رواية في ارض الغرام انت دولتي الفصل الرابع والعشرون 24 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم(ذمه)

داليا .. بحياتي كولها متوقعت حيجي يوم ويتقربلي ابداً .. هذا الي حتى شوفتي تزعجه يبوسني مره وحده!!
مااكدر اوصف الشعور الي اعتراني شعور غريب .. حلو ومخيف .. اتمنيت ميخلص ومردت احسه ولا يصير بينا اصلاً!
احساس متناقض .. بلحظه وحده لكيت نفسي كولهاخضعله!!
مو بس گلبي الي خاني كل ذره بجسمي وبروحي صارت ملك اله بهذيج اللحظه!
الوحيد الي بقى يقاوم كل هذا الشعور والاحساس هو عقلي ... اصوات براسي تكولي ابعدي عنج لتضعفين .. لتنسين هذا منوو وانتي شنوو!
لتخسرين نفسج .. لتسلمين روحج!
حتندمين .. حتندمين .. حتنكسرين!!!!!
اتمنيت جسمي وگلبي ينصاعون لعقلي ويبعدو عني .. بس الظاهر حكم گلبي كان اقوى من كولشي!
بين كل هذي المشاعر والافكار والاصوات المتناقضه .. انهارت كل دفاعاتي وستسلمت لعواطفي!!
حضني !!
اخذني وصعد للغرفه مالتي .. محجيت اي شي ولا حتى نطقت بحرف كنت مثل المسحوره تحت لعنه اسمها اسيد!
فجأه لكيت نفسي بغرفتي ع السرير و هو محاوطني!!
بهذيج اللحظه كنت اسعد مخلوقه بالدنيا لاني ومن غبائي فكرت انو هذا حب .. خلص واخيراً حس بيه وبدا يبادلني نفس الشعور .. واخيراً حيصير هذا الزواج حقيقي!
كنت مستعده اخسر كولشي في سبيل اثبتله حبي .. ويعرف اشكد اني مجنونه بي..!
كنت غبيه لدرجه معترضت على كل الي ديسوي .. موگفته لما بدت لمساته تاخذ منحى ما بي رجعه وميفيد بعده اي كلام!
سكتت وخليته يسوي الي يريده .. صح كنت خايفه وكل ذره بجسمي ترتعد الغرفه كانت  هدوووووء لدرجه اسمع صوت الدم الي يمشي بشرايينه .. انفاسه وصوته الي  مثل زئير الاسد .. كل شي بعقلي كان يصرخ بيه حتى اشرد وابعده عني بس جسمي الغبي صار كأنه عجينه و يحركها مثل ميريد .. گلبي حسيته حيوگف خلص .. استسلمت للي صار ودموعي نزلت لحالها .. كنت اقنع نفسي انو اني بالاول والاخير زوجته وهذا الشي من حقه ولازم يصير!!
رغم هذا شي بداخلي كان متأكد انو الي ديصير غلط ولازم انهي قبل لا اندم ..!
بس كولشي كان خارج ارادتي .. گلبي الي اتحكم بيه  !
حسيت اني ويا صرنا واحد .. كان هادئ ويتصرف بكل رقه ولطف ع بالك حبيب  ديتعامل ويا حبيبته .. مثل الي خايف على شي رقيق لينكسر ومحاوطه بحذر!
مااعرف اشكد مر من الوقت واشوكت حينتهي هذا الحلم .. بس كل ذره بيه كانت ترحف مردت اصحى ع الواقع وانصدم لو اندم .. لان جزء مني كان متأكد هذا الي كدامي مو اسيد الحقيقي ، هذا النسخه الهادئه منه!
واول ميصحى من نزوته هذي حيرجع الوحش الي اعرفه والله وحده يعرف شنو الي حيصير!
اكيد اغلبكم حييسألني اذا كنتي تعرفين هذي نزوه مو حقيقه ، وهذا مو اسيد .. لويش استمريتي للاخير وما منعتي الي صار؟!!
مراح اجاوبكم لانو اني نفسي مااعرف لويش استسلمت .. لويش منهيت كولشي قبل لا نوصل لهذي النهايه!!
كنت خاضعه له تماماً هو الي كان يتحكم بيه .. يمكن غباء مني ، او اني جبانه واستسلمت بسهوله ..!
بس الشي الوحيد الي اعرفه انو الي صار مو بكيفي غصباً عني وبنفس الوقت برضاتي!
واني وسط احلامي وقبل لينتهي كولشي .. حسيته ابتعد عني بقوه وكأنه كان نايم وصحى!!
كام من يمي ونظراته الي كولها اشمئزاز واحتقار .. اخذ ملابسه وطلع من الغرفه بسرعه!!!!!!!!!!!!!!!!!!!!!!!
مااحجيلكم شنو الشعور الي دااحسه ولا  راح اكدر اوصفه .. بس ابسط شي ممكن يقربلكم الصوره انو حسيت نفسي قذره حالي حال بنات الشارع الي لما تخلص حاجتهم منها يشمروها .. بس الفرق هنا انو انتهت قبل لتصير!
طلع وعافني مثل الحثاله الي قرفان منها .. حتى ما التفت عليه وشافني قبل ليروح!!
متحركت من مكاني ولا حتى مديت ايدي وغطيت نفسي  .. بقيت على نفس نومتي الغرفه هدوء والجو احسه صار ثلج .. ظليت صافنه اباوع ع السقف ودموعي تصب.. تجري مثل الشلال بس موسم الربيع لما يذوب الثلج ويصير يجري بقوه!
ابجي وارجف .. وشي محشور بحنجرتي ميقبل لا ينبلع ولا يطلع ويخلصني .. شي ديخنكني ومااكدر احرك ساكن .. بالعاده لما يصير بيه شي يجرحني او يقهرني يمر شريط حياتي كوله كدام عيني .. من طفووولتي........الى اللحظه الي اني بيها .. وابقى اندب حظي وابجي !!
بس هالمره متذكرت من حياتي شي ... لا ابويه وهو معلك بالحبل .. لا اختي وموتتها .. ولا حتى امي وحقارتها .. مفكرت غير بالاحساس الي اعتراني .. عار مغطيني من راسي لرجليه !!
وكأنو عقلي دينتقم مني ع الي صار .. ديتشفى بيه لان مستمعتله من نصحني ابعده عني!

