رواية في ارض الغرام انت دولتي الفصل الحادي والثلاثون 31 - بقلم ﮼الاميره،الموسويه 👑

ما احلل لاي شخص ياخذ كتاباتي وينشرهم (ذمه)

بقلمي (هدى الموسوي) الاميره الموسويه 👑

اسيد .. شفت داليا غركانه بدمها واني فقدت عقلي والي خبلني اكثر كلامها .. تصيح بنتي اسيد لتموت بنتي!!!!
بدون وعي شلتها هي ودمها حتى حجاب ماكو ع راسها ركضت خليتها بالسياره وگبل للمستشفى  بكل سرعتي ماادري بنفسي فقدت ، مااعرف شدااسوي .. بقت هي  تصيح وتعيد نفس الكلام بنتي ما بنتي .. الى ان اختفى صوتها ...!
درت وجهي عليها لكيتها نايمه فقدت الوعي!!
گلبي كام يرجف بقوه وعيوني تريد تطلع من مكانها تريد اتباوع بوجها تتفحصها ، تعرف اشبيها .. بصوت عالي صحت عليها داليياااا .. داليييييااااا .. اتسمعيني .. دالييييااااااا لج احجي وياي داليااااااا .. اريدها بس تجاوبني ماكو!!
زدت السرعه اكثر بس اني كل عقل ما بقى براسي احس روحي طلعت مني بس جسد ديتحرك .. ماادري اشلون وصلت للمستشفى .. گبل للطوارئ نزلت وبسرعه نزلتها من السياره من شافوني المسعفين اجوي يركضون خليتها ع السديه بس اني ماادري بنفسي شداسوي ولا اسمعهم اصلاً شديحجون بحيث سألوني عن حالتها وشصايرلها واني مااجاوب اتخورست .. مكلت شي غير انطيتهم اسمها وبس !
المهم ..
اخذوها مني وراحو واني جامد بمكاني بس اباوع عليها اشلون دتروح من بين اديه واني مااحرك ساكن!
رجليه احسها ثگلت مااكدر اوكف عليهم  ، بخطوات متثاقله مشيت كعد ع الكرسي بالطوارئ .. كعدت والافكار بدت تغزو عقلي ...
معقوله داليا؟!
اشوكت .. وليش مكالتلي؟!
زين شعرفها جنس الجنين بنت وتصيح بنتي؟!!
اكيد صارلها هوايي حامل ومكايلتلي .. بس الي صار بينا من فتره قليله ميتعدى شهرين 3 ..اشوكت لحكت تعرف بيها بنت؟!
معقوله من اتقربتلها  غصباً عنها؟!!!!
زين ساره شنو كالتلها .. شنو سوتلها حتى صار عدها نزيف؟!!
معقوله اتكون ضربتها .. اي اكيد والا ليش صار بيها هيج ونزفت .. اكيد اذتها ... اوووووويلي ساره اذا الزمج .. خلي يصير بيها شي محد يخلصج مني غير بعد مااخذ روحج .. اصبريلي اني اعلمج.
بعدني داافكر واحجي ويا نفسي چان اسمع واحد يصيح منو الي ويا المريضه داليا نزار...؟!!!!
بس سمعت اسمها فزيت .. كمت بسرعه كلتلهم اني .. اني زوجها .
چان يكول المريضه محتاجه دم وحالاً لانو عدها نزيف !!
اني مرتبك وفكري متشتت مااعرف شنو الي صار زين الطفل .. الطفل شنو مات .. أسأل عليه بس لااا لاا اخاف يكولون مات .... لا ميموت .. ميموت لااا.. بقيت صافن بوجه الممرض وهو يحجي وياي .. چان يعيط بوجهي اخيييي دتسمعني دااكولك انريد دم والا راح نفقد المريضه!
من كال هذا الكلام احس واحد خمش گلبي من صدري .. رجعت الوعيي وكلتله بصوت جامد..
_شنو زمرة دمها ..؟!

الممرض .. +AB

اسيد .. اني فصيلتي +O يعني يصير انطيها .

الممرض .. امشي وياي انسويلك فحص سريع وانشوف اذا دمك يتوافق او لا.

