جوائح الدهر الفصل الثامن وأربعون 48 - بقلم دعاء رزاق

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

ـــــــــــــ⊰ ـــــــــــــ

خليت صينيه بيد وسام صدت عيوني على عهد الطاع من غرفتي لازم حمالة الصدر مالتي بيده وملابسي الخاصه يسحل بيها كدام اخواني او ولد عمامي

- توسعت عيوني بصدمة عين على عهد وعين على الولد محد منتبه اريد اتحرك من مكاني ماكو انثولت عبالك أحد ضربني على راسي التفت وسام يباوعلي بنظرة سريعة مستغرب واندار على عهد يباوع اله بس شاف الملابس بيده اختفت ضحكته راساً ألتفت على ولد وكال

وسام:: بداعة بيواتكم لا ترفعون راسكم

::- بس كال الهم هيج صار هدوء كلهم مدنگين محد رفع راسه راح وسام على عهد شاله هوه وملابس فات للغرفة

دقيقه دقيقه احس صخنت من الفشلة سوده بوجه انعام يمممممه عزاااااا العزانييي صخام اي والله صخام مشيت بسرعة ورا قبل لا افوت التفتت عليهم يشربون ماي وعيونهم بالكاع بس علي يباوعلي صفح
غميته ودخلت لمحت وسام لازم جزء من ملابسي وعهد لازم الجزء الثاني

وسام:: ولك هده عمي هده

عهد:: ماااا اليده ( ما اريده)

- تريده شسوي بي مال مرتي هده لا اكتلك
- سعليك اليده ( شعليك اريده)

-: دجيببب ولك
::- سحبه منه خلاا ورا ضهره وعهد كام يصرخ ويكمز بالغرفة دنك وسام يلمم. الملابس المطشرهن عهد واني مسطوره لو يذبحوني ما يلگون قطرة دم بيه

كام من مكانه عهد سحب الكعب مالتي وركع وسام براسه

وسام:: اخخخ الله احتركة روحك سرحان
ولك هاي ليش عمك اني

عهد:: بتيفي الدلبك ( بكيفي اضربك)

::- سد المجر مال كنتور التفت شال الكعب
رجعه مكانه والتفت يشيل عهد يحجي وياا بصوت ناصي وبس سمع كلامه عهد سكت يهز براسه باسه بخده وسام والتفت يريد يطلع قلص عيونه عليه ومر من يمي بهذيج اللحظه لو ميته اشرفلي

بس طلع لطمت على وجهي من تزوجنا لليوم ولا مره خليته يشوف ملابسي الخاصة

فلتت للمطبخ حتى ما رفعت عيني على احد بس دخلت لمحت طيبة واكفه تشتغل بمكاني

وهجَ:: اني اكمل اكعدي أنتِ
طيبه:: وين رحتي ؟
- تخزيت ولج تخزيت يبوو
- عفيه شبيج شصار ؟
- عهد طلع ملابسي الفلانية للصاله بس وسام تصرف بسرعة ما أتوقع احد انتبه

- وين مخلية ملابسج انتِ؟
- لميت الملابس من المشر خليتهن على جرباية بس غطيتهم بالمنشف هذا عهد داهية دخيل الله

- هههه طفل ما يفتهم شبيج
- يا ما يفتهم مشيطن لازم اخلي يحترمني اني خالته ومرت عمه اذا يبقى هيج الوضع بعد حتى جهال ايان من يكبرون ها يحترموني

- هههههههههههه
- أضحكي اضحكي
::- طلعت الابره مالتها ضربتها بيدها وانطيتها الأكل لان هي مريضة سكر وتضرب انسولين
عفتها تاكل كملت ترتيب الأكل مديت راسي من باب المطبخ

وهجَ:: علي تعال
::- كام من مكانه اجه باتجاهي دخل باوع على طيبه دار وجه بسرعة وكال

