جوائح الدهر الفصل الثاني وخمسون 52 - بقلم دعاء رزاق

بِسْمِ اللّٰهِ الرَّحْمٰنِ الرَّحِيمِ
"جَوائِحُ الدَّهْر"
(بقلم الكاتبة: دعاء رزّاق)

لا تنسَوا التصويت والتعليق يا جميلاتي، فكل كلمة منكنّ تمنح القصة روحًا أجمل 🌿

ـــــــــــــ⊰ ـــــــــــــ

غفران:: طولت هواي تعبني الانتظار

راجح:: ياروح روحي خلص رجعت اني والغـياب انــتهــى بـشـوفـة عـيـونــج

:- حسيت گلبي راح يطلع من صدري عجزت انطق أي حرف حاضنته بقوة ودموعي تنزل نسيت الحلال والحرام والعالم الموجودة
ما انتبهت إلا على صوته

- كافي فضحتونا ولد الاوادم كافي

ابتعدت عن راجح لمحت اسامه واكف ورانا تماماً مدنك بالكاع ويصيح ابتعدت عنه بكم خطوة وهو كام يكول للعالم

اسامه:: زوجها ياعالم وداعة جدي العزيز زوجها مسافر من سنتين وهسه شافته اعذروهم

::- عفته يحجي ركضت دخلت جوه
واسمع الأشخاص الموجودين يتحمدون الراجح من يمي تفشلت ما سيطرت على نفسي شلون حضنته خرب حضي

ضليت ساكته ورا خمس دقايق تقريبا دخل راجح واسامه راح وين ما ادري بس المهم راح

بداخلي شعور حلو والإبتسامة مرسومه على ثغري درت وجهي اهفي على نفسي رغم الجو باااارد والدنيا مغيمه كأنها تريد تمطر

بس حسيت بحراره قويه سحب الكرسي البصفي كعد درت وجهي للجهة ثانيه
عيوني على ورده عرفت هو الي جابها

ضلينا ساكتين وكل ما تصد عيوني عليّ الگاه يباوعلي مبتسم اغلس وادور وجهي

للأمانة لو مو حرام اكعد واگابله ونعل ابو اليعوفه اعذروني شويه مشاعري خرجت عن سيطره اي والله

-: صديق فرات راح وبعد ما رجع عرفت همه ورا هذا شي ولأن موسم الشتاء والعالم نصها مريضة الصيدلية ما تفرغ خصوصاً بوقت العصر لحد التسعه بليل ولان قريبه من شارع الأطباء عليها ازدحام..

:- طلعت من صفني التفتت على راجح گلت

غفران:: شوكت اجيت ؟
راجح:: تعالي اكعدي هنا

- لا خليني هنا كل شويه جاي شخص
- قبل اربع ساعات وصلت وانتظرتج تجين حتى اشوفج اول وحده
- زين انتَ وضعك تحسن مو ماكو شي يخوف

- منو گالج؟
- محد كالي اني ضليت أفكر لحد ما فهمت
هسه گلي وضعك زين ؟

- من شفتج صرت زين
- راجح سيد انتَ دخيلك جدك حرام تحجي
وياي هيج

- چا شسوي ماكدر الزم الساني
- الزمه واسكت
-: ضحك بصوت شبه مسموع
شكله تعبان وعيونه ذبلانه ضعفان كلش
رغم هو صاحب جسم ضخم بس المرض متعبه حيل اتقربت منه وگلت

غفران:: ليش ما تروح ترتاح ؟
- استغفرالله خليني ساكت
- لا راجح صدك كوم روح للبيت ارتاح

- وداعتج ما اروح خلصي ونروح سوه
فرحان لان جاي اشوفج حققتي حلمج

- مو حلمي وحدي غلطان حلمنا هذا
- الحلم الأول حققتي انتِ الحلم الثاني اني
احققه

- يا حلم ما اذكر اكو حلم ثاني ؟
- اكو اكو اذا نسيتي انتِ اني ما نسيت.

- شنو هو گلي؟
- لا بعدين تذكرين وحدج

- راجــح
- روحــه
- روح ارتاح اني أتأخر
- ميخالف نروح سوه انتظرج هنا
- واضح من عيونك نعسان لا تعاند
- راسي يوجعني ماكدر اروح
- راسك يوجعك وكاعد بنص الهوسه وأصوات
السيارات والعالم

- ما أسمع صوت غير صوتج
- حرام جذب سيد انتَ
- وحق رسول الله مركز وي صوتج بس
- اممم
- عندج شي تحجينه ؟
- لا ماعندي شي

- لا شوفي شي احجيلي
- ماعندي والله
- شوفي شي منا منا المهم احجي لا تسكتين
- مو راسك يوجعك
- ورسول الله وجع راسي يروح من اسمع صوتج احجي لا تسكتين
- تحجي صدك راجح ؟
- وروح امي

