رواية في ارض الغرام انت دولتي الفصل الرابع عشر 14 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لأي شخص ياخذ كتاباتي وينشرهم (ذمه)

اسيد .. كنت واكف واباوع عليها اشون دتحاول تنزل الشكر بس متكدر ..هي اصلاً طولها شبر ونص وماده ايدها تريد توصله ..!
ع بالها حساعدها مثل الحليب لما فتحته ، خلي اشوف بلا شنو نهايتها القزمه هاي .. بقيت مسوي نفسي مشغول وممهتم بس اني اباوع عليها بلا متحس بس احس شي بداخلي من صدك ديضحك عليها وعلى تصرفاتها الغبيه !
بعدين راحت جابت الكرسي وصعدت اول ما جرت العلبه جان تندفع ليوره هي والكرسي رادت توكع .. اني بسرعه ركضت لزمتها قبل لتوكع .. طبعاً اني سويت هشكل مو لأن خايف عليها لااا .. بس لان اكو شي ابالي اريد اسوي !!
بسرعه لزمتها جان تضم روحها بحضني مره ثانيه!!
بقت جامده مااعرف ليش متحركت ..و فجأه تحقق الي ردته ... طلعت ساره كدامي ..!!
هي بسرعه فتحت عيونها مثل الي خافت وحاولت تبعدني عنها .. بس اني لزمتها بقوه وثبتتها بمكانها .. رفعت راسها وباوعت بعيوني بنظره خوف وخجل!!
عيونها دتتوسلني ابتعد عنها يمكن خوفاً من الحقنه ساره لتفهم الي صار بغير طريقه نظراً للموقف الي احنا بي!
سندتها وكمت حاظنها .. هي من كامت بسرعه ابتعدت عني .. بصوت هادئ سألتها ..

_تأذيتي؟!

داليا .. اتوقعت حيبعدني لما شاف ساره بس الي صار صدمني بقى لازمني لا اوكع واني بحظنه ولا كأنو الحيه واكفه بالباب  .. مااعرف اشصارلي احس جسمي كوله صخن من الفشله .. يا ربي بس لا تفهم الي صار غلط ، لوع بالها  اني حاظنته وتروح اتكول للحجيه !!
الفكره خلتني ارجف .. كولشي ولا الحجيه مااريدها تفكر اني مو خوش ابنيه لو عندي هذي السوالف .. يا رب دخيلك لاا .. هو اباوع بعيونه ولا مهتم ولا ع بالك هاي شافتنه بهالوضع .. حيخبلني شنو من بشر هذا وفوكاها لازك بيه ميخليني اكوم عنه ..!
بعدين كومني ، اني بسرعه ابتعدت عنه جان يسألني اذا تأذيت!!
معقوله اني بعدني نايمه و دااحلم .. هذا ديسألني الي لو اني متوهمه .. بقيت صافنه بوجها مثل المصدومه .. جان تحجي الحيه!!

ساره .. وتسألها بعد؟!!
من شنو تأذت من حظنك؟!!

اسيد .. ولا عبرتها اصلاً  لان هو هذا الي اريده اني ، ساره تشوفنا بهالوضع  حتى تفك عني ياخه هي واختها الحقنه منار ، بلكي تكول هذا يدور نسوان وعنده علاقات فيتركني بحالي واخلص من افلامهن الي ديسونها .. خصوصاً اختها كامت تحجي وياي بالقلم العريض واعرف شنو نواياها اتريد اتزوجه الغبيه هههههه .. صايم وافطر على منار والله يا الله.
المهم ..
من شفتها اقتنعت بالموقف وصدكته ارتاحيت ومحجيت وياها ولا جاوبتها ع الكلام الي كالته اتجاهلتها تماماً وبقيت انتظر جواب من هاي الجبانه الي واكفه كدامي ترجف من ساره !!

داليا .. ساره تحجي وهو ولا ع بالك يسمعها .. بقى صافن بوجهي وينتظر جواب مني!
مااعرف لويش ديسوي هشكل هذا اكيد انجن تصرفاته مو طبيعيه ، ردت اخلص من نظراته حتى يعوفني ويروح لا تفضحنا الحيه .. بسرعه هزيت راسي وكلتله ..
_مبيه شي شكراً ع المساعده دكتور .

