رواية في احضان الذئاب الفصل الرابع والعشرون 24 - بقلم الكاتبة قمر الجنابي

لاتنسون التصويت بالضغط على النجمه لدعمي⭐💖

يل مشيت بكل عبيرك
يا دفو ايعطّر گذلتي
يا گلب يقره صفنتي
شلون بيّه
غير كون ارهم لغيرك

حور♤♤

وعمج سوينه سالفه وكناله اغتصبها واحد وصارت بيها حالة نفسيه وتكرهك وبس اشوفك تكتل روحها ولهل السبب ابوج ما سئل عنج كل هل سنين وضل بس يدزلج فلوس

ضحكت وكتلها....اكيد اني ما افتهمت قصدج عدل شنو يمه عيدي الاشرتلي

ام حور.....ادري الحقيقه راح اصدمج لذلك اني ضميتها عليج كل هل سنين

جسمي كام يرجف حسيت روحي راح اتخربط كتلها....زين ليش هيج سوه اني بشنو اذيته من جنت طفله شنو جان صعبه عليه ينطيني لكمه

ام حور.....مصايب متعلقه بالماضي بس ثقي هو سوه هيج حتى يحميج

كمت ع حيلي تستهرت كمت شكو شي كدامي ادفعه لو اكسره وصيح....شنووو هو هذه عذرررر بعدييين مين يحميني يخليني يمج انتي الي ما عندج كل رحمه عبالج نسيت اجنتي اسوين بيه جنتي اجرررمين بيه واني اسكت اكول امي ولازم احترمها او الله وصه باللوالدين بس هسه عرفت ليش جنتي هيج اسوين بيه لان اني مو من دمج ولحمج وما عندج كل رحمه الي الله ياخذكم كلكم

كامت ع حيلها واجتي تريد تهديني اني دفعتها وضليت اصيح احس دخلت بصدمه....والله اباوع ع كل بنيه عدها ابو وتحسر اريد احس بهذه الشعور ومن احد يسئلني عن ابويه اضل صافنه شكلهم عدل ميت بس هسه تأكدت هو صدك ميت

ام حور...هذه الحجي ميفيدج صار الي صار بعد ومحد يكدر يرجع للماضي ويغير الي صار

حور....اريد اشوفه وحاجي

ام حور...شتكليله

نزلت دمعتي وكتلها ...اكله ليش

ام حور...لابد يجي شي يوم تتواجهون بي واني هم ما دايمتلج احس روحي ع ساعه اموت لذلك فلوسي الجمعتهن طول عمري يبقن الج ويعيشنج ملكه لان اني ما عندي احد بهل دنيا يورث الجمعتهن بس انتي وابريلي الذمه ع كلشي سويته بيج بس صدكي قسوتي عليج مو اقسه من هاي الدنيا وحتى خطيبج ديري بالج منه ترى مو امان الزلم ابريلي الذمه بنيتي

ضلت اسوي ابريلي الذمه وتبجي اول مره بحياتي اشوفها تبجي لان دائما جانت كدامي الام الصلبه القاسيه واني ضليت واكفه مثل الصنم حتى دموعي بعد متنزل

لحد ما بدون ما احس وكعت امي عليه ووكعنه ثنينه بالكاع

باوعتلها وجهها اصفر كلش ضليت ادك ع وجهها متكعد وعركانه كلش

رحت ذبيت عليه ماي اول ما كعدت تقيئت اني كلش خفت كمت لبستها عبايتها وسندتها

وطلعنه بشارع تقريبا الساعه جانت بال 10 الصبح

ضليت أشر ع التكاسي محد وكفنه لحد ما اجه رجال يطلع عمره نهاية العشرين كال....ها خويه خيركم تردون مساعده

كتله بدموع...عفيه ما ادري امي شبيها تخربطت وريد اخذها للمستشفى

كلي....يله خويه ابشري سيارتي بالفرع هسه اجيكم وناخذها

حور...اي خويه الله يستر عليك ما عدنه احد احنى بس الله

ركض الولد جاب سيارته ونزل فتحلي الباب صعدت امي وره وصعدت بصفها وحطيت راسها ع كتفي

