رواية جارنا الثامن الفصل الرابع 4 - بقلم دانيا

رواية جارنا الثامن

الفصل الرابع4

بقلم دانيا

بقيت قاعده في نص السرير وبحاول اتنفس بصعوبة ،، بقيت بعاين حولي شايفه البنات ببكوا بس م فاهمه اي حاجه بقيت بحاول استجمع انا وين وديل منن ومالهم والزول وينو مشى وين من شدة الخوف لمن حسيت نفسي محمومه خلود بقت تسأل فيني في شنو يابت مالك شفتي كابوس ؟ وانا بقيت اعاين ليها زي الما نصيحه ، راجلها قعد جنب بناتو وبحاول يهدئ فيهم ورجعوا نامو البنات المساكين اصلاً صحوا على صوتي.

خلود قالت لي نومي دا مجرد كابوس ، اتغطيت وعملت نفسي نايمه وهم طلعوا مشو بقيت صاحيه للصباح....الصباح بعد شراب الشاي قلت ل خلود عاوزة امشي لأمونه بت عمي بهناك هسي بجي ،، طلعت عاوزة امشي بيت عمي شفت الراجل كان جاي من الدكان وشايل حاجات كتيرة ، قلت دا طالما براهو كيف مشتري حاجات كتيره كدا ؟ المحير في الموضوع حته اكياس العيش كانت كتيره ؛ قلت الزول دا فيهو حاجه م طبيعيه لكن يا خديجه مالك ومالو م تخشي في شؤون غيرك .

دنقرت راسي ومشيت بس عشان م تجي عيني في عيونو ،، مشت بيت عمي لقيت امونه قالت لي ماشه الملحمه تمشي معاي؟ قلت ليها ليه انتي صهيب وين ما يمشي هو ؟ قالت لي صهيب مشى السوق....طلعنا مشينا اول ما وصلنا هسي كانت بتتكلم مع الجزار وانا كنت منتبهه مع الشارع وشارده في الكابوس حق امبارح.

فجأه لمحت الراجل داك كان ماشي بإتجاه طرف الحله وكان بتكلم بتلفون ،، من غير ما احس لقيت نفسي ماشه وراهو....وصل نهاية الحله في مشروع حق قصب زارعنو يعني قايم بكون زي متر ونص من الأرض مشى وقف بهناك للمشروع ، انا جيت وقفت بين القصب عشان م يشوفني .

فجأه وقف وسلم على زول م قدرت اشوف وشو كان متكمكم بشال ،، قال ليهو اها الأمور عندك ماشه كيف ؟ قال ليهو بصوت منخفض كدا والله الأمور طيبه لحد الآن قفلوا 15 بت ، التاني قال ليهو اوعى يكون فيهم بنات من نفس المنطقه....انا بقيت واقفه مصدومه وبقيت ارجف قلت بنات شنو ؟ عارفه نفسي م بقدر اسكت قفلت خشمي بيدي ،، قال ليهو لالا كلهم من المناطق المجاورة ، تاني قام سألوا قال ليهو اها ناس القريه تعاملهم كيف إن شاء الله م شكوا في حاجه؟ دخل يدينو في جيوبو وابتسم إبتسامه كلها خبث قال ليهو يشكوا شنو انا ما قلت ليهم انا ود اخو حاج محمود وهم صدقوا م بعرفوا الأغبياء إنو حاج محمود م عندو اخو ولا ود اخو حتى ، والأغرب من كدا هم م بعرفوا حاج محمود مات ليهو سنتين