رواية في ارض الغرام انت دولتي الفصل الخامس عشر 15 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لأي شخص ياخذ كتاباتي وينشرهم(ذمه)

داليا .. سمعت صوت الطلقه ومن البيت ..  كلبي وكف من الخوف .. وكفت وجمدت بمكاني ماادري شسوي ، شنو هذا الصوت ، وين اروح .. ادخل للبيت اخاف ، ابقى بمكاني اشووون ماادري شنو صاير جوه؟!!
زين الحرس الي بالباب لويش ما اجوي معقوله مسمعو الصوت .. معقوله اني دااتوهم وهذا مو صوت طلقه؟!!
دقايق مرت عليه واني محتاره مااعرف اشون اتصرف .. بقيت افكر وحالي كوله انكلب .. رجليه احسهم يطكطكون من الخوف مدري من البرد .. يا ربي دخيلك .. بعدين قررت اطلع للحرس ماكو غيرهم يجون يشوفون شنو الي صار بالبيت .. ركضت بسرعه صحتهم .. 
من كلتلهم سمعت صوت طلق استغربو ودخلو بسرعه للبيت .. اني دخلت وراهم بس خطواتي بطيئه  ومتثاقله من الخوف والرعبه .. دخلت للبيت شفتهم يدورون ماكو شي البيت هدوء .. واحد منهم صعد للطابق  الثاني  دور كولشي ماكو .. حتى اسيد مموجود!!
مشيت اني بسرعه لغرفة المكتب ماتله طبعاً هي بالطابق الارضي ومعزوله تقريباً عن البيت اكو حديقه خلفيه كبيره وحلوه  تجنن بنهاية البيت .. وهو مسوي المكتب مالته بيها ..

المهم
فتحت الباب مالت الحديقه بسرعه وطلعت للمكتب مالته الجو كان بارد ثلج والدنيا كانت شبه دتمطر يعني رذاذ خفيف  .. دكيت الباب عليه .. ماكو رد!!
رجعت دكيت الباب بقوه .. وصحت من ورا الباب .. دكتور اسيد .. دكتور .. !!
هم ماكو اي رد منه!!
زين هو مطلع من البيت واني كنت بالحديقه النهار كوله مستحيل يطلع وما اشوفه .. والبيت دورنا  كوله مموجود بي وين راح .. وهذا صوت الطلقه الي سمعته متأكده كولش زين من البيت طلع ... اكيد هذا سوه بروحه شي ... اول ما خطرت الفكره ابالي .. فتحت الباب بسرعه ودخلت .. الغرفه كانت شبه ظلمه وبس الضوه مالت التيبلام مشعول !!
كولشي مدااشوف .. مشيت كم خطوه عثرت بشي بالكاع مااعرف شنو وما اكدر اميزه من الظلام ..!
طبعاً غرفة المكتب مالته مداخلتها اني ابد .. لان هو مانع اي شخص يدخللها بدون علمه .. وكوني ماعندي شغل بيها فما ادخللها نهائياً .. لذلك ما اندل وين مكان الضوه حتى افتحه واشوف شي بهذا الظلام .. داامشي وادور ع الضوه .. وجان ينفتح الضوه ... !!

باوعت جان اشوفه كاعد ع الكرسي ورا المكتب و.. ويدخن جكاره بكل هدوء .. ملامحه بارده ، عيونه خاليه من اي مشاعر بس بحر من الظلام .. بقيت اني جامده بمكاني خفت من ردة فعله لان دخلت المكتب مالته .. ردت احجي اسأله عن الصوت الي سمعته .. بس دخول الحارس وسؤاله سبقني ..

الحارس .. دكتور اسيد انت هنا .. صار ساعه اندور عليك كلبنا البيت وانت ماكو.

اسيد .. بنبره هادئه وجامده .. ليش شكو؟!!

الحارس .. لا ماكو شي بس الانسه داليا كالت انو سامعه صوت طلق وخفنا لا احد دخل للبيت يعني حرامي او شي ، فأجينا حتى نتأكد اذا صاير شي.

اسيد .. بنفس النبره .. ماكو هيج شي انستكم متوهمه .. تكدرون ترحون .

