رواية في احضان الذئاب الفصل السابع 7 - بقلم الكاتبة قمر الجنابي

البارت الخامس🎉💕

بقلمي الكاتبه قمر💁‍♀️✔

لاتنسون النجماااات🥰🌟

تنويه!!!
هلو حبايب حابه اخذ رأيكم بالقصة حلوه لو لا نستمر لو لا انطوني رأيكم؟!

انا الغَربة سنيني أستَفحِلنْ بالرَوح

انا المآ أدري ليش أعزازي آذوني ..

فزيت مرعوووبه ع صوت الطلق صار ع بيتنه من كل الجهات وصوت دوريه مال شرطه

خفت اطلع بره خاف تلوحني طلقه درت وجهي حتى اكعد امي ما لكيتها كمت ورجليه يرجفن ياربي شلون هيه متسمع يمكن شافت الضوه مال طلق وطلعت اشوف شكو

كوه مشيت وحاطه اديه بأذاناتي
وصلت يم الباب لكيتها مردوده ع النص فتحتها وشفت منضر ما راح انساه طول عمري

امي مدده بالكاع ودم صاير ع طولها وتارس الكاع ركضت يمها وكعد بيها ودموعي تجري ما ادري شسوي ومنو الي ضليت اهز بيها

حور.....يمه شو وينج ادري بيج مسمعيني بس اني هنا لتموتين وتعوفيني حبابه بس كعدي حاجيني ابوس ايدج ورجلج ما الي غيرج بهل دنيا والله هدور اسمع كلامج وما اشلع كلبج حتى اندومي ما اكل حبابه كعدي وين اروح وين انطي وجهي

تقريبا خمس دقايق من الرعب وكف صوت الطلق طلعت بشارع بدون تردد وصيح بعلوا صوتي ....عفيه لحكولي امي راح تمووووت يا ناااااس يا عااااالم

ع صوتي التموا الجوارين ودخلوا جوه اسمع واحد يحاجيني ويكول....حور لتخافين ما راح يصير شي عليها خابرنه الاسعاف راح ينقلوها للمستشفى وصير زينه

ما جنت افرزن شكل الي جاي يحاجيني لان عيوني مغوشات من الدموع وحس صارت بيه صدمه شوي وضلمت الدنيا بيه وكعت

(حبايب راح تنضم ويانه عائله جديده بالقصه)

مرحبا اسمي تاره عمري 20 سنه مرحله ثانية طب اسنان طبعا اني ناعمه كولش وملامحي بريئه الى درجه اي احد يشوفني ميصدك اني بجامعه

خلي احجيلكم شوي عن عائلتي طبعا اهل ابويه جانوا تفكيرهم همجي كولش ميردون بنيه لان يكولون اجيب العار الاهلها

حسب الي سمعته عمتي جانت تحب واحد وخطبها اكثر من مره بس ما انطوها اله لان فقير فا لان تحبه ويحبها اتفقوا يشردون سوه ويكملون حبهم بعيدا عن هذه الضلم
وفعلا شردوا وزوجوا ومرة سنتين وعمتي صار عدها طفلين ولد وبنيه وطول هل فتره اتلح ع رجلها ترجع الاهلها وصالحهم وتكسر الشر بما انو ازوجوا بالحلال وصار عدهم جهال اكيد راح ينسون الماضي
ويصالحوهم

وضلت اتلح علي بهل كلام بس رجلها الله يسلمه ما قبل لان يخاف ع عمتي وجهاله من عشيرتنه لان يدري بيهم مخابيل ولسه متحلفين يغسلون عارهم

وبعد الضغط عليه من قبل عمتي وافق وقرروا يرجعون ويصالحون اهلها ويكسرون الشر وصدفه ويه رجعتهم جان زواج ابوي من امي

وفعلا رجعت عمتي ودخلت البيت اهلها وتكود بجهالها بيدها وكلها امل بأهلها انو راح يستقبلوها بالاحضان

وصدمه الي صارت انكلب العرس الى عزه من شافوا عمتي وجتمعت العشيره وقرروا يذبحوها هيه وجهالها بدم بارد والله يمكن مصدكوني بس هذه الي صار وهذه الي وصلناله من ضلم

وفعلا نفذوا خطتهم القذره ناسين انو رب العالمين يباوعلهم وهمه يقتلون اطفال بغير ذنب
ويبررون فعلتهم بما يسمى غسل العار وميعرفون همه اكبر عار

طبعا زوج عمتي شرد بعد الي صار وحسب الي سمعته تخبل لان خسر زوجته وطفاله وبفتره قصيره اجانه خبر وفاته

