رواية جوائح الدهر الفصل التاسع 9 - بقلم دعاء رزاق.

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

الظلال تتراقص في زوايا الغرفة وكأنها تعرف أسرار لم يُكشف عنها بعد.
كل شيء هادئ إلا أنّ الصمت نفسه يهمس بتحذير
خطوة واحدة خاطئة كلمة واحدة غير محسوبة
قد تغيّر كل شيء وتفتح أبواب لم تكن مستعدة لها

ـــــــــــــ⊰ ـــــــــــــ

::- رچعت تسبح ولا گانوا نحجي وياها رفعت حاجبها باتجاه الشباك كلنا صرخنا بصوت واحد بس شفنا واحد مخلي وجه على الجام مال شبك وملامحه ما واضحه راساً عاطت استبرق

- علييييي
::- مـجرد نـطقت اسـمه ابتعـد عـن الچـام
گـامـت استبرق فتـحت الـشباگ وعـاطـت

استبرق:: چـنييييي شـنو انـتٓ بـضبط
علي:: شـبيـچ ارچـعي سـدي خـليني اسـمع شـتحـچون

زهره:: اخخخخ من مـنگم ولـد محمد توخر منا لو العب العوچية على ضهرك

:رفع نفسه اكثر لزم شباك وگال
علي:: ام زوزو عـلى گـيفچ ويانا

::- بعـده يـحچي وسـدت الـشبـاگ استبرق
عفس وجه وعـاط بصـوت عـالي ونزل
وخلال هاي الدراما الـصارت غفران مادخـلت ولا نطقت وهذا شي مو جـديـد هي دائماً هيـج

استبرق:: يـلا زهيره كـملي
زهره:: اخذي إخواتج واطلعن منا راسي يوجعني

استبرق: بس...
رحمه:: كـافي خلينا نطـلع
::- بدون نقاش طلعن ثنينهن كدامي طلعت وراهن استدارت غفران وگالت

غفران:: شمدريج احنا هنا ؟
رحمه:: عمي فاضل گلي المهم وهجَ وين ؟
استبرق:: مـادري بيها صـراحـة

- هي مو چانت وياج ؟
- اي بس راحت والله اعلم وين راحت

::- خزرتها ما راضية على كلامها أشرت الهن يرحن للمطبخ كل وحده لزمت شغلة بينا بين ما الكل اجتمع صبوا الاكل بس ابويه وعمي حسين ماكو وجود الهم حتى سلمان وجه ما يتفسر غلست على وضع وكملت ثواني ودخل علي اخذ السفره وفرات وايان يشيلون الأكل
التفتت استبرق الي خزرتها رأساً دارت وجها على غفران وحده صافنه بوجه الثانيه ساكتات
وهذا الأفضل بقدر الإمكان راح اخليهن بعاد عن احفاد سلمان خوفاً ينعاد الصار بيه وياهن.

::- اخذت الماي وطلعت للصاله لمحت حوائح كاعدة بنفس المكان تباوع صفح على سلمان وترجع تباوع بطرف عينها عالكل بدون استثناء وكأنها. تعرفهم بشنو يفكرون خليت الماي بسفره وگعدت بمكاني والكل كذلك رفعت عيني على عمي محمد أتذكر كلامه

قـبـل سـاعـتـين

رحمه:: اگص ايدي اذا تفكيري مو صح
فاضل:: اگصها اني ؟
جوائح:: واني اجيبلگ سچينه
رحمه:: انتٌ شنو وراگم

::- قبل لا يچاوبها عمي اجاها جواب من اخر شخص تتوقعه

- اني وراهم
::- التفتت على صوته فتحت عيوني بصدمه واني اشوف عمي محمد رأساً اتحرك فاضل من مكانه اتقرب على عمي محمد طبطب على كتفه وطلع من البيت كله حسيت نفسي مثل الثوله بنصهم قبل لا انطق كلمه گالت

جوائح :: شفتي شنو ورانا ؟
رحمه:: وحق علي عقلي ضرب من وراكم كل شويه صدمه غير شكل ممكن افهم شكو ؟

محمد:: ماكو شي بعد عمج
رحمه:: عمو شنو وراهم انتٓ وليش كل شغلة تصير يطلع واحد منكم وراها اني اتفهم هدف جوائح وحقها بس انتٓ ليش ؟