والولد ضل يمشي سريع وطريق كله يسئلني عليها

اول ما وصلنه للمستشفى ردت انزلها مكدرت نزل الولد اجه يمي وكال...وخري خويه اني انزلها هيه مثل امي

وصدك سندها ونزلها اول ما شافونه الممرضين اجو يركضون علينه بالسديه حطيناها ودخلوا كبل للانعاش والولد ضل يركض وياها منا ومنا واني واكفه بره ما قبلوا يدخلوني

تقريبا ساعه ونص اني اللوج وحدي حتى ريكي يبس اجاني الولد نفسه ركضت عليه حتى من خبصتي كتله...ها عمو بشرني امي شلونها

هو استحه بعد يكلي خويه رد عليه....والله يا عمو حتى ما اضم عليج امج ضربتها جلطه دماغيه اندعيلها بلكي تكوم بالسلامه

ما اعرف اصالي بهذيج اللحضه توقعت روحي انهار ووكع بالكاع بس جنت كلش قويه وهل قوة هيه التعبتني كتله...انشالله تتعافه

حتى هو ضل صافن راد يحجي اجاه واحد كله ...دكتور اركان اجتك حاله

اركان...يا حالة عمي اليوم اجازتي

الممرض...هاي بعد شافوك بالمستشفى ودكتور فارس طالع

باوعلي وكال....بابا انتي عندج احد

حور...لا بس اني وامي عايشين

اركان...ها ماشي تعاي وياي ادخلج جوه اذا تردين

حور...ماشي

مشه واني امشي بصفه وعيني بالكاع دخلنه جوه الناس كلها اسلم عليه ذاك السلام الحلو والاحترمات بعد احلى باوعتله وضليت صافنه عليه وكلت بكلبي .....اريد اصير دكتوره وساعد الناس صدك شعور حلو

اركان....يله انتي كعدي هنا واي شي تحتاجي روحي ع اي ممرضه كليلها اريد دكتور اركان راح ادليج عليه او الله يشافيها

حور...شكرا مقصرت

خله وراح واني بقيت كاعده وحدي انتضر يطلع احد يطمني عنها

لحد ما مليت من الانتضار ردت اروح للحمامات بس ما ندليت سئلت مره دلتني عليها طبيت جوه صفنت ع الحمامات انضف من مستقبلي هاي المستشفى مشايفتها قبل اعتقد اهليه يبو هسه مين ادفع كل هل مصاريف يله هيه مو كالت عندي فلوس خلي اخذ من عدهن قابل حاطتهن بجيبي

رحت غسلت وجهي وفتحت الضفيره وبللت شعري لان صاير كفشه وشديته شلون مجان

طبعا جنت كلش هادئه لان امي طول هل سنين كل يوم تتخربط وحالتها للاسوء بس جنت مفكره مثل كل مره تطلع منها ونرجع ع البيت سوه بس اضاهر جان للقدر رأيي ثاني

مليت من الانتضار ورحت ع ممرضه سئلتها كلتلي.......... حولوها ع غرفه خاصه

حور...زين اكدر اشوفها

الممرضه...اي اكيد سمح الدكتور لان حالتها استقرت ...تعاي وراي ماما

رحت وراها وصلنه يمه غرفة مكتوب فوكاها vip كلتلي....تفضلي حبيبتي

دخلت شفتاها نايمه مو بغرفة مال مستشفى لا عبالك غرفة مال فندق خمس نجوم

انتبهت كانونه بأيدها ونحلانه كلش ووجها شاحب مبين التعب عليها ضليت كاعده يمها وصافنه هسه شسوي حتى موبايلي بقه بالبيت فوكاها شنو هاي الغرفة vip شنو يردون يقطوني واني ربع معندي

انتبهت ع سجادة وقران محطوطين ع جرارات رحت اخذتهن ولبست الجادر وكعدت اقره قران بصوت ناصي صح امي متسمع بس كلت بلكي يساعدها

