رواية في ارض الغرام انت دولتي الفصل الثاني والثلاثون 32 - بقلم ﮼الاميره،الموسويه 👑

ما احلل لاي شخص ياخذ كتاباتي وينشرهم (ذمه)

بقلمي (هدى الموسوي ) الاميره الموسويه👑

اسيد .. اول ما سمعت امي كلام ايناس وتأكدت انو داليا بنتها والموضوع حقيقي ومو كذب اتخربطت !
طبعاً امي مريضه عدها تهطل بشرايين القلب والدكتوو كال اقل صدمه او ارهاق تأثر على صحتها لان قلبها اولاً ضعيف وثانياً مريض .. فكان اقل عارض او انزعاج يسببلها فقدان الوعي لان گلبها ميتحمل!
اني ابد مو بنيتي أأذي امي لان هي عندي اغلى من روحي اشلون افكر اغثها لو اكون السبب بموتها؟!!
بس من عرفت انو هي الي خلت ساره تروح الداليا ، وكنت راح اخسر ابني الي حتى ماادري بوجوده بسببها ، والاعظم من هذا كانت تعرف انو اني متزوج مسألتني ولا واجهتني واصرت انو اتزوجني وحده لا اريدها ولا اطيقها .. كل هذا خلا الغضب يعميني كمت مااشوف احد ولا احسب حساب الشي الخيانه هي نقطة ضعفي وامي الي سوته اكبر من خيانه بالنسبه الي لانها بكل بساطه سوتني لعبه بيدها وساره هي الي تحركني!
المهم ..
من شفت امي تخربطت اعصابي تهسترت حسيت بذنب فضيع وندم لان كلتلها ع الحقيقه .. بس ما عندي خيار ثاني .. لان اميي مستحيل تتقبل داليا بحياتنا سبق وكلتلكم امي تحب الشكليات والمظاهر واهم شي عدها العادات والتقاليد تعتبرها خطوط حمراء وماكو اي مخلوق على وجه الارض يكدر يغير نظرتها تجاه هذي الافكار امي انسانه حديه لدرجه عجيبه اذا كالت شي مستحيل تتراجع عنه او تغيره !
يعني عايشه بالعصور المتحجره .. وداليا بالنسبه الها متليق بيه .. فمن سابع المستحيلات ترضى ع زواجنا وخصوصاً الطريقه الي تم بيها ، يعني بين قوسين لا يمكن تتقبل داليا كـ چنه الها.
بس مع ذلك امي متقبل بالظلم .. لذلك كان لازم اكوللها الحقيقه حتى تعرف انو داليا مو من الشارع مثل ما هي مفكره وانو هي مظلومه وعانت الامرين بسبب امها الي هي ايناس اختها لامي!

شلت امي خليتها ع التخم وام عادل جابت جهاز الضغط والسكري قستهم الها  طلع عدها ارتفاع بالسكر بس مو هواي وضغطها زين!!
انطيتها علاجها وطلعت للحديقه ادخن جكاره راسي احسه يريد ينفجر.. انتظرتها الى  ان ترتاح اشويه وتصحى!

بقيت ادخن جكاره وره الخ والتفكير نخر عقلي .. هذي اول مره بحياتي أحس نفسي اذيت امي .. گلبي احسه يتگطع من الندم ع الي صار لامي بسببي .. بس لااااا كل هذا بسببها هيي ... اي هي .. المفروض متخليني لعبه وتتصرف هيج وتسويني مضحكه!
زين هي هم حقها .. ام وعرفت ابنها متزوج بدون علمها!!
بس اني اضطريت لهذا الشيي يعني مو بيدي !!
بقيت أسأل نفسي واجاوبها مثل المخبل .. دااحس روحي فقدت عقلي .. اي فقدته .. وكل الي ديصير بسبب بلوة حياتي .. من يوم الي عرفتها حياتي انكلت رأساً على عقب!
كلشي صار عباره عن مشاكل .. كل الي تدخل بي يتدمر .. بسببها عاندت امي .. اتزوجت بدون علم اهلي .. اني الي كنت احجي على علي وانصحه ميسوي هيج شي صرت مثله!!
من يوم الي دخلت الحياتي صارت جحييييم .. حتى صرت عاق بسببها ..!
احجي ويا نفسي بس البراكين بداخلي اتفور غضب اريد انفجر .. منظر امي و وكعتها كدامي خلو اعصابي تتهستر .. بعدني ع هالحال وچان اسمع صوت صياح من البيت!!!!!!!!!
گلبي اتوقف عن الحركه .. رجليه احسها انشلت .. كلت امي ماتت !!
اي ماتت وبسببي .. ماتت وهي مراضيه عني!!
الفكره هذي بس مرت على بالي جسمي صار يرجف مثل السعفه .. اريد اتحرك من مكاني اروح اشوف شكوو .. شصاااار .. مااكدر رجليه متتحرك ع بالك جامدات!!
شمرت الجكاره من ايدي وركض للبيت بس گلبي احسه بقى بمكاني لان ما احس بي دينبض .. دخلت لكيت امي نايمه ع حطتها .. داليا واكفه تبجي .. وايمان كدامها تصيح وتلعلع عليها بكل صوتها....!!!!!

