جوائح الدهر الفصل الخمسون 50 - بقلم دعاء رزاق

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

ـــــــــــــ⊰ ـــــــــــــ

.راجح بداخل التابوت صرخة بصوت عالي.
فتحت عيوني التفتت اباوع على الغرفة حطيت ايدي على گلبي أجر نفس بصعوبة

دخيلك ياربي شنو هذا الحلم شمرت الغطه نزلت جوه رحت الغرفة اهلي فتحت الباب مديت راسي على صوت الباب باوعتلي امي وخرت الغطه بسرعة وگالت بنبرة كلها خوف

زهراء:: بسم الله شبيج ماما صايرلج شي
غفران:: عادي افوت ؟
- تعالي
:- دخلت سديت الباب وراي ابوي فتح عيونه يباوعلنا ساكت سوتلي مجال يمهم وكالت

زهراء:: تعالي هنا نامي
- لا لا اكعد هنا
فارس:: لا بابا هنا نامي

::- نظراتهم الي جانت غريبة حسيتهم يعرفون شبيه ابتعد ابوي هم صعدت نمت بنصهم غطاني وغمض عيونه

زهراء:: سوالفيلي شبيج ؟
- مابيه شي بس حلمت حلم وكعدت مختنكة
- تكدرين تحجيلي الحلم لو بعدين ؟
- لا اكدر شوفي حلمت بوحده من صديقاتي المقربات مني كلش متوفيه
::- ابتسمت بوجهي ابتسامة مريحه وهمست

زهراء:: اليـمـوت بـالـحـلـم يـنكـتـب الـه عمر جــديــد أو يـطـول عـمـره

غفران:: والله ؟
- والله ماما معقولة ما تعرفين هذا شي
- لا شمعرفني اول اشوف هيج حلم

::- ماكدرت ارتاح حتى من حجت امي
ملت راسي باتجاه ابوي لكيته يباوعلي صفح

فارس:: صديقتج بابا غفوره مو ؟
- اي

::- سكت يباوع على امي وهي تسوي نفسها ما تشوفه من خلال نظراته حسيته كاشفني قبل الأذان كام يريد يطلع كال

فارس:: تمشي سوالفها عليه بنت المطي
::- سد الباب وطلع ضحكت امي واني خنست
سحبت الغطه لفيته على نفسي

- صلي ونامي
- ما اصلي
- ماشي نامي ولا تخلين ايدج جوه راسج
- اي

::- خليتها تطلع حطيت ايدي جوه راسي ونمت
للضهر كعدت على صوت هوسه بالبيت استغربت لان بيتنا آخر فترة هادي
كمت من مكاني سحبت حجابي من الكرسي لبسته وطلعت

صارت كدامي زهره كاعدة بصالة
وبصفها عهد منتچي على رجلها ويباوع على جهال استبرق الي كلهم يبجون وزهره حايره تسكت منو بيهم

::- نزلت استبرق من فوك لازمه المميات

غفران:: هاي شوكت رجعتو
استبرق:: الصبح اجينا راح انفجر

زهره:: وجعت امي تنفجر بنت جلب خلي الفروخ تبجي شتردين منهم

- اخليهم يبجون شنو غير راسي موتني
تبجي ريم تطبك وياها ريمي اسكتهن يبجي اخوهن تتمرض ريم ثاني يوم تتمرض اختها
وباليوم الثالث اخوهن حتى اذا تطلع حبايه بجسم ريم ثاني يوم تطلع الاختها بنفس المكان اطلع جلبه اذا اخلف بعد

زهره:: مشي ولي عابت اي والله
تعالوا يبعد جلاوي

::- شالت وحده صرخوا البقيه نزلت الوحده وشالت الثانيه وهذولة يصرخون حارت شلون تسكتهم آخر شي كامت تصيح

زهره:: صوج امكم بنت جلب عافتكم وراحت
ولج استبرق تعاي سكتي خلفتج وانتِ شكو صافنه تعاي شيلي واحد منهم

غفران:: اغسل واجيج
::- عفتها ورحت غسلت ورجعت شلت وحده منهن ماكدر افرق بينهن لان بعدي ما اعرفهم زين طول الفترة الفاتت استبرق بيت مرت عمي محمد

- شلتها اشربها حليب بالمميه وزهره خلت وحده بحضنها ورا شويه نزلت استبرق ترضع
مجتبى باوعت على عهد صافن علينا ساكت