-: رجع راسه على كرسي مثبت عيونه عليه
ما حبيت ارده لان اصلاً اريد حجه حتى احجي ويا ضليت افتر يمه واحجي كلشي وكل شوي يجي شخص وبس يروح ارجع اسولف لحد ها

نام وهو يسمعني بس سكتت فز فاتح عيونه
راجح:: لا تسكتين احجي

:- رجعت احجي وهو مغمض عيونه يعني نايم بس اسكت يكعد حتى من كثر الحجي تعبت
بس أتأكدت فعلاً نام بعمق اخذت سماعتي خليتها بإذنه حس عليه بس ضل مغمض

شغلة قرآن وعليت الصوت حتى ما يسمع الاصوات الموجودة وينام براحه عفته ورجعت الشغلي ورا ساعتين نص ساعة طلبت اكل

وكعدت على صفحة لان بهيج وقت العالم تخف باوعت على راجح الضوه بوجه نزعت الجاكيت مالتي خليته على وجه حتى ما يصير الضوه بوجهه

ضل نايم تقريباً ساعة وأكثر طفر طفره من مكانه ضليت فاتحه عيوني مصدومه بسبب طفرته سحب السماعة من أذنه

راجح:: دخيلك ياعلي اي والله دخيلك ياعلي

غفران:: شبيك خلستني

- هاج أخذي هذا خرب أذني راحت

::- اخذت تليفون منه بس شفت المشتغل غميت نفسي جيهان تأخذ تليفوني دائماً علمود تسوي مقالب بأخواتها وتبحث عن هيج اصوات وبس منتهي القران محول على فيديو صوت انذار الحريق وصوته عالي واني مخليه صوت سماعة عالي

رفعت عيوني اباوع اله وجه اصفر زين ما وگف گلبه على هاي الهبطه

غفران:: راجح كوم ارجع منين ما اجيت بس تبقى هنا تنجلط اسم الله

راجح:: آذاني بيها صدى بس انتظري

::- رفع ايده يضغط على أذنه بقوه
لزمت ضحكتي ماريد اضحك عليّ
ورا كم دقيقه اجه صديق فرات سلم على راجح وطلعنا راح يبقى هو والمساعد

صعدت بسياره راجح وهو راح جاب مي وعصير صعد انطاني العلاگه وسد الباب الجاكيت مالتي لسه شيايلة بيده ردت اخذه بس شفته خلا بجهته وكأنه مايريد ينطي

اتصل على اسامه فتح خط يحجي وصوته عبالك هستوه كاعد من نوم

اسامه:: ها متت بعدك

راجح:: عدل وينك انتَ
- بحضن فو.....

::- انسد تليفون بوجه راجح هز راسه يضحك
عرفته راح الفاطمه واكيد هي السدت التليفون لان اسامه مبين كاعد من نوم دايخ وشافته يجفص سدته

راجح:: اشربي العصير

غفران:: بدون اكل وعلاج انتَ

- علاجي يمي لا تخافين
- وينه ؟
- انتِ

::- أخذت رشفة من العصر حتى ما اضحك درت وجهي اباوع على طريق قبل نوصل گال

راجح:: انتظريني ندخل سوه

غفران:: تمام الكل هنا مجتمع من البارحة
- ليش ؟
- همه كل خميس يجون العصر وثاني يوم يروحون

:- هز راسه قفل السياره ونزل عاف الجاكيت بداخلها قلصت عيوني عليّ وهو يحك ارنبة خشمه داير وجه

فتحنا باب البيت الخارجي ودخلنا لمحت ايڤار وجَلنار بالحديقة كاعدة كدامه يضفر شعرها ويسولفون بيناتهم حتى على دوخلنا ما حسو مندمجين سوه

غفران:: احمممم مساء الخير

::- التفتوا على صوتنا كامت جَلنار وكفت وايڤار ابتسم كام من مكانه يمشي باتجاهنا اتقدم اله راجح حضنه يسلم علي ويتحمد اله

بعدهم يحجون طلع علي هو وجهال من البيت
يطفرون كلهم وعهد بس شاف راجح شمر الطوبه من ايده وكام يركض انحنى اله فاتح
حضنه شمر نفسه بحضن راجح يحجي

عهد:: عمييي راجح
- بعدد عمك كبران صاير زلمه
- اشتاقيتلك
- كول والله
- والله
- ما نسيتني يعني
- لااا احبك اني ما انساك
-: ضحك فرحان يبوس بي ضل حاضنه لحد ما شاف مجتبى كدامه يطفر نزل عهد شال مجتبى يبوسه ويضحك اجن ريم وريمي وي علي وملاذ بنت رحمه بحضنه

