رواية جوائح الدهر الفصل السادس عشر 16 - بقلم دعاء رزاق.

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

في أعقاب انتظارٍ طويل تحرّك شيء خفيّ شيء قلب مسار الأحداث وترك الجميع أمام واقعٍ لا يشبه ما ظنّوه يوماً

ـــــــــــــ⊰ ـــــــــــــ

- بعد ما رجعت البيتنا ضليت ايام واني ماكدر اتحرك طاقتي صفرت اسامه بعد ما عرفت شي عنه ولا حتى حجينا وهذا أفضل شي جان ضل براسي كلام جوائح عن موضوع الحمل ماراح من راسي فكرت أفتح الموضوع واحاول أشوف ردت فعله بس ترددت ماكدرت احجي وحالتي يوم عن يوم تتعب حتى للعرس ما راح اروح افضل شي ابقى بعيدة بعد ما عرفت اسامه هناك وين ما اروح وراي حسبي الله بس

::- رفعت راسي على صوت باب غرفتي دخلت مرت اخوي وگالت.

سما:: راح نروح البيت عمو رسول تجين ؟
فاطمه:: تتعشون هناك ؟
- اي
- لعد ما اروح اني
- وإذا سألوا عنج ؟
- كولي مريضة
- فاطمه لا تسوين هيج كومي حتى تغيرين جو
- ماكدر والله لا تلحين اريد ارتاح.

::- ماردت وطلعت عرفتها بالها يمي بس افضل شي ابقى وحدي قبل لا يطلعون أكدوا عليه اقفل الباب كمت وراهم قفلت الباب ورجعت نمت مكاني وتغطيت شغلت الأذكار وعليت الصوت ونمت حتى انام بدون احلام مزعجه نمت بعد الف فكره براسي

::- ساعة او اقل ويمكن اكثر حسيت بحركة قريبه مني ثواني وحسيت حتى ماكدر اتنفس  من الخوف روحي راحت بهاي الثواني كمية الرعب الي عشتها محد يتخيلها بس دخل مسمعي صوت شخص مو غريب عني صوت جنت اخاف من اسمعه بس بهذيج الحظه بس سمعت اسمي بالسانه اختفى خوفي رجع گلببي يدك وتنفست براحه.

- فواطم ؟
::- بلعت ريگي وهمست بصوت شبه مسموع.
فاطمه:: انعل روحك روحي راحت.
::- طفرت من الجربايه شغلت الإضاءة لمحته كاعد ركبه ونص كدام الجربابه لابس دشداشة لونها رصاصي وشماغ ابيض نزل الشماغ عن وجهه وهمس.

اسامه:: لا تخافين شبيج.
::-  رفعت كفوفي على وجهي ضربت الكاع برجلي وگلت.

فاطمه:: حتى هنا لحكتنييي منين فتت مو قفلت الباب منين دخلت كلي.

اسامه:: اكو وحده تستقبل زوجها هيج ؟
::- لا تخليني اسب حتى زوجي شتريد شكو جاي إذا شافك زياد يسويك أكل للحيايه والله.

اسامه:: اعترفي تخافين يصيرلي شي ؟
::- فتحت عيوني مصدومه من بوردة أعصابه جسمي كله يرجف هوه عادي ومريح.

فاطمه:: كوم روح اسامه لا تعبني والله ما ناقصني تعب.
- اجيت احجي وياج بشي واروح ما اطول لا تخافين.
- مو وكت حجي اسامه روح امانه.

- ما أطلع من غرفتج لحد ما احجي إلي عندي.
::-   مسحت وجهي باوعت على شباك الباب مقفول منين دخل هذا زفرت نفس بقلة حيلة وكلت.

فاطمه:: احجي اسمعك اسامه بس لا تتأخر امانه.

::- كعد على جرياية بمكاني دفع الغطه وكال.
اسامه:: تعالي اكعدي بصفي هنا..
:- ترددت اروح بس رحت حتى اختصر الوقت كعدت بصفه سحبت الغطه لفيت نفسي وهمست.

