رواية جوائح الدهر الفصل التاسع عشر 19 - بقلم دعاء رزاق.

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

لم يبدأ كل شيء حين اعتقد البعض أن البداية كانت هناك بل في هذه اللحظة الخفية حين مرّ الحدث بهدوءٍ مضلل بينما كان في جوهره الشرارة الأولى لسلسلة تحوّلات ستغيّر المعنى وتكشف وجهاً لم يكن مستعداً للظهور بعد

ـــــــــــــ⊰ ـــــــــــــ

صعدنا وأول شي وكعت عيونا علي ايڤار وجَلنار سوه واحد بصف ثاني ايڤار رافع إصبعه بوجهها ومنفعل وهي ساكته ردت اصعد بس استوقفنا كلام ايڤار

ايڤار::  اني شفتج طالعه من بيته
جَلنار:: لا
-: دار وجه عنها مغمض عيونه وكمل كلامه.
ايڤار:: هو شنو لا بعيوني شفتج طالعه من بيته
هذا شكلج وحتى هذا شعرج نفسه!!!!

::- ما تحملت وهجَ وصعدت رأسا بس شافها گال.
- روحي وهجَ أخذي غفران وروحي.
::- التفتت إلي .

وهجَ:: اوگفي بداية درج خاف يجي احد
- تمام
:- نزلت اراقب إذا احد يجي بنفس الوقت ركزت وي صوتهم لان مسموع.

وهجَ:: شبيك توك شفتها وتعيط عليمن حارك دمك ؟

ايڤار:: خليها هيه تحجيلج
- لا احجي انت ما شوف خلستها خلس
- حظرت جنابها أكثر من مره اشوفها تطلع من بيت صاحبي وحتى تطلع ويا بسياره وهذا المخلوق مو آدمي.
::- بس صوت وهجَ وايڤار طالع جَلنار ما نطقة بحرف.

وهجَ::اسكت شويه جَلنار صح كلامه ؟
::- ما نطقة بحرف رجعت گالت
وهجَ:: إذا دكول مو آدمي شكو تمشي ويا ؟
روح ايڤار حسابك بعدين روح

::- ماعرفت شصار فوك بس صوت ركعة باب قوية بنفس ثواني نزلت وهجَ لازمه ايد جَلنار أشرت إلي تعالي ورانا رحنا الغرفتنا دخلنا وقفلنا الباب رأساً تخوصرت وگالت

وهجَ:: اليوم ماكو طلعة إذا ما دكليلي كلامه صح لو غلط.

جَلنار:: ماريد احد يعرف
- محد يعرف هو بس اني وغفران وايڤار بكلمه مني يسكت بس غردي خلينا نسمع.

جَلنار :: كلامه صح بس مو الي بالكم مجرد ياخذني البيتهم علمود اخته وهو يوصلني ويرجع اخته صديقتي وندرس بنفس المدرسة

وهجَ:: متأكدة ؟
- اي والله
- بس گال مو آدمي شلون اثقين تروحين البيتهم ؟
-  ماله علاقة بيه بالعكس حباب
- ابوج وينه امج وينهم ؟

::- باوعت الوهجَ اريدها تسكت ماكو اخر شي گلت.

غفران:: ابوها خارج المحافظة وامها وأبوها منفصلين وهي واخواتها عايشات سوه.

::- فتحت عيونها بصدمه
وهجَ:: وحدهن ؟
جَلنار:: اي بس اكو عامله ويانا وبيت عمتي قريب علينا كل يومين تجي تشوفنا.

وهجَ:: تمام بس لا تروحين الصديقتج ولا اثقين بأحد جَلنار ايڤار من ردت فعلة يعني فعلاً اكو شي ورا هذا الولد انتبهي زين..

غفران:: ولا تنسين هو ما شايفها قبل وشافها تطلع من بيت صاحبه وعرفها بنت عمه اكيد راح ينفعل.