من شفت امي ما بيها شيي و على نومتها الهوا دخل لصدري اتنفست الحمدلله الك يا رب .. بلعت الغصه الي حشرت بحنجرتي من الخوف وسديت الباب بكل قوتي بحيث الجام اتكسر!!
بصوت عالي وبغضب ..

_شكووو ؟!!

الحيوانه ايمان من شافتني سكتت و وجها صار اصفر بقت بس تباوعلي ، و داليا ع وكفتها بس مدنكه وتبجي !

_دااحجي وياجن شنو هالصياح ، ومنو هاي الي صيحت؟!!

ايمان .. محد صيح دااحجي ويا الخانم وين سمعت صياح!

اسيد .. بغضب .. دتحجين؟!
صوتج واصل الراس الشارع ع بالي امي صارلها شي واتكليلي دااحجي؟!!

ايمان .. عوفك من صوتي هسه وكول لهاي خلي تطلع هسه من البيت ترى والله ...

اسيد .. اي؟!
ترى والله شنوو شتسوين بلا؟!!

ايمان .. طلعها احسنلك.

اسيد .. الغضب سيطر عليه حيل بحيث عيوني احسها يطلع منها نار .. هاي الظاهر متعرفني واخذت راحتها .. بصوت حاد وغاضب .. التفتت على داليا

_امشي روحي لغرفتج.

داليا .. من طلع اسيد اشو هذي اتولتني غلط ومسبه الحقيره اني سكتت محجيت شي لان الحجيه مريضه وهسه مو وقت مشاكل وعرايك .. بس من غلطت على ابويه متحملت بعد ادموعي نزلت لان ابويه دينشتم بسببي .. محجيت وياها بس كلتلها احترمي نفسج ولتجيبين طاري بابا.
وهي مصدكت على الله حاجيتها كامت تصيح بعلو صوتها .. اشويه ودخل اسيد وجهه اصفر والخوف مالي ملامحه!
كال منو صيحت اني محجيت هي جاوبته وبقت تلاسنه .. هي تحجي واني من يمي خفت من ردة فعل اسيد!!
هاي الغبيه متعرف ويامن دتحجي ، مشايفته من يعصب شيسوي !
بعدين كالي روحي لغرفتج .. طبعاً هو ميباوع بوجهي مااعرف اشبي اكيد ع باله اني الي دااصيح واتعارك وامه بهالحاله!
بقيت صافنه بوجهه ردته بس يباوع عليه ، يرفع عيونه ويشوفني حتى اكوله ترى مو اني الي صيحت و محجيت شي!
بس ماكوو بقى داير وجهه وساكت ينتظرني انفذ الي كاله .. متحركت چان يعيط بيه بصوت اعلى

اسيد .. وليي من خلقتيييي .

داليا .. من صاح بيه نزيت لان صوته كولش عالي .. رجليه ركضت وحدها من الخوف .. بس الي قهرني اشون يصيح عليه هشكل كدام هاي الحقيره واني اصلاً ممسويه شي هي الي صيحت!
رحت للغرفه دخلت وسديت الباب كعدت بالباب وبقيت ابجي على حظي الي ما فد يوم نصفني!
بعد مده مااعرف اشكد اندك الباب .... منوو؟!!

ام عادل .. دخلت .. الحجيه كعدت وتريدج بغرفتها دتنتظرج!!

