رواية في احضان الذئاب الفصل الخامس والعشرون 25 - بقلم الكاتبة قمر الجنابي

البارت الثالث والعشرون🎉💕

بقلمي الكاتبة قمر💁‍♀️🌸

لاتنسون التصويت⭐🙏

بلكت المامر كبل هسه يمر💔

باااارت طوووويل لعيووون الحلوين💕

حور♤♤

دكتور اركان...البقيه بحياتج امج انطتج عمرها

فتحت عيوني اريد استوعب الخبر بعدين كمت اصفك بأديه وضحك...لايابه هاي عود انتوا دكاتره وكلشي متفتهمون مابيها شي امي كل مره تتخربط وبعدين اصير زينه ونرجع سوه للبيت فا بلا هل شقه الثكيل

اركان...بابا هذه حال الدنيا هم السابقون ونحن اللاحقون دزينه الجثه للطب العدلي لازم واحد جبير يجي يستلمها ويكمل الاجراءات

هنا كمت اصيح....شبيك انته مخبل شنو طب عدلي شنو اجراءات اكلك امي ما ماتتت شبيك انته متفتهم

ضليت اصيح اجن الممرضات عليه يهدئني بس ما اتحملت الخبر كمت املخ بشعري ساعه اضحك ساعه ابجي لحد ما بعد محسيت ع روحي

كعدت الكانونه بيدي وصوت الاجهزه مرعب وناس اسولف وناس تبجي وناس تضحك شويه وصحيت ع نفسي وذكرت الي صار قبل ما ينغمه عليه معقوله امي ماتت معقوله راح ارجع للبيت وما الكاها كدامي لا اكيد هذه حلم

ضليت اضرب بروحي حتى اصحه طبعا الخبر من كثر ما صدمني حسيت روحي دخلت بصدمه صح الموت حق ولا اعتراض ع حكم الله بس اني ما عندي احد مقرب بس امي وما صاير وياي هيج موقف وما اعرف شلون اصرف وشسوي

صح جانت قاسيه وياي بس ميهون عليه هاي عشرت عمر وهيه الربتني واحسن بالف مره من اهلي الحقيقين

شويه واجه دكتور اركان ضربني ابره بالمغذي وكلي...ادري الخبر السمعتي كلش صعب عليج لان اني مريت بالي مريتي بي من توفه والدي ...حسيته شلون اختنك رجع كلي...انتي شنو ما عندكم احد بالبيت

ضليت اون بكلام ممفهوم لان حتى ما بيه حيل احجي

اركان....عيوني اعتبريني ابوج اخوج واي شي تحتاجي كليلي واذا ما عندج بعد مكان ترحيله تعاي وياي البيتي وسكني ويه عائلتي وما راح افرق بينج وبين خواتي

بس كلي هيج واني طكيت من البجي وكمت اصيح.....يارب الغريب حن عليه واهلي لا حتى ما كلفوا نفسهم واجوا يشوفون هاي الطفله النطتها حياة دروس اكبر من عمرها بهواي شسوي يا اللهي حتى اخاف ارجع للبيت وحديييي شلون ما راح الكه امي شلووون صدك ميحس بالنعمه الا الفاكدها

اركان....بابا هدئي مو زين عليج الله يرحمها راحت للارحم مني ومنج لتبجين هيج راح تأذيها بكبرها بس انتي شنو عندج اهل وينهم لعد

ما رديت عليه هو كلي ...براحتج وطلع

واني ضليت نايمه ع السرير والله يعني وضعي يصعب ع الكافر ما انسى هذاك اليوم شكد جان اسود من اني وحدي وما ادري شسوي وين انطي وجهي

ما ادري شكد نمت بس كعدت الفجر ع صوت واحد يصيح بأسمي فتحت عيوني وكلت...منوووو انته