كنت اريد بس انام كل ذره بگلبي تتوسل عقلي انو يتركني اغمض عيوني وانام .. انام بلكي مااكعد بعد !
بس هيهات عيني تغمض وهذي الافكار تدور ابالي ..  وهذا الاحساس الي بداخلي ديحرگ روحي حرك!!
مااعرف اشكد صارلي نايمه بمكاني ..  ولا اعرف هو وين راح اصلاً .. بس اتذكرته معدتي گلبت .. مااريد يمر ع بالي ولا اريد اشوفه .. بس اشون مااشوفه واني عايشه ويا؟!!
واشون الي وجه ابقى هنا .. شنو اسوي اذا شفته .. اشون اخلي عيني بعينه واحجي ويا بعد!!
بس المحه حتذكر كل الي صار .. ومااكدر مااكدر اشوفه الموت عليه هون .. لا لا .. ما لازم ابقى هنا بعد .
لازم اعوف كولشي وانهزم بدون ميعرف .. لان اذا شافني مراح يخليني اروح!
اييي لازم اعوفه لازم .. مستحيل ابقى ويا بعد حتى لو اعرف اطلع گلبي من صدري ولا اضعف .
بس وين اروح؟!!!
وين اندل اطلع منا اصلاً ؟!!
اشون و وين اعيش؟!!
مو هو هذا الحب الي ردتي .. مو هو هذا الي كنتي عازمه ومصره تخلي يحبج؟!
مو هو هذا فارس احلامج الي عشگتي من أول نظره و وكعتي بغرامه .. اتحملي النتائج.....!
كل هذي الافكار اتدور ابالي .. واني مثل الجثه الهامده مااحرك ساكن صحيح ظاهري كان هادئ بس البركان الي بداخلي والنار الي دتحركني محد يكدر يشوفها ولا يحس بيها.
مبقتلي طاقه حتى ارفع راسي من المخده ، مو من التعب ولا جسمي متأذي .. بس روحي احسها مكسوره متسندني حتى اوكف.. دموعي الي دتنزل تأذيني ، مع ذلك لازم اتحرك ، لازم اطلع منا ما ابقى بعد لو على جثتي بس بالاول لازم استجمع نفسي.
بكل ما عندي من قوه سحبت نفسي وكمت جريت الغطى لفيته عليه وبوجهي للحمام .. اول مدخلت الحمام المرايه صارت بوجهي .. وكفت كدامها بملامح الموتى .. وجهي شاحب ورگبتي مليانه اثار زرگه وحمرا .. شعري منفوش .. ملابسي امزكه!!
بقيت صافنه اباوع كدامي فجأه عيوني انصدمت متتحرك من الي شفته .. وگلبي انمرد لدرجه وجعت كل ذره بروحي .. كنت متجمده و دموعي هي الوحيده الي تتحرك .. تجري على خدودي عشره عشره .. تعرفون منو شفت بالمرايه ؟!!!!
شفت امي واكفه كدامي وتضحك ... تضحك بقوه وتتفحصني بسخريه .. حسيتها فرحانه لانها دتشوفني بهالمنطر!!
هي كانت تضحك واني كنت امووت .. بلا شعور وبلا احساس مديت ايدي ع المرايه بقوه وكسرتها بأديه .. بقيت اضرب بيها .. اضرب بيها بكل قوتي لحد ما اختفت الصوره من كدامي صوت ضحكاتها اختفى .. انتبهت على نفسي شفت اديه تنزف دم كنت مجروحه اكثر من جرح .. والدم مغطي كل المكان .. بس محسيت بوجع ابد ولا اهتميت للدم ولا خفت ، لانو الجرح الي بداخلي كان ألمه اكبر !
فجأه سمعت باب الحمام انفتح .. التفتت بهدوء .. شفته واكف كدامي بكل برود ولا كأنو صاير شي .. غير ان نظرة الظلام بعيونه ترعب .. ملامحه كانت مخيفه بشكل مينوصف  وعيونه بحر من الظلام والغضب .. لما شاف ايدي والدم حسيت ملامحه ارتخت !!
وحاول يتقربلي هه الظاهر خاف عليه .. اني من شفته بده يتقرب مني ابتعدت عنه لانو اصلاً وجودي ويا بمكان واحد ديذبحني دااحس بالقرف نفسي لعبت .. مو انوب يلزمني!!
اموت غير ولني اعرف نفسي بأول لمسه راح انهار .. اعرف گلبي مو ثقه ولا كفو اتركه يلمسني .. رجعت ليوره وبصوت حاد وضعيف بالكوه طلعته ...