فاطمه:: احجي.
اسامه:: اريد اخطبج وهذا الاسبوع اجيب والدتي تخطبج.
::- توسعت عيوني مصدومه مصدومه من كلامه كل الكلام يعجز يوصف شعوري بهاي الحظه .

اسامه:: اسمعي اني مجاي العب مستعد الكلشي واذا ترفضين ارجع حقير اجيت احجي وياج مثل الوادم.

فاطمه:: خلصت ؟
- اي
- خوش كوم روح أسامه.
::- لزم ايدي حيل وگال .
فاطمه:: لا تخليني اصير حقير .
::- ردت اغلط علي بس اجه بالي كلام جوائح واجه بالي اعرف منين يعرف عادل وشلون وصل اله ماعرف شلون فكرت بس الاول مره افكر بطريقة صح
::- رفعت ايدي الثانيه لزمت ايده نزل عيونه على ايدي بنفس الطريقة إلي لزمت ايده بيها لزم ايدي هو كذالك استغلت الوضع وگتله .

- اريد أعرف شي.
- هذا مو موضوعنا بس اسمع الموافقة من اهلج راح اجاوبج على كلشي.
- لا اريد أعرف هسه.
::- غمض عيونه وزفر نفس بغضب
اسامه:: احجي خلينا نشوف ؟

- شلون عرفت عادل وليش طلب منك انت بذات ؟

:: ضغط على ايدي وگال
اسامه:: سمعت من زياد ابوج عنده معرفه قويه بال****  وجنت محتاج معلومات تخص شخص هو كذالك معروف بهاي الأعمال وضليت فترة طويلة يلا وصلت اله وأخذ مني سنه واني احاول اعرف اذا عنده صله بهذاك الشخص وآخر شي طلع هو ويا مشتركين بأعمال غير قانونية اطريت أوصخ نفسي واسافر خارج العراق اكمل اعمال ابوج حتى ينطيني معلومات ومن هذاك اليوم اني وي ابوج وأغلب اعماله إني انفذهن اله.

::- تشتغل وي عادل!!!!!!
- اي
:: حاولت الزم نفسي وما اتسرع ردت أعرف كلشي من البدايه.

فاطمه:: شنو الشي الي يخليك تدخل شغل كله قذاره وتخاطر بحياتك علموده ؟

::- باوع إلي بنظرات غريبة وهمس بصوت شبه مسموع.

اسامه:: تتذكرين البيت إلي اخذتج اله ؟
::- هزيت راسي بمعنى اي.
- هناك جانت ميلا وانتِ واني واختي.

- اختك ؟
::- مجرد ذكر اخته ذكرت الغرفه الي جان يطلع منها صوت
فاطمه:: الغرفه الي جان يطلع منها صوت اختك بيها ؟

اسامه:: اي اختي بيها
- كمل شبيها اختك ؟
::- دفع ايدي وكام يمشي بالغرفه ويضغط على ايده دار وجهه عني وهمس..

::- قبل سنوات طلعت حالها حال البنات للدوام وما رجعت  ايام واسابيع اختي مالها وجود ومحد قدم بلاغ خاف تنكشف أعمالها جانوا يعرفون هيه مخطوفه ومحد نزل من نفسه وراح يدور عليها وبعد أشهر بليله ضلمه شمروها باب بيت سلمان كل الانواع التعذيب متعرضه اله ولا شخص بيهم حتى امها وأبوها ما اهتموا كأنها شي زايد وشمروا محد اهتم الها ومن هذاك اليوم واني اشوفها فاقدة عقلها وما تعرف أي شخص ولا حتى اني  ولا علاج يفيد الف موته متت أخذت عهد على نفسي  اگتله بيدي  سنتين واني ادور إلا أن عرفت اسمه لان جان يهدد بيهم وكدرت اوصل الابوج سبع سنوات وإني بهاي الأعمال حتى اكدر أخذ حقها.......