...شبيج اني عمج لؤي البقيه بحياتج حور

حور.....ها عمي والله زين ذكرتوا اكو بنيه من دمكم ولحمكم ذابيها بشارع

لؤي....هسه بلا هل حجي ترى ارجع وخليج وحدج تركعين راسج بالحيطان

هنا خفت كلت لا يسويها صدك منو يضلي منو يدفن امي منو يسويلها فاتحه كتله بدموع....لا حباب بس ادفنها الامي اني وحدي شعرف وشكدر اسوي

لؤي...لا روحي الخطيبج الشهم خلي هو يدفنها

حور...اني سامعه الاضفر ميطلع من اللحم لعد انتوا شنو من مله ملتكم ولكككك هاي الربت بت اخوك وجانت زوجتك

هو فتح عيونه حسيته كلش انصدم كام يمسح بكصته والعرك ينزل كلي بتوتر....سولفتلج يعني

حور...اي حجتلي ولابد يجي يوم يطلع الحق وحوبتي تطلع بيك ولك اني تطعني بشرفي ولك اني اشرف منك ومن امثالك متخاف الله يطلعها ابتك بالمستقبل فد يوم

ضحك وكال....ما اريد بنات اذا اجتي بنيه ادفنها مثل ما دفناج اني وبوج بسراديب الماضي وديري بالج تفكرين توصلين الابوج وسولفيله هل كلام ترى اسود عيشتج فوك ماهيه سوده

ما اتحملت كلامه كمت تفلت عليه اتقرب عليه وكال....ليش تخليني ادزج وراها

اركان.....منو حضرتك

لؤي...انته المنو

اركان...اني الدكتور

لؤي...اي وهاي بت اخويه واجيت اخذها

اركان باوعلي بستفهام وكلي...هذه عمج؟

باوعت العمي يخوزر بيه والله خفت واني منا روحي رايحه كتله...اي عمي

اركان...تمام اسف ع الازعاج

واجه فتح الطبله مالتي قراها وتقرب عليه حط ضوه بعيوني من كمل كال....صحتج ممتازه بس كتبتلج فيتامينات جبيهن من الصيدليه وهسه راح اكتبلج خروج

لؤي...تسلم دكتورنا مقصرت

طلع الدكتور وجه عمي عليه كال بأحتقار....يله حضري روحج خلي ارجعج للبيتكم وروح ادفن امج هاي هم طلعتلي صفح

حور...هاي التكول عليها امج جانت مرتك وانته حتى ما عندك اي احترام للميت جاي تعزيني ولابس احمر وعطرك سابقك

باوعلي صفح وكال....احسلج احجي عدل ترى بقيتي جوه رحمتي

ضحكت بحركه وكتله....لا غلطان خلي يجي خطيبي وسولفله كلشي وشوف شيسوي بيك

ضحك بصوت عالي وكال....ولج غبره وطفله ما اعتب عليج رايح للخارج هناك يكو** عليج وانتي ضلي غشيمه ويله طلعي كبالي بلا حجي زايد.... وغمني

طلع من الغرفه واني اريد اسيطر ع روحي وما ابجي بس ما اكدر دموعي تعاندني وتنزل

طلعت برى اول ما شافني مشه واني مشيت وراه اسمعه يدردم ويكول...هسه شكد راح اتقطني هاي المستشفى ع وحده ميته ...دار وجها وكال....ما لكيتي غير مستشفى خاص هاي الحكوميات بكد الزبل

راح ع الاستعلامات وكلها انطينه الفاتوره كلتله واصل حسابكم باوعلي وكال...منو دفعهن انتي ولج

حور...لا ميلي قابل

لؤي....امشي بعد احسن

رحنه ع سيارته صعد هو اني فتحت الباب ردت اصعد وره عاط بيه وكال....ولج سايق الخلفوج صعدي كدام يله

باوعتله بأحتقار وكعدت وره من صعد راد يحجي كمت اصرخ ....كااااااافي اني بيا حال وانته هيج تكلي كاااااافي اذا حجيت بعد اكتل روحي وانته المسؤول

