رواية في ارض الغرام انت دولتي الفصل الخامس والعشرون 25 - بقلم ﮼الاميره،الموسويه 👑

بقلمي( هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

اسيد .. انتي طالق .. صدكيني راح اتركج نهائياً ومراح تشوفين وجهي ابد بس اتركيها من ايدج.

داليا .. اول مسمعت الكلمه منه بجيت بقوه كنت اشهك بحرگه وكانو روحي دتطلع .. النظرات الي كانت بعيونه وهو ينطق هذي الكلمه كان مثل الخايف وملامحه مرعبه .. مكنت اعتقد حيمر عليه يوم واشوف بعيونه نظرة خوف!
بقى مركز نظره بوجهي .. تنهد تنهيده حسيتها طلعت من اعماق روحه .. كل جزء بي كان يرجف غضب كأنه ديصارع شي بداخله .. بهدوء وصوت حاد  رمى عليه اليمين وسكت!!
ومشكيت بصدق كلامه ابد كان فعلاً يتكلم بجديه .. المفروض هسه اني ارتاح مو؟!!
صار الي ردته وطلكني خلص .. لازم افرح مو؟!!
هذا الي اريده صحيح انو يتركني .. زين لويش بقيت لازمه الكزازه متركتها؟!
لويش كنت افضل الموت على انو اتحرر منه .. انو اسمع هذي الكلمه منه كان هدفي قبل كم ثانيه .. لعد لويش روحي داتحترك؟!
شنو من قدر هذا ...
مااكدر ابقى ويا ولا اكدر اعيش بدونه ، شنو من حياه هذي الي دتحارب اي سبيل لسعادتي؟!!
خلص طلكني وبعد منرجع مستحيل لشنو عايشه والمن اعيش بعد؟!!
دقايق مرت عليه سنين كنت جامده بمكاني وكل ذره بيه ترجف .. اخر شي فكرت بي .. انو حياه بدونه وبعيد عنه مااريدها غمضت عيوني بقوه وضغطت ع رگبتي بالكزاره حسيت بألم فضييييع روحي دتحترك  الدم بدا ينزل بقوه ع صدري .. كنت بوعيي واكفه ع طولي بس روحي بغير عالم ، يمكن دااموت .. روحي دتطلع!!
بلحظه وحده شي قوي سحبني وفززني .. فتحت عيوني لكيته واكف كدامي وقريب مني حيل .. سحب الكزازه من ايدي وشمرها .. اني كنت واكفه مثل الصنم مااتحرك كنت اشوف كل الي يصير بس مااحرك ساكن .. سامعين بالموتى الاحياء؟!!
اني كنت هشكل ، فارغه احس نفسي .. بس لما حظني رجعتلي روحي!

اسيد .. الغبيه كانت راح تموت روحها .. صح اني غلطت وحقها بس مهما يكون متوصل لدرجه اتأذي نفسها !
حيل ندمت ع الي سويته بلحظتها .. وغصب عني اضطريت اكللها هذي الكلمه .. مو لانو اريد اطلگها او راح اطلگها صدك!
لااااا .. كنت اريد اهديها مو اكثر وشي ثاني هي مكانت تعرف شي عن الطلاق ع بالها بمجرد ما اكول طالق نتطلق خلص!!
لذلك حاولت اسايرها .. وفعلاً كلتلها انتي طالق ، اتوقعت تترك الي بأيدها وتهدا..!
بس ولا ع بالك سمعتني بالعكس ضغطت اكثر وجرحت نفسها جرح اكبر .. من صدك فقدت عقلي بلحظتها يعني هي الي رادت اطلكها حتى متنتحر او تأذي نفسها .. زين ليش من سويت الي تريده متراجعت؟!!
خبلتني وطفرت الشياطين الي براسي .. مكدرت اسيطر على اعصابي بعد واني اشوفها دتموت كدامي .. اول مغمضت عيونها ركضت سحبتها عليه وبعدت الكزازه من ايدها!!
كانت ترجف بقوه ، جسمها بارد ثلج .. والدم ينزف من ايدها ومن رگبتها .. منظرها فعلاً فعلاً كان يدمر !
دمرتني صدك بوقتها اتمنيت اختفي  .. صح اني اكره النسوان بس ممفكر أأذي احد لهدرجه توصل للموت!
كل الي كنت اسوي حتى أأذيها مجرد كلام جارح مو اكثر لانو الجرح الي بداخلي كان عميق وكل بنت اشوفها تذكرني بالماضي  بس متوصل للتعذيب الجسدي!!
(يا ريتكم تعرفون انو الكلام يأذي الروح اكثر من الاذى الجسدي)