اسيد .. اخذني ورحنا سوولي فحوصات ع السريع واخذو مني بطلين دم كالو بس اثنين لان محتاجين حالياً واذا ردنا بعد عود نطلب من مصرف الدم ممستعجلين عليهم.
اخذ الدم وراح واني بقيت انتظر بالردهه بس احس الدنيا دتفتر بيه .. ودمي يغلي مثل البركان اريد اعرف شنو الي كالته الحقيره ساره الها بحيث خلتها توصل لهلحاله .. يعني حتى اذا عرفت بيه متزوج ممعقوله تغار عليه وتوصل بيها الحاله انو ممكن تسقط طفلها بسبب الغيره!
طردت الافكار من راسي بس الغضب ميروح مسيطر عليه .. مرت ساعه تقريباً وماكو خبر منها ولا احد طلع!
واني كاعد على نار احترك مااعرف شبيها شصارلها .. خلص صبري كمت اشوف شكو أسأل اشلون صارت حالتها چان يطلع الممرض نفسه بوجهي .. كالي الحمدلله على سلامة المدام وضعها استقر وزال الخطر الشكر لله!
ما اكدر اوصف الاحساس الي حسيته بوقتها ع بالك اشلون الي دااحترك بنار تسعر بيه و واحد اجه طفاني!
جريت نفس وكعدت ع الكرسي احس اطرافي ارتخت .. بس بقى سؤال يدور ابالي .. الطفل ما جاب سيرته !!!!
معقوله صارله شي؟!!
حاولت ابعد هالفكره من بالي وحاولت اسأل الي كدامي بس احس اللساني انعكد .. خفت من الجواب الي راح اسمعه!
كالي بس ينقلوها لغرفه خاصه تكدر اتشوفها .. عافني وراح .. اشويه وطلعت داليا من الطوارئ نايمه ع السديه ومغمضه عيونها !!
رحت وراهم للغرفه الي نقلوها بيها محد بيها بس هي .. بقيت كاعد يمها وانتظرها تصحى حتى اتطمن عليها و ... ع الي ابطنها  .. بس مكعدت مااعرف الظاهر تعبانه من الي صار .. عفتها وطلعت خابرت على علي كلتله تجيب مرتك وتجيني للمستشفى الفلاني .. بقى يسأل ويحقق كلتله داليا اتخربطت وجبتها ، وهسه عندي شغله ضروريه ومااكدر اعوفها وحدها ..!
كالي مسافة الطريق اني يمك .. كعدت انتظر مدخلتلها بعد لان شكيت بيها هي كاعده بس متريد تحجي وياي ودتتظاهر انها نايمه.
صدك اشويه واجانب علي هو و مرته ام اللسان..

سلمى .. بصوت حاد وعصبيه .. شسويتلها .. هاااا كولي اشسويتلها البارحه اني يمها كولشي ما بيها مثل الورده شسويتلها ؟!!

اسيد .. ساكت وممعبرها اصلاً لان الي شاغله اكبر من سلمى ولغوتها .

علي .. سلمى اهدي شنو هذا الكلام خلي نفتهم شصاير.

سلمى .. لتكولي اهدي علي ولتدافع عنه انت تعرف كولش زين شنو هذا وشلون يتعامل ويا الناس اكيد ضربها لو اذاها والبنيه متحملت .. بس والرب يا اسيد اذا صار بداليا لو بأبنها شي محد يخلصك مني اكلك بسنوني.

اسيد .. علي اني رايح خليك يمها ولتعوفها ابد واي شي يصير بلغني .

علي .. ماشي روح انت وليظل بالك اني هنا وان شاء الله ماكو شي.

