رواية في احضان الذئاب الفصل الرابع عشر 14 - بقلم الكاتبة قمر الجنابي

البارت الثاني عشر🎉❤

بقلمي الكاتبه قمر💁‍♀️💕

لاتنسون التصويت بالضغط على النجمه🌟

تنويه!!!!
حبايب فضلا وليس امر الي ممتابعني خلي يتابعني حتى تكبر عائلتنا وكلشي يوصلكم اول بأول ....احبكم♡

مانسينة
عالدروب الماخذتكم جودرينة
وانتو عفتونة ولاطيف اعتناكم
ولا تلومونه لون نحجي بهواكم

هيه الكلوب التحن واحنه اشبدينه

حور◇◇

وفوكاها عابر ع سطحنه اجه بتجاهي واني ركضت من خبصتي وخوفي عثرت بطابوكه ووكعت ع وجهي حتى خشمي طك دم ما احس غير صار فوكاي ويريد ينزعني ملابسي اني تخبلت هذه شيريد يسوي اني امي ما ابدل كدامها مو هدور واحد غريب يكشف عليه

سيف....اش يا حلوه ما راح أذيج بس خليني اتونس

من سمعت كلامه مدري مين اجتني القوه وعضيت ايده بحيث لو باقيه اكثر جان شلعت لحمته صاح بيه وكال....ياكح... اني الج

كام ضربني راشدي ركع راسي بالحايط من حركتي دفرته بالعضو مالته وسويتها طفره وكمزه وقفلت باب السطح بالزلكاطه

سمعته يدك بالباب ويكول.....اني اعلمج لج يمين عليه اذا اكمشج محد يخلصج من ايدي اذا ما اكسرلج ما انحسب ع الزلم

كتله من وره الباب.....لا لتعب نفسك انته اصلا محسوب علينه ....وركضت نزلت الدرج

خفت اشوفني امي هسه احصلي دكه منها فوك كل الخوف الاكلته

ركضت واني حاطه ايدي ع خشمي غسلت وجهي وحس جسمي كله يرجف وكلبي يدك اسرع من المولده

ما ادري ليش اكو بداخلي فخر رغم الرعب الشفته بس كمت حسيت روحي قويه غسلت وخشمي بقه يجري دم حتى صارت عدي دوخه كلت هسه لو اموت هنا محد يدري بيه

عاد كوه وكف الدم لمن ختمت القران بكلبي

طلعت من الحمام ورحت اجر بروحي كوه حطيت راسي ع المخده وممصدكه الي صار كل شوي اكول راح اكعد من الحلم بس للاسف طلع هذه واقعي المرير يعني حتى ابيتي بعد ما اكدر اخذ راحتي

كلش انقهرت لان بعد ما اكدر اصعد للسطح جنت اصلي فوك السطح حتى الله يشوفني

شويه واجتي امي يمي كعدت تاكل مسويه بيضه طك كلت نصها وعافت الباقي الي كمت بسرعه جريتها من دشداشتها وكتلها.....انطيني موبايلي انتي مو تردين يحبني ويزوجني

جرت الدشداشه من ايدي وشرتلي....اي اريد اخلص من همج وذبج عليه بس ما اريد اضمين عليه خاف هدور منا ورايح ينطيج فلوس وضميهن هم اكسر ايدج والله

حور.....يلللله انطيني الموبايل والله ما اضم عليج بعد

كامت طلعته من صدرها وحطته بأيدي ودفعتني فرحت بي كلش فتحته لكيت كوام رسائل من محمد رديت عليه وكتله مابيه شي وبعدين نحجي

بعد الي صار من وره سيف العار لسه الخوفه بيه ضليت افكر اكول المحمد على الي صار لو لا خاف اكله ويروح يكتله لان ايده وضرب قررت ما اكله بس اذا عادها ما اسكتله بعد

طبعا ما الي نفس بعد اداوم بس اخاف يفصلوني من وره الغيابات فا كلت اداوم بس ما كدرت اقره لان كلش تخربطت من وره الدم الخسرته او المن اكول وشكي حالي

عاد بالكوه نمت وكعدت الصبح وكالعاده غسلت وبدلت وحضرت الجدول قبل ما اطلع فتحت موبايلي لكيت محمد كاتب انتضريني بالفرع الي بصف بيتكم