المهم..
سحبت الكزازه من ايدها وشلتها هي كانت شبه فاقده الوعي بس عيونها مفتوحه تراقبني!
طلعتها من الحمام خليتها ع السرير .. بسرعه جبت الاسعافات كعدت كدامها ع السرير وبديت اعالج الجرح الي برگبتها ، صح كان كبير بس سطحي مو خطر!
نظفته .. عقمته .. ضمدته الها .. هي كل هذا صافنه متحرك ساكن ولا تحجي بس دموعها تجري بهدوء وبدون صوت!
كنت اضمد جرحها واباوع بعيونها الي مليانه دموع وكلام مفهمتها .. حزن وألم خلوني مااكدر احجي ولا كلمه
كملت جرح رگبتها بعدين ضمدت ايديها اثنينهم كانو مجروحين اكثر من جرح والكزاز الناعم بعده بأيدها طلعتهم ونظفتها المفروض لما المس جرحها تتأذه تصيح اني طلعت الكزاز وهي ماكو اي ردة فعل منها بس صافنه ودموعها تجري!
خوفني هدوئها ع بالي بيها شي قست ضغطها والسكر وحرارتها ونبضاتها .. كولشي طبيعي بس اشويه هبوط خفيف عدها .. ضمدت ايدها و نزلت جوه سويت اكل وجبتلها مسكن الالم واجيت .. لكيتها ع نفس الصفنه ونفس الحاله .. كعدت يمها وخليت الاكل كدامها بصوت جامد..

_لازم تاكلين نزفتي هواي.

داليا .. ماكو اي رد فعل !!

اسيد .. داحجي وياج جاوبيني.

داليا .. محجيت اي شي كنت اسمعه واشوفه اشون ضمد جرحي وايديه .. كل الي سوا اذاني حسيت روحي دتحترك من الوجع بس شي بداخلي منعني ابين اي ردة فعل يمكن لانو وجع گلبي وألم روحي غلب ع كولشي!
بقيت اعيد الي صار ابالي مره ومرتين والف والفين .. حتى عقلي تعب من المشهد الي دينعاد .. عافني وراح فتره ورجع بيده اكل و ..
كالي اكلي .. محجيت .. من كل عقله هذا يريدني اكُل هسه؟!!
اكيد عقله بي شي اذا متوقع مني حرد عليه اصلاً .. سكتت ولا كأنو موجود او ديحجي وياي

