رواية في احضان الذئاب الفصل الثاني والعشرون 22 - بقلم الكاتبة قمر الجنابي

البارت العشرين🎉💕

بقلمي الكاتبه قمر💁‍♀️🌸

لاتنسون التصويت لدعمي حتى استمر 😍✌

باااااارت هدييييه الاحلى متابعين🎉🎉🎉🎉💕

يمتى الليل يفهمني ويجيبك طيف

تارة♤♤

وبويه يكله خلي تحترم نفسها بالاول لهناك كله اخوها.... خاف الله الحرمه حامل

عم الصمت لثواني وراها سمعت ابويه يكول....لاحول ولا قوة الا بالله ماشي هسه اجي وياك نروح نجيبها ولو اني كايليها ما اريد جهال بعد بس يله هاي هدية من الله والحمد الله

سمعت صوت وراي نزيت ودرت وجهي شفته عمي كلي....شعندج هنا ع شنو تتصنتين

تارة ضيقت عيوني وكتله....اشرقت وانورت وانته وين جنت مختفي صالك اشهر ابويه كلب الدنيا عليك وشبي وجهك مورم شنو هم طاب بعركه وكاتليك

رد عليه بنبره حاه.....انجبي لج سا*** قابل اني مثلج مدمغه

تارة....لا عمو لا انته احس مني اني شنو

ورحت عنه وكلت بصوت ناصي ....الله ميحارب بحجار هاي حوبتي

لؤي...شنو لج

رجعت الغرفتي وضليت افكر معقوله مرة ابويه صدك حامل بس اني بعيني اشوفها تبلع مانع

اوف ما ادري افرح اضوج خاف ابويه تجي بنيه ويدللها وينساني همه التؤم كافين ماخذين كل اهتماته

هسه اني هم بطرانه البكري مخلفه خمس جهال وشوف تفكيري غميت روحي

للمغرب يله اجه ابويه وزوجته الضحكه شاكه حلكها صارت بوجهي كتلها...الحمد الله ع السلامه البيت فارغ بدونج ومبروك البيبي الجديد

تقربت عليه باستني براسي وكالت....الله يسلمج توته يوم الالج وتزوجين ونشوف جهالج

ابتسملتها مجامله ورحت للمطبخ كعدت اثرم بالخيار حتى اسوي زلاطه وكلام مرة ابويه براسي يوم الالج وتزوجين  كبل ذكرته وجريت حسره ....اخ يا فهد من اذكرك احس يتحرك بداخليي شعورين شعور الحب وشعور الخوف

صح كلبي مطمله ومايل اله يعني نفس ميكولون مرتاحتله عكس مرتضى جنت ابد ممرتاحتله بس مع ذلك خايفه انصدم ورجع اتعذب لان بعد ابد مابيه حيل هيج سوالف

لذلك قررت انتضر يرجع الدوام وقنع ابويه يرجعني الدراستي وفهد اذا مكتبولي اكون من نصيبه فا راح اكون لو الدنيا كلها توكف بطريقنه

ايمان....يمعوووده تارة تارة شجاج صالي ساعه اصيحلج وين سارحه

تارة....ها خاله اسفه ممنتبها

ايمان....اكلج شخبار البيت اشصار مصار بغيابي ابوج وين راح وين اجه

تارة....ماكو شي كالعاده حياته مستشفى وعياده

ايمان...وراتب ما استلم مو خلص الشهر

تارة....يا خالة شمدريني اني طابه ابجيبه....بس ابشرج اصالحنه

ايمان...يا صدك شلون قبل يصالحج

تارة....لا ابويه حنين ادري بي ميشيل عليه المهم شنو هل خبر الحلو

ايمان...سكتي ولج اني مو حامل بس كلت هيج لان اخاف ميرجعني ويزوج عليه لان ابوج يخوف زعله

تارة....يا خاله شلووون هيج اسوين جان اجيتي وعتذرتي منه تدرين بأبويه يتقشمر بحجايتين حلوات