ـــــــــــــ⊰ ـــــــــــــ

وهجَ:: اذا فارغ تعال للحديقة الخلفيه.
:: سديت تليفوني ونثرت شعري على اكتافي ابتسمت مجرد شفته جاي باتجاهي ما تحركت من مكاني حسيته وكف ورأي تماماً حمحم وهمس..

- محتاجه شي ؟
وهجَ:: تعال اكعد هنا.

::- أشرت اله على مكان مقابيلي صاير ماكدرت أشوف ردت فعله لأنه ورأي بس أتحرك من مكانه وراح كعد مقابيلي رفعت عيني اجت بعيونه الي مقلصهم ويحاول يفهم ليش طلبت منه يجي بهذا الوقت!
مانطقة بحرف واحد  ربع ساعة وأكثر لا هو نطق ولا اني نطقة كل شوي اركز بملامحه وارجع ارسم إلى ان مد ايده يطلع باكية الجكاير والجداحه وهمس..

وسام:: تـرسـمـيـن؟
وهجَ:: اي تـكـدر تـبقـى هـنـا لـحد مـا اكـمـل !
- وانـي الـمـمـنون

::- نطقة اخر كلمه مبتسم ورث جكارته وما شال عيونه عني بكل مره ارفع عيوني حتى اركز بملامحه الگا صافن بوجهي وهذا إلي جنت اريده بس ماردت هذا الإحساس إلي بداخلي..

مر الوقت واني ارسم اكتافي بعد ما احس بيها گمت من مكاني خليت ايدي على ضهري وتمشيت بالحديقة.

وسام:: اذا الرسم يتعبج ليش ترسمين ؟
::-  ملت راسي باتجاه وگلت
وهجَ:: يتعبني بس احبه واحيانا ارسم اشياء ومثل ما ارسمها على ورق ارسمها بعقلي  بالواقع ما راح تكون مثل ما هيه بخيالي

-  چـنـتي تـرسـمـينـي!
- اي حـبـيت أحتفظ بـرسـمه الـك لان خاف بيوم يصير شي بوقتها ماراح اشوفك اصلا بس راح تبقى الرسمه وصورتك بخيالي..

وسام:: تـعـالي اكـعـدي هـنـا

::- اشرلي اكعد بصفه رحت كعدت بس خليت مجال ببني وبينه.

وسام:: نفترض صار خلاف بين اختج وأخوي هذا شي راح يأثر ؟
وهجَ:: اي هواي هم لان هاي اختي كأن من يكون اذا حاول يمسها بشي راح أحقد علي الآخر يوم بعمري هو والأشخاص الي بحياته حتى لو مالهم دخل  ماراح أتقبل وجودهم..

::- باوعلي بنظرات كأنه يريد يحجي بس متردد مسح على وجهه وگال.

وسام:: وهج بعدج ما تعرفين شي من هاي الحياة مرات الإنسان ينجبر على شي وهو مايريده بيوم من الايام راح تفهمين كلامي هذا.

::- من خلال كلامه عرفت اشياء هواي اول شي أتأكدت كلام جوائح صح ومو مجرد شك بس ليش ماكو واحد منهم رجال وما يكسر مره ؟

وسام :: لا تصفنين كومي ادخلي جوه.
وهجَ:: وسام
-اسمعج
- هم يجي يوم وتكرهني ؟
- ليش هذا سؤال ؟
- جاوب هم راح تكرهني
- لا ما اكرهج بس مثل ما كلتي اذا يصير شي راح تخرب صورتج بعيني وهاي اذا ما خ....

::- ما كمل كلامه وزفر نفس بحسره
وسام:: راح تبقين بعيني مثل ما شفتج اول مره

- تذكر اول مره شفتني بيها ؟
- باب المدرسة  چـنـتي  اول يوم داومين  والطريق كله تحجين ماسكتي ولا لحظه.
وهجَ:: دقيقه هو صح انتٓ مبين جبير بس بشكد اكبر مني ؟

::- حك ارنبة خشمه وهمس.
- 14
- هـاااااااا؟؟
- والله شبيج.
- على هذا الحجي انت شايب صدك جذب كاعدة احجي وي شايب.
::- فتح عيونه مصدوم  أشر على نفسه وگال.
وسام:: اني شايب ؟
وهجَ:: جا اني رجليك بالكبر استغفرالله كوم نام مو زين على الشياب يبقون كاعدين .