اسيد .. ماشي لتاكلين ولتحجين .. بس لازم اتسمعين وبعدها راح اتركج انتي الي تقررين ..
الي راح اكوله محد يعرفه غيري اني وربي والطرفين الي سوو بيه هشكل .. قبل كم سنه اول مدخلت للكليه ..
اتعرفت ع بنت وياي اتداوم .. بالبدايه كانت مجرد صداقه وزماله جامعيه بعدين بالمرحله الثانيه بدت تاخذ مجرى ثاني بدت تتحول الى اعجاب .. بعدها تعلق .. وبالاخر حب !!
اكيد هذي قصه تقليديه ويمكن سامعتها هواي ولد يشوف بنيه بالجامعه حلوه عجبته حبوا بعض ويرتبطون بعلاقه يأما تنجح او تفشل بعدين لو يتقدملها لو يضحك عليها ... الخ
بس الي صار وياي يختلف الانسانه الي اختاريتها محبيتها لانها حلوه او جذبني شكلها .. لا بالعكس كانت مو حلوه حيل جمالها اقل من العادي وحتى حالتها الماديه كانت جوه الصفر يعني عائلتها يتغدون ميتعشون!
ورغم انو هي الي لزكت بيه بالبدايه وخلتني اتعلق بيها بس مهتميت لكل هذي الاشياء ولا حسستها بيوم اكو فرق بينا حبيتها حب صادق وخالص بدون مصالح ولا شكليات .. حبيت روحها وتصرفاتها الي لحد الان مااعرف اذا كانت حقيقيه او جزء من لعبتها .. بالمرحله الثانيه خطبتها اهلي كلهم اعترضوا وامي كالت اتبرى منك اذا اخذتها .. صحيح امي گلبها طيب وتساعد الناس بس هوواااااي تتأثر وتهتم بالمظاهر والبنيه كانت فقيره حيل لذلك امي عترضت بدون متشوفها حتى!!
اتحديت اهلي كلهم وامي زعلت عليه حتى من البيت وطلعت كنت اداوم الصبح اشتغل الظهر وبالليل ابات بنفس مكان شغلي .. الى ان اتخرجت .. اعتمدت على نفسي ومخليت اي احد يساعدني حتى عمي ابوها لساره واخويه كرار اشكد اتوسلو بيه ع الاقل اجي اعيش هنا ببيت المزرعه مقبلت ، مخليت احد يتفضل عليه .. ٣ سنوات امي مشايفها ولا تقبل تحاجيني .. وهذا اكثر شي دمرني .. امي عندي اغلى من الهوا الي اتنفسه .. ضحيت بأمي علمود اوفي بوعدي لهذي الانسانه ، بيتنا موصلته ابد حتى عنوانه بديت انسى ..
ما اريد اطيل الكلام ..
خلصت الجامعه وتخرجت ، كنا متفقين اول ما نتخرج نتزوج .. هي طبعاً عرفت كل الي سويته على مودها وعرفت قاطعت اهلي حتى اتزوجها كلتلها كلشي ، بالبدايه مقبلت وكالت اني مو مهم المهم اهلك وامك ... من هذا الكلام!!
فكرتها متريدني اخسر اهلي وكذا .. وهذا الشي خلاها تكبر بعيني اكثر لذلك فهمتها انو حبي الها اهم من كلشي بالدنيا .. ههه كنت غبي مو!!