اسيد .. عفتهم وطلعت بس اني روحي دتحترك والشياطين تتنطط كدامي مااشوف بشر كدامي اشوف غضب وبس .. بوجهي طلعت لبيت كرار ... السياره كل سرعتها تمشي بحيث ردت اندعم وتنكلب بيه اكثر من مره !!
اوووف شيوصلني الج ساره والزمج الا اشرب من دمج وهم ميكفيني .. حتى مفكرت بأخويه والي يسوي كلت اذا وكف بوجهي انهي هو وياها والي يصير خلي يصير .. الغضب عماني بحيث كمت مااحسب احساب احد ، اني من اوصل لهذي المرحله من العصبيه افقد بحيث حتى اني اخاف من الي ممكن اسوي ونتائجه بعدين!
بس ميهمني غير اوصل الساره واطلع حركتي بيها .. وصلت لبيتهم الدنيا الظهر .. صفيت السياره اشلون ما كان .. لكيت الباب الخارجي مفتوح دفعته ودخلت بسرعه وگبل للباب الداخلي هم دفعته كل حيلي ودخلت .. لكيتها بالمطبخ والبيت فارغ ، من شافتني عيونها صارت بالطول و وجها صوفر .. بدون اي كلام واي مقدمات سحبت المسدس خليته براسها .. هي كامت ترجف مثل السعفه ..

ساره .. دخيلك اسيد عفيه الله يخليك والله مسويت شي اني والله اسيد بس اسمعني.

اسيد .. بصوت حاد هادئ بس مليان غضب .. اسمعيني زين كلام وما اعيده .. وديري بالج تكذبين عليه وروح ابويه افرغ المسدس براسج واطلع محد بالبيت ومحد يدري بي اصلاً يكولون حرامي وفضت راحت .

ساره .. وهي تبجي برعب .. لاااا فدوه اروحلك اسيد لا تيتم جهالي الله يخليك الله كل الي تريده اكوله بس لتموتني الله يخليك مو لخاطري لخاطر جهال اخوك فدوه اروحلك والله اكولك كل الي اعرفه.

اسيد .. شعندج رايحه للمزرعه ، وشنو كلتي لداليا؟!!!

ساره .. بصوت يرجف وكلمات متقطعه .. مو .. اني .. والله مو اني .. امك .. والله عمتي هي الي كالتلي اروح للمزرعه واحجي ويا داليا .. اكوللها انت اتزوجت حتى تعوفك بحالك وتروح.

اسيد .. مو كلام الي كالته لا السماء بكبرها وكعت على راسي .... امي؟!!!!!!!!!'
معقوله امي تسويه هيج؟!!
لااااا اكيد هذا فلم من افلام هذي الحيه دتريد اتخرب بيني وبين امي حتى تطلع هي منها ..!
سحبت اقسام ردت اخوفها حتى اتكول الصدك .. سحبته وخليته ع راسها .. هي كامت تصيح..

_كلتلج لتكذبين عليه بس الظاهر انتي تردين اتموتين.

ساره .. لاااااا دخييييلك والله مدااكذب وداعت جهالي هي هاي الحقيقه .. واذا ممصدكني هسه اخذك وانروح لبيتكم واحجي ويا امك كدامك.

اسيد .. باوعت عليها ترجف وحالتها مو مال وحده دتكذب !!
كلامها صحيح .. وردات فعلها حقيقه مو تمثيل .. سكتت بس بوقتها اتمنيت لو ضاربتني طلقه اهون مليون مره من الي سمعته .. امي تسوي بيه هيج؟!
امي الي جبرتني اتزوج واكسر گلب المخلوقه الي احبها بس حتى متنقهر لو يصير بيها شي تالي تطلع هي سبب كل قهري؟!!!!!
جسمي احسه نمل اديه كامت ترجف من الغضب الي اجتاحني والالم الي دااحسه بصدري .. جريت السلاح واستجمعت كل حيلي حتى احجي كلمتين ..
_حرف واحد من الي صار اذا عرف بي احد انهيج ، وخلقتج بعد مت اشوفها واذا فكرتي توصلين عتبة بيتنا وروح ابويه ادفنج بالباب سمعتيني؟!

ساره .. اي اييي والله ماافتح حلكي ولا احجي شي والله ومااوصل بعد لبيتكم ابد والله بس لتيتم جهالي ابوس رجلك.