غفران:: شبي حبيب خالته كاعد عاقل وساكت ؟

استبرق:: مرينا على بيت وسام على اساس نجيب طيبه وعهد متعود عليها اجه ويانا

غفران:: بس شبي ساكت
::- يباوع علينا ساكت ما يحجي استغربت وضعه ولا يحجي حاولنا ويا ولا يرد صاحت استبرق الطيبه نزلت من فوك هي وجيهان كالت الها

استبرق:: شبي عهد من اجينا لسه ما تحرك وساكت ؟

طيبه:: شسمه عدنا عسل بالمكسرات انطيت اله يأكل منه وتخربط اخذه وسام للمسشفى طلع متحسس عنده حساسيه من العسل ضاربينه ابر وعلاج من رجع ساكت ما يحجي
لو يباوعلنا ويهز براسه ومن يريد شي يحجي بصوت ناصي وبس هيج

- شوكت صار بي هيج ؟
- البارحة العصر

غفران:: جوائح تعرف ؟
طيبه:: لا البارحة موعد جلسة العلاج مالتها ومحد حجه وياها

زهره:: روحي كعديها خليها تجي اله
جيهان:: الصبح طلعت من سته ونص

- ولا تكعد هاي الفرخه اخخ اذا الزمها

:- ضليت عيوني عليّ لحد ما نامت الطفله خليتها مكانها اتقربت منه اريد اشيله دفع ايدي

غفران:: ليش ولك عهود تعال نلعب بره ؟

::- ألتفت يباوع على باب صاله ولا كأني احجي ويا أبتسم كام من مكانه يركض اندريت اباوع لمحت جوائح واكفه باب الصاله جنطتها بالكاع فاتحه أيدها الإثنين تأشر العهد بيدها بمعنى تعال

وهو ما صدك بس شافها ركض شمر نفسه عليها حضنته بقوة تشمه وتبوسه

جوائح:: يمه حبيبي الحلو شبي شو خليني اشوفك

::- شال راسه من كتفها يباوع الها همس الها شي ما سمعته وهي لزمت ايده تبوسها
دخلت تمشي وهو بحضنها سلمت على موجودين وكالت الجيهان

جوائح:: اصعدي الغرفتنا تلگين وي ملابسي ملابس العهد جيبلي ملابس كاملة اله وتعالي

جيهان:: دقيقه

استبرق:: زينه انتِ؟
جوائح:: اي حبيبتي لا يضل بالج

زهره:: ملابس عهد مو بيت عمه
- اي بس اني مشترية اله

:- ضلت تحجي ويانا لحد ما نزلت جيهان منسقة ملابس العهد تكرمون حتى حذاء منسقتها أخذتهن منها جوائح وراحت باتجاه الحمام ورا شويه طلعت مغيره ملابس عهد ومرتبه شعره اله وهو يسولف وياها ويضحك عكس قبل شويه ما يحجي وي احد

جوائح:: راح اطلع اني وعهد بليل نرجع لا يضل بالكم

زهره:: وحدج ؟
- شيلان وياي اكيد ما نروح المكان بعد بس نغير جوه سوه

- اي هيج صيري اطلعي تونسي صخمي لطمي مو لازمتلي المحاكم والمراكز وهذا كتل وهذا صخم من طيح الله حظجن وحظ محمد الخلاجن وياا

عهد:: انتِ اشش

::- رفع اصبعه فاتح عيونه على وسعهن عود يخزرها لان شافها تحجي وتصيح على جوائح

كلهم ضحكوا على ردت فعله حتى جوائح لزمت ايده وطلعوا هي ويا مشيت كدامها شلت الجنطه خليتها بيدها ابتسمت الي
وطلعوا بقيت وراهم لحد ما اختفوا من كدامي

رجعت دخلت للبيت كعدت يم جهال استبرق وهي ترتب أغراضهم فوك للضهر الكل رجع من شغل دخل ابوي ويا عمي محمد ثنينهم ما منتبهين الي لان كاعدة بالكاع كدام التخم والصاله فارغة