::- ابتسم وهو يباوع على جوائح وكأنه يريد يفهمها شي بدون لا يگوله هزت راسها بنفي اتمشه باتجاهي خله ايده على كتفي وگال بنبرة هادئة

محمد:: التركيز باشياء ثانوية يسبب مشاكل الج ويمكن للكل بدون استثناء لهذا سبب يا بعد عمج شنو يصير ومنو وي منو لأ تسألين والأهم كل الاورق المخفية تنكشف بعدين

كمل كلامه وراح الغرفته والحقيقة كلامه خله شگ بگلبي لأنه چان واضح تهديد مبطن والغرب من هذا كله جوائح ما رفعت عينها عني ولا اختفت ابتسامتها

- رحــمـه
::- طلعت من صفنتي على أثر صوتها رفعت عيني على الكل عينهم عليه مستغربين

رحمه:: هــا؟
غفران:: اكــلي لا تصفنين

::- ابتسمت الها واكلت حتى ابعد الشبهات عني صراحتاً صرت اخاف لأن بهذا البيت ما تعرف عدوك من صديقك وعائلة عمي محمد احسهم متربين على الخطط وبعدين انتِ هم تحسون مثلي ؟

غفران:: لا
::- باوعت الها صفح اشرت على استبرق خازره وهج وجوائح تباوع الهن بطرف عينها نكدر نكول راح تصير كاتل ومكتول شلت صحني بيدي وفلتت للمطبخ بحچه اسوي چاي ورا دقائق الكل گام ورجعوا يتعاركون ياهو يشيل المواعين صبيت چاي الي وطلعت للحديقة

تاركه البيت وفوضته اخذت زاوية حتى أخذ راحتي فتحت تليفوني دزيت رساله اله وقفلته انتظره يجي الأن الوحيد الي يعرف شنو جاي يصير من وراي مرت نصف ساعة وهو ماكو أثر اله زفرت نفس بغضب إيست يچي مجرد ردت اكوم انفتح الباب دخل ابويه وعمي وراهم زياد وانمار محد منتبه الوجودي لان بنهاية

فارس:: لا تخلي احد يحس
حسين:: لا حول ولاقوة الا بالله راح انجلط من ورا لا بي خير ولا نفع مسربت

زياد:: حشاك عمي ميخالف كلنا مسربتين

انمار:: صحيح صحيح لازم تتحمل عمي

:: التفت ابويه خزرهم حتى يسكتهم
دخلوا جوه ما عدا زياد وانمار ضليت بمكاني استمع الحديثهم

زياد:: فوكها هو ابو راهي
انمار:: دير بالك يطلع الحچي زياد

- لا ما يطلع
- حتى الايڤار
- ماكدر اضمن الك هذا شي بس احاول
- زياد مجبور تحاول

:-: هز راسه بمعنى اي ودخل بقى انمار عينه على شباك غرفتنا فتح تليفونه كأنه يتصل على شخص مجرد ثواني واشتغلت شاشه تليفوني بسبب اتصال انمار رفضته وإني اشوف ردت فعله عقد حواجبه ما راضي رجع اتصل مره ثانيه نعلت الشيطان وگمت اتمشى باتجاهه

رحمه:: احمم
:-: على أثر صوت التفت الصدمة واضحة علي

انمار:: رحمه
- اي رحمه شبيك مصدوم
- انصدمت بوجودج هنا يعني سمعتي كلشي ؟
- تقريباً اي

- حلو ردتي اچـي واچـيتـچ
::-  وعيونه بعيوني لا ارداي توترت اشرت اله على مكان وگلت

رحمه:: تعال نكعد هناك عندي كم كلمه اريد اسحبهن منك عادي
انمار:: عادي مو مشكلة
::- وفعلاً گعد بصفي شغل جگارته ثبت عيونه على الورد وگال

انمار:: غردي
رحمه:: شنو موضوع عمي وي ابوي

- ماكو موضوع بس اسامه ابن حسين مسويلة سالفة اكبر من راسه وإذا تسألين شنو هي عنده شغل وي واحد وطالب منه يخطف وحده وال**** رايح خاطفها واخت صاحبه هم هسه مرجعها للبيت وأبو راح يتصرف

رحمه:: خطفف ؟؟وانتٓ انمار سكتت إله ما سحلته ؟
- شسحل منه لو ما مرجعها چان الي غير تصرف رحمه اسامه انسان زين بس راح بطريق غلط يحتاج واحد يدلي الطريق الصح ردت أخذه واخلي يتأدب بسجن بس راح

