رواية في ارض الغرام انت دولتي الفصل الثالث والثلاثون 33 - بقلم ﮼الاميره،الموسويه 👑

بقلمي ( هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

داليا .. كالي مسويه حادث!!!!
متأثرت ولا انزعجت بس بنفس الوقت لا فرحت ولا اتشمتت .. سكتت وكأني مسمعت شي .. بصوت هادئ كلتله..

_هسه حتروح؟!

اسيد .. اي لازم اروح لان ابو احمد مو هنا بالشمال ومحد يمها ، كالي روح على ما اوصل.

داليا .. زين حكوم احظرلك ملابسك على ما تسبح.

اسيد .. لا لتكومين اني ابدل واروح ارجعي نامي.

داليا .. منعسانه طارت النومه .. انت روح اسبح واني ححظرهم.

راح دخل للحمام واني كمت حظرتله ملابسه طبعاً من كد ما عشت ويا حفظت كل تفاصيله وكل ملابسه رغم هو عنده ملابس هنا اكثر من المزرعه بس تقريباً كولهم نفس الاستايل والالوان نفسها .. المهم ..
حضرت الملابس ونزلت سويتله گهوه حتى يصحصح لانو هستوه نام مصارله هواي واكيد بعده نعسان .. ليروح يغفى ويسوي حادث .. سويتها وصعدت .. لكيته ديبدل !!

اسيد .. وين رحتي؟!

داليا .. نزلت سويتلك هذي حتى تشربها .

اسيد .. هاي الي؟!!

داليا .. لا انطيها للحرس من تطلع.

اسيد .. امممم ماشي خليها ع الميز و ارجعي نامي.

داليا .. اشوكت حترجع؟!

اسيد .. ما ادري حسب الوضع.

داليا .. والحجيه ؟!!

اسيد .. اشبيها ؟!

داليا .. لازم تعرف لانها اختها ..

اسيد .. خلي نتطمن على وضعها بالاول وبعدين اني انطيها خبر ، امي مو مال صدمات.

داليا .. اي زين.

اسيد .. كملت وشربت الگهوه .. ردت اطلع چان اتذكرت شغله .. التفتت عليها هي كانت كاعده ع السرير ومتغطيه!!

_ معليج بأيمان وحاولي تتجنبيها ما اريد مشاكل.

داليا .. هففف من يجيب طاريها تلعب نفسي مااعرف لويش من يذذكرها هو بالذات انغث واحس بغضب .. سكتت محجيت شي.

اسيد .. ويامن احجي؟!

داليا .. رادت تحجي ويا اتفهمه انو هي ممسويه اي مشكله ولا حاجيه وياها .. بس فكرت انو مو وقتها هسها .. اوك.

اسيد .. يلا اني رايح واذا صار شي خابريني.

طلعت من البيت بوجهي للمستشفى الي كال عليها رجل ايناس .. دخلت سألت عليها  كالو بعدها بالعنايه المركزه وحالتها خطره ننتظر للصبح وانشوف بلكي تتحسن وعلى اساسها نكدر انحدد الاضرار الي سببها الحادث .
بقيت انتظر للصبح وصل رجلها ..

ابو احمد .. ها بشر اسيد اشلونها؟!

اسيد .. ماكو شي ان شاء الله ، هسه نعرف النتيجه هم كالو ننتظر الصبح !

بعدنا دنحجي .. چان يجي الدكتور .. طلع صديقي من ايام الجامعه شافني ما صدك .. سلام علينا واشلونك واخبارك .. من هذا الحجي ..

د.ابراهيم .. خير شعندك بالمستشفى شنو راح تنقل يمنا؟؟

اسيد .. لا والله بس عندي مريضه هنا البارحه سوت حادث حالتها خطره وكالوالصبح  بلكي يزيل الخطر .

د.ابراهيم .. لااا سلامتها .. لعد شكو دتنتظر هنا تعال لغرفتي واني هسه اشوفلك وضعها .

اسيد .. اي والله بلكي تشوفها من البارحه انتظر وميخلون واحد يدخل للعنايه هسه بس انريد نتطمن ع حالتها.

د.ابراهيم .. هسه دقايق واجيك تعال انتظروني بالغرفه.