علي:: سلام عليكم
طيبه:: وعليكم السلام

- تعال اخذ الاكل
- جيبلي السفره
- على ميز طعام أفضل
- مو مال ميز طعام جيبي السفره ياختاة
:- اخذها وراح دخل ورا ايڤار شال الاكل ويا واني سحبت كرسي كعدت أصواتهم عالية بس صوت تليفون طييه أعلى

وهجَ:: طيبه نصي شويه خلينا نسمع
-: طفته وركزت على صوتهم وياي

اسامه:: فد نذل هذا لا يحجي ولا يسولف

وسام:: شنو بعقلك انتَ
انمار:: احجي شبيك سكتت ؟

راجح:: لا تلحون راسي يوجعني

علي:: هسه هو مطي وسكت احنا شلون ما حسينا بي

أسامه:: لان مثله مطايه
- عندك وجهة نظر
- وجهة وحده عندي هواي وجهات نظر
- انطيني وحده منهن
- مو هسه بعدين

حمزه:: لا تمسلتون مو وكت تمسلتكم
وانتَ راجح لو تعتبرنا اخوتك حجيت النا بس وضحت الشغلة

راجح:: لا تفهمون بكيفكم كل واحد بيكم عده هم بكد الدنيا يومية مصيبة نطلع من وحده نوكع بوحده جديدة اجي ازيدها عليكم

انمار:: حشه نعمة الله احجيلي حجاية هسه استغفرالله شني هموم شني ازيدها لو تشوفنا بنص الموت تعال احجيلنا

ايڤار:: صحيح راجح ولا تنسى كلام ابوي النا
احنا طبقنا كلامه بس انتَ تلعب بكيفك

أسامه:: بعد ما يسويها واذا يسويها اكتل علي
علي:: اي والله

حمزه:: الصبر ياربي شلون بينا وي جوز الجواريب

علي:: ما اسمحلك تحجي علينا
وسام:: ثنينكم تنطمون ولا حرف

انمار:: ندخل بالمفيد هسه شوكت تروح
راجح:: طيارتي الصبح اني وهذا المعفن

اسامه:: احترمني لك
ايڤار:: ليش اسامه تأخذه وياك ؟

- اسامه عنده معارف هواي ومن البداية هو الساعدني بكلشي بس ما جان يعرف شي وهسه هو يريد يروح

اسامه:: صحيح عندي أصدقاء هناك وحتى شقه يكدر يستقر بيها براحته أفضل من الفنادق واني ابقى وياا لان كلكم عدكم شغل واني نص شغلي هناك

علي:: جذاب مو شقه هي العمارة مالته وكل شقق الموجودة اله

::- صار هدوء اختفت أصواتهم طيبه صافنه بوجهي واني صافنه بوجها ما فهمنا على شنو يحجون بضبط ثواني وكال

وسام:: تحجي صدك ؟

علي:: وشرفي ما تحجي انتَ تخاف يطكونك عين

اسامه:: انجب انتَ العمارة اشتريتها من صاحبي خسرت بيها بالبداية بس هسه لا خير من الله وكل الخسرته بيها تعوض

حمزه:: طلعت تعرف تشتغل زين زين

ايڤار:: اني ادري قبلكم علي سوالفلي

علي:: جذب ما حجيت هو سمعني وداعة سلمان

ايڤار:: ايان يدري هم وابوي

علي:: اني اترخص
::- صار صوت ركض بالبيت وصوت ضحكهم عالي حتى عهد يضحك كمت اباوع من الباب علي يركض بالبيت واسامه يركض ورا يطفرون من مكان المكان سحبه من تشيرته يكله

اسامه:: عرفتك ما تسكت المن حجيت بعد
علي:: اكلك وداعة سلمان ما حجيت
- تحجي لو لا
- هدني ابو شخا***
- : ما خلا يكمل كلمه سد حلكه ركض عهد شمر نفسه وياهم

