رواية جمعتنا فرصة عمل الفصل التاسع عشر 19 - بقلم تقي محمد

صحيت الصباح بدري طيارتي كانت الساعه ٥ جهزت نفسي و شربت الشاي ورتبت الشقه اصلا ما كانت وسخانه لانو أمبارح رتبتها وجريت شنطتي نزلت طبعا ما كان في زول صاحي وانا نسيت امبارح ادي المفتاح لي السكرتيره إتصلت على البت الساكنه جمبي ديك كان إسمها رهان دقيت ليها ردت بعد مسافه قلت ليها رهان معليش على الازعاج بس انا طالعه على المطار دايره اديك المفتاح بتاع الشقه امبارح نسيت اديهو لي السكرتيره قالت لي طيب دقيقه اجيك طالعه دقيقتين كدا جاتني طالعه ودعتني واديتا المفتاح طلعتا بره كان في عربيه واقفه قدام الباب بعد شويه الزول نزل خفت قربتا ارجع لمن شفتو دكتور إيهاب إطمنتا جاء علي فتح لي الباب التاني قال لي اركبي اوصلك المطار قلت ليهو شكرا بدبر حالي قال لي ما تكابري اصلا م ح تلقي عربيه في الوقت دا اركبي اوصلك قلت ليهو بلقى بعدين هسي نحن ما في الشغل يعني ما بتقدر تفرض علي رأيك قال لي طيب امشي جريت الشنطه وبقيت ماشه فعلا كلامو صح ما في اي عربيه في الشارع هو مافي بني ادم زاتو ماشي في الشارع بقيت ماشه وإتلفت بقيت اقول في نفسي هسي انا كان مشيت كدا الوقت ما بتأخر قلت بي صوت والله الوقت بتأخر احسن اشوف لي ترحال فتحت تلفوني بس إتزكرتا انا ما عارفه الموقع البطلبو منو ترحال في زول سحب مني التلفون إتهجمت لقيتو دا إيهاب قال لي براك بتضيعي في زمنك قلت ليهو إنت دخلك شنو قال لي ما عندي دخل قلت ليهو يلا طيب رجع لي تلفوني قال لي لأ وشالو ومشي مشيت لحقتو فتح باب العربيه وجاء شال مني الشنطه قال لي اركبي عاينت ليهو مسافه قال لي الطياره ح تفوتك لو ما ركبتي مشيت ركبتا جاء ركب وقعد يضحك قلت ليهو ما تسخر مني مطره اركب معاك قال لي الزعل دا من شنو ياربي عاينت ليهو بي طرف عيني وسكتا دور العربيه نزلنا في المطار نزل معاي مدى لي صندوق متوسط كدا قال لي توصلي بالسلامه يارب قلت ليهو الله يسلمك بس دا شنو قال لي دي هدية وداع بس ما تفتحيه الا بعد تصلي السودان قلت ليهو ما كان تتعب نفسك كفايه جيتك معاي لحدي هنا ما قصرت والله قال لي امسكي طيب ما ترديني شلتو منو وتاني شكرتو قال لي بس ما تفتحيها الا لمن تصلي السودان اوعديني قلت ليهو طيب وصلني لحدي صالة المغادره وودعني إنتظرني لحدي ما ركبتا حتن مشى كان عندي فضول اعرف جوه الصندوق في شنو

بس ما فتحتو لاني وعدتو لمن وقت الاقلاع جا ياخ كنت سعيده سعاده لاتوصف ومن ركبتا ركبتا شريحتي حقت السودان لمن إستقرينا في الجو إتزكرتا اول مره لمن كنت جايه الفرق إنو المره الفاتت كان معاي ابوي والمره دي انا براي قعدت جمبي بت سلمت علي إتونسنا حبه

وبعدها كل زول ركز في حاجه انا كنت فاتحه تلفوني شويه العب وشويه اعاين في الاستوديو في النهايه قفلتا التلفون ونمت حبه طبعا ما كلمتا زول من ناس بيتنا إني نازله السودان لحدي ما وصلت السودان إتصلت لي ابوي بي رقمي السوداني رده لي بي دهشه كدا قال لي ملاذ!! قلت ليهو اي انا في المطار تعالوا سوقوني قال لي ليه ما كلمتينا من بدري إنك جايه قلت ليهو عملتها ليكم مفاجأه ..