اسيد .. كعدنا ابراهيم بغرفته وراح صدك دقايق واجاني بيده التحاليل واوراق .. بس وجهه ميبشر بخير!

د.ابراهيم .. اكول اسيد اشتقربلك المريضه ؟!

اسيد .. خالتي وهذا زوجها .

د.ابراهيم .. اها .. والله مااعرف شنو اكلك اتمنيت مو اني الي انقلك هالاخبار بس شسوي الحظ جمعنا اليوم ..!

اسيد .. احجي ابراهيم شكو؟!

د.ابراهيم .. المريضه متعرضه الحادث كلش قوي واضطرو يبترون رجلها واحتمال جداً كبير انو تصير مقعده لان العمود الفقري متأذي وبي كسر .. وهسه هيه بعدها فاقده الوعي لما تصحى وانكمل الفحوصات نتأكد وان اشاء الله اكو أمل .

اسيد .. رغم اني كنت كارها لايناس بعد الي سوته بس من سمعت كلام ابراهيم انقهرت عليها .. اباوع لرجلها وجهه صار اصفر وملامحه انگلبت محجه شي بس واضح عليه القلق!
سلمت على الدكتور وطلعنا .. اشويه واجه اخويه كرار خوالي ٢ و احمد ابن ايناس .. اتسالمنا وسألونا ع وضعها  كلنالهم مندري عنها شي الى ان تصحى يلا نعرف!
كعدنا بالردهه اشويه واجو الموظفين كالو ممنوع تبقون هنا .. طلعنا بره جرني ابو احمد كالي انت من البارحه هنا روح لبتيتكم ارتاح واني اجيت بعد وتشكر مني!

اسيد .. لااا شنو هالحجي ابو احمد شنو اني غريب ، ومااروح الى لن تصحى واتطمن عليها حتى اكول الامي لانها متدري بالصاير اصلاً.

ابو احمد .. اي لتكللها للحجيه واني بس تصحى اتصل بيك وانطيك خبر روح ارتاح .

اسيد .. لحيت ويا ردت ابقى بس هو اصر انو اروح!
اني من صدك كنت مكسر تكسير وما نايم بس كلت زحمه اعوفه وحده .. بعد الحاح واصرار منه .. رجعت للبيت .. بس شرجعت راسي صاير طبل لا راحه ولا نوم والتفكير نخر عقلي نخر .. اريد بس الزم الفراش حتى اغمض عيوني وانام .. وصلت للبيت دخلت للكراج .. بعدني بالباب واسمع الهوسه والصياح!!
اييييي بدت رحمة الله!!
فتحت الباب ودخلت بس روحي صايره بخشمي اريد بس اعرف منو هاي الادبسز الي تصيح وكالبه الدنيا .. باوعت بالصاله محد بس ايمان وام عادل !!
ام عادل واكفه وهاي العار تصيح .. بقيت اني واكف اسمعها شتحجي وهي متدري ملتهيه تلعلع ...!

ايمان .. اذا ما طلعتج من هذا البيت ولبستج الباب فلا اتسمى ايمان.
شايفه روحها ومتتحاجه من جمالج هسه انتي لو على حسبج ونسبج .. كلج خلك وحده مهتلفه لمج من الشارع مينعرف اصلج من فصلج .. جايه تخلين راسج براسي اني اعلمج.

اسيد .. ام عادل من شافتني رادت تحجي .. اني خزرتها سكتت وراحت للمطبخ وهي بقت تصيح متدري بيه واكف وراها .. من خلصت لغوتها اندارت شافتني وراها ..... بلعت اللسانها.
بقت صافنه بوجهي بكل صلافه بس وجهها ينطي اللوان .. بصوت هادئ بس مليان غضب ..

_اني شكلتلج؟!!

ايمان .. بينها وبين نفسها .. يمه گلبي راح يوكف ، هذا صارله اشكد واكف هنا .. بس لا سمعني!!

اسيد .. بصوت حاد ونبره اعلى .. ما اسمع؟!!!

ايمان .. شوف قبل لتعصب ولتصيح مو صوجي هي البدت .. ومن شافتك ضمت راسها .

اسيد .. سألتج جاوبيني .