يطلعونه من المشكلة وكأنها ما صارت لهذا تجنيب التصرف بعچله وراح اربي على هادي

- حلو ننتظر ونشوف وهسه منو يعرف بهذا الموضوع غيركم ؟
- فرات يعرف شي ما نعرفه احنا وراح اعرفه قريباً
- مثل شنو ؟
- الله اعلم بس گدر يحوسهم حوس وخلاهم يلتهون عن الراح يصير
- دخيلك ياعلي شيصير مثلاً ؟

:-: قبل لا ينطق ايشي دخل عمي فاضل يفر بسويچ فرحان وانمار ابتسم ابتسامة واسعه لمحنا بطرف عينه وگال

فاضل:: اشوفگم گاعدين هنا
انمار:: صحيح مثل ما تشوف

فاضل::- ادخلوا جوه لا تجيبون الشبهات الكم خصوصاً والدي الكريم ما يرتاح الكم ثنينگم

رحمه:: مع احترامي الگ عمي بس اخر همي ارتاح او لا لأنه ما يهمني صراحة

انمار:: محد يهتم اله بس لازم اخذ حذر كومي ادخلي قبلي.

- ما ادخل اني انتٓ ادخل
- لااااا انتِ ادخلي ما ادخل اني

- گـــلـــت لا انــت ادخـــل
::-وكفت واني متخوصره صفن بوجهي ثواني واستدار على صوت عمي فاضل بدون مقدمات لزم طرف ايدي عمي وگال

فاضل:: أمشي جوه أنمار اني اجيبها واجي وراك.
::- وفعلاً راح انمار وهو ساكت باوعت بطرف عيني على عمي.

فاضل:: عيونج اطفيهم الج .
رحمه:: خـفـت عمي خـفـت
- تحششين حظرت جنابج!
- يمكن اي ويمكن لا
- رحمه عمج اني عمج احترميني لا طيح حظج
- محترمتك عمي محترمتك

::- رجع خزرني وراح كدامي تمشيت سريع سبقته سحبني من ايدي وگال

فاضل: نــدخــل ســـوه
رحمه: يـلا تـمـام
::- دخلنا سوه كلهم مجتمعين بعدهم الا جوائح ماموجودة هيه وفرات اتقربت منهم گعدت بصف غفران اول ما گعدت خلت راسها على گتفي رفعو عيونهم عليها مبتسمين اي لا تستغربون غفران الكل يحبها والاقرب الجدي ومانعرف سبب حبهم إلها

سلمان:: هذا****وينه
::- مسح على وجهه عمي وگال
حسين:: عفته يم صاحبه يچي خلال يومين

- شلوووووووننن تخلييييي هنااااااااك
فارس:: يابه لا تصيح صاحبهم مريض قابل يعوفه
::- التفت النا ابويه وأشر نكوم بعدنا ما اتحركنا
دك تليفون عمي فاضل فتح خط راساً مجرد ثواني وگام من مكانه مصدوم التفت الهم وگال

فاضل:: بستان سرحان مــحتـرك
مجرد نطلق الگلمه الصدمة احتلت الوجوه كلها

سلمان:: منووو گااالك؟
زهره:: ولك خاف يضحكون عليك
فارس:: يمه جاهل حتى يضحكون عليّ
محمد:: لحظه شلون احترك

::- همه يحجون واني عيني على عمي محمد يتصنع الصدمة ومتأكدة هو ورا الموضوع هذا
لحظه لحظه جوائح ماموجودة التفت على انمار عينه على درج رأسا درت وجهي لمحت فرات وجوائح گاعدين ثتينهم مبتسمين بس صارت النظار عليهم اختفت ابتسامتهم

::- عفتهم يحجون وصعدت واكيد غفران وراي تمشي سحبت جوائح من أيدها گامت من مكانها وهمست

جوائح:: وين رحمه
رحمه:: تعالي عندي شغلة وياج
سحبت أيدها وصعدت وياي دخلنا الغرفه سحبت حجابي شمرته على جربايه تخوصرت وگلت