ضل بالي خاف سيف كايله ردت ابوسها وهوه عصب بسرعه اجتني الرجفه وقررت اروحله

اول ما فتحت الباب اجتني كفخة هوى بارده والسما مغيمه صح صبح بس الدنيا مضلمه وبارده كلش واني لابسه قميص المدرسة الابيض وجواه قميص خفيف بحيث جمدت

فتحت باب الشارع وطلعت اتمشه اول ما طبيت بالفرع لكيت سيارة محمد رحت فتحت الباب وصعدت كفختني ريحة عطره ردت اموع ومن غير شي السياره دافيه لو بيدي افرش ونام بيها فوكاها لابس رسمي قميص اسود وبنطرون اسود وجاكيته نيلي ضليت صافنه ع اناقته

اول ما صعدت كبل حرك ولتفت الي ضل يتأمل ملامح وجهي وكال.....شو وجهج اصفر خو ما رجعت سوتلج شي هاي امج

حور.....لا ابد

محمد....شوفي حوريتي اني كلش احبج والي يأذيج معناها أذاني لان انتي روحي فا ما اريدج اضمين عليه كلشي يصير وياج الصغيرة قبل الجبيره

حور....ليش

محمد.....حتي احميج شبيج بابا

حور....شنو حرب وتحميني

محمد....لا اله الا الله حوريتي هاي الدنيا جبيره وبيها ناس مو زينه واني اخاااف عليج افهمي

حور....واني اخاف منك

دار وجهه عليه صفن بوجهي وكال....ليش سويتلج شي اني اذيتج بشي خوفتج بشي وما ادري

حور....لا بس بابا عاف امي وهيه مريضه وراح الوحده الثانيه انته هم يمكن يجي شي يوم تعوفني

محمد....وانتي من هاي خايفه

حور... اي هواي خايفه يصير هجي وياي

محمد....شوفي حور مو كل اصابعج سوه امج اختارت الشخص الخطأ بس مو هذه يعني كل الناس مثله وكل الزلم يعوفون نسوانهم فا بهاي الحياة اكو الزين واكو المو زين

حور...وشلون اعرف الزين والمو زين

محمد....من افعال الشخص تعرفين
شكد ميحجي مالج غرض بالكلام باوعلي بس للافعال هسه اني مثلا اكدر اقشمر عليج بكم كلمه حلوه واخذ منج الاريده وذبج بس اني زلمه وما تربية هيج ومن اعشك اعشك بسوادين واخذج يعني اخذج غصبا ما عليج....وجر خمشي

ضحكت ع سوالفه وضل ينصحني

هواي تعلمت اشياء من محمد ما جنت اعرفها بحياتي حسيته هو مدرستي الخاصه الي تعلمني ع هاي الحياة ومتحاناتها

شوي وكرصني من زندي وكال.....شنو هاي ليش ما لابسه ملابس هواي

توترت شكله قابل ما عندي ضليت اتلبك بالكلام كتله.....ها لا بالعكس مو بارده كلش

باوعلي صفح وكال....هسه لو اكو محل مفتح جان اشتريتلج جاكيته وتلبسيها غصبا ما عليج يله برجعه اشوفلج

حور....ها لالا ميحتاج بعدين ما ناوي توصلني للمدرسه ترى اليوم خميس ورفعة العلم

محمد...يله هسه رايحين

حور.....انتو بجامعه هم عدكم رفعة علم

ضحك وكال.....لا فد يوم اخذج لهناك وراويج الجامعه كلها

طفرت وكتله....صدك بله

محمد....اي والله حضري روحج ع الاحد

كلبي ضل يركص لان الجامعات بس بالمسلسلات اشوفهن ومنيتي ادخللهن

عاد ضلينه نسولف لحد ما وصلت ضل يوصيني ادير بالي ع روحي ابتسمت وهزيتله راسي اول ما نزلت من السيارة صارت بوجهي ازهار باوعتلي بنضرة استغراب ودخلت للمدرسه اني وجهي صار اصفر لحكتها وكلت....صباح الخير