ايمان .. من شافت اسيد اتلبكت بس مع ذلك بقت ع موقفها ما رادت تضعف حتى لا تتشمت بيها داليا حسب تفكيرها .. بملل ..  يبوووو دروح انت وتهديداتك متحاجيها لو كادر بس عليه .. كالت هالكلام .. عافته وراحت
مشت من يمه چان يلزمها من شعرها ...!

اسيد .. كنت واكف وياها على شعرايه وهي كطعتها ..  جريتها من شعرها بقوه وبصوت حاد وهمس بأذنها ..

_ لمي غراضج بسرعه انتي طالق .. طالق .. طالق .. ودفعتها ع الكاع

ايمان .. من سمعت الي كاله اسيد فقدت عقلها .. مكانت متوقعه يطلكها بهالسهوله كل ظنها تخلي يكره داليا ويطردها .. بس الي صار خبلها .. زحفت ع الكاع ولزمت رجليه ... لااااا لا لا دخيلك لتطلكني والله انفضح دخيلك شتكول عليه الناس  ، ابويه يذبحني اذا رجعتله الله يخليك لا تطلكنيييي !
بعدها تبجي وتصيح نزلت الحجيه ...

_ شكووو ايمان اشبيج ؟!

ايمان .. كامت من يم اسيد وركضت للحجيه لزمتها الحكيلي عمه اسيد طلكني  الله يخليج كليله يرجعني .. والله ابويه اذا عرف يموتني شكول للناس يومين وطلكني عمه فدوه حاجي .. وتبجي!

الحجيه .. بصوت حاد .. امشي روحي لغرفتج.

ايمان .. بدون اي كلام ركضت لغرفتها .

الحجيه .. انت شنو عندك العالم لعبه تتزوج بكيفك وتطلك بكيفك.

اسيد .. اي بكيفي ولحد يتدخل.

الحجيه .. مو بكيفك محد يدخل اهلها يعرفني الي واني الرحت خطبتها ، وانطوها الي .. شكللهم هسه بتهم ما صارلها شهر من اتزوجت تروحلهم مطلكه ؟!

اسيد .. انتي الي جبتيها وانتي الي تتحملين مسؤوليتها .. لو عاجبج تعلي صوتها عليه وترديني اسكت.

الحجيه .. اذا انت ما عندك اسلوب شتسويلك؟!

اسيد .. هه هي هاي الي كدرتي عليها .. ما عندي اسلوب؟!
مره تعلي صوتها على رجلها وتكليلي ما عندك اسلوب؟!
اسمعيني زين يمه اني سكتت ع الي سويتي انتي وچنتج الثانيه ومحجيت بس لتختبرين صبري ترى والله اتشوفون شي عمركم مشفتو مني.

الحجيه .. اتهددني يا ابن بطني؟!

اسيد .. افهمي الي تفهمي .. وهاي لحظه وحده متبقى هنا بعد.

الحجيه .. شافت ابنها عصب .. وتعرفه لما يعصب محد يكدر يوكف بوجهه .. قررت تتبع غير اسلوب ويا عسى ولعل يوافق تبقى ايمان هنا لان اذا راحت لاهلها ميصير خير .. ابوها واحد شراني ويدور طلايب وفصول ..!
بصوت هادئ .. اسيد  لا تشلع گلبي وجوز عن البنيه خليها تكعد هنا واني انطيك عهد متسمع صوتها بعد.

اسيد .. انتي لتشلعين گلبي واطلعي من الموضوع.

الحجيه .. اووووف يمه گلبي راح يوكف .. و وكعت ع التخم!! (كالعاده فلم من افلامها)

اسيد .. من شاف امه اتخربطت ركض عليها .. يمه .. يمه اشبيج حاجيني .. ام عاااااااادل ... جيبي مي بسرعه ويييييينج .. بسرعه!!