_اطلع منا.

اسيد .. لما شفتها بالمطبخ لابسه ملابس النوم وشكلها مينوصف .. جمال وحسن مشايفته عيني .. يمكن هي هذي الحوريات الي يحجون عنها بالجنه .. شعرها محلول على طوله ، واصل لنهاية ضهرها ولابسه شورت وسترابلس يظهر اكثر ميغطي!
واني اصلاً صورتها وهي بالفستان بعقدنا ما طلعت من راسي .. مكدرت اتحمل اكثر .. بدون اي تفكير اتقربت منها وبستها .... بعدها خرج الموضوع عن سيطرتي .. اتوقعتها تبعدني عنها .. متخليني المسها .. بس ردة فعلها المستسلمه خلتني اتمادى اكثر!!
طبعاً هي متجاوبت وياي نهائياً بس ممنعتني!!
استمر الي بينا وهي كانت مستسلمه الي تماماً كنت اني الي اتحكم بيها وبسهوله .. كلتلكم اني اعرف انو الي تأثير عليها كولش قوي بس متوقعت لهدرجه!
المهم ..
اخذتها وطلعت بيها للغرفه لانو الي ديصير مو مال نوكف بـ باب المطبخ .. رحنا لغرفتها .. خليتها ع السرير وبديت عادي كأي علاقه تصير بين زوج وزوجته .. بس بالنسبه الي مكانت هذي علاقه وانما كانت خارج ارادتي يمكن ضعفت لنزواتي من شفتها بهذاك المنظر .. حسيت نفسي تحت تأثير سحرها الي ياخذ عقل اكبر واحد!
كنت مثل الي متخدر وميدري شديصير او شديسوي .. بقينا ع هذا الوضع مده اني مفتون بيها وهي مستسلمه .. لكيت نفسي بلا وعي واتقربلها .. حسيت بشعور غريب ... شعور ممجربه طول حياتي .. اني حالياً عمري 32 سنه الي مثلي يكونون عدهم كوووومه تجارب من هذا النوع سواء جسديه او عاطفيه وهذا الشي يكون طبيعي عدهم .. بس اني لاا الي صارلي بالماضي خلاني ابتعد تماماً عن اي علاقه ومن اي نوع .. لذلك تجربه هذا الشعور اخذتني لعالم ثاني .. والي دوخني واخذ عقلي اكثر كان هي!
استسلامها بين اديه و هدوئها .. كانت مثل شي رقيق .. مااعرف اشلون اتعامل وياها اصلاً .. سحرتني بجمالها بنعومتها بأنوثتها الطاغيه .. مخلت ذرة عقل براسي .. لدرجه وصل الي بينا انو اخذتها خلص .. صارت مرتي فعلاً بس............!
شي بخضم العلاقه فززني .. مااعرف شصارلي حسيت نفسي داارتكب جريمه .. شعور غريب اعتراني دمر كل الاحساس الي كنت عايشه .. وشفت صورتها .... اي هي .... علياء!!
كانت هي الي بمكانها نايمه .. وكانت تباوعلي بتحدي وتضحك .. تضحك بستهزاء .. فقدت عقلي بلحظتها ردت اقتلها .. اخنكها .. اموتها .. بس شي بداخلي منعني اتهور سحبت نفسي منها وطلعت بسرعه حتى مباوعت عليها لان وجه علياء كان كدامي .. كنت قرفان من نفسي ومنها .. اشلون اتماديت لهدرجه .. اشلون اتقرب من جنس حواء مره ثانيه!!
طلعت ركض للحديقه حسيت نفسي مخنوك انفاسه مگطوعه ودااموت .. ردت بس الهوا يدخل الصدري .. بس اتنفس .. جسمي يرجف غضب .. اشلون سويت هيج شي ... الماضي كله مر كدامي .. علياء ، احمد .. منطرهم سوه .. خيانتهم الي .. كره .. كره .. كره .. هالشعور سيطر عليه لدرجه فقدت اعصابي !
بقيت ادخن جكاير وحده وره الخ والتفكير اكل عقلي .. راسي احسه دينفجر ، ونار بداخلي شابه حاركتني حرك .. شنو الي راح يصير بعد الي صار؟!!
شنو راح تعتقد هذي .. واشلون اصلح الغلط واني اخذتها؟!!
بعد ميفيد اتركها مااكدر لان البنيه انكسرت .. ولا اكدر اكمل وياها لان مستحيل اثق بيهن ابد.
زين شسوي هسه .. اشلون اتصرف .. اني اسيد الي عمري مرتكبت غلطه وحده بحياتي صح اتأذيت هواي بس عمري ما ضريت احد حتى من انخانيت منتقمت .. درت وجهي ومشيت .. اجه اليوم الي ارتكبت بي اعظم غلطه!
غلطه متتصلح ولا اكدر الكالها حل .. شسووووووووي .. اشلووووون اتصرف؟!!
مر الوقت واني بالحديقه كاعد افكر .. صارت الظهر الجو صار حار ودخت من التفكير .. دخلت للبيت جان اسمع صوت تكسير قوي من فوك!!

