رواية في ارض الغرام انت دولتي الفصل الرابع 4 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

أسيد .. بسرعه ضغطت ع المسدس وضربت نفسها طلقه!!
بقت صافنه بوجهي نظراتها غريبه ، بعدها وكعت بين اديه فاقده الوعي !!
رفعت حاجبي بأستغراب باوعت عليها ، الظاهر هذي مو بس وكحه .. لا وجريئه هم!!
متأثرت ولا اهتميت بيها ..!
اولاً لان متعود على منظر الدم والموت بحياتي ، يعني مو شي جديد!
وثانياً لان اصلا ميرف گلبي على هيج نماذج وجنس حواء بالتحديد!

يعني اذا ماتت او عاشت متفرق عندي .. عفتها بالكاع تنزف وكمت حتى اصيح واحد من الجنود يشيلها ياخذها للدكتور الخفر يعالجها ، بهذ الاثناء اندكت الباب قوي وسمعت صوت الجنود الحرس يصيحون .. ويدكون بالباب يردون يكسروا....!
الظاهر سمعو صوت الطلقه!
فتحت الباب وطلعت .. خبصوني .. خير سيدي شنو هذا الطلق؟!
شنو هجوم ، سمعنا صوت طلقه من غرفتك ..... من هذي الاسئله دوخوني!!

أسيد .. ماكو شي داانظف بالمسدس وثارت طلقه.

الجنود .. هااا .. بالريش سيدي ، ع بالنا صار هجوم .. !

اسيد .. يلا كل واحد يروح لواجبه ماكو شي.

راحو الجنود واني رجعت للغرفه ، بقيت الوم بنفسي ليش كذبت؟!!
ليش مكلتلهم الحقيقه؟!
من شنو خايف ؟!
الكل تعرفني وتعرف اخلاقي شنوو لعد ليش مكلتلهم الي صار؟!
داافكر وفكري مشغول بألي صار .. جان اسمع صوتها تون!!!
خرب نسيتها تماماً .. باوعت ع الكاع مليانه دم !
لازم انقلها بسرعه والا راح تموت .. واذا ماتت محد يصدك الي صار ، وانو هي الي اجت لغرفتي واني مااعرفها..!!
خصوصاً واني كذبت مكلتلهم الحقيقه ... راح يكولون دكتور اسيد يجيب نسوان للمعسكر وتصير فضيحه ، ولو شنو احجي ميصدكون لان الدليل الوحيد مات...!
بلحظه وحده الشي الي كان ما اله قيمه قبل دقايق وميهمني موته ... صار اهم شي بحياتي.
عقلي كله افتر من الكلام الي اجه براسي ... طردت الافكار مني وبسرعه شلتها من الكاع وطلعت بيها ل كتور الخفر .... غرفتي قريبه على الطبابه حيل يعني محد شافني وبسرعه وصلت .. دخلت لكيت الدكتور الخفر كاعد ديخابر ورايح لغير عالم!
من شافني فز من مكانه ونظرة الاستغراب والثول على وجهه تقرا مليون!!

دكتور علي .. ها.. هـ .. اي منـ .. مـ..نـووو !!

أسيد .. مو وقت اسألتك هسه حظر جهاز الانعاش بسرعه لان فقدت دم هواي واحتمال اتموت.

علي .. اييي .. اي .. خليها ع السديه اني راح اجيب الجهاز .. !

راح علي واني خليتها ع السديه وباوعت عليه .. وجها اصفر مثل الليمونه .. خليت ايدي على ايدها ردت اتحسس نبضها ... ماكوو النبض ضعيف حيل !!!!
لا يا ربي راح تموت ، انتهى امرك اسيد .. كمت اصيح على علي بدون وعي..

أسيد .. لك علي راح اتموت بسررررررعه ... يمعود بسرعه النبض ضعيف.

علي .. اجه يركض بسرعه .. اجيتي اجيت .. ابتعد عنها خلي اسوي الانعاش ..
بقى دكتور علي يصعقها بالجهاز .. مره .. مرتين .. 3 مره .... بدا گلبها ينبض!
وخر الجهاز وشكللها الدم .. كال لـ أسيد .. بسرعه خليلها المغذي حتى نبدي انعالج الاصابه.

أسيد .. من رجع گلبها نبض ارتاحيت .. حسيت الهوا بدا يدخل الصدري .. قبل ثواني كان مستقبلي ومهنتي راح ينتهون لو ميته هاي المصيبه!
بس من استقر نبضها اطمئنيت !
بصوت جامد كلت لدكتور ..

_علي انت تعرف شنو شعوري تجاه هيج حالات ، فـأنت الي راح تعالجها ودير بالك تموت لان مستقبلي متوقف عليها.

