رواية جمعتنا فرصة عمل الفصل السابع عشر 17 - بقلم تقي محمد

لمن شلت رخصة ممارسة المهنه اول حاجه جات في وشي هي بس الظروف كانت قويه إنها تمنعنا امي مرضت شديد وكان لازم نسافر الهند عشان العلاج للأسف كان عندها ورم في الراس سافرت معاها ورسلت إسماعيل اخوي السودان ينفذ وصية ابوي كان وصاني بيها قبل يموت بتزكر قال لي يا إيهاب اخوي لازم ياخد حقو إيهاب حق اخوي دا دين في رقبتي ورقبتك إسماعيل فعلا نزل السودان وانا إنشغلت مع أمي لحدي ما إتعالجت الحمد لله لمن رجعنا السعوديه سألت إسماعيل عمل شنو في الموضوع وهنا كانت الصدمه إنهم رحلو وهو ما عرف ليهم اي مكان وقدر ما بحث مالقى اخبار عنهم لحدي ما....

القصه وقفت هنا قلت ياربي حصل شنو بعد داك ولقى عمو ولا لأ ودي منو البحبها دكتور إيهاب دي شكلها محظوظه شديد والله بي دكتور إيهاب دكتور قدر الدنيا وزول محترم شديد ووسيم العشاء ازن قمت صليت وسخنت لي اكل إتعشيت جهزت ملابسي ومشيت رقدتا كنت تعبانه شديد اول ما ختيت راسي في السرير نمتا