::- اخذهن وحده وحده يبوسهن فرحان بيهن شال ملاذ وكال

راجح:: كثرانه الجهال ولكم

علي:: بعد هسه اكو ثنين بطريق

::- عقدت حواجبي ما فاهمه أي ثنين منين مو اليوم الصبح ماكو شي منين اجو

::- أخذنا الجهال ودخلنا جوه بعدنا بالباب وما حسينا غير بجگليت فشخنا وهلاهل زهره صوتها يركض

استقبلوا راجح كلهم بس شفت ابوي خازرني ختلت ورا ايڤار

غفران:: عفيه لا تعوفني هسه انعلس

ايڤار:: محد يحاجيج لا تخافين.

جَلنار:: تزوجتوا ؟
غفران:: منو اني ؟
- اي وراجح ؟
- لا يمه شسالفة
- لعد ليش يهلهلون ويطشون جگليت؟
- جان مسافر يتعالج ورجع لهذا سبب
- عبالي تزوجتوا والله

فارس:: غفران بابا تعالي

::- التفتت على صوته ابتسمت اخفي خوفي منه

غفران:: ها بابا
- شلونها صديقتج هسه؟
- يا صديقتي
- ما تعرفيها مو
- لا صدك ياهيه ؟
- الماتت بحلمج قبل سنه مدري سنتين
::- يحجي وعيونه على راجح الكاعد بصف زهره

غفران:: اي اي زينه
- خوش حجي
-: عافني وكعد يمهم باوعت على البنات مادات راسهن من المطبخ يضحكن فلتت من الصاله بس دخلت التفتت جيهان دكول

جيهان:: اختج وجها مورد
رحمه:: والعيون تضحك
استبرق:: رجع المحبوب
- وهجَ اكيد الوجه يورد روحها ردت

غفران:: لا تخلوني اغلط علي كال اكو جهال ثنين بطريق يا جهال ؟

رحمه:: المطيه طلعت حامل
غفران:: دقيقه يعني استبرق حامل
- طلعت اكبر مطيه

جيهان:: كولون الها الطفل الثاني ابن منو ؟
::- صفنت عليهن كلهن وحده تغمز للثانيه ما عدا وهجَ جانت تباوعلي مبتسمه وايدها على بطنها بس شفتها لا إرادياً صحت بصوت عالي

غفران:: جذببب عليج علي حامل ؟

وهجَ:: ههههه اييي
- جذابه
- وحق علي واولادة حامل اني

- يممه اللهم صل على محمد وال محمد
::- حضنتها فرحانه بيها كلنا نعرف شكد تتمنى يصير عدها طفل

استبرق:: بقت شيلان وجوائح وفاطمة ما يعرفون

جيهان:: محد يعرف بس علي وعمه نيرمين وعمه زهراء وبيبي وزهره

وهجَ:: اي نجتمع كلنا على اكل واكللهم اني واستبرق

استبرق:: قبل كلشي بس يجي وسام أخذي واطلعي بالحديقة كليله حتى يعبر عن فرحته براحته اذا يعرف كدام الكل راح يتقيد وما يكدر ياخذ راحته فهمتي ؟

- اي فهمت اني اكله بس خلي يجي

جيهان:: يتأخرون ما يجون هسه
- ميخالف

:- كعدت تشرح الها شلون دگله والفرحة واضحة بوجه وهجَ الكل مجتمع ويحجون وي راجح اسامه ما اجه للمغرب كلش دخلوا الولد كلهم واحد ورا ثاني وجان وياهم شاب عشريني من شكله مبين بس حسيت شايفته بمكان بس ماذكر وين

وكف انمار يسولف ويا وزياد يحجي وي ايان
او وسام بس شافهم علي كام هو وراجح وايڤار واحد يسلم على ثاني حسيت بفرحة من شفت لمتهم بعد غياب طويل

صح ناقصهم اسامه وحمزه بس جمعتهم حلوه

عهد واكف بصف وسام يباوع عليهم من يحجون

حاط ايديه الاثنين ورا ضهره وشابكهم سوه
تماماً مثل وگفت فرات او وسام واكف بنصهم كأنه ابو

كعدوا كلهم بصاله وايان كعد عهد بحضنه وانمار خله بنته ملاذ بحضنه

مجتبى بحضن علي وريم بدون تفاهم طفرت
يم زياد تكعد بحضنه وريمي هي بحضن
ايڤار بقى راجح يباوع عليهم كلهم رفع عينه باتجاه الباب باوعلي ونزل عيونه على بطني غمزلي ونزل عيونه

من اجه ابوي جان يصلي بس شافني خليت ودخلت للمطبخ وجهي صخن باوعت عليهن وكلت

غفران:: راجح خرب صار سريري
استبرق:: حقه عمي سنتين وي اسامه
وهجَ:: مو زين صاحي وما يكبسل

رحمه:: شمدريكم توكم شفتوا يمكن يكبسل
محد يعرف

غفران:: لا تحجون عليّ يشور بيكم

استبرق:: خلصت عمري احجي عليّ ما شور..

