رواية في ارض الغرام انت دولتي الفصل الثالث 3 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

‎!!اسيد .. بصوت جامد وغاضب ، انتي منوووو وشجابج لهنا؟

‎داليا .. بصوت يرجف وخوف ، عفيه لترمي واني اكولك كولشي والرب بس لتموتني

‎أسيد .. سمعت صوتها يرجف و واضح عليها الخوف ، ما همني خوفها بك ما زعجني صوتها اشكد اتخبل من صوت النسوان ، طبعاً المسافه الي تفصل بيني وبينها تقريباً متر او متر ونص ، لانو الكرفان مو كبير ، يا دوب ماخذ الاسره ودوالايب الملابس!
بقيت المسدس واللايت موجهات عليها وبهدوء مشيت فتحت الضوه !!
‎اول ما انفتح الضوه هي نزت .. باوعت عليها ناعمه والشعر اسود مغطي كل ضهرها بس دايره وجها ع الباب ومخليه ايديناتها على الباب ماخذه وضع الي ديسلم نفسه!!
‎هذي شكلها ارهابيه كفشتها وهي وتعرف اشون تاخذ وضع الاستسلام ، اكيد ارهابيه!!
‎.. بقيت موجه السلاح عليها وبصوت حاد كلتلها

‎ايديج بقيهم مرفوعه واندراي عليه ، وخلي ابالج حركه وحده منج افرغ المسدس براسج

‎داليا .. گلبي يرجف بقوه دااحس نفسي حموت من الخوف وهذا يكولي افرغ المسدس براسج!!
‎هي هذي الناقصه ع اساس الي بيه قليل وديرعبني بالاكثر ، سمعت كلامه ونفذت بالحرف .. انداريت عليه بهدوء بس راسي مدنكته وجسمي كوله يرجف!

‎اسيد .. اندارت بس هم مشفتها بعدني لان منزله راسها والشعر مغطيها اتكول وصله مال قماش سوده ومغطيتها مو شعر !
‎كلتلها
‎انتي منووو ، شجابج لهنا ، واشلون دخلتي للمعسكر ، ومنو وياج بعد؟_
‎احجيلي بالتفصيل وديري بالج تكذبين لان كذبه وحده تنهي حياتج.

‎داليا .. بقيت محافظه على هدوئي بس احس رجليه دتطكطك من الخوف ، وكلبي حينفجر من الرعبه .. بصوت جامد واني مدنكه كولتله ..

‎.. محد وياي اني لحالـ_

‎!!بعدني ممكمله قاطعني

اسيد .. لما أسألج ترفعين راسج وتجاوبين ، ومااعيد الكلام.

داليا .. صوته يخلي گلبي يرجف من الخوف ونبرة التهديد الي بيها تدل على انو هذا الشخص غير قابل للنقاش .. فبلا اي كلام رفعت راسي ودااريد اجاوبه بس الي شفته خلاني انخرس ماانطق ولا حرف!!

اوووووووو ما اكدر اوصفلكم الي شفته!!!!

نسيت اني منو ، حتى  المصيبه الي اني بيها نسيتها من شفته .. من هسه اكوللكم خلص لكيت فارس احلامي.
رفعت راسي شفت واحد طويل لابس بس فانيله داخليه وبيجامه ، الظاهر كان نايم المسكين واني رعبته!!
جسمه يجنن مو معضل ونشاز لاااا فد شي نازك ، شعره اسود وبي خصلات شيب يااااااااا ربي ما اكدر اتنفس من الوسامه الي شايلها..!
عوفو هذا كوله وركزولي على عيونه يا ربي  يا عيونه ..... شايفين لون الكره الارضيه من الفضاء!!
هيج لون عيونه يسحر يسحرررررر !
رصاصي ماادري ازرق ماادري اخضر .. لون عجيب غريب ملامح وجهه حاده !
بس عيونه بيها شي غريب احسه مثل القرفان مني او ميتحمل يشوفني اصلا!!
بعد ما شفته انصدمت محجيت اي كلمه بقيت بس صافنه بهذا الكائن الي كدامي .. رحت لغير عالم.
طبعاً اني وصديقتي سلمى دائماً نتعارك هي من تشوف داني  تذوب الغبيه ، كانت تحبه لدرجه الغباء بحيث لما تشوفه متعرف اشون تتصرف ، داني شخص كولش حلوو ومثقف هو سنه ثانيه كليه وياها ، بس اني بعدني بالاعداديه!
المهم اني بس ابقى اضحك عليها ، هي  دائماً اتكولي راح يجي يوم تشوفين واحد يخليج  تحسين نفس هذا شعوري ،  كنت اضحك على عقلها منولد الي يجذب انتباهي اصلاً!
بس من شفت هذا المخلوق من صدوك عذرت سلمى يمكن متصدكوني بس والرب وگعت بحبه من أول نظره!!
اول ما اجت عيني بعينه قررت هذا الشخص ميصير غير الي.