وبالنسبه الامي صارت بيها صدمه من وره الي صار بليلة عرسها والي شافته وهيه بعدها عروس

ومرت الايام وامي حبلت وتسمع الرايح والجاي يكلها ادعي ربج يجيج ولد مو بنيه وسود وجهج

اما ابويه جان شويه اهون من اهله بس هم ينساق وياهم لان مثل ميكولون من عاشر القوم اربعين يوما صار مثلهم فكيف هوه صار عمر ويه اهله

المهم عاد جابت امي وجيت اني ع الدنيا وكلها كامت اصيح اكتلها وطلك مرتك بس ابويه عاندهم

وبعد المشاكل الطويله والعريضه وافقوا وكالوا ننطيها فرصه ثانيه وامي بعد خافت تحبل وكامت تبلع مانع بدون علم ابويه لان خاف هم تجي بنيه ويكتلوها وتطلك وهيه تحب ابويه ومتكدر بدونه

صار عمري 7 سنوات وبعد الضغط ع امي حبلت من ابويه وهنا الصدمه من عرفت حامل ببنيه خافت تكول الابويه وكلتلهم حامل بولد والكل فرحوا ومرة الايام واني اشوف امي طول الوقت بس تبجي وخايفه واعصاب حتى مرات احسها تخبلت لان تصرفاتها ابد مو مال واحد صاحي

وفعلا اقترب موعد الولاده وامي بدت تطلك خذوها ع المستشفى وجابت امي (اختي حور) وهنا الكل انصدم اولهم ابويه على مو يابه شلون اجذب علينه والدنيا انكلبت بالصياح

امي سوده عليه وره ساعات ضربتها جلتين توفت وعمامي وبيت جدي بدل ميواسون ابويه كلوله تكتل بتك لو نتبره منك

وخطيه ابويه جان واكع بين نارين وفعلا وافق انو يكتل اختي حور خوفا عود من تكبر اجيبلهم العار وكلهم اني اكتلها بيدي وخذاها ابوي وطلع

ومن وكتها وكمت اخاف من ابويه رغم جنت طفله بس خفت مثل ما كتلها يكتلني اني هم

مرة الايام وجدي توفه ولحكته بيبتي والعشيره الله سلط عليهم العذاب منهم الي انقتل ومنهم الي شرد خارج العراق ومنهم الي صار خريج السجون وهيج صفه ابيتنه بس اني وبويه وعمي عمره بالثلاثين

وهنا قرر ابوي يزوج حتى يجيب وحده تعتني بيه لان هو عده دوام وفعلا فتره وزوج بس جانت مرتة زينه ساعه هيج وساعه هيج مع ذلك مهما يكون محد يعوض حنان الام الي فقته واني طفله

فترة ومرة ابويه جابت ثنين ولد توم جنت هواي احبهم وفرحانه بيهم وتربيتهم كله عليه يكلك اني امهم
وضليت بين دراستي ودوامي وتشجيع ابويه الي من صرت بسادس خلاني اشد حيلي وطلع الطبيه حتى اصير مثله ومن طلعتها هنا ابويه كام يفتخر بيه وين وميروح وين ميكعد على مو يابه بتي دكتورة ورفعت راسي

نرجع الى الحاضر

تارة....كعدت الساعه سته ونص الصبح رحت غسلت وجهي وفتحت البرده اجاني ضوه بعيني باوعت للشارع ناس قليله

رحت الغرفتي غيرت ملابسي لبست تنوره
وردي عريضه وقميص ابيض كصيف وجنطه وشال وردي وكسسوارات ومكياج خفيف وسبحت بالعطر
وطلعت صبحت ع ابويه ومرة ابويه ايمان او عمي كالعاده نايم الصبح ميشتغل ابويه يصرف عليه

ايمان.....تعاي تريكي ويانه

تارة ....لا ما اشتهي اكل هناك

ايمان.....اذبين فلوسج ع اكل البره اليسمعج يكول ما عدنه اكل

رد عليها ابويه....شلون كلام هذه لعد عليمن اني اشتغل وتعب غير الهم

تركتهم يحجون وطلعت لكيت الخط واكفلي صعدت وسلمت

مرتضى.....وعليكم السلام

طبعا بالخط بس اني وصديقتي ميساء يجي عليها اول وحده وبعدين عليه وهوه طالب ويانه بس قسم تحليلات كلامي وياه جدا قليل بس ع كد السلام وهاهيه