::- بعدهي تحجي وانجرح اصبعها هي وتثرم الزلاطه

غفران:: حللل بيج حتى توبين

- والله ولا اتوب ابقى احجي عليّ

::- سكتنا من اندك باب المطبخ دخل وسام يدور بعيونه على وهچ وهي صايره ورا ميز طعام محد يشوفها اله يتلفت من الجهه الثانيه

وسام:: وينها مرتي ؟

استبرق:: عوف مرتك هسه شنو ناسني ما تسأل عليه هاي هيج الخوه

وسام:: استبرق تزوجتي وخلفتي وبعدج
على سوالفج شوكت ناسيج ياهو يسأل عليج يوميه

- شوكت شو ما اذكر ؟
- هسه اكول لبناتج امكم جذابة
- مرتك هاي هنا اخذها وروح

:- ضحك من مدت رأسها وهجَ لزمت ايده وكامت طلعوا من المطبخ واستبرق تعض شفه الوجه حتى تذكرها خاف نست

طلعت رحمه للصاله ورا شويه رجعت توزع صفنات كالت

رحمه:: جوائح مو على اساس تجي ؟

استبرق:: اي بس عدها شغل شويه وتوصل اكيد

::- بقيت كاعدة لحد ما خلصن البنات وطلعنا نصلي فوك طيبه نايمه وجُواهر اخت جَلنار لحد الآن ما رجعت لان من شهر تقريباً بلشت تشتغل بمحل ملابس نسائية هي لحت بهذا الموضوع لحد ما اقتنعوا ابوي وعمي محمد

هي أكبر أخواتها وبنفس الوقت منتظره أخواتها ينجحن من سادس حتى يقدمن سوه وعلى هذا الأساس لازم تنتظر الـ 2025

لهذا السبب حبت تشتغل الشي الوحيد الي
محد معترض عليّ بعائلتنا هو الدراسة وشغل

ما يحبون احد يترك دراسته ودائماً يأكدون علينا بأن نكمل ونتعين وكل شخص يصير مسؤول عن نفسه أن كان ولد او بنت المهم الشهادة عدهم

مره من المرات جدي سلمان كالي
كل ولدي واصلين واريدكم تكملون حتى العالم دكول ولد سلمان وأحفاده ناجحين واصلين.

يعني هو مهتم بحجي العالم وهذا همه الوحيد تفكيره محدود وغريب
عكس عمامي صح يردونه نكمل بس علمود
تعتمد على نفسنا وهذا الصح

:- مجرد خلصنا نزلنا جوه دخلت جُواهر سلمت وصعدت فوك عشر دقايق ونزلت باوعت عليهم وگالت

جُواهر:: هذا الجديد منو ؟

استبرق:: هم انتبهت بس مادام مدخلينه للبيت وبنصنا يعني من العائلة

رحمه:: هذا ابن عمي مهند هاي الفترة يشتغل وي الولد لهذا جابوا وياهم

غفران:: احس شايفته

جُواهر:: جان موجود بعقد ايڤار وجَلنار وبعرس استبرق هم شفته

::- التفتنا عليها مستغربين تركيزها يمكن اكثر شخص قليل الكلام وهادي بالبيت هو جُواهر

رحمه:: ما شاء الله شنو هذا تركيز

- لا مو تركيز بس أذكر شكله لان بيومها عثرت بفستاني وهو شافني من الفشلة ما نسيت شكله

جيهان:: صحيح صحيح
جَلنار:: واني شاهده

جُواهر:: وسم عوفوني بحالي

::- دفعتهن وكعدت شافوا جوائح وحمزه ما اجوا كاموا يصبون الاكل واني رحت اريد اصيح الوهجَ وسام تأخروا بره لحكتني رحمه بس طلعنا للحديقة لمحت وهجَ حاضنه جوائح وحمزه خازر وسام اتقربنا منهم

رحمه:: وأخيراً اجيتوا

جوائح:: والله عدنا شغل خلصنا واجينا
غفران:: حمزه شبيك

وسام:: مابي شي فرحان لان أخته حامل

::- رفع ايده ركعه بوكس بطنه وسام يضحك من گلبه وحمزه معطب وهجَ خانسه سحبناهم ودخلنا جوه سلمت وراحت تغسل جوائح خلوا الاكل على سفره وكل واحد اخذ مكانه وكعددوا بنص الاكل مد رأسه وسام يهمز شي الايان تغيرت تعابير وجه واختفت ابتسامته باوع على وهجَ إلي مدنكه ورجع باوع على وسام

