رواية جارنا الثامن الفصل الثالث 3 - بقلم دانيا

رواية جارنا الثامن

الفصل الثالث3

بقلم دانيا

بقيت اتلفت افتش في مصدر الصوت دا جاي من وين ؟ آخر شيء كان في غرفه بابها صغير بفتح على السلم ،، بس حسيتو دا م بابها الرئيسي لأنو مافي زول عاقل بخلي داخل البيت وبفتح الباب على السلم وفي نفس الوقت الحيطه حوالين الباب كانت رطبه يعني زي كأنو الباب دا عاملنو جديد...قربت للباب بقيت اتصنت سمعت اصوات م قدرت اميزها كانت عباره عن همهمه.

الباب كان مقفول بالترباس من برا من غير طبله ،، بس قبل الحق افتح الباب سمعت صوت اقدام جايه بنفس الإتجاه ، فتحت باب السلم براحه وطلعت قلت هوي يا خديجه لو قعدتي اكتر من كدا ح تتمسكي احسن ترجعي ، ماشه على باب الشارع قبل اصل سمعت صوت وراي قال " خير إن شاء الله " فجأه حسيت حيلي كله انهدى وقلبي بقى يضرب بسرعه.... قلت لا يا خديجه م تتلفتي اجري اطلعي قبل يصلك مشيت بسرعه على الباب حاولت افتحو حلف كان يفتح.

حسيت الزول قريب لي قلت مافي حل تاني اتلفتت لقيتو واقف وراي....قلت ليهو بصوت متردد كورة اولاد اختي وقعت هنا وجيت عشان اجيبها ، م اتكلم معاي بس بقى يعاين فيني بنظرة حاده ، الباب براهو فتح طلعت كانت الدنيا على وشك المغرب مشيت بخطوات مسرعه دخلت بيت ناس اختي خلود ، صادفت صهيب في وشي قال لي جايه من وين ترجفي ؟ قلت ليهو مرسله ومشيت منو.

لقيت خلود ونسيبتها جو قعدت معاهن في المطبخ ، قلت ل خلود مبروك الجيران الجدد على الأقل كدا احسن من البيت يقعد فاضي ويتسكن بالجنون ،، بقن يضحكن قالت لي جيران شنو هو زول واحد اخير عدمو والله ، بقيت سارحه بفكر قلت لو حكيت ليها ح تشاكلني احسن اسكت.

بالليل نمت مع بناتها منى ومرافي في غرفتهم ،، بالليل بقيت بشوف نفسي رجعت تاني للبيت داك ومشيت بالباب الرئيسي دخلت بالهول م كان في زول جيت وقفت قدام القرفه ديك لقيت مدققين ستاره في مكان الباب ، زحيت الستاره لقيت الباب مبني ومجير زيو وزي باقي الحيطان كأنو م كان في باب هنا.

لفيت مشيت بإتجاه السلم مكان الباب الصغير ، لقيتو متربس زي ماهو ولسه في اصوات طالعه من جوا.....مسكت الترباس عاوزة افتح الباب حسيت بيد مسكتني من كتفي متا من الخوف اتلفتت بخلعه لقيتو دا نفس الزول قبل اعمل اي حركه مسكني من رقبتي وخنقني بقوة بقيت م قادره اتنفس ،، فجأه صحيت مخلوعه لقيت نفسي قاعده اصرخ لمن البنات صحوا وقعدوا يبكوا ، خلود وراجلها جوا جاريين مالكم في شنو