اسيد .. جريت سلاحي وطلعت بس شطلعت .... البركان الي بداخلي انفجر .. انفجر وحرك كل ذره بروحي احس النار دتاكل بيه بهدوء .. الهوا ضاع عليه .. اتوقع الالم يجيني من الكل الا من امي!!!
امي الي لو تطلب روحي ما اعزها عليها .. ولو مواجهتني وكايلتلي طلكلها حتى لو حياتي وموتي متوقفات على داليا اطلكها بس امي كون متنقهر ولا تنغث لو يصير بيها شي!
بس اتدخل هاي الحيه بحياتي وتقرر عني بدون حتى متفهم مني شي هو هذا الي قضى عليه.
طلعت من بيت كرار والهم زاد عليه اضعاف احس نفسي فاصل عن الوجود بعالم وحدي بي والظلام محاوطني من كل الجهات ديخنكني ويكتم انفاسي .. بقيت اسوق بالسياره مااعرف وين اروح و شنو اسوي؟!!
طلعت على طريق صحراوي الدنيا صارت المغرب والجو بارد وكفت السياره ونزلت اريد اشتم الهوا ديضيع عليه ماادري شصارلي وليش دااختنك؟!!
احس شي واكف بحنجرتي ديخنكني ميطلع ولا ينبلع حاشر بزردومي .. و صدري بي وجع كارثي .. نزلت من السياره الشارع فارغ محد بي بس اني والشمس غوربت .. وكفت بصف السياره ماادري شسوي اشلون اتخلص من هاي الخنكه الي دتكتم انفاسي راح اموت ... صفنت كدامي وفكري شارد فجأه اجه ابالي اليوم الي اكتشفت بي خطوبة علياء واحمد من شفتهم بباب المحكمه طالعين ايد بأيد!!!!!
ذكريات وصور نسيتها ودفنتها من اسنين دتمر كدامي .. نفس الوجع نفس الحرگه نفس الخيانه ومن اعز اثنين عندي بحياتي!
اكثر شي يموتني بالحياة وينهيني هي الخيانه وامي استخدمت اسوء وسيله لموتي!
مااكدر اتحملها الخيانه بالنسبه الي مرض يقضي عليه اكدر اواجه الموت واوكف بعينه بكل سهوله ، بس مااكدر اتحمل الغدر والخيانه انهار واضعف كل قوتي و وجودي ينتهي ..
روحي من صدك كانت تنازع حتى تطلع مني .. رجليه متشيلني بعد وكعت على اركبي بالكاع ودموعي وكعت وياي ... بصوت قوي هز كياني وروحي صحت ..

_آآآآآآآآآآآآآخ يــــــمــــــــه لييييييييييييييييييييشششششششششش!

صيحت الى ان حسيت حنجرتي اتجرحت بعد حتى صوتي راح !
كمت من التراب صعدت بالسياره وگبل لبيتنا .. حتى الطريق محسيت بي ولا ادري اشلون وصلت لبيتنا لان فكري وعقلي كانو مشغولين بأكثر من مليون شي!
وصلت لبيتنا ما باقي بيه ذرة حيل رجليه اسحل بيهم سحل .. لاول مره بعد كل هالسنين احس نفسي مكسور ومذلول.
دخلت للبيت لكيتهم كاعدين بالصاله سبب موتي والثانيه الي تتسمى زوجتي .. بدون اي كلام دخلت من شافتني هي شكلها اتغيير الظاهر حست اني عرفت بألي سوته .. حاجتني ..

الحجيه .. الله يساعدك يمه اسيد اشو اليوم ماكو لا سلام ولا كلام شصاير؟!!

اسيد .. محجيت شي ما عندي قوه للكلام .. صعدت لغرفتي بوجهي للحمام مي بااااارد ثلج والدنيا بارده انجماد ..اريد برودة المي تطفي النار الي تسعر بداخلي ماكوو !
طلعت من الحمام على صوت الموبايل باوعت علي!!
مجاوبته ما عندي قابليه احجي وصوتي رايح اصلاً .. حتى بلوة حياتي الي نايمه بالمستشفى ومااعرف شصار بيها ما صار مسألت عنها ولا رديت وعرفت اشلون صارت!
شي بداخلي يكلي كل الي صار وسبب كل الي دااعيشه هسه والنار الي تسعر بيه ..... هي!
من يوم الي عرفتها والمصايب والبلاوي متخلص بحياتي وصلتني لمرحله دااعيش اسوء مخاوفي!
محاوبته ورجعت للحمام .. بعد فتره من الوقت طلعت بدلت ونزلت .. لكيتها بعدها كاعده بالصاله هي والحيه الي ورطتني بيها .. مريت من يمهن اريد اطلع چان تصيحني امي!!!