::- هز راسه بمعنى بسيطه حتى الأكل عافه ما كمل ضل صافن بالماعون حمزه نفس وضعه
وهذوله أكثر ثنين يغارون على إخواتهم وسام اليوم ينسحل مابيها مجال

باوعت على الكل كلهم يسولفون وي زهره ويتناقشون وياها بمواضيع وهي فرحانه بيهم

راجح كل شويه يرفع عيونه عليه وابوي يخزره
بس خلصوا اكل كلنا لزمنا المطبخ بربع ساعة خلصنا لان هواي احنا كل وحده لزمت شي لحد ما كملنا أخذنا الجاي وكعدنا يمهم
حمحم زياد اخو انمار وگال موجه كلامه الزهره وأبوي

زياد:: مرخصتكم اريد اطلب منكم شغلة

زهره:: صلاوات حجيت يالخوينس شنهيه شغلتك كول بعد جلاوي

أنمار:: احجي
زياد:: اريد تروحون تخطبولي

::- بس كمل كلامه شرك حمزه بچاي وايان باوعله صفح وعمي محمد خله الاستكان على الطبله و باوعله

علي مد راسه الايڤار همس اله شي ويضحك
كل ولد عمامي لزمتهم الضحكه على وضع زياد

من شاف نظرات حمزه وايان وعمي محمد

زهره:: من عيوني الإثنين بعد گلبي بس كون خوش مره اختاريت

انمار:: خوش مره نفس تصرفات جوائح ولسان استبرق وصلافة وهجَ

زياد:: انتَ اسكت اسكت
علي:: هاي صفات ذكرتني بوحده

ايڤار:: حتى اني حسيتها هي صراحتاً

حمزه:: راح اكوم تره اسكتوا
اي زياد ياهيه التريد تخطبها

زياد:: اختك

::- ماكدروا يسكتون طكوها بضحكة بصوت عالي وحمزه وجه صار ينطي ألوان

محمد:: ماعدنا مره
حمزه:: سمعت ماكو مره الك
ايان:: خلص الحجي

فارس:: هي بكيفكم باجر اخذ امي واروح الام شيلان ونشوف الحجي لا ياخذك الواهس محمد تراها بنت مرتك وربت بيت جدها ماعدنا مره كال

محمد:: انتَ اسكت لا تحجي تعتبرني ابوها
وأخوها مسؤول عنها

حمزه:: صحيح

فارس:: حجي يفيدكم اذا البنيه توافق مالكم حق تحجون اصبرولي جوائح اتصلي على شيلان

جوائح:: شكول الها ؟
- أساليها اذا خطبها زياد توافق او لا

حمزه:: شنو سالفتكم تحجون على اختي واني كاعد

محمد:: فارس استقر

جوائح:: دقيقه دقيقه عليمن هذا الحجي يابه لا تدخلون لا حمزه ولا انتَ بويه خليهم يروحون يخطبون وافقت بيها الخير رفضت هم بيها خير

زياد:: مو اكللكم بس هي تفتهم

فارس:: طيح الله حظك وحظ اليوكف وياك كوم منا ماعدنا مره

انمار:: عمي كافي باجر يصير خير وانتَ لا تخزر رايحين نخطبها ما كاتلينها

حمزه:: اذا ما اسودنكم بسيطه

راجح:: اذا خلصتوا كلامكم اريد احجي شي

::- التفتوا كلهم اله مركزين ويا لان شكله ونظراته تبين شكد هو جدي بكلامه أخذ نفس عميق وگال...

راجح:: عمي فارس مرخصتك
يمكن ماكو داعي أحچي هواي، لأن إنت تعرف قبل الكل شنو بيني وبين بنتك غفران ربيتها بدم گلبي كبرت بعيني يوم عن يوم، وكل الناس شاهدين شكد كانت عزيزة عليّ
ما جاي ادور حب ولا حچي عابر جاي أطلبها بالحلال حتى أكمل وياها الطريق مثل ما وعدت نفسي من سنين اليوم أريد آخذها رسمي وأكون إلها سند من بعدك
وإذا بيه خير أتمنّى تنطيني موافقتك

::- تسارعت دگات گلبي والرجفه سرت بجسمي
لزمت ايدي رحمه بقوة تهديني ردت اكوم بس خفت اوكع على وجهي صدمني وصدم الكل بكلامه

كامت رحمه لزمت ايدي كال ابوي

فارس:: ابقن بمكانجن اكعدن

::- رجعت كعدت بصفي تضغط على ايديه

سكت لحظات رفعت عيني على ابوي بس حتى أشوف ملامحه باوعلي بنظرة سريعة والتفت باوع الراجح بنظرة طويلة