اسيد .. الحمدلله المره الثانيه انتبهي على نفسج ، وماكو داعي للرسميات اسيد تكفي .. ابتسمت بوجها وطلعت .. شفت ساره جامده بمكانها .. واشكد ارتاحيت من شفتها بهذا المنظر.

داليا .. كالي هذا الكلام وراح .. من كد الصدمه حتى عيني مرمشت .. حتى ساره اباوع عليها مصدومه لدرجه محجت ولا كلمه دارت وجها وراحت مثل المسطول!
رغم انو نصدمت بكلامه .. بس متأكده اكو غرض ورا تصرفه هذا وديسوي هشكل لغايه ما اعرفها .. بس يحلم يسويني لعبه بأيده ولمصالحه ، اني اعرف اشون اوكفه عند حده الحقير هذا .. تحول كل شعوري وصدمتي بي لكره وحقد !

كملت الريوك وصعدته للحجيه .. ساره مشفتها بعد الظاهر صار عدها انفصام من الي صار ما الومها الي يشوفه اشون يحجي ويشوف اسلوبه اشون تغير 180 درجه اكيد يتخبل مو بس ينصدم !

دخلت لغرفة الحجيه لكيتها كاعده دتغسل وجها بالحمام خليت الريوك وانتظرتها تريكت ونزلت .. اني نظفت غرفتها وردت انزل .. جان اشوفه طالع من غرفته مبدل وكاشخ الافندي .. و ريحة العطر واصله لراس الشارع!
درت وجهي وسويت نفسي مشفته .. بس هو ميعديها الا يحقر .. بصوته المرعب

اسيد .. اذا حاجتج ساره ع الي صار بالمطبخ لتكليللها شي عن الموضوع.

داليا .. بصوت جامد .. لويش انت خليت شب ينكال اصلاً!

اسيد .. بلا طولة اللسان اسمعي الكلام ولتناقشين.

داليا .. بأستهزاء .. ماشي اسيد.

اسيد .. اتقربت منها حيل وهي رجعت ليوراها.. بصوت جامد ومليان غضب .. الظاهر صدكتي نفسج انتي!!

داليا .. اتقرب مني وجسمي الغبي كام يرجف .. عطره ترس انفاسي .. بطوله وضخامته واكف كدامي .. ابتعدت عنه بس هو كان كولش قريب مني والحايط ورايه ماكو مكان اروحله بعد .. دنكت راسي مباوعت بوجهه لان اعرف اذا باوعت بعيونه اضيع وانسى الكلام .. بقيت ابلعم مااعرف شنو احجي ..!

اسيد .. اتقربت منها حيل لان اعرف نقطة ضعفها .. كامت ترجف وانفاسها تسارعت .. بصوت همس كلتلها .. ليش احسج تحبين لما اقترب منج!!

داليا .. كلماته شعلت نار بجسمي .. حسيت نفسي صخنت .. يا ربي لهدرجة مبين عليه اشكد ضعيفه كدامه!!
دفعته عني بقوه .. بس ههاي اصلاً الدفعه مأثرت بي .. هو لحاله ابتعد عني وابتسامه خبيثه على وجها ..
بصوت حاد وغضب كلتله . اول شي اسألني اني اطيقك اصلاً حتى اتأثر بقربك او عدمه!!
اما الي ديصير هو عدم المستحى مالتك لما تقترب مني لهدرجه   ، بس تعرف الي مثلك مااعتقد حيفهم الي دااحجي ، واحب افهم جنابك  انو اني متعديت حدودي حتى انسى نفسي مثل متفضلت حضرتك ..  حسب مااتذكر حضرتك الي طلبت مني اكولك أسمك بدون رسميات لو اني غلطانه!

اسيد .. انتي غبيه والكلام وياج يحتاجله وقت ، واني ماعندي وقته اضيعه ويا اشكالج .. سوي الي اكولج عليه وبس والا راح تندمين.