المهم ..
بعد متخرجنا بفتره هي اختفت واني كنت مشغول اجمع فلوس حتى أأجر شقه نتزوج بيها على ما اتوظف حرمت نفسي من كلشي في سبيل انجمع بيها ابيت واحد .. فأنشغلت عنها فتره غصباً عني مو بأيدي .. بس كنت اتصل بيها وأسأل عنها كل يوم بس منتشاوف .. لما اختفت ماكو منها اي خبر حتى مكالماتي مترد عليها ..!!
عفت شغلي ورحت لبيتهم .. طلعلي ابوها ... سلامت عليه وقبل لا أحجي كلمه وأسأل عليها ... صدمني بكلام حسيته هدم نص عمري بوقتها .. بكل برود كالي
( علياء انخطبت وتفضل هاي حلقتك)!!!!
بوقتها ضحكت ضحكه والعبره خانكتني .. من كل عقلي ع بالي يتشاقه وياي ..
كلتله اني خطيبها على سنة الله ورسوله وعاقد عليها شنو انخطبت ؟!!
كالي خطوبتكم بس عقد سيد واحنا رحنا للسيد وفصخنا يعني هسه انتو منفصلين.
هذا كل الي كاله وطلع الحلقه خلاها بأيدي هنا العالم كله توقف بالنسبه الي!!
مااعرف شنو احجي ممصدك الي دااسمعه .. 5 سنوات حب يجي هذا ينهيها بسهوله؟!!
كنت مفكر هو الي جبرها ع هذا الشي لان متأكد من حبها الي ومستحيل تسوي بيه هيج .. اترجيته يخليني احجي وياها افتهم منها شنو الي صار وخلاها تقرر هيج قرار بدون حتى متكلي او اعرف!
بس مقبل منطاني مجال حتى اشوفها .. طردني وسد الباب بوجهي!
كل هذا الي صار سهل وعادي ممكن يصير .. اكيد ابوها جبرها واذا صدك غصباً عليه وعلى شاربه اخذها .. رجعت واني كلي امل انو اشوفها ويرجع كلشي كما كلن لان هي متتخلى عن حبها .. مرت ايام واسابيع واني مناطر اريد بس اشوفها ماكو حتى من البيت متطلع!!
معقوله !!
طبعاً كل الي صار بيه من اول يوم اعترفتلها بحبي الي اللحظه الي ابوها طردني بيها شخص واحد هو الي يعرف بالموضوع .. صديقي احمد!
احمد هذا صديق طفولتي اني ويا رابين سوى من اول ابتدائي هو صديقي اني ويا حيل متشابهين مااعرف بس مرات احسه نسخه مني واني نسخه منه .. مااعرف منو الي يقلد الثاني بس كان بمثابه اخ الي واكثر .. يعني علاقتي بي اقوى من اخويه كرار!
لذلك كل اسراري كانت يمه .. حتى لما اتعاركت ويا امي وعفت البيت هو مقبل وبقى يحجي عليه .. كالي لك انت غبي تبيع امك علمود بنيه؟!!
قحط بنات تروح وحده يجن عشره بس امك وين تلكى منها؟!!
مسمعت كلامه لان كنت عاشك ومعمي على عيني .. واكثر شي كان رابطني بهذي العلاقه انو اني انطيتها كلمة رجل مااتخلى عنها ومحد غيرها تصير ام لجهالي!
ومستحيل اخلف بوعدي لانو راح اطلع مو رجال .. فضحيت بأهلي ومضحيت بوعدي!
بمرور الزمن كنت اللاحظ احمد بدا يتغير رأيه .. كان يذم بيها ويحجي عليه يكلي شعجبك بيها .. وشنو بيها ينحب وحبيتها .. وليش باقي وياها .. حتى بشرفها طعن!!
وتعاركت ويا .. وصلت صداقتنا للنهايه لان جاب سيرتها بالموزينه .. بس بعدين اعتذرلي واترجاني اسامحه .. اني مااكدر على زعله فتصالحنا..!
بس بعدين رأيه تغير تجاها ..صار يسألني عليها .. ويمدح بيها .. ومن اذكرها يبقى يسأل ويدقق وين رحنا وشسوينا؟!!
صح استغربت من هذا التحول بس مستبعد هيج شي لاني اشك بروحي ومااشك بأحمد!!
اول ما طردني ابوها وكالي هالكلام بوجهي رحت لاحمد اشتكيله!!!!
رحت لبيته بتت يمه بيومها .. هداني وكالي البنيه مو نصيبك واصلا متستاهلك .. هذا الي كاتبه الله ... ومن هذا الحجي!!

اني كل هذا ممصرفلي ولا مقتنع لانو علياء الي ومتصير لغيري لو على جثتي حتى لو اعرف ارتكب جريمه واقتله الي يتقربلها .. بقيت مستمر اشتغل واجمع بفلوس العرس ولا كأنو سمعت شي بس اني لا ليلي ليل ولا نهاري نهار .. عقلي وتفكيري كله يمها .. اخاف اذوها .. اخاف غصبوها ع واحد غيري .. مواني الشغل والتفكير دمرني  .. قررت اراقبها و بس اشوفها اخطفها واتزوجها .. والي يصير يصير!
الى ان فد يوم وبعد اشهر من الانتظار يم بيتهم .. طلعت!!

