في صباح يوم جديد
قصر القناوي
في جناح اسد
استيقظت فيروز على كابوس ولقيت ستها فاطمه مش موجودة جنبها
فجاه سمعت اذان الفجر فقالت : اعوذ بالله من الشيطان الرجيم يارب اجعله خير و احفظ اخويا وطمني عليه في القريب العاجل
وقامت اتوضيت وصليت الفجر ونزلت على المطبخ عملت فطار لنفسها وكمان شوية مخبوزات للعيلة و اكلت و طلعت تجري بس مش زي كل يوم.... لا كان مختلف فمسؤوليتها كل شويه بتزيد.... وبتفكر في كل حاجه حصلت.... وهتعمل ايه فاللي جاي
افتكرت كلام قاسم لما قال : عشان تضمني وجودك في القصر أطول مدة ممكن.... لازم يكون اسد موجود في القصر..... لان الحاج مصطفي عايز اسد يرجع القصر بس هو رافض ودي مهمتك لازم تخلي اسد يرجع يعيش في القصر زي الاول
وقعدت تفكر ازاي هترجعه القصر ؟
وافتكرت كلام على أن ابوها اتقتل و كلام رحاب انه قاسم اللي قتل ابوها..... والست اللي شافتها في المستشفى و الفيديو....بس اللي متأكد منه أن قاسم ملهوش مصلحه في قتل ابوها... يبقى مين اللي عمل كده ؟
و قاسم اللي هيتجوز علي عمتها بعد كام يوم واللي هي السبب فيها لأنها اديله اللي هو عايزه عشان يتجوز اللي بيحبها...ولازم تحل المشكلة دي قبل ما مع عمتها و عيله القناوي يعرفوا... بس ازاي؟
و فريد اخوها اللي متأكد انه عايش بس هو فين؟
و القافله الطبيه و الأطباء الجدد اللي مسؤوله عنهم ولازم تقوم بشغلها اتجاهم
و مشكلة مالك و ملك جوازه من ليالي؟
ورغم زعلها منه بس هو اخوها و لازم توقف معه ومع ملك وما تظلمش حد فيهم... بس ازاي.. تحل المشكلة دي؟
وليلى و مازن اللي اهملتهم الفتره الاخيره واللي بتعتبرهم عيالها ومش اخوتها
و عيلة ابوها اللي مش متقبلينها..... واهمهم اختها فريده لأنها معتبرها امانه من ابوها هي وفريد
وحياتها اللي اكيد في خطر بسبب اللي عملته واللي لسه هتعمله.... ومش هي بس لا كمان كل اللي تعرفوا ولازم تحميهم كلهم.... حتى لو كان التمن حياتها
وقعدت تفكر في كل دا وماحسيتش بالوقت وهي بتجري
....................................................................
في فيلا اسد
قام وصحي بنشاط ولبس شيك جدا ونزل بسرعه عشان يروح يفطر في قصر القناوي و يشوف حبيبته فيروز اللي بقت مراته ونزل على السلم
احد الخدم : اعملك قهوه يا أسد بيه؟
اسد : لا هشربها في قصر القناوي
وطلع وركب عربيته ولسه هيتحرك ركب فارس العربية جنبه
اسد ب استغراب: في ايه؟
فارس ربط الحزام وقال : هروح معاك
اسد : ليه؟
فارس بابتسامة : اولا عشان افطر.... وثانيا عشان اتفرج على اللي هيحصل انهاردة في القصر... اصلي اتبسطت امبارح اوي الصراحه
اسد بسخريه : لا يا شيخ
فارس بابتسامة: قصر القناوي بقى مسلي اوي
اسد بعصبيه : نزل ياض
فارس : ابدا لازم اشوف بنفسي هيحصل ايه انهاردة على الفطار
اسد بابتسامة : تدفع كام؟
فارس : عايز ايه؟
اسد بمكر : هقولك بعدين...
فارس : انا معيش فلوس... دا غير اني واحد دخل على جواز
اسد بسخرية : هو انا لما هاعوز فلوس هاطلب منك يا معفن
فارس : اومال عايز ايه؟
اسد بمكر : طلب صغير خالص
فارس : مش مطمنلك
قاسم بغموض :متخافش
فارس : ربنا يستر
وتحرك على قصر القناوي
.......................................................................