رحمه:: انتٌ السبببب
- سبب شنو؟
- تعرفين قصدي انتٌ الي حركتوا البستان ؟
::- گلبت عيونها وگالت
جوائح:: لا مو اني تشوفيني بالبيت كاعدة ؟
رحمه:: جوائح انتٌ لو لاااااا؟

- لا مو احنا تره كلنا كدامج بالبيت شنو طرنا حرگنا البستان واچينا ؟
- اكيد بعيدة عن هذا الموضوع ؟.
- اي
غفران:: والـچـذاب؟
جوائح:: يـلـعـب بـنـار

::- ابتسمت وعيونها بيها لمعة غريبة قطع حديثنا دخول استبرق وراها وهج ثنينهن يركصن وحده تهز شعرها وثانيه تهز جسمها كله عبالك منتوله بالكهرباء

وهجَ:: شلون اخبار حلوه اويلي
استبرق:: احترك بساتنه وأ احترك گلبه هلا هلا
::- مستمرات بالرگص باوعت بطرف عيني على جوائح وهيه بادلتني النظرة

رحمه:: لزگتن كافي رگص اكعدوا واستچنو
استبرق:: اسكتي فرحتي ما انطيها لأحد يارب يارب كون يحترك كلشي عنده ويصفه بشارع ضايع تايه وحيد يارب كولوا امين

غفران:: امين
وهجَ:: صح حرام ندعي بس أمين
رحمه:: ثلث الدعوة على داعي
استبرق:: وأي شحلاتني اذا اصفه وحدي احسن من العيشه وياكم لا تحجون بعد وياي

::- نهت كلامها وطلعت من الغرفه كلها غلست عليها فتحت الشباك بسبب صوت الفوضه إلي بره لمحت الولد كلهم بدون استثناء كاعدين

يضحكون صوتهم واصل للشارع سديت شباك فتحت الكنتور اخذت دشداشة وطلعت للغرفه ثانيه لمحت باب غرفة كوثر مفتوح مريت من الباب استوقفتني صوتهن طالع كوثر تعيط بصوت شبه مسموع وميلا كاعده على جرباية مجرد شافتني كوثر سدت الباب بوجهي هزيت ايدي ودخلت الغرفه التبديل كملت وطلعت

بدون أي تفكير نزلت جوه أشرب ماي جنت مفكره عمامي وسلمان راح يروحون السرحان لاكن الصدمني كعدتهم مثل ما هيه ويسولفون بينهم بصوت ناصي ولا عبالك صاير شي والضحك مسموع
هم هزيت ايدي ودخلت للمطبخ فعلت وضع الاهتزاز بسبب وضعهم إلي ما ينحزر اخذت بطل ماي وتفاحه مديت راسي من الباب أشوف اكو واحد ماموجود بينهم وگعت عيني على ايان كاعد بصف فرات بس مو وياهم عينه على شباك وحده من الغرف اكيد عرفتوا يا غرفه ما يحتاج اكول عينه على شباك غرفة استبرق صح ؟

بدون تفكير رفعت ايدي ورگعت البطل بقوة حتى ينتبهون إلي على أثر ضربه الانظار توجهت إلي

رحمه:: إلي يريد يكعد هنا ينزل عينه عن الشبابيك.
::- مجرد كلت هيج وتعالات اصوات ضحگهم لان عرفوني اقصد منو والي اقصده رجع يخزر بيهم رمقته بنظرة سريعة ودخلت ضليت افتر

بالبيت أتأكد منو الموجود ومنو الي مختفي تحسباً لأي شي يصير بعد ما اتاكدت الكل موجود صعدت فوك والف شغلة براسي بس الاهم بستان سرحان احترك بفعل فاعل او احترك بسبب حادث هذا إلي براسي وإذا بفعل فاعل منو هو والكل موجودين بالبيت متفقين وي شخص معين يا اما اكو شخص وراهم وبعيد عن الأنظار تمددت بمكاني إلى أن نمت وانتهت رحلة أفكاري الغريبة العجيبة

ـــــــــــــ⊰ ـــــــــــــ

رفعت الغطه بهدوء وطلعت واني ادعي ما يطلع صوت وفعلاً مجرد طلعت توجهت للطابق ثالث صعدت بهدوء خوفاً احد يحس عليه صارت عيني باب غرفته ترددت افتحه لاكن مجرد سمعت صوت خطوات على درج فتحت الباب بسرعة ودخلت الغرفه واني كاتمه انفاسي وفاتحه عيوني على وسعهم من صدمة اختفى صوت الخطوات بعد ما انفتح باب احد الغرف اخذت نفس براحه بس سرعان ما اتذكرت اني بغرفة بسام لطمت على كصتي من الفشلة درت وجهي للغرفه ثبتت عيوني على بسام متمدد بنص الجرباية جگارته بيده وريحة الدخان تخنك حتى الصخل بلعت ريگي بتوتر وإني اسمع صوت وهو يگول