الحارس .. الحمدلله .. يلا من رخصتك دكتور .

طلع الحارس وبقيت اني بمكاني مااكدر اتحرك من الرعبه الي عشتها ..درت وجهي دااريد اطلع وجان صوته المخيف يفززني ...

اسيد .. بصوت جامد .. الحجيه اجت؟!

داليا .. لـ ..لا.

اسيد .. من احجي باوعي بوجهي وجاوبي؟!

داليا .. اني عظامي ترجف من الخوف والرعب الي عشته وهذا يتمعلس عليه .. من صدوك حسيت نفسي حنفجر بي بعد مااتحمل بالموت واكفه على رجليه واعصابي تلفانه .. درت وجهي بسرعه ردت اطلع كل الرعب والخوف الي عشته  بي .. بس الي شفته جمدني بمكاني ...'

جان واكف يم الشباك يدخن بكل برود وعدم اهتمام .. وايده تنزف دم!!!!!
من شفت الدم مااعرف شصارلي كلبي وجعني .. اتذكرت الموت.. اي الدم بالنسبه الي عباره عن موت .. وكل الي احبهم اخذهم الموت .. ماادري شصارلي كمت ارجف .. بسرعه وبدون وعي مني ركضت عليه لزمت ايده .. كان بيها جرح كولش كبير وينزف بقوه!!
هو من شافني اشون مرعوبه واشون لزمت ايده نظراته اتغيرت مثل الي اتفاجأ بتصرفي .. بصوت مرعوب وقلق كلتله ...

_ايدك دتنزف .. دم .. ايدك .. !

اسيد .. بعد الكلام الي كالته العار ساره فقدت اعصابي .. كل هاي السنين دست على جروح گلبي وحاولت بكل الطرق انسى الي صار .. احذفه من حياتي نهائياً .. اتحملت عذاب نفسي محد يتحمله بحيث دمرت عمري وشخصيتي .. ضيعت سنين من شبابي في سبيل اخلق شخص قاسي ميهمه اي شي ولا يتأثر بأحد .. كل الي صار تركته ورايه وما حجيت بي ابد .. حتى بيني وبين نفسي مااذكره ، وكل شخص يحجي بالماضي  او يحاول بكلمه يذكرني بألي صار انهي من حياتي تماماً لدرجة خسرت هواي اشخاص احبهم واعزهم لهذا السبب .. ابتعدت عن الناس كلهم وعزلت نفسي .. دفنت روحي بالعسكريه وبنص الموت في سبيل ما التقي بأحد وما احجي بهذا الموضوع ولا اذكره  ..
وبلحظه وحده اجتي هاي الحقيره دمرت كلشي .. بلحظتها ردت اقتلها خلاص وميهمني  اكبر واحد يطلع وراها .. بس جهالها ونظراتهم الي والدموع الي بعيونهم هي الي وكفتني!
بعد ما اخذتها امي وراحت .. دخلت لمكتبي واحس شي بداخلي يغلي .. شي بداخلي يريد ينفجر .. صح مو من طبعي اعصب بسرعه بس هذي المره كلشي اختلف ردت احرك الكون كله من كد الغضب الي سيطر عليه .. النار الي دتستعر بگلبي .. غصب عني لكيت روحي دااسترجع كل الذكريات .. كل الماضي بدا يدور براسي مثل الشريط .. اتذكرت كل الي صار .. واتمنيت الله ياخذ روحي بهاي اللحظه ويخلصني .. الله يلعنج ساره ع الي سويتي اووووف لو ما جهالج محد يخلصج مني غير عزرائيل  ..
لحظه بعد لحظه بدت الذكريات تهاجمني .. كلما تمر ابالي صوره من الماضي اتدمر اكثر .. گلبي ديحترك !
اباوع لاديه  بدت ترجف بقوه .. جسمي احسه برد .. الدنيا اظلمت بعيني ، بقيت هادئ بس داخلي يغلي مثل البركان الي يريد ينفجر .. لازم اطردها من بالي لازم .. لازم ابعد الافكار هذي عني .. !
بس مرات نوصل لدرجه ما منها رجوع .. مهما حاولنا نتناسى الحقيقه لازم يجي يوم وانواجها!
بلحظه قررت انهي كلشي .. هذا الافكار لازم اقتلها .. لازم اتخلص منها .. سحبت المسدس وقررت انهينها بأيدي اذا عقلي ميكدرعليها!!