من جنت أشوفك وياها توقعت يجي يوم تحجي هيج حجي.
تغيرت تعابير وجهه ابتسم بخفة وكمل كلامه

إذا نيتك صافية مثل ما تحجي، فأني ما أوگف بوجه نصيب اذا هي موافقة

زهر:: غفران سمعت حجيهم توافقين لو ترفضين

نيرمين:: شجاج عمه خلوها تفكر بعدين دا تحرجوها هيج كلكم موجودين

زهراء:: خلوها تروح الغرفتها

::- بس كالت امي هيج كمت من مكاني اريد اشرد فوك انضرب اصبعي بحافة الطبله
شاغت روحي لان الضربه على اضفري

زهره:: اسم الله زهره كومن وياها بعد ما تشوف الفرخه

::- لزمتني رحمه وقبل لا نصعد كالت

رحمه:: دقيقه قبل لا نروح احجو العدكم اريد اشوف ردت الفعل
محمد:: شكو شصاير ؟

وسام:: راح يجيكم الحفيد السادس

زهره:: صلاوات على محمد ياهيه حامل منجن

::- باوعت على استبرق ورحمه وهنه اشرن بعيونهم على وهجَ إلي منزله راسها وخاتله ورا وسام شهگت زهره وكالت بنبرة مليانه فرح

زهره:: يااعع ولك مرتك حامل وسام
- اي
- يابعد حيلي بالمبارك عليكم ولج تعالي خلي ابوسج

::- كامت الزهره والولد كلهم يباركون الوسام
عمتي نيرمين حضنتها تبجي على صوت بجيهن بجت امي

يمكن اني ما افهم شعورها بس هو فعلاً صعب دائماً تتمنى يصير عدها ورغم عدها عقم رب العالمين رزقها وان شاء الله يرزق كل محروم

كعدوا بإمكانهم يضحكون وفرحانين جوائح الوحيدة الي صافنه عليهم وعيونها دمعة

كل ضحكة وكل شخص مرتاح بعائلتنا بسببها لو ما هي الهدتت سلمان وخلته يعوف الحله يجي البغداد وضلت ورا لحد انتقمت منه ومن سرحان وهسه نصهم بسجن والنص الثاني لا حول ولاقوة تركوا أعمالهم والله اعلم يمكن يشتغلون بالخفيه

بس المهم الكل مرتاح هسه صح خسرنا فرات
بس راح المكان افضل من دنيا والله يرحمه

اتمنى اعرف شنو شعورها وهي تشوف الكل فرحان ومرتاح أخذت نفس وصعدت فوك وكلهن اجن وراي بس دخلنا الغرفة طفرت طيبه دكول

طيبه:: الله الله الله وافقي عليج الله

جيهان:: حبيتتتت شلون تقدم الج كدامهم
ليش ما كلتلي موافقة الهم بصوت محاسن

استبرق:: لو مو عيب جان كالت موافقة

غفران:: انطمن يمه كلبي راح عيبببب منهم

وهجَ:: عليمن عيب باسج كدامهم مثلاً

رحمه:: السانج وهجَ

جوائح:: طيح الله حظجن وحظي

::- غمتهن وكعدت فتحت تليفونها ولان قريبه مني لمحتها تراسل

درت وجهي عنها احجي وي رحمه وهي تهديني التفتت استبرق گالت

استبرق:: ذكرت شنو ردت فعل وسام ولج شو ما سولفتي النا ؟

وهجَ:: طلعوا طيبه وجيهان واني اسولف الكم

طيبه:: ولا اطلع وربي اريد اسمع

جيهان:: طلعه ما أطلعه اريد اسمع حالي حالجن

رحمه:: عوفيهن

::- انتچت على كتف جُواهر وكالت

وهجَ:: بس طلعنا من المطبخ رحنا للحديقة
لگينا هذا الولد الي موجود هنا ابن مهند يحجي مكالمة لحد ما خلص مكالمته سلم عليه ودخل

لزم ايدي وسام أخذني بنهاية الحديقة
گال

وسام:: شلونها ضوه عيوني صاير شي بغيابي
وهجَ:: لا ما صاير شي ليش ؟

- احسج فرحانه هواي مو بس شويه
- فرحانه لأنك اجيت ادور عليه

- : ابتسم سحبني الحضنه يمسد على راسي
اخذ نفس عميق وكال
وسام:: روحي تردلي من اشوفج فرحانه

وهجَ:: وســـام
- ضــوه عـيـونــه

:- ابتعدت عن شوي وگفت كدامه
رفعت ايدي خليتها على بطني ابتسمت من نزل عيونه على بطني عاقد حواجبه مستغرب صفن ثواني وتوسعت عيونه مصدوم