هيج يله خلصت منه وسكت ما حجه شي وصلت ع الشقه اول ما دخلت حسيت كلبي انقبض

لؤي....ابقي هنا ولطلعين ابد اكمل الاجراءات ونسويلها فاتحه بسيطه بينه احنى الزلم ماكو نسوان

حور...اريد اشوفها كبل مدفنوها

لؤي...احير بيج بيها اوديها للمغيسل ومن نروح للنجف تعاي وياي عود

وطلع وسد الباب كبل ركضت ع موبايلي حتى اسولف لمحمد كلشي صار وياي بلكي يرجع علمودي لان كلش محتاجته بهل وقت وخايفه وحدي فتحت موبايلي كلت هسه الكه بالقليل خمسين مكالمه بس تفاجئت ولا مكالمه ادك ع رقمه مال الخارج يطلعلي مغلق ياربي هسه اني بيا هم احير ضليت ابجي وون....يمه وين رحتي والله اني احبج رجعي للدنيا كتليني شسوين سوي بس لترحين وتخليني وحدي يممممه منو الي بعدج منو يلبسني البدله ويزفني بيده يا ضوه عيوني

ضليت ابجي لحد ما غفيت بالكاع كعدت ضهري متكسر باوعت للساعه بال11 الضهر كمت غسلت وجهي طبعا مماكله بس ع المغذيات وجسمي يرجف بس ما اشتهي العسل كمت حتى اغسل صارت كبالي غرفة امي خفت ادخللها لتهاجمني الذكريات

رحت غسلت

وأديه ما اكدر اسيطر عليهن يرجفن كملت طلعت ملابس سود لبستهن وحطيت شال فوك راسي وطلعت كلت اروح البيت اهل محمد بلكي يعرفون شي عنه

ضليت امشي بشارع وعيني بالكاع وصلت البيتهم بالباب واكفه سيارة محمد اذكرت بالعقد مالتي من امي صعدت وياه وهوه كام يدردم ضليت اباوع للمكان الكعدت بي امي وبجي

تالي رحت دكيت الباب طلعتلي اخته الجبيره ريتاج اول ما شافتني انصدمت من منضري وكالت....يا شبيج حور

حور....محمد وين ليش اتصل عليه ماكو

اول ما كتلها هيج كامت تبجي...ولج سكتي ابويه وامي متخبلين يدكون عليه وماكو ميرد

كبل وكعت بالكاع وكتلها واني انوح...ولج ريتاج كلبي بعد ميتحمل يفكد عزيز ثاني

ريتاج...يا شبيج ليش منو الاول

حور...امي توفت

ريتاج.....يااااا شلون وشوكت ليش مندري

اجتي عليه كومتني ودخلتني بالاستقبال ونطتني ماي وكعدنه نبجي سوه

ريتاج....والله القاهرني حالتج تكسرين الخاطر منا امج ماتت وانتي ما عندج غيرها ومنا اخويه الاخباره انكطعت

حور....لا مابي شي محمد كلبي هيج يكلي

رادت تحجي دخلت امها حضنتني كبل وضلت تبجي ما ادري ع ابنها ع امي بس سويناها فاتحه وكعدنه نبجي كلنه

لحد ما كمت ع حيلي وكتلهن...اني راجعه للبيت خاف عمي يجي وميلكاني

ام محمد...براحتج يمه والله كسرتي كلوبنه الله يكون بعونج ويصبرج

اني فتحت عيوني كل ضني تكلي ابقي يمنه شلون تنامين وحدج حتى ريتاج اشوفها تندس بيها كلت خطيه اكيد نست لو ما انتبهت لان كلبها محروك ع ابنها وبالها يمه

كامت ريتاج وصلتني للباب كلتلي...اكلج مسوون فاتحه

جريت حسره وكتلها....عمي كال نسوي بس للزلم

ريتاج....زين ابقي يمنه شلون تنامين وحدج بليل

حور....لا عادي متعوده اهم شي اذا سمعتي اي خبر عن محمد كليلي ترى والله كلبي نار عليه وبس الله يدري شكو بكلبي من حزن