داليا .. بعد ما راح اسيد حاولت انام مكدرت .. احس شي بداخلي ممرتاح والي زعجني اكثر من كالي لتسوين مشاكل وذكر ايمان !!
لويش يكول اسمها .. ولويش يكول اتجنبيها .. لهدرجه ميريد يجرح مشاعرها ؟!!
وشكو جاي عليه ميروح يكوللها الها .. اني اصلاً محجيت شي هي الي سوتلها مشكله وغلطت عليه .. وهو حتى مكلف نفسه وحجه وياها بقى يعيط عليه كدامها وفشلني  .. اوووووف نار نار ومشتعله بگلبي .. بالبدايه كنت مفكره انو وجودها وقتي وبس اجي اني تروح بس الظاهر ما عنده نيه يطلكها .. معقوله صاير شي بينهم؟!!
لااا .. ولج داليا شدتحجين انتيي .. هو كالج زواجهم ع الورق واضظر يتزوجها علمود امه.
بس اخاف يكذب عليه يريد يسكتني؟!!
الافكار اكلت گلبي وروحي .. الاحساس الي بداخلي من يوم شفتها لليوم ديموتني .. وخصوصاً من يذكرها كدامي اتخبل .. لويش ديصير بيه هشكل .. معقوله دااغار عليه؟!!
بقيت للصبح الافكار مخلتني انام .. ومردت اطلع حتى مااشوف هاي الحيوانه ، تصير مشكله وتنذب براسي!
انتظرته باكي يجي حتى انزل ويا بس ماكو ما اجه .. صارت الدنيا الظهر تقريباً .. نزلت بعدني ع الدرج چان تطلع ايمان من غرفتها .. اني شفتها ودرت وجهي .. رحت للمطبخ لكيت ام عادل دتسوي غده .. سلمت عليها وكالتلي راح اسويلج ريوك !
كلتلها لاا ما اشتهي نفسي مسدوده .. هي مقبلت كالت ميصير انتي حامل وطفلج لازم يتغذا .. كلتلها ماشي لعد لني اسوي انتي كملي شغلج .. بعد ملحه خلتني اسويي .. دااحضر بالريوك چان تجي الخانم .. كالت لام عادل

ايمان .. سويلي ريوك بسرعه.

داليا .. اشكد متستحي هذي حتى اسلوب مثل الاوادم ما عدها .
كلتلها ام عادل انتي اشتغلي اني حسوي ريوك واعزللها منه اخذي الها انتي .. لويش انسوي مرتين هذا هوايه!
صدك سويت الاكل وعزلتلتها صينيه اخذته ام عادل الها واني كعدت بالمطبخ اكل .. مااحس الا ايمانوو فوك راسي وبيدها الصينيه .. ذبتها بالكاع وبصوت عالي ..

ايمان .. هو هذا هم اكل ؟!
التفتت شافت داليا كاعده دتاكل بالمطبخ .. هه وانتي شكو كاعده هنا .. بس حقج متعلمه ع اماكن الخدم العز ميليق بيج.

داليا .. اني روحي طالعه منها وكلامها هذا كملها .. بصوت حاد كمت من مكاني ..

_ ع الاقل الخدم عدهم اخلاق وعايشين بكرامتهم مو مثل بعض الناس لزكه عايشيين ويا ناس متريدهم.

ايمان .. شنوو قصدج ولج؟!!

داليا .. واضح قصدي حبيبتي ولمصلحتج لتخليني احجي .

ايمان .. لا احجي عيني احجي هو انتي كولشي يطلع منج تربية مياتم ام الشوارع.

داليا .. اني مراح احجي وياج لا عندي رجل من يجي خلي يعرفج منو تربية الشوارع.
عفتها تلعلع وتغلط وصعدت لغرفتي بس اني گلبي احسه ينزف دم من كلامها هانتني وام عادل واكفه .. دخلت لغرفتي وشبعت بجي .. من البارحه اني غصه بگلبي ع الي سوته بيه ومخنوكه مااعرف اشبيه .. وهسه كملتها .. بجيت لحد ما راسي ورم وغفيت لحالي .. ماكو دقايق يمكن و فزيت على صوت اسيد يصيح .. نزلت بسرعه لكيته مخلي امه بحظنه ويغسل بوجهه!!
يا ربي سترك اشصاير الحجيه اشبيها اشوكت كعدت .. بس لا عرفت بأختها مسويه حادث ... او يمكن اتكون ماتت معقوله!!!!!!!!!!!!!
بقيت جامده بمكاني مااعرف اتصرف .. اخاف اخطي خطوه وحده .. رجليه خدرت .. باوعلي اسيد بنظرات حاده مااعرف شنو السبب .. اكيد صار الي ابالي خالته ماتت والحجيه اتخربطت لانها ماتت وهي متحجي وياها ... ايييي واني السبب!
اديه كامت ترجف ردت اوكع ولزمت بالمحجر مالت الدرج .. هو شافني وبسرعه باوع لاأم عادل وصاح دالياااا .. ام عادل ركضت عليه سندتني .. صعدتني لغرفتي ..