فارس:: جاي اكلك مو اني
محمد:: اسكت سوالفك ما يمشن يمي

- ما اسكت هي شني خبصتني والله هاي المره مو اني

:: التفت اله عمي محمد يحجي بصوت ناصي يكله

- بس هاي المره يعني القبلها كلهن انتَ

- لا مره منهن مهند كسرها
- طيح الله حظك انتَ ومهند
- وحظك ويانا كلها جامه سيارة عليمن مكبر الموضوع
- بس جامه لو مكسرين سياره تكسر

:- يباوعله ابوي وهو ساكت حسيته كوه لازم نفسه ما يضحك حك طرف حاجبه وگال

فارس:: بناتي بطولي احترمني

محمد:: تحترموني احترمكم ما تحترموني ما احترمكم

- اهوو والله اذا يسمعنا ابنك الطايح حضه يسوينا مضحكة

- ماموجود بالبيت علي امشي فوت واني اعلمك انتَ ومهند على سوالف زعاطيط هاي

- دخل عمي محمد وابوي ورا يضحك واني مصدومه بيهن جنهم مراهقين يتعاركون تعمدت اطلع صوت حتى ينتبهون الي
حركة الطبله اليمي صار صوت وكفوا بمكانهم يلتفتون بصاله رجعت حركتها مره تانيه تقربوا مني يباوعون عليه
بس شافوني داروا وجهم وراحوا عني

وكملوا طريقهم كل واحد راح يدور على مرته
ضحكت على ردت فعلهم شلت الاطفال خليتهم بغرفة زهره ورحت اساعدهم

بين الشغل والأطفال خلصت يومي بليل
فتحت تليفوني تصفحت بي شويه وبدون تفكير رحت بحثتت على حساب راجح دخلت عليّ اتصفح بحسابه لا إرادياً دخلت على الأشخاص المتابعهم لفت انتباهي عدد الدكاترة المتابعهم المختصين بهذاك المرض حسيت اكو شي غلط حتى لو صاحبه مريض
ما معقولة توصل مرحلة يتعمق هيج

اجت افكار براسي واتمنيت تفكيري غلط بس تذكرت كلامه
وتصرفاته الغريبة وجع راسه المستمر
سيارته إلي ما تفرغ من العلاج بكمية مبالغ بي لشخص عنده لم طبيعي براسه

- طلعت من حسابه طفيت تليفون وكمت من مكاني اريد اطلع طفرت جُواهر كالت

جُواهر:: وين رايحه!
غفران:: هنا هسه راجعة
- اروح وياج
- شعندج رايحه وياي
- رجلي على رجلج ولا اعوفج
- استغفرالله امشي

:- طلعت من الغرفة نزلت جوه وي نزلتنا دخلت جوائح شايلة عهد بيدها وهو نايم وشيلان وراها شايلة هواي اكياس سلمت عليهن ونزلت للحديقة توقعت كاعدين بره بس ماكو احد موجود غير حمزه كاعد يدخن باوع النا ودار وجه كأنه ما شافنا

التفتنا ندخل طلعت جيهان ورانا حاطه ماسك الفحم الوجها ولابسه تراك ستن اسود اذا توكف بضلمه ما يبين غير أيدها ورگبتها

جُواهر:: شعندج نزلتي تردين تخلسين العالم
جيهان:: انتن شعدجن تفترن ها لو حلال عليجن وحرام عليه

غفران:: اجينا ندور على علي وماكو اثر اله
امشن نرجع

جيهان:: علي فوك بغرفته
دقيقه اصبروا

::- اخذت حصو ناعم من سندانات
شالته وابتعدت شويه رفعت أيدها ركعت الحصو بشباك غرفة الولد الي علي موجود بيها
رجعت اخذت بعد حصو وركعت الشباك زين ما تكسر فتحه انفتح الشباك مد راسه علي بهتت مصدومة من شكله أشرت اله ينزل جيهان رأسا ً
سد شباك وما حسينا غير طلع من بيتنا يركض باوعت على جُواهر صافنه بوجه حاط نفس الماسك الي مخليته جيهان على وجه

- عفت صدمتي اجت عيني على حمزه فاتح عيونه على وسعهن عين على علي وعين على جيهان هز راسه ما مستوعب