ايمان...هسه شمدريني هذه الاجه ابالي

تارة...وشسوين ع بطنج

ايمان....لا اجم يوم وكله مات

ردت احجي دخل عمي وجهه مكلوب ويباوعنه صفح كال....العشه وووين

تارة...هسه جاي يصير

لؤي....اي يله جوعانين مو بس حايرات بسوالف ...وطلع

باوعتلي مرة ابويه وكالت بهمس....هذه شجابه

تارة.....يمعوده متدرين بي عنده سبع اراوح مثل البزونه يختفي اشهر ويطلعنه جنه خلصانين منه

لؤي....العشششششه

طفرت من الخرعه ورحت اكمل العشه من خلصت شلت الصينيه لكيت ابويه وعمي جاي يسولفون ومبين الجو مكهرب لان ابويه ضايج من عمي

عاد خلصوا العشه شلت الصينيه غسلت الماعين وصعدت فوك ودردم بكلبي شنو هاي شو عاشت اللحضه صدكت نفسها حامل لا ساعدتني ولا شي بس كاعده وتتلزك بأبويه يكلك هستوها مزوجته وهيه كل لواكتها ع الفلوس المهم شعليه لفيت راسي ونمت

كعدت ثاني يوم ع صوت مرة ابويه ترزل بيه وانواع الغلط ....ولج تردين تهجمين بيتي ادري بيج تكرهيني بس اني حاسبتج مثل بتي وما مخليتج تحسين بأمج لافيها الموت

اني مفتحه عين وساده عين مجاي استوعب ع شنو هل رزايل بس من جابت طاري امي هنا ما اتحملت وطكيت بوجهها....انشالله انتي هم يلفيج الموت ولو الموت مياخذ بس الزينين هاي بدل متكولين الله يرحمها هيج اسوين ادري شمسويتلج امي الله اكبر لا الميت يخلص منكم ولا العدل

ايمان....او الج عين تحجين ام الولد لو بيج حظ ميلكوج ابيت مال دعارة

تارة...الحمد الله هذه جان اختبار من ربي ونجحت بي بعد ميهمني هاي النفسيات المريضه التحجي عليه

ايمان....شلون تكولين الابوج اني مو حامل وجذابه هو هذه الي يأمنج ع سر خليتي يكلب البيت ع راسي

طفرت من الخرعه....يا هو اني يمته شفت ابويه اشو كملت العشه وصعدت فوك وخليت ونمت وليش حتى اكله تدرين بيه ما عندي هل حركات

ايمان...جا منو كايله اكو غيرج يدري

تارة....وروح امي الماكو اعز منها ما كايلتله

ايمان....ولج خاف عمج جان يصنت علينه من طب وباوعلنه صفح

تارة....ما ادري بس تأكدي قبل مضلميني

ايمان...اي ماكو غيره هل حقير

باوعتلي حسيتها رادت تعتذر بس بطلت نزلت جوه وبس الصياح هيه وابويه

واني كلبي خلصان حطيت سماعات بأذاني وطلعت قران بصوت حسام الدين عبادي كلش ارتاح وهدئ من اسمع صوته

مرة الايام مثل بعضها لحد ما بيوم ابويه صاحلي كلي.... بابا سوينه جاي بس لبسي جبه وحجاب

تارة...ليش بابا منو يمنه

احمد...بنيتي خطار صديقي

تارة....ها تمام من عيوني

رحت سويت الجاي ولبست جبتي وحجاب وشلت الصينيه اني وجاي ادخل سمعت ابويه يكول للرجال....مبروك الترقيه الملازم اول تستاهل والله ما انسه وكفتك ويانه لؤي حجالي كلشي

رد عليه صوته خشن كلش يخوف.....ما سويت غير واجبي ليش وكفاتك وياي قليله

احمد....اخ عزيز والله

فتحت الباب ...وكلت سلام عليكم ...سمعت بس ابويه رد

شلت عيني شفت واحد كلش ضخم واسمر وماعنده لحيه بس شوارب كبل دنكت لان استحيت بس الكبر شدعوه ميرد السلام

احمد....عشتي بنيتي حطي الجاي هنا

حطيته وشردت بس منو هذه الغثيث مجاي اذكره معقوله الضابط الساعدني بس جنت مخبوصه حتى ما اذكر شكله

بس عمي الحك ينكال كلش صاك مدري مين ابويه يطلع هل حلوين

تسريع الاحدات........