الحاصل ...
واني صافنه بي وسرحانه فززني صوته الي يرعب ع بالك صوت اسد ديزئر!

اسيد .. لج انتي غبيه لو تتغابين؟!
سألتج سؤال جاوبي لا اخلي طلقه براسج وانهيج هسه.

داليا .. فجأه الرجفه رجعت الجسمي من سمعت صوته ، من صدوك شكله وهو يحجي ع بالك وحش يريد ينقض على فريسته !
مااعرف شنو هالكره هذا الي بعيونه ، لو ما أول مره اشوفه كلت عنده ثار وياي لو قاتله واحد من اهله!
لان نظرات الكره والاحتقار بعيونه مو طبيعيه .. !
المهم گلت خلي اجاوبه واخلص روحي منه لان شكله ناوي يموتني مو شقه.
بلعت ريگي وبصوت يرجف كلتله ..

_انـ .. انـ..ـي .. اجيــ .. ت .. اجيت لهنااا .. حتــ .. حتى اشوف اخويه.
و .. ووو .. و مح .. محد .. محد اجه ويـا .. ويـاي .

أسيد .. و اخوج شنو يسوي هنا ؟!

داليا .. اليوم .. اتصو.. ب ، و وو .. و جابوه لهنا.

اسيد .. وانتي شنو ما عندج اهل؟!
اشلون يخلوج تطلعين بهالليل هذا وحدج؟!
ماكو غيرج يجي يسأل عليه؟!
واشلون دخلتي للمعسكر اصلاً؟!!

داليا .. من كال ما عندج اهل .. حسيت غصه صارت بحنجرتي !!
وگلبي انغز ... اهلي ... هههه ... اها لو تدري بأهلي.
ردت اجاوبه بس مكدرت العبره خنكتني.

اسيد .. لج اني مو دااحجي وياج ؟!!

داليا .. مااعرف لويش حسيت بغضب داخلي ، متحملت بعد انفجرت بوجهه بدون قصد ... كلتله بصوت عالي وغضب..

_انت شكوو دتسألني اصلاً؟!!
ومنو انت حتى تحقق وياي؟!!
اني جايه اشوف اخويه وبس مو شغلك أهلي يطلعوني بالليل ، بالنهار انت شنوووو علاقتك وشعليك؟!

اسيد .. بنت الكلب دااحجي وياها ، كامت تعيط بوجهي !!
ع بالك بزونه وطفرت بوجه واحد ، نار وشبت بيه تالي عمري مره تصيح عليه؟!!
بعدها دتحجي وتصيح اتقربت عليها انطيتها راشدي (كف) درت وجها 180 درجه.
ع بالي توكع ، ع بالي تتأذه ، تبجي ... اشو هاي ولا ع بالك دارت وجها عليه بكل صلافه  وابتسمت بوجهي....!

داليا .. ضربني على وجهي حسيت راسي انخلع من رگبتي!!
من صدوك اول مره احس بألم هشكل!!
بس مردت اضعف ويستقوي عليه .. درت وجهي عليه وابتسمت  .. بنبرة استهزاء كلتله ...

_ لا والله رجال وتعرف تضرب هم.

اسيد .. اني هيج صلافه مشايف بحياتي ، فوكاها تستهزء!!
ماشي لعبتي بعدادات عمرج اليوم .. تردين تشوفين الرجوله شنو؟!!
اوك هسه اشوفج ...
جبت الكلبجات جريت ايديها كلبجتها .. هي بقت صافنه تباوع بوجهي  بس شكلها اتغير و وجها صار اصفر ، عرفت راح اسويلها شي هه ، انتي الي ردتيها اتحملي .. جريتها شمرتها ع السرير ، بس اني روحي لعبانه منها .. ومستحيل اسويلها شي بس اريد اخوفها حتى تتأدب الحقيره وتعرف ويامن تحجي..

داليا .. كلبجني وشمرني ع السرير .. واني متت من الخوووف قطرة دم مبقت بيه !!
يا الهي ارجوك بحق المسيح لتخلي يلمسني ما اتحمل صدمه بعد كافي الي عشته .. اول ما دفعني ع السرير .. كلت راح يغتصبني لا محاله .. غمضت عيوني وسكتت بس احس بالكوه اتنفس دااختنك .. كلت بس يتقرب مني اموته هذا شكله ميعرف اني منو ؟!
ع باله وحده كيوت وشابعه دلال ، ميدري گظيت عمري ويا الولد عايشه بالميتم لحد ما عرفت كل سوالفهم ..!
المهم سمعت صوت المسدس ديسحب اقسام .. گلبي وگف ... يا ربي هذا شحيسوي؟!!!!
فتحت عيوني برعب وجان اشوفه موجه المسدس عليه وعيونه تجدح نار.....!!
بسرعه وخوف كلتله ...