خليت المسدس على راسي واتخذت القرار .. بس شي واحد الي وكفني ... ابويه!!!
ابويه الي تعب عليه وصلني للي اني عليه اليوم يستاهل هيج اخذله!!
امي الي ضيعت شبابها في سبيل تكمل الي بدا ابويه ، كبرتني و سوتني رجال عليه الاعتماد .. تستاهل هيج اكسر گلبها وافجعها بيه؟!
اني مو جبان حتى انهي حياتي بهذي الطريقه السخيفه .. مو اسيد الي ينهي حياته بسبب شي انتهى ..!
الي صار غلطه وجل من لا يغلط .. الحل الوحيد هو اواجه اغلاطي واتعداها .. بس اول شي اسوي لازم اوقف الافكار الي دتنخر عقلي وتحرك روحي .. لازم اشغل عقلي بألم اقوى حتى ينسى كل شي ثاني .. ما اخذت وقت هواي حتى انفذ الي اجه ابالي ..!
سحبت المسدس بسرعه وضربت ايدي طلقه !!!
صح الوجع كان قوي بس مو اقوى من وجع گلبي .. بقيت صافن على ايدي اشلون تنزف وكل ذره بجسمي ترجف ترجف .. ألم فضيييع بس اكدر اتحمله .. مااعرف اشكد مر من الوقت واني على هذا الحال صافن على الجرح الي بأيدي ... مااحس بأي شي يحيطني عقلي كان بغير مكان .. ديحارب الوجع الي بأيدي .. نجحت الخطه بدت الافكار السوده تتركني ! !

ما حسيت غير شخص فتح الباب ودخل !!

بدون مااشوفه منو عرفته .. لانو هاي الانفاس السريعه حفضتها .. والخطوات الغبيه مستحيل ما اميزها .. اول خطوتين الها عثرت بالطاوله الي كدامها .. !
يلا عادي متعرف ترتيب الغرفه ولا داخله للمكتب .. بقت تدور على شي بالغرفه .. اكيد تريد تفتح الضوه .. بقيت صافن عليها الضوه خافت حيل مااشوف بس خيالها يتحرك .. رغم الوجع الي بگلبي وألم ايدي .. بقيت هادئ محجيت شي بس اراقبها ..!
بعدين فتحت الضوه من يمي ملامحها كانت مرعوبه وقلقه بشكل ... اجه الحرس وكلتلهم ماكوو شي راحو .. هي هم رادت تطلع  .. بس اني ردت أتأكد اذا عدها فضول عن الكلام الي كالته الحقيره هذيج .. اكيد راح تحجي لان لسانها متبري منها .. سألتها عن امي جاوبتني وهي دايره وجها .. بعدين حاولت استفزها اكثر حتى تحجي لان هي من تعصب تنفجر اعرفها مثل ما صار وقت وكعت منها المنشفه انفجرت بوجهي !
وفعلاً مثل ما اتوقعت التفتت و الغضب واضح على ملامح و وجها .. بس من شافت ايدي دتنزف حسيت وجها ارتخى ونظرة خوف على وجها  .. اكيد بسبب الدم!
من ركضت ولزمت ايدي استغربت من تصرفها وجرئتها .. كلما اعرف عنها شي تصدمني اكثر .. كنت اعرف بيها متخاف وتتجرأ ع اشياء مو كدها مرات .. بس متوقعتها ابد تلزمني !!
كالتلي ايدك تنزف والرعب على ملامحها يقرا الف ...سحبت ايد منها بقوه وبصوت جامد كلتلها ..

_امشي اطلعي بره.

داليا .. وين اطلع شدتحجي انت شوف ايدك شصاير بيها!!

اسيد .. كلتلج اطلعي بره مااريد اشوف احد.

داليا .. بصوت حاد .. مو بكيفك اطلع واذا جبرتني راح اتصل بالحجيه واخليها تجي بنفسها .. عاد انت تخيل المسكينه شراح يصير بيها من تسمع بهذا الخبر نص الليل.