گلبي رجف اكيد سوت بنفسها شي .. الي صار صعب تتحمله اي بنيه صح اني مغصبتها وهي كانت راضيه بس الي سويته مو سهل ولا بسيط!!

صعدت بسرعه لغرفتها دخلت لكيتها فارغه .. ركضت للحمام فتحت الباب لكيتها واكفه كدام المرايه .. او بقايه المرايه .. وجها كان شاحب وعيونها مورمه .. واضح كانت تبجي حالتها كلش متبهذله .. شكلها حيل صعب منظرها بهذي الحاله عصر گلبي عصر .. لاول مره احس بالذنب تجاه بنيه!!
والاعضم من هذا كله اديها كانت تنزف !!
الدم تارس المغسله والكاع ..  كان ينگط من ايدها بكميه كبيره وهي ولا كأنو  صاير شي .. معقوله مداتتأذه؟!!
بهدوء اتقربت منها ردت اشوف ايدها اشبيها ، ابتعدت عني وبصوت جامد كالتلي اطلع!!

_خلي اشوف ايدج!

داليا .. بصوت حاد ومخنوك بنفس الوقت .. لتتقربلي.

اسيد .. ماشي مااتقربلج بس خلي اشوف ايدج اشبيها .. ومشيت بتجاها ..

داليا .. بصوت عالي كلتلك لتتقرب مني .. واطلع منا مااريد اشوف وجهك.

اسيد .. حاولت اسيطر على اعصابي لان منظرها دمرني وشكلها وهي تحجي والعبره خانكتها اذاني حيل ، ردت ابينلها انو اني ممهتم حتى لتفكر ضعفت كدامها .. بصوت جاد وبنبرة تحذير .. لتطولين اللسانج ولتختبرين صبري .. خليني اشوف ايديج لتموتين وابتلي بيج.

داليا .. درت وجهي عنه وضحكت بهستيريه .. كنت اضحك ودموعي تجري .. گلبي كان يتكطع من كلامه ، كل الي سوا بيه وكل هذي الحاله الي وصلني الها .. كل الذل والعار الي خلاني احسه وبكل برود يكولي لتموتين وابتلي بيج؟!!!!
ههههههههه يعني هو اصلاً ميهمه اذا متت او لا كل همه ليبتلي بموتي!!