جَلنار:: مو من حقه يرفع صوته عليه
- لا من حقه لأنه ما رفع صوته بدون سبب
::- نهت كلامها وطلعت من الغرفه باوعت على جَلنار جانت خايفة عفتها ورحت صحت الاختها وهذا هم غلط أختها غير تنتبه إلها بس صوج من الأهل دائما..

::- لمحت وهجَ واكفه بالممر تباوع  ومصدومه على شي خطيت اول خطوتين وصار صوت ركض على درج لمحت فرات ورحمه ثنيمهم راحوا باتجاه وهجَ حسيت بخوف من وضعهم ضليت بمكاني ماتحركت ثواني وطلع فرات شايل بيده وحده ماواضح منها شي غير شعرها بسبب الشرشف وبس شفت شعرها عرفتها جوائح ورحمه ورا تركض لزمت المحجر بيدي استند علي صارت فوضه بره ماكدرت أسمع شي بس اصوات النسوان العالية ردت وحده منهن تچي تلزمني گعدت بالكاع حيلي مهدود اخاف من هيج مواقف غمضت عيوني حتى ما احس بدوخه دفايق مو أكثر  حسيت بخطوات قريبه مني بنفس الحظه انمدت ايد على كتفي.

- لا تخافين ما بيها شي.
::- مجرد سمعت صوته نسيت كلشي صار ما فكرت بشي ثاني غير اعرف جوائح شبيها.
فتحت عيوني لمحته كاعد كدامي ايده على كتفي وعيونه تتفحص ملامح وجهي .

غفران:: ليش شايلها شبيها
راجح:: مابيها شي فاقدة بس وبس يشكلون مغذي الها تصحه
- والله ؟
- والله تصحه واكيد بسبب التعب صار هيج ترتاح ترجع احسن من قبل كومي

:؛- اخذت نفس حاولت اقتنع بكلامه واقنع نفسي ماكو شي لزم ايدي يكومني وهمس.

راجح:: غفران حاولي تقوين نفسج مو من أقل موقف تفقدين سيطره على جسمج.

::- درت وجهي عنه رغم كلامه صح ماكدر اتخلص من وضعي هذا  ضل لازمني لحد ما فتح باب الغرفة وصاح الجَلنار تلزمني وراح

::- كل الي بالبيت يعرفون وضعي لهذا رأسا لزمتني وگالت.

جَلنار:: تعالي اكعدي هنا
::- اول ما كعدت اخذت نفس وهمست.

غفران:: تكدرين تروحين تشوفين شصار جوه ؟

جَلنار:: هسه أروح بس قبل كلشي ليش هيج ما تروحين الدكتور ليش تبقين هيج باجر عكبه لا سامح الله صار شي ومحد يمج شسوين بنفسج ؟

- تحجين وكأنه بيدي الوضع.
جَلنار :: بيدج كله بيدج الموضوع صار اله سنوات والمره تخطت وانتِ ما تخطيتي

غفران:: انجبي  تخطيت
- واضح من وضعج بسرعة توكعين تذكرين من شفتي البزون اكل الطير شصار بيج لو من استبرق تتعارك لو من يصير مشاكل ماكو تفاهم راساً توكعين..

::- هي مستمره تحجي وإني بالي مو يمها آخر شي طلعت تشوف الوضع جوه باوعت على ايدي شلون خليته يلزم ايدي امداج غفران امداج

::- ورا دقايق دخلت هيه واسراء وجيهان بس شفت إسراء خزرت جَلنار

جَلنار:: وهجَ دكول رحمه تجي وتحجي شصار محد يعرف غيرها.

إسراء:: وانتِ معقولة ما تعرفين بالي ضل يمها خطيه وبعدين شبيج وجهج اصفر اكيد تعرفين مو ؟

جَلنار:: لا ما تعرف بس سمعت صوت عالي وعبالها صار شي.

إسراء:: معقولة من صوت يصير هيج.