بعد مرور اربع سنوات.......

تنويه!!!

حبايب سرعت الاحداث لان مجان صاير ويه بطلاتنه احداث مهمه لذلك سرعتها للاحداث الاقوه حتى ميصير ملل

مرة اربع سنوات كانو اربعة اشهر فعلا الوقت يمشي بسرعه ومنحس بي

بهل فترة مريت بأيام صعبه وايام حلوه لان هاي الحياة متبقه ع حال واحد

طبعا رجعت الجامعتي مع انو واجهت صعبوبه بهل شي ورقنوا قيدي بسبب كثرة الغياب بس الحمد الله بفضل معارف ابويه رجعت

وعدت المرحلة الثانيه وفهد ماكو وصرت ثالثه وفهد ماكو وصرت رابعه وفهد ماكو وراح اصير خامسه وفهد هم ماكو

غيابه عذبني هواي مرت هل اربع سنين والله شاهد ما راح من بالي لحضه حتى شعور الندم يعيش وياي ليش ما سولفتله كلشي ليش ما خليته يخطبني وووو افكار هواي تجيني

رغم ذكرياتي وياه جدا قليل ويمكن هذه سبب عذابي لان جاي اذكرها بكل تفاصيلها

طبعا من رجعت للجامعه الي عرفته انو انقل الغير جامعه ومحد يعرف اخباره حتى حساباته كلهن سادهن

بس دائما اكو امل بكلبي يكلي قصتج ما انتهت وياه والله حتى صورة اله معندي بس اني لان احب ارسم ومن كثر ما ملامحه لازكه ابراسي رسمته وطلعت الرسمه طبق الاصل عنه وهل شي الوحيد الي ساعدني من اشتاقله اشوف الرسمه

طبعا اليوم اكدر اكول يوم مميز لان المشيه مال عمي واخيرا خطبله مره وراح نزوجه ونخلص منه وهم باجر اول يوم الي بالمرحله الخامسه متحمسه لان اخر مرحلة وراح اتخرج وعود احنى الكبار وكذا بعد منتحاجه

تارة....ها بابا تحتاج شي بعد

احمد....لا بويه بس جيبيلي سويج السياره خل نتوكل ع الله

تقربت ع ابويه وهمستله....بابا طالع كيكه يكلك انته العريس

ضحك وكال....ولج اسكتي لا اسمعج ايمان اضل تغرد

رحت جبتله السويج خذاه وطلع ضل يدوس هورن العمي وعمي ماكو ما نزل

ادري لو عروس هم خلصت صعدت اشوفه وين صار رحت ع غرفته دكيت الباب ودخلت كتله....عمو وين صرت ابويه والوادم كلها منتضرتك

لؤي...ولج البنطرون مال قاط مينسد هسه مين طلعلي هل كرش

تارة...عمو انته مكرش من زمان

لؤي...هسه بدل ما جاي اصنفين عليه شوفيلي بنطرون

تارة...اجيبلك من ابويه

لؤي...لا دوري بالكنتور مالتي كون نفس لون القاط 

رحت اكلب بالكنتور بالكوه لكيت واحد ورهمنا وطلع خلصنه منه

تقريبا للمغرب واجه ابويه وعمي وكالوا الحمد الله عدت المشيه ع خير وقرينه الفاتحه مرة ابويه طكتها بهلهوله بحيث كلنه اخترعنه ادري مو السواد عيونه بس تريده يزوج تخلص منه بحيث تحس الهلهوله طالعه من كل كلبها