-  اني شايب انتِ طفلة وحاطه حمره وكاعدة بالحديقة بنص الليل اخوج هذاك الي يركض وراي وينه خلي يجي.
- اني طفلة ؟؟؟؟
- اكو غيرجج ؟
-  ديلا طفله ولا شايب ورجليه بالكبر.
::- عفته وكمت أخذت أغراضي وكتله.

وهجَ:: جيب الكرسي وياك يا شايب.
::- ما انتظرت رد منه ودخلت جوه لمحت فرات  منتچي على باب المطبخ وجوائح  بمكانها لو بيدي أروح افلش راسه عفتهم الغرفتي  اخذت نفس الي اريده سويته راح اتقرب منه أكثر وأكثر ما اعرف الي راح اسوي صح او غلط بس المهم  اردها الهم رغم گلبي جاي يدگ بكل مره اشوفه شعور غريب يحتلني مو مهم شعوري بهذا الوضع كعدت أكمل الرسمه  اول ما خلصت  علگتها على حايط وخليت فوگاها ورقه ثانيه حتى محد يشوفها ابتعد خطوتين التفتت بكل الغرفه من سنوات وإني ارسم وكل رسمه إلي اعلگها على حايط ومن حبي للرسم  بابا سوالي غرفه خاصه حتى أخذ راحتي

- رجعت كلشي مكانه وغسلت ايدي مسحت الحمره رفعت شعري ورحت الغرفتنا اني والبنات كلهن جانن كاعدات يرتبون اغراض جوائح بالجنط حتى الصبح نروح البيتها وانرتب كلشي .

رحمه:: وين جنتي ؟
وهجَ:: يم جوائح كاعدة تأكل وحجيت وياها شويه واجيت.

استبرق:: راح يصير الج ساعتين ونص تحجون وهيه طول الوقت تاكل ؟

- شبيج سوالف اخوات مو راح تتزوج وكعدنا نتذكر ايامنا وهاي ونوب هيه حاطه وتأكل حموضه حتى أني حمضت من يمي.

غفران:: حتى البارحة ما اكلت شي وبليل لگيتها تأكل ليمون وملح.

استبرق:: الي يشوفها يكول وحده حامل وجاي تتوحم.
رحمه:: انجبي استبرق لا تسمع كوثر تروح تزود حجي وتسوي سالفه.

:: همه يحجون واني ركزت على كلمه حامل استغفرالله من تفكيري طردت الأفكار من راسي وكعدت وياهن ورا شويه اجت جوائح  عيونها جان بيها دموع  وشفايفها حمر وخشمها كذالك عرفتها جانت تبجي لان من تبجي يصير هيج شكلها ردت احجي وسكتتني رحمه كلهم عبالهم ضايجة لان راح تتزوج بس محد يعرف شنو صاير گلبي وجعني واني السبب بكلشي تمر بي لو ما مدخله هيه وقبلت تتزوج فرات جان جنت اني احظر العرسي من وسام بس هيه حضت علمودي وساكته ومتحمله كلشي الخاطري اني!!
بشنو اجازيها وهيه متحمله الخاطر ما انجبر على الزواج
ماكدرت اتحمل اعوفها كمت دفعت جربايتي بصف جربايتها نمت بصفها وتغطيت ما فتحت عيونها بس ابتسمت مسحت دموعها ونمت يمها الثاني يوم الصبح كعدت ما لگيتها والبقية كذالك كلهم ماكو حتى الجنط الي خليناهم بالغرفه ماخذينهم عرفت البنات راحن للبيت وجوائح مادري وينها اساسا كمت بسرعة  طلعت من الغرفه اريد اروح اغسل صارت بوجهي كوثر نعلت الشيطان ورحت غسلت ونزلت جوه لگيت الكل مخبوص وحتى خطار اقارب زهره وسلمان وبنات اخوته واخواته البيت مليان اعوذ بالله اليوم بيتنا كله سم سلمت من بعيد ورحت للمطبخ اول ما شافتني امي گالت.