علي .. انت شدتحجي شنو شعورك شنو اعالجها؟!
تريد تورطني بيها؟!
انت الي جبتها وانت الي تعالجها ، واذا هالكد كارها وميهمك امرها شكووو جبتها اصلاً وليش دخلتها للمعسكر؟!
تدري اذا الآمر (الضابط المسؤول) عرف شنو يصير بينا؟!
لك بابا سمعتنا تروح بالرجلين ، منو هاي وشتسوي هنا ، وين لكيتها وجبتها بس فهمني ، وشنو علاقتك بيها؟!!

أسيد .. بصوت عالي وعصبي ، لك اجاوبك ع كل أسئلتك بس مووو هسه ، راح تموت لازم اتعالجها لان اذا ماتت ينتهي امري هي الي لازم تحجي وتفهمم الي صار.

علي .. شال المقص و وجهه لـ اسيد .. وبصوت جامد كاله ..

_اذا خايف على مستقبلك وسمعتك هالكد .. اتفضل انقذهم لان اني ما راح الزمها اصلاً.
تركه وطلع........!

أسيد .. بقى يصيح ورا علي .. علي .. بس علي اتجاهله تماماً
طبعاً علي صديق أسيد المقرب بهذا المعسكر من انتقل لليوم هم اصدقاء كعدتهم سوه و كلامهم واحد ، يعني واحد يحترم الثاني ويعزه ، فلما امتنع يساعده مو لان خايف على نفسه !!
لا بس لان تصرف أسيد كان اناني جداً .. البنيه كانت دتموت وهو ميفكر غير بسمعته!
وهذا الشي يتعارض تماماً ويا شرف مهنتهم (الطب) وقَسَمَ (يمين) التخرج الي قسموا..والي يفرض عليه يأدي عمله بكل أمانه وصدق ويبذل اقصى ما عنده في سبيل انقاذ الروح الي تحت ايده!
لذلك كان لازم يخلي يتحمل نتيجة افعاله ويترك الانانيه الي بيها فأضطر انو يخلي امام الامر الواقع غصباً عنه.

بقى أسيد صافن على جثة داليا الي امدده كدامه ونبضها الضعيييف ميعرف شنو يسوي.. يعوفها يموت ويضحي بمهنته ومستقبله؟!!
لو يعالجها رغم كل الكره الي يحس بي تجاها لان هي سبب كل الي بي هسه من قلق وتوتر وخوف على مستقبله!!
جر نفس كووووولش طويل .. وبأيد ترجف اخذ المقص .. وقص القميص الي لابسته.....!
كل الي فكر بي وهو يعالجها مهنته وسمعته ... مستقبله الي ممكن يضيع بغمضة عين.
اولاً بتهمة القتل .. وثانياً بالفساد.

أسيد .. بديت اطلع الرصاصه من كتفها .. رفعت راسي دااخذ المقص .. وجان انتبه على عينها ... دموع تنزل منها!!
اول مره يصير وياي هيج موقف .. حاولت ما أتأثر بس غصب عني الموقف غريب!
المهم ..
شكيت قميصها و حمالة صدرها لان الاصابه بكتفها ، ما احجيلكم المنظر رغم الوضع الي اني بي وحالتها الحرجه بس شكلها كان مغري لدرجه متنوصف.
غضيت نظري عنها وبديت اطلع الرصاصه مااعرف شصارلي اديه ترجف والعرك يصب مني مثل الي أول مره يسوي هذا الشي !!
فجأه اتذكرت اول مريض عالجته كنت بنفس هاي الحاله ، مرتبك واديه ترجف .. عقمت الجرح وخيطتها ، هي كانت بغير عالم بس عيونها تجري دموع موكفت ابد ، حاله غريبه!
كملت ضمدتها وطلعت ..
لكيت علي كاعد ع رحله من رحلات  المدرسه ويدخن ..!
اني هم محجيت اي كلمه مشيت كعدت بصفه ، طلع جكاره ورثها (شعلها) وانطانياها بدون كلام .. اخذتها منه وبقينا اندخن والهدوء سيد الموقف الى ان حجه هو ...

علي .. اشلونه وضعها؟!

أسيد .. مستقر .

علي .. اعرف حالتك متساعد بس .. منو هاي؟!

أسيد .. ما اعرفها.

علي .. لعد وين لكيتها ؟!!

أسيد .. ملكيتها هي لكتني.

علي .. شنو هي حزوره ؟!

أسيد .. بعد ما طلعت من عندك رحت نمت فجأه انفتح باب الكرفان كعدت لكيتها كدامي .. وحجاله كل الي صار....!

علي .. الله اكبر عليك يمكن صدك جايه تشوف اخوها ، ليش عاملتها مثل الـ ... ، شوف وين وصلتها جان ماتت المخلوقه بسبب الي سويته.