اسيد .. الالم الي بأيدي صار قوي .. وبديت احس بدوخه براسي وهاي واكفه تتعاند وياي .. بصوت غاضب صحت بيها ..

_لج شنوو تهدديني انتي؟!

داليا .. بلي دااهددك ، وكافي اروح اصيح الحرس يجون ياخذوك للمستشفى يشوفون شمسوي بروحك.

اسيد .. خفت لا تروح تصيحلهم صدك هاي الخبله .. وهذولي يخابرون امي گبل ، وترتعب امي بهاليل حاولت اسيطر على الالم الي بأيدي بس مدااكدر اتحمل بعد ..
_ امشي جيبي علبة الاسعافات بسرعه ، وديري بالج تصيحين الحرس متلومين الا نفسج.

داليا .. اشون مااصيحهم دشوف وجهك صار ليمونه .. يمكن حتموت!!

اسيد .. بصوت عالي وغاضب .. لج امشي جيبي العلبه لتلغييييين خلصيني.

داليا .. يا ربي شكله ياخذ الروح يخوف وفوكاها كام يصيح .. رجليه رجعت ترجف .. بدون اي كلام رحت جبت العلبه ركض سويت الطريق خطوتين .. اتذكرت نفسي من ركض وراي الچلب .. نفس هاي الركضه ركضت .. بس قبل كنت خايفه من الچلب وخايفه .. هسه لويش دااركض هشكل من شنو خايفه؟ 
رحت جبت العلبه وانطيتهيا .. طلع معقم ومااعرف شنو بدى يمسح بالجرح ومدري شيسوي..

اسيد .. تعالي ساعديني.

داليا .. اني؟!!!!!!

اسيد .. لا امي!

داليا .. بصوت ناصي والك خلك تتشاقى هو انت بالايام العاديه مشايفتك مبتسم هسه تتشاقى .. مخبل مو صاحي !

اسيد .. شدتلغين انتي؟!!

داليا .. ها .. هـ..اا .. دااكول اشون اساعدك اني كولشي مااعرف بهذي الاشياء!

اسيد .. سوي الي اكوله الج وبس.

داليا .. ماشي.

اسيد .. كالتلي ماشي وبقت واكفه بمكانها .. هاي لو غبيه لو غبيه وحده من اثنين.
بصوت جاد .. متتحركين تجين لهنا .. اشون تساعديني وانتي واكفه هناك؟!!

داليا .. هـ..اا .. ايي .. اي جايه .. اوووف على غبائي!

اسيد .. لما ضربت نفسي كنت ارجف واعصابي منهاره ، فـ أيدي مكانت ثابته والضربه اجتي صفح يعني مخترقت ايدي بس جرحتني جرح كولش قوي بحيث قطعه من ايدي انشالت ..  مسحت الدم وخايتله ماده توقف النزف ، عقمتها .. كلتلها خيطي انتي  لان اديه الثانيه مااسيطر اخيط بيها الجرح!
انطيتها الابره .. اشو هاي صفنت بوجهي!!

داليا .. شنـ.. شنـو..وو.. شنو .. اخيط .. شقصدك؟!

اسيد .. مو انتي الي تردين اعالج ايدي؟!!
اتفضلي ساعديني اني مااكدر اخيطها بهاي ايدي مااسيطر عليها ، دتشوفين جسمي اشون يرجف ، ومدااركز دايخ!

داليا .. بس ..!

اسيد .. ماشي اخذي العلبه واطلعي عني .. وديري بالج تكولين الاحد اذا عرفت امي بالموضوع وروح ابويه انهيج.

داليا .. وايدك؟!!

اسيد .. طبها مرض معليج انتي.

داليا .. زين لويش متروح للمستشفى الله يخليك !