ما ردت عليه رجعت كتلها....شبيج مسمعين

حجت بدون متباوعلي ....يعني كلام اخويه طلع صح ....وراحت

ضليت صافنه صحيت من صفنتي ع صوت المعاونه دفعتني وكالت....بسرررررعه للاصطفاااف ليش متأخره

ركضت للصف نزعت جنتي ورحت ع الاصطفاف وكفت بالاخير كملنه مراسم رفعة العلم واكيد القوانين الكل خميس ينعادن نفسهن وهيج خلص الاصطفاف دخلت للشعبه كعدت بمكاني ما لكيت ازهار درت وجهي شفتها كاعده بالسره الثاني رحت يمها وكتلها ....شبيج ليش هيج تصرفين وياي شسويتلج اني

ما ردت عليه عفتها ورجعت المكاني شنو قابل معندي كرامه

شويه ودخلت ام العربي افترت علينه علمود الواجب وصلت الي كتلها ما حاله لو انكلبت الدنيا انواع الرزايل سمعتني كتلها.....والله ست جنت مريضه

ردت عليه....عياره بطلن اني ما عندي طالبه متحل واجب شنو مفتحين هنا روضة

صاحت للمراقبه حتى تاخذني للمديره طلعت واني الفشله بوجهي امشي بالممرات مال مدرسة واني مدنكه وكول بكلبي اللهي ما اريد شي بس يوووم حلو ومتنزل بي دمعتي بس يوم اللهي

وصلت ع الادارة طردونه كالوا المديره عدها شغل باوعتلي المراقبه وكالت....يله راح اكول للمدرسه وديتها للمديرة بس انتي منا ورايح حلي الواجب ...اشرتلها براسي بمعنى اي

رجعنه للصف وكعدت بمكاني وكوه خلص درس العربي وجوع كتلني فتحت جنتي اريد اطلع فلوسي ملكيتهن كلت بكلبي يبووو لحكتني ع الربع بكتنه

ضليت كاعده وبطني تلويني من الجوع لان من البارحه ع النص بيضه ولسه شويه وبده درس الاسلاميه اول ما بدت تشرح المدرسه وجتني بنيه كالت....يردون حور احمد

رفعة ايدي بتفاجئ كالت الابنيه....جيبي جنتي وتعاي
خذت جنتي وطلعت والبنات يباوعلي رحت للاداره وكلبي يلعب كلت هاهيه راح يفصلوني وكعد بالبيت وامي ادك بيه

اول ما طبيت للادارة صارت بوجهي الفراشه كلتلي....اهلج بالباب طلعيلهم

ضليت متاجئه طلعت بره لكيت سيارة محمد او هو واكف منتجي عليها ويشرب جكاير اول ما شافني طفه الجكارة وأشرلي اجي

لسه مسطوره ما اعرف شديصير رحت صعدت وكتله....شجابك وشلون قبلوا يطلعوني

شغل السياره ومشه وكال....اعرف المديره وكتلها حور جوارينه

حور...ها تعرف المديره

محمد....شنو غرتي

ضحكت وكتله ..... دخلي وحده بيها خير اغار منها مو هاي العجوز وجهها يطرد النعمه بس اصيح ع البنات واذا صاحت عليك بصوت تخليك يومين تكعد انته ونايم اصفك وترجع تنام

ضحك وكال....شطوله لسانج

حور..... بس ليش طلعتني من المدرسه

محمد....ما ادري كلبي كلي روحلها حسيتج ضايجه وما مرتاحه ومن غير شي ضل بالي يمج لان ما لابسه ملابس هواي كلت خاف تبردين

ضليت صافنه ما ادري شعبر بس هل مخلوق بيدت اعشقه اكتفيت بأبتسامه وشوي وكتله....بس وين رايحين

محمد....اشتريلج ملابس ونروح للجامعه

طفرت وكتله....صدك

محمد....اي مثل ما وعتج

ضلينه ندور ع محل ملابس بالكوه يله لكينه واحد لان صبحيه وكلها معزله دخلنه جوه وضل يكلي شتردين شتردين واني مستحية بالكوه يله قبلت اخذ فستان طويل مخصر من فوك وعريض من جوه بس شكله اخذ كلبي رحت بغرفة القياس لبسته وطلعت محمد فك عيونه وكال....يجننن بس اخذي غير لون