حمزه:: ولك علي شمصخم بوجهك
علي:: ماسك هذا

- حاطين انتِ وياها صخام تعال علي تعال
- اوكف نتفاهم هي قنعتني مالي دخل إني

حمزه:: قنعتك شني زعطوط انتَ زعطوط شطولك شعرضك راسك شكبره زعطوطه تضحك عليك

جيهان:: انتَ زعطوط لا تغلط
حمزه:: المصخمة السانج اكصه ولا حرف

::- علي ابتعد على صفحه يضحك وجهيان راحت وكفت كدام حمزه تردد بي وهو تخبل

- اني مصخمة اني كول تغار مني لان بيضه وانت اسمر

- دمشي لا اهفج على صخام وجهج
- السمرررر شكبرك حاط عقلك وياي
- وخري من خلقتي لا الزكج بالحايط

جيهان:: علي هذا الاسمر شكد عمره ؟

علي:: تاج راسج هذا ثلاثيني جاد ما يحب زعاطيط يحب جلد النمر وشعر الأصفر
و.....

حمزه:: مو اجي اصخم وجهك أكثر من صخام البي

جيهان:: ثلاثيني وحاط عقلك وي وحده مواليد 2006 لو اني منك اطم روحي احسلي

::- ضلوا يتعاركون راحت جُواهر تسكت اختها وهاي تزيد ما تنقص السانها اطول منها أخذت علي على صفحة احجي ويا

علي:: بيج شي ؟
غفران:: راح أسألك سؤال واريد جواب بدون جذب علي

- حسب السؤال اجاوب
- راجح المريض.؟
::- رفع عينه بعيني ثبت بمكانه لا يرمش ولا يتحرك من ردت فعله عرفت تفكيري صحح!!!

غفران:: هو موو؟

علي:: لا شسالفة راجح مابي شي
غفران انتِ اكبر من جوائح واستبرق صح ؟

- اي
- تشوفين الاشياء المرت بيها جوائح سهله
- لا
- إذن شوفيها رغم المرت بي رجعت الشغلها والحياتها اما انتِ شسويتي عزلتي نفسج بأربع حيطان أكل قليل نوم قليل ما مفتهمه شي من حياتج مع العلم تعرفين راجح يرجع بس شسويتي انتِ دمرتي نفسج

راجح يرجع عسى ما يبقى سنوات المهم بالاخير يرجع وشنو بي هو حالياً مو مهم المهم زين ركزي على كلمه زين و على كلمه يرجع ساعتها ركزي على نفسج

ونصيحة لا تفكرين بشي التفكير يخلي الإنسان اثوله مع احترامي الشديد الج بس ما ناقصج ثول أنتِ

::- كمل كلامه يضحك ابتعد عني وراح باتجاه
حمزه والبنات إلي لحد الآن يتعاركون

بس كلام علي منطقي فعلاً اني جاي أضيع نفسي بقى كدامي شي بسيط وحلمي يتحقق
ضيعت وقتي بالتفكير بدل ما استغله الصالحي..

استبرق:: زين صحيتي على نفسج صيري مثلها
وكملي حياتج والكاتبه الله يصير

غفران:: صحيح مره كلتي تتمنين نتخرج سوه
وانتِ اجلتي سنه واني هاي آخر مرحلة إلي

استبرق:: صحيح وهذا اخر احلامي وراح يتحقق باذن الله

::- ابتعدت عني رايحه باتجاهه شباك تراقب الموجودين جوه مجتمعين كلهم بالحديقة وأصوات ضحكهم عالية ابتسمت

استبرق:: تذكرين آخر مره رحنا بيها الكربلاء

غفران:: أي اتذكر

- مر ست سنوات على هذاك اليوم ولا وحده بينا جانت تتوقع حياتنا راح تتغير وأحلامنا الي نشوفها مستحيل تتحقق اتحققت وجاي نعيشها هسه رحمه أخذت حب طفولتها

- وانتِ اخذتي اول حب بحياتج الجنتي تتخيلين شنو تنجمعين بي صارت صدك وتخيلاتج تحققت وصرتي ام أطفاله

- وما ننسى وسام وحبه الوهجَ وتحميل كلشي وفاز بيها بالاخير

- لو ما وصل التهديد ذاك السلمان وطلعنا من ذاك البيت ما يتحقق ولا شي

- مره فرات كال العقرب ما يستقر
بس العقرب استقر وأخيراً

-: التفتنا على الصوت مصدومين بوجود......