طبعا اني بكلبي ما راضيه ع الزواج هذه لان الابنيه عمرها 16 سنه وعمي نهاية الثلاثين خطيه من هسه شايلتلها هم شلون راح تحمله وتحمل خباله

مشه باقي اليوم بشكل طبيعي بس عمي اليشوفه عوزه جناحات ويطير من الفرحه

طبعا لليل وحضرت ملابسي لان باجر اول يوم دوام ولازم اكو حماس من كملت لفيت راسي ونمت وما جنت  ادري باجر اشضاملي من مفاجئات

كعدت الصبح ع صوت المنبه غسلت وبدلت وحطيت عطر ونزلت جوه لكيت ابويه منتضرني فا طلعنه كبل وكالعاده نفس الكليشه بدايه كل سنه جديده ضل يوصي بيه وديري بالج ومن هل كلام

وصلت ع جامعه بس كلبي مدري شبي يرفرف كلت يمكن لان مشتاقه للجامعه وجوائها 

اول ما طبيت صارت بوجهي مرام كلتلي ....اني اول مره اشوف كمر يطلع بالنهار شنو عمي حليانه وسمنانه

تارة....يا هلا بمرومه والله كلش مشتاقتلج انتي الصديقه الوحيده الصالج اربع سنين وياي وما فد يوم صدمتيني

مرام....اسكتي بابا لو احجي عنج منا الباجر ما اخلص هسه عوفج من هل دراما امشينه للنادي كلش جوعانه

تارة....بسم الله بدينه بالجوع مالتج ولا اشبعين امشي يله

رحنه نتمشه للنادي وكل شوي اشوف وحده من صديقاتي اسلم عليها ما شاء الله كلها فرحانه بالسنه الجديده وبعد جم يوم نفسهم اشوفهم يبجون من الفاينل ويسبون الدوام هههه

اول ما ردت ادخل للنادي اجمدت بمكاني من شفته وكلت بشفايف يرجفن ....فهد؟!!!!!

حور♧♧

حور....ديله ماما هو كوي صالج ساعه عبالك جاي تخيطين

ام حور....يله كملت روحي لبسي اشوفه عليج

خذت الثوب وطفرت للغرفه لبسته طلع يجنن عليه ضليت صافنه وفتر ع المرايه

حور...اكلج زينب مو جنه عيب المفضوح اكثر من المستور

طفرت ازهار من يمها....لا عيني مو عيب بعد انتوا رايحين تعقدون

زينب...ولج يله تعاي احطلج مكياج راح يجووون

حور....يله خيه لبخي لبخي

كعدت تحطلي مكياج وجيب هذه ترد هذاك طبعا زينب خبيرة مكياج ما شاء كلش تعرف تحط 

كل شوي اريد اطفر اشوف بالمرايه بس متخليني لحد ما سمعنه هورن جوه كبل طفرت....ولج اجو ولج

زينب....هووووب هوب يمعوده شبيج راح تخربين المكياج

حور...ما ادري توترت

زينب....يا سبحانه مغير الاحوال وين حور الي لسانها اطول منها بخمس مترات

حور....ولج هسه الوضع يختلف صارنه خمس سنين نحب بعض راح نشيب واحنى متانين هل لحضه وصارت ميت الف عركه وميت الف عقبه يله كدرنه نوصل لهل اليوم شلون مترديني اتوتر

ازهار....اي عمي حقها الابنيه بس ترى اليوم خطوبتج مو عرسج جا بالعرس شسوين

عفتهن يحجن ورحت ع المرايه اباوع الشكلي ومصدومه اجتي زينب كلتلي....ها حور شنو فصل النت يمج