كتله.....ليش معجبك

محمد.....لا بس احمر لوونه ويجذب النضر واني اغار عليج اخذي الوردي ع الاقل

ضيكت عيوني ورحت اخذت الوردي لبسته وختاريت جاكيته بيضه هم كلش حلوه ودفع الحساب وطلعنه واني فرحانه احس روحي ع الغيم كلت بكلبي الله بسرعه استجاب دعائي الحمد الله اجاني يوم حلو

ضلينه نمشي بسياره وهوه مطلع اغنية حبيبي صباح الخير وكل شوي يباوعلي ويبتسم من لمعة عيونه احسه شكد يحبني

شويه وصلنه يم بناااايه كلش جبيره يمكن تعادل مدرستنه خمسين مره ضليت صافنه وفاكه حلكي وكف السياره بالكراج الخارجي وكال....تفضلي دكتوره

حور.....اكلك محمد خو مامبيه عليه زعطوطه بالاول متوسط

محمد....لا افا اصلا مبينه مرحله رابعه

ضحكت ورحنه بالبدايه ما قبلوا يدخلوني بس كلهم ضيفه وياي وراواهم هويته ودخلنه

ضليت صافنه من البنات والولد والاجواء فد شي

ضلينه نفتر وبعدين وداني ع السنتر مدري السبنتر مدري سلنتر كعدنه ناكل واني ما صدكت لفيت المستحه بوصله وضربته جلاق وخلصت الاكل من الجوع ورجع طلبلي مره ثانيه وخلصت نصه كال ....اطلبلج بعد

حور....لا يمعود تريد تكتلني

محمد....تدرين شنو الاحبه بيج لان تصرفين ع طبيعتج هنا اغلب البنات مصطنعات ويضاهرن هواي

ردت اجاوبه اجتي بنيه جرت الكرسي وكالت....هلا محمد شلونك منو هذه الطير الجديد

محمد....يا هلا بروان اعرفج خطيبتي حور

شو هاي وجهها صار احمر خزرتني وكالت.....يا فدوه يا مرحله انتي

ردت اجاوبها سبقني محمد وكال....بعدها بالمدرسه بس تخلص نزوج

روان....ها بيها الخير عاد عزومني بعرسكم

محمد....اكيد اول المدعوين

روان....يله طيور الحب اعوفكم براحتكم وخزرتني وراحت

ضل يسولفلي ع البنات والولد هنا وشلون ما لازم نثق بأي احد وشويه وكلي....اكلج حور شوكت ناويه تتحجبين

حور....بعدني صغيره ع هل شي وما مفكره بي ابد وما اعرف اللبسه اصلا

محمد....فكري بي احسلج

باوعتله صفح ودرت وجهي شوي وكمنه بس احس الانضار علينه بس جدا تونست فرينه الجامعه كلها ورواني قسمه وكل شوي تجي وحده لو واحد يسئلوا هاي منو وهوه يكلهم خطيبتي بكل ثقه عايش الدور الاخ بس كلش حبيت هل شي حسيته يفتخر بيه عاد شوي وكتله بيش الساعه كال...بال12
كبل طفرت....رجعني للبيت بسرعه راح يخلص دوامنه لتروح امي تحس

محمد....لتخافين شبيج هسه نرجع

وفعلا شويه وطلعنه بس كلش تونست تمنيت ما اطلع عاد نص الطريق وطلعت ملابس المدرسة لبست فوك الملابس ملاتي بس الجاكيته ضميتها بجنطه وصلنه للفرع مالتنه قبل ما انزل كلته....محمد
كال....ها يروحه

كتله...احبببك

تارة◇◇

وفعلا رحنه ع العماده كلي مرتضى انتضري هنا وراح دخل ربع ساعه وطلع ركضت عليه كتله.....ها بشر

مرتضى....للاسف ماكو اي شي

كعدت بالكاع ودموعي تجري دنك عليه مرتضى وكال....لضوجين اجيبلج عشره بمكانه

من حركتي عطت بي ....اني بحال الموبايل بس داكلك صوووووري الخاصه بي

مرتضى....اييييي جا شسويلج انتي فاهيه

تاره....انته شببببيك جاي ازيد همي هم

مرتضى....امشي ارجعج للبيت ترتاحين ونشالله موبايلج يرجعلج

كوه كمت وامشي واني مدنكه احس الدنيا وكفت بيه يعني موبايلي وبي كلشي يخصني امري لله رحت ركبت بسياره وبقينه ساكتين لحد ما نزلت بدون ما اكول شي