وسام:: شسوين هنا ؟
وهجَ:: هــا ؟

- شسوين هنا ؟
- شعليك
- شنو شعليه داخلة غرفتي ودكولين شعليك ؟
- لحظه هاي غرفتك ؟
- شتشوفين كدامج ؟
- اشوفها غرفة النوم بس مادري بيها الك بعدين شدعوة عليك ياابن الناس واذا دخلت غرفتك والله يالله هيه غرفة فد نمونه أن شاء الله نمونه تحمظ على گلبك بحق علي أو اولادة

- خلصتي ؟
- خلصت من خلصت روح إلي بالي
- اطلعي چا
::- نطق آخر كلمة وهو يسحب نفس من جگارته نبرة صوته خلتني استغرب بدون مقدمات گلت

وهجَ:: شهل نبرة الصوت وطريقة الكلام ؟
وسام :: شبيها
- أسأل نفسك شبيها واذا مرة ثانية تحجي هيج وياي بهذا الأسلوب صدك واعتقد عيني ما اخليها بعينك وما اشوفك كدامي تمام ؟

- تسوين فضل ما ميت على شوفتج اني
-  ما ميت على شوفتي على أساس ميته عليك
::- نهيت كلامي والتفتت أطلع من الغرفة مجرد فتحت الباب نطق آخر كلمة جنت متوقعة اسمعها منه

وسام:: تسوين فضل اذا تبقين بعيدة عني لان ما أريد اشوفج كدامي .

::- احترك گلبي أو فار دمي بسبب كلامه اكيد لا بس شي بداخلي انكسر وإني اسمع كلامه بدون ما اخلي عيني بعينه گلت

وهجَ:: والله انت اسويلك هذا الفضل من تحترم نفسك وتنتقي كلامك بوقتها راح اسويلك هذا الفضل ومادام موجود هنا غصباً عليك تتحمل تشوفني وهذا العندي وان شاء الله ما يجمعني حديث وياك لان فعلاً بعد هذا الحديث كرهتك

::- طلعت وعفت الباب مفتوح بدون ما اسده نزلت صار بوجهي فرات لا ارادي خزرته ليش ما ادري بس خزرته ورحت الغرفتني فتحت الباب دخلت اتاكدت كلهم موجودين بإمكانهم لا استبرق مالها أثر بفراشها غلست ونمت مكاني اعترف گلبي وجعني بس ليش هذا الكلام الجارح ليش هاي المعاملة بذات إني استحق معاملة افضل من هاي بدون

ما احس لگيت دموعي تنزل خليت ايدي على گلبي يوجعني غمضت عيوني كاتمه انفاسي ساعة تجر ساعة واني ما نمت ولا لحظه وي صوت الاذان گمت من مكاني واساسا كلهن گعدن يصلن توضيت وصليت ورحت للغرفة

ثانيه اقرأ يوم يومين اسبوع إلى أن مر شهرين خلصت فترة الامتحانات لكن صحتي تراجعت ونفسيتي تعبت عزلت نفسي عن الكل بدون استثناء حتى بوقت الأكل ما أنزل ولا اشوف احد وبفترة الدوام اطلع قبل الكل وي ايڤار حتى اتجنب شوفتهم وهكذا انتهت رحلة السادس وبقت النتائج انتظرها واني شبه ميته بسبب الخوف إلى أن اجه يوم إعلان النتائج

دخلت الغرفة إلي مسويتها مرسم حتى ارسم قفلت الباب ختلت خاف احد يچيني مر وقت واني خاتله واكيد محد راح يفكر اني هنا ماعدا علي الي هجر باب الغرفة.