اتوقعت اشوفها مكسوره .. متأثره .. حتى توقعتها تموت بعدي ههه ... بس الي شفته العكس!!
كانت كاشخه كشخه بحياتي مشفتها لابسه هشكل .. طلعت من بيتهم صعدت بسياره واكفه كدام البيت!!
اباوع ع السياره هذي مو غريبه!!!!!!
هذي سيارة احمد .. صديق عمري!!!!!!
زين شيسوي هنا .. وليش صعدت ويا علياء؟!!!!
معقوله اخذها حتى يصيحني .. اي حتى يجمعنا اني وياها لان يعرف اشكد متعذب واشلون دااعيش بدونها .. السعاده طيرتني من كاعي .. صعدتي سيارة الشغل ..  وراهم والموبايل بأيدي .. من كل عقلي كنت منتطره يتصل بيه!!
بقيت وراهم .. اباوع وكفو كدام محكمه!!!
يا ستار شعدهم .. بس لا صاير وياها شي .. زين احمد شنو علاقته؟!!
نزلو للمحكمه اني بقيت انتظر ... الى ان طلعو .. الي شفته طير عقلي .. ترازني كله اختل .. اكيد اكو غلط بالموضوع .. كانومتكاوديين والابتسامه تارسه وجها و وجهه !!
شنو الموضوع .. معقوله الي ابالي هذا ... لا لا .. مستحيل .. مستحيل .. فتحت السياره ونزلت بس احس جسمي كله يرجف وگلبي راح يوكف .. اي كلبي راح يوكف .. مشيت بخطوات متثاقله وكفت كدامهم ...
من شافوني اختفت الابتسامه من وجهم!!
بصوت متلعثم مااعرف شنو اكول .. شنو احجي .. وكلمه ماادري اشلون طلعت مني ..

_شـ.. شـديصـ..يـر؟!!

هو سكت ودنك راسه محجه ولا حرف .. و ألي جاوبني هي .. هي جاوبتني وبكل صلافه..

علياء .. اني واحمد انخطبنا .. وهذا عقد المحكمه.

اسيد .. يمكن كلمة صدمه متنطي شعوري حقه بوقتها .. ولا الخدلان .. ولا حتى الموت هم يكدر يوصف الاحساس الي حسيته!!
قبضت ايدي بقوه حتى اسيطر على اعصابي .. استجمعت نفسي بس داخلي يصرخ .. بصوت جامد وكل هدوء وببتسامه عريضه

_ اهااا .. الف مبروك شايفين كل الخير ..

احمد .. رفع راسه راد يحجي .. بس هي سبقته ..

علياء .. شكراً .. والعرس هذا الخميس و انت معزوم مو متجي!

اسيد .. هههه اذا لعرسج ما اجي لعد المن اروح؟!
بس احمد اريد اكلك كلمه بمناسبة هذا الخبر الحلو .. انت صديقي واعرفك من زمان اتوقعت يكون اختيارك ارقى من هيج مو بهذا الانحطاط تاخذ افضالة غيرك ،عموماً بقايا الاسود تاكلها الكلاب .. مبروك ابو شهاب واي شي تحتاجه خويك موجود وبالخدمه.