حور...العفو هاي منو

زينب...انتي

حور....تدرين اول مره بحياتي احط مكياج وشكلي كلش اختلف طلعت جني ثلاثينيه جاده

زينب....تعاي ازهار شوفي الجمال

ازهار....هلا هلا اليوم استاذ محمد يتخبل

حور....هو متخبل من كاعه

اجتي امي كامت اصيح....يله ولج حبيبج سبه الدنيا يكول وين صارت

حور...اي اي جايه

رحت لبست جبه فوك ملابسي ولبست حجاب لان رايحين للامام وهناك ميصير تدخل المامحجبه

حور...متجن ويايه

زينب...ولج فشله من عيالج روحي انشالله بحفله خطوبتج نذب عضام

طلعت وكلبي يدك اسرع من المولده نزلت من درج الشقه وامي نزلت وراي اول ما فتحت الباب محمد التفتلي صاعد بسياره رحت حتى اصعد وياه

بس شفت اخته الجبيره كاعده بغير سيارة وتأشرلي اجي اصعد وياهن بقيت متحيره محمد يأشرلي اصعد واخته تأشرلي اصعد تالي استسلمت ورحت بسياره الي بيها اخته وامي راحت ويه محمد

سملت وصعدت كلتلي اخته ريام ....اشرتلج تجين ويانه لان ادري بأخويه مو راحه وانتي عين البارده عليج طالعه تخبلين ....وضحكت

اني بقيت ساكته مدري شبيه مشاعري مخربطه فرح وخوف وحماس وصايره مشكل

طبعا الطريق كله محمد يكسر علينه ويصير بجهه الاني كاعده بيها ويباوعلي وخواته يضحكن ويكولن....يا تخبل الولد

لحد ما وصلنه يم الامام الكاضم (ع) لان هناك اتفقنه نعقد

وكفنه السيارات ونزلنه اول ما فتحت الباب صار بوجهي محمد كال....شنو هل مكياج

طبعا حجايتين بيهن حظ ما عرفت ارتب ضليت اسويله...ها مو شسمه

محمد....راح تخليني امشي وتعارك ع الي يباعولج

ابتسمت ودنكت هو كمش ايدي وكال...امشي

حسيت روحي رادت تموع استحيت كلش من اهله فوكاها محمد شطوله الي يشوفونه يكول هاي بته رغم اني لابسه كعب

ضلينه نمشي ومحمد كامش ايدي حيل عبالك راح اطير منه وفوكاها كل شوي جسمه يطخ بجسمي وهو يكلي...اشتعلوا

واني مثل الاطرش بزفه لحد ما وصلنه للامام بس ما دخلنه للداخل كعدنه بره واجه الشيخ واني ارجف مثل السعفه ما جنت ادري بروحي هل كد جبانه وريام اخت محمد اطتني قران وكلتلي اقري بي لحد ما يسئلج الشيخ

كعدنه كلنه ومحمد مقابيلي وشيخ يمنه سئلني كم سؤال وكتله نعم وسئل محمد وهم كال نعم وهنا تعالت صوت الهلاهل وامه طشت علينه جكليت وامي هم جانت ناذره خبز العباس (ع) كامت وزعته

ومحمد كل ما اشيل عيني اشوفه يباوعلي واني ارجع ادنك

لحد ما كملنه كلشي وطلعنه ردت اركب بسيارة ابو بس صاح بيه محمد وكال...شنو مزوج امج اني تحطيها يمي وترحين هناك

ضحكت وردت اشرد بس جرني وصعدني وكلها تضحك وفرحانه توجهنه للبيت بس شو من وصلنه محمد عبر بيتنه كتله....ترى بيتنه منا

محمد...شنو ادليني انتي

حور...لعد وين رايحين

محمد....اراويج غرفتنه

حور...شايفتها مو اني وياك اختاريناها

محمد....هسه غير تسكت شبيج تستحين بابا بعد كم يوم اصير رجلج

بقيت مبتسمه ومدنكه وصلنه ع بيتهم دخلنه جوه ودخلن ورانه خواته وامه وامي ومحمد يطرد بيهم ويصيح يمعودين عوفوني وين لاحكيني

وهذني يضحكن ويصيحن...ها طيور الحب

لحد ما طردهن وطببني بغرفته وسد الباب وجرني اله وكال بهيام ....احبج

يتبع....