ريتاج...الله يصبرج يروحي تردين اجي وياج

حور....لا متقصرين

خليت وطلعت اول ما وصلت البيتنه لكيت عمي واكف بالباب اجه عليه وكلي.....اني مو كتلج لطلعين

حور....رحت البيت خطيبي شتريد جاي

لؤي....حضري نفسج بليل نروح للنجف ندفنها

كتله بحركه...يعني صارت صدك

وبعد محسيت ع روحي كبل اغمه عليه ما ادري من الصدمات مدري لان مماكله شي

كعدت لكيت روحي بغرفتي وازهار وزينب فوك راسي وصوت نسوان بصالة

كبل اجن عليه وكالن سوه..البقيه بحياتج حوري

ازهار...حبيبتي والله انكسر كلبي عليج بس سمعنه امج توفت اجينه طايرين اني وزينب

كتلهن بصوت مبحوح....ويرحم امواتكم

زينب...يا داداه شبيج راح تموت البت.... كومي سوينالج شوربه

اشرتلهن بيدي بمعنى...ما اشتهي

ازهار....غير اصيرين قويه وراج طريق طويل

كامت زينب توكل بيه وزهار تقره قران يم راسي الحمد الله صح اهلي مابيهم خير بس الله عوضني بصديقات ومتأكده لو محمد هنا مجان عافني ثانيه بس هم حضي كلها اجتي سوه

شويه وسمعنه صوت واحد يسوي...احم احم

زينب لبست حجابها اما ازهار فا اصلا ما محجبه دخل عمي كال...يله حور حضري نفسج ...وطلع

ساعدني ازهار وزينب وحده حطت شال ع راسي وحده لبستي الجبه طلعت من الغرفتي النسوان ضلن يسويلي البقيه بحياتج حتى مجاي اعرفهن منو من كثر ما بالي مشوش

نزلت الدرج بالكوه وزينب كلتلي...حبيبي حور والله لوبيدي اجي وياج بس امي ما قبلت

ازهار...اي والله يعمري اني هم ابويه كال طريق طويل هسه راح نبقه هنا نعزلج البيت واي شي تحتاجي كلينه

اشكرت منهم وصعدت ويه عمي بسياره ونطلقنه رحنه للمغسيل ردت ادخل ما قبل عمي كلي ابقي هنا ضليت اراقب كل شوي يطلع كبر ويصيحون لا اله الا الله كلشي جان يقبض الكلب ويخوف

شويه وجو زلم يصيحون لا اله الا الله

شايلين تابوت حطوا فوك سياره ستار اكس واجه عمي شغل السياره مالته ومشه وره الستار اكس

وطريق كله اني بس ابجي ولا سكتن عيوني شكد حاولت اقاوم بس ما كدرت

قريب منوصل ما ادري بروحي غفيت عمي كعدني كال...يله وصلنه نزلت من السياره امشي بصف عمي وتعثر بجبه وزلم كدامنه شايلين التابوت دخلوا للامام زوروها وطلعوا واني اليشوفني يكول هيه الميته مو امها بعدين توجهوا للمقبره ردت ادخل اكو نسوان جانن جايات ويه عمي كامن يصيح ويكولن...حتلو امها بنيه بعدها صغيره ميصير تدخل للمقبره بليل تنداس

كمت اصيح...ولكم امي شلون اعوفها شنو تندااااس شنووو هل خرابيط

لؤي...ابقي هنا شعدج جايه كلها زلم عود اجيبج بغير وكت ازوريها

ضليت اصيح بالكوه هدوني بقيت كاعده بالكاع ومربعه وبجي اجتي مره جبيره انطتي قران وكالت...كعدي اقري يفيد المتوفيه اكثر من دموعج

عاد صدك فتحت القران اريد اقره ما اكدر عيوني مغوشه من الدموع وكوه اشوف الكلمات

شويه واجه عمي كال....يله

كوه كمت من الكاع بس انتبهت اكو رجال جبير ولا شال عينه عني بس يراقبني اني جانت حالتي يرثا لها حتى ما ركزت زين رجعنه البغداد