نيرمين:: واخيرا كعدتي.
وهجَ:: اي محد كعدني.
::- بوستها وكعدت توصيني على كم شغلة وراحت يم الخطار نسوان عمامي يطبخون بالمطبخ الخارجي صبيت جاي وكعدت اكل دخلت كوثر وياها ثنين بنات من شكلهم واضح مسمومات كعدن يباوعن بوجهي .

وهجَ:: مضيعات شي بوجهي ؟
كوثر::  لا ليش ما رحتي وي اختج
::- سكتت ما جاوبتها وحده من الي وياها لو بيدها دكوم تاكلني عيونها مال وحده تريد تبجي أشرت عليها وگلت .

وهجَ:: بنت منو انتِ؟
::- خزرتني وگالت بنبرة حادة.
- بنت يحيى
كوثر:: يحيى اخو جدي سلمان وهاي بنت جدو يحيى ايات وهاي اختها إسراء.

::- هزيت راسي الهن وسكتت ثنينهم يخزرن وهاي ايات الحقد واضح بعيونها وإذا احجي احسها تبجي ماعرف ليش خليتها براسي

وهجَ:: متزوجات ؟
إسراء:: اني لا بس ايات متزوجه من شهرين.
وعمي سلمان جان موجود بعقدها ما كال الكم...

::- قبل لا تكمل صاحت بيها اختها واخذتهن كوثر وطلعت اول ما طلعن دخلت امي وياها
بنات اربعه وحده منهم جانت تشبه جوائح شبه مو طبيعي ضليت صافنه.

نيرمين:: وهچ هذني بنات عمج وهاي بنت عمج فارس.

::- مجرد كالت بنت عمج فارس شركت بجاي.
وهجَ:: بنت عمي فارس ابو رحمه ؟

- اي شبيج.
::- خزرتني وضلت تحجي وياهن وقبل لا تروح كالت.

نيرمين:: هذني فقيرات لا تتعاركين وياهن ديري بالج عليهن بين ما يجون بنات عمج.

::- راح انجلط اليوم چني
وهجَ:: من الأخير عرفوني عليكم

::- ضحگة وحده منهم وگالت
-  اني جَواهر وهاي جُلنار وهاي جيهان واحنا اخوات وهاي سجى بنت عمي فارس من مرته ثانيه..

::- اهلا بيكم هسه فهمت زين استوعبت .
جيهان:: الحمدلله فهمتي.
::- كلهن حجن طبيعي لا اختهن الوسطانية ساكته وما نطقت بحرف واحد
بين ما خلصت اخذتهن وصعدت مثل ما كالت امي ديري بالج عليهن يعني  لازم ادير بالي صعدتهن للغرفه وگلت

وهجَ:: ابقن هنا  وإذا تحتاجن شي خلي تجي وحده منكم تصيحلي..
جَواهر:: ماشي

::- فلتت فوك اشوف اخواني هنا لا
فتحت الباب بدون لا ادگه صار كدامي وسام يكوي قميصه وصدره عاري من المنظر صخنت سديت الباب ضليت اضرب على خدي دقيقه ورجع فتح الباب  ما باوعت علي بس گلت اله.

وهجَ:: اكو واحد من اخواني هنا ؟
وسام:: لا لو اكو جان علكوني بالمروحه شنو رايده منهم ؟
وهجَ:: هاا مادري نسيت.

::- صفنت أحاول اتذكر شنو ردت وليش صعدت كلشي نسيت عفته ونزلت بس صوت ضحكته مسموع صار يضحك بصوت عالي.
كعدت على بايات الدرج انتظر واحد يجي ومحد اجه غير اسامه اول ما شافني همس.