نزل اسيد قبلها بوهي بقت جامده بمكانها من الي صار .. صح هي دافعت عن نفسها وحاولت اتبرر الي صار .. بس على منو تكذب !!
كلامه صحيح كولما يقترب منها تفقد السيطره على جسمها كل ذره بيها تستسلم لقربه منها.!!!
بقت سرحانه ومحتاره من تصرفاته الي كل اشويه شكل!!

التفكير دوخني استجمعت نفسي ونزلت .. لكيتهم مجتمعين بالصاله وساره كاعده وياهم .. اول ما لمحتني نظرات السم طفحت على وجهها .. !
تجاهلتها لان الي بيه مكفيني ، بس الي حيرني اشون مكالت للحجيه ع الصبح وسوتلي فضيحه!!
الله اليعلم هاي الثانيه شضامتلي .. نزلت من الدرج ودااروح للمطبخ جان اسمع صوته ..!!

اسيد .. داليا نسيت أسألج اشلون صارت ايدج؟!!

داليا .. شنوووووو ...  دتسمعون الي دااسمعه لو اني انجنيت!!
ديكول داليا لو اني غلطانه .. اول مره بحياته يكولي داليا ...!
وديسألني على ايدي هذا اشبي اكيد راح يموت وديفكر يسوي عمل خير قبل مياخذه الله !
اباوع على ساره والحجيه حلكهم مفتوح من الصدمه!!
حاولت اتلافى الموقف بسرعه جاوبته ..
_الحمدلله تحسنت شكراً للرب ولحضرتك اكيد دكتور.

اسيد .. الحمدلله .. وبلا دكتور شكلتلج اني!

داليا .. نطرات الخباثه بعيونه والمكر واضحه هذيييج وينها .. ع باله اني غبيه ، قبل دقايق رزلني فوك وهاني لانو كلتله بأسمه .. وهسه يرجع يكرر نفس الكذبه مالت الصبح!!
راح اتخبل والرب .. هذا من صدوك ناوي يخبلني .. اعرف الي ديسوي تمثيل سخيف .. بس الي حيخبلني هو شنو قصده منها ولويش ديسويها؟!!
محجيت شي ابتسمت ورحت للمطبخ !!
سمعتهم يحجوون ويصيحوون مااعرف ع شنو وساروو صوتها يلعلع واصل لجيران .. اني عفتهم وطلعت للحديقه .. الجهال من شافوني اجوي يلعبون يمي !

مرت الايام بسرعه وساروو بقت يمنا زعلانه حيصيرلها شهر .. زوجها لا اجه ولا سأل عنها .. وهي لسانها محد سالم منه حتى ام عادل المسكينه شيب راسها منها بس تتأمر وتتعارك كولشي معاجبها .. اسيد بقى اسبوع بالبيت ورجع الدوامه من وراها هي ومشاكلها .. اما اني حاولت بكل الطرق اتجاهلها ومااحجي وياها
الشي الوحيد الي مونسني بالبيت هم الجهال .. جهالها يخبلون ومؤدبين مطالعين على امهم الحيه ابد .. بقيت متونسه عليهم برائه وطفوله ذكرتني بأختي ..!
الحجيه متحملت مشاكلها وطلايبها خابرت اسيد كالتله اليوم تخابر اخوك يجي ياخذ مرته وجهاله موتوني .. طبعاً الحهال مبيهم اذيه بس الحجيه تكره الهوسه .. بيتهم فارغ ومتعودين على الهدوء فلما يلعبون تصير خبصه وهي تنزعج .. وامهم ممقصره !!
طكت روحها المره وخابرت .. كاللها اسيد لتخابري اني اليوم نازل واخذها لبيتها
فعلاً الظهر وجان يجي

اسيد .. شردت من البيت للدوام من وراه هوسه هاي الافعى هي وجهالها ..

بالدوام لكيت علي .. وعرفت منه اشياء غريبه عجيبه!!

علي .. اني قررت اخطب.

اسيد .. يا الله واخيراً اقتنعت بذوق امك!!

علي .. امي اصلاً متعرف بالموضوع!!