صاح بيهم حمزه كعدوا بمكانهم يأكلون ويسولفون وي راجح وهو ساكت بس خلصوا الاكل رحت سويت چاي الهم حطيت المواعين بالغساله ورجعت اني وطيبه نراقب بيهم

راجح نايم على قنفه وعهد بحضنه يلعب بالتليفون والبقية يسولفون ويا وهو يهز راسه صوتهم ناصي حيل عكس قبل شويه جان عالي عرفت عدهم شي وزاد شكي من اجه ايان وياهم كلهم اجتمعوا يسولفون ملامحهم ما تتفسر والأول مره أشوف الخوف بعيونهم

ورا وقت طويل كام اسامه من مكانه يحجي

اسامه:: رايح اني صبح اشوف چهرتگم الخايسه

راجح:: وين رايح ؟
علي:: يم البيت

انمار:: واني هم أتأخر الوقت البيت ينتظرني

زياد:: راح يبلشون بسوالفهم

ايان:: صحيح كذالك اني لازم اروح البيتي

راجح:: خلوني اروح حظي وي البيت اني هم

ايڤار:: چا بس انتم حتى اني عندي بيت

علي:: كوم حمزه كوم خلينا نفتر بشارع ماعدنا بيت

وسام:: بيتي يمي انگلعوا انتم

حمزه:: بحلگي حجاية استغفرالله بس خلونا نولي

زياد:: اني وياك اروح
:- من خلال كلامهم عرفت معنى البيت يعني نسوانهم لان وسام كال الهم بداعة بيواتكم
وزياد جان نايم وحتى ما اكل شي طلعوا بره كلهم ما عدا اخواني اربعتهم صاحولي طلعت الهم بس شافني ايان ضحك فتحلي حضنه

ايان:: هلا بحبيبة اخوها
::- ابتسمت فرحانه حضنته طبطب على ظهري
ابتعدت عنه

حمزه:: مرتاحه هنا؟

وهجَ:: اي مرتاحه ماعندي شي
::- سألوني هواي عن وضعي وقبل لا يطلعون راح ايان جاب اشياء من سيارته خلاهم كدامي وكال

يان:: الاكياس السود الج والوردي الطيبه والعهد بس وينها طيبه؟

::- أثناء كلامه مدت راسها من باب المطبخ مبتسمة سلم عليها من بعيد اشر الها على الاكياس مالتها

ايان:: هذني الج
طيبه:: شكرا خويه بس شنو المناسبة ؟

- ماكو مناسبة حبيت اجيب هداية الاخواتي

::-, نهى كلامه مبتسم باس عهد وطلعوا كلهم مشيت وراهم للباب بس أتأكدت طلعوا خارج الحديقة دخلت لمحت طيبه واكفه بمكانها تمسح بدموعها

وهجَ:: اسم الله شبيج تبجين ولج ؟

طيبه:: هيج ماكو شي بس ايان يذكرني بفرات نفس الحنيه وحتى أصواتهم تتشابه من اجه وسمعت صوته عبالي فرات اجه والله

- تعالي
::- حضنتها مسدت على رأسها
- ايان هم اخوج ماكو فرق بينهم بس لا تبجين مو زين عليج

طيبه:: لا ما ابجي خلي اخذ عهد ونروح الغرفتنا

::- ابتعدت عني تمسح دموعها التفتت على عهد شالته باوعلي رافع حاجبه

عهد:: ليس تحلينها تبثي وتحه
( ليش تخلينها تبجي وكحه)

- هههههههههههه
- لا تضحكين ولك منو الوكحه تحترمني لو لا

-: لبسني وما جاوب أخذته وراحت مو طبيعي الشبه بينه وبين تصرفات علي ماخذ وكاحة علي ونظراته حركاته كلها امه وبشكل مكس بين جوائح و ابو الله يرحمه

غميت نفسي حتى الأطفال ما تحترمني
مشيت واني ادردم عليهم رتبت البيت وطلعت المواعين رتبتهم باوعت من شباك وسام وايان بعدهم يسولفون والبقية رايحين