اسيد .. راحت داليا وبقينا بس اني والحيوانه .. مشيت يمها جريتها من ايدها وصعدتها لغرفتها دفعتها بالغرفه دخلت وسديت الباب .. انداريت عليها هي خافت وجهها كام ينطي اللوان .. اتقربت منها لزمتها من فكها وعصرت وجهها بأيدي حيل وبصوت حاد غاضب ..

_اولاً هذي اخر مره تعلين صوتج كدامي.
وثانياً .. داليا مرتي وام ابني وانتي عندج علم متزوج لان سبق وكلتلج ، فهذا بيتها تسوي الي يعجبها ومحد يتجرأ ويحاجيها لا انتي ولا غيرج وأذا سمعت او شفتج حاجيه وياها لو زاعجتها ما اوديج لاهلج لاااااا اموتج وادفنج هنا وعود خلي رجال يطلعلج.
اخيراً والاهم .. خلي هالكلام ابالج واحفظي ... انتي ولا شي بالنسبه الي ، هيج عدم حالج حال اي نعال مشمور بالبيت ، انغصبت عليج واتزوجتج .. ومبقيج مو حباً بيج لا بس حتى لتنفضحين بين الناس .. الى ان يعدي كم شهر راح اطلكج فخلي هالفتتره تعدي على خير ولتلعبين بعمرج.

ايمان .. محجت شي من الرعبه اول مره تشوف هذا لوجه من اسيد .. بقت بس ترجف والوجع زرف خدها .. انرعبت والي سمعته صدمها داليا حامل!

اسيد .. بصوت غاضب من بين اسنانه .. فهمتي لو افهمج بطريقتي !!

ايمان .. هزت راسها بقوه يعني فهمت.

اسيد .. دفعتها وطلعت من يمها بس اني الشياطين كلها براسي من جهه امي الي مااعرف اشبيها ما بيها .. ومن جهه هذني الي وكعن براسي !
نزلت جوه لكيت امي مصحصحه ويمها ام عادل .. رحت يمها من شافتني دارت وجهها عني!
اني هم من شفتها زينه وما بيها شي عفتها وطلعت من البيت لان اختنكت من المشاكل والطلايب .. صعدت سيارتي وبقيت افتر وافكر بداليا وكل الي صار .. گلبي انعصر من اتذكرت اشلون عطت بيها كدام ايمان الظهر .. هي مو السبب بألي ديصير اني الي ظلمتها ودخلتها بهذي الدوامه .. لو من البدايه اول ما عرفت ماخذها وكايل لامي الحقيقه ما كان صار كل هذا .. اووووووووف ماادري شسويت بروحي مادري .. بس كل الي اريده هسه احظنها واعتذر ع كل شي .. بس مستحيل ما اكدر !
بقيت بره لحد الليل كلش رجعت .. لكيت البيت هدوء والكل نايمين .. رحت لغرفتي دخلت .. لكيتها فارشه ونايمه بالكاع!!!
محجيت شي دخلت سبحت ، بدلت ونمت ما اسمع الا صوت واحد ديبجي ... فزيت لكيتها وهي نايمه تحجي وتبجي!!!!
كمت من فراشي صحيتها ..
_داليا .. داليا ... كعدت مرعوبه من شافتني حظنتني حيييل !!!!

داليا .. اجتي ام عادل صاحتني كالت تريدج الحجيه .. اني خفت لا تعصب مره ثانيه وتتخربط لو يصير بيها شي واني اكون السبب .. بس لازم انزل مااكدر اكسر كلمتها وهي صاحتني !
كمت غسلت وجهي ورحت لغرفتها .. دكيت الباب كالتلي ادخلي .. دخلت لكيتها كاعده ع الكرسي مالتها وتباوعلي بس بحقد مااعرف بحزن نظراتها غريبه .. اني محجيت شي بقيت واكفه يم الباب ومدنكه لانو ما الي وجه اباوعلها بعد الي سويته .. صح اني انغصبت اتزوج ابنها بس مهما يكون هي ام ومن حقها تفرح بأبنها وتختار مرته بنفسها .. بس شسوي اذا حظي اعوج!

الحجيه .. بصوت حاد .. تعالي اكعدي هنا.

داليا .. مشيت كعدت ع السرير كدامها ..

الحجيه .. ارفعي راسج وباوعيلي اريد احجي وياج كلام واريدج تحجين الصراحه.