اسيد .. شقصدك؟!!
لا .. لحظه لحظه ... ليكون سويت الي ابالي هسه!!

علي .. راح اتزوج سلمى!!

اسيد .. لك شدتحجي انت .. شنو لكيتها؟!!

علي .. اي لكيتها .. قبل شهر رحت للدير الي اخذتها اله هي وداليا .. ومتتوقع الي عرفته!!
لكيتها صايره راهبه .. من شفتها حسيت گلبي وكف ، فارقت الحياه .. الغبيه دمرت حياتها .

اسيد .. لعد اشون حتتزوجك اذا صارت راهبه؟!!

علي .. البنيه حالتها النفسيه حيل تعبانه ومتدمره .. اتخذت هذي الخطوه بلحظه ضعف ومكانت تدري شنو عواقبه بس بعد ما عرفت حياة الرهبنه وقوانينها ندمت على قرارها  بس الاوان كان فات لانو داليا صديقتها الوحيده عافتها وراحت .. محد الها وهي من نوع شخصيتها ضعيفه جداً وتتأثر بسهوله عكس داليا ..

اسيد .. بنبره حاده وانت شعرفك بداليا شخصيتها قويه؟!!

علي .. سلمى الي كالتلي .. حجتلي كلشي عنها .. البنيه حياتها كانت جداً صعبه مااعرف اشلون كدرت تتخطاها .. من صدك هاي داليا انسانه قويه بصراحا كلام سلمى عنها خلاني اريد اتعرف عليها اكثر...

اسيد .. بغضب .. هسه انت شنو تريد تتزوج هاي لو تتعرف ع الثانيه شنو قصتك

علي .. يمعود اشبيك غير دااحجيلك الي صار .. هسه اني شكلت حتى تعصب حسستني دااحجي عن اختك!

اسيد .. علي احترم نفسك شنو هذا الكلام .. وشعليه بيها اني متحجي عليها .. ميهمني اصلاً .. كلها خلك خدامه عدنا ولو ما امي جان طردتها من زمان.

علي .. ماشي عوفنا من داليا  خليني اكملك الي صار .. بعد ما تركتها صديقتها اظطرت تبقى بالدير لان محد الها وتتظاهر انو هي راهبه لان ماعدها غير حل اذا تركت الرهبنه تنطرد بالشارع!
فأني لما اجيت كنت طوق النجاة  الي انقذها من الغرق .. بالبدايه مقبلت تترك الدير وتجي وياي لان تخاف على نفسها .. ورغم كلتلها اتزوجج بس رفضت الموضوع رفض تام .. لان كالت مااريد تصير مشاكل بينك وبين اهلك اذا عرفو بيك متزوج من وراهم!
بس اني متركتها .. وبقيت شهر كامل اروح واجي للدير والح عليها .. الى ان اقتنعت بالاخير
واني جهزت كلشي مبقى غير نعقد ونتزوج!

اسيد .. زين طوق النجاة مفكر بأهله شنو موقفهم لما يعرفون بزواجك؟!!

علي .. هذي حياتي واني الي اقرر شنو الصح وشنو الغلط ، اولاً اني موطفل ولا زعطوط حتى يتحكمون بيه ، وثانياً اني الي راح اعيش وياها باقس عمري مو هم حتى يختارون زوجه الي بكيفهم!

اسيد .. والله مااعرف شنو اكلك ابو حسين .. بس طالما انت واثق من قرارك خلص سوي .. واتمنى متندم عليه بعدين.

علي .. ان شاء الله ما اندم .. وبصراحه متوقعتك راح توافقني بهالسهوله وتتقبل الموضوع هيج!

اسيد .. انت اخوي و واجبي ان انصحك  .. والظاهر ميفيد بيك النصح لذلك طالما هذا الشي راح يسعدك ويريحك فاتمنالك الخير اكيد.

علي .. ههههه ابو الاسود حبيبي والله فرحتني .. كنت خايف ومتردد اكلك بالموضوع بس الحمدلله ارتاحيت عاد من طرف واحد.