_اي اقتلني عادي بس لتحلم اخليك تلمسني انت متعرفني ، والمسيح اكلك بسنوني.

اسيد .. اشكد وكحه هذي المخلوقه ، حتى والمسدس كدامها تلاسن وتصيح .. لا والحلوه تهددني ههههههه ، من كل عقلها مفكره اتقرب منها  ..!
ابتسمت بس نار شابه بيه اريد افرغ المسدس براسها بهذي اللحظه واكتم انفاسها للابد ، اطلع بيها كل قهر السنين الي عشته بسببهن....!
بصوت جامد كلتلها ..

_ لتخافين اني ما اتقرب للحثاله امثالج ، بس عندي اصدقاء هواي عادي ميهمهم يتقبلون كلشي ، فـ أني طالع وراح ادزهم الج بلكي يريحوج لان الظاهر طلعتج بهالليل لهذا السبب ، سالفة اخوج هاي تلفيق ، لان وين اكو اخو يديح اخته نص الليالي ؟!!
الا اذا كاااااان ....... تعرفين شنو ميحتاج اكول.
يلا يا حلوه ابقي هنا وهسه ادزلج الي يونسج.

داليا .. اشكد حقير اشكد نذل هذا .. مفكرني ساقطه ؟!!
حقه اني الغبيه شعندي طالعه بنص الليل .. لو سامعه كلام سلمى ومنتظره للصبح مصار كل هذا
يا اللهي ارجوك خلصني و بعد ما اكررها ولا اعاند ابداً .. ارجوك🙏🏻
شفته من صدوك لبس تيشيرت وديطلع من الباب ..!!
دفعت نفسي بسرعه وكمت وكفت كدامه ...!!

اسيد .. دااريد اطلع ما احس بيها الا وكفت ع الباب وصارت كدامي .. عيونها بعيني وميفصلنا غير كم سانتيمتر!!!!
عيوني صارت غضب اريد اكلها بسنوني اشلون تتجرأ وتوكف بوجهي هشكل؟!!
حافظت على هدوئي و بصوت مليان غضب كلتلها ..

_انتي عاجبج اتموتين؟!!

داليا .. اولاً اني مو مثل ممفكر ، وثانياً طلعه متطلع اذا متفتح اديه وتخليني اروح
ثالثاً واخيراً اذا عندك اصدقاء زباله مثلك ، يردون حثاله مثل متفضلت فأكيد عندك اخوات دزهم عليهن.

اسيد .. لاااا هذي ناويه على موتها هالمره ، من حسن حظها اني مو من الناس الي تهزهم كلمه .. ولا اتسرع نهائيا ً ، بس كلامها استفزني لاقصى حد داست ابطني .. ولازم تتأدب ، سحبت المسدس خليته ع صدرها وضغطت عليه بقوه ، ابتسمت بوجها .. بنبره مظلمه كلتلها ..

_ماشي راح اكون كريم وياج وانطيج خيارين !!
يأما ترجعين للسرير وتنتظرين اصدقائي يجون حتى ترضيهم !!
او افتح الباب هذا واكول هاي ساقطه اجتني تريد اونسها ..!
تعرفين الدنيا ليل و بنيه بغرفة رجال بهيج وقت شنو معناها؟!!
يعني بالحالتين راح تصيرين حثاله ..!
بس اذا تردين نصيحتي اني افضل الخيار الاول لانو استر الج اشويه.

داليا .. خلا المسدس ع صدري مقابل كتفي وضغط عليه بكل قوه حسيته ديخترق روحي من الوجع ... وكال هذا الكلام بكل حقاره ... حسيت نفسي من صدوك حثاله ، الذل الي حسيته كرهني نفسي...!
استاهل .. اني الي جبتها لنفسي .. تجمعت الدموع بعيني بس ما بجيت!
باوعت بعينه بكل تحدي واخذت قراري النهائي"
بصوت جامد كلتله ...

_اذا اكو حثاله بهذا الغرفه  فهو انت ، واني افضل الموت على ان يستشرف براسي واحد حقير مثلك .

بلحظه وحده وبكل سرعتي رفعت ايديناتي الي مكلبجهم ، لزمت المسدس الي بأيده  بسرررررررعه وضغطت ع الزناد!!!!! !!!!!

............................

مرحبا حبايبي شخباركم ❤️
شنو رأيكم بالاحداث وشنو توقعاتكم للبارت القادم 🤗
رأيكم يهمني ويسلموووو من القلب لكل الي ديصوتون ويعلقون شكراً للكلام الجميل الي دتكتبو 😘