رواية في احضان الذئاب الفصل السادس 6 - بقلم الكاتبة قمر الجنابي

البارت السادس🎉💕

بقلمي الكاتبه قمر💁‍♀️💕

لاتنسون النجمه احبكم 🌟💕

.....ولا محطه البيها اونس روحي لو گلبي عثر .....

حور♧♧

ما جنت افرزن شكل الي جاي يحاجيني لان عيوني مغوشات من الدموع وحس صارت بيه صدمه شوي وضلمت الدنيا بيه

فتحت عيوني لكيت روحي نايمه ع سديه والمغذي معلك فوك راسي وصوت الاجهزه مرعب انتبهت ام محمد كاعده يمي هيه ومحمد تفاجئت بوجودهم

من شافوني فتحت عيوني اجوا عليه يطمنون رديت عليهم بصوت مبحوح....امي شلونها

محمد.....لتخافين حور اهم شي انتي اصيرين زينه

حور.....محمد امي شلونها

محمد.....لتخافين مابيها اي شي الطلقه جايه بمتنها مسويه عدها تمزق بس الاطباء كدروا يسيطرون عليه وكالوا لازم اضل تحت المراقبه 48 ساعه منا لمن يروح الخطر

حور الدموع نزلت من عيني.....يعني شنو

محمد....يعني يومين وترجعون البيتكم ان شاء الله

حور....انتوا شسوون هنا وشلون عرفتوا

ام محمد.....يمه جا غير وليدي فزعلكم اول واحد وشافج تخربتي شالج وجابج ع المستشفى

باوعتله شفت عيونه يلمعن ومبين الخوف بيهن عليه كتله....شكرا واتمنى ترجعون ع البيت لان تعبتوا ويانه

ام محمد.....بنيتي لتكولين هيج حق الجار ع الجار تعال محمد بره خلي احاجيك

طلعوا بره راحوا وره الستارة اسمع امه تكله.....اني راح ارجع للبيت وما اوصيك انطي كل تكاليف المستشفى خطيه هاي يتيمه تعتبر صدقه جاريه

محمد.....لتوصين حريص

حور....احس كلماتها هواي حزت بكلبي اصعب شي من الناس تصدق عليك

دخل محمد يمي بعد ما راحت امه باوعتله وكلت.....بس اصير عدنه فلوس انرجعلكم كل فلوسكم

محمد.....تحجين صدك حور قحط الفلوس اهم شي امج تكوم بسلامه

شويه واجتي الممرضه كالت راح يجي ضابط التحقيق ياخذ اقوالج

حور.....يعني شنو ياخذ اقوالي بعدين اني ماعندي اقوال وحتلو عني ياخذهن وين يوديهن خاف يذبهن بسجن

باوعت للمرضه ولمحمد كوه كاتمين ضحكتهم كلي محمد.....يعني تسولفيله ع الي صار وياكم وشلون امج اصوبت

حور.....ها عبالي تقصد خواتي شو شنو بعدين اني اخاف من الشرطه انته حاجي

محمد.....ميصير لازم الشاهد هو اليحجي

وفعلا شوي ودخل رجال طويل شوي ضعيف عنده شوارب ونجمه ع كتفه

بده يسئلني واني حجيتله الي صار بكل تفاصيله بس كل شوي اسحك بالحجي لان خايفه منه لهناك كال.....ابوج اخوج وين

حور....ماعندي

الضابط.....تردين تقدمين شكوه

حور.....شكوه هاي شنو هدور

محمد.....يعني تشتكين ع الي سوه هيج ويحطوا بسجن

حور.....اي خلي يتعاقب مثل ما أذه امي

الضابط.....عدكم العافيه ....وطلع بره

حور.....منو سوه هيج وليش

محمد....انتوا مالكم غرض جوارينكم الي اجوا جدد ابنهم كاتله واحد واجوا اهل المرحوم سووا بيهم دكه عشائريه وجتي طلقه تايهه بأمج

حور....يعني شنو دكة عشائرية

محمد.....سوالف همجيه مال عشاير يخوفون بيها الي كتل ابنهم حتى ياخذون حكهم

حور....يعني شنو عشاير

محمد....اهوو حور شكد اسئلين

حور.....اولا اعصابك ولشوفني لساني طويل ترى اني كلش مطفيه

محمد....وثانيا

حور.....شوف مو كتلك مطفيه كتلك اولا واني ما عندي ثانيا

ضحك بصوت عالي اول مره انتبه ع ضحكته شكد حلوه وعنده غمازة وحده بخدة ضليت صافنه شوي وصحيت من صفتي بعد ما حسيته هوه هم صفن عليه وعيونه تلمع كتله بجديه....محمد اخر سؤال