تاره.....لعد شو ما مريت على ميساء مو كل مره تمر عليها اول وحده

مرتضى باوعلي بالمرايه وكال.....خابرتني كالت ما اداوم اليوم

تاره.....استغربت شو ما كلتلي

عاد مسافه الطريق وصلنه ع الجامعه

تنويه !!!
حبايب ماراح اذكر اسم الجامعه لان البطله طلبت ذلك

مرتضى....يله نزلي هنا اروح اوكف السياره بالكراج

تاره ....نزلت ودخلت ع الجامعه

وبقيت افتر وحدي لان ميساء غايبه اليوم حتى اتصلت عليها اكثر من مره مترد احس اكو شي غريب بس مجاي اعرفه بالخص باخر فتره احس تصرفاتها صايره هواي غريبه ومن اسئلها ....تكلي ماكو شي

شويه وبدت المحاضره حاولت اركز ويه الدكتور بس مكدرت عاد بالكوه خلصت المحاضره طلعت بره رحت ع النادي اشتريت اكل وكعدت اكل شوي وشفت مرتضى جاي من بعيد بتجاهي وصل يمي كال....ممكن اكعد

تفاجئت اول مره يجي يحاجيني بجامعه كتله....اي اكيد تفضل

مرتضى .....تاره اريد احجي وياج بموضوع كلش مهم

تارة....خير بس لا ميساء بيها شي

مرتضى....لا منو جاب طاري ميساء الموضوع متعلق بينه اني وياج

تارة....اي تفضل كول

مرتضى.....بصراحه ما ادري مين ابدي وشحجي كلش مستحي منج بس اتمنى اسمعيني الاخر كلمه ومتفهيني غلط

تارة....لا اكيد احجي

مرتضى.....اني اصلا ممعتاز فلوس وتفقت ويه صديقتج ميساء اتقنعج حتى اوصلجن كل يوم في سبيل اشوفج هواي

تاره ردت احجي رد عليه....خليني اكمل رجاءً اني معجب بيج هواي ويمكن مو بس اعجاب وحب هم من المرحله الاولى واني اراقبج وما شفت ولا سمعت الا الزين عنج وقبل متحجين اي شي اتمنى تفكرين بالي كلته لان مستحيل تلكين احد يحبج بكدي

بقيت مصدومه ما اعرف شكله يمكن اخر شخص جنت متوقعته معجب بيه لان ولا فد يوم حسسني بهل شي جان كله تعامله وياي بشكل رسمي هوه صح خوش ولد مرتب وحلو وشخصيه بس عمري ما فكرت بي كحبيب كتله......بصراحه ما ادري شكلك بس ميحتاج تفكير اني مو مال حب وهل سوالف اكو هواي بنات بجامعه غيري ليش اتعب نفسك وياي

مرتضى....بس اني ما اريد غيرج وما طالب منج اي شي بس فكري ورديلي الخبر

تاره كمت لملمت ملازمي وكتله....اسفه ما اكدر

وطلعت بره النادي وطول الوقت بقيت اجنبه حتى نهايه اليوم حاجيت ابويه وكتله رجعني انته كلي ليش كتله السايق مسوي حادث وفعلا اجه ابويه رجعت وياه وكتبت رساله المرتضى كتله....بعد لتجي عليه وفلوسك راح ادزهن بيد ميساء

وحضرت الرقم سويت هيج لان ابويه دائما يحذرني من الولد واني ما اريد انزل راسه ابد اريده يبقه مفتخر بيه وين ميروح او وين ميكعد وثبتلهم الابنيه ميجب العار

عاد وصلت للبيت اول ما دخلت تلكوني اخواني التؤام طبعا عمرهم 11 سنه وصاروا بالخامس ابتدائي ضلوا يجرون بيه حتى اقريهم كتلهم....ولكم يباووو تعبانه خلي ارتاح وقريكم صعدت فوك بغرفتي اجتني رساله ع الواتساب من رقم غريب مكتوب بيها.....متوقعتج هيج اسوين ويكون بعلمج اني مو بحال فلوسج

عرفته مرتضى رديت عليه.....بس هذه حقك والفروض تشكرني سويت هيج لان اريدك تنساني وما اريد اجرحك

مرتضى....انتي بهذه تصرفج جرحتيني بزايد

شفت الرساله وما رديت

غيرت ملابسي وراسلت ميساء بس ما فاتحه نت سديت الموبايل ونمت كبل من التعب كعدت تقريبا بالسته المغرب لكيت مرتضى داز عشرين رساله كلهن احبج ولسوين هيج بصراحه قهرني وستحيت احضره رديت عليه وكتله.....ماشي افكر بموضوعك

وهذه جان الخطأ الي راح يوديني النار جهنم

شما حظيت بگاع كلها تصير ملاچة وفلح...!!!

يتبع....