قصر القناوي
الكل من في القصر في غرفة الطعام ماعدا فيروز ودلال
صفيه : اومال فين فيروز ياما؟
الحاجة فاطمة : معرفش انا امبارح بعد ما نامت جمت من جنبيها
اسد وفارس دخلوا
اسد : السلام عليكم
الكل : وعليكم السلام ورحمة الله وبركاته
الحاج مصطفى : اجعدوا يا ولاد افطروا معانا
اسد قعد في مكانه ولسه فارس هيقعد جنبه
اسد بهمس : دا مكان فيروز
فارس بهمس : لا ياشيخ يعني فيروز تعقد جنبك و تطرد صاحبك اللي تعرفه من زمان عشانها
اسد بهمس : وطرد ابويا ذات نفسه
فارس بهمس : واطي يا مان
الحاج محمد لفارس ب استغراب : مالك ياولدي ما تجعد وجف كده ليه؟
فارس بهمس : منك الله يا أسد جبتلي الكلام ثم قال بصوت عالي : بصراحه يا حاج محمد كنت بفكر اقعد جنب اسد بس قلت في نفسي يا واد يا فارس انت على طول مع اسد مش هتقعد هنا كمان جنبه فقلت اقعد جنبك يا حاج اصلي مش بشوفك كتير وانت وحشتني الصراحه
اسد ابتسم وقال بهمس : برافو عليك يا ابو الفوارس بتحل اي مشكله في ثانيه
فارس بهمس : هتتردلك قريب وتشوف
الحاج محمد : تعال يا ولدي الكرسي اللي جنبي فاضي
فارس راح قعد جنب الحاج محمد وحمزه على الناحيه الاخر
فريده : يا داده فيه ميني باتيه تاني؟
داده : اه هروح اجيب من المطبخ
وراحت
فريده : تسلم ايدك يا صفصف بجد باتيه طعمه تحفه
صفيه بابتسامة : بالهنا والشفا... بس مش انا اللي عملته.... ثم وجهت الكلام الي الحاجة فاطمة وقالت : انتي اللي عملته ياما؟
الحاجة فاطمة : لا يا بنتي انا معرفش اعمل الحاجات دي
فريده : ماما انت بعتي حد يجيب باتيه من المخبز
حياة : لا ممكن الداده عملتهم
جاءت الداده ومعها طبق وقالت لفريده : اتفضلي
فارس : وانا كمان عايز ادوق الباتيه
الداده جمالات : اتفضل
فارس بعد ما اكله : بجد تحفه تسلمك يا داده دا احلا من اللي في الفنادق
الداده جمالات : مش انا اللي عملته دي الست صفيه
صفيه بصدمه : لا مش انا
الداده جمالات : انا صحيت دخلت المطبخ لقيتهم قلت يبقى انت اكيد اللي عملتيهم حتي فيه حلويات كمان
فارس : دول يلزموني جبيهم يا داده
الداده جمالات : حاضر
وراحت
سناء بمكر : ممكن تكون دلال عملتهم أصلها يا حبت عيني منامتش من امبارح من ساعه اللي حصل
حياه بكره : اللي حصل صعب علينا كلنا
واسد مش معهم مركز على السلم
الحاجة فاطمة : مالك يا ولدي مش بتاكل ليه؟
فارس بمكر :لا اصله مستني الاكل اللي ينزل من فوق
الحاجة فاطمة باستغراب: ازاي يعني؟
نزلت دلال و قعدت جنب اسد مكان فيروز
اسد كان هيقولها تقوم بس خجل بعد اللي حصل امبارح
فارس اول ما شاف اللي حصل ضحك بصوت عالي على شكل اسد
اسد بصه بكره
د. مصطفى : مالك اتجنت بتضحك لوحدك؟
فارس بابتسامه هو بيبص على اسد : اصل في ناس جت عليا وربنا انتقامي منهم أشد انتقام
اسد : طب كل يا خويا احسن يكون آخر يوم في عمرك ولا حاجة
الحاجة فاطمة : بعد الشر يا ولدي... دا لسه صغير
فارس : قوليه يا حاجة...... ربنا على الظالم والمفتري
جات الداده ومعها الحلويات ووضعتهم على السفره
سناء بمكر : تسلم ايدك يا دلال على الحاجات الحلوه دي
دلال افتكرت ان عمتها سناء هي اللي عملتهم و قالت انها عملتهم فقالت : بالهنا والشفا على جلبكم
فارس : بجد يا دلال انتي ولا الشيف الشربيني
دلال بغرور : دي أقل حاجه عندي