بعد نص ساعه ابوي جاني جريت إشعلقتا في رقبتو قلت ليهو يا ابوي والله إشتقت ليكم شوق مبالغه قال لي حتى نحن إشتقنا ليك شال مني الشنطه ختاها في العربيه كان جاي بي عربية ولد خالتي إسمو مجاهد ركبنا مجاهد قال لي حمد لله علي السلام يا ملاذ قلت ليهو الله يسلمك المهم بعد موال السلام إتحركنا على بيتنا ❤️ اول ما وصلنا جريت قدام ناس ابوي دخلت اول حاجه مشيت إتعلقت في امي قالت لي كديستي طبعا الاسم عشان طوالي متلصقه فيها🤣 قلت ليها والله يا أمي مشتاقين🥺 قالت لي والله يا بتي عاد سفرتك مسخت علي البيت مزن نطت فوقي قالت لي والله مشتاقين يا ملوزه قلت ليها كتير الشوق يا بت قلبي وينو الولد العاق داك قالت لي يابت اخوكي كبر سنه بقى ما عاق قلت ليها نشوف مشيت سلمت علي مزمل قلت ليهو شنو ما عارفني بره ولا شنو قال لي عارفك بس كنت منتظرك تجي تسلمي علي😇 قلت لي مزن قلتي لي شنو قالو لي اسحب كلامي قلت ليها هي اتزكرتا دايره إتصل على ريم وزهره اكلمهم إني جيت اول ما إتصلت ليهم وقعوت فيني نبز قلت ليها هي مالكم زهره قالت لي معقوله تكوني نازله السودان وما نعرف الا من خالتك يا سجمانه لكن اصبري لي لمن اصلك قلت ليها يا زوله هي بطفش قالت لي اصبري بس الا ما ترجيني في البيت ريم قالت لي وب عليك جاياك بي صوت ابوها حق الحمار🐸 قلت ليهم الله يجازي محنكم سريع منتظراكم ولو ما جبتو معاكم قهوة خالتو سعاد ما تجو طبعا خالتو سعاد ام زهره

جوني زهره نطت فوقي وبقينا نبكي الشوق يا جماعه🐸💔 بكينا مسافه وبعدها بقينا نتونس اديت كلو زول هديه ريم قالت لي بالمناسبه يا ملاذ في حاجه عايزين نقولا ليك ....

الفصل العشرون

قلت ليها اها في شنو زهره قالت ليها ما تقولي ليها ياخ ريم قالت ليها بقول ليها ما بقدر ادس اكتر من كدا قلت ليهم في شنو حرقتوا روحي إتكلموا ريم قالت لي زهره خطوبتا بعد بكره قلت ليها نعم؟ قالت لي والله وهي قالت عاملاها مفاجأه ليك لمن عرفنا إنك جايه قلت ليها ما شاء الله ولو ما جيت كنتي ح تنخطبي من دون تكلميني وينو صوت ابوك حق الحمير داك جيبي قالت لي يا بت إنتي هبله معقوله انا اعمل كدا لكن كنت عايزه اكلمك وبكره الخطبه عشان ما تنشغلي وعارفاك لو قلت ليك من بدري ح تصري تجي وما كنت عايزه اشغلك قلت ليها متين بقيتي مؤدبه كدا وبعدين مالو كان جيت يابت إنتي صحبتي من الطفوله إنتي بقيتي اختي عديل معقوله في اخت ح تفوت خطوبة اختها اكيد لا قالت لي هسي ما فات شي لازم تتظبطوا لي خطوبتي قلت ليها اكيد خليني ارتاح باقي اليوم دا ومن بكره ح نجي نصبها معاك قالت لي تنورو انا وريم قعدنا نضحك قلت لي ريم يابت إنتي زهره دي غيرتوها،، ليه بقت مسكينه كدا قالت لي تتزكري لمن كنا بنمشي ليها في البيت ونقعد معاها بالساعات تقوم تطردنا نمشي نكلم ليها امها قلت ليها اي وكانت بتدقها وفي النهايه نمشي وتحوربنا إسبوع بي سبب الدقه ايام ياخ ريم قالت لي اي والله هسي كل وحده فينا بقت عندها مشاغلا قلت ليها اي والله ..