داليا .. ردت ارفع راسي واباوعليها بس ما الي وجه .. روحي متطاوعني ارفع راسي احس نفسي مسويه جريمه .. بقيت مدنكه والدموع اتجمعت بعيني من يوم يومي مكسوره هسه حتى ما الي وجه اباوع للناس.

الحجيه .. ارفعي راسج شنو متسمعين.

داليا .. بصوت مخنوك بالعبره .. ما اكدر .. الله يخليج احجي واني اسمعج.

الحجيه .. ليش متكدرين؟!!
بعد كل الي سويتي و زواجج من ابني بالسر هسه يلا استحيتي؟!!

داليا .. دموعي نزلت من كلامها .. حجيه اني اعرف غلطانه واعرف الاسف ميفيد واني لو عشت عمري كله مااوفي جميلج وفضلج عليه كعدتيني ببيتج وعاملتيني مثل بناتج .. بس والرب الي صار مو بأيدي ولما اسيد عرض عليه الموضوع وفضت رفض تام مو لان .... ما احبه ولا كرهاً بي بس انتي وكفتي كبال عيني الرب يشهد عليه .. مردت ارد جميلج عليه بهالطريقه بس ابنج وانتي تعرفي اذا راد شي محد يكدر يخلي يغير رأيه او يتراجع عنه .. واني كنت لا حول ولا قوه وماعندي احد اروحله .

الحجيه .. ليش ما اجيتي عليه واني اساعدج .. وامنعه .

داليا .. خفت .. خفت اجي واشوفها هنا .. وخفت من تعرفين الحقيقه انتي هم تكرهيني وتطرديني مثلها

الحجيه .. مثل منو؟!!

داليا .. حجيه فدوه اروحلج لتذكريها وكولي الي تردي مني شنوو واني مستعده اسوي الج بدون اي نقاش حتى اذا كلتيلي اعوف اسيد واروح ، راح اعوفه وما راح تشوفون وجهي ابد عهد عليه.

الحجيه .. مراح تتحركين خطوه منا الى ان تجي ايناس وينكشف كلشي.

داليا .. هنا اني رفعت راسي من كالت راح تجي .. الغضب والعذاب الي زرعته بيه اختها خلوني ارفع راسي .. لاااا الله يخليج لاااا ماريدها .. مااريد اشوفها فدوه لاااا الله يرضى عليج لااا لتخليها تجي واني اسوي الي تردي والرب .. والرب اسوي كل الي تردي هسه اروح واختفي من حياة ابنج نهائياً و داعت بنتي اختفي بس لتجيبيها ما اريد اشوفهاا .. لاااا لاااا.

الحجيه .. من شافت حالة داليا انصدمت .. كانت متهستره وتبجي بحرگه .. بس الي صدمها اكثر الي سمتعه ( وداعت بنتي )!!!!!!!!!
انتي حامل؟!!

داليا .. من سمعت الحجيه يلا وعت على روحها .. خلت ايدها على حلكها بصدمه من الي كالته .. بس الاوان فات .. الحجيه سمعتها .. اكيد راح تخلي اسيد ياخذها توكع الطفل لان هي مستحيل تقبل شي يربطني بأبنها .. نست رعب وخوف لقاء امها وسيطر عليها رعب وخوف اكبر واعظم .. خوف فقدان روحها الي بداخلها ... طفلها .. كامت من مكانها وهي ترجف كعدت بالكاع يم رجلين الحجيه لزمتها ومن بين دموعها وشهكاتها ..

_فدوه اروحلج اذا تعزين ولدج وبناتج لتحرميني من ابني  .. والله محد بقالي بهالدنيا غير هالطفل لتاخذي مني والرب اموت امووووت اخذي روحي وبقي طفلي اذا راح طفلي اموت والرب اموت.

الحجيه .. من شافت حالتها ودموعها گلبها انكسر عليها .. مدت ايدها عليها ولزمتها  انتي من كل عقلج تفكرين اني ممكن أأذي روح الله خلقها ... شتحجين انتي؟!!
ومنو ابن ابني .. حفيدي؟!!
كومي يمه كومي من الكاع ولتبجين صح اني كنت معترضه على زواجكم وكنت ناويه اخلي يطلكج بالبدايه بس بعد الي سمعته لااا مستحيل احرم طفل من امه وابو واخلي يجي للدنيا ويتعذب.

داليا .. يعني مراح تخليني اوكعه!!
راح يبقى الطفل ببطني ..!