ركبت سيارتي ورحت .. بوجهي لحظن امي .. من شافتني وشافت حالتي فقدت !!
اتصوري الانسانه الي بعت على مودها اغلى ما املك باعتني .. داست حب ٥ سنوات بلحظه وحده .. وبلا سبب .. بس الي دمرني مو الحب الي دمرني وهد حيلي الصديق الي كنت معتبره اخ .. كرهت جنس حواء عن بكرة ابيه مو لان خانتني ولا لان ضيعت سنين من عمري بالذل والتعب .. لاااا كرهتهن لان بسببهن  خسرت اخوي وصاحب عمري !
يمكن لو ميت احمد اهون عليه من شوفته يبيعني علمود وحده مثل هذي حقيره وماديه!
بحياتها محبتني .. لزكت بيه لان كانت تعرف اني ابن عز وعندي فلوس .. بس لما قاطعت اهلي ودرت انو كلشي مراح اتحصل باعتني !
الحمدلله انو انكشفت قبل لا اتزوجها .. بس الي موتني خيانة صديقي !
بعد الي صار حالتي النفسيه اتدمرت .. بين قوسين اتعقدت .. وكرهت شي اسمه انثى  ، اتصوري حتى كلام مااحجي ويا اي بنت ... الى ان اجيتي انتي .. انتي الي گلبتي كل الموازين!
مااكلج احبج ولا اكذب عليج .. بس شي بداخلي تجاهج مااعرفه .. وروحه لابويه مدااكذب عليج ، اني نادم ع الي صار و نادم انو سببتلج كل هذا الاذى .. بس صدكيني مو بيدي .. كل الوجوه الي اشوفها هي!!
هي تصير كدامي بكل موقف يصير .. حتى من اتقربتلج شفتج هي .. كرهتج وكرهت روحي!
فكرة انو المسها واتقرب منها تثير اشمئزازي!

داليا .. كان يحجي والعبره خانكته .. عيونه مليانه ظلام .. غضب .. كره .. و ألم!!
للحظه حسيت انو هو الي مظلوم مو اني .. الحسره الي تطلع من صدره وجعتني الي .. كنت اريد احظنه واكوله اني هنا .. اني حعوضك عن كل الي سوته بيك ..اني مو هي ولا راح افكر بيوم اجرحك ولو بكلمه ..  بس خوفي من ردة فعله هي الي منعتني .. بعد الكسره الي كسرنياها مااعرف شنو ممكن يسوي بعد!
بلا ميطلب مني العفو .. وبلا ميعتذر ع الي سوا گلبي الغبي سامحه .. اكو اغبى من هيج ؟!!
كان لازم ارد عليه اريد افهم شنو الي حيصير بعد متطلكنا؟!!
بصوت مبحوح والعبره بصدري ..

_واني شنو ذنبي ادفع ثمن غيري؟!!

اسيد .. اففففف .. واخيراً حجت .. ما الج اي ذنب وكلتلج الي تردي اسوي الج.

داليا .. وبرأيك هو هذا الي اريده؟!!
تكسرني وتشمرني وتجي تسألني شنو اريد حتى تسوي؟!!

اسيد .. انتي زوجتي واني مسويت شي غلط ولا ندمان عليه .

داليا .. قصدك طليقتك!

اسيد .. لا زوجتي مو طليقتي .. الطلاق بالاكراه والغصب ميصير .. لازم اكون بكامل هدوئي ورضاي حتى اطلكج هذي اولاً
ثانياً .. لازم ارمي عليج يمين الطلاق 3 مرات وبكل مره اكول 3 مرات انتي طالق يلا يبطل الزواج يا ذكيه!

داليا .. شقصدك؟!!

اسيد .. قصدي انتي بعدج مرتي !

داليا .. مو فرحانه .. لااااا طايره من الفرح .. بعده مُلكي وبعدني مرته!!
يا ربييييييي اول مره احس الحياة ابتسمتلي .. بعد كل الي عرفته والي كاله اكيد يحس بشي تجاهي والا ما كان كعد يبرر ويشرح صارله سنه!
واذا عنده مشاعر تجاهي معناها حيحبني!!
مدااصدك .. يعني هسه اني مو مطلقه .. بعدني ع ذمته!!
ماادري شسوي .. والرب اني مخبله قبل ساعه كنت داتموت بسببه حتى يطلكنني .. وهسه فرحانه لانو بعده زوجي!!
اوووووف من گلبي الي شايلته .. بس لازم ما ابينله اني سهله ويلعب بيه مثل ميريد .
بصوت جامد ..