::- طفرت جيهان وگالت بنبرة حادة.
جيهان:: اي من ورا عمج صار بيها هيج ومن زمان هاي الحاله بيها ويلا اطلعي.

إسراء:: احجي عدل عمتج إني احترمي زين
وبعدين يا عمي ؟
جيهان:: عمج ال**** سرحان شافته يكتل واحد بحديقة بيتهم ومن هذاك الموقف صار بيها هيج ويلا رضيتي فضولج انگلعي

::- دفعتها وسدت الباب ضلن يتعاركن بره بسبب كلامها رجع الموقف بالي ماكدر انسى ذاك اليوم ولا يروح من بالي شلون ذبحه من الوريد للوريد بس مجرد ذكرت الموقف جسمي كام يرجف لزمت الحرز الي لابسته بركبتي وضليت اقرأ ايات لحد ما ارتاحيت..
صح ارتاح بعد ما اقرا ايات بس من أقل موقف او اشوف شي كدامي أفقد سيطره على نفسي....
ضليت بمكاني ولا طلعت ساعات واني كاعدة وجَلنار يمي بس ملتهيه بتليفون لحد ما انفتح الباب ودخلت رحمه وراها استبرق او وهج عطت بدون ما احس.

غفران:: رحــمــه
- عيون رحمه حبيبتي
:: حضنتني بدون اي مقدمات طبطبت على ضهري وگالت.

رحمه:: شبيج حبيبتي كالوا تخربط وضعج
- زيننه صرت بس جوائح شلونها وينها ليش ما اجت ؟

استبرق:: زينه راحت البيتها ترتاح باجر نروح الها نشوفها.

رحمه:: اي صح وهسه ارجعي تمددي حتى ترتاحين وانتم مثل ما كتلكم دكولون دخت او وكعت من درج وخلاص.

::- كلهن هزن راسهن مقتنعت نزعت حجابها ورحت تتوضى كلهن ضايجات ضلن ساكتات ورا شويه طلعن يكملن شغلهم ورحمه نامت إني كذالك نمت للصبح كعدنا كلنا خلصنا كلشي وصعدنا نحظر نفسنا حتى نروح الجوائح..
بين ما كملنا طلعنا كلهم موجودين جوه اول ما شافنا وسام گام طلع يشغل السياره راجح الوحيد الي ما جان موجود سلمت على امي وطلعت صارت كدامنه خاله نيرمين هيه وعمي محمد جاين من بيت جوائح وضعهم طبيعي رغم رحمه جانت تباوع عليهم تتفصح ملامحهم زين لهنا الوضع طبيعي لحد ما وصلنا البيتهم قبل لا ننزل گالت رحمه.

- وسام  أي أحد يريد يجي البيت جوائح انطني علم او حتى تحجي وي اخوك مو مهم.
وسام:: ماشي انزلن هسه وصيحلي فرات..

::- وفعلاً اول ما دكينا الباب فتحه فرات وجان واضح هستوه كاعد من نوم رغم الوقت متأخر
سلمنا علي وراح الاخو  لحمنا جوائح كاعدة على كرسي وبيدها كلاص عصير.

وهجَ:: اختييييييييييييي
::- ضحكة بصوت عالي فرحانه كأنها جانت خايفة تشوف اختها بوضع مو زين بس صار العكس وشافتها بوضع تمام راحت تحضنها واحنا واكفات سلمنا عليها وهيه ضلت كاعدة ما تحركت .

استبرق:: خوفتيني وخليتنا اليل كله كاعدات  وهسه الحمدلله راح الخوف نكدر نرتاح.

جوائح:: شبيجن كولن يالله تراني زينه.
غفران:: رجلج بيها شي ؟

رحمه:: اي الدكتورة كالت لازم اسبوع او أكثر ما تمشي عليها وتضل كاعدة
- ابتسمت جوائح وگالت.