الحجيه .. اسيد يمه وين رايح .. مو احجي وياك اني؟!
شصاير كلي بيك شي؟!!

اسيد اتجاهلها وكأنه ميسمعها ولا يشوفها اصلاً .. بصوت جامد صاح على ام عادل ....
اجتي ام عادل تركض .. هاا دكتور اتفضل

اسيد .. غرفتي الجوه اترتبيها وتنقلين ملابسي وغراضي الي بالغرفه الفوك الها.

ام عادل .. يعني انقل ملابسك من غرفة ست ايمان.

اسيد .. اي و راح ادزلج ملابس ثانيه ترتبيهم بيها.

ام عادل .. ملابسك يعني؟!

اسيد .. بصوت حاد وغضب .. سوي الي اكلج عليه وخلص لتحجين زايد.

ام عادل .. العفو دكتور مو قصدي ان شاء الله بس يوصلن ارتبهم.

اسيد .. عافها ودار وجهه يريد يطلع چان الحجيه توكف كدامه .. وبصوت مرتبك

الحجيه .. ولك يمه اني ويامن احجي ، ع الاقل كول امي دتحجي وياي .

اسيد .. التفتت عليها بس اني ذل الدنيا وغضبها ولعنتها وكسرها و وجعها كله متجمع بيه .. بصوت حاد ومبحوح ..

_من اليوم ماعندج ابن اسمه اسيد .. مات اسيد وانتي الي گتلتي مبروك عليج.

الحجيه .. من سمعت صوته اشلون مبحوح وكلامه الي كاله اتخبلت .. اسيد يمه اشبي صوتك ليش هيج مختفي اشبيـ..

اسيد .. لتكوووووولين يمه كلتلج.

الحجيه .. عرفت انو اسيد عرف الموضوع خلص .. وحست بحجم الكارثه والدمار الي سببتها لابنها؟!!!
رادت تحجي بس اسيد منطاها مجال .. بصوت حاد شبه مختفي ..

_منا ورايح عندج 3 بنات و ولد واحد اني انسيني وانتي مكانتج وتقديرج ماانقص منهم ذره ، بس غير التقدير ما الج عندي شي محبتي اعتبرها صفحه وانطوت حالج حال علياء تتذكريها؟!!
انتي نفسها متختلفين عنها بشي طعنتيني نفس طعنتها بس انتي اعظم لان انتي اقرب منها الي ... انتي كنتي امي.

الحجيه .. دموعها كامت تصب من كلام ابنها متوقعت ابد يجي يوم وتسمع اسيد يحجي هشكل وياها؟!!
بصوت مخنوك بالعبره وعصبيه .. ولك تتبرا من امك علمود خدامه؟!

اسيد .. ابتسم ابتسامه هادئه .. ههه خدامه !
مو هي هاي الي كنت لما اكول خدامه تنزعجين وتزعلين مني؟!
هسه صارت خدامه؟!
بس حتى ترتاحين وتعرفين قدرج عندي الخدامه هاي لو اجيتي ووكفتي بوجهي وكلتيلي طلكها ، اطردها ، موتها .. ما كان رديتج ابد انت تأمرين على رگبتي وماابخل بيها عليج!
بس انتي استخدمتي اخبث واحقر والعن مخلوقه وخليتيني لعبه بيدها .. استخدمتي اسوء شي بحياتي وسويتي ... خنتيني !

الحجيه .. ما حجت شي بس حست بندم فضيع من كلام ابنها .. ولانها تعرف اسيد لما يكول كلام ميتراجع عنه وميكذب بي عرفت انو هي فعلاً خسرت ابنها.. !
رادت تحجي وهم قاطعها ..

اسيد .. التفت على ايمان .. بعد اشويه تجي مرتي الي كلتلج عليها تتذكرين؟!!
حظري روحج واستقبليها.

ايمان .. شنووووو شدتحجي انت يا زوجه و وين جايبها .. اكيد دتتشاقه!