ـــــــــــــ⊰ ـــــــــــــ

جوائح:: نمت بالغرفة الثانية ورا وقت حسيت بخطوات قريبة مني رفعت راسي وما حسيت غير بالمخدة على وجهي وصوت يتكرر بأذني

- اموتج بيدي واحرك گلبهم

:- فتحت عيوني أجر النفس گلبي يدگ بقوة
ولا شخص موجود بالغرفة

يعني مجرد حلم رفعت ايدي التلمس وجهي حسيته مو مجرد حلم لان فعلاً اختنكت

::- وخرت الغطه كمت أريد اطلع من الغرفة حسيت بأحد ينفخ يم اذني التفتت اباوع بالغرفة ماكو احد جسمي قشعر

استغفرت ربي طلعت من الغرفة وأطرافي ترجف حسيت بخوف وقلق فعلاً
دخلت الغرفة اخواني نايمن ثتينهم

رحت سحبت الغطه من علي نمت بصفه تغطيت ويا جنت انقد سوالف وهجَ هسه صرت مثلها بس نمت يمهم حسيت براحة بعدها فعلاً نمت

ورا ساعات حسيت شي على خشمي درت وجهي للجهة ثانيه هم اكو شي يتحرك دفنت رأسي بالمخده نفس شي نعاد بس على رگبتي طفرت من مكاني احك برگبتي اباوع على علي وجه احمر من ضحك وايڤار كاعد بصفه هم يضحك وحمزه كدامي تماماً لازم طرف السبحه مالته ويمررها على وجهي حتى انزعج

جوائح:: هاي انتَ
حمزه:: لا ابوي نايمه هنا واحنا سؤال ما تسألين علينا

- وخر منا مالي خلك اتعارك

علي:: شوكتتت اجيتي ليش ما كعدتيني

ايڤار:: زينه أنتِ.؟

- أي الحمدلله زينه ماردت اكعدكم
علي:: كومي خلينا ننزل سوه جوه

::- هزيت راسي خليتهم يطلعون كمت وراهم نزلنا سوه جوه سمعت شيلان بالبيت عبالي اتخيل لان آخر اسبوع خلصته يمها واربعه عشرين ساعة تلغث فوك راسي بس طلعت ما اتخيل مدت رأسها من المطبخ تمشي وتصيح

شيلان:: انتِ ست الحسن منين جبتي هاي الفكرة مال عزيمة

جوائح:: وسم شبيج لحكتيني هنا
- ميته عليج لاحكتج اجه هذا البلوه كعدني من الصبح يأبه شكو اكعدي نروح يم جوائح

اذا ما اكتلج واضمج بمكان محد يدري بي اني اعلمج يوميه مكعديني من نومي علمودج

حمزه:: شكد تحجين الخاطر الله سدي حلكج شويه

علي:: دكلك بلوه
ايڤار:: ما تحترمك شو
جوائح:: طلعت لعبت وي جهال طوبه وصعدت على سطح تاكل حب شمس وتحش بالعالم

شيلان:: جذااااااااابه لج تجذبين على اخوج تاج راسج لا تصدكها

حمزه:: راح اغلس بمزاجي حسابج بعدين اني اعلمج

علي:: خاف تنسى اني اذكرك

::- فلتت للمطبخ شارده غسلت وراحت للمطبخ بس فتت سحبتني من ملابسي

شيلان:: ايا حيوانه اذا ما افتن عليج اني اعلمج

- وخري وخري لا اكتلج

غفران:: شنو سالفه العزيمه ولج ؟

جوائح:: اخذي جيهان واطلعن من المطبخ بس جُواهر وشيلان يبقن

غفران:: واني
- استلمي البيت انتِ خلينا احنا نطبخ

:- وجهت كل وحده الشغلها واني استمع الكلام جُواهر وي شيلان

جُواهر:: اي هو ايڤار اخذها إلها بشهر جلستين صح تعبت بالبداية بس بعدين لاحظت شكد تحسنت

شيلان:: شنو اسم الدكتورة ؟

- اذكر اسمها رفيف دائماً تمدح بيها جَلنار

::- رفيف دكتوره اختصاصها علم النفس الجانت تتعالج يمها وهجَ سنوات طويلة تتعالج عدها حتى كدرت تتشافه تماماً من الحاله الجانت بيها هي

- طول ما هنه يمي يحجن بيها حسيت شيلان تعمدت تفتح هذا الموضوع علمود تخلي بالي ماكدرت تحجي وياي ودگلي أخذي جلسات عدها حاولت توصل الفكرة الي بغير طريقة