اسيد .. عاط بيها .. امشييييييي ولي من خلقتي

داليا .. ماشي .. ماشي .. حخيطها !
اخذت الخيط منه بس احس كل ذره بجسمي ترجف .. الجرح كبير وشكله يخوف .. صفنت بعيونه ما بيهم غير الظلام وشي غريب مفهمته .. مشايفته من قبل ابد .. معقوله هذي نظرة الالم من الجرح الي بأيده؟!!
معقوله لان ديتوجع هيج عيونه مليانه ألم؟!!
شي بكلبي وجعني من شفت نظراته الي كولها ألم .. اخذت الخيط وبديت اخيط الجرح بس ادموعي مااعرف لويش نزلو!!
كنت مدنكه ودموعي وكعو على ايده!!
ماادري لويش بجيتي .. مااااا ادري بس گلبي كان مقبوض .. يمكن لان الدم ذكرني بألي خسرتهم .. او يمكن نظراته هي السبب ... ما اعرف .. ما اعرف!
كملت الخياط مالت ايده .. رفعت راسي لكيته نايم!!
گلبي وكف كلت هذا اكيد مات !!
اي .. ايييييي .. مات .. بسرعه ضربته على خده ضربات خفيفه .. بس ماكوو ميصحه!!
اكو يمه كلاص مي .. اخذته وذبيت المي على وجهه بقوه .. جان يصحى!!

اسيد .. بدت تخيط بالجرح والوجع موتني .. جرح مو بسيط ابد .. من الوجع فقدت الوعي .. ما حسيت غير بالمي نكعني!!
فتحت عيوني لكيته واكفه كدامي قريبه عليه كولش ودتتضرب بوجهي ، وجها كان عباره عن خوف ويمكن شفت دموع؟!!!
خصلات من شعرها نازله على وجها كنا بعز الشتا بس قطرات عرك على جبينها .. الي يشوفها يكول كانت دتسوي عمليه جراحيه مو خياط كم غرزه!!
من شفتها حسيت گلبي ديبتسم لوحده شكلها صدك يضحك .. كلتلكم هاي الغبيه هي الوحيده الي تخليني ابتسم من داخلي بدون سبب ومااعرف ليش!!
كلبي ابتسم بس ملامحي بقيتها جامده ..

داليا .. يا ربييييي شكراً الك ع بالي متت .. انت اشون تنام .. اشون تخوفني هشكل .. مخبل انت مخبل؟!!

اسيد .. من كالت مخبل خزرتها بغضب ..!

داليا .. اسفه .. اسفه مو قصدي بس خوفتني ع بالي صارلك شي ، كلت هسه ابتلي بيك ع بالهم اني الي قتلتك!

اسيد .. واني ع بالي خافت عليه ، طلعت خايفه على روحها..!
كمت من مكاني اريد اروح لغرفتي لازم اتمدد ، بس مااكدر احس نفسي دايخ .. لزمت الكرسي و وكفت مشيت خطوتين .. وجان اوكع بالكاع!!

داليا .. من وكع ركضت عليه بسرعه ردت الزمه بس خفت ليعصب الافندي .. وين تريد تروح خليك هنا ارتاح وبعدين كوم ، واذا رايد شي كولي واني اجيبه الك!

اسيد .. بصوت تعبان .. اريد انام.

داليا .. هـ ..ا .. ماشي حروح اصيح الحرس يجي يسندك وتروح لغرفتك!

اسيد .. عوفـ..ي .. الـ.. حر..س .. كلـ.. كلـتل..ج!

داليا .. ماشي لعد ارتكي عليه اني حاخذك.

اسيد .. وخــ .. وخرييي .. عنـ.. نـي... بكل قوتي كمت بس احس الكاعد دتدور بيه .. استندت ع الحايط طلعت من المكتب .. الدنيا دتمطر قوي بره .. اتنكعت اكثر ما اني متنكع .. بقيت مسيطر على نفسي بكل قوتي .. وصلت للدرج .. صعدت درجايتين ... وبعد مااكدر كل قوى ما بقت عندي!!