قعدن إتونسن معاي مسافه ومشن بعد مشن دخلت غرفتي شغلتا المكيف ونمتا صحيت العصر إتهجمتا جريت صليت الضهر والعصر لقيتم خاتين صينية الغدا امي نادتني مشيت إتغديت معاهم إتونسنا لحدي المغرب ومشينا انا وأمي الزريبه حلبنا الغنم وجينا امي ختت اللبن في النار يا الله من قنانة اللبن حق أمي إشتقت ليها ناس حلتنا كلهم جو حمدلو لي السلامه وقعدوا معانا مسافه ومشو مره باقي اليوم الصباح فتحت شنطتي رتبت ملابسي في الدولاب اثناء ما برتب كدا في حاجه وقعت لقيت دي الهديه بتاعة دكتور إيهاب رفعتها ختيتا في السرير وكملتا ترتيب جيت دايره افتحها سمعت صوت ريم دخلتها في الدولاب ولبستا عبايتي ومشيت ليها قالت لي لي ساعه منتظراك ارح مشينا بيت ناس زهره رتبنا معاها البيت وكنسنا وشغلنا الغساله غسلنا الملايات لمن إنتهينا العصر ازن عملنا ماسكات في وشينا ريم قالت لينا لازم نمشي السوق في حاجات ناقصه زهره قالت لينا كلمتا زاهر اخوي قال ح يودينا بعد المغرب بالعربيه نشتري الناقص قلت ليها لحدي بعد المغرب ح نقعد معاك متأكده ما ح تطردينا قالت لي ياخ الكلام دا كان زمان ما تحرجوني كلو مره ريم قالت ليها نحن عندنا كرامه قالت ليها إنتي اسكتي خالص اخر من يتكلم عن الكرامه تتزكروا ولا ازكركم قلنا ليها لالا خلاص طبعا فضايح فضايح بس بعد المغرب زاهر جا قال لينا اجهزو لبسنا عباياتنا ومشينا إشترينا حلاوه وناعم جاهز وبسكويت برضو جاهز وعصائر بدره كتيره وفواكه وما خلينا ماسك حايم إلا إشترينا ورجعنا البيت بييتنا مع زهره بعد إصرار منها كرامتنا فوق كل شي🙂😂💔 صحينا الصباح طبعا اليوم المنتظر عملنا ما سكاتنا وزيتنا شعرنا ولفيناهو بي طرح وبدينا نكنس مسكنا الحوش حقهم الكبير داك انا وريم ننضف لحدي ضهرنا ما إنقصه عديل وركبنا الستائر وجهزنا القدامات والعصائر ومشينا إستحمينا بعدها بدا موال صحاني التقديم انا كنت بعبي وريم تقسطر وزهره تاكل🐸 المهم لحدي ما إنتهينا صلينا العصر ومشينا الكوفير مع زهره إتمكيجنا طبعا الكوفير ما بعيد من بيتهم بعد شويه كدا نسمع صوت الطلق والحريم يزغردن جاتنا بت تجري قالت لينا عقدو مشينا لي زهره لقيناها تتكلم في التلفون لمن إنتهت بقت تبكي 🐸 قالت لينا غشاني قال لي خطوبه كيف يعقد وتبكي مسكناها باركنا ليها بعد شويه البكاء إنقلب فرح سبحان مغير الاحوال لبسنا فساتينا زهره قالت عايزه تلبس توب فعلا لبست توب كحلي مع لونا جا رهيب ولبست دهب صيني المهم راجلا جا نحن طلعنا وبعد مسافه جو طالعين انا وريم قعدنا نزغرد ونشيل ونغني ونصفك لاقونا البنات بالدلوكه شلنا معاهم وزهره تشيل وتتكشم طلعنا لقيت ناس أمي جو مزن جات قعدت معانا تغني طبعا مزن اختي مع إنها اصغر مني بس ما شاء الله صحتا سمحه وطويله تتشاف اكبر مني عشان كدا لمن نكون طالعين مكان امي قاعده تقول لينا إتحصنوا المهم لحدي بعد العشاء كدا الناس مشوا فضلنا نحن وام ريم واخوانا وكم مره من حريم الحله رتبنا مع زهره البيت اصرت علينا نبيت معاها بس انا كنت تعبانه تعب وطبعا عارفين بيت المناسبه الاهل ديل تلقيهم قاعدين والناس الجايين من بعيد مستحيل القى راحه إستأذنتا منهم ورجعتا مع ناس امي مشيت زولة نوم بس طوالي نمتا الصباح صحيت بي صوت خالتي جات تسلم علي مشيت اتسوكتا وشلت شاي وبسكويتي ومشيت قدتا جمبها إتونست معاها مسافه قالت لي أمبارح جيتو العقد قلت ليها اي بس ما شفتك قالت لي ماجيت والله كنا عند النسابه قلت ليها والله فاتتك قالت لي مصوره صور وريتا الصور قالت لي حلاتا بت سعاد طلعت حتى راجلا حلاتو عقبال ليك يا يمه يا ملاذ قلت ليها بري انا ما دايره اعرس قالت لي حالتي حجزتك لي مجاهد ولدي قلت ليها الا مجاهد ولدك كان قلتي محمد مسكين لكن مجاهد دا بري قالت لي خلاص بعرسك لي محمد قلت ليها سمح لمن اكون دايره اعرس بكلمك قالت لي شفتي كلامك دا ح تبقي بايره كدا اها صحباتك عرسوهن امي قالت ليها تفي من خشمك بتي ما بتبور قلت ليهو ابور وما ابور فطيره انا 🐸 قفلتوا لي مزاجي زاتو مشبت خليتهم يتونسو فتحت دولابي لقيت هدية دكتور إيهاب شلتها فتحتها لقيت...!!