فقدت كل ذرة عقل عندي وبلا اي تفكير مديت ايدي اخذت من المغسله قطعه كزاز من المرايه الي انكسرت خليتها على رگبتي بسرعه وانداريت عليه .. اديه كانت تنزف و ترجف مااعرف من ألم الجروح الي بيها لو من الالم الي دااحسه بگلبي .. كل ذره بيه كانت ترجف بس ثبتت نظري عليه  وبصوت حاد .. اتحرك خطوه ثانيه وحشوفك الموت من صدوك.

اسيد .. گلبي ما احس بنبضه بعد .. .. رجفه صارت بكل جسمي خلتني ارتعش بس مو خوف من تهديدها لا كنت ارجف من الغضب .. اشلون اتفكر تأذي نفسها بس حتى ما  اتقربلها .. كانت تفضل الموت على ان اللمسها !!
شعور حقير بالغضب والخوف بنفس الوقت اتملكني ، گلبي كان يدك بكل قوته يريد يطلع من صدري !!
وهي واكفه كدامي بملامح جامده وكان واضح عليها جاده ومدااتمزح .. مشفت ولا ذرة خوف بعيونها .. معقوله الموت ميخوفها .. كل الي بعيونها كان تحدي وغضب .. غضب وكره اول مره المحه بعيونها .. كنت كلما اباوعلها مااشوف غير الاستسلام والخضوع .. مااعرف شنو سببه بس احسها تضعف لما اتقربلها او حتى اباوع عليها .. اما الان ماكو بنظراتها غير الحقد ، الغضب  والكره!!
حاولت اسايرها حتى متتهور لانها فعلاً كانت حتأذي نفسها .. كانت تضغط ع رگبتها بقوه ..!
ابتعدت عنها وبصوت هادئ ..

_ داليا اهدي وابعدي الكزازه عنج .. خلص مراح اتقربلج.

داليا .. هه لويش ابعدها خايف عليه؟!!
لتخاف الي سويته بيه اذاني اكثر من أذية هذا الجرح.

اسيد .. داليا لتخبليني كلتلج اتركيها .. صدكيني حتندمين بعدين.

داليا .. اندم؟!!!
ههههههههوانت شتعرف عن الندم؟!!
انت متعرف شنو الندم .. متعرف شي عن الوجع .. ولا بحياتك راح تعرف .. لانك اصلاً منزوع الاحساس فمراح تعيش هيج شعور.

اسيد .. بنفاذ صبر .. كلتلج بعديها بعدييييييها.

داليا .. بصوت عالي ومن بين دموعها .. خلص اني اكتفيت .. اكتفيت منكم و من هذي الحياة كولها .. كافي مااريد اعيش بعد .. ولتفكر راح اموت لان اني حزينه ومكسوره وما الي احد لاااااا .. اني حموت لان مااتحمل اشوف وجهك بعد .

اسيد .. بجفون حمره وگلب يحترك وكأنه ديصارع حتى تبقى روحه بداخله .. ماشي مراح تشوفيني بعد صدكيني والي تردي يصير بس ابعدي هذي عنج وخلي نتفاهم.

داليا .. طلكني.

اسيد .. اللهم العن الشيطان .. داليا اترجااااااج اتركيها لتسوين بيه هيج .. لج كاااافي ابعديها .. ابعديها والي تردي يصير صدكيني.

داليا .. طلكني كلتلك.

اسيد ... ماشي .. ماشي .. اطلكج بس ابعديها عنج.

داليا .. ضغطت ع الكزازه حيل لحد ما سال الدم من رگبتي ...

اسيد .. من شفت الدم سال منها ماادري شصار بگلبي يمكن انفجر .. او طلع من صدري خلص لان ما عاد احس بي .. بلا اي تفكير وبدون وعي طلع مني الكلام .....

_انتي طالق.

مرحبا حبايبي ..
اسفه ع التأخير بس كنت مقرره اوقفها للقصه لحد ميخلص رمضان لكن بسبب طلب الاغلبيه انو اكملها خلص حكملها لخاطركم .. بس عندي طلب بسيط يمكم رجاااااااااااءاً لحد يلح ويضغط عليه .. البارت حكتبه لما يصير عندي فراغ واول ميكمل انشره مااعرف اشكد حيطول فلتطلبون مني وقت محدد الى ان يخلص رمضان ع الاقل .. و بدوووون ملحه وكلام يغث لانو هووووووااااااااي داانزعج من هالحاله .

وهسه اريد رأيكم بالاحداث وتوقعاتكم للبارت القادم 🤗
لتنسووووووووون التصويت ❤️