أسيد .. تتوقع اكو وحده بنت ناس ومربايه تدخل مكان عسكري ما بي بس زلم ونص الليل؟!!

علي .. هااا ... والله ماادري شنو اكلك ...!

أسيد .. لتكول شي بس سد حلكك.

علي .. هههه بس تعرف هذي المسكينه اشكد منحوسه من بين كل الغرف وكل الناس الي موجودين هنا حظها وداها عليك اكثر واحد يكره النسوان ، ع بالي بس اني ما عندي حظ هاي حطمت المقااييس.

أسيد .. بنبرة ساخره .. ليش متكول اني الي منحوس ، من بين كل الي موجودين حظي ورطني بيها.

علي .. زين معرفت منو هذا اخوها الي اجت عليه؟!!

أسيد .. البارحا جابو مصاب مدني كالو منفجره عليه عبوه ناسفه ، واني الي اشرفت على حالته ، كانت اصابته جداً قويه والمغرب اتوفى .. اعتقد هو هذا لان ماكوو مدنيين بالمستشفى غيره.

علي .. انا لله وانا اليه راجعون ، مات وانت ردت تموت اخته.

أسيد .. انت الحجي وياك ميفيد خلي اروح للآمر احجيله الي صار قبل ليطلع الصبح وتصير قضيه .

كام أسيد وراح للآمر طلب الاذن ودخله .. حجاله كل الي صار ليش دخلت للمعسكر واشلون وصلت الغرفته  بس كاله انو هو الي ضربها طلقه لانو ع باله ارهابي والدنيا ظلمه مشافها.
فتحو تحقيق بالموضوع والآمر مالته شاف البنيه وتفقدها .. كاللهم اذا صحت وحالتها تحسنت متطلع لازم تنحبس الى ان يتأكدون من هويتها ، وصحة اقوالها!!
طبعاً الهبر انتشر بالمعسكر والكل كام يحجي بالموضوع .. تعرفون كلام الناس ..!
الي كال عنده علاقه بيها ، والي كال يجيب (ساقطات) للمعسكر!
والي كال رادت اتفضحه وقتلها..!
كل اثنين يحجون سوه .. وفوك هذا كوله الضابط المسؤول قرر ايقافه عن العمل الى حين انتهاء التحقيق وحل القضيه!!!
حاول يقنع الآمر ويفهمه انو كل الي دينكال عنه مو صحيح .... بس الآمر كان صارم ويا .. وجبره ياخذ اجازه الى ان يخلص الموضوع .. هذا الشي حيل أثر على أسيد لدرجه فقد اعصابه صار بركان من الغضب ، كل الي فكر بي لو عايفها تموت وخلصان منها .. كان ما صار كل هذا بي ، اذا هو كاره النسوان قبل هسه كرهن لحد الموت ، كل مصايبه بسببهن!
اخذ ملابسه ونزل لبيتهم ... محد عرف عنه شي بعد.

بقت داليا بالمستشفى يومين فاقده الوعي لان حالتها كانت تعبانه بسبب الدم الي فقدته !

بالميتم الكل كان مخبوص عليها ويدورون ما خلو مكان ما راحوله ، سلمى من خوفها وغبائها محجت شي ولا كالتلهم انو داليا راحت تشوف داني ، لان اذا كالت مراح تسلم من الكل !
هسه يكولولها ليش مكلتي من راحت ، ليش مبلغتي عنها؟!
واذا صار بيها شي محد راح يرحمها ...!
فـ  فكرت انه اكيد لزموها الحرس وهي كالتلهم كولشي فراح يجون للميتم حتى يتأكدون داليا من وين!
بقت ساكته ..

ثالث يوم قررت تروح بنفسها للمعسكر وتسأل عنها .... الصبح من طلعت الكليتها .. راحت بوجها للمستشفى العسكري..!

بعدها هسه وصلت للباب مالت المعسكر ..... وجان تسمع صوت انفجاااار كووووولش قوي!!!
لدرجه شمرها من مكانها مسااافه جداً بعيده !
وكعت بالكاع الدخان ترس الجو وكولشي متشوف .. مسمعت شي لان الانفجار كولش قوي بحيث حست اذانها انزرفت .. بكل ما عدها من قوه فتحت عيونها ..... !
وجان تشوف الميتم والكنيسه صايرات رماد!!!!!!!!!!!!

للحكايه بقيه🤗
طبعاً البارت ردت انزله البارحا بس التصويت ع البارتات قلييييل كولش ميسوي واهس اكمل بصراحا 😪 واني اريد القصه تصعد حتى اكملها بسرعه
رأيكم بالاحداث الي صارت وتوقعاتكم للبارت القادم 😘❤️