استغليت الفرصة وركضت الغرفتي اخذت ملابس بدلت بسرعة وسويت روتيني الليلي طفيت الضوه وشمرت نفسي على جرباية تغطيت اسوي نفسي نايمه

عشر دقايق انفتح باب الغرفة حسيت بخطواته بالغرفة وصوت ساعته الي خلاها على ميز التواليت وصوت باب الكنتور بدون ما اشوفه متأكدة اخذ ملابسه وراح للحمام هذا روتينه الي ما يتغير اخذت نفس براحة من سمعت صوت الدوش رفعت الغطه عن وجهي مبتسمة

بس سرعان ما اختفت ابتسامتي من شفته واكف كدامي ولاف المنشفه على جسمه عيوني شكلت من كد مارمشت

وسام:: مو نايمه كملي نومتج
وهجَ:: الماي!
- شبي
- مفتوح بالحمام
- ادري بي
- روح امشي شسوي هنا
- ليش تسوين نفسج نايمه ؟

- لا صدك نايمه
- يعني انتِ حالياً نايمه
- اي
- والجذاب ؟
- الله يذبه بنار

-: رفع ايده يمسد على لحيته وعيونه تتنقل على ملامحي سحبت الغطه أكثر بس عيوني طالعات هز راسه يضحك

وسام:: لا تلوميني اذا اكلج طفلة
وهجَ:: اني مو طفلة لان انتَ شايب تشوفني صغيرة

- شايفتني مشيب لو امشي على عكازه
- عندك كم شعراية مشيبه بس يعني مو شايب كلش بس هم تبقى شايب مدري شلون قبلت بيك لو ماخذتلي واحد اكبر مني بأربع سنوات
افضل

- شو انتِ طالعة عينج تهيلگتي مو بعينج اني
- لا والله
- مو بعينج ؟
- اي
- وهـجَ
- الماي راح يخلص روح اسبح
::- هز ايده ما عاجبه وراح يمشي هو يمشي واني لازمة گلبي لا توكع المنشفه دخل وركع الباب حيل

::- غطيت راسي اول ما نمت طفرت على ركعة طالع من الحمام يمشي ويركع بكلشي كدامه. ما تحملت طفرت من مكاني

وهجَ:: شبيك اريددددد انام
وسام:: لا تصيحين لا تصيحين
- لا تركع بالاغراض اجتك الحاله بنص الليل
- نامي لا اجيج وعلي
- اوي يمه صدك والله خوفني الشايب وحق علي واولادة أسويها ليلة كشره خليني انام

::- رجعت تمددت وهو ما ركع شي بعد اجه تمدد بصفي ساكت زفر نفس طويل دقايق واحنا على هذا الوضع حتى نومه طارت من عيني اندريت للجهة ثانيه صد وجهي بوجه غمضت عيوني حتى ما اشوفه

وسام:: وهجَ
- همم
- بعيد عن الشقة تحسين نفسج مضلومة وياي ؟
- الصراحة تريد ؟
- اكيد
- لا ما احس مضلومة بغض النظر عن الفقر البيني وبينك اكو هواي أشياء إيجابية مثلاً تشجعني اكمل دراستي وتساعدني لساني طويل شوية يعني مو هواي واسمع هاي الكلمة من الكل بس ما كلت الي السانج طويل ولا نقدت على تصرفاتي ودائماً اشوف منك المدح والثناء على اشياء أسويها حتى لو بسيطة والأهم من هذا.....