صحيت الصباح جهزت نفسي وشربت الشاي ومشيت المستشفى وصلت المكتب لقيتو مقفول إستغربت معقوله انا جيت بدري؟ عاينت لي الساعه نفس الوقت البجي فيهو كل يوم مشيت لي السكرتيره قلت ليها عايزه المفتاح عاينت لي من فوق لي تحت وجاتني قريب قالت لي انا ممكن اسألك سؤال قلت ليها إتفضلي قالت لي احلا انا ولا إنتي قلت ليها كيف ما فهمتا🐸 قالت لي إنتي هبله قلت ليها إنتي حلوه بعترف وجميله بس السؤال دا ليه قالت لي تعترفي شنو انا احلى منك بي مراحل بس ليه دكتور إيهاب ما شايفني🐸 قلت ليها ودا علاقتو بي شنو؟ يا أستاذه يشوفك ما يشوفك انا دخلي شنو قالت لي اسمعيني المفتاح م بديك ليهو اوامر دكتور إيهاب لو هو ما جاء المكتب ما يتفتح قلت ليها من متين الكلام دا قالت لي من زمان قلت ليها ايواا من زمان براك قلتيها لمن كان المكتب ليهو براهو بس هسي مكتبي انا جوه اعمل شنو ؟ قالت لي إنتظري ،،ياخ كرهتها كره قربت اضربا بالشنطه الشايلاها دي مشيت لي سحر قالت لي مالك وشك داير يقع منك إبتسمي يابت من الصباح خلي الامل يشرق قلت ليها هي خلت فيها امل قالت لي منو قلت ليها القشرنينه دي عاينت لي قلت ليها السكرتيره قالت لي اها مالا قلت لي لقيت المكتب مقفول مشيت اشيل منها المفتاح شبكتني انا جميله وانا شنو وانا شنو ياخ كرهتني وفي النهايه ابت تديني المفتاح قالت لي دكتور إيهاب قال ممنوع المكتب يتفتح الا اذا هو جاء قالت لي ما تزعلي يا صحبتي اصلها بتغار منك😉 قلت ليها تغار من شنو عاجباها حياتي حقت الكادحين دي ولا شنو قالت لي ما علينا دكتور إيهاب لسه ما جاء؟! قلت ليها اول مره يتأخر قالت لي بكون في حاجه شاغلاهو عموما تعالي إستضيفك في مكتبي بقيتي نازحه وقعدت تضحك مشيت معاها طبعا ما وريتكم سحر بعد ما إشتغل مع دكتور رائد لقت شغل العمليات صعب طوالي رجعت لي العمبر ،،ادتني إسكارب لبستهم ومشيت العمبر حقنا لفيت على المرضى طبعا انا شغاله عمليات بس مع دكتور إيهاب رجعت لقيت سحر ماشه تنفذ قلت ليها جيبي انفذ معاك اصلا مافي موضوع قالت لي طوالي قسمت لي هي دخلت عمبر الرجال وانا دخلت عمبر الحريم نفذنا الجرع وجينا قلت ليها كدي امشي المكتب اشوفوا جاء ولا لا قالت لي تماام ولو ما جاء تعالي ساعديني😉 قلت ليها مصلحجيه مشيت لقيت المكتب فاتح رجعت مكتب سحر طلعت الاسكار ولبست ملابسي قالت لي جاء قلت ليها شكلو لانو المكتب فاتح قالت لي يا خساره🙂 مشيت دخلت لقيتو قاعد قلت السلام عليكم عاين لي قال وعليكم السلام حسيت صوتو متغير قلت ليهو إنت كويس؟ قال لي كويس مالك إتأخرتي قلت ليهو جيت من سبعه والله بس لقيت المكتب مقفول قال لي ما عارفه المفتاح عند السكرتيره قلت ليهو ما عارفه وسكتا على كدا مدى لي ملف قال لي دا حق العمليه حقت الليله اقريهو شلت الملف منو وقعدت اقرا فيهو لمن إنتهيت دايره اناقش معاهو الحاله لقيتو راقد في الدرج وكان شكلو تعبان سكتا بقيت اعاين ليهو كان بتعب روحو في الشغل كتير ما كان بس بدخل عمليات كان بدير مستشفى كامله براهو من طاقم وإسطاف ولو حصلت اي حاجه بتكون مسئوليتو زمان لمن كانو بقولو الدكتور لمن ينتهي برتاح إكتشفت العكس هسي دكتور إيهاب دا اربعه وعشرين ساعه ماسك المراجع وبقرأ بيتفقد المرضى اكتر من مره في اليوم ولازم يقرأ حالة اي مريض على الاقل مرتين المهمه ما ساهله كان دكتور كان ممرض الاتنين بحتكو بالمريض شديد انا من جيت المستشفى دي حسيت انو هنا اي زول عندو قدر من الاحترام شايفين إنو اي فرد في المجال الطبي عندو اهميه كبيره عشان كدا المستشفى دي شغلها سمح والتواصل زاتو بين اعضاء الفريق الطبي قوي شديد بين الممرضين والدكاتره وناس مختبرات حتى الصيادله عندهم تقدير خاص ،،سمعت صوت الباب بدق دكتور إيهاب قال إتفضل دخل رائد قال ليهو اها يا دفعه بقيت كيف قال ليهو احسن عاين لي قال لي ملاذ كيفك قلت ليهو تمااام الحمد لله ،،طلع شريط حبوب من جيبو قال ليهو هاك دا ح ينفعك قال لي ملاذ ممكن تجيبي مويه قلت ليهو حاضر دقيقه بس مشيت سريع جبت مويه وجيت مديتا لي دكتور إيهاب مسكها وبلع الحبوب رائد قال ليهو إرتاح خلي الشغل الليله لي قال ليهو ياريت والله يا رائد انا ما قادر اعمل اي حاجه رائد قال ليهو يا زول لازم ترتاح وما تشيل هم الشغل وين ملفات العمليات عاين لي قال لي الملفات عندك قلت ليهو اي عندي مديتو ليهو قال لي عمليه وحده ؟ دكتور إيهاب قال ليهو اي عمليه وحده شال الملف وقال لي طيب انا ح امشي عندي عمليه بعد شويه خلي بالك منو لحدي ما إنتهي قلت ليهو طيب هو طلع وانا رجعت قعدت في مكتبي قاعده كدا إيهاب قال لي ملاذ.....