الحجيه .. اي يبقى ومحد يكدر ياخذه منج غير الخلقه .

داليا .. دنكت على رجل الحجيه وباستها ودموعها تجري من الفرحه ممصدكه .. الله يخليج الله يخليلج بناتج و ولدج .. الله يطول عمرج .. الله يرضى عليج حجيه والله اعيش كل عمري خدامه عندج لانج رضيتي ابني يبقى الله يخليج الله يخليج .. وتبجيييييي !

الحجيه .. الدموع اتجمعت بعينها من شافت حرگة داليا على ابنها وفرحتها من كالتلها محد ياخذه منج .. حست هالبنيه اشكد مظلومه بحيث مستعده تتخلى عن روحها .. كومتها بسرعه مقبلت تبوس رجلها وسكتتها .. روحي غسلي وجهج كافي بجي وتعالي خلي انكمل كلامنا.

داليا .. الفرحه الي دااحسها تعادل فرحة واحد غركان ببحر صارله ايام ، فقد الامل من الحياة وبلحظه شمروله طوق النجاة ونقذو!!
مااكدر ما اكدر اوصف فرحتي من مالت الحجيه ابنج يبقى .. رحت غسلت وجهي ورجعت كعدت يمها ..

الحجيه .. اسمعيني داليا .. الي صار صار و اني اعرف ابني ولئامته واعرفه من يكول على شي يسوي لذلك راح اسكت عن الي سويتو وعن زواجكم لخاطر الطفل الي ما اله ذنب .. بس بشرط!

داليا .. الي تأمرين بي اسوي وبلا اي كلام لخاطر ابني الي عتقتي.

الحجيه .. استغفر الله يمه شنو عتقته لا تحجين هيج .. واني ما اريد منج شي صعب ولا مستحيل بس اريد منج اتثبتيلي انج ما تردين تنتقمين من عدنا وانج صدك تحبين ابني.

داليا .. بأستغراب .. انتقم منكم؟!!
شنو قصدج حجيه شنو انتقم ولويش انتقم على شنو الانتقام؟!

الحجيه .. يعني متردين تاخذين حقج بسبب الي سوته ايناس وتنتقمين من ابني لان هي اول و تالي اختي.

داليا ... حجيه شدتحجييييين انتقم من اسيد؟!!
ومنج انتي الي فتحتيلي بيتج و أويتيني ؟!!
لاااااا مستحيل معقوله انتي كل ظنج اني داانتقم ع الي سوته اختج بيه؟!!!
ماشي من حقج تفكرين هشكل بالنهايه هي اختج والي سوته بيه اني واختي مو قليل بس اني مااكدر اثبتلج شي لان ماكو هيج شي اصلا بس انتي شوفس شنو يثبتلج انتي صدقي وبرائتي من هذا الشي واني اسوي .

الحجيه .. اذا متردين تنتقمين اشلون عرفتي اسيد وشوصلج النا .. واشلون اجيتي البيتنا .. واشلون عرفتي ايناس اختي ؟!!

داليا .. كل الي صار صدفه وداعة الي ابطني و روح اختي مكنت اعرف شي عنكم ولا ادري امـ.. اختج عايشه اصلاً غير بعد ما شفتها بالصدفه واسيد كالي هاي خالتي!!
وقتها ردت اشرد بس هو الي منعني وحتى مصدكني وفكرني اكذب بس لما واجها وعرف كولشي منها وقتها صدكني.

الحجيه .. واني هم اريدج اتثبتيلي هذا الشي.

داليا .. اشون اثبتلج؟!

الحجيه .. اريدج اتواجهين ايناس وتحجين كلشي كدامي حتى اعرف الحقيقه.

داليا .. العبره خنكتني وحست روحي صارت بحنجرتي اتريد تطلع من ذكرت اسمها بس اذا هذا الشي يثبت برائتي من هذا الي تفكر بي الحجيه اني مستعده اواجهها.. كلتلها موافقه!

الحجيه .. زين وهسه اريدج تحجيلي كلشي من اول يوم وعيتي على امج الى هذي اللحظه!

داليا .. ماشي راح احجي كولشي ولما تجي اواجهه بكل هذا كدامج.. بقينا كاعدين وحجيتلها كلشي اني احجي والحجيه ادموعها تصب .. سبحان الله هي انكسر كلبها عليه واختها لا ... معقوله الحجيه اخت ايناس ؟!