غسلت وما حجيت اي شي بخصوص هذا الموضوع ورا الضهر اجت رحمه وراها وهجَ بس سمعت صوتهن طلعت من المطبخ اسلم عليهن وما احجيلكم الصدمتهن بوقتها وأي شخص يجي بس استقبله يصفن بوجهي حسسوني جنت اكتل بيهم استغفرالله

عفتهم ورجعت نصيت النار طلعت عصير دا اشرب دخلت للمطبخ رحمه بطنها كبرانه
دخلن وحده ورا وحده

باوعت عليها وكلت
جوائح:: عرفتج حامل من تخربط وضعج بالمستشفى

رحمه:: لان جربتي الحمل قبلنا
شو باوعيلي

::- باوعت عليها ما فاهمه شي
وهجَ:: مو كتلج سمنانه

جَلنار:: اي حتى متغيرة حليانه

شيلان:: بيبي مرجفتها تاكل كلشي تنطي الها وتجبرها تنام هواي وخلت زيوت الشعرها اسبوع واحد خلاها تصحصح

جيهان:: عدنا ثنين هنا يحتاج نخليهم يم بيبيتج فترة

::- تحجي وتباوع على غفران وجَلنار
وهنه يسولفون بيناتهن قطع حديثهم .
صوت ايڤار حمحم ودخل كال

ايڤار:: جَلنار تعالي

وهجَ:: كومي حبيبتي زوجج الغالي يريدج كومي

جيهان:: شتريد منها خلي اختي يمنا

ايڤار:: انتِ ام السان شنو لازمه على علي ومخليته ساكت كليلي واعوف اختج يمج

جيهان:: اخذها ماريدها

::- ضحكوا على كلامها كامت جَلنار طلعت ويا طفيت الغلايه وكعدت بعدي ما نطقة حرف سمعت صوت عهد بالبيت حسيت گلبي فز من سمعت صوته كمت وكفت باب المطبخ لمحته بيد وسام يضحك باوع عليهم كلهم لحد ما ثبتت عيونه عليه نزله وسام اجه يركض انحنيت اله شمر نفسه بحضني مطوق ركبتي بيده كال

عهد:: أين لحتي ذوذو ( وين رحتي جوجو)

جوائح:: روح جوجو انتَ شلونك زين ؟

عهد:: ما تلديني ( ماترديني)

:- باوعت عليّ نظراته قهرتني
بوسته بخدوده

جوائح:: لا اريدك اني شلون ما اريدك

عهد:: تليديني ( ترديني)
- اي اكيد غير عهدي أنتَ

- اني هم اليدج لا تلوحين
( اني هم اريدج لا تروحين)

- لا ما اروح هواي عنك

::- التفتت على البنات
جوائح:: كملت كلشي اني ابقوا هنا انتم واني راح اطلع بره بالطارمه

رحمه:: تمام بس روحي بالجهة الثانيه حتى تأخذين راحتج لان نص المعزومين ما اجو لسه

::- هزيت راسي مبتسمه أخذته وطلعت كعدت وخليته بحضني هو يسولف وإني اجاوبه حاولت افهمه راح أغيب عنه مده بس يبقى طفل ما يفهم بسهوله

الشي الوحيد الي لازم اسوي اتعالج من الحالة التجيني ماريد أخلي عهد يمي وتتعب نفسيته ويتعرض الأمراض وعقد نفسيه بسبب وضعي

الشي العشته ما راح اخلي ابني يعيشه

::- ساعة ونص تقريبا بره ويا كاعدة اجت أمي شايلة بيدها شي مثل الحرز خلته بملابسي وكالت

نيرمين:: لا تنزعينه حتى تبقين مرتاحه
جوائح:: تمام
- انطيني عهد وكومي ادخلي صار المغرب

::- اخذت عهد دخلنا الكل موجود إلا أيان واستبرق وجهالهم ما اجو بسبب وضع استبرق

باوعت على زهره تخزر بأم حمزه وام حمزه تباوع الها صفح وابوي يراقبهم منتظر الانفجار

:- دخلت ساعدتهم بصب الأكل بعد ما صلوا كلهم والكل كعد سفره وحده أصواتهم وضحكهم خلت روح بالبيت الأول مره يصير تجمع خالي من المشاكل