- يلا هنه كم يوم احجولي البيت شلونه بدوني ؟

وهجَ:: مو حلوووو وهذوله علي وايڤار يتعاركون محد يرزلهم جنتي صاكرتهم وهاي كوثر تتمضحك لان مريضة انتِ واسراء تفتر وتنبش بالبيت والخطار رايح وچاي وسلمان كل شويه مسويله سالفة لان فرات ما موجود والعالم تجي علمودكم وسوالف تعبانه بس أبوي كال الهم مدري شنو وسكتهم  وزهره دافع الج إذا اقاربنا حجن عليج  خوش مره صايره واني هم خوش بنيه لأن كمت اطبخ واشتغل وما افتح تليفون لازمه انذار كل شويه افتر بمكان خاف يسون شي .

رحمه:: يبووووو كافي كافي نهديتي
استبرق:: شبيج وهجَ نسيتي من كتلت كوثر وذبيت ماي على اسراء ومن اسامه رزل البنات لان يحجون علينا.

:- هنه يحجنن وجوائح مركزه وياهن ورحمه تحير تسكت منو ما سكتن لحد ما دخل فرات بيده اكياس  باوع علينا وگال

فرات :: هذا اكل الكم اني راح اطلع ساعتين واجي لا تروحون ابقن يمها ولا تفتحن الباب الأحد لحد ما تشوفون الكاميرات.

:-كمل كلامه وراح بسرعة كامت رحمه اخذت الاكياس وراحت للمطبخ وصاحت على استبرق تجي تسوي جاي..

::- ضلت وهجَ تسولف وي جوائح وهيه تتجاوب وياها اما إني ضليت ارقب الكاميرات كل شويه تمر سياره

رحمه:: عوفي الكاميرات وتعالي اكلي.
:- رحت وإني ساكته ضلينا نسولف ورحمه تسوي لفات الجوائح وكل شويه تخزرها علمود تكمل اكلها وترجع تخزرنا علمود نكمل سوالف ونسوي واهس الها  لحد ما اجه فرات وگال وسام ينتظرجن حجت رحمه وي جوائح بصوت ناصي وهيه تهز برأسها ترخصنا منهم ورجعنا للبيت وهج طول طريق تبجي.

وسام:: ليش تبجين هسه اختج مو بعيدة شوكت ما تدرين اجيبج إلها.

- اسكت انت ما تعرف شنو يعني اختك تتزوج وتعوف البيت.
- هم صح بس اخوي هم تزوج وعاف البيت

- اخوك اخذ اختي راح اضل حاقده علي
- اختج هم اخذت اخوي راح أحقد عليها
رحمه:: انطموا ثنينكم

استبرق:: اهوو شبيج رحمه خليهم يسولفون وسوالفهم تونس
- انطمي انتِ هم
::- سكتوا لان جانت منفعله ومجرد وصلنا البيت فاتت على غرفة عمي محمد ماعرف شنو حجت ويا وطلعت وراها بشوي طلع عمي محمد راح الغرفة جدي وصوتهم صار عالي
اول ما طلع گالت زهره.

- شبيك يمه ليش أصواتكم طالعه
محمد:: ماكو شي كولي اله خلي يلزم اخوته لا اتصرف غير تصرف وكتاب الله احرك بيوتهم وحلالهم واصفيهم بشارع.

:- نطق آخر كلمة ودخل الغرفته بنفس الحظه رجع طلع وبيده سويج ضلت زهره تتحسب وتعدي عليهم واحد واحد وعماتي يسكتون بيها ومن هذا اليوم بعد ما اجت جوائح البيتنا ولا دخلت اله الكل يسأل عمتي نيرمين وتطلع أعذار لحد ما وسام كال .

- فرات وجوائح طلعوا من بغداد الاربيل
وراح يبقون كم شهر هناك بسبب شغل فرات.

:- الكل اعترض وصار يحجي لان ما اجو للبيت قبل لا يروحون دخل الشك بكلبي من زواجهم لليوم محد يخلينا نروح بس مره وحده فقط  يا نراسلها يا نتصل عليها ودقايق وتسد التليفون ابتعدت عنا إلى أبعد الحدود رحمه الوحيده الي جانت تززرها دائماً وتحجي وياها وأكثر من مره تختفي ونعرف تروح إلها بس تنكر يوم يومين شهر او أشهر حياتنا مثل ما هيه الكل ملتهي بشغله رجع الدوام وكلنا ندوام حتى وهجَ ويانا واغلب وقتها تتعارك وي وسام وما تدخل المحاضره مالته اسامه خطب فاطمه وتم عقدهم استبرق وايان يجهزون ببتهم لان عرسهم بداية السنه  واني وراجح شي منتهي كل ما يحاول يتقرب مني ابتعدت عنه أكثر إلى ان حس هو وابتعد كذالك صار يدوام وي وسام بس حمدت ربي لاني بقسم ثاني وبعيد عنه..
ست اشهر مرت بس غيرت اشياء هواي الكل جان ملتهي بنفسه والمشاكل خفت ويمكن لان عمي محمد هددهم الله اعلم جوائح التهت بحياتها أخوانها زعلانين عليها بسبب بعدها بس محد يكدر يحجي وياها لان رحمه محذرتهم جنت متأكدة اكو شي مخفي وزاد شكي من سلمان طلب من عمي محمد يأخذ العائلة كلها للبستان ونبقى هناك يوم كامل محد اعترض بالعكس الكل فرح لان البيت صاير كئيب بين ما أخذنا الاشياء التي نحتاجها ونزلنا نكعد كل ولد عمامي وبنات عمامي مجتمعات وسام جان يضحك وكلهم يباوعون اله صفح شال كاست الماي أيان وشمرها علي.

غفران:: لااا البيت راح يتوصخ
رحمه:: اسكتي خلي يركعه
وهجَ:: ليش ؟

::- التفت الها ايان فاتح عيونه مصدوم بس شافته يباوع الها كالت.

وهجَ:: اركعه حيل.
::- ضحكوا كلهم عليها لان خافت من اخوها

وسام:: اكللهم شبيها اختكم
ايڤار:: أكل وحل
علي::  الزم السانك لا اكصه
رحمه:: انطم

::- كلهم يخزرون بي حتى رحمه صايره نسخ لصق من ايان تتصرف مثله وتحاسب مثله واستبرق تصيح صارو ثنين خاف عايزه اني..
أثناء حديثنا طلعت زهره هيه وعكازتها اول ما شافها گال

وسام:: زهره ما دريتي شصاير
زهره:: شصاير ولك سترك ربي
-چا غير حفيدتج حامل
::- بس كال هيج طفر من مكانه ميت ضحك وايان أعصاب صاير.

زهره:: ياعع ياهيه ولك بس لا مرت فرات.
- اي زهيره راح اصير عم وشلون عم اطك بالكاع.

::- رحمه التفت على زهره الي ملامحها انگلبت كلاب حاولت تبين العكس بس لگفتها رحمه و حتى اني ما فرحت موضوع زواج فرات ما راح من بالي ولا كدرت اتقبل الفكره.

زهره:: شوكت يردون
- اتوقع اليوم كالوا يجون وهم ورانا للبستان.
وهجَخافت من اخوانها وعصبيتهم ما انطت ردة فعل او يمكن غير شي لأنها واضح وضوح الشمس مو فرحانه

::- اول مره ما نفرح وكلنا نفس الاحساس حسيت لازم احجي الهم بس نرجع بليل أخذنا اغراضنا وطلعنا كلنا أكثر من سياره والبيت خلوا اسامه موجود بي لان ما يريد يطلع..
الكل جان فرحان ومحد متوقع راح يصير شي يگلب حياتنا ويگلب الموازين....

ـــــــــــــ⊰ ـــــــــــــ

يفور بلحظه غضب رفعت ايدي وضربته راشدي على وجهه ابتعد عني صافن بوجهي ما نطق بحرف واحد طلع من الغرفه وبعد ما رجع
جنت اريد وقت حتى اكدر اطلع بداخلي بس عجزت افهم شعوري  التعب إلي بيه ما يوصفه أي كلام شعور الخذلان ابشع شعور  الاول مره حسيت نفسي ضحية اني والي بطني ماكدر اتصرف أي تصرف وانزل الطفل لان راح اكون مثلهم ماكو فرق ورغم كلشي ضليت تمسكه بي وما تصرفت اي تصرف ثاني يوم أول شي سويته طلبت من ابويه ياخذ إلي اجازه لمدة كم شهر حتى اضبط وضعي ابتعدت عن الكل نهائيا ما طلعت من البيت أشهر تمر واني بطني يكبر فرات حاله حال اي شخص عادي ما اختلط بي وأحيانا يغيب بره البيت وما أسأل عنه  طول الأشهر إلي فاتت جنت أحاول اصير ام صالحه واتعلم اشياء تخص الاطفال من كل عقلي  وبيوم من الأيام دخل فرات عليه وگال .

فرات:: جوائح
:- رفعت عيني اله وها نطقة بحرف وهو فهم وكمل كلامه.

- تعرفين اني كلت الهم طلعنا الاربيل ومحد يعرف احنا ساكنين بشقة.
- الزبده
- وسام منطي علم للكل على طفل والكل يريد يشوفنا ومجتمعين بستان ابو علي نروح ؟,

::- صفنت بوجه شي بداخلي جان حاب فكرة طلعة وشي ثاني كأنه يحذرني من هاي طلعة بس غلست على شعوري حتى أروح اشوف اهلي  هزيت راسي وهو ابتسم وطلع كمت لبست شي واسع رتبت شعري وطلعت اله لگيته ينتظرني صعدت بصفه هو جان يتلفت يمين ويسار .

جوائح:: ليش تباوع شكو ؟
فرات:: ابقي دقيقه هسه أجيب الهويه واجيج.
:- نزل واني ضليت انتظره  صارت عيوني على أوراق هواي موجودة بسيارته فضولي دفعني اشوفهم كل ضني اشياء تخص سرحان أو شخص من العائلة بس شفت شي ما خطر بالي ولا حتى فكرت بي أول ما فتحت الأوراق وكعت منهم صورتين وحده منهم جانت صورتنا بالعرس والصور الثانيه جانت اله هو وبنت يحيى الجبيره لابسه فستان أبيض وهو لابس رسمي وثنينهم لازمين ايدين بعض 

قريت اول صفحه وجان عقد   زواج بإسمه واسمها حسيت احد ضربني على راسي من الصدمه نزلت من سياره رأساً 

حسيت كل خطوة اخطيها روحي تطلع بيها عقد زواجه بيدي أول ما شفته طالع من البيت وتليفون بيده يحجي مكالمة رفعت ايدي إلي بيها العقد وصحت بصوت عالي لانه بعيد عني بمسافه بس هيه مجرد لحظات وما حسيت غير سياره  شمرتني ما حسيت بشي غير حرارة الدم.......

لم يكن ما جرى سوى لحظةٍ عابرة في ظاهرها، لكنّها كانت كافية لتوقظ شيئًا لم يُفترض أن يستيقظ
مرّ كل شيء بهدوءٍ مريب غير أنّ الصمت الذي تلاها لم يكن بريئًا وكان في الأعماق ما يتسلّل ببطء كنبضٍ غريب لا يُشبه سواه.
هناك  حيث انتهت الكلمات بدأت حقيقةٌ أخرى تتشكّل معلنةً أن القادم لن يكون كما مضى.

يـتـابـع

ـــــــــــــ⊰ ـــــــــــــ