مر وقت كولش هوااااي حجيت بي كل الي مر عليه .. الى ان اندكت الباب ودخلت اكبر عذاب بحياتي ... كالعاده متشيكه ولبسها كوله ماركات وكشخه .. دخلت سلمت على الحجيه واني كأني مموجوده اصلاً .. حتى مباوعتلي!

ايناس .. خير ام اسيد شصاير خليتيني اجي ركض ع بالي واحد اسم الله مات.

الحجيه .. لو ميت واحد اهون من الي عرفته !

ايناس .. شكوو يا ستار شصاير.

الحجيه .. صحيح داليا بنتج؟!!

ايناس .. يبووووو عليج وفاء  جبتيني من بيتي لهنا ركض حتى تسأليني هالسؤال السخيف هذا.

الحجيه .. سؤال سخيف؟!!
ولج هاي بنتج ضناج .. اشلون تنامين الليل وبنتج متعرفين عنها شي .. اشلون تغمض عينج وبنتج مهجوله وبالشوارع.

ايناس .. اني ما عندي جهال غير احمد وطيف والباقي كله كذب وماضي اسود دفنته وخلصت منه.

الحجيه .. عمت عينج على هيج صلافه ولج !
هسه صار ماضي اسود؟!
مو هذا الي عاندتي علموده ابويه وكل اهلج واخذتي؟!!
مو هو هذا الي ابويه مات من حركته بسبب سوايتج ؟!
رحتي اتزوجتي واحد لا من دينج ولا من ملتج وبدون علم اهلج وهسه اتكولين ماضي اسود؟!

ايناس .. اييي صحيح كل الي كلتي صحيح بس اني كنت مراهقه وهو ضحك عليه ، صار الي صار وخلص هسه شكوو دتفتحين دفاتر قديمه.

الحجيه .. دفاتر قديمه .. بنتج لحم بطنج دفاتر قديمه؟!
كل هاي السنين قنعتينا انو بناتج اخذهن ابوهن وسافر وتالي متالي تطلعين شامرتهن بالشارع ؟!!

ايناس .. شامرتهن ذابحتهن حاركتهن .. محد اله علاقه بيه .. واذا ممكن اتكولين شتردين مني لان رجلي ميدري بيه من اجيت لا تسوين مشكله اريد اروح.

الحجيه .. ما اريد منج شيي بس من هاي اللحظه بعد لتكولين عندي اخت ولا تشوفيني وجهج ابد والا والله العلي العظيم اروح لرجلج واحجيله كلشي وانتي تعرفي ميحتاج اكلج شنو يسوي اذا درى بماضيج الاسود مثل متكولين.

ايناس .. وجهها صار اصفر والرعب انرسم على ملامحها .. من سمعت كلام الحجيه .. لا تكولين ولا تحجين شي اني رايحه بس بسيطه وفاء اتبيعين اختج علمود وحده لفيتيها من الشارع.

الحجيه .. تسواج هاي الي لفيتها ع الاقل ما تشمر ضناها مثلج يا رخيصه .. اطلعي من بيتي وديري بالج اشوف وجهج فد يوم لان ابد ما راح يصير زين.

كامت ايناس والنار تتطاير منها غضب وسم .. اخذت جنطتها وطلعت ..

داليا ..كنت اسمع كلامها الي مثل السهام تخترق گلبي وساكته محجيت شي بس دموعي حجت .. معقوله اكو ام بهالقساوه يا ناس؟!!!
الله يكول الجنة تحت اقدام الامهات معقوله الجنه تحت قدم هيج ام!!!
بجيت بجيت بجيت بس بهدوء وبلا اي صوووت .. مردتها تسمع شهكاتي وتشمت بيه .. الى ان شفتها طلعت من الغرفه ذبيت روحي ع الكاع وكمت اشهك وابجي ماادري شنو من شعور اعتراني بوقتها بس حسيت نفسي لازم اطلع الحرگه الي بصدري والا راح اموووت!!!
شافتني الحجيه خطيه اجتي حظنتني وظلت تبجي وياي .. بعدين كومتني كالت مو زين على طفلج انتي حامل لتبجين ميصلح عليج!
كمت من يمها رحت الغرفتي .. اشويه وجابتلي ام عادل العشا كلتلها ما اشتهي !!
بس لحت عليه كالتلي الحجيه اتكول اذا ما تاكل ازعل عليها .. مو الج للطفل خطيه شنو ذنبه !
كوه غصبت نفسي واكلتلي كم لكمه .. بعدها خليت راسي ع المخده ونمت .. ما حسيت على نفسي غير واخد ديصحني .. فزيت لكيت اسيد كاعد يمي!!
من شفته حظنته بقوه .. مااعرف شنوو السبب بس حسيت روحي محتاجه احظنه !!
هو هم من شافني حظنته استغرب !!