وعمي وصلني للشقه وكال...صديقاتج يباتن يمج مو

حور...اي موجودات بالبيت كالن نعزله

لؤي...خوش اي شي تحتاجي اتصلي عليه والباب قفليها ولتفتحيها الاي احد

اشرتله براسي ودخلت للبيت تفاجئت ملكيت احد كلت خطيه يمكن تعبن ورجعن لبيوتهن ضليت كاعده وحدي نص الليل وبيت هدوء ووحشه كلش كمت وجيت شمعه وكعدت اقره قران وصلي الروح امي

لهناك طبيت الغرفتي اتصل ع محمد ماكو نفس الشي من التعب غفيت ما طولت هواي وفزيت ع احلام تخوف كبل فتحت باب غرفتي وباب الشارع وطلعت اصيح وركض بشارع

تارة♤♤

تارة....بابا منو مات

حسيت ابويه ارتبك دار وجهه وكال....ها بابا ماكو شي ام صديقي توفت

تارة....ها خطيه الله يرحمها لعد شبيكم هيج انخبصتوا

لؤي...دروحي شكد اسئلين

باوعتله صفح وطلعت وسمعته يكول الابوبه...لا تروح ولا توصل اني اتكفل بكلشي

وبويه يكله ....لا شلون قابل طالعه من فطر الحايط من زمان كتلك نجيبها هنا تعيش ويانه ونخلص من هل دوخه

لؤي...اكلك الابنيه مخبله وبيها حاله نفسيه وهسه ماتت امها شلون راح نسيطر عليها

والله حرام اذا فهمت ع شنو يحجون رحت ع مرة ابويه كتلها...ها يله نطلع

ايمان....لا وين نطلع تأجل العقد

تارة....يا ليش

ايمان...ما ادري عمج وبوج هيج كالوا ع الخميس اليجي

تارة.....يله بعد احسن لان مالي مزاج

كعدنه نتعشى وسكوت جان سيد الموقف وعمي طلع مدري وين عاد من كملنه ساعدت مرة ابويه بالمطبخ ورحت صعدت الغرفتي فتحت موبايلي لكيت رسالة من فهد مكتوب بيها....كاعده

رديت عليه ...اي كاعده

تقريبا نص ساعه يله جاوني وكال...فكرتي

تارة....اي فكرت

فهد....اي شنو قرارج

تارة...اني موفقه بس عندي شرط

فهد...خلي اتصل

كتله اوك ورحت قفلت باب غرفتي ورديت عليه

تارة...الووو

فهد....ليش هيج صوتج حلو

ابتسمت وكتله...شكرا

كلبي ضل يدك وانفاسي اسارعت مدري اصالي كلي....اي شنو شرطج

تارة.... قبلها اريد اسئلك هاي الراح تزوجها تحبك

فهد....لا ما اعتقد تحبني

تارة...لعد شجابرها عليك

فهد...يمكن طمع

تارة....ولشوكت يبقه زواجكم ع الورق

فهد....ومنو كلج راح ابقيها هواي بس نزوج اشوف حجه وطلكها

تارة...وهيج راح ترضي امك

فهد...لا ارضي ضميري وكلبي لان كلبي يريدج بس انتي وقافل عليج

تارة....تمام اذا هيه متحبك فا شرطي بس نزوج اطلكها

فهد....غالي وطلب رخيص اهم شي راح اصيرين مالتي

ردت اجاوبه سمعت اخويه جاد يدك بالباب رحت فتحتها وكتله....ها حبيبي شتريد

طب يريد يلعب صحت بي بصوت ناصي....اطلع اريد اقره شكبرك اصير بعد مو صرت بطولي

جاد....شبيييج توته اريد اكعد يمج غرفتج بارده

تارة....لا حبيبي اطلع بعدين تعال

شو هذه ركض عليه جر موبايلي وشرد فوكاها فهد ع الخط ركضت وراه وصيح...جاد جااااد جيب الموبايل