علي:: افتحييييييي الباب ما اكللهم هنا أنتِ
::- لا يا صخل يكول ما اكللهم وهو يصيح
وهجَ:: روح منا يا صخل
علي:: منو الصخل ؟

- أنت اكو غيرك هنا ؟
ايڤار: اي اني
- انت هم هنا يلا كلكم صخول بس روحوا منا
::-, صار هدوء لثواني ورجع علي يحجي بصوت عالي

علي:: سوتنا صخل شفتها شفتها ؟
ايڤار:: ميخالف بسبب السادس اتحمل
- لا ما اتحمل
:- افتحييييييي الببااااااااااابب
وهجَ:: شوفوا راح اتصل على ايان واكله علي باك منك فلوس وتشيرتك الجديد الي عبالك جوجو أخذته هو عد ايڤار يمسح السياره بي واذا تسأل عن عطرك المفضل

علي:: البيت بيتج الغرفة غرفتج مالنا دخل أخذي راحتج تعال ايڤار لا تزعج اختنا
ايڤار:: صح صح خليها ترتاح

::- لزمتني الضحكة على نبرة صوتهم ثواني واسمع بس صوت الخطوات على درج يعني راحوا كلهم رجعت كملت الختله مالتي ساعة تجر ساعة بدون ما أحس ارسم وناسيه نفسي وناسيه الدنيا دقيقه واندك الباب اجاني صوت رحمه.

- وهجَ؟
- هــا؟
- استبرق يمج
- لاا ما شفتها اصلاً بس اكيد تلگيها عالسطح
- لا ماكو الها اثر هناك حتى البيت كله ماموجودة بي.

::- بدون تفكير گمت من مكاني تاركة الرسمه وفتحت الباب طلعت الهن مجرد شافتني عقدت حواچبها وگالت .

رحمه:: شصاير بيچ ولج ؟
وهجَ:: شصاير ؟
غفران:: ماعدج مرايه تشوفين نفسج ؟
وهجَ:: أكيد عندي بس ما بيه شي شبيچن؟
رحمه:: تره شگلچ متغير عيونج ذبلانه وجهج اصفر شصاير بيچ صدك جذب

وهجَ:: اهااا والله عبالي اكو شي يمعودة هاي آثار السادس ما اختفت بعدهي موجودة
::- هزت راسها ما مقتنعة وگالت.

رحمه:: راح اغلس عليكم هسه بس خليني اشوف هاي وين واني اعلمكم.

::- نهت آخر كلمه ونزلت هيه وغفران نزلت وياهن مجرد دخلنا بالممر اجانا صوته.

وسام:: صاير شي ؟
::- التفتت اله رحمه وغفران اما اني ما وگفت وكملت طريقي بدون لا التفت حتى رحت للصاله ماكو احد موجود الكل بغرفهم ما اجت بالي غير الحديقة الخلفية رأساً طلعت وغفران ورحمه وراي التفتت رحمه وگالت .

رحمه:: بدون صوت
وهجَ:: ليش ؟
غفران:: وسام گال شاف إيان طالع للحديقة.
:: هز راسي وگلت

وهجَ:: اذا الزم اخوي وي اختج نجيب نوعية زينه ونشدها
غفران:: نوعية شنو!!!
وهجَ:: كرون كرون حبيبتي بس انتِ كيوت مو مال كرون احطلج وحيد القرن حتى يناسب فهاوتج .

:: رفعت أيدها على رأسها وهي عاقده حواچبها باوعت الها رحمه وزفرت نفس وراحت باتجاه الحديقة لحگنها وفعلاً مجرد وگفنا بالباب لمحنا استبرق گاعدة تحچي وايان داير وجهه عنها وايده ورا ضهره ومن خلال منظرهم واضح داخلين نقاش حاد مجرد اتقربنا منهم أكثر التفت ايان الستبرق وگال آخر شي توقعت اسمعه من اخوي بيوم من الأيام......

وتجمّد كل شيء في تلك اللحظة النظرات الخطوات
وحتى الهواء بدا وكأنه يراقب بصمت.
شيء ما تغيّر خلف ذلك الباب شيء لم أستطع فهمه لكنه ترك في داخلي رجفة خفيفة لا أعرف مصدرها
ورغم أن المشهد انتهى سريعاً إلا أن إحساساً واحداً بقي يلاحقني
أن ما حدث الآن  لم يكن نهاية الموقف بل بداية لشي أكبر ينتظر الظهور

ـــــــــــــ⊰ ـــــــــــــ

تابعوني لتكونوا على اطلاع بكل جديد عن الرواية وكل ما يخص "جوائح الدهر"