حلا : انا عايزكي تعلميني يا دلال
دلال بتوتر : حاضر
الحاج مصطفى : تسلميلي ايدك يا بنتي عشان عملتي حسابي
دلال بابتسامه : بالهنا والشفا يا جدي
فارس : اومال في مرات الأسد؟ ..... قصدي الدكتورة فيروز
اسد ركز معه
صفيه : معرفش مش جعد في الجصر
فريده بفرح : الحمد لله طفشت
دخلت فيروز في هذه اللحظة وقالت : مين هي اللي طفشت؟
الكل اتصدم من شكل فيروز اللي لبس ملابس رياضه ورابطه الجاكيت في وسطها و جسمها كله ميه من الجري
الحاجة فاطمة بقلق : مالك يا بنتي؟
فيروز : كنت بلعب رياضة
صفيه : تعال افطري شكلك جعانه
فيروز : هروح اغسل ايدي الاول
وراحت فيروز غسلت ايديها و مسحت جسمها بفوطة وراحت علي غرفة الطعام
وشافت دلال قعد مكانها بس كبرت دمغها عشان مش ناقصه كلام على الصبح وقعدت جنب جدتها
فيروز : معلش يا داده ممكن كوبايه عصير لو مفيهاش تعب
الدادة : حاضر يا بنتي
وقعدت فيروز مابتاكلش ومستنيه العصير
الحاجة فاطمة : ما بتاكليش ليه يا بنتي؟
فيروز : انا فطرت
صفيه ب استغراب : ميتا؟
فيروز بصت على الساعة اللي في ايديها وقالت : تقريبا من ٣ ساعات
الحاجة فاطمة بصدمه : واه وايه اللي صحاكي بدري كده؟
فيروز بابتسامه : انا اتعودت علي كده... بابا علمني حتي لو نايمه متأخر اصحي بدري
الحاجة فاطمة : الله يرحمه... فعلا ابوكي كان بيصحى اول واحد في البلد كليتها
فيروز بحزن : الله يرحمه
سناء بمكر : دوجي اللي عامله دلال خفيف على المعده
فيروز بابتسامه : فين دا؟
دلال : الباتيه دا
فيروز بصدمه : نعم!
سناء بمكر : طبعا مستغرب فاكره جايبينه من المخبر... بس دلال هي اللي عامله...وطبعا انتي متعرفيش تدخلي المطبخ تعملي كوبايه شاي مش كده؟
فارس لحمزه بهمس : ولعت
حمزه بهمس: وانت فرحنا ليه؟
فارس بهمس : انا جاي اتفرج اصلا
حمزه بصدمه : لا ياشيخ
فارس : اسكت خليني اتفرج
فيروز ابتسمت وقالت بمكر: بجد...متقولي يا دلال دا معمول بالسمنه مش كده؟
دلال بغرور : ايوه بالسمنه البلدي
فيروز بابتسامه : بس دا معمول بالزبده
دلال اتوترت
الحاجة فاطمة : وانتي عرفتي من فين؟
فيروز بابتسامه : اصل انا اللي عملته قبل ما اطلع اجري.... حتى.. وشاورت على الطبق اللي قدام الحاج مصطفى.... دا معمول بسكر دايت عشان عارفه ان جدو مصطفى عنده سكر
فارس بابتسامه : الله عليكي يا قاصفه الجبهات
الكل اتصدم ان فيروز هي اللي عمله الباتيه
سميحه بسخريه : مش عيب عليكم تكدبوا علينا وانتم في السن ده
فيروز عايزه تقفل الموضوع وبصت على فارس وقالت: صح انت اسمك ايه... اصل شفتك كتير ومعرفش اسمك ؟
فارس بابتسامه : انا فارس البشيري الصاحب الانتيم لجوزك يعني هتشوفيني كتير
فيروز : اه انا شفتك قبل كده عند انكل على
فارس : اه حمايا
فيروز ب استغراب : حماك ازاي؟
فارس : اصل انا هاخد بنته
فيروز بصدمه : بنته ملك؟
فارس : لا ملاك
فيروز في سرها : هو انا ناقصه مشاكل... يارب حلها من عندك...
فارس : خطوبتنا بعد اربع ايام اكيد انتي من المعزومين
فيروز :ملك و ملاك اخوات اكيد هكون معاهم.. بس خلي بالك انا حماتك فكر بس تزعلها وقتها استحمل اللي هعمله فيك
فارس بخوف : ربنا يستر
واكمل في سره : وانا اقول ملاك طلع كده لمين؟
جاءت الداده جمالات وقالت : اتفضلي يا بنتي العصير
فيروز : انا عندي حساسيه من الفراوله.