دخلت للبيت وبقيت متردده اكول الابويه ضاع لو لا زين ابويه ممكن يتفهم بس عمي اذا سمع يذبحني والله هسه يضل يسويلي فاهيه وفاهيه وفضحتينا احسن شي اكلهم انكسر وذبيته

اول ما دخلت صعدت لفوك حتى مالي نفس اتغده حطيت راسي ع المخده وكل شوي اريد افتح موبايلي اشوف منو مراسلني واذكر انباك همزين حاطه رمز للبرامج بس المشكله الاستوديو مفتوح ضليت افكر على ما غفيت

كعدت المغرب نزلت جوه سويت لفه وصعدت ومرة ابويه ضلت ادردم وراي ما رديت عليها لان كلش مالي خلك
صعدت لفوك وبالكوه اقره اجذب ع روحي للفجر يله غفت عيني كعدت ثاني يوم لبست شلون مجان وحتى مكياج ما خليت وطلعت لكيت مرتضى واكف صعدت وكلت....صباح الخير

رد عليه وكال...صباح النور بشري ملكيتي موبايلج

تاره....لا وين الكا قابل

مرتضى....يله انشالله اليوم تلكي

بقه يسولف واني كوه ارد عليه وصلنه ع الجامعه اول ما دخلت صارت بوجهي بنيه هاي من قسم التحليلات اعرفها جانت ميساء صديقتي تمشي وياها كلتلي..صباح الخير هذه موبايلج البارحه لكيته جوه الطاوله مال الاكل وخفت احد يشيله فا خذته اني وكلت انطيجيا اليوم

ما صدكت خذته وجان ودي اشبك الابنيه من الفرحه كتلها....متتخيلين شكد فرحتيني والله جنت خايفه لان صوري بي وهل وكت مو امان وبهل مناسبه اعزمج بنادي

زهره....اذا هيج خلي كل يوم مبايلج يضيع ولكا

ضحكنه ورحنه ع النادي طلبنه جاي وفطائر بجبن وكعدنه ناكل وكتلها...اكلج زهره هم تعرفين شي عن ميساء

حسيتها تلبكت من سؤالي وكال....لا ابد اخبارها انكطعت

تاره....اي والله وكلش بالي يمها

زهره....لتخافين انشالله مبيها شي وترجعنه السنه التجي

ضلينه نسولف بشكل رسمي وشوي وترخصت منها وطلعت بره النادي كبل صار بوجهي دكتور فهد باوعلي وكال....ها لكيتي موبايلج

تارة....شنو وشمدريك انته

فهد.....لعد منو البارحه تبجي اباب العماده

تارة....جنت موجود اشو ما انتبهتلك

فهد.....لا ما جنت موجود بس الطيور وصلتلي خبر

تارة....وهلكد تهمك اخباري

فهد....اكثر ما تصورين ومنا ورايح ديري بالج ع غراضج ترى الدنيا مو امان

اشرتله براسي ومشيت كال...تارة

مدري ليش كلبي دك من سمعت اسمي بصوته التفت وكتله....نعم استاذ

فهد....من تخلصين محاضرات تعاي المكتبي عندي موضوع مهم وياج

تارة....ماشي

مشيت واني حيل متوتره وكلبي يدك ع الالف يكلك داخله سباق مال ركض

انتضرت يخلصن المحاضرات ع نار لان بالي كله يم دكتور فهد شيريد مني وفعلا خلصنه رحت المكبته دكيت الباب اجاني صوته الخشن يكول.....تفضل

دخلت وضلين واكفه يم الباب اول ما شافني كام من مكتبه واجه بتجاهي وكال....تاره بدون لف ودوران شوفيلي موعد ويه اهلج حتى اجي اخطبج

بديرة فقره عشك البيها عالفطره
لكيتك منها لون اخضر
عكس كل الخلك من حبك انه اكبر

يتبع....

الكاتبه....قمر💕