ام عادل .. اووووف كله من ورا هاي الحيه الله ليرضى عليها.

داليا .. منو .... الحجيه اشبيها؟!

ام عادل .. ورا ما صعدتي بقت ايمان تصيح واجه الدكتور وسمعها حجه وياها ما ادري اشكاللها وطردها كاللها لامي هدومج ترحين لاهلج بعدين صارت الهوسه والحجيه نزلت واتخربطت.

داليا .. جريت نفس الحمدلله الي بالي مو صحيح .. بس هم بعد اكو مشكله ومو بعيده توكع براسي .. رجعت كعدت كلتلها انطيني كلاص مي شربت مي وكلتلها خلي ننزل.

ام عادل .. وين اتنزلين هسه ردتي توكعين وانتي حامل .. اكعدي بغرفتج واسكتي.

داليا .. لا صرت زينه نزليني اريد اشوف الحجيه .

ام عادل .. بس الدكتو..

داليا .. ام عادل دااكولج صرت زينه فدوه خليني انزل واني احجي ويا اسيد معليج انتي.
نزلنا اني وان عادل لكيت الحجيه كاعده وهو كاعد يمها ديفرك بأيدها .. من شافني خزر ام عادل .. كلتلها روحي انتي معليج اني احاجي .. راحت ام عادل واني كلت صباح الخير ورحت يم الحجيه كعدت يمها .. اشون صرتي حجيه؟!

الحجيه .. ولج اشلوني يمه ورجلج هذا يريد يموتني .

داليا .. بعيد الشر عنج حجيه .. بس اهدي ولتنقهرين وان شاء الله كولشي يصير مثل متردين.

اسيد .. كعدت يم امي وتكللها كلشي يصير مثل متردين تلي يسمعها يكول اني الي سويت المشكله مو هي الي اتعاركت ويا العار ايمان .. باوعتلها بغضب هي دارت وجهها.

الحجيه .. ولج يمه البنيه ما صارلها شهر من اخذها وهسه طلكها؟!
شكول الاهلها شحجي اذا سألوني ليش طلك بتنا؟!

داليا .. فرحه متنوصف من سمعتها كالت طلكها .. درت وجهي عليه والابتسامه شاكه وجهي نصين .. ماادري اشون طلعت هالكلمه مني ... طلكتها؟!!

اسيد .. الغبيه امي تحجي وياها ومقهوره وهي تباوعلي وتبتسم .. منظرها يموت ضحك هي والابتسامه الي على وجهها كل الغضب الي بداخلي اتبخر من شفتها ابتسمت رغم اني كنت معصب منها لان الصبح كلتلها معليج بأيمان وما سمعت كلامي .. كتمت الضحكه لان امي تعبانه وكاعده بس بداخلي شي ميت ضحك.

الحجيه .. اي ولج يمه طلكها .. ويريد يوديها لاهلها شسوي هسه اني بهالمصيبه ؟!

داليا .. لويش مصيبه حجيه .. انتي قابل شنو علاقتج هو يتفاهم ويا اهلها.

الحجيه .. اشلون شعليه غير اني الرحت وخطبتها .. ولج يمه ما صارلها شهر كلتله اصبرلي كم شهر على الاقل حتى نمدر انطلك هسه اذا تطلكت تنفضح البنيه وشيخلصنه من اللسان العالم ومن اهلها.

اسيد .. انتي معليج عوفيها عليه والي يحجي اشك حلكه وحلك الخلفه.

الحجيه .. ولك انت تريد اتموتني اسيد .. ولك ماخذ الدنيا بعنتكه وعرك .. اتريد اتموت وتموتني وياك .. ولك هو اني شعندي بس انتو الاثنين .