داليا .. وشنو تنتظر لعد .. طلكني.

اسيد .. بعد كل الي كلته..  هذا اخر رد عندج؟!

داليا .. اني وانت نعرف انك محتنساها .. لويش اتحمل اكثر واتعذبني وياك بلا نتيجه !

اسيد .. منو كال بلا نتيجه .. اني من شفتج اتغيرت هواي اشياء بيه .. ومتأكد انتي تكدرين تغيريني.

داليا .. اني مو دكتور نفسي.

اسيد .. بعصبيه .. ضبي اللسانج اني مو مخبل .. ولا شفتيني حجيتلج مشكلتي وسبب الي صار كمتي اتطولين لسانج.

داليا .. بسم الله وجعت حميده لعادتها القديمه .. بس اني صح زودتها .. هذا اسيد متغير شي حتى لو حجالي قصته .. مو معناها اتغير خلص وصار حباب وكيوت!
_مو قصدي .. بس الي سويته بيه مو قليل .. ومااتحمل يصير مره ثانيه .

اسيد .. مراح يتكرر وعد ولا راح اتقربلج بعد.

داليا .. شنووو .. قصدييي .. شنو الي يضمن؟!

اسيد .. كلامي ضمان وجربيني.

داليا .. اوك بس بشرط.

اسيد .. محد يملي عليه شروط كولي طلب واذا عجبني ماشي.

داليا .. اريد اكمل دراستي.

اسيد .. ليش انتي يا صف؟!!

داليا .. سادس احيائي.

اسيد .. امممم مكنت متوقع ..

داليا .. يعني موافق.

اسيد .. افكر بالموضوع .. وهسه يلا اكلي فضيني.

داليا .. ماكو تفكر اني وافقت ابقى هنا واتحمل كل خبالاتك .. قصدي عصبيتك .. بالمقابل سويلي الشي الوحيد الي طلبته منك.

اسيد .. كلتلج افكر .. يلا اكلي.

داليا .. شنو اكل متشوف الاكل صار ثلج !!

اسيد .. امشي ننزل جوه احمي واكلي هناك .

داليا .. اوك .. بعدت الغطا عني ودااكوم .. جان اشوف ملابسي كولها امزكه !!
رجعت لمكاني وسحبت الغطا بس بأديه مو بالكف لانو كان ملفوفات ويأذوني حيل !

اسيد .. هاا ليش رجعتي؟!

داليا .. ها .. مـ..و ..مـوو ..

اسيد .. احجي خلصيني شكو؟!

داليا .. ملابـ.. ملابـسـ..ـي .. ما .. ما اكدر!

اسيد .. محجيت وياها شي لان اعرف شتقصد .. رحت للكنتور طلعت منه ثوب عدل لونه بنفسجي طوخ كان عادي وبي فراشه بظهره كبيره .. منتبهت عليه الا لما لبسته مخصر على جسمها يموت طلع عليها..
قبل لتلبسه جبته خليته يمها ع السرير .. البسي!

داليا .. باوعت لاديه ملفوفه والوجع الي بيهم فضيع مااكدر حتى احركهم .. بقيت صافنه ع الملابس ومااتحرك.

اسيد .. متلبسين تفضيني .. شكوو دتصفنين؟!

داليا .. انت شبيك بس تصيح متكولي .. مداانشوف اديه اشون مجرحه وملفوفه اشون البس فهمني؟!

اسيد .. اووووف .. نسيت اسف .. هسه شنو البسج اني؟!

داليا .. لاا .. لتتقربلي انت اصلاً .. صيح ام سعد هي تساعدني!

اسيد .. هه ليش ام سعد ترى ماكو شي مشايفه اني لو نسيتي؟!!

داليا .. وجهي احسه حينفجر من الحراره .. كان يباوع عليه بنظرات افهم شنو معناها ويبتسم ابتسامه خبيثه.