اسيد .. لا مااتشاقه ، واعتقد بلغتج اني متزوج وانطيتج خبر قبل الزواج ومع ذلك اصريتي نتزوج .. فاذا عندج اي مشكله الباب يوسع حصان اتوكلي.
درت وجهي وطلعت گبل للمستشفى .. وصلت لغرفتها لكيتها فارغه!!!
نزلت ركض للرسيبشن اسأل ع بالي صار بيها شي .. كالولي طلعت هي واختها ورجلها..!
جريت الموبايل اتصلت على علي بس اني الدنيا انگلبت بعيني يعني لو لازم علي بساعتها يمكن نهيته اشلون يطلعها بلا علمي؟؟

علي .. الوو اسيد هاي وينك اتصل وماكوو؟!

اسيد .. بعصبيه وغضب .. انت اشلون تطلع مرتي من المستشفى بدون متكلي؟!!

علي .. اسيد هدي ولتعصب ترى اتصلت عليك اكثر من مره مجاوبت والمستشفى كالو حالتها استقرت وتكدر تطلع شسوي يعني اتعارك ويا الاطباء وابقى لحد ما حضرتك تجي؟!!

اسيد .. داليا وين؟!!

علي .. عندي بالبيت و..

اسيد .. سديت الجهاز بوجهه وطلعت لبيته گبل .. وصلت خابرته كلتله نزلي داليا بسرعه ، لان مااريد اشوف مرته ما الي خلك اللسانها يمكن اطلع قهري بيها اذا حجت!

علي .. اسيد اصعد وتعالي عندي حجي وياك ضروري.

اسيد .. اوووف شيخلصها .. صعدت فتحلي الباب علي ودخلت لشقته مكعدت كلتله صحيلي داليا حتى انروح!!

علي .. داليا متروح.

اسيد .. شنو؟!

علي .. اسيد خويه البنيه تعبانه والي صار بيها مو قليل ، والاطباء كالو لازم ترتاح هالفتره لان مو زين ع الجنين حالته تعبانه.

اسيد .. هو كال الجنين .. واني حسيت الدم بدا يصعد الراسي والهوا دخل ريتي!!
يعني عايش؟؟!
ابني عايش و ما مات ؟!!!
الف الحمد والشكر اللك يا ربي .. هم زين اكو شي برد اشويه النار الي مشتعله بگلبي .. بعد امه بلوة حياتي  اشلون اقنعها؟!
بصوت حاد ..

_داليا وين؟!!

علي .. نايمه جوه.

اسيد .. روح كول لمرتك خلي تطلع من يمها اريد احجي وياها.

علي .. اسيد اسمـ..

اسيد .. امشي علي فضني ترى ما الي خلكك.

علي .. عافه وراح طلع سلمى من يم داليا بس هي من شافت اسيد بقت تخزر بي!
طلعو اثنينهم ودخل اسيد .. لكاها نايمه ع السرير بس صاحيه .. من شافته دارت وجهها ..

اتقرب كعد بصفها ع السرير .. وبصوت حاد ومبحوح كاللها

_اشلون صرتي؟!

داليا .. محجت اي شي ودايره وجهها.

اسيد .. مديت ايدي درت وجهها عليه لكيتها تبجي ودموعها ع خدها .. اسمعيني قبل لتبجين وقبل لتسوين اي شي .. اسمعي الي راح اكوله وبعدها الي تردي يصير بلا بجي وبلا دموع .. مو زين على طفلج البجي والتعب .

داليا .. مااحجيلكم الخوف والرعب الي عشته بالمستشفى .. كان كل الي ابالي بنتي لتموت .. مااعرف لويش اختي تاليا وكفت كدام عيني بحيث عيوني تصب ماادري على بنتي لو اختي!!
بعد معاناة وخوف استقرت حالتي والطفل الحمدلله ما بي شي!
من نقلوني كنت ادري بي كاعد يمي وينتظرني اكعد بس اني نفسيتي كانت تعبانه كولش بحيث اذا الزمه اكل منه لحم وهم ميكفيني ع القهره والحركه الي عشتها..وبنتي الي رادت اتموت!
خليته من راح كعدت بعدين اجتي سلمى هي وعلي هم كعدنا نبجي وحجيتلها كولشي وهي تدعي عليه .. هي تدعي واني گلبي يحترك من كلامها بس مااكدر احجي .. احس نار ومشتعله بيه من شفت الصور وهو كاعد يم وحده ثانيه !
سمحولي اطلع من المستشفى كال علي لازم ننتظر اسيد يلا نطلع اخاف يجي وميلكانه يظل باله لازم ننتظره .. كلتله ما ابقى لحظه وحده وما انتظره ولتنطي اي خبر اصلاً اني بس اطلع منا اطلب الطلاق!
علي بقى يحجي وكالي ميصير هيج ومو كل الامور تنحل بالطلاق .. اني ولا عبرته اصلاً طلعت واخذوني لبيتهم لليل اجه الافندي ولا كأنه مسوي شي !
كعدنا بس اني ويا سألني اشون صرت مجاوبته!
بعدين كالي راح احجي كلام وبعدها الي تردي يصير .. اني مجاوبته بس ادموعي تصب