واتمهلي من قبل ما تتهوري

ياواحدة دون الناس وما بتتكرري

ياحلى زولا غنو ليه ليك الدلال ادللي

.. 💚

الفصل الثامن عشر

قال لي ملاذ قلت ليهو ايواا قال لي تعالي اقعدي هنا وأشر لي على كرسي قدام المكتب حقو مشيت قعدتا مكان اشر لي قال لي بس خليك كدا قلت ليهو إنت كويس قال لي اي قلت ليهو أمبارح كنت كويس كيف جاك الالتهاب قال لي في زول عاداني،، ممكن اسألك سؤال قلت ليهو إتفضل قال لي إنتي ليه ما حققتي حلمك قلت ليهو كيف يعني قال لي م كان حلمك إنك تقري طب قلت لي اي بس كيف عرفت قال لي حزرت بس وطلع كلامي صح قلت ليهو فعلا كان حلمي اقرأ طب بس ما جبتا النسبه ولمن دخلت تمريض حبيت المهنه شديد وواصلت فيها قال لي حلوو اهم حاجه الانسان يحب مهنتو قلت ليهو إنت اصلا حلمك كان طب؟ قال لي ممكن تقولي كدا حلم كنت بحلم بيهو من زمان ولمن إتحقق كان ناقص حاجات كتيره ..قبل يتم كلامو سمعنا صوت الباب إيهاب قال إتفضل جات داخل السكرتيره اول ما شافتني صرت لي وشها ما عارفه ليه بتكرهني البت دي قالت لي دكتور إيهاب يا دكتور إيهاب اخوك إسماعيل بره قال عايزك قال ليها طيب جاي هي طلعت دكتور إيهاب وقف قال لي شويه وراجع قلت ليهو تماام طلع إستغربت ليه ما قال ليها تخليهو يجي هنا ما دا مكتبو في النهايه ..بعد مسافه دكتور رائد جاء قال لي إيهاب مشى وين قلت ليهو طلع مشى يقابل اخوهو بره قال لي الليله م ح يكون في عمليات عشان كدا تقدري تمشي قلت ليهو كويس هو طلع وانا رتبتا المكتب وطلعتا لمن جيت طالعه شايفاهم من بعيد واقفين دكتور إيهاب واخوهو بس ما قدرت اشوف اخوهو سمح المهم طلعتا مشيت الشقه ما كان في موضوع والوقت كان بدري فتحت التلفزيون وبديت احضر في فيلم كان ممل شديد خطر في بالي إتصل على زهره وريم مكالمة فيديو إشتقت ليهم شديد إتصلت مسافه ماردوا علي قفلت التلفون ورقدتا نمت صحيت العصر صليت ونزلتا تحت جمب المجمع إشتريت لي فشار وحلويات لمن كنت طالعه لاقتني بت سلمت علي قالت لي إنتي ساكنه معانا هنا قلت ليها اي قالت لي معناها شغاله معانا في المستشفى قلت ليها اي قالت لي بس ما قاعده اشوفك شغاله شنو إنتي قلت في نفسي دي شنو البت الفضوليه دي قلت ليها شغاله ممرضه قالت انا برضو ممرضه في وحدة غسيل الكلي إنتي وين قلت ليها انا شغاله في السيرجري قسم جراحة القلب قالت لي مع المدير الطبي ونائبو حظك شكلك عندك مكانه خاصه كان نفسي إشتغل في القسم دا لكن ما إتوفقته قلت ليها قسم غسيل الكلي برضو حلو والله قالت لي فعلا ،،اتشرفت بيك إنا سلمى وإنتي قلت ليها انا ملاذ قالت لي طيب يا ملاذ فرصه سعيد قلت ليها انا اسعد مشت وانا بقيت واقفه شلت باقي حاجاتي وطلعتا فتحت الشقه ودخلت نزلت لي فلم من النت وبقيت احضر واكل من الفشار ياخ عدم الموضوع مشكله لمن كنت في السودان ما حصل قطعت موضوع زي دا المهم اليوم مره بي خيرو بي شرو صحيت الصباح زي المعتاد جهزت نفسي ومشيت المستشفى كنت متأكده الليله م ح يكون في شغل بس قلت لو مافي شغل بمشي اشتغل مع سحر ما بقدر اقعد في البيت براي حاسه نفسي ح اجن دخلت لاقاني دكتور إيهاب في وشي🙂 قال لي تأخير قلت ليهو إنت بقيت كويس يعني قال لي اصلا الالتهاب بقعد معاي يوم بس 🙂 قلت ليهو سبحان الله

مشينا المكتب كان عندنا عمليه إتجهزنا ودخلنا خلصناها في ساعه ونص تاني كان عندنا بعدها عمليه طلعنا من دي غيرنا ملابسنا ولبسنا ملابس للعمليه التانيه دخلنا طوالي كان يوم متعب شديد التانيه دي اخدت مننا قريب خمسه ساعات طلعنا بدلنا ملابسنا ونزلنا الكافتريا تحت كانت الساعه وحده فطرنا إيهاب قال لي تاني ما عندنا حاجه قلت ليهو لو كنت قلت لي في عمليه تاني كنت شردت خليت ليك المستشفى قعد يضحك دي كانت تاني مره اشوفو يضحك 🙂 قال لي ح تشردي تمشي وين يعني قلت ليهو ارجع السودان قال لي كويس إنو مافي عمليه تاني طيب قلت ليهو بي مناسبة السودان إجازتي السنويه قربت صح قال لي لسه فاضل كم شهر قلت ليهو الايام دي في العادي بتجري شديد الا لمن الزول يكون منتظرها تمر تمشي بالبطئ قال لي إستمتعي بي كل يوم لانو يوم مشي مابرجع وكل يوم بمشي بنقص من عمرنا عشان كدا لازم نودع ايامنا ونحن مويقنين بي عدم العوده قلت ليهو فعلا كلامك صح