وسام:: كملي احجي براحتج
- شسمه ما تجبرني او تطلب شي مني

- لان ماريد شي انتِ رافضته افهم ردات فعلج تعمدت اليوم احضنج ماريد تبقين خايفة
موضوع الفرق جان قالقني وهسه حسيت براحة لا تفكرين بشي نامي

وهجَ:: مقتنع هيج انتَ؟
- مادام مرتاحه انتِ اني مقتنع لا تفكرين بشي ثاني نامي

::- كلامه زحزح الخوف البداخلي ما انكر كل ليلة انام بيها بصفه اخاف مرات سنوات طويلة على ذاك اليوم النحس وتعالجت من حالتي النفسية بس الخوف بقى بداخلي اخاف اتقرب خطوه منه واتندم وخوفي يوم عن يكبر كل ما اذكر هو ما يعرف اني مايصير عندي اطفال هذا شي خانكني ومتعبني الحل شنو مادري خايفة احجي اله وما يتقبل هذا شي ..

التفكير تعبني بدون ما احس نمت وبداخلي خوف ماله نهاية....

::- ومثل كل يوم كعدت الصبح نفس الروتين رحنا للدوام ورجعنا للبيت طيبه وعهد يلعبون يم بيت جيران ماخذهم الواهس حجيت وي استبرق وسألت اهلي عن جوائح كالوا نايمه نغزني كلبي من نبرة صوت ابوي بس ما حجه شي ثاني خليت تليفون على شحن مشيت للصاله كعدت كدام وسام

وهجَ:: عندك وقت نروح يم بيت مرت ابوي ؟
لحد الآن ما باركت الهم انتَ

وسام:: شلون ما باركت من طلعوا للبيت بليل رحت الها استبرق معزتها مثل معزة طيبه ماكدرت اروح للمستشفى بس رحت للبيت وراهم

- ليش ما كتلي ؟
- جنتي بيت اهلج توقعت تعرفين
- اممم تمام
- شبيج
- مابيه شي راح انام المغرب اكعد
- لا تنامين خلينا نطلع بعد ساعة تغيرون جو ونتعشه بره ومناك نروح يمهم
- لا ماكو داعي
- وين ما اروح اكلج منا ورايح بس لا تزعلين زعلج يتعبني

- يتعبك مو
- ورح عزيز گلبي يتبعني
- يلا نعديها الك بس ها وين ما تروح دگلي
- تأمرين أمر
- الله

::- ماكدرت اخفي ابتسامتي مشيت واني اضحك وحدي دخلت سويت فواكة اخذتهم ورحت كعدت بصفه حتى يأكل وياي

هو يشتغل واني اقرأ بين الدوام والطلعات والشغل مرت الايام خلصنا الامتحانات والعطلة بلشت رجعت للرسم بكل وقت اكون فارعة ارسم أثناء صفنتي سمعت صوت الباب نزعت الكفوف طلعت اركض فتحت الباب بس شفتها ابتسمت

وهجَ:: اهلاً اهلاً يا اختي العزيزة

جوائح:: كيف الحال والاحوال

:- ضحكت على نبرة صوتها الشي الوحيد الي صار بالفترة الفاتت هو تحسن جوائح تغيرت بشكل غريب والكل بدون استثناء مصدوم بيها

::- دخلت جوه شافت ماكو احد گالت

جوائح:: وينهم ؟
- طيبه نايمه فوك وعهد وي وسام طالعين يغيرون جو

- ت
اها تمام المهم وضعج شلونه
- عال العال وانتِ
- نوعاً ما
- احجيلي شنو سبب جيتج صاير شي ؟
- لا ما صاير شي بس احلامي الغريبة ما تخلص
- خير أن شاء الله شنو حلمج هاي المرة ؟
- بعدين احجيلج بس اريد مفتاح البيت
- يا بيت
- بيتنا اني وفرات
- شسوين بي ؟
- لا تسأليني بس جيبي المفتاح
-: ماكو فايدة من النقاش وياها دخلت الغرفتي ما اعرف وين مخلي وسام گلبت الغرفة كلها ما لكيته فتحت المجر الاخير صار كدامي كومه مفاتيح من ضمنهم مفتاح البيت سديت المجر التفتت اريد اطلع بس ذكرت شغلة طلعتها من الكنتور خفت تصرفي غلط بس تبقى امانه اخذتهن وطلعت لگيتها صافنه على اثر صوت المفتاح انتبهت الوجودي