احس كلبي راد يوكف وجاد يصيح...بابا ماما تارة تركض وراي

احمد....شبيكم تركضون صغار انتوا

تارة.....جاااااااد جيب موبايلي

احس كلبي شويه ويوكف كلت هسه جاد راح ينطي الموبايل الابويه ويشوف الاتصال ومن خبصتي عثرت بدرج كبل اجه جاد يمي وكال....ها توته اسف تعورتي من وراي ردت اشاقه وياج هاج موبايلج

جربته منه وكتله من وره حركتي.....انعل ابوك لابو توته

جاد....بابا توته تكول انعل ابوك

احمد....انعم الله بويه

تارة.....جذاب بابا

رجعت الغرفتي لكيت فهد بعده ع الخط خرب حضي سمع هل خريط كله من فشلتي سديته بوجهه

شويه وكتبلي...منو جاد

تارة....اخويه الصغير

فهد....ها ديري بالج مابقه شي واجي اخطبج

تارة...يي نشالله

فهد....احبج

سكتت وحس كلبي راد يطلع من مكانه رجع كلي....وتمنيت انتي تكونين مرتي الاولى بس جان للقدر رأيي ثاني

تارة....الله كريم

ضلينه نسولف شوي وبعدها ترخصت منه ورحت اقره ثاني يوم كعدت رحت للدوام وعمي ماهوه فا ابويه وداني بس ابد ما اطمنتله احسه تعبان ومهموم ومن اسئله يكلي مابيه شي عاد وصلت ع الجامعه اول ما دخلت فتحت عيوني من شفت مرام وفرات كامشين ادين بعض رحت يمهم وكلت بتفاجئ....عزه اليوم الشمس مين طالعه

غمزتلي مرام وكالت....بصف الكمر

فرات....اجتمعوا الشمس والكمر بفضلج

ضحكت وكتلهم....لا وصايرين رومنسيين

فرات....اني رومانسي من زمان بس الاخت جانت جنها حصان الحمزه

كامت مرام ضربته ع ايده....ولك اني حصان الحمزه مو صوجك صوجي اني اتغزل بيك من الصبح

ضلوا يتعاركون واني ميته ضحك عليهم لهناك جريت مرام من ايدها وكلت الفرات.....يله عيني باي مو تريد تلزك بصديقتي عنده مخططات صهيونيه اناقشها

فرات ضل يدردم على مو يابه ماخذه حبيبتي لهناك كال.....اي عيني روحوا امري لله

ضلينه نسولف اني ومرام لهناك كتلها....اني وافقت ع فهد

مرام...صدك لعد وبت خالته

سولفتلها كلشي والاتفقنه عليه رجعت كلتلي...اذا هيج تمام توكلي بالله ما دام تحبون بعض ماكو شي راح يوكف بطريقكم

مر باقي اليوم بشكل طبيعي بس ما شفت فهد وهل شي ضوجني

من كملت رجعني عمي للبيت وكبل رحت نمت كعدت تقريبا بالعشره بليل اخترعت وكمت مثل المخبله وراي امتحان فوكاها

طبعا اني بيه طبع من اضوج انام هواي

جنت كلش جوعانه نزلت جوه قبل ما ادخل للمطبخ سمعت ابويه معصب ويكول الاعمي....انته منعتني عنها كل هل سنين وضليت معتمد عليك اجيبلي اخبارها وهسه اكلك اجيبها تعيش هنا تكلي خليها هيه ادبر روحها بابا هاااااي بتتتتتي تعرف شنو بتي شلون اذبها بشارع

احس روحي انصدمت صدمة عمري معقوله الجاي اسمعه معقوله ابويه ازوج الثالثه وعده بنيه منها وما كايلنه والله ايمان اذا سمعت تحرك الدنيا