اسامه:: شبيج جنج وحده مطلكه.
وهجَ:: مطلكه ولا اكبسل كلي اخواني وين ؟
- راح اسكت لان اكو جلاب جوه ماريد يكولون. علينا نسوي مشاكل ونتعارك اخوج علي يركص بره وي وسام وايان سحبه دخله بسياره وقفلها  حتى ما يركص وايڤار طالع.

- خرب يومك علي ولا تكعد زين جوائح وين ؟
كاعد وياها مادري بس شفتها صبح وي ابوها رايحه .

::- كمل كلامه وصعد رغم أسلوبه مو حلو بس أحسه حباب ولو اكو شخص ينصحه ويبعده عن الطريق الغلط راح يتغير متأكدة..
: اخذت نفس ونزلت اساعد عماتي مو من عوايدي بس افضل ماكعد ضليت أشتغل وحتى امي  استغربت والكل استغرب اساسا  للعصر اجوي البنات كلهم كعدوا يمدحون بيت جوائح وفرات آخر شي أشرت الهم وصعدنا فوك اول ما دخلنا صفنت رحمه على سجى وگالت.

رحمه:: سجى ؟
سجى:: لا ابليس.
::- گلبت عيونها استبرق وغفران راحت تسلم على بنات

وهجَ:: تعرفوهن ؟
استبرق:: اكيد غير جنا ساكنين سوه بنفس البيت وانتلقنا لهنا انقطعت اخبارهن.
جَواهر:: شفتوا اختجن ؟

رحمه:: اكيد شفناها
::- حجتها وهيه مبتسمه ضلت تسووالف وياهن لحد ما انفتح الباب ودخلت جوائح لابسه فستان ماروني گاصه شوي من شعرها حافه وجهها اكو شي متغير بيها بس شنو ما عرفت المهم طالعه حلو اول ما وكعت عينها على بنات انصدمت سلمت عليهن لحد ما وصلت السجى إلي جانت تشبه جوائح وثنينهم جوائح وسجى نسخه من عمو فارس خصوصا الملامح نسخ لصق.

::- جانوا حاببن يتعرفون عليها بس هيه ما طولت وطلعت من الغرفه كلها 
::- لحگتها بسرعة دخلنا غرفة الرسم طلعت كاتبها وفتحت تليفونها تتصل على شيلان اول ما فتحت خط گالت جوائح.

جوائح:: شصار على الموضوع الي گتلج علي ؟
شيلان:: استلمها واحد من المحققين.
- قبل بدون ما يعترض ؟
- اي بس سأل منو الي جان يشتغل عليها كتله المحققة جوائح محمد وافق وما أعترض.
جوائح::  زين اذا هيج بس شنو اسمه ؟

-  المحقق بهاء.....
:: كالت اسمه الكامل ونهت المكالمة منها باوعت إلي وگالت

جوائح:: احجيلي شبيج حبيبتي اكو وحده ضوجتج ؟

- لا بالعكس بس عائلتنا كلش جبيره وتخلي الواحد دايخ شسالفة .
-  لازم يبطلون يجيبون جهال اني اول ما دخلت البيت اختنكت.

وهجَ:: جنهم صخول بعدين وين جنتي ؟
جوائح:: طلعت وي شيلان للصالون
- اها زين لعد تحسين نفسج زينه ؟
- اكيد وهسه روحي يم البنات خليني اكعد وحدي شويه.

::- مجرد كالت هيج طفرت من مكاني وطلعت جانت واضح عليها تريد تكتب شي تركتها وحدها ورجعت وي البنات  لحد الليل طلعنا على سطح من فوك ستاره نشوف الحنه مال الزلم مديت راسي اباوع عليهم جانوا بحدود العشرين شخص وأكثر كلهم لابسين دشدايش وشماغ ضليت صافنه ادور على اخواني ما شفت غير ايان كاعد على كرسي وعيونه بتليفونه التفتت على استبرق فاتحه تليفونها تضحك عرفتها تحجي ويا ضليت مركزة لحد ما صاحت وحده من بنات عمي گالت .