محمد....عيونه

حور....ازهار صديقتي الي سووا عليهم الدبكه خو ما تأذت

محمد....دبكه شنو

حور.....هاي الهستوك شرحتلي عنها

ضحك بصوت عالي وكال....دكه حبيبتي دبكه نوع من انواع الرقص الكردي

صفنت وفتحت عيوني لان كال حبيبتي وهو هم حس ع روحه حاول يغير الموضوع كلي....لا اطمني محد تأذه

وهيج مرن يومين بالمستشفى ومحمد ابد ما عافنه وامه مرات تجي

صدك كبروا بعيني وامي صحتها كلش تحسنت وطلعنه من المستشفى محمد اصر يوصلنه بس اني ما قبلت زحمنا هوايه هل يومين

فا اخذنه تكسي ورجعنه ع البيت بس امي حيل انقهرت لان الدكتور منعها تخيط بعد وهذه مصدر رزقنه الوحيد بس شسوي الله كريم

دخلنه ع البيت ساعدت امي تتمدد ورحت عصرتلها برتقال من الي جابته ام محمد ونطتهيا

ورحت صعدت بسطح عسه ولعل اشوف ازهار حتى اطمن عليها بس كلشي ماكو نزلت جوه وطلعت واجباتي حتى اقره لان صالي يومين غايبه بس بالجذب اقره بالي كله يم ازهار ويم امي وساعه افكر بمحمد مدري مشاعر متناقضه

شوي واندكت الباب اجو ناس جوارينه يطمنون وجابونه واجب صندوك بسببي وناس جابوا صندوك عصير

مر اليوم بصعوبه وامي كل شوي تبجي من الالم واني اركض انطيها المسكنات الاشرلي عليها ابو الصيدليه

كعدت ثاني يوم بال10 الصبح جان دوامي ضهري قريت شوي وسويت بيضه الي وكعدت اكل لكيت امي لسه نايمه رحت يمها اكعد بيها متكعد كلبي وكف حطيت ايدي ع كصتها واجه نار

شوي وكامت تغتض مثل السعفه لزمتها نفاضه كامت اشرتلي اغطيها غطيتها 3 بطانيات وبعدها ترجف حرت وين اروح وشسوي ضليت ابجي من الخوف هوه هذه الماعنده احد هيج يتبهذل

طفرت لبست نعالي تكرمون وركضت ردت اروح الام محمد وبطلت شنو المره ابتلت بينه هيه وبنها مدري وين ودتني رجليه وكفت كبال صيدليه طبيت جوه واني ما ادري شحجي جان اكو صيدلاني مبين عمره بالعشرين كلي.....تفضلي

حور.....امي متخربطه قبل كم يوم اصوبت بطلقه بكتفها ويومين وطلعونه من المستشفى بعد ما صارت زينه وهسه ترجف وما ادري شسوي

الصيدلاني كتبلي دوه وكلي.... انطيها هاي هسه اصير زينه واذا ما صارت اخذوها للمستشفى

دنكت وكتله.....بس ما عندي فلوسه

ما حس غير واحد مد ايده انطه الفلوس وخذ الدوه وجرني من ايدي باوعتله شفته محمد ومبين معصب كتله....انته شنو وين ما اروح تطلعلي

محمد.....اي الله يجيبني الج من تكومين تخربطين وحدج اني مو كتلج بالمستشفى اي شي تحتاجي تعاليلي

حور....ما ابتليت بينه انته وجيب دوه خلي الحك ع امي

انطانيا وضل يباوعلي صفح خذته منه وركضت للبيت لكيت امي بعدها ترجف انطيتها الحبايه وشربت مي حسيتها هدئت وبقيت يمها لحد ما حسيتها صارت زينه تقريبا صارت الساعه بال11 ونص كلتلي ....كومي بدلي

حور....لا وين اروح منو يضل يمج

ام حور....روحي لتخافين عليه صرت زينه

ترددت بين الاروح لو لا بالاخير قررت اروح كلت بلكي اشوف ازهار وفعلا بدلت اول ما فتحت الباب صار محمد بوجهي تفاجئت وكتله ....ها محمد

كبل اجه بتجاهي وجرني من ايدي وكال.....حور اني احبج

تاره♤♤

كعدت تقريبا بالسته المغرب لكيت مرتضى داز عشرين رساله كلهن احبج ولسوين هيج بصراحه قهرني وستحيت احضره رديت عليه وكتله.....ماشي افكر بموضوعك