داليا .. شفت الحجيه مقهوره وكلامها صحيح .. هي ايمان صح حقيره ولسانها متبري منها بس ماكو اي بنيه بالعالم تستحق تنفضح وتتشوه سمعتها بلا سبب .. وهي ما سوت شي يستدعي يطلكها .. ع الاقل حالياً..!
التفتت عليه ..

_ اسيد الحجيه مريضه سامحها هالمره لخاطر امك وبقيها هنا .. الى ان تمر فتره وسوي الي تريده حتى محد يحجي .

اسيد .. صدمتني بكلامها من حجت .. باوعتلها والصدمه ماليتني .. ع بالي دتتشاقه بس ماكو على ملامحها ذرة مزح .. وتحجي من كل عقلها !!
معقوله لهدرجه ميهمها وحده تشاركها بيه؟!!
حيل انزعجت من كالت هيج مااعرف ليش بس عدم اهتمامها وكأنو الموضوع عادي عدها تبقى ايمان ويانا بمعنى ما اهمها ولا يزعجها هالشي .. اني هم من شفتها هيج كلت بسيطه اني اعلمج .. انت الردتيها.

الحجيه .. الله يرضى عليج بنتي ويكملج بعقلج .. بس ويامن تحجين.

اسيد .. ماشي خليها تبقى.

داليا .. من غصب عني كلت هالكلام لان اذا راحت ايمان الاهلها راح تصير طويله وعريضه واحتمال يأذو لو يسوون له شي لان حسب كلام الحجيه اهلها ناس شرانيه!!
لااا كولشي ولا هو خليني اتحمل القهر وگلبي ينحرك ولا هو يتاذه!
بس متوقعت خو بسهوله يتراجع عن كلامه ويبقيها بعد ما وصلت للطلاك!!
حييييييل انقهرت منه شنووو هذا ما عنده احساس بلحظه يصعدني للسما وبالثانيه يركعني بالكاع ويكسر گلبي"
سكتت محجيت شي والحجيه طارت من الفرحه حتى كامت عليه وباسته .. هو خلا وكام كال اني تعبان اريد ارتاح .. راح للغرفه واني بقيت ويا الحجيه .. سويتلها ريوك بعدين دخلتها للحمام سبحتها بدلتلها وعطرتها .. وكعدنا اني وياها بالصاله للعصر هي نامت واني النار تحرك بيه .. عفت الحجيه وصعدت للغرفه اخذ ملابس حتى اسبح لان تعبت وعركت .. دخلت لكيته امدد ع السرير ويحجي بالموبايل .. مدرتله بال اخذت الملابس و دااطلع چان يحجي..

اسيد .. وين؟!!

داليا .. للحمام.

اسيد .. مو هذا حمام شكو نازله جوه؟!

داليا .. بكيفي انت شكو.

اسيد .. اللسانج طولان ظبي لا اكصه الج.

داليا .. التفتت عليه ردت احجي بس خفت لتصير مشكله وهستونا خلصنه من مشكله .. بلعت الكلام ودخلت للحمام اللي بالغرفه .. سبحت ، لبست البرنص مالت الحمام و طلعت .. هو ع كعدته .. وكفت ع المرايه داامشط شعري مااحس غير ايديه حاوطتني من ورايه!!
و وجهه بشعري يشتم بي!!
_گلبي يمكن وگف لحظتها .. حتى المشط وكع من ايدي .. بصوت يرجف .. شدتسوي؟!!

اسيد .. دااتطمن على ابني اشلونه.

داليا .. وابنك بشعري؟!!

اسيد .. بكيفي انتي شكو؟!

داليا .. اسيد وخر عني اريد امشط .

اسيد .. ما اوخر شتسوين؟!

داليا .. لزمت ايده بعدتها و وخرت عنه .. وكفت يم الباب وباوعتله .. بصوت حاد بس العبره خانكتني..

_ انت لويش دتسوي هشكل؟!

اسيد .. دفعتني وراحت وكفت بعيد .. وهذا التصرف عصبني لابعد حد بس لزمت اعصابي اريد افهم شنو موضوعها هاي ..

_ شسويت؟!