اسيد .. بيها الخير حبيبي ، واشوكت ناوي تتزوجون؟!!

علي .. هذا الخميس ان شاء الله

اسيد .. الف مبروك اني راح اكون الشاهد اكيد هههه

علي .. طبعاً ميحتاجلها سؤال .

كنت اعرف علي ديسوي غلط كلش كبير بزواجه من دون علم اهله او رضاهم .. بس الفرحه الي شفتها بعيونه وهو يحجي عن البنيه الي يحبها خلتني اسكت وابلع كل الكلام الي بگلبي!
ثاني يوم خابرتني امي كالت خابر اخوك يجي يرجعه مرته لبيتها .. كلتلها اني اجي واخذها البيتها لان اذا خابرته اكيد مراح يقبل ترجع .. لذلك ردت اخذها اني واخلي كدام الامر الواقع!

رجعت لبيتنا بعدني بالباب واسمع الصياح واصل لسابع جار وساره خابصه الامه خبص!!

دخلت لكيتهم بالحديقه .. هي وداليا والجهال .. من شافتني ساره سكتت ..!

_بصوت حاد وغضب .. شكو شبيج صوتج واصل لسابع جار ؟!!

داليا .. قبل ليجي اسيد من دوامه بساعه تقريباً كنت كاعده بالحديقه داالعب بالجهال وفرحانين .. مااحس غير الحيه واكفه على راسي وتصيح!!

ساره .. اني كم مره كلتلكم لتحجون ويا هذي ولتتقربون منها؟!!

داليا .. وكفت اباوع عليها ومصدومه من كلامها ..هاي ويامن دتحجي؟!!
معقوله تقصدني .. زين لويش شسويتلها .. بهدوء كلتلها .. حضرتج دتحجين وياي؟!!

ساره .. مدااحجي وياج لانو مااحجي ويا هيج اشكول قذره .

داليا .. اللهم طولج يا روح .. احترمي نفسج احسنلج.

ساره .. هلا هلا وعندج اللسان وتجاوبين هم .. اي عيني حقج اذا ماخذيج بالاحضان اشلون متشيخين!

داليا .. ممكن اعرف حضرتج شتردين بالضبط؟!!

ساره .. اريدج تولين منا تنكلعين ما اريد اشوف خلقتج كدامي.

داليا .. بسيطه .. لمي ملابسج وروحي لبيت رجلج وانتي بعد متشوفيني .. اما سالفة اطلع منا فما اعتقد كاعده ابيت حضرتج وتطرديني البيت هذا اله اهل واذا ميردوني هم الي يطردوني مو انتي.

ساره .. لا يا ساقطه تطرديني من بيت رجلي اني اعلمج اليوم الا اربيج الظاهر اهلج الزباله معرفو يربوج!!

داليا .. من حجت على اهلي حسيتها ضربتني سهم بنص گلبي .. اشكد كنت قويه و واكفه بوجها اول ما ذكرتهم حسيت حيلي انهد .. وكلبي وجعني والدموع اتجمعت بعيني .. محجيت وياها شي بس هي اجتي تريد تضربني .. جان يدخل اسيد .. اول مشافته كامت تبجي!!!!

ساره .. هم زين اجيت اسيد تعال شوف هاي الحثاله اشلون طردتني من بيت عمي!

اسيد .. بصوت جامد .. ضبي اللسانج ولتتجاوزين .. وكصري صوتج منا شارع!

ساره .. دااكولك طردتني تكولي لتتجاوزين شنو تريد اسوي بلا ابوسها لو اشكرها .. شنو انتو جايبيني هنا تذلوني؟!!

اسيد .. اعتقد تعرفين ليش جبتج لهنا .. لو تحبين اذكرج!!

ساره .. اسمعني زين اذا متاخذ حقي من هاي الساقطه اني اعرف اشلون اتصرف وياها .

داليا .. من كالت الساقطه اني متحملت ابد .. سكتلها هوااي بس لهنا وكافي .. احس الدمعه واكفه بطرف عيني وبصوت حاد كلتلها ..