كامت من مكانها أخذت المفتاح مني وباوعت على الامانه الي طلب مني فرات انطيها الجوائح ولحد الان ما انطيتها الها مديت ايدي سحبت أيدها وخليت الامانه بيدها

وهجَ:: هاي الامانه المفروض توصل الج من زمان
جوائح:: أمانة شنو ؟

- افتحيها وتعرفين
- بعدين افتحها اريد اروح للبيت
- اروح وياج ؟
- تعالي بس طيبه ؟
- ما عليها منطقتنا امان والكاميرات بكل مكان وبداية الفرع يم المحل مخلين شخص لابس مدني بس هو احد من الأمن

- شفته وعرفته لان جان موجود بيت اسامه
- اي المهم خلينا نطلع
- : طلعت هي واني سحبت الصايه لبستها وطلعت وراها شفتها واكفه يم الامن تحجي ويا نهت كلامها واجت وكفت كدام عتبت الباب رفعت أيدها تمسح على وجهها
فتحت القفل ودفعت الباب من يمي حسيت بخنكة وغصه

دخلت جوه تلتفت يمي ويسار عيونها
تتنقل على كل زاوية بالبيت راحت باتجاه وحده من الاغرف وكفت ماكدرت أروح وراها حسيت بشعور صعب حيل صعب

شلون كدرت تتحمل حتى لو ما تحبه بس عاشوا سوه وعدهم طفل صعبة ربع ساعة وأكثر طلعت من الغرفة عيونها حمره فاتت الكل مكان بالبيت إلا وحده من الاغرف جانت مقفولة ومفتاحها ما موجود

ضلت تحاول تفتحها مادري شلون اجت بالي الامانه الي كال انطيها الها أشرت الها وكلت

وهجَ:: شوفي شنو موجود ممكن تلگين المفتاح
::- هزت راسها فتحتها وكعت منها ورقة بالكاع
ومثل ما توقعت المفتاح هو الامانه طلعت المفتاح جربته على الباب وانفتح عافت الباب دنگت فتحت الورقة جانت كلها كتابه بخط اليد ما قريت شي منها سدتها ضمتها والتفتت دخلت للغرفة

::- فتحت عيوني مصدومة بالي شافته عيوني
الغرفة قارغة تماماً بس بيها فراش بالكاع والفراش عليّ الغطه وصفه باكيت جكاير وجداحه شكل مكانه مثل ما هو كأنه جان

نايم وكام من مكانه بدون لا يرتب ايشي مكان نومته جكايرة كلشي باقي بالغرفة مثل ما هو رفعت عيوني على حياط مليان صور مصغرة الجوائح هي وصغيرة انداريت اباوع على عليها أيدها على حلكها الدموع تنزل عشرة عشرة

بجيت على حالها وعلى حاله شنو وصله الهاي المرحلة شنو الي ضل مضموم بگلبك ومحد عرفه ..

::- خليتها بالغرفة وطلعت وكفت باب الغرفة اباوع الها تقرا بمكتوب بالورقة أكثر من ساعة واحنا هنا انتظرتها تطلع وبس طلعت طلعنا من البيت وكفت باب البيت همست شي وقفلته الآخر مره كلشي بهذا البيت بقى ذكرى

أتأكدت من هاي اللحظه جوائح ماشية بطريق جديد وحياة جديدة تختلف عن العاشتها طول السنوات الفاتت
اندرت الي قبل لا تصعد بسيارتها كالت