داليا .. رجاءاً .. روح صيح ام سعد!

اسيد .. مااصيحها ام سعد ولا تشوفج بهالوضع لانو حتفكر اني الي مسوي بيج هشكل .. متدري بعقلج الغبي وحركات المزعطه الي تسويها.

داليا .. اولاً اني مو زعطوطه عمري حيصير 20 سنه وثانياً .. كل الي صار بسببك لو تحب اذكرك.

اسيد .. اخر مره اكول.. ضبي لسانج لا اشوفج الخبال الحقيقي بس هالمره نكمل للاخير.

داليا .. لاااا يا ربي هذا ولا يستحي .. دخلت وجهي جوه الغطى مااريده يشوفني اشون خجلت .. الافكار الي اجت بعقلي من كلامه تفشل .. الحمدلله محد يسمع بشنو نفكر .. والا كان انفضحنا .. من ورا الغطى حاجيته .. روح منااااا اريد انام !!

اسيد .. اتقربت منها شلتها هي والغطا ونزلت بيها ليجوه .. وهي خبصتني خبص بس تصيح نزلني .. نزلني !!
الي يشوفها هسه ميكول الصنم الي كان جامد قبل اشويه!
وهي ملفوفه بالغطى خليتها ع التخم ورحت حميت الاكل وجبته .. كعدت كدامها .. اوكلها لانو اديها متكدر تاكل بيهم .. بقيت اوكل بيها وامسح الاكل من حلكها .. وهي تصير حمرا دم من الخجل!
خلص  الاكل وخلصت روحي ويا .. منظرها مثل الطفله وشكلها مره كلها انوثه دوختني واني الدنيا مدوختني اصلاً!
كملت الاكل .. كالت

داليا .. اريد ابدل بعد مااتحمل ملابسي كولهم دم (صح هو نظفها بس الريحه ) وعرك واكل .. روح صيح ام سعد الله يخليك!

اسيد .. كلتلج ماكو ام سعد يأما اني ابدلج او تبقين هشكل لحد ما تطيب ايدج!

داليا .. من كل عقلك ؟!!

اني دقيقه مااتحمل بعد اشون تريد انتظر لحد متطيب ايدي!

اسيد .. بكيفج انتي قرري!!

داليا .. ياربي اشووون اخلي يتقرب من بعد؟!!

واشون ابقى هشكل مااكدر؟!!
بقيت متحمله يوم كامل مسبحت ولا بدلت ملابسي .. بالليل صعدني لغرفتي نمت .. واني من يتقرب مني افشل من منظري وريحتي .. اكيد مطيبه صارت !
عافني بالغرفه ونزل .. اني كمت ع كيف للحمام .. فتحت المي بأديه بالكوه الالم موتني .. حتى دم كامت تجري بس اكو شفت بالحمام (قفازات مالت عمليات طبيه) لبستهم حتى ميعبر الدم من ايدي .. سبحت ع السريع غسلت كل جسمي وشعري .. طبعاً حاولت مااستخدم الكف .. سديت اديه حيل صارو مثل الي ديضرب بوكس وسبحت .. جرح رگبتي متقربت يمه بس هم دخله مي .. !
كملت بسرعه لفي عليه المشفنه وطلعت .. الالم موتني .. وايدي تنزف قوي .. مااكدر اسكت اكثر .. فتحت الباب ونزلت رحت لغرفته لكيته نايم .. فتحت الضوه هو كعد .. شافني واكفه كدامه وبالمنشفه .. اتخيلوا الموقف!!!!!!!

للحكايه بقيه❤️
البارت كولش طويل ولو الاحداث مو سريعه بس هواي امور انكشفت .. مكدرت اكمل لانو صايمه واكو مواضيع حساسه خلوها بعد الفطور 😅
رأيكم بالاحداث وتوقعاتكم للبارت القادم ... لتنسوووووون التصووووووويت 😘