الحاجة فاطمة : زي ابوكي
فيروز : متشغليش بالك انا شبه بابا في ايه؟... لان هتلاقيني صوره طبق الاصل منه
الداده جمالات : هروح اجبلك عصير غيره
فيروز : لا انا اصلا فطرت بس قلت ميصحش محترمش قوانين البيت حتى في وقت الاكل رغم انتوا بتفطروا متأخر اوي
الحاج مصطفى بسخريه : وايه كمان يا بنت مصطفى؟
فيروز بابتسامه : اصل بابا قالي ان حضرتك كنت بتفطر كمان بدري عن كده... بس انا شايفه غير كده شكلك عجزت... وبقيت مش بتصحي بدري
الحاج مصطفى بمكر : مين جال كده انا شفتك وانتي طلع من البيت والدنيا لسه منورتش
الحاجة فاطمة : اوه بتطلع من البيت والناس لسه مصحيتش افرضي حد عملك حاجه
فيروز في سرها : ههههههههههه بتلعب معايا يا حاج مصطفى بس اصبر عليا وشوف انا هعمل ايه؟
سناء : ما هي تربيه الخواجات
فيروز :انا تربية مصطفى محمد القناوي...وبعدين مين قال ان مفيش ستات بتطلع تلعب رياضة في الوقت دا.... انا عارفه ان تيته فيروز مرات جدو مصطفي كنت بتحب تطلع الصبح تجري ومش كده بس لا وكمان جدو مصطفى كان بيطلع معها مش كده يا جدو؟
فارس في سره : يا بنت ايه ضرب في الجون
الحاج مصطفى بصدمه : عرفتي من فين؟
فيروز : عيب عليك يا راجل انا عارفه كل حاجه عنكم حتى اتفه التفاصيل.... يعني مثلا حمزه كان عايز يبقى مهندس بس مجموعه كان قليل فدخل تجارة وكان ممكن يدخل خاص بس حب يعتمد على نفسه
الكل اتصدم من كلامها
فيروز بابتسامه: ونقول مين كمان.... مرات ابويا حياة
الكل ركز معها مستني هتقول ايه
فيروز بمكر : كانت بتشتري اكل من بره وتقول لبابا انها اللي عمله عشان بابا مكانش بيحب ياكل من بره.... لأنها مبتعرفش تعمل حاجة في المطبخ
حياه بصدمه : انتي جبتي الكلام دا من فين؟
فيروز مردتش عليها وأكملت : وكمان نقول مين..عمي أحمد
احمد بلع ريقه بخوف
فيروز : كان بيحب واحدة زمان قبل ما يتجوز...بس هي مين يا عمي؟
الكل بص على احمد
احمد بتوتر : الكلام ده مش صح
فيروز بابتسامه : عيب عليك يا عمي انا مش بقول حاجه اللي لما اكون متأكد منها مليون في الميه بس متتعبش نفسك انا عارفها لوحدي
احمد توتر
فيروز بابتسامه : نقول كمان زوجي العزيز
اسد بصها بابتسامه وهو مستني يعرف هي تعرف ايه عنه
فيروز بابتسامه : واسد زوجي العزيز كان بيحب واحده في روسيا اسمها فيروز
الكل اتصدم لكن كانت الصدمه الكبرى من نصيب اسد وفارس
فيروز اكملت : بس هي ماتت مش كده؟
اسد بصدمه : انتي عرفتي من فين؟
فيروز قامت هي وصلت للي هي عايزة
ولسه هتطلع من غرفة الطعام... اسد مسكها وقال بعصبيه : من فين عرفتي؟
فيروز ابتسمت و رفعت نفسها في طول اسد
وقالت بهمس لا يسمعه غيره : لأن انا فيروز اللي كنت بتحبها
ونزلت وعلى وجه اسد الصدم وطلعت فيروز الي جناح اسد و هي فرحنا
فيروز :كده خلصت من موضوع اسد وكلها يوم بكتير و يرجع يعيش في القصر
والدور الجاي على 🙃
....................................................................
تحياتي كوكي بهجوري
انتهى الفصل (التصويت لو سمحتوا)
ياترى الدور الجاي على مين؟
اسد بعد ما عرف ان حبيبته عايشه هيعمل ايه؟
احمد بعد ما حس بخطر ناحية فيروز هل هيسيبها عايشة؟
انتظروا كل ما هو جديد
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!