شويه وندكت الباب كمت من السجاده صار بوجهي دكتور اركان كبل كلي...اسف خاف ازعجتج

حور...لا بالعكس

اركان....انشالله عجبتج الغرفه ورتاحيتي

حور....والله بصراحة الراحة الحقيقة من ارجع للبيت والوالده وياي

اركان...اكيد انشالله ترجعون بأقرب وقت

اجه ع امي فحصها وكال...شويه وتكعد نشالله

حور....ما ادري شلون اشكرك لان هواي ساعدتنه

اركان...لا هذه واجبي ترى يله بسلامه

وطلع ...ضليت كاعده وفكر بمحمد

هسه وصل لا

شجاي يسوي

نايم كاعد

شبعان جوعان

مرتاح مضايق

يله بس ارجع للبيت ويه امي اكيد راح الكه هواي مكالمات منه واكيد راح يكعد يزرلني لان ما رديت عليه

طبعا الي جاي يصير بحياتي هو شي روتيني صار بنسبه الي طول هذيج السنين الفاتت امي دائما تتخربط ومحمد دائما يسافر فا بديت استقبل هاي الامور بكل هدوء

لان صارت جزء من حياتي بس بنسبه للشي الي عرفته اليوم ما جاي اكدر اطلعه من راسي كل همي اواجه ذاك الشخص الماكدر اكول عنه ابويه لان هو رجال غريب واكله ليش ذبيتني كل هل سنين

طبعا فزيت من افكاري ع الكحه مالت امي ركضت عليها انطيتها ماي كلت يمكن هذه من وره البنج نزل ع صدرها

بس تفاجئت من كامت تكح دم كلش خفت من المنضر اكبر مني بهواي ركضت بالممرات وصيح امي راح تموت

اول واحد شافني ركض دكتور اركان لان جان واكف بالممر وياه ممرضين بس شافوا حالة امي انخبصوا وكبل نقلوها للانعاش

ركضت وراهم اريد افهم شكو بس محد يرد عليه بس يدفعون بيه لحد

ضليت ابجي وناس تباوعلي تقريبا صار الليل وماكو اي خبر عن امي

شكد تمينت شخص جبير اعرررفه وياي لان اني كلشي ما اعرف وحدي وركض بالمستشفى منا ومنا

ضليت كاعده يم باب الانعاش وجهي اصفر وتعبانه كلش وجسمي يرجف من الصبح لسه محاطه شي بحلكي غير الماي

شويه وطلع اركان ركضت عليه كتله ....ها دكتور بشر امي شلونها شوكت نرجع للبيت لان كلش تعبت

كام يجنب يباوع بعيوني كبل كتله...شبيك متحجي خوفتني

دكتور اركان....البقيه بحياتج امج انطتج عمرها

تارة♤♤

فهد....اني خطبت

تارة....وكف السيارة اريد انزل

فهد....لا متنزلين اذا ما اكمل كلامي خلي شويه عندج احترامات للمقابل

تارة....ليش انته بقيت احترامات مصعدني وياك حتى تكلي خطبت

صاح تارة بصوت عالي اني سكتت وباعتله صفح وكتله....بس اني كتلك انتضرني

فهد....اي واني جان عدي استعداد انتضرج العمر كله

تارة....هههههه يي وصار هسه

فهد....مو بس انتي المريتي بضروف صعبه

تارة...يمكن صح بس بقيت متسمكه بحبي وما رحت انخبطت مثلك ورفضت كل شخص حاول يصارحني او يتقدملي

فهد....مرات الانسان ينجبر يسوي شغلات هو ميريدها

تارة...وضحلي خلي افهم

فهد...الولده توفت من انتي اختفيتي

تارة....اني اسفه مجنت ادري الشغله هيج الله يرحمها

فهد...ويرحم امواتج وموتى المسلمين المهم وصتني قبل ما اموت ازوج بت خالتي خلي نفسج مكاني تارة شراح اسوين بهل حالى

تارة....ما جنت ادري الشغله هيج الله يسعدكم واني ما احب اكون طرف ثالث يخرب هل سعاده لذلك راح اطلع من حياتك

فهد...هههه ما تغيرتي ابد بعدج تتهربين مني شوكت اصيرين شجاعه واتواجهين مشاكلج

تارة...شترديني اسوي بهل حالة

فهد...تنتضريني ازوجها او وره فترة اخطبج

ضحكت بحركه وكتله....اي وانتوا تعيشون شهر عسل واني كاعده وانتضر فارس الاحلام فهد يخطبني