اسيد .. اذا تردين اتحظنيني شكو نايمه بالكاع؟!!

داليا .. واااااا فشلتاااااااه !!
بعدت عنه بسرعه .. شعندك هنا؟!!

اسيد .. شنو؟!!
غرفتي هاي لو غلطان؟؟

داليا .. اقصد شعندك كاعد يم راسي؟!

اسيد .. هاااا .. مكاعد يم راسج بس حظرتج كنتي تصيحين وحركتي الجو .. كلت اكعدج لا يموت واحد الظاهر كنتي تتعاركين دتكميلن عركه الظهر.

داليا .. اولاً مكنت اتعارك .. شفت كابوس مزعج لانو انت بي .. وثانياً الظهر اني متعاركت زوجتك الحبابه هي الي غلطت عليه وسبتني واني سكتت لخاطر الحجيه لانها مريضه وكلت هسه زوجي ياخذ حقي بس مقصرت حضرتك.

اسيد .. عافها وكام لفراشه .. مقصرت لتخافين .. وكومي نامي بفراشج.

داليا .. نايمه بفراشي شكرا.

اسيد .. ك و م ي .. لا اجي اكومج بطريقتي الي تعرفيها.

داليا .. لاااا كولشي ولا طرقك .. كمت من الكاع نمت يمه ع السرير وانطيته ظهري!

اسيد .. ديري وجهج عليه.

داليا .. مرتاحه هشكل شكراً.

اسيد .. استغفرك ربي .. ليش تخليني اعيد الكلام مرتين اني شكايلج؟!!

داليا .. نبرة صوته معصبه .. درت وجهي عليه بسرعه .

اسيد .. اشلونه فهود .

داليا .. يا فهود هذا؟!!

اسيد .. ابني فهد !

داليا .. ههههههههههههههاي .. اشبيك حبيبي مصخن ومديت ايدي خليتها ع وجهه؟!
انت اسمك اسيد وابنك فهد ؟!
شنو عائله مفترسه !!

اسيد .. لزمت ايدها ثبتتها ع وجهي .. شكلتي؟!!

داليا .. دااكول مصخن؟!!

اسيد .. قبلها ؟!!

داليا .. اهاااا .. يقصد ع حبيبي!!
هههههه شكلها عجبته الكلمه !!
بس مراح اكولها الا اشلع گلبه ع الي سوا بيه اليوم كدام الحيوانه ايمانوو!
سحبت ايدي منه حيل وتغطيت .. مكلت شيييي .. تصبح على خير ابو بنتييييييييي ماكو فهودي.

اسيد .. كالت حبيبي!!!!
اول مره اسمع هاي الكلمه منها وخرب يومهاااا اشكد حلو اتكولها احس شعرات ايدي وكفت من سمعتها !!
بس معادتها بنت اللذين .. ماشي اني اعلمج الصبح اعرف اشلون اخليج اتكوليها ....!
اتغطيت ونمت ... مااحس غير الموبايل يرن !!!!!!

كعدت شفت الساعه ب3 بالليل ... يا ستار منو هذا الي ديتصل ...

داليا .. سمعت صوت الموبايل وكعدت .. شكوو اسيد منو ديتصل بيك؟!!

اسيد .. باوعت ع الموبايل ابو احمد زوج ايناس يتصل!!!

_الوو .. شنوووو ...بيا مستشفى ... ماشي ماشي .. اني رايح؟!!

داليا .. شكووو اسيد منو الي بالمستشفى!!

اسيد .. ايناس مسويه حادث وهسه بالمستشفى حالتها خطره!

للحكايه بقيه ❤️
اعرف تأخرت عليكم واسفه بس والنبي البارت طويييييل تعبني
رأيكم بالاحداث وتوقعاتكم للبارت القادم 😍
لتنسووووووووون التصويييييييييييت 😘