جوائح:: لا تحجين لأحد تمام ؟
- لا تخافين
- اسمعي اريد اغير مكاني اعوف بغداد كلها اعيش بمكان ثاني ماعندي طاقة اتحمل شي بعد
- اهلي يعرفون ؟
- اكيد
- إذن سوي الي براسج بس اهم شي توكنين بخير
- عهد
- شبي
- اعتبري امانه يمج اكمل علاجي وبوقتها أخذه
- افضل شي علاجج يحتاج وقت وممكن تتصرفين تصرفات غريبة بدون ما تحسين
- أعرف لهذا خلي يمكم
- بعيوني
- : حضنتني بقوة وراحت اخذت نفس مسحت دموعي فتت جوه انتظر وسام يرجع حسيت نفسي خايفة ومشتاقه اله
كعدت بطارمة انتظر يجي ما دخلت للبيت لحد ما سمعت صوت سيارة وسام اخذت
كمت وكفت دخل عهد يركض شايل ألعاب

عهد:: سوفي وهوذه سوفي
( شوفي وهوجه )

- الله الله شهل ألعاب الحلوه ادخل شوفهم الطيوب

- التيوبه ( الطيبوبه)
- اي حبيبي
- هز راسه وراح يركض نسيت اكللكم كمت انطي حلويات والعب ويا صار يحترمني
بعد معاناة طويلة

::- دخل وسام حسيت گلبي كام يرفرف شلون مادري بس من فرحتي ركضت شمرت نفسي بحضنه وكعت الأغراض منه لمني بحضنه بقوة

اول مره ابين مشاعري اله واتقرب منه ما حجه ايشي لمني اكثر حسيت على نفسي وابتعدت عنه منزله راسي

وسام:: بيج شي حبيبتي ؟
وهجَ:: اتاخرت هواي وضل بالي يمك اتصلت عليك بس تليفونك مغلق

- تعالي نفوت جوه
-: دنگ شال الأغراض اخذت قسمه منه دخلنا للبيت يحجي

- اسف اتاخرت وي عهد اخذته يلعب وي الاطفال وتليفوني وكع منه وشاشه نكسرت
وما انتبهت على الوقت

- لا ماكو داعي المهم انتم بخير

:- ابتسم صاح الطيبة انطاها أغراضها وشال الاشياء الي جابها الي أخذهم للغرفة واشرلي تعالي

- كمت ورا سد الباب لزم ايدي باوع الوجهي يشوف ردت فعلي ابتسمت اله كعد على قنفة فتحلي حضنه كعدت على على رجله طوق
خصري بيده مقربني اله حطيت راسي على صدره همس

وسام:: مو من عوايدج احجيلي شبيج
- مابيه شي بس.....
-: قطع كلامي وكال آخر شي توقعته اسمعه من وسام..............

ـــــــــــــ⊰ ـــــــــــــ

فاطمة:: شبي صوتج ؟
غفران:: فاطمة جوائح
::- أثناء كلامها سمعت صوت صرخه ومن خلال الصوت عرفتها جوائح الي تصرخخ

فاطمة:: شبيها جوائح ؟
- : مجرد سألتها وهي حجت كلشي واني وي كل كلمه عيوني تتوسع من صدمة

فاطمة:: دخيل الله هاي اختج شوكت ترتاح ؟
- مادري والله شلون متحمله
- الله يساعدكم حبيبتي من يصير عندج مجال اتصلي وطمنيني عليكم

-: اختصرت الحديث وياها لان صوتها تعبان والأصوات يمها عاليه
سديت المكالمة منهم ضل بالي يمهم من العرفتهم لليوم بس مشاكل وتعبانين حسبي الله ونعم الوكيل على كل شخص يضرهم

ثاني يوم خلصت الدوام ضايجة
كنسلت المحاضرات وكعدت وي غفران هي تحجي وإني استمع الها وطول الاسبوع هيج
بآخر يوم من الدوام طلعت امشي لمحت اسامه واكف بعيد بصف السيارة لابس قميص اسود فاتحه اول ثلث دگم الوشم البصدره واضح

-: مشيت بخطوات سريعة وكفت كدامه

فاطمة:: دگم قميصك بسرعة

أسامه:: هيج تستقبلين زوجج فواطم
- لا تخليني اطلع عن طوري
:- سد الدگم وهو يضحك فتحلي الباب وكال