_الحثاله هو الي يدعي عكس حقيقته .. والساقط هو الي يتبلى ع الناس بغير ذنب ، والي ممتربي هو الي يستخدم هذي الالفاظ بكلامه .. اعتقد واضح كلامي والذكي تكفي اشاره .
من سمعتني كلت هذا الكلام .. هجمت عليه بسرعه ورادت تضربني راشدي (كف) .. بس اكو ايد وكفتها...!

اسيد .. حلو ردها كان على ساره رغم انو قاسي شويه وميصير تحجي هيج وياها لان مهما يكون هذي مرت اخويه .. بس تستاهل الحقيره هاي هي الي بدت!
فجأه ساره هجمت عليها رادت تضربها .. اني بسرعه لزمت ايدها .. بس هذا الشي معجب ساره خانم ابد .. فبدت تلغي ...!

ساره .. ايييي عيني طبعاً تدافعلها لهذي الحقيره مو حبيبة الكلب هاي .. اي عيني مبين من الاحضان والنظرات .. وكدام الناس تمثل انو تكره النسوان وعندك عقد منهم .. والله متنلام بيك علياء كسرت خشمك وتستاهل .. تاليها ضليت تدور ساقطات وتجيبهم لبيتك بحجة تساعد عمتي ... وانت مرتاح ...

قبل لتكمل كلامها .. انطاها اسيد راشدي (كف) خلا حلكها ينزف و وكعها للكاع....!
وجهه مليان غضب .. وعصبيه .. عيونه صارت نار و بملامح مميته .. عافها ودخل للبيت بسرعه ...!!

اسيد .. بصوت عالي صياح .. يمه .. يمه .. وييييييينج .. يمه!!

الحجيه .. ها يمه اشبيك خير شصاير؟!!

اسيد .. بصوت حاد وغضب .. لحظه وحده متبقى هاي الحقيره هنا .. هسه تاخذيها لبيت رجلها .. لا اكلب البيت عليكم والله .

الحجيه .. اي ابني اوديها هسه .. بس فهمني  اشبيك استهدي بالرحمن خل افهم شصار.

اسيد .. بلا متفهمين اي شي .. تاخذيها لبيتها .. لو اكلج اخذيها لبيت اهلها خلي يربوها الادبسز هاي وعمي اني اتفاهم ويا .

الحجيه .. ماشي هسه اخذها بس استهدي بالرحمن خلي احط حجاب على راسي انطيني مجال .. راحت الحجيه اتبدل ، واسيد خابر السايق مالتهم كاله تاخذ امي توصلها لبيت عمي ... وصاح لأم عادل كاللها لمي شكو غرض الها ولجهالها وطلعي بره خلي تاخذهم مااريد تدخل للبيت ولا اشوفها لان انهينها خلاص.
راحت ام عادل سوت مثل ما كللها .. طلعت ملابسهم بره والحجيه بدلت ونزلت بسرعه .. اخذتهم بالسياره وراحت ..!

داليا .. بقيت بالحديقه مدخلت جوه لان شكله يخوف كان ومعصب .. مردت اشوفه اخاف يطلع حركته بيه!!
مرت ساعه ساعتين .. ثلاث ساعات والحجيه ماكوو .. !
ام عادل خلصت شغلها وراحت .. بقيت بس اني ويا بالبيت .. صارت الدنيا المغرب والليل بدا يظلم .. واني كاعده بالحديقه .. الدنيا بردت بالليل وكمت ارجف .. مع ذلك مدخلت للبيت ابد الخوف منه اتملكني لان الي شفته عليه الظهر شي من صدوك مخيف .. الموت انرسم بوجهه وعيونه اظلمت لما الحيه ساروو ذكرت اسم هاي البنيه كدامه .. معقوله لهدرجه الموضوع كبير بحيث مد ايده على مرت اخو؟!!

بقيت بالحديقه افكر بألي صار وسرحانه .. ما فززني غير صوت الطلقه من البيت !!!!!!!!!!!!!!

للحكايه بقيه❤️
توقعاتكم ، رأيكم بالاحداث ولتنسون التصويت حتى اكمل والقادم احلى 🤗