وهذه جان الخطأ الي راح يوديني النار جهنم

مرتضى.....اي هسه بديتي تفكرين صح

صحيت ع روحي يربي اني شكتله شبيه تخبلت كتبتله....يله ان اروح اجه ابويه

مرتضى....بس عدي طلب اخير اتمنى ترجعين بالخط

تاره...انته اذا تريد اشوفني تلكاني بجامعه باي

طلعلي جاري الكتابه سديت الموبايل مالي خلكه وضليت صافنه بس اني ما عندي اي مشاعر تاجهه عمري ماشفته غير مجرد زميل وسايق

خلي نشوف تاليتها شلون كمت غسلت ونزلت جوه لكيت اخواني جاي يلعبون ومرة ابويه تفرفح وياهم اول ما شافتني نزلت كلتلي....وينج تارة دتعاي ساعديني شوي هسه الجهال عليه والشغل عليه هم

تاره....حاضر

رحت يمهم كعدت اللعب وياهم ولهيهم وقريتهم هم

شوي واجه ابويه من العياده كلنه طفرنه نستقبله بالاحضان بادلنه الحضن بفرح

بنسبه الابويه صح اشوفه يضحك ويسولف او ولا مره قصر علينه بشي شنكول يجينه قبل منطلب بس مرات احسه مكسور من الداخل بس ميبيلنه ما ادري شنو الي مأثر عليه فراك امي لو اختي حور الله يرحمها

كعدنه نتعشه مر باقي اليوم بشكل طبيعي بس مرة ابويه هواي ضلت تشكه مني وابويه يصدها ويكلها خليها براحتها دراستها صعبه واني ما اجادل لان بطبعي ما احب العرك ابد وجنب المشاكل

شوي وصعدت فوك الغرفتي ضليت اقره او وقت المنبه ونمت حتى ما كلبت بالموبايل

كعدت ثاني يوم بدلت ونزلت جوه لكيت ابويه منتضرني صعدت ونطلقنه للجامعه شوي وكلي ابويه....لعد هذه الولد ميجي عليكم بعد

تاره....ها بابا ما ادري

ابو تاره.....بنيتي شوفيلج واحد ثاني اذا هذه تركم لان اني مو اتعاجز منج لا والله بس تدرين شغلي ولتزاماتي

تاره....ماشي بابا

وصلت ع الجامعه دورت ع ميساء هم ماكو بده القلق يزيد عندي كعدت يم مجموعه بنات هنه صديقاتي بس مو كلش ضلن يسولفن ويضحكن واني بس اشاركهن بالابتسامه شوي وسمعت واحد يصيحلي
التفت شفته مرتضى ....كتله نعم

مرتضى....ممكن تجين دقيقه
لاحضت البنات ضلن يباوعلي صفح ترخصت منهن ورحت وراه وكفنه ع جهه كتله بعصبيه....ترى بعد ما اقبل تجي اصيحلي كدام البنات

مرتضى.....اعصابج عمري ترى صحتلج ما اغتصبتج

فتحت عيوني من جرئته كتله..... انته شلون تحجي وياي بهل طريقه

مرتضى.....شقررتي

تاره.....ما اريدك بصراحه اني ما مستعده ادخل بعلاقه حب

ورحت عنه واني تاركه بركان يفور وراي

همزين هو بغير قسم ما اشوف خلقته هواي نهاية اليوم طلعت انتضر ابويه يم باب الجامعه ما حس غير اجتي دراجه بتجاهي ابتعدت بس جان اسرع مني وضرب ايدي ضليت اتلوه من الالم التموا الطلاب وما اشوفلج غير واحد حط الولد ابو دراجه شبعه كتل انتبهت عليه هذه مرتضى

اجن البنات يطمنن عليه كتلهن ....مابيه شي بس ايدي شوي اللوت

كوه الطلاب واخروا مرتضى عن الولد
اجه مرتضى يمي يطمن عليه بخوف واضح بعيونه وكلي .....خلي ادويج للمستشفى

تاره....لا شكرا متسوه مابيه شي

مرتضى....لعد خلي اوصلج للبيت

تاره....ابويه راح يجي عليه

عكد حواجبه وكلي ....كافي عناد رجعي وياي بالخط ووعدج ما افتح هل موضوع بعد الا انتي تكليلي

بين ترددي واصراره كتله...اوك

وكفت ع جهه وهوه راح جاب السياره من الكراج من شفته صعدت وره شوي وبويه اتصل عليه رديت عليه وكتله...رجعت الخطي القديم

صفنت كلت خلي اسئل مرتضى ع ميساء بلكي يعرف اخبارها كتله....مرتضى متعرف شي عن ميساء ليش مجاي اداوم

حسيته ارتكب وكلي.....ليش متدرين ميساء ازوجت

تاره....شنوووو

تنويه!!

حبايب اعرف جاي اتأخر عليكم واتمنى تعذروني لان لو ما صارت عندي ضروف صعبه ما اتأخر

يل شايل فهاوة هيل طعم سوالفك عنبر