《》《》《》《》《》《》《》

مرت الايام سريع وبقى فاضل لي يومين بس وأخلص السنه وكنت شايفه اليومين ديل كتار كنت متحمسه شديد ارجع بيتنا وحلتنا كنت فرحانه شديد وبحسب في الايام يوم يوم ما بقى فاضل لي كتير جهزت شنطتي خليتا جاهزه مشيت المستشفى لاقتني سحر قالت لي يا حليلك يا ملاذ ح إشتاق ليك والله تاني منو ح يجي يشتغل معاي ورديتي قلت ليها شوق بتاع مصالح 🙂💔 قالت لي بهظر والله ح إشتاق ليك شديد عليك الله ما تطولي في السودان تعالي راجعه سريع قلت ليها حاضر ما بطول وانا زاتي ح إشتاق ليك والله ،،بعدها افترقنا هي مشت مكتبها وانا مشيت المكتب صبحت على دكتور إيهاب قال لي بكره إجازه بالنسبه ليك جهزي فيها نفسك وطلع طوالي حسيت بيهو زي المكتئب كدا المهم ما ركزتا إتزكرتا القصه قلت اصور منها بعدين اقراها لمن ارجع السودان طبعا فضولي كان قوي كان نفسي اعرف البت دي منو البتكلم عنها دكتور إيهاب بس خفتا يجي يلقاني مشيت سريع قفلت الباب فتحت الدرج ما لقيتا 💔 فتحت الدرج البعدو لقيتا فيهو فتحت الصفحه مكان وقفت اخر مره وصورة كم صوره إنتبهت إنو باقي الروايه متمومه بالحبر شكلها كان لسه ما إنتهت قفلت الكتاب ورجعتو في مكانو ومشيت فتحت الباب جريمه كامله🙂💔 المهم دخلنا العمليه الاخيره لي طبعا وبعدها طلعنا جو كلهم ودعوني دكتور رائد وسحر والممرضات الاشتغلت معاهم وحتى الدكاتر في عنبر الجراحه جو ودعوني الا دكتور إيهاب ما ودعني لمن مشو دخلت المكتب لقيتو قاعد قلت ليهو طيب انا ماشه قال لي كويس💔 تخيلو قلت في نفسي على الاقل كان تقول لي تصلي بالسلامه طلعتا ومشيت البيت ارتحت باقي اليوم وصباح اليوم التاني مشيت السوق إشتريت هدايا لي ناس أمي واخواني وابوي حتى زهره وريم إشتريت ليهم هدايا المهم غلفتهم كلهم وشلتهم ومشيت البيت كنت جعانه شديد فطرتا ورقدتا نمتا صحيت بعد ازان الضهر قمت صليت وطلعت مشيت لي جيراني الاتعرفت عليهم ودعتهم وجيت راجعه السماء كانت مغيمه وسمحه شديد وقفت في البلكونه وبعاين شفت دكتور إيهاب طالع من المستشفى كان بتكلم بالتلفون كان عليهو هيبه بس مغرور😒 عاينت الشارع كلو بعد شويه المطره بقت تصب رزاز رزاز يا سلام شعور حلو خلاص بقيت انطط تاني إتزكرت إني واقفه في الشارع هسي الناس ديل يقولوا علي شنو دخلت لبست لي عبايه وطلعتا بره قعدتا تحت المجمع ما كان في زول في الشارع بقيت اعاين للمناظر لمن كترت دخلت جوه حسيت بالجوع عملت الغداء وبقيت اكل سمعت صوت الرعد😣 من زمان بكره الصوت دا

لانو امي كانت بتخوفنا لمن نطلع نلعب في المطر تقول لينا وب عليكم الرعده ح تقع فيكم طوالي كنا نجري ندخل وغير كدا صوتو عالي مشيت قفلت البلكونه وبقيت قاعده جوه لحدي ما الصوت وقف والمطر وقفت....

مره باقي اليوم وجاء اليوم المنتظر😍...