::- ضلوا موجودين الوقت متأخر بعدين الكل راح حتى عهد أخذوا وياهم انتظرت ايڤار يجي لان طلع يجيب علاج بس دخل للبيت شافني كاعدة أتقدم بأتجاهي مبتسم

ايڤار:: منتظرتني

جوائح:: اي ردت احجي وياك من زمان ما كعدنا سوه

- عندي هواي حجي الج
- عندك وقت هسه لو غير يوم؟
- لا ماعندي شي بس خلي انطيها العلاج واجيج

- تمام دخل للبيت ورا شويه رجع بيده بيبسي انطاني واحد وأخذ واحد كعد يمي كال

ايڤار:: احجيلي بالبداية شصاير وياج وشنو سر التغير هذا

جوائح:: مادري صراحة ماعندي شي احجي انتَ

- منين ابلش
- من النقطة المهمة
- جَلنار قصدج ؟
- اي
- حاولت اخليها تتعافى وتنسى الصار وياها بس ماكو نتيجة فترة ترتاح بعدين ترجع أسو
أ من قبل

من مات الطفل رجعت النقطة الصفر
رجعت أحاول من جديد اريد اخليها تتعافى بالكامل حتى السنه هاي ترجع تكمل دوامها
بعدهي صغيره وما شافت شي من حياتها

- ترجع احسن من قبل بس يحتاج وقت
- ادري صابر اني وأن شاء الله خير

- تحبها ؟
- مادري

- شنو ماتدري صار الكم هواي سوه اهتمامك بيها وخوفك عليها واضح لا دكلي مادري حتى الغبي اذا يشوفك يكلك تحبها

- عقلي مو براسي ما فاهم شي من اللي جاي أسوي بس گلبي مرتاح وياها

- شغلتك واضحة بس لازم تتأكد من نفسك

- حتى لو تأكدت ما احجي شي إلها أريدها تكمل دراستها وتتخرج بوقتها تريد تكمل وياي راضي اني تريد تكمل وي شخص ثاني اطلگها وتعيش حياتها مثل ما تريد

- اممم احس عرفت النهاية من هسه نعيش ونشوف

- شنو هي ؟
- نعيش ونشوف بذاك اليوم اذا صار البالي أذكرك بهذا اليوم هسه لا تفكر هواي

- كلشي يتغير بيج إلا كلامج الي كله الغاز
- صحيح هسه اريد تحجز إلي عد دكتوره رفيف

- الج ؟؟
- اي شبيك مصدوم
- تحجين صدك
- اي والله
- لا هاي قوية شلون اقتنعتي ؟
- علمود عهد اريد اكون بحاله أفضل حتى تعيش سوه اني وياا

- ههههه تدلل ام عهد باجر احجز الج لو غير يوم تردين ؟

- اي باجر ماريد أتأخر
- مثل ما تردين

::- طول حديثنا اني مركزة على كلمه طفلنا
هاي الكلمه خلتني اعرف نهاية جَلنار ايڤار

ما راح اكللكم انتم هم انتظروا النهاية وتعرفون ....

- نهينا حديثنا وكل شخص راح الغرفته رحت نمت وي البنات وما نمت وحدي
ثاني يوم طلعت الدوامي وقبل موعد الدكتورة رجعت للبيت حظرت نفسي وطلعت
اخذت فترة اخذ جلسات إلها ورا كل جلسه انهار بس وراها بساعات احس هم وانزاح عني وصرت انتظر موعد الجلسة الثانية علمود أروح وبأخر جلسه

طلبت مني أرجع الأكثر مكان بي ذكريات ماكدر انساها وما ذكرت شي معين حتى اكدر أروح بعد يوم متعب نمت صحيت على حلم عرفت شنو معنى حلمي بدون تردد رحت البيتنا القديم اخذت وقت طويل هناك

ومن بين الأشياء الي اخذتها من وهجَ جانت اكو رساله من فرات الي قبل وفاته بأيام معدودة

المكتوب برساله بكف وآخر كلمه بكف خلت ألف سؤال براسي شنو الخلاك تسوي هيج
كلشي راح ويا تارك ألف سؤال ورا

وآخر كلمه برسالة خلتني أتأكد من شي واحد فرات جان يدري بروحه يموت

طلعت من البيت قفلته وانتهى كلشي هنا
جنت متأكدة راح اخطي هاي الخطوة وخطيتها عفت كلشي ورجعت صعدت بسيارتي حركتها أمشي بسرعة