- اتفضلي سلطانة گلبي

- واحمد ؟
- اني كتله راح اوصلج
- : صعدت بسياره سد الباب
والتفت صعد بصفي ساق سيارة

اسامه:: گلبي طاك عليج وعلي
فاطمة:: لو ماا اعرف وضع بيتكم چان كتلك جذاب بي أعرف الوضع تعبان ومشغول

- اخخ فواطم طلعت مصيبة جديدة
- يا ستار ياربي شكو
- رحت اخذ سويج سيارة راجح ومن فتحتها شفت كمية علاج كارثة نبشت سياره نبش. طلع قبل جان عنده ورم براسه وشايلينه اله وطول السنوات الجان بيها مسافر هو يعالج وهسه راجع اله من جديد وضعه كلش تعبان وما يحجي لأحد

فاطمة:: تشاقه ؟
- لا وداعتج
- عزااااااااااااااا
- لا تحجين لأحد محد يدري واجيت اوصلج واحجيلج گلبي راح ينفجر

- إسم الله عليك هسه شراح يسوي ؟
- حجينا وي الدكتور نسويله عملية بس نسبة نجاحها ضعيفة لازم نوقع اله قبل العملية لان حالته خطره وماكدر اعوفه لازم اروح ويا لان ابو ما يسأل عنه امه متوفية واخو الله يحركه بنار جهنم فطس محد موجود اله

فاطمة:: لا أن شاء الله تنجح وروح ويا لا تعوفه

- أتأخر ويا
- مو مشكلة المهم ترجعون بخير وسلامه وان شاء الله يرجع سالم ونشوف عرسه هو وغفران

- ان شاء الله يعني راضيه اروح ؟
- من كل گلبي المهم نبقى على تواصل
- متفقين سلطانة گلبي هسه انزلي بليل بس اضبط الوضع اجيج قبل لا نسافر
- شوكت تروحون
- الصبح
- تمام ما انام اليوم انتظرك تجي
- ماشي لوعة گلبي
:- باسني بخدي وانزلت دخلت للبيت يلا راح
وصلت للبيت كعدت احجي السما

سما:: عفيه هذا الأخيار الأفضل ثنينكم تعرفون تتصرفون وهذا شي مفرحني
- شلون ما فهمت ؟
- اقصد هو ما لح بموضوع الزواج ومخليج تركزين بدراستج وانتِ ما كلتي لا على موضوع سفره وهنا واضح ثنينكم متفاهمين حتى لو تتعاركون عادي المهم هو مخليج من أولوياته ويأخذ رأيج بكلشي حافظي على علاقتكم

فاطمة:: هيج دكولين ؟
- اي وهسه روحي نامي واني اكعدج بليل

:- سديت السجل وطفرت نمت بليل كعدتني اخذت فره بالبيت وطلعت انتظر بره بس شفت اجه كمت اضحك من فرحتي

أخذني الحضنه كعدنا نسولف ساعات طويلة لحد اذان الفجر. كام حضني حيل ويوزع بوسات متفرقة على وجهي

اسامه:: ما اوصي بعد انتبهي على نفسج ودارستج

- روح وانتَ مرتاح
::- حضني الآخر مره وراح مستعجل ما انكر واكول ما بجيت المهم يروح ويرجع بسلامة

دخلت اصلي دعيت الهم شايلة هم غفران شلون بيها راح اللهي الصبر

- ما رجعت ضليت كاعدة والصبح كلهم طلعوا البيت عمو رسول بقيت وحدي بالبيت مطفية بس منتظره يوصلون ويدزلي رساله حتى انام للضهر تقريباً سمعت صوت الجرس من غبائي طلعت ركض افتح الباب لان فكرتهم اهلي اجو بس اول ما فتحت الباب شفت آخر شخص أتمنى اشوفه شجابه هذا هنا

فاطمة:: عادل!!!!!

ـــــــــــــ⊰ ـــــــــــــ