داليا .. لتسوي نفسك غشيم .. انت مو كلتلي هذا الزواج وقتي شكوو مبقيها يمي.

اسيد .. لتخبليني ترى ادفنج هنا .. منو هسه كالي كدام امي خطيه و بقيها هنا ؟!!

داليا .. اي كلت لان امك خطيه مريضه ، بس حظرتك مصدكت بسرعه وافقت ع الاقل اعترض كول لا حسسني انت فعلاً متريدها .. مو من اول كلمه كلت بقيها.

اسيد .. لج بابا انتي مخبله لو تردين تخبليني .. اطلكها اتكولين بقيها .. ابقيها تزعلين واتردين اوديها .. شتردين بالضبط فهميني ترى طلعت روحي.

داليا .. كلامه صحيح واني الغلطانه .. اني الي كلتله بقيها .. خلص لازم اعتذر منه .. ردت اروحله احضنه واعتذر منه .. چان يرن موبايله ..

اسيد .. الوو .. اهااا ماشي هسه جاي ..

داليا .. وين؟!

اسيد .. دااحجي وياها جان يخابرني ابو احمد .. كالي خالتك صحت وتعال شوفلنا شنو القصه لان محد يقبل ندخللها .. لبست هدومي وبوجهي للمستشفى بس اني اريد انفجر من الي ديصير بيه .. راح يخبلني هذني وتاليها موتي يصير بسببهن.
وصلت للمستشفى اتلكوني رجل خالتي وابنها وخوالي .. عفتهم ورحت لغرفة ابراهيم .. كلتله هيج وهيج السالفه ومحد يقبل يدخلنا انشوف المريضه!
كالي تعال وياي شنو محد يدخلك .. اخذني و رحنا لكيتها امدده ع السديه وبس عيونها تستدير وجهها نصه ملفوف ورجليها وحده مبتوره .. شافتني فتحت عيونها تريد تحجي متكدر .. شاف الاشعات والتحاليل مالتها واني هم شفتهم طلع عدها كسر بالعمود الفقري .. وشلل بالاطراف السفلى من منطقة الحوض الى رجليها .. اضافه الى فطر بالجمجمه ورضوض بباقي الجسم .. حالتها كانت كلش صعبه .. عفتها وطلعت كالو بس تستقر حالتها ننقلها بغرفه خاصه وتكدرون تشوفوها ..
فعلا بقينا للعصر يلا نقلوها .. ودخلو رجلها وابنها شافوها كام يبجي ابنها ورجلها اتحمدلها السلامه هو وخوالي .. لليل اني عفتهم و رجعت للبيت لان حيل تعبت !
وصلت للبيت ب 12 بالليل لكيت الكل نايم والبيت هدوء .. صعدت للغرفه لكيتها فارغه و داليا ماكو!!
وسمعت صوت بالحمام .. اكيد هي .. نزعت ملابسي ، بدلت تراك خفيف ومددت ع السرير چان يرن الموبايل .. باوعت علي يتصل بك!!
جاوبته .. الوو سلام وكلام ..

علي .. يمعود ضل بالي عليك من اخذت داليا بعد ما شفتك ولا عرفت اخباركم شصار ما صار ؟!

اسيد .. ما صار شي وهسه اني ببيتنا .

علي .. يا بيت الي بالمزرعه؟!

اسيد .. لا بيت ابويه.

علي .. لاااا تتشاقه!!

اسيد .. هه لا لك يول دااحجي صدك ، قابل اني مثلك عايش بالبوكه.

علي .. يمعود اسكت طاح حظي من هالوضع وسلمى خطيه متبهذله وياي.

اسيد .. مو نصحتك ما فاد بيك النصح.

علي .. هههههه شوف منو ينصح .. دسكت بابا اسكت.

اسيد .. امشي ولي لك قشمر ع الاقل اني كاعد ويا اهلي .

علي .. اووووف اسيد ماادري شسوي .. المهم حبيت اتطمن عليك يلا اخذ راحتك حبيبي.

اسيد .. هلا بيك ان شاء الله هالاسبوع اداوم ونلتقي .

علي .. الله كريم.

اسيد .. بعدني دااسلم ع علي .. وچان عطرها يترس خشمي .. وايديها حظنتني من ورا..!!!