دخلت للمطبخ وكلت بعصبيه...يا بتك هاي هسه تحجولي كلشي شنو اني مثل الاطرش بزفه بهل بيت

ايمان....اختج عيني

فتحت عيوني .....شنووووو يعني انتي تدرين وقابله

احمد....بابا خلي افهمج اني ردت اكلج بس مصارت فرصة

تارة....شتفهمني بابا راح اتخبل والله منو هاي بتك

احمد....بابا تذكرين امج من جابت انتي جنتي صغيره واني كتلكم راح اكتلها لان تفكير اهلنه الهمجي قبل خلاني هيج اسوي من خوفي عليها وديتها يم مرة تربيها لان مستحيل ينطيني كلبي اكتل طفله مالها ذنب

حطيت ايدي ع كلبي وكتله....تقصد اختي حور 

احمد....اي

لؤي....والمره الربتها ماتت

صحت بصوت عالي....انتوووو شنو ما عدكم رحمة شلووون اذبووون اختي هيج ذبه وسنين كلشي متدرون عنها واني كل ضني اختي ميته وجنت اتمنى عندي اخت اسولف وياها وضحك وشاقه وانته بابا متوقعت كلبك هيج قاسي هاي تفرقه يعني اني خالني كدام عينك وهذيج ذابها يم وحده حتى متعرف شلون  تعاملها منعرف جانت مرتاحه مضايقه فرحانه حزينه جوعانه شبعانه

احمد....بابا شي صار وانتهى وسنين خذتنه واني مامقصر وياها جنت كل شهر ادزلها مصروف يكفيهم سنه وعمج ممقصر وياهم كل يوم يروحلهم وممخليهم معتازين شي

طلعت من المطبخ وصعدت الغرفتي اريد استوعب الجاي يصير بس مجاي اكدر معقوله حور عايشه معقوله ودنيا كلها تدري واني اخر من يعلم

كلت بكلبي....حبيبتي حور انتي اختي الصغيره وشي الوحيد البقالي من امي اذا ابويه ذبج وما سئل عنج فا اني مو مثله اني اختج الجبيره وبمقام امج

كمت بدلت وحطيت مكياج خفيف كلش ولبست اسود ونزلت جوه كلها باوعتلي بنضرة استغراب كلت الابويه.....هسه تودوني الها حتى انجيبها تعيش يمنه

لؤي....هاي شبيج تخبلتي

عطت بي....راح اتخببببل اذا ما اروح اشوفها تررى

لؤي....احمد حط حد البتك

احمد...امشي بابا نشوفها اني قابل لؤي هذه حقها وبالاخير هاي اختها لازم نروحلها ونقوم بالواجب

وفعلا بدلوا وطلعنه اني وعمي وبويه بس مرة ابويه مقبلت تجي كالت اضل يم التؤام

عاد عمي يسوق ومبين معصب وبويه احسه كلش ضايج اما اني كلبي بس يدك اتخيل من اشوفها وشوفني شلون راح تكون ردة فعلها

راح تفرح لو اضوج
راح تتقبلنه لو تطردنه

اني وبوسط افكاري وكفت السيارة نزل عمي كال...بهاي الشقه

باوعت شقه مبينه كلش حلوه ومرتبه من بره نزلنه وعمي دك الباب محد يرد ضل يدك هواي

لهناك كال....يمكن رايحه البيت صديقتها

احمد....تندله انته

لؤي....اي امشينه

باوعلي عمي صفح وصعد بسياره كتله بكلبي لا عشتوا

صعدنه بسياره وشويه ونزلنه يم بيت بابه صغيره وطالع من عنده شجر هواي دكينه الباب هم ماكو ضلينه ندك بعدين اجانه ولد كال ....منو

لؤي....اني

فتح الباب وكال....تفضلوا

لؤي....اني عم حور يمكم هيه

.....اي يمنه اصيحلكياها

لؤي....اييي

شويه وجتي فتحت الباب باوعتنه بستغراب وكالت....منو انتوا

يتبع....