مريت من يم وحده من سيارت صدت عيوني على الشخص إلي يسوق وكملت طريقي بس

سرعان الفتت اباوع على سياره اختلاطت وي باقي سيارات وراحت بس كأني لمحت شخص يشبه فرات او مجرد وهم

بسبب العلاج مسحت عيوني وكملة الطريق
بس وصلت للبيت صعدت فوك كعدت اكتب شويه وبدون ما أحس كتبت ساعات متواصلة ما حسيت على نفسي لحد ما صار عندي وجع بأيدي. انتبهت دنيا صبح وإني كاعدة بدون نوم

ضغطت على نفسي طلعت للدوام كملت التقرير سلمته وأثناء رجعتي اتصلت وهجَ حتى اطلع وياهم رفضت لان حالتي النفسية مو تمام

حسيت بدوخه مو طبيعية صفيت سياره على صفحه ونزلت امشي للبيت مجرد وصلت فتت للغرفة جيهان كاعدة تابع مسلسل وأختها نايمه خفت
وحدي لان اتخيلت هواي اشياء تعبتني اخذت منوم ونمت الثاني يوم العصر كعدت على هوسة البنات فوك رأسي شمرت ماي على وجهي طفرت من مكاني بسرعة

جوائح:: هاي ليش ؟

استبرق:: جاي تصرخين انتِ ونايمه خوفتينا
غفران:: اكو وأحد ينام هلكد ؟

- اهوو وخرن عني خل انام
:- دفعتهن تمدتت وغطيت راسي بس للاسف راحت النومة من عيوني

اشهر واني على هذا الحال مستمرة بعلاجي وطول هاي اروح اشوف عهد وارجع للبيت

بهاء اختفى وما شفته مره ثانيه
ما أنكر واكول ما اجه على بالي اجه هواي بسبب كلامه وياي

شيلان:: اممممم ما أعرف شنو كلامه وياج بس اضاهر اله تأثير قوي

- انطمي
- اغلس بمزاجي

- طيح الله حظج وحظ مزاجج شعندج هنا ؟

شيلان:: تعرفين خلصت العطلة ورجع الدوام
ورحت وياهن نشتري ملابس

جوائح:: اها فهمت كومي نروح يمهن

- كلهم بره بالحديقة اتوقع استبرق تجرب ملابسها تعالي

::- كمت وياها رحنا الغرفة استبرق الباب مفتوح لفت انتباهي كلامهن دفعت الباب وكلت

جوائح:: بس العقرب استقر وأخيراً

التفتوا على صوتي مصدومات

غفران:: وكفتي گلبي صدك جذب
استبرق:: روحي راحت
جوائح:: انخوك ما سويت شي تره..

شيلان:: اسمعن خلونا ننزل جوه يمهم أحب هيج أجواء بيها حش هواي

استبرق:: جوي واجوائي انتِ خلينا نروح

::- ما اعترضت نزلت وياهن اجت عيوني على وهجَ إلي صاعدة بنص الدرج وايدها على رأسها رحمه صايره وراها تماماً تساعدها

بس وكعت وهجَ على درج لزمت المحجر ورحمه وكعت من درج للكاع
من قوة وكعتها صار صوت قوي صرخت بصوت عالي ركضت الها رفعت راسها من الكاع على إثر الصريخ دخلوا يركضون محد مفتهم شي صاحت استبرق بصوت عالي

- ماي رأس الطفل نزل مختلط وي الدم.....

ـــــــــــــ⊰ ـــــــــــــ

"مشهد من البارت القادم"

ركضت بأتجاهي الطفلة شايلة بيدها ورده اتقربت مني قدمتها إلي وگالت

- هاي من عمو الج
::- شمرتها وركضت بهتت مصدومة
يا عمو هذا باوعت على صيدلية اكو أشخاص واكفين دخلت بسرعة انطيتهم علاجهم
سحبت الوصفة الطبية ركزت بيها بدون لا ارفع عيوني گلت

- شريط**** خلصت كميته عيوني
ما رد ولا نطق بحرف واحد رفعت راسي اباوع على صاحب الوصفة الطبية بس صدت عيوني بعيونه توسعت عيوني بصدمة من نزع الكمامة مبتسم همس

- مـر وقــت طـويـل

ـــــــــــــ⊰ ـــــــــــــ