داليا .. بصوت هادئ همس .. اسفه حبيبي.

اسيد .. گلبي اكيد وگف .. بس هلي اشلع گلبها اشويه مثل نا سوت بيه البارحه .. بصوت حاد ع شنو؟!

داليا .. واني حاضنته بسته ع خده .. ع الي صار الظهر.

اسيد .. وشنو اسوي بيها الاسف اني؟!

داليا .. لعد شنو اكولك ؟!

اسيد .. لتكولين شي.

داليا .. لعد ؟!!

اسيد .. اريد افعال اني.

داليا .. اشون يعني مفهمت؟!!

اسيد .. اني افهمج .. جريتها لحظني وبستها .. بوسه بعد بوسه .... وصار الي صار!!!! (عيب انتو معليكم بيهم 😅)

داليا .. كعدت الصبح نايمه بحضنه .. يا رب شكراً الك حققت الحلم الي اتمنيته من اول يوم شفته بي .. بقيت صافنه بوجهه .. رفعت اديه ومشيت اصابعي ع ملامحه بهدووووء .. وصلت يم حلكه چان يبوس اصبعي!!
وييييييي صخنت من الخجله ..

_ هاي انت كاعد؟!!

اسيد .. كملي معليج بيه.

داليا .. ههه شنو اكمل ؟!

اسيد .. الي كنتي تسوي .

داليا .. كاااافييييي كوم موبايلك صارله ساعه يرج موتني .

اسيد .. هاي شنوو لعد ليش مكعدتيني؟!

داليا .. شفتك نايم ومردت اصحيك.

اسيد .. جريت الموبايل .. لكيت اتصال من الدوام الامر مخابرني .. رجعت اتصلت بي .. چان يكلي لازم هسه تلتحق صاير تعرض وهواي اصابات وطبيب واحد ميلحك!

سديت الموبايل وكمت بوجهي للحمام سبحت وبدلت .. طلعت لكيت داليا مسويه ريوك .. اتريكت و وصيتها على امي وطلعت للدوام ... بقيت هناك 10 ايام چان يخابرني ابو احمد رجل ايناس ..

_الوو .. جان يكول خالتك حالتها كلش مو زينه ورجليها شاكيين صاير بيها گنگري .. وتريد اتشوفك ضروري!!

_بس اني بالدوام ؟!!

ابو احمد .. اشوكت تنزل؟!

اسيد .. باجر ع الاغلب

ابو احمد .. ماشي انتظرك .. بس ضروري تجي اول ما تنزل لان حالتها متسمح تأخير.

اسيد .. ان شاء الله .. سديت الموبايل وثاني يوم اول ما نزلت بوجهي للمستشفى الي نايمه بي ايناس .. وصلت لكيت بس رجلها وياها .. سلمت وكعدت لكيتها امدده ع السرير كالعاده .. بس تكدر تحجي !!

_ها ام احمد اشلون صرتي؟!

ايناس .. هذا حالي شتشوف ؟!

اسيد .. الله كريم ..

ايناس .. عندي كلام اريد اكوله الك .. حتى اروح واني مرتاحه.

اسيد .. عمرج طويل ان شاء الله.

ابو احمد .. ماشي اني اعوفكم على راحتكم لعد.

ايناس .. لااا خليك ابو احمد انت هم لازم تعرف كولشي ..

اسيد .. ام احمد اتركي الكلام هسه انتي مريضه ومو زين عليج من تصيرين زينه عود نحجي على راحتج.

ايناس .. لااا اني اعرف مبقالي غير ايام معدوده .. واريد ازيح هذا الهم الي صارلي اسنين شايلته ..

اسيد .. ماشي براحتج ..

ايناس .. اول شي اني صح كنت متزوجه قبل وصح خلفت من زوجي الاولاني ... بس مرتك مو بنتي.........

للحكايه بقيه 🤗
واسفه ع التأخير بس البارت طويييل تعبني
رأيكم بالاحداث وتوقعاتكم للبارت القادم ولتستعجلون بالحكم 🙂 الي مركز بالقصه من البدايه حيعرف بنتها لو لا
لتنسووووووووون التصويييييييييييييت 😘