وسام:: احـلـفـي
وهجَ:: راح تصير اب واخيراً

- حــامــل..
- اي وسام بعد سنين الله رزقنا

::- رفع ايده مسح وجه عيونه دمعت عين عليّ
وعين على بطني بحركة سريعة حاوط خصري بيده يرفعني الصدره حاضني بقوة

بقى ساكت گلبه يدك بقوة رفع راسه ناحيتي عيونه تلمع كأنه طفل سمع أحلى خبر بحياته
ضحك وهو بعده متحير دموعه سبقت ضحكته، حضني أكثر وكال بنبرة مليانه فرح

يارب لك الحمد والله حلمي تحقق، صرتي أم وأنا أب

بقى يحچي ودموعه تنزل على خدي يقبّل جبيني، يضحك ويبي بنفس اللحظة
يهز راسه ويگول

مبروك يا ضـوه عـيونـي الله رزقني بيچ مرتين مرة يوم صرتي زوجتي واليوم يوم صرتِي أم طفلي
يبتسم ودموعه بعينه

- تعبتي هواي بس الله جازاج ربي يحفظچ انتِ وفرحتنا الصغيرة

ضحكت وأنا بدموعي، وكل التعب والايام السوده العشتها الانتظار تحولت بلحظه الفرح

:- أثناء حديثنا سمعنا صوت الباب ابتعدت عن حضنه لمحت حمزه داير وجه وجوائح تاوع على حمزه وتضحك حمحم وسام وگال

وسام:: اتفضلوا اتفضلوا

::- تقربوا علينا سلمت على جوائح وحمزه حضني وألتفت خازر وسام

حمزه:: شنو هذا الاستهتار

وسام:: يا استهتار ولك فرحان

- بشنو فرحان ؟
- اختك حامل مني

جوائح:: وهجَ حامل ؟؟
:- هزيت راسي بمعنى أي بدون مقدمات سحبتني الحضنها دمعت عيوني من نزلت دموعها گالت

جوائح:: ياروحي الله يتمم الج الحمل على خير ويقر عينج بشوفة طفلج سالم معافى
يارب يجعل أيامج فرح وسعادة دائمه

حمزه:: الف مبروك حبيبتي الله يتمم الج على خير

وسام:: واني باركلي
حمزه:: انتَ انجب اني اعلمك بعدين
بعدين اجت رحمه وغفران قطعوا حديثنا

::- هي تحجي عنها وعن وسام والبنات مدمعات

جيهان:: زوجوني
جُواهر:: راح اشك حلكج ادبسز

::- لزمتها تضربها بخفه على حلكها وكلهن يضحكن حجوا هواي على ردت فعل البقيه
للعشره بليل نزلنا لان مطرت كل واحد اخذ عائلته وراح بس جوائح وحمزه بقوا لان طريقهم طويل

كعدنا اني وجوائح جوه الشجره الجو بارد ومطر بس كلش حلو

حاطه أيدها على خدها صافنه على مطر

غفران:: شلون الوضع بالبيت الجديد ؟

حوائح:: عادي اغلب وقتي شغل ومن ارجع بين تنظيف والطبخ يخلص الوقت يبقالي بس وقت نوم مدا الحك حتى اكعد وي نفسي

- خلصتي شغل لو بعدج ؟
- اي بقى ترتيب خفيف ودوامي بلشت بي هم

- وضعج شلونه
- نوعاً ما زين الوقت يمر بسرعة وما حسيت بأي شي

- صحيح مرينا بوقت صعب بس صار ذكريات
- الحمدلله اول مره افوت للبيت واحسه مريح

- لان الكل مرتاح جوائح بعدج صغيرة انطي فرصه النفسج تبدين من جديد ؟

- فرصة ؟
- اي
- ما احس احتاج فرصة حتى ابدي من جديد
لان اني من زمان بديت حياتي
- اقصد تتزوجين مره ثانيه ؟

:- التفتت الي تباوعلي صافنه هزت راسها
جوائح:: ماكدر وضعي مخربط عدا احلامي المزعجة هذا شخص كل فترة واحلم بي تعبت واني أحاول اذكر شكله

- لحد الآن تحلمين بي ؟
- اي
- ممكن يكون مجرد حلم

- لا مو مجرد حلم متأكدة وحتى احس هذا شخص شايفته

- وين شايفته ؟
- شاكه بشخص بس مادري اذا فعلاً هو او لا

- يا شخص ؟
- ما تعرفي انتِ هسه كليلي شوكت توافقين ؟

- منو كلج اوفق
- أكلي نعل مع احترامي الج توافقين غصباً عليج غفران مو جاهلة انتِ اتصرفي صح لا حظج اطيحه هسه دكومين نروح يم اهلج دكولين موافقة الهم يلا كدامي