اسيد .. اولاً وقبل كلشي اني مكذبت عليج ابداً امي صدك كانت مريضه واني كنت بالمستشفى وياها الى ان طابت وصارت زينه!
ثانياً .. الي كالته ساره الج اياً كان ترى كله كذب الزواج مجرد شكليات ع الورق وبس و روح ابويه ومصار بينا اي شي .

داليا .. شفت الصور بعيني وديحلفلي هذا من كل عقله؟!
بصوت جامد .. اي واضح مصاير شي بينكم من الكعده الي كاعديها والحفله والناس البدله الي لابسها والحلقه الي خليتها بأيدها.

اسيد .. كل الي شفتي صحيح بس كلها شكليات مجرد تحصيل حاصل.. كدام الناس.

داليا .. شكليات مو شكليات هذا شي يخصك الك اني ماابقى وياك بعد.

اسيد .. قصدج شنو بلا وضحي؟!!

داليا .. لو اني لو هي.

اسيد .. شنو لو انتي لو هي؟!
دااكولج هذا زواج شكلي فتره وينتهي.

داليا .. الي عندي كلته وانت اختار .

اسيد .. اني اعصابي تلفانه والي صار هد نص حيلي وهايه كاعده تتشرط .. كمت من مكاني وبصوت حاد .. اني طالع خمس دقايق الكاج بالسياره فضيني.

داليا .. انت شكلك مسمعت شنوووو كلتلك.

اسيد .. لتخليني وارتكب جريمه بيج هسه .. شنو تخيريني انتي .. منو انتي وتحددين شنو اسوي واشلون اسوي.

داليا .. مدااحدد .. دااكولك اختار بينا يأما اني او ..

اسيد .. انتي مستحيل اطلكج انسي وهي مااكدر هسه اطلكها شنو اتكول الناس شهر وطلك؟!
البنيه تنفضح وهذي سمعه مو شي سهل .. انطيني مجال يعدي كم شهر وبعدها اطلكها .

داليا .. ولويش متطلكني الي؟!!

اسيد .. لان انتي ام ابني اشلون اطلكج؟!

داليا .. من كال ام ابني ماادري شصارلي كل القلق والغضب والحزن صارو فرح حتى موضوع ضرتي نسيته!
يا رب يعني اتقبلها وتمسك بينا مراح يتخلى عني وعن بنتي؟!!

اسيد .. يلا فضيني كومي بعد ورانا طريق طويل.

داليا .. ماشي دقايق واجي وراك .. طلعت سلمت على سلمى ودعتها هي بقت تحجي عليه لان سامحته بسهوله ورحت ويا .. متدري اني اضحي مو بس بسعادي لا حتى بروحي في سبيل سعادة وضمان راحة بنتي .. صعدت بالسياره اول ما خليت راسي ع الكشن غفيت .. ماادري وين جابني ع بالي حياخذني لبيت المزرعه اشو الطريق طويل؟!!
ما حسيت غير لما وكفت السياره كعدت .. اباوع اشو هذا بيت اهله؟!!!!!!!!!!!!
شجابني لهنا اني صكيت بمكاني .. درت وجهي عليه جان ينزل ويفتحلي الباب .. اني بصدمه كلتله هاي شنو؟!!!!

اسيد .. هذا بيتج انزلي.

داليا .. اسيد عفيه شدتحجيييي شكو جايبني هنا.

اسيد .. امي عرفت كلشي وتعرف اني وياج متزوجين بعد شكو شاردين؟!!