فهد....ليش هيج تفكيرج بيه شوكت تفهمين شكد احبج اني وريدج رغم كل هل سنين الراحت حبج بكلبي ما مات او اني اوعدج وعد رجال حتى ما اتقربلها واني كايليها هل شي زواجنه بس ع الورق واني احب طالبه وريد اخطبها وهيه وافقت

تارة...شنو اليضملي متغير رأيك بعدين

فهد...ليش حبي الج وانتضاري كل هل فتره مو ضمان

تارة...هذه عرضك موت بطيء بنسبه الي

فهد...لا هاي ضربية الانتضار

تارة....ما ادري شنو موقف اهلي اكيد ما راح يقبلون اكون الثانيه

فهد...وافقي انتي بالاول واهلج اني اقنعهم

كتله بصوت مخنوك....نشوف

وكف السياره وكال...فكري عدل تارة

فتحت الباب مال سياره ونزلت بدون ما اكول شي وما ادري شسوي صدك حيره جبيره ما انتبهت ع الوقت الساعه تسعه ونص رحت ع محاضرتي دكيت الباب ودخلت كبل كلي الدكتور...برى

سديت الباب وطلعت بدون ما اكول شي هيه هاي العايزه اول ما التفت صار فهد بوجهي حتى اخترعت باوعلي وكال...شبيج شفتي جني

تارة....لا بس ما توقعتك واكف وراي

باوعلي بطرف عينه وفتح الباب مال قاعة كبل اجاه الدكتور سلم عليه ذاك السلام الحلو وكله فهد دخلها اني اخرتها ترى ...هو كبل كلي...تفضلي بنيتي

دخلت واني اكول بكلبي عفيه بلد ميمشي الا بالواسطات

عاد ساعة ونص وخلصت المحاضره طلعت برى اتنفس هوى لان اليوم مدري شبيه احس روحي كلش مخنوكه شويه وجاني فرات كعد يمي ونطاني كلاص كهوه باوعتله وكتله...انته مو لله اسوي هيج صدك لو كالوا مصالح

ضحك وكلي....ديله عاد شلون مصلحه عاويه لسه كلشي ما سويتي

تارة....اكلك شي بس بينه

فرات....شنو وكعتي كلبي

تارة....ترى مرام تحبك بس هيه تكابر

هو كبل طفر وكلي...كولي والله

تارة...يي اش شبيك فضحتنه

فرات....لا هذه احلا خبر سمعته بحياتي وبهل مناسبه عازمكم بالمطعم

تارة...لا روح انته وياها مالي خلك اني

فرات...والله مو صوجج...واجه يمي اخذ كلاص الكهوه وراد يروح

رجعت جريت الكهوه منه وكتله.....هيه وليه خو ما وليه جيب الكهوه يابه اروح وياكم بس ما اطول شويه واكوم وهيج اصيرلك فرصه تحجي وياها براحتك يا غبي

فرات...يعني اعترف

تارة...لا انتضر يبيض الديج

فرات....ماشي خوش خطه بس لتخليها تحس يعني جيبيها للمطعم ع اساس بس انتي وياها طالعين لان خاف متقبل

تارة...لا تقبل خليها عليه

مرام...شقبل

تارة....يبو شكد فكر دائما تجين بالوقت الخطأ

مرام باوعت الفرات ورجعت باوعتلي...شجاي تخططون من وراي

فرات.....هسه اني جاي احجي ويه تارة شكو دخلتي بالنص

مرام....وانته شعندك ويه صديقتي هاااا صاير اشوفها وتحجي وياها اكثر مني

فرات ابتسم وكال...تغارين عليه

مرام....لا اغار منك ...واجتي حضنتني وباستني براسي وكالت...لتاخذ البيست مني

اني كوه كاتمه ضحكتي عاد فرات شاف الوضع خارط طبك نعالاته وطفر

مرام...عوفينه من هذه الخبل انتي شلونج احسج مو ع بعضج

سولفتلها كلشي صار وياي انصدمت وكالت....ها شنو قصتكم تصلح المسلسل تركي عنوانه الحسناء والذئب

تارة....ولا تستقر مخرج مرام هسه اني وين وانتي وين

مرام....شوفي بصراحة الشغله معقده بس اذا تحبي ويحبج توكلي حتلو العاشره انتي بس بنفس الوقت الزوجه الثاني شي ابد مو سهل ومشاكل هواي

تارة...ما ادري كلش حايره

مرام...اكلج حبيلج واحد ثاني شنو خلصت الزلم بس فهد

تارة....راح ادفرج والله شكد مزاجيه انتي

مرام...ولج اكو خبر كلش راح يصدمج

تارة...خير انشالله شكو

مرام....مرتضى الدك بيج الدكه الناقصه البارحه توفى

حطيت ايدي ع حلكي وكتلها...شنوووو

مرام...اي والله مدري شكول الله يرحمه يلعنى

تارة...لا الميت مجوزله غير الرحمه بس شلون مات

مرام...طلع بي ايدز

تارة...ومين عرفتي

مرام....لج غير الجامعه مخبوصه بي

تارة...الله يغفرله ذنبه

مرام...اي ابريله الذمه

تارة...اي طبعا بريتله الذمه لان يوم القيامه يلتقي المتخاصمون واني ما اريد اشوف خلقته لا دنيا ولا اخره

طبعا مر باقي اليوم بشكل طبيعي ونهاية الدوام كلت المرام نروح ع المطعم وهيه كيفت لان تموت ع الاكل عاد اخذنه تكسي ورحنه للمطعم الكلي عليه فرات دخلنه وكعدنه ع طاولة

مرام بفرح....يله شنطلب بيتزا كنتاكي همبركر مشويات

تارة.....لا مو هسه

مرام....يا وليش ننتضر

فرات....هاي شنو الصدفه الحلوه بنات جامعتنه هنا

مرام....بسم الله الرحمن الرحيم اول مره اشوف جني يحجي

فرات....كون يطب بيج هذه الجني ويسودنج

تارة....هيه مسودنه اصلا

مرام....ولج رتج عون طلعتي فرعون

فرات...يله بهل مناسبه السعيده عازمكم ع حسابي

مرام....يله اذا بيها عزيمه ما احجي

همه ضلوا يسولفون واني وقتت المنبه حتى يدك وفعلا شويه ودك رديت وكلت.....ها بابا شنو خطار يله جايه

مرام...يا وين ولج عافتني شلون ارجع

تارة...خلي فرات يوصلج بسيارته يله باي باي

فرات ضحك وكال...الله وياج

ردت اخابر عمي بس دك عليه رقم غريب رديت وكلت...الووو

....شعندج بالمطعم

تارة...بلا زحمة منو معرفتك

...اني فهد

تارة....وشمدريك اني بالمطعم ومين جبت رقمي

فهد....ماكو شي يصعب عليه

تارة...بدل متراقبني روح نفذ وصية امك

فهد...رجعي للبيت تارة

و سده بوجهي عاد اني خابرت عمي اجه عليه اول ما صعدت استلمني تحقيق شعندي هنا واني كتله اجيت ويه صديقاتي وهو سكت

رجعنه ع البيت كبل دخلت شمرت ملابسي ونمت حتى اشرد من هاي الافكار شويه وكعدتني مرة ابويه كلتلي....ولج كومي نشتري ملابس باجر حفلة الخطوبه مال عمج

تارة....ما اررريد اللبس من العدي

ايمان...مو صوجج صوج التكلج

طبعا اني بس احد يكعدني اطير نومتي فا كبل كمت غسلت ونزلت جوه حتى اكل لان جسمي يرجف من الجوع لهناك سمعت عمي يكول الابويه.....اييي ماتت

احمد...والابنيه وين راح تبقى

لؤي....لا هاي مينخاف عليها شبيك

احمد....لؤؤؤي اذا ضام عليه شي هسه ترى تتندم بعدين اني معتمد عليك بهل سالفة لتخليني اروح وشوف كلشي بعيني

تارة....بابا ع شنو تحجون منو ماتت

يتبع....