غفران:: انجبي اني أكبر منج ومن استبرق تحترميني لا ازعل

جوائح:: صدك والله تزعلين هاي كل قوتج
كومي كومي لا تخبليني بنص الليل

::- كامت كدامي مشيت وراها أول مره اركز بطولها اقصر وحده بينا هي رغم كلنا طولنا مناسب إلا هي ركضت دخلت وراها گلت

غفران:: شكد طولج ولج
جوائح:: مادري
- بداعة عهد كولي شكد
- وخري عني
- بداعة عهد
- احلفي ما دكولين الأحد ؟
- والله ما اكول
- 152

- هههههههههههه اقتنعت كل وحده قصيرة محد يكدر الها البله كله برأسها

- انطمي على طولج أنتِ عابت
طولي 168
- مو هواي فرق
- هههههههههههه اقنعي نفسج

:- غمتني وراحت باتجاه غرفة اهلي دگت الباب ودخلنا سوه انصدمو بوجود جوائح بغرفتهم
كالت امي

زهراء:: تعالن حبيباتي
فارس:: بيجن شي ؟

جوائح:: لا اجينا نكول شي ونروح احجي غفران شنو ردتي دكولين الهم

غفران:: شنو شكو شكول ؟
جوائح:: تحجين لو احجي اني

فارس:: احجي بابا
غفران:: ها شتردت احجي اني

- استغفرالله ربي غفران موافقة على راجح
بس مستحيه دكول

غفران:: جذابة
جوائح:: انتِ الجذابة والعباس تريد راجح
زوجوهم

- ياااا لا جذبين شبيج أنتِ
- لزكتي خو ما لزكتي شوف عمي هاي بنتك موافقة ما عليك بيها تخجل دكلك

::- اريد احجي تحط أيدها على حلكي رافعة
وتحجي وتخزرني امي تضحك من كل گلبها وابوي مبتسم على سوالفها

ويمكن اول مره نشوف جوائح تحجي هواي وتضحك

فارس:: هاي هيه مادام موافقة

غفران:: بس خل......
جوائح:: اسكتي لا تحجين اي هاي هيه وها كالت تريد العقد هذا الأسبوع بس تستحي منكم

:- دفعت أيدها احجي بصوت عالي

غفران:: والحسن تجذب ولج صخمان
- صخمان براسج امشي اطلعي

::- دفعتني طلعني وقبل لا تسد الباب كالت الهم
- لا تنسون هذا الأسبوع

سدت الباب وطكتها ركضه فوك
صعدت وراها اركض

غفران:: والله اليوم اكتلج يا جذابة

جوائح:: انجبي جاي اجمع راسين بالحلال
شعليج انتِ

- فشلتيني يا جلبه

::- ضحكت بصوت عالي على صوت ضحكتها طلع ايان من غرفته يباوع عليها مستغرب
وعلي مد راسه هو وراجح يباوعون
فاتت للغرفة دخلت وراها ضلينا نتعارك لحد ما نمت

للصبح كعدت على صوت البنات يمي
فتحت عيوني لمحتها ترزل بيهن
لحد ما صحصت كمت غسلت وطلعت ملابس الي بسرعة اخذتهن وطلعت متوجه للغرفة ثانيه صار بوجهي راجح بيده صينية صغيرة بيها كوب جاي وقطعتين توست وجبن

راجح:: صباح الخير للناس الحلوه

غفران:: صباح النور للسادة

::- ضحك بخفه قدملي الصينية وگال

- قبل ايشي اتريگي
- مو جوعانة والله
- ميخالف اگلي شويه واذا تردين اكعد يمج حتى يصير الج واهس

جوائح:: توكل خويه توكل اني اكعد يمها

::- التفتنا على صوتها واكفه باب الغرفة او وراها جيهان ماده رأسها

راجح:: خويه ورسول الله آشور اني

جوائح:: بكلمه وحده اخرب خطوبتكم
دشور بيه واني اعلمكم

راجح:: ثواني خطوبتنا وتخربيها ليش غفران موافقة ؟

جيهان:: بس لا محد كالك من البارحة كالت
موافقة بصوت محاسن

جوائح:: الفضل الي كالت ما أوفق ولا اريد راجح

غفران:: جذابة والله اريدك
::- شهگت بس انتبهت الجفصتي وهذا الرادته
هي استغفرالله ربي اخذت الصينية منه ومشيت بسرعة دخلت وقفلت الباب اسمعه يكللها

راجح:: على هذا الحجي ليل نهار ادعيلج
وروحها الامي

جوائح:: عفