رواية جوائح الدهر الفصل الخامس 5 - بقلم دعاء رزاق.

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

الأحداث تتسارع والصراعات تتصاعد، والمصير يلوح في الأفق بلا رحمة. كل خطوة قد تغيّر كل شيء ولا عودة ممكنة أمام ما ينتظرهم…

ـــــــــــــ⊰ ـــــــــــــ

- جوائح

مجرد سمعت اسمها تخربط وضعي وتسارعت دگات گلبي  ثواني نزلت هيَ ورحمه سلموا على الكل والصدمة محتله الوجوه واحنا مركزين عليها و هيَ ولا التفتت ضلت تباوع على الكل بطرف عينها

زهره:: شوگت اچيتن 
رحمه:: ليش منو گال چنت وياها

انعام:: اذا مو سوا ليش رچعتوا سوا!

سلمان:: خلونا نتزقنب نتسمم ونشوف شنو هاي المهزلة.

كمل گلامه رجعوا بمگانهم ياگلون 
رفعت عيوني على أمي الي عينها على جوائح نظراتها كلها ندم التفتت على جهة جوائح واگفه بصف رحمه وعينها على وهجَ انرسمت ابتسامة غريبة على ثغرها

ثواني وراحت باتجاه المطبخ ورحمه لحگتها
استبرق داخله بحاله صدمه حالها حال البقية.
عشر  دقايق وگامت وهجَ للمطبخ استغلينا الفرصة وگمنا سوا.

دخلنا المطبخ ثبتت نظراتنا على رحمه تضحك بصوت ناصي وجوائح كاعدة على كرسي بيدها كوب چاي

أثر دخولنا التفتوا النا مجرد شافتنا رحمه اختفت ضحگتها .

رحمه:: يمه گلبي عبالي واحد من عمامي تف عليجن
وهجَ::  هاي عليمن.
رحمه:: عليجن اكيد قابل على سرحان.
غفران:: شبيج وين اخلاقج .
استبرق:: دقيقه خلونا نستوعب شصار قبل شويه

جوائح:: شصار مثلاً
استبرق:: انتِ تعرفين إني منو

::- نزلت كوب چاي من أيدها رفعت حاچبها وهمست

جوائح :: بنت عمي فارس اكيد.

استبرق:: لاا مو عم....
رحمه:: گافي حبيبات شبيچن كلنا أخوات صح انتِ ما اعرفج

تحچي وعينها على وهجَ اتچاهلت كلامها وشمرت نفسها بحضن جوائح حضنتها بقوة.
ابتعدت عن حضن اختها بحركة غير متوقعة اتقربت استبرق حضنت جوائح جمدت بدون ردت فعل  ثواني ورفعت أيدها طبطب على ظهر استبرق الي ماگدرت توصف شعورها بالكلام اگتفت بالحضن

علي:: الله شنو هذا إلقاء مشهد تاريخي

::- شهگنا مصدومين منين طلع هذا التفتنا كلنا ماد راسه من شباك المطبخ وبصفه وسام  مخلي ايده على وجه يضحك

وهجَ:: وسم ومرض شبيگم مخابيل گطتعوا خلفتي.
وسام:: اشش ولك ايڤار وينك 

::- مد راسه ايڤار وياهم چنهم حراميه .

- ها ولك
وسام:: شغل النا موسيقى ابو الغاز خلينا نبچي على هذا المشهد الحزين

رحمه:: وخروا منا لا اسويكم موسيقى هسه

::- سدت شباك وهجَ عليهم  گعدنا سوا واحد صافن بوجه الثاني كل الكلام اختفى .

وهجَ:: اجيب موبايلي واجي
جوائح:: لا طولين.

رحمه:: الباقيه وين استبرق
استبرق:: قسم منهم ما اجو ويانا شالوا قريب من بيت عمو محمد هذا أما انمار وزياد بيتهم هم قريب علينا بس وسام وفرات واسامه موجودين هنا 

رحمه:: خوش حچي بس فرات وين ؟
غفران:: طالع من صبح ويرجع بوقت متأخر ومحد يعرف شي عنه.

::- نهيت كلامي باوعتلي جوائح بنظره  سريعة ونزلت عيونها

استبرق:: سلمان ناوي نيه گشره الوهجَ او وسام

جوائح::  واحده منكم لاحظة تصرف او شي غريب !

استبرق:: انعام تطلع بره بوقت متأخر ومحد يدري بيها كوثر تدخل غرفة جدي وتطلع ضامه فلوس بالمكان سري وها زهره جاي تحچي براس نسوان عمامي لان عمه نيرمين تروح للشغل وهنه يشتغلون مگانها وعدج فرات يگعد ساعات طويلة بالحديقة مالتكم.

::- صفنت بوجه استبرق ثواني وهزت رأسها بمعنى گملي.

استبرق:: هواي شغلات صارت بس أغلبها تصير من نروح للدوام.

رحمه:: دوامگم بلشتوا بي ؟
- اي
- وهجَ وياجن ؟
غفران::  وهجَ طالبة سادس يعني مو بالجامعة مثلنا

::- عقدت حواجبها باستغراب التفتت على جوائح.
رحمه:: اصبري شلون هيه وايڤار توأم وهيه طالبه سادس!

جوائح:: وهجَ ترگت  دراستها خمس سنوات

::- قطع كلامها دخول وهجَ غيرت الموضوع فوراً  گعدت وهجَ فتحت تليفونها وطلعت تسچيل صوت الجدي وعمامي.

فارس:: ماكو هيچ حچي يأبه.
محمد:: إني الحد الآن ساگت ومتستقبل تصرفاتگم برحابة صدر بس توصل البناتي هاي واگفه وما اقبلها لا منك ولا من أخوتك .

::- صارت ضربه قويه مثل الي رگع الكلاص وصاح عليهم.

سلمان:: ومصيبة الحسين اذا ما يتزوچها ابن عمها ويستر عليها أخذها بيدي واشمرها على سرحان چلمه زايده منگم الي غير تصرف وياگم .

حسين:: انتو تحچون وأحنا مثل الطرش بزفه منو يتزوج منو وليش بويه ؟

سلمان:: بنيت اخوك م..

ما كمل كلامه رأساً صرخ عمي محمد بصوت عالي
محمد:: بنتي أشرف من اخوك وچلاب وزواج  ما ازوجها وابن امه الي يمد ايده عليها ربيتها بدم گلبي وعزيزة اخوانها هاي  اخوانها واختها بوجهك بوقتها واذا اشوفكم واصلين أنسى انت ابوي

::- خلص تسچيل كلنا رفعنا عيونا على جوائح او وهج جاهلين منو يقصدون بكلامهم بس مجرد شفنا دموع وهجَ ورجفت جسمها عرفنا الي يقصدونها هيه سحبتها الحظنها جوائح همست شي الها.

رحمه:: بس اصبري ليش هسه يلا يريد يزوجهم

جوائح:: الله يعلم بشنو يفگررون بس لا تخافين حبيبتي مثل ما گال ابوي اخوانها واختها موجودين وهسه گومي غسلي واطلعي جيبيلي آخر الأخبار والمستجدات

::- ضحگت وهجَ من بين دموعها وهمست.
وهجَ:: صوت وصوره مو أحسن ؟
استبرق:: عفيه وإني وياج گومي .

::- طفرن ثنينهن وي طلعتهن دخلت المطبخ امي باوعت علينا ابتسمت وگالت

زهراء:: شلونهم البنات.
رحمه:: الحمدلله گلنا بخير
:: ردت جوائح وگامت طلعت من المطبخ تارگه المكان كله زفرت نفس

زهراء:: حچيتو وياها!
عفران:: اي حچينا وياها
::- هزت راسها واگتفت بسگوت الحزن واضح بعيونها وگفت أغسل بالمواعين وميلا تساعدني ايڤار وعلي لمووا مواعين السفره گلها واحنا نغسل بين ما خلصنا المطبخ طلعت يمهم بصاله بشربون چاي ويتناقشون بيناتهم .
ولا وحده من البنات موجودة غير كوثر حاشره نفسها بصف أمها ربع ساعة تقريباً ودخل ايان ويا إيهاب مجرد شفته اجه بالي راجح 

سلم عليهم وكعدوا واحد بصف ثاني علي وايڤار وسام گاعدين هم بس بالهم مو يم يمنا  ثواني ودخل فرات سلم بسرعة وصعد فوك خمس دقايق ونزل مغير ملابسه التفت علينا حسيته يدور على شخص رفع عيونه اتجاهي وگال.

فرات:: غفران چبت الج الوصيتيني عليهن گومي اخذيهن  كمل كلامه وطلع بسرعة.

زهره:: شنو موصيه الولد ولج
غفران:: شغلات تخص الدراسة.
زهره:: ولك فارس شبيهن بناتك وحدتهن ما تنلزم

فارس:: يمه مو گافي 
بسام:: زهيره نيتج صفيها فرات صيدلاني وغفران هم وچاي يساعدها ليش تفگيرج Deviant

::- عفتهم يحچون وصعدت الغرفة فرات
رغم استغرابت لان ما موصيته شي بس دخلت الغرفة التفتت ماكو شي الى أن وكعت عيني على ملف مليان أوراق وعليهن ختم قريت او صفحه منها عرفتها شي يخص بساتين جدي
گلبت آخر صفحه ورقة بيضه فارغة ما عدا سطر واحد
مكتوب( خليهن عد الجوائح امانه هاي )

::- لا اردياً ابتسمت لان من دون الموجودين يثق بيه رجعت الاوراق بمگانهم فتحت المجر الي بصف جرباته طلع گدامي سجل لونه بنفسچي اخذته بسرعه بدون لا اركز شنو بس خليت الأوراق بداخله ورجعت أخذت قلم گلبت الورقه على جهة الفارغة وكتبت.

( وحده بوحده يچي يوم واطلب منك)

::- رفعت المخده اخلي الورقة چواها لمحت نفس الصورة الي اشوفها بتليفونه او الي يلزمه بالحديقة بليل بس الصوره تختلف  عن الي شفتها عده أكثر من صوره وكلهن النفس البنت ركزت على عيونها وشگلها ملامحها مو غريبة عليه رجعتها مكانها وخليت الورقة وطلعت هرولت الغرفتنا فتحت الباب بسرعة

غفران:: يمه اختنگت
رحمه:: شبيج ولج منو يرگض وراح؟
غفران:: محد يرگض

::- التفتت على جوائح الي مخليه كومه اوراق گدامها وصافنه عليهن اتقربت منها وهمست.

غفران:: هاج فرات طلب مني انطيهن الج.
جوائح::  شنو هنه!
غفران:: افتحي السچل وتفهمين

::-اخذته مني مجرد فتحته صفنت شوي
وابتسمت رفعت عينها بعيني .

جوائح:: شوكت اجه!
غفران:: قبل عشرين دقيقة ما طول بسرعة راح
::- ابتسمت الها وكعدت بصف استبرق الي لازمه الكتاب وتقري  وهجَ رحمه مركزه وي جوائح. الغرفة هدوء وهذا شي غريب ونادر
.
وهجَ:: شسمه جوجو عندي طلب ممكن!

جوائح:: خليني اخمن تردين تروحين الخطوبه
صديقتج
وهجَ::  عزااااا اي وحق علي وأولاده اريد اروح
جوائح::  روحي احچي وي امي وابويه

::- قطع كلامنا دخول كوثر باوعت على رحمه وجوائح وگالت.

كوثر:: جدي يگول خليهن يچن يريد يحچي وياچن التفتت جوائح الها رمقتها بنظره وبدون لا ترد گامت هيه ورحمه 

جوائح:: وهجَ شيليهن وتعرفين وين تخليهم.

::- مجرد طلعن گامت وهجَ تشيل الملفات دقايق وسمعنا صوت عياط جو....

                      ــــــــــ⊰ ــــــــــ

في مكان آخر كانت فتاة جالسة أمام نافذة غرفتها كوب قهوتها بين يديها تراقب الطريق بصمت. ابتسامة خفيفة ارتسمت على شفتيها، لكنها لا تدري أن الأيام القادمة ستقلب حياتها السعيدة رأسًا على عقب وأن القادم سيجبرها على مواجهة ما لم تتوقعه وفي تلك اللحظة اخترق الغرفة صوت شقيقتها…

- راح تروحين!
::- التفتت على اثر صوتها مبتسمه.

- اي ك بس مااعتقد اطول عندي اليوم.
- ماشي تروحين وي احمد

فاطمه:: اكيد اروح ويا بس وينه هو
اديان:: اكيد بيتهم وين مثلا.

فاطمه:: صحيح يلا رايحه بوستها وطلعت من البيت مريت على بيت خاله مجرد رفعت ايدي ادگ الباب طلع احمد گال

احمد:: تردين اوصلج
فاطمه:: اييييي.
احمد:: اخوج وين
فاطمه:: طالع من الفچر عنده شغل.

تمشيت گدامه  انتظره يشغل سياره
وأثناء  انتظاري اجاني صوت ابن عمي

- ليش واگفه هنا!

فاطمه:: انتظر احمد يجي

-  هز راسه مبتسم وراح خمس دقايق واجه احمد صعدت بصفه واتوجهنا للكليه
مجرد وصلني نزلنا سوا راح للكروب مالته واني سلمت على صديقاتي  ودخلت القاعة.

::- ثواني واجت يمي صديقتي گعدت توزع ابتسامات عرفتها تريد شي گلت

فاطمه:: غردي ساره غردي.
ساره::  تحسين احمد مرتبط!

فاطمه:: مادري 
ساره::  انتو سوا توقعت تعرفين
فاطمه:: صح بس ما ادخل بحياته الخاصه.
ساره:: اففف هسه شحچينا عليمن هالعصبية گلها 

- اتجاهلت كلامها دخل الدكتور وبلشت المحاضرة  ساعة وأربعين دقيقة تقريباً خلصت المحاضره طلعوا كلهم اخذت جنطتي وطلعت.

كالعاده اگعد بالحديقة يچي احمد يجب اكل الي ويروح گعدت وي صديقاتي جذبني
حديثهم..

مريم:: إني شفته لچ شگله مو راحه.
ساره:: ابو خوش انسان شعچب
فاطمه:: عليمن تحچون؟
مريم:: ابن العميد اليوم موجود هنا وشفته شگله مو راحه عبالك مجرم نوب حتى مسوي وشم بركبته وأيده والله اعلم باقي تفاصيل جسمه
فاطمه:: صدك چذب عبالي عدگم موضوع مهم شعلينا بيهم.
ساره:: إني اكلج هيه رادت تحچي ويا وهوه ما معبرها الهذا سبب ضاجت.

مريم:: يمعودات سمعت عن عائلتهم كله تشتغل بالقانون وعدهم اخلاق خير من الله گلت اجرب حضي.

::- زفرت نفس بغضب وعفتهم رحت
يم احمد گعدت بصفه وهو مستمر يأكل اشر الي شبيج!

فاطمه:: مابيه شي بس الجو بارد وتعبانه.
احمد::  بعد الج محاضره وترچعين للبيت.

::- نطق آخر كلمه بصوت ناصي وبدون مقدمات گال
احمد:: گومي گومييي بسرعة
فاطمه:: شبيك وين
احمد:: صاحبي اچه گومي

::- گمت ابتعدت مسافه عنه وگعدت 
اجه باتجاه شاب طويل القامه لابس رسمي فاتح اول دگمتين من قميصه گعدت بنفس المكان الي جنت كاعده بي التفت بشكل عشوائي اجت عينه عليه من غبائي ضليت مركزه بشگله 

-  هيه مچرد ثواني والتفت يگمل حديثه وي احمد  الحظه الحظه هذا بركبته وشم استوعبت هذا نفس الشخص الي حچوا عنه البنات.

::- اخذتلي صفنه استوعب آخر شي گمت من مگاني خلص وقت الدوام طلعت من القاعة صار بوجهي نفس الشخص ابو الوشم   باوعلي
بنظرة غريبة  ملت للجهة ثانيه تحرك بسرعة صار مقابيلي خزرته وابتعدت للجهة ثانيه وهم صار كدامي نرسمت شبه ابتسامة على ثغره 

:- رفعت حاجبي بتحدي زادت ابتسامته غمزلي وراح التفتت اباوع على الطلاب مستغربين الوضع 

غلست وطلعت بسرعة
احمد منتظرني بالباب اتقربت منه وتمشينا سوا الى أن رگبنه بسياره اخذت نفس وگلت.

فاطمه:: منو هذا الي اچه يحچي وياك
احمد:: ابن العميد وصديقي
::- رغم جنت متأكدة نفسه بس حبيت اتاكد منه.

فاطمه:: لا بس هيج استغربت اول مره اشوفه.
احمد:: صحيح  ابن عمه دكتور جامعي واجه يشوفه يعني مو طالب بس بين فترة وفترة يجي

فاطمه:: شسالفة خو گول كل عائلتهم.
احمد:: لا بس ابو الي هوه العميد حسين سلمان وابن عمه دكتور وسام علي.

::- صفنت على اسمائهم مو غريبه عليه
كأني سامعته من قلب بس وين ما أعرف
بس جنت متأكدة منتظرني شي ما توقعت بيوم من الايام اعيشه...

ــــــــــ⊰ ــــــــــ

رحمه::- بعد اخر حديث وي جدي أتأكدت ماراح يعوف جوائح بحالها بسبب جرائتها والسانها لكنن هي مغلسه على وضع ومستمرة بخططها.مر الوقت بعد ما رحت للمحكمه

مرتين والمركز شرطه مره الى أن خلصت طاقتي وطول الوقت لابسه گعب  طلعت من المركز المسافه الي بيني وبين سياره بسيطه بس من تعب صرت أحسها بعيده
فتحت الباب وصعدت نزعت الگعب وانطلقت للبيت نستقبل المشاكل والمشاحنات الي راح تصير.صفيت السياره ودخلت للبيت طلع بوجهي وسام يهز رگبه ورا ايڤار  هزيت ايدي
وگلت.

رحمه:: خير أن شاء الله ليش ترگصون!
ايڤار:: البستان مال سلمان مبيوع بميت مليون وراح ينچلط
رحمه:: اصبروا يا بستنان

وسام:: بستانه الي يحبه جان حالف ما ينطي ألا ب**** وهسه انباع بسعر البستان الصغير.
رحمه:: عزااااااا شلون نباع غير تحچون .

::- طلع فرات من البيت ورث جگارته وهمس.

فرات:: اكو واحد لازم لزمه على جدج اذا تتسلم للشرطه اقل شي فد عشرين سنه وجدج تم تهديده من شخص مجول وبتالي اكيد يريد مقابل سگوته والمجهول طلب منه يبيع البستان بهيج سعر وأما الفلوس راح ياخذهن المجهول.

::- بدون تفگير عرفت منو المجهول.
فرات:: العقرب ولا يثبت

::- نهى كلامه مبتسم وراح يكعد بالحديقة وي الجوز وسام وايڤار  دخلت البيت وشلون منظر كدامي يفتح النفس زهره شاده راسها وتون سلمان مدد وايده على عيونه والباقية فرحانين يمكنن بسبب ضلم جدي الهم سلمت عليهم وصعدت فوك دخلت طابق ثاني طلع انمار من الغرفة

رچف گلبي مجرد شفته كدامي المحني كدامه
اتقرب مني وهمس.

أنمار:: شلونج

رحمه:: الحمدالله وانت شلون صارت رچلك

قبل لا يرد طلع زياد ورا استغربت الإخوان شيسون هنا اليوم.

زياد:: الله شلون وگفه حلوه امشو لا تورطونه ويشوفگم واحد اخذ أنمار ونزل

::- ضليت واگفه بمكاني انمار حب حياتي وزياد طليقي وثنينهم إخوان حتى بعد طلاقي ماكو أمل يجمعني شي وي انمار

درت وجهي  دخلت الغرفتتنا ماكو ولا وحده موجوده استغربت وين موليات شمرت جنطتي بشكل عشوائي وتوجهت للباب اريد اطلع بس استوقفني صوت غفران.

غفران:: ياا رحمه هاي.
::- التفتت على صوتها ماده راسها هيه واستبرق وهجَ ذكروني بصورة مال حيايه.

رحمه:: شسون هنا
وهجَ::  جوائح طلعتنا هنا.
رحمه:: ليش شمصخمات

استبرق:: ما سوينا شي بس خلينا ملح بدل الشگر وعود ردنا الزهره بس صار خربطه واجه الجوائح وعرفتنا إحنا ورا الموضوع خلتنا نطلع هنا مدة ساعتين بس الجو حلو وجاي نفكر شنسوي بالمره جايه

::- ضربت على رجلي حيل مايفيد وياهن شي اذا جنت بوحده هسه صرت بثنين استبرق او وهجَ غفران فقيرة

وهجَ:: صح ذكرت الصبح من طلعتي صارت مشكلة.

رحمه:: مشكله البستان أعرف بيها
غفران:: جدي مصر يزوج وهجَ الواحد من ولد عمامي
رحمه:: هذا لازم واحد يحط حدود اله وشصار

استبرق:: عمو محمد گال اله وهجَ اخر وحده تتزوج ماكو هيچ حچي وصار يصيح آخر شي گال اله خلي بنت اخوك  تتزوج فرات.

رحمه:: يقصدد منوو
استبرق:: عبالنا يقصد واحده من عدنا بس طلع يقصد جوائح

غفران:: وكلهم دخلوا بصدمة ورا ساعتين بضبط صارت مشكلة البستان
والكل اجه حتى اسامه وعمو حسين وانمار وزياد كلهم اجتمعوا وجدج ضغطه صعد

::- دخلت بحاله صدمه جوائح وفرات!!
ليش همه بذات وليش مصر على موضوع زواج
ضل الموضوع براسي وعمي محمد وجوائح مختفين لحد ساعة ثمانيه بليل دخلوا ثنينهم
نظرات جوائح الجدي چانت مليانه حقد

توجهت للمطبخ أخذت شي ضمته بملابسها وطلعت الكل ملتهي بموضوع جدي انسحبت بهدوء وطلعت وراها لمحتها واگفه هيه وايهاب لازمه بيدها ورقه شغلتها بجداحه وشمرتها بالگاع وايهاب مصدوم همس كلمه الها والتفت يروح وهيه اتجاهلته وسدت الباب درة وجهي اريد ادخل اجت عيني على فرات واگف بنهاية الحديقة وعيونه على جوائح الي واگفه تباوع على نار

مجرد ثواني وصار صوت الطلق بكل مكان.

يـتـابـع

تتشابك الأحداث بأقصى قوة وتتصاعد الصراعات لتصل إلى نقطة الانفجار أسرار ظلت مخفية لفترة طويلة بدأت ترى النور، والقرارات التي اتُخذت ستترك أثرها إلى الأبد. النهاية ليست سوى بداية لما هو أعظم…

ـــــــــــــ⊰ ـــــــــــــ