داليا .. اشكد عنيد وراسه يابس لخاطر الرب .. هو انت وينك وين العناد هسه؟!
عود اريد اساعده الغبي .. دروح طاح حظ الي تساعدك معليه بيك بعد .. بقى يمشي لحد الدرج و وكف ارتكى ع المحجر مالت الدرج بس اباوع جسمه كوله يرجف .. !
متحملت اشوفه بهذا المنظر بعد .. خطيه شكله يكسر الخاطر .. مشيت وكفت بصفه رفعت ايده خليتها على كتفي .. محجه شي بقى هادئ بس جسمه كان حار نار!!
باوع بوجهي بنظرة استسلام .. سندته وصعدنا اثنينا خطوه خطوه .. نفسه كان سريع وحار .. اضخم مني واطول مني صرت بصفه اتكول نمله!
الكوه صعدنا الدرج لان كان ثكيل واني بالموت متماسكه .. وصلنا لغرفته فتحت الباب ودخلنا .. يم السرير دااريد اخلي يلزمه حتى ينام .. جان يذب كل جسمه عليه اني مكدرت ادفعه وكعت وهو صار فوكايه!!!!!!!!!!

شكله فقد الوعي الافندي!!
اني جوا و وجهه صار على ركبتي .. انفاسه الحاره خلت جسمي كوله يرجف  وصار نار .. يا رب ارجووووك ساعدني .. مااكدر ابعده عني ثگيل ونايم!!
حسيت نفسي دااحترك واختنك بنفس الوقت .. حاولت اهدئ اشويه واستجمع قوتي حتى ادفعه عني .. الغرفه هدوء .. وبس صوت انفاسه الي دتحركني .. حسيت بشي غريب فوك گلبي!؟؟؟؟
شي سريع وقوي .. شنو هذا .... معقوله .. لا لا .. هذا گلبه دينبض بقوه .. بوقتها حسيت بأحساس مااكدر اوصفه .. هدوء ، دفو ، احساس حلو حلو بكل معنى الكلمه مينوصف لدرجه حسيت رعشه بكل جسمي مثل ميكولون جسمي كزبر!!
بس ..... الكلام الي سمعته منه خلا كولشي يختفي بلحظه .. بصوت ضعيف همس كال ..

_خاينات .. كلهم خاينات .. !!

دفعته عني بقوه وكمت بسرعه .. اباوع لجسمه يرجف بس حيل بشكل مو طبيعي !!
يا ربي هسه اني شسوي؟!!
لا اكدر اعوفه هشكل ولا اكدر اكول للحرس يموتني غير!!
رحت فتحت الديلاب مالته طلعتله تراك .. باوعت عليه بعده بملابس الدوام ومبللات حتى الحذاء بعده برجله!!
خليت التراك وكعدت نزعته الحذاء والجواريب .. بعدين بقيت صافنه عليه .. اشووون .. اشون انزعه ملابسه؟!!
واشوون ابقي بيهم مبللات والجو بارد وهو يرجف؟!
بعد تفكير وتردد كبيييييير قررت اسوي الي بالي والي يصير يصير!!
فتحت الدكم (ازرار) مالت قميصه بس اديه ترجف و وجهي صار نار .. فتحته وجان اشوف عضلاته من ورا الفانيله الداخليه!!!!!
لا يا الهي ارجوووك ابد مو وقتها هسه .. من صدوك صخنت كل ذره بجسمي صارت نار من المنظر!!
بعدت عنه القميص والفانيله هم نزعتهيا .. ما احجيلكم اشكد عانيت من المنطر الي شفته ..!
لبسته التراك .. وسحبت البنطرون من عنده بسرعه كان لابس شورت طويل جوا (الحمدلله)
ولبسته البيجامه مالت التراك .. حاولت بكل الطرق ما المس جسمه .. بس تعرفون الي يلبس واحد نايم شنو يصير بي؟!
بعد معاناة وخجل حرك كل ذره بيه لبس التراك .. طلعت ملابسه المبلله للحمام ورجعت لزمته حرارته نار؟!!
بسرعه رحت جبت مي بارد ومنشقه .. بللتها وخليتها على كصته!!
بقيت اسويله كمادات وهو يرحف مثل السعفه ...!
اشويه اشويه بدا يقل الارتجاف .. بس حرارته بعدها معلكه!!
كان نايم بكل هدوء وملامحه مرتخيه .. اول مره اشوفه هيج هادء والسلام مرسوم على وجهه .. !
سرحت بي رحت لغير عالم .. احس گلبي مغمور بالهدوء واني دااتأمل تفاصيل وجهه وملامحه الهادئه ..
رفعت ايدي اريد المس وجهه... جان يحجي!!

