رواية جوائح الدهر الفصل الرابع والعشرون 24 - بقلم دعاء رزاق.

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

ـــــــــــــ⊰ ـــــــــــــ

:- بعد أشهر طويلة الكل فرح ورجعت سوالفنا وحياتنا طبيعية بس لازم بنص الفرحه يصير شي رفعت البدله دخلتها بسياره تقربت الها وگلت

وهجَ:: لا تشلعين گلب اخوي 
نيرمين:: عيب ماما
::- دفعتني امي وسدت الباب غمزت الها شافني ايان درت وجهي ورجعت  راحت امي وي ابويه وبس تحركت سياره العرس طلعوا وراها كومه سيارت كل جماعة ايان وجماعة ولد عمامي باختصار هواي أشخاص يزفونهم للفندق ويرجعون رفعت أطراف فستاني وتمشيت بهدوء بسبب الكعب مالتي  وكفت بمكان ونزعت الكعب شلته بيدي والتفتت اريد ادخل صار كدامي وسام طالع بيده تليفون كأنه يراسل درت وجهي وكملت طريقي ما التفتت اله  وكملت طريقي مادري شلون راح اتحمل شوفته بالدوام  أخذت نفس اصبر نفسي لمحت غفران وجَلنار واخواتها واكفات سوه  اجت بصفي شيلان وهمست.

شيلان:: هذني الي بصف غفران منو ؟
::- تحجي وعيونها على چَلنار وجيهان وجُواهر
التفتت الها وگلت
- هذني بنات عمنا هو صح ابوهن جلب وامهن جلبه بس هنه حبابات وحسب كلام رحمه واستبرق عايشات وحده ويوميه تمر عليهن عمتنا وبس .

- شلون يخلون بناتهم وحدهم ؟
- والله ماعرف بس كالن ابوهم ماله علاقة بيهن يدز مصرفهن ومن يفرغ من شغل يجي بالبيت بس لا يسأل ولا يعرف شي عنهن .
- شبيهن عمامج جلاب تريد واحد شريف ماكو.
- لا عمي فاضل وعمي فارس خوش عماما.
- زين طلعوا ثنين منهم.
-: هزت رأسها وراحت يمهن تسولف باوعت على جَلنار سحبت نفسها شويه شويه وراحت  طلعت تليفوني وثبته بمكان وشغلت التصوير صورت كم فيديو وصوره وطفيت تليفوني كعدت على كرسي نشرت كم صوره الي  على انستا   صار كدامي حساب وسام ترددت ادخل وفعلاً ما دخلت عفت فضولي يگتلني أهم شي ما يكول تراقبني  دخلت على واتساب اريد ادز صور الجوائح ومن تصحه تشوفهم بس  انصدمت من شفتها فاتحه رسالتي والتسجيل  مال كوثر واصل الها انسطرت من صدمه رأساً اتصلت ابتعدت عن الفوضه ورحت للجهة ثانيه اتصلت عليها  بهذيج الحظه حسيت گلبي راد يوكف شعور ما ينوصف دمعت عيوني وإني انتظرها تجاوب وفعلاً انفتح الخط راساً كلت

وهجَ:: جوائح ؟؟؟
- لا مو جوائح
::- بهتت مصدومه من سمعت الصوت  همست

وهجَ::حمزه ؟
حمزه:: اني شكايلج ؟
- دقيقه شسوي تليفون جوائح عدك ؟
::- سكت دقيقه مثل إلي يفكر أخذ نفس وگال
حمزه:: تليفونها بقى بالمستشفى وأخذته وبس ترجع تأخذه
- ياااا حمزه والله عبالي هيه گلبي اجه يوكف ليش هيج ؟
- شسوي مثلاً وبعدين اا تغيرين الموضوع مو كنلج لبس مشلتح ماريد ؟
-: رمشت مرتين استوعب بشنور تورطت اني
وهجَ:: ههههه يا مو احم هاي
- اي كملي جمعي الاحرف وانطقي
- شبيك عرس اول اخونا الجبير خليني فرحانه دخيل ربك
::- رجعت سكت حسيت احد يمه ويتهامس ويا  كلت

وهجَ،:: امك يمك ؟
حمزه:: اي يمي ماتكدر تحجي مكسره تكسر
لا ايد لا رجل مفاصلها خطيه وحسابج بعدين سالفه لبسج ما افوتها الج

وهجَ:: سلملي على امك وكللها وهجَ دكول شلونها مرت ابوي وعلى سالفه لبسي أبوي وايان وايڤار وعلي كلهم موجودين محد حاجني ليش بس انت

حمزه::  ما عدا ابوج بس اخوانج مكرنين كلهم كرونهم حتى الأعمى يشوفهن.

-  صحيح وابسط مثال كرونك طالعه من شاشه.
- صفن ما مستوعب كلامي رأسا طفيت النت من تليفوني الله يستر من ردت فعله حمزه اكبرنا منا كلنا ما عدا ايان اخونا من مرت ابونا الكل ما عدا كم شخص يعرف ابوي عنده ابن غيرنا حتى سلمان ما يعرف بوجوده حمزه أكثر شخص قريب من ابونا وهو المسؤول عن كلشي صار حرك تهديد  وخسارتهم بكلشي جوائح تخطط هو ينفذ بعيد عن الأنظار ومحد يشك بي لان من الأساس ما يعرفون بوجوده

حمزه مو بس اخونا إنما هو سلاح ابوي الي معتمد عليّ بكلشي وأقرب شخص اله من بينا هو جوائح
اخذت نفس وقفلت تليفوني كله التفتت اريد أرجع المكاني بس لمحت شي بالمسبح من بعيد مشيت بسرعة وكل ما اتقرب يوضح الي منو موجود بداخل المسبح  صرخت بصوت عالي بمجرد لمحت جَلنار بداخل المسبح على إثر صرختي ركضن البنات باتجاهي واصواتهن علت الكل تجمع راد ينزل شخص من اقاربنا بس سبقه ايڤار وطفر يسبح طلعها من الماي  رحمه هوه غطوها أدخلت غفران وماكو ثواني واستفرغت كل الماي ساعدتها وخلينها تنام صفح ليش ما اعرف بس سويت الي كالته غفران دقايق وشالها ايڤار واخذوها للمستشفى ضليت صافنه ماستوعبت الصار ولا كدرت افهم شوصلها  بنص المسبح اخذت اختها او وصلنا راجح للبييت والكل رجع   اول ما فتت صعدت بوجهي فتت بدلت وكعدت جيهان ساكته وبس تبجي غفران تحجي وياها ما نطقة بشي لان أعرف شكد صعبه تشوفين اختج بهيج وضع   ضليت بمكاني بس انتجيت على قنفه وغمضت عيوني شلون نمت مادري نمت واني كاعدة ما حسيت اله على ايڤار ينومني على جربايتي فتحت عيوني باوعت على شباك الشمس طالعه طفرت من مكاني اباوع اله عيونه تعبانه مو بس عيونه حسيته تعبان وبي شي مو طبيعي  .

وهجَ:: اسم الله زهره شبيك حبيبي ؟
- ما نايم نعسان وتعبان
- تعال نام بس كلي شلونها جَلنار ؟
- زينه ما بيها شي
:- ما ضغطت ولا سألته شي ثاني كمت سحبت الستره منه  ما قبل ينزع  قميصه ضل بملابسه نام على جربايتي غمض عيونه ضليت امسد على شعره لحد ما ثگلت أنفاسه عرفته نام غطيته عدل وسديت البرده نزلت السبلت اله وطلعت من الغرفه  فتت الغرفة كوثر وميلا لگيت غفران ورحمه كاعدات يمهن وكلهن ساكتات حتى كوثر وميلا عقدت حواجبي وگلت

وهجَ:: شبيجن كاعدات سوه دخيل الله شكو ؟
كوثر:: اهووو شكد تسولفين اسكتي راسي يوجعني
غفران:: ايڤار دخل يمج طلعنا لان جان تعبان
- اها هيج الحجي يلا كلولي شبيها جَلنار

رحمه:: عدها فقر دم حاد وجانت كاعده هناك دايخه او واكعه بس ماكو شي ثاني

- يمه الحمدلله شفتها منين تجينا المصايب مادري.

::- ضلوا يحجون  نامت كوثر وميلا وغفران رحمه ما نامت بدلت وطلعت  نزلت وياها باوعت على ساعة وگالت

رحمه:: بعد ساعة طيارة ايان واستبرق كون يكعدون
وهجَ:: هاي اذا نايمين عود.
::- خزرتني وراحت تسوي جاي  ايان قرر يسافرون اسبوعين  وبعدين من يرجعون يسون عزيمه للكل وافضل شي هيج..
بس العالم من صبح جايه حتى العرسان مو هنا بس كل شوية جاي أحد يبارك  ورا سبوع على عرس  لمحت انمار جامع ولد عمامي ويتفقون على شي حتى فرات أو وسام علاقتهم رجعت طبيعي وي الكل ولا كأنه صار شي فقط اخواني بتجبنون فرات غلست عليهم والتهيت بنقل ملابسنا للببيت الجديد كلشي كامل بس منتظرين  عزيمه العرس وبعدها ننتقل
ثاني يوم طلعت رحمه من صبح للمحمه عدها شغل وراها بدقايق دخلت امي وگالت.

نيرمين:: ماما وهجَ علاوي راح ياخذكم البيتنا وتلگين اكو شغلات مرتبتهم اني لا تخلين أحد يخربهم و.......

::-ضلت تشرح إلي عن أشياء هواي ما فهمت شنو السبب بس من گالت مروا على بنات عمج اخذوهن صفنت ما مستوعبه شي گلت

- عليمن ناخذهم؟
:-  اليوم مشيت رحمه وعقد قرائنها من أنمار.

وهجَ:: هااااا؟؟؟
- اي المهم سوي إلي كتلج علي وتلگين فستانين هناك اول اول واحد الرحمه وثاني خاف ما يعجبها الاول.

::- نهت كلامها وطلعت كمزت بمكاني من الفرحه ركض ركض بدلت وأخذت مكياجي وطلعت غفران تنتظرني بره انطلقنا أخذنا بنات عمي وجَلنار كوه اجت  اول ما وصلنا للبيت انصدمن كلهن حتى أني انصدمت لان جان بدل الكوشه كوشتين وكلشي مرتب الذهب والاغراض العقد مال عروستين مو مال واحد  وحده ضلت صافنه بوجه الثانيه بهل الاثناء دخل عمي فارس ويا ابويه ابوي اتقدم علينا وكف بصف جَلنار وگال.

محمد:: تعالي وراي عمي.
::- باوعت على أختها  ورجعت تباوع على أبوي كأنها خايفه ابتسم الها يطمنها اخذها وراح يحجي وياها ورا دقيقه دخلت رحمه بس شافت وضعنا وباوعت على كوشات هزت رأسها بمعنى شكو  راحت غفران طلعت اشياء تخص العقد أول وحده مكتوب عليها رحمه وانمار بس شافتها فتحت عيونها مصدومه رحمه تباوع على الاسم وتباوع على ابوها.

والصدمة الأكبر من طلعت القطعه الثانيه والاسماء المكتوبه ايڤار وجَلنار..

رحمه:: دقيقة شصاير هنا مو المفروض بس همه شنو سالفة.

فارس:: عمج محمد خطبج الانمار واني وافقة.
رحمه:: وإني شنو هنا شلون توافق ؟
غفران:: ابوي يعرف مصلحتج اسكتي

وهجَ:: دقيقه وشنو وضع اخوي وجَلنار
فارس:: نفس الشي محمد خطبها من ابوها واكيد وافق ابوها  مادام الكبار متفقين لا تدخلون انتم..
::- يحجي كأنه موضوع حداً عادي بس طلع ابوي رآحت رحمه وأخوات جَلنار يم اختهن صفنت على ابوي حط أيده على كتفي وگال

محمد:: افرحي الإخوج
- بس ما يحبها ؟
- هو اجاني وطلب مني اخطبها اله وباسرع وقت وإني ما رديته وإني اثق باختياره لانه اعقلكم..

::- مجرد كال هو طلب منه سكتت بس ضليت أفكر بالموضوع  عفت أبوي والكل رحت أسوي الي وصتني امي عليّ كملت كلشي ودخلت يم البنات لمحت جَلنار لابسه فستانها وتبجي شبه منهارة ورحمه واختها جبيرها تحجي وياها .

::- ما دخلت خليتهن يحجنن وياها وبس كامت رحمه تلبس فستانها حسيتها ترجف كوه تسيطر على نفسها ما توكع رحت ساعدتها وخليت غفران تسوي المكياج إلها ورحت يم جَلنار  مسحت دموعها وگتلها.

وهجَ::  اكلج شي ؟
::-, هزت راسها بمعنى اي ابتسمت حطيت الها مكياج وإني احجي
وهجَ::  مرات ننحط موقف نحسه صعب وما نستقبله بس هو الصالحنا ويمكن بي خير النا بس ما نعرف  ومو لانه اخوي بس الحق ينكال
ايڤار انسان واعي وفاهم وعاقل كل الصفات الزينه بي وإذا الله كاتب الكم تكملون حياتكم سووا  راح تذكرين كلامي اخوي زلمه خوش زلمه  وهسه ماريد أشوف دموعج  اعتبري هاي خطوة جديدة تغير حياتج خلي عندج امل رغم كلشي خلي بالج أكو اشياء حلوه تنتظرج مهما انكسرتي او عشتي اشياء صعبه تجيج اشياء حلوه تمحي كلشي  ..

جَلنار:: الله كريم  عادي اشوف ايڤار اريد أسأله شي.

رحمه:: لا مو عادي كملي وبس يخلص العقد احجو براحتكم ..

::-  سكتت وما حجت بعد بين ما كملنا كلشي اجو المعازيم طلعن البنات يهتمون بكلشي  أمي عمتي زهراء كلهم تكفلوا بأدق التفاصيل 
مجرد صار صوت  السيارات بره سحبت ايد جَلنار وأخذتها للشباك تباوع من فوك

::-  السيارات ملت الفرع كله  وكل الي نزلوا شيوخ كبار والي وياهم لابسين لبس عسكري وكل نواع الرتب موجوده باختصار مشية ترفع الراس من بين العالم كلها لمحت أخوي نزل لابس لبس رسمي وبيده باقة ورد وبصفه انمار لابس بدله رسميه كذلك وبيده باقة ورد

تختلف عن الي بيد ايڤار  التفتت مبتسمه واحس الفخر طلع من خشمي  رحمه جانت تباوع مبتسمه وجَلنار تباوع وعيونها مدمعه  فاتتت امي اخذتهن ثنينهن  ركضت اخذت تليفوني دزيت رساله الايڤار وطلعت ركض وگفت بالباب علي وزياد او وسام ياخذون التوزيعات والماي يقدمونه دقيقه ولمحت ايڤار يتقدم باتجاهي ضحكة بفرح رجعت اركض مثل الخبله كومت جَلنار من الكوشه وسحبت شال العقد ليش مادري بس اجه بالي أخذه

اخذتها للباب بس لمحت ايڤار وكفت مصدومه بمكانها وهو كذالك وكف يباوع الها مستغرب ليش مادري اشرت اله تعال اجه يتقدم الها حطيت الشال بيده وطلعت وكفت بالباب اتسمع الهم وغفران وكفت وراي تسمع كذالك..

::- مديت راسي شوي اباوع الهم مدنكه راسها وهو ساكت  مسح على وجه وگال الها.

ايڤار:: ما مرتاحه ؟
::- هز رأسها وما زالت منزله رأسها اتقرب منها أكثر وگال

ايڤار:: ارفعي راسج جَلنار
:- ضلت ساكته لمن مد ايده على وجها رفع رأسها بطرف إصبعه

ايڤار:: راسج لا تنزلينه مره ثانيه خلي راسج عالي دائماً 
جَلنار:: ايڤار
- لا دكولين شي افهم شنو حابه دكولين بس ما راح يفيد الحجي اني من أول يوم شفتج جنت ناوي اخطبج  واجه اليوم الي راح تصيرين بي على ذمتي من اليوم بعد ما تفكرين بشي ولا شي واحد  لأن اني موجود ..
::- كمل كلامه نزل عيونه على أيدها إلى طالعه فتح شال حطه على رأسها وتغطى كل جسمها من فوك همس إلها شي وراح
::- التفتت علينا تمشي حسيتها مكسوره  امها وينها عنهم ولا شخص من عائلتها موجود غير اخواتها معقولة لهل مرحله وصلت بيهم يعوفون بتهم بهيج يوم يعجز الكلام عن وصف  الوضع اخذتها كعدت بمكانها أشرت الاخواتها يبقون يمها وفعلاً ولا وحده عافتها غفران يم رحمه  ضليت اصور لحد ما كالوا راح يدخل الشيخ استغربت ليش يدخل كلهم لبسوا حجاب حتى اني خمس دقايق ودخل الشيخ  ويا ابويه ورجال ثاني عرفته هذا ابو جَلنار

كعد الشيخ بالبداية يسولف ويحجي عن الزواج بعدين بلشوا بعقد انمار ورحمه اتقربت مني غفران وگالت

- رحمه وانمار من 17 سنه واحد يحب الثاني
وحتى بعد ما تزوجت ما تغيرت مشاعرهم وبعد هاي سنوات اليوم عقد قرائهم كدام الأشخاص الي جانوا سببب كسرتهم

وهجَ:: أنمار متوتر
-: عيوني عليهم طول ما السيد يردد الكلمات لونه مخطوف ومتوتر رحمه ماواضح منها شي بسبب الشال بس جانت خايفه أكثر من أنمار وحقها اليوم هو اسعد ايام حياتها

2020/10/22
وبهذا اليوم انعقد گلب رحمه بگلب انمار
وانتصر حبهم بعد 17 سنه

- رجع السيد يعقد الايفار وجَلنار
ثنيمهم وضعهم ما يتسولف عقد الهم الشيخ
وانعقد گلب ايڤار بگلب جَلنار

::- بارك الهم الشيخ وطلع الإستقبال يم الزلم
بس طلع كامت زهره من مكانها وعماتي وياها يطشون جكلية ويهلهلون وهوساتهم ما وكفت
كملوا تلبيس الذهب وكلشي اترخصو وطلعوا  باوعت على رحمه عيونها حمر وجَلنار كذالك  هزيت راسي بقلة حيلة هذني وتالي وياهن

جمعت البنات كلهن وكومت العروسات نركص وياهم وفعلاً شويه شويه صاروا يضحكون  ورا ساعه راحوا يبدلن  واحنا عزلنا البيت  ونشغلنا بترتيب  جنت طايره من الفرح بسبب اخواني واحد تزوج وثاني عقد قرائنه 
ورا الاذان بساعة تقريباً صارت هوسه وأصوات عالية بره  طلعت رحمه من الغرفه مستغربه الوضع وراها جَلنار نشفت ايدي وشمرت الخاولي  فتحت شباك وألمح 
ولد عمامي واخواني مجتمعين بالباب وي فرقه موسيقيه وانمار على ضهر اخو زياد وايڤار على ضهر وسام ويركصون باب البيت فرحانين

غفران:: خلونا نطلع وياهم
جيهان:: أي والله خلونا نطلع
وهجَ::وياهم كم واحد عيب
::- التفتنا على رحمه تضحك فرحانه وتسولف وي جَلنار  نص ساعة وهمه مستمرين لحد ما خلصوا فاتوا للبيت يضحكون   عفنا شباك ورحنا كعدنا اول ما فات زياد صاح بصوت عالي.

زياد:: مباااارككك مرت أخوي
:- استحت رحمه وهاي أول مره اشوفه مستحيه  ضلوا يسولفون ويضحكون باروكو الجَلنار كذالك لحد ما تأخر الوقت وهمه كاعدين كلنا رحنا انام وضلوا يسولفون

ثاني يوم الصبح كعدت قبلهم كلهم باوعت على مكان جَلنار ما موجودة ولا الها أثر خفت رأساً طفرت دورت عليها بكل البيت بس ماكو أثر الها اخر شي طلعت للطارمه لمحت ايڤار حاط فراش بالكاع ونايم وبصفه المرجوحه اتقربت أكثر لمحتها نايمه على مرجوحه ومتغطيه وايڤار حاط ايده على عيونه ونايم

::-ما أعرف ليش ابتسمت بداخلي حسيت براحه عفتهم ودخلت جوه اول ما فتت صار بوجهي أنمار طالع من الاستقبال توه كاعد من نوم  والحمره واصله الخشمه وحنچه ضحكت بوجه ماكدرت الزم نفسي بس شافني اضحك استغرب عفته وفتت للغرفه سحبت الغطه من وجه رحمه  بس شفت شكلها كعدت بالكاع اضحك طفرت من مكانها مخلوسه فاتحه عيونها  وشعرها مفتوح والحمره بكل وجهها جنها مهرج

رحمه:: وسم شبيج مسودنه
- باوعت على غفران إلي تباوع مصدومه كلهن كعدن يباوع عليه وعلى رحمه أشرت بيدي عليها وگلت

وهجَ:: شوفن هاي المستهتره ولجن
رحمه:: إني مستهتره ولج ؟
جيهان:: شوفي وجهج شبي
غفران::  يااااااا
- ولجن أنمار وجه كله حمره هسه يلزمونه الولد هههههههههههه

::- بس كلنا هيج طفرت من مكانها تباوع على وجها سحبت شال خلتها على رأسها وغطت وجها طلعت تركض  .

- يما بطني أول مره أشوف واحد يفضح نفسه
جُواهر:: انجبن كافي وي جَلنار ؟

وهجَ:: هههههههههههه يم أخوي
جيهان:: حتى اختي استهترت
::- طفرت جُواهر تركض تجيب أختها ورحمه  ورا دقايق رجعت خازرتني

وهجَ:: ها بشري مسحتي الجريمه
رحمه:: اطلعها منج إني اعلمج إذا ما اردها بسيطه..
جيهان:: صدك جذب اول طيحته ملطخه وجهج
غفران:: ملطلطين

-  اكلن *** يا حيوانات ما تستحن شنو هاي الألفاظ طيح الله حظج

وهجَ:: نعتذر رحمه ام الحمره
::- ضربتني برجلها واني ماكدر اسكت لزمتني الضحكة بنفس الوقت اجت جُواهر  ساحله اختها من أيدها

جُواهر:: اني اعلمج بعدين
رحمه:: عوفيها شعليج بيها ؟
- أنتِ اسكتي امشي غلسي وجهج من الحمره فضحتنا

- هههههههههههههه
رحمه:: وسم الي يسمجن كون
::- راحت دردم علينا  وجَلنار صافنه
جيهان:: شسويتي ولج ؟
- ما سويت شي بس طلعت أشرب ماي وهو صاحلي والله وكال تعالي ما ردت اروح بس كال إذا ما تجين اشيلج وما رحت شالني وخلاني اكعد بالمرجوحه وكال ليش طلعين بهيج لبس بعد ماريد أحد يشوفج وكال....

::- ما خليتها تكمل وعطت بيها
وهجَ:: يبووووو شبيججج حجيتي كلشي ولج وين الخصوصية ليش تسولفين

جيهان:: انجبي خليها تسولف احجي بعد شكالج
جَلنار:: كال...
- ولج اسكتي يااااااا اذا تحجين بعد اروح أكله خطيبتك فضحتك لا تحجين على اخوي.

::- سكتت تباوع الي وترجع تباوع على أخواتها هزت راسها اي وكالت

- بعد ما اسولف
- خلي اسمعج مسولفه اله اكله عليج
- لا ما اسولف
- شو تهددين اختي كدامنا ؟
- انجبي اختج تفضح سوالف اخوي
- اخوج سريري يأخذ اختي بليل
- اختج مستهتره شعدها طالعه بليل
- طيح الله حظج وحظ اخوج
- لا يا صخله الله يطيح حظج انتِ واختج

غفران:: اهوووووو شلون بينا احنا واحد يكعد يكول يالله وانتن حايرات منو باس منو ومنو راح يم منو شعدنا ما دكولون شعدنا

::- فتحنا عيونا مصدومات بصوتها العالي فتحت الباب رحمه تباوع على غفران مصدومه بيها

رحمه:: طلع صوتج غفران مو اصبريلي
::- راحت جابت عودة المساحه كل وحده اكلت المقسوم طلعتنا جوه الولد نايمين واحنا  كاعدات للتسعه اجتي امي وابويه وجايبين ملابسنا واغراضنا  اخذناهم وفتنا نرتبهم
للعصر راحت جَلنار واخواتها او ولد عمامي هم راحوا بقى علي يمنا بس وعمي فارس وعمتي زهراء بقوا هناك على أساس بليل يرجعون امي راحت للعيادة وابويه بدوام البيت فارغ تماماً رحمه تطبخ وغفران تحجي مكالمه وي استبرق  اخذت نفس وطلعت كعدت بالحديقة بداية الشتاء وريحه الورد بكل مكان ودنيا مغرب حسيت براحه
ضليت صافنه لحد ما اجت غفران تضحك كعدت يمي وگالت

غفران:: نسيت اكلج رحمه كالت يوم الأحد تروحون للدوام

وهجَ:: ادري كالت بس مالي خلك
- شنو مالج خلك خلينا ندوام تتغير نفسيتنا ونشوف أصدقائنا
- وسام وراجح يطلعون بوجهنا
- عادي ما نهتم  نعتبرهم حالهم حال الدكاتره الباقيه ولا نركز عليهم
- نحجي برسميه ولا نعرفهم ولا شي متفقين
- أي عفيه منو همه لا نعرفهم ولا شي
- الله كريم نشوف بس باجر وراها انداوم
- البيت هادي وبي راحه مو طبيعية نقصنا جوائح بس
- ترجع باذن الله
:- كملنا حديثنا وكمنا فتنا للببيت صوت القران عالي ورحمه لابسه الجادر وبيدها قران تقرأ ما رفعت عيونها علينا ضلت تقرا  فتنا للمطبخ  باوعت على غفران وكلت.

وهجَ:: روحي شويه وراح يأذن اني حسوي المقبلات
-: باوعتلي بنظره عرفتها معذورة مثلي طلعت الخضره خليتها تنظفها واني  اثرم
فات علينا علي  بيده  تليفون كال

علي:: امي دكول ما اجي اليوم  بتسعه تروح للمسشفى عدها عمليات وتتاخر يلا ترجع وأبوي عده شغل هم ما يرجع 

وهجَ:: وايڤار؟
- لا يجي
غفران:: يعني بس احنا نبقى بالبيت ؟
- اي  بس والله احس بغرابه وين صوت العياط والهوسه شو ما حبيت خلونا نرجع يم زهره.

وهجَ:: روح منا لا اركعك هستونا حسينا بطعم الحياة امشي منا

:-: هز ايده ما عاجبه وراح  من يوم إلي انسجن اسامه علي مو مثل قبل
شفته راح اخذ كوشه حطها بالكاع وتمدد بصف رحمه باوعت اله شالت المسبحه انطتها اله وگالت

رحمه:: هاك استغفر ولا تضل ضايج
::- وفعلاً أخذها وكعد يسبح باخر كم شهر ابتعدنا هواي ونسيت هو قريب من جوائح لان هيه ربته واهتمت بي أكثر من امي واسامه جان قريب منه وثنينهم راحوا شلون هملته هيج!!!

وهجَ:: كملي انتِ
- لا تروحين خلي يم رحمه بعدين احجي ويا
- بس  اكعد يمهم
- روحي يلا
::- كمت بسرعة غسلت ورحت كعدت بصفه حطيت رأسي على رجل رحمه   كمل تسبيح ونام بصفي تماماً  عشر دقايق وكملت غفران هم اجت يمنا كلنا حاوطنها وهي مستمره تقرا قرآن 
انفتح الباب دخل ايڤار يباوع علينا مستغرب گال

ايڤار:: شعدكم اليوم ؟
- روح بدل وتعال

::- ضحك وراح بدل وغسل واجانا كعد يمنا وگال

ايڤار:: أشوف رحمه بجوائح كأنهم شخص واحد
::- ابتسمت رحمه  وفعلاً كلامه صح جانت تلمنا بهذا الشكل قبل لا يجي سلمان وعمامي البيتنا  بعد سنوات رجعت حياتنا طبيعية مجرد إذن كلهم كاموا يصلون وإني وغفران كاعدات محد حرجنا ولا كالوا ليش ما صليتن
بين ما خلصوا صبينا الاكل وكعدنا كلنا سوه
ثاني يوم الصبح طلعنا نجيب اشياء نحتاجها
واول ما رجعنا كعدنا نشوف اغراضنا الامي وعمتي زهراء 

حسيت نفسي مترددة اروح للدوام بس بنفس الوقت بداخلي شي غريب ضليت طول اليوم افكر  نمت ساعتين وكعدت الصبح اسهل بروحي غفران عكسي كاعدة من صبح وكلها طاقه لبسنا وكملنا كلشي باوعت على نفسي وگلت

وهجَ:: شلوني غفران ؟
- تشكين المطي الرصاصي حلو هيج بس لا تأخذين كعب اسود طلعي كعب ماروني وجنطه نفس لو الكعب طلعين قنلة.

::- سمعت كلامها وفعلاً طلعت ولا غلطه..
دخلت رحمه تلبس حجابها  باوعت علينا

رحمه:: هاي بداية دوام كشخات بعدين ماكو خلك الجن تسون ايشي..

غفران:: اتفق بعد نقصنا استبرق
وهجَ:: بحالنا هيه وي الحب صدك شكد بقى ويرجعون ؟

رحمه:: يومين بس المهم فضوها واطلعوا علي ينتظركم بره..
::-  بوسنها وطلعنا نركض لا يشوفنا عمي فارس صعدنا بسياره گال علي.

علي:: وين رايحات للعرس ؟
غفران:: اكلك ترانا اكبر منك أمشي وصلنا
علي::  خلي يرجع ايان واني الجن..
::- يحجي ويباوع النا صفح اعرفه يشاقه
ضل يتعارك وي غفران بين ما وصلنا  دخلنا  أخذنا  استرغبنا الجو بس شويه شويه  كمنا

نتعرف على بنات ونسلم لحد ما راحت غفران القسمها دخلت للقاعة أقل من عشر دقايق دخل الدكتور يسلم ويرحب بطلاب  عرفنا على نفسه وعلى تخصصه وأشياء ثانيه  وصار يسأل على الأسماء بهدف التعرف عليهم
سألهم واحد واحد لحد ما وصل الي گلت

- وهجَ محمد سلمان
::- كمل كل الطلاب آخر شي باوعلي مره ثانيه وگال

هيثم:: دكتور وسام يقربج ؟
::- رأساً هزيت راسي بمعنى لا
وهجَ:: لا دكتور ماكو
::- باوعلي بطرف عينه مبتسم حسيته عرفني جذابه بس ما فشلني كدام الطلاب خلص اول محاضره يتعرف على طلاب ويشرح على منهج  
والكل مندمج  ورا ما خلصت محاظرته دخل دكتور  ثاني وهم نفس الدكتور الاول يعترف ويسأل حسيت بملل والوقت طويل روحي خلصت بين ما طلع رأساً طلعت اتمشى لحكتني وحده من البنات  التفتت الها
گالت

- اتفضلي هذا وكع من ايدج.
::- مديت أيدها لازمه اسواري
ابتسمت وگلت

وهجَ:: شكرا حبيبتي ما انتبهت من وكع.
- العفو ماكو داعي تشكريني  خلي اعرفج على نفسي مره ثانيه اسمي اماني..... وياج بنفس القسم.

- اهلا بيج أماني اسمي
- وهجَ محمد
::- ما خلتني انطق اسمي كالته رأساً استغربت الوضع اختصرت الحديث وياها وطلعت اخذت شي اكله وكعدت اكل  لمحت غفران جايه باتجاهي وياها فاطمه بمجرد شفتها كمت وكفت

وهجَ:: فطومم الحلوه
-: حضنتني فرحانه
فاطمه:: مشتاقتلج والله
- واني اكثر كذا مره ارسلج اتصل ماكو
-: سحبت كرسي كعدت
فاطمه:: نفسيتي تعبانه وماكدرت اتواصل وي احد شلونج انتِ ؟
- ماشي الحال
::- دخلنا بمواضيع هواي ما ذكرت اسامه كدامها حجينا عن أمور هواي ونسينا نفسنا كامن يرجعن هنه واني كملت اكلي شربت عصير رحت عدلت شعري وحطيت حمره مره ثانيه ورحت للقاعة عرفت نفسي متأخره  اول ما وصلت للباب سمعت صوت مو غريب طالعه من القاعه  دخلت وي كل خطوة أدعي ما اشوفه كدامي بس للأسف حظي زباله أول ما دخلت  لمحته كدامي  دكيت الباب وگلت

وهجَ :: دكتور ممكن ادخل
::- التفت إليه باوعلي بنظره سريعة وگال

وسام:: المحاظره صار الها ربع ساعة وين
جنتي ؟
:- صفنت عليّ إذا  اجذب راح يعرفني لان  جنه عايشين بنفس البيت وحافظني  باوعت على طلاب كلهم يباوعلي من الفشله گلت

وهجَ::   شسمه هي دكتور  ربع ساعة دكتور

::- باوعلي ما عاجبه لو بيدي اكفخه أشر على مكاني وگال

وسام:: هاي المره سماح ادخلي اكعدي.
::- درت وجهي ورحت كعدت بمكاني وكعت جنطتي بالكاع دنك واحد كاعد قريب مني شالها اخذتها منه وكتله.

وهجَ:: شكرا
- ولو
::- رجعت ركزت بالمحاظره وهو كل شويه يباوع على الولد الي انطاني جنطتي
ومستمر يشرح وحده من الطالبات سألته عن شي وهو راح يمها يجاوبها ومبتسم
دقيقه شويه الجو صار حار اخذت نفس 
حسيت حركة بطني مدري معدتي المهم اكو وجع ضليت لازمه نفسي لحد ما خلصت المحاضره مالته  رأساً كمت طلعت سمعته يصيح ورأي بس ما التفتت اله  اخذت ماي بارد وطلعت للحديقة  ضربت باقي المحاظرات بعرض الحايط  راحت اخذت غفران وبس اتصلت على علي اجانا ردت بس اوصل للبيت .
وبس وصلت نزلت امشي بسرعة شمرت جنطتي فتت للمطبخ طلعت  ثلج وكعدت على كرسي اكل ثلج واحسني بعدي محتركه حرك غفران تباوعلي من الباب هي وعلي ما حجت ولا دخلت يمكن خافت لأني جنت مثل صخله المسدونه  كملت اكل ثلج ورحت غيرت ملابسي ونمت ما كعدت اله على صوت رحمه تعيط بصوت عالي رفعت الغطه باوعت اله وكلت.

وهجَ:: شبيججج صيحين شييجججج
- وسم كومي نريد نروح البيتنا القديم باجر يجون استبرق وايان ولازم نستقبلهم من صبح وعدنا شغل هناك ..

::- كمت اسحل بروحي غسلت وبدلت گالبه خلقني وحتى غفران گالبه خلقتها
كملنا بسرعة وطلعنا انمار واكف ينتظرنا صعدنا بسياره ساكتات وهو ورحمه يسولفون  وصلنا واول ما نزلنا وكفت سيارة ايڤار ويا جَلنار وجُواهر وجيهان سلمنا ودخلنا سوه شافتنا زهره صاحت.

زهره:: يههلا بالحمامات نورتن دارجن.
وهجٕ:: الله زهره شنو هذا الاستقبال بوسنها وسلمنا على باقبات  التفتت اريد اسلم على عمي او وكعت عيوني على ايات كاعدة  بعيد عنهم وبيدها طفل  تنوم بي خاف جان ناقصني هسه كملت خزرتها ودمي يفور لزمت ايدي رحمه كعدتني يمها  همه يحجون واني عيوني تراقب الكل طلع وسام من المطبخ سويت نفسي ما اشوفه راح الها اخذ الطفل من أيدها وصعد فوك كامت هيه كعدت مقابيلنا وگالت

ايات:: شلونجن
رحمه:: الحمدلله شلونج
::- لا اني رديت ولا غفران لبسناها لبست النعال حشاكم شويه وكمت افرفر بالبيت من ضوجه صعدت على درج اريد اروح الغرفتنا القديمه اول ما صعدت سمعت صوت طالع من غرفتنا والباب مفتوح اتقربت أكثر ولمحت وسام حاط ابن فرات بحضنه والممه بيده يشربه حليب  ويهمس اله.

وسام:: نام بعد عمك نام ابوك رباني وهسه اني اربي ابنه بس تكبر تربي جهالي

:-: تحرك الباب رفع رأسه يباوعلي مصدوم رمشت مرتين والتفتت اريد اطلع بس كال

وسام:: تعالي لا تشردين
- ما شارده انتقي الفاظك
- فوتي وخلي الباب مفتوح.
::- فتحت الباب كله وفتت تقربت منه أريد أشوف الطفل بداخلي شعور غريب تجاهه
مد ايده ينطيني الطفل أخذته منه بحضني  فتح عيونه ورجع غمض هيج صغيرون بحجم النتفه  دمعت عيوني ماعرف ليش بس دمعت.

وسام:: هذا عهد
وهجَ:: ياعيوني شكد صغيرون 
::- بسته بخده ريحته حلوه وناعم ابيض ركزت على ملامحه يشبه فرات إلى أبعد الحدود ماكو أي شبه بينه وبين ايات كله ابو رجعت بسته مره تانيه انطيته اله وگلت

وهجَ:: الطفل ماله دخل بأعمال ابو الله يخلي الكم.
وسام:: دقيقه قبل لا تروحين منو هذا اليوم الي حجتي

::- عرفته يقصد الي انطاني جنطتي تخوصرت وكلت

وهجَ:: شعليك انت لا تدخل وبعد دير بالك ترزلني كدام الطلاب وحق علي و أولاده إذا تعيدها من ادخل محاظرتك بعد

::- نهيت كلامي وطلعت من الغرفه حتى نسيت أسأله شعده بغرفتنا كاعد
  كل مكان وزاوية بهذا البيت النا ذكريات مستحيل ننساها  طلعت للحديقة وكفت بره وإني اشوف فرات كاعد بالكاع بيده صوره يباوع عليها ويدخن  شكله تعبان وكأنه كبر عشر سنوات  رفع رأسه يباوع على الباب كأنه ينتظر شخص يجي 

:- يستاهل كلشي يصير ويا كسرها وغدرها وهي ثقت بي مستحيل انقهر عليّ  كعدت بمكان بعيد عنه ماكدرت الزم دموعي بجيت ما اعرف ليش بس بجيت  ضليت ابجي لحد ما خلصت دموعي مسحت وجهي ورحت على غرفة أمي القديمه فتت نمت
الثاني يوم صبح كعدت من وقت الطباخين لزموا الطبخ وعماتي البيت واحنا الضيافة باوعت على كامرات نزلت سياره بداية الشارع  كلهم صاحوا اجو العرسان كامت زهره والكل بحدود الخمسين شخص إلي لازم بيده جكلية والي سلاح وكفت السياره بالباب ماكو شي واضح منها لان مضلله التفتت على صوت ضحكة ابوي يضحك وكأنه يعرف منو اجه رأسا التفتت على صوت فتحت باب السياره نزل منها اخوي حمزه بدلته العسكرية الوجه كلها تغيرت ملامحها بعد ما انفتح الباب الثاني ونزلت منه وحده محجبه عقدت حواجبي مستغربه بس سرعان ما صاح علي بصوت عالي ونزل يركض باتجاه البنت التفتت النا تباوع عليهم واحد واحد لزمت ايد رحمه وگلت

وهجَ:: هـاي جــوائــح

ـــــــــــــ⊰ـــــــــــــ

البارت القادم يوم الجمعة او السبت

ايشي يخص موعد النشر بحساب الانستا انشره لان يصير عندي ضرف وما الحك اكتب ضيفو الحساب حتى تعرفون الموعد بشكل
صح

ـــــــــــــ⊰ ـــــــــــــ

or11._11
يوزر حساب