي اخويه سيف كلي ابتعدي عنها سمعتها مو زينه وتحجي ويه الولد

باوعتلها صفح وكتلها....كلمن يشوف الناس بعين طبعه

كامت زينب طفرت وكالت....ولج حور اني اعتب عليج ليش مكلتي هذه الولد الصاك خطيبج

حور...شنو منو كلج هل كلام

ازهار....هو محمد كايل السيف وسيف كلي ولذلك اني زعلت عليج معقوله احنى صديقاتج اخر من يعلم لو يمكن تخافين من العين

حور.....لا عيني ترى هذه مو سبب مقنع صدك لو كالوا العذر اقبح من الفعل

زينب...لا ترى اني ويه ازهار بكلامها هذه الولد مبين عنده شي وياج من احترك بيتكم اجه مثل الخبل حتى يساعدج ومن حجه عليكم ابو الايجار كومه بالكاع وغيرها وغيرها

حور...اي هو يحبني واني هم معجبه بي بس مو مخطوبين

ازهار....ها طلع الحجي

حور....اي وشنو قابل الحب حرام لو عيب المهم ممسويه شي غلط يغضب ربي

ازهار....يله بيها الخير اني اترخص

زينب....وين بعدج

ازهار....لا اليوم عدنه طلعة وريد اروح ابدل

راحت ازهار وزينب وصلتها للباب وجتي يمي سئلتني الف سؤال عن محمد واني كله اجاوبها بالمختصر لهناك كلتلي....اكلج تعرفين ست سارة

حور...يي شبيها هاي ام العربي

زينب....ولج هاي جانت تاخذني من جنت ادرس ومن وراها بطلت الله لينطيها

حور.....ليش بطلتي

زينب...جانت تضربني وتهين بيه كدام البنات بدون سبب واني كرهة المدرسة وبطلت اذا اشوفيها اريدج تنتقميلي منها وشتردين اطيج

حور....يا فلك طرج شهل سوالف هاي دسكتي عمي ويني وين هل سوالف بس تعاي اكلج شو كل ما اجيكم اشتم هاي الريحة مال البخور

وشموع ونسوان يطبن يطلعن شنو السالفه شو احنى محد يجيبنه بس عمي الخبل

زينب....اكلج بس مو تكولين الاحد اموتج

حور...هاي شبيج المن اكول اشو امي خرسه وبس انتي وزهار صديقاتي

زينب....احنى عايشين بالخير من وره السحوره امي اسوي للنسوان بس امانة الله هو مو سحر مساعده مثلا وحده تريد تخلي رجلها يتعلق بيها وميخونها تجي الامي مثلا وحدها قسمتها واكفه تمشيها امي وزوجها خلال شهر او مثلا وحدها بيها تابعه يعني هواي سوالف اذا رتوا شي تعالونه شغلنه كله مضبوط

حور... اني جنت مطفيه وما اعرف هاي السوالف عبالي سحر شلون بالمسلسلات وفلم سندريلا من كلبها اميره هذه كل عقلي جان فا كتلها....يي ميخالف اكل الامي الله يكثر من امثالكم والله خوش اساعدون الناس بلكي امج تركعنه بسحر تخلصني من عمي وتكلبه مطي حتى اضل ادك بي

زينب ضحكت وكالت....ورقي حبي

حور....لا هنا نزاعل

زينب....اكلج هسه اجيج

راحت شويه وجتي جابت علاكه جبيره مال ملابس كلتلي....امانة الله ذني نضيفات وجدد محد لابسهن بس ميصيرن عليه اخذيهن

حور...خاف بيهن سحر

زينب...طاحضج ولج احنى منسوي سحوره ابلاش

اترددت اخذهن بس لحت عليه فا شلت العلاكه وطلعت رجعت البيتنه لكيت الباب مفتوحه عرفت امي موجوده دخلت جوه

وهيج مره اسبوع ثاني وخلصت العطله وهذه الاسمه عمي كل يوم يجي البيتنه بليل ويطب بغرفة امي وجهه الفجر يله يطلع واني من خوفي اقفل باب غرفتي بحيث ولا فد يوم اجه وصار وجهي بوجهه لان اخاف منه

طبعا الدوام يبدي باجر واني طلعت ملابس الطتنياهن زينب لان ملابسي كلهن احتركن همزين لكيت بيهن صدريه وقميص لبستهن صارن كصاف عليه بس حلوات ضليت افتر كدام المرايه وتخيل روحي سلطانه لان شفت مسلسل حريم السلطان وتأثرت بي

لحد ما تعبت من الجذب نزعت الملابس وغسلتهن وكيوتهن وعطرتهن طلعن جدد وحضرة جنطه عاديه مو مال مدرسه لان ما عندي احتركت مال مدرسة

حطيت بيها دفتر وقلم وكلت اروح اتوسل للمديره بلكي تنطيني كتب جدد

كملت كلشي ورحت حتى انام تقريبا نص الليل وسمعت قفل مال باب عرفت عمي اجه كلت شعليه

رجعت نمت شويه وفزيت ع ثكل ع جسمي فتحت عيوني اريد استوعب شنو النايم عليه لان الغرفه ضلمه من ركزت طلع عمي

ضل يبوس بيه مبين مو طبيعي وبي ريحة غريبة كمت اصرخ بعلوا صوتي

احس هاي الاغنية تمثل حال تارة وحور 💕

يتبع....