اسيد .. بصوت مجهد وضعيف .. انتي نفسها .

داليا .. فززني حسيت كلبي طفر من مكانه من الرعبه .. هذا مو نايم شكعده؟!!
معقوله كان ديراقبني؟!!
بقيت ساكته مااعرف شحجي وحراره سرت بجسمي من الخجل والفشله ..

اسيد .. اي .. اكيد .. نفسها ماكو فرق .. كلجن نفس الشي.

داليا .. انتبهت لكلامه هذا ديهذي؟!!
اي ديحجي وحده اكيد الحراره اثرت عليه .. بس شنو قصده بهذا الكلام؟!

_اشششش لتحجي ارتاح انت مصخن مو بوعيك.

اسيد .. هههه .. اي مو بوعيي .. لان دااشوفها .. هاي واكفه كدامي..

داليا .. منو هي؟!

اسيد .. الخاينه .. الي خدعتني .. الي حركتني.

داليا .. بقيت ساكته محجيت.

اسيد .. تدرين انتي اول حب بحياتي .. اي .. اول حب .. من حبيتج اقطعت عهد على نفسي ما اشوف وحده غيرج انتي وبس .. حتى بنات اقاربي ما اسلم عليهن كمت..
كنت افكر بشعروج لينجرح .. كنت ادرس واشتغل بنفس الوقت حتى اجيبلج كل الي تردي .. حتى اسويلج عرس ما صاير الكل تحلف بي .. امي جانت تحجي عليه تكول راح تموت من الشغل انطي لنفسك راحه .. كنت اتعارك وياها علمودج .. علمود ما اخليج ناقصه شي .. كل مناسبه وقبل كل الناس هديتج توصلج.
ما انام الا على صوتج .. واول ما اصحى انتي اول شخص افكر بي واول وحده احاجيج!
ليش هيج .. شسويتلج بس اريد اعرف ليش .. ليش خنتيني .. ليش حرگتي روحي؟!
لج تدرين شنو سويت على مودج .. اتخليت عن كلشي حتى اهلي كنت مستعد اعوفهم حتى ارضيج

داليا .. كان يهذي بدون وعي .. بس الحرگه الي بكلامه حسيتها تطلع من كل گلبه .. عيوني دمعت من كلامه .. بس منو هذي الي ديقصدها؟!

اسيد .. بشنو قصرت وياج .. بشنو اذيتج .. حتى تسوين بيه هيج .. و ويا  منو؟!!
صديقي .. صديق طفولتي !!
خليتيني اخسر مرتين .. احترك مرتين .. اموت مرتين .. قتلتي گلبي مرتين !
بروحي وصديقي!!
بصوت مبحوح وعبره مخنوكه .. آآآآآآخ .. لج ليش علياء ليش .. والله حبيتج .. والله مخنتج ابد .. والله گلبي ديحترك .. دااموت بسببج.. ليش بس اريد اعرف ليش .. ليش .. ليش!!
دمرتـ ..يني .. دمـ..ر..تـيـ..ني!!

داليا .. كان يحجي بقهر و حركه رغم صوته الضعيف .. بس من ذكر اسمها شفته دمعه نزلت من عينه !!
معقوله اسيد يبجي ............ معقوله لهدرجه يحبها ؟ !!
هو يحجي واني دموعي تجري لحالها .. مااعرف شنو اسوي .. اريد اسكته .. اريد اكوله اني هنا .. اريد اهدئه .. بس مااعرف اشون .. بس ادموعي تصب على الحاله الي هو بيها .. .. بقيت يمه طول الليل هو يهذي  واني اسويله كمادات لحد ما تعبت ، ذبيت روحي يمه ع السرير ونمت .. ما حسيت غير صوت الحجيه المفجوع دتصيح عليه ..!!

كعدت مرعوبه .. انتبهت على نفسي نايمه بحظنه والحجيه واكفه كدامي هي ونظرات الغضب  والصدمه بعيونها....... !!

للحكايه بقيه ❤️
رأيكم بالاحداث وتوقعاتكم للبارت القادم 🤭
البارت 16 حيصير شي كووووولش حلووووو 🤗 بس لتنسووون التصويت