جُلنار :: هذاك ابو دشداشة النيليه منو ؟
::- باوعت على مكان الي أشرت علي جان واكف ايڤار يسولف وي واحد من زلم .

وهجَ:: ايڤار توأمي هذا
جُلنار :: الله يخلي الكم.
::- ابتسمت الها وضليت اراقبها جانت هادئه الى ابعد الحدود اجاني احساس بوقتها بس مثل كل مره طردت الأفكار من راسي وضليت اباوع من بعيد لمحت شخص لابس دشداشة بيضه والشماغ على راسه والضحكة مرسومه على وجهه بدون ما أحس لكيت نفسي ابتسم.

استبرق:: احم حلو مو ؟
- منو ؟
- وسام
- ايع شايب منين حلو.
- چا المن تباوعين وتوزعين ابتسامات ؟
-: الإخواني فدوه الهم شنو طول شنو هيبه شنو فخامه اويلي عليهم بعد عمري اخواني..
::- هزت شفتها وغمتي وراحت للجهة الثانيه.
كل وحده بينا جانت تباوع الشخص ضلينا انراقبهم لحد ما كملوا ركص الجوبي وشافنا ايان مجرد شافنا عفتهن وركضت جوه وهنه مثل الصخلات ركضن وراي اول ما نزلنا للطابق ثاني صار كدامنا جوائح وهيه تعدل دشداشة فرات وهو يحجي شي الها اول ما شافونا ابتعدوا عن بعض باوع الها فرات وهيه تضحك اول ما دار وجهه تغيرت نضرتها وضحكتها اختي وأعرف حركاتها هاي وراها شي جبير.

جوائح:: تونستو ؟
جيهان::  اي الزلم حلوين.
::- فتحت عيونها أختها حطت أيدها على حلكها وسحبتها ختلنا بالغرفه خاف يجينا ايان.
اليل كله كاعدين نسولف ويمكن جانت اول مره ننجمع بنات عمامي وتعجبني سوالفهم بس ماعدا أسراء وايات وكوثر  جانن يباوعن الجوائح وهيه حست بس غلست عليهن وايات وين ما تشوف فرات تباوع علي حتى هو لاحظته باوع الها شكيت أكو شي بينهم بس ماعندي دليل عليهم .

استبرق::  لا تخافين ماكو شي فرات خوش فرات ما اتوقع عنده شي وهسه كومي صارت بالخمسه جوائح ورحمه يروحون للصالون بسبعه الصبح واحنا نطلع بالوحده لان القاعة بعيدة .

::- اكتفيت بسكوت وكمت  مر الوقت بسرعة بين المكياج والشعر خلصنا وطلعنا لحد ما وصلنا القاعة الاول مره ما جان عندي لهفة الشي ساعة واجت العروس جانت طالعه حلوه حتى الدخولية تجنن بس علكوا الاغاني مال ردح الكل كام يركص حتى هيه نزلوها البنات تركص ورحمه وغفران حايرين بالبدله  اربع ساعات ضبط يلا زفوهم للفندق مجرد صعدوها بسياره ماكدرت الزم دموعي بجيت بحركة اني يمكن لأنها راح تعيش بعيد عني او يمكن لان ما حابه زواج هذا كله.
::- ما نطقة بحرف امي كذالك تبجي وما سكتت اخواني اختفوا ومحد شافهم اساسا واعرفهم  ابتعدوا حتى يبجون براحتهم..
::- مجرد وصلنا البيت نزلت قبل الكل ودخلت لمحت ايات تبجي وامها واسراء بصفها  اتاكدت اكو شي بينها وبين فرات..

لم تتشكّل اللحظة صدفة بل جاءت مثقلة بما أُخفي طويلاً لتضع الحقيقة وجهاً لوجه مع الجميع، بلا مهرب ولا إنكار

ـــــــــــــ⊰ ـــــــــــــ

يـتـبـع