داليا .. اسيد عفيه الحجيه مريضه لتشوفني وتتخربط فدوه امشي رجعني للمزرعه

اسيد .. لزمتها من ايدها ونزلتها من السياره .. فتحت الباب ودخلنا .. لكيت امي كاعده دتنتظرني الظاهر من شافتني دخلت وداليا وياي اتخبلت كامت على حيلها واجتي وكفت كدامنا ..

الحجيه .. اسمعني اسيد سكتتلك ع كل الي كلته وحجيته بس مال تجيبها لبيتي لاااااا  لهنا وكافي ولو اني لو الخدامه بالبيت.

اسيد .. اسمها داليا وتكون مرتي بلا تسميات ما الها داعي

الحجيه .. هااااا ولك هذا الحجي وياي اني كلامي صار ما له داعي ؟؟!
ولك ربيتك وتعبت عليك تالي تفضل عليه خدامه؟!!

اسيد .. كلتلج اسمها داليا كافي هذي التسميات لتخلوني اكلب البيت على روسكم هسه.

الحجيه .. لااااا انت مو طبيعي ابد الظاهر الخدامه لعبت بعقلك مضبوط.

اسيد .. امشي داليا روحي لغرفتي القديمه هسه اني جاي وراج.

ايمان .. خاله متحجييييين شنو هذا الي ديكوله ابنج شنو مرته شنو تمعد هنا؟!!

الحجيه .. لتخافين بنتي محد يكعد هنا غيرج وماكوو وحده تاخذ مكانج لا خدامه ولا غيرها.

اسيد .. ههه اي نشوف ليش لا..!

الحجيه .. ولك انت اليوم مو طبيعييي شمسويتلك هاي بنت ابليس.

داليا .. من بين دموعها .. لتحجيييين ع ابويه الله يخليج ابويه متوفي و ما له ذنب.

الحجيه .. اي هم زين مات وما شاف عارج الي جبتي اله جان كسرتي وجهه .. امج المسعده وين هم ماتت لو ملتهيه بغير شغل.

اسيد .. امها بالشمال تتصيف ويا عائلتها ..

الحجيه .. جرت داليا من ملابسها ودتريد اتطلعها ... بس اسيد لزم داليا وبعدها عنها ...

اسيد .. على كيفج ويا بنت اختج.

الحجيه .. ولك انت شتحجي .. ولك اسيد تريد اتموتني انت؟!!

اسيد .. لا اموتج ولا تموتين .. اسمعي بأذنج .. داليا تعالي هنا يمي ..

داليا .. اجتي تبجي .. باوعت على اسيد بس محجت..

اسيد .. كوليلها منو امج وانتي بنت منو؟!!

داليا .. بقت مصدومه وتباوع بوجه اسيد .. ممصدكه الي ديحجي هذا من صدوك مو عاقل مثل مكالت امه اشون يكوللها اني منووو!

اسيد .. بصوت عالي صياح ... احجييييي كولي انتي منووو ومنو امج!!

داليا .. دنكت راسها وبصوت مخنوك .. ايناس امي.

الحجيه .. يا ايناس ولج ؟!

داليا .. رادت تحجي بس دموعها خانتها ...

اسيد .. لحظه هسه تعرفين منوو !
سحب الموبايل واتصل على خالته ايناس .. رن رنتين وجاوبته ..

ايناس .. الووو شعندك

اسيد .. اسمعيني بنتج داليا سوت حادث وتريد اتشوفج قبل متموت.

ايناس .. عساها اتموت وتلحك ابوها شعليه اني ؟!
كلتلك هذا الموضوع نسيته وداليا واختها بالنسبه الي ماتن ويا ابوهن.
وانت هم اطردها احسنلك لان هاي مثل ابوها فكريه وتفكرك مثل ما ابوها فكرني ساعة السوده الي اتزوجت بيها وخلفتهن

داليا كانت تسمع ودموعها تصب .. والحجيه تسمع ومصدومه

الحجيه .. فجأه وبلا مقدمات وكعت بالكاع... .......!

للحكايه بقيه❤️
رأيكم بالاحداث وتوقعاتكم للبارت القادم
اي غلط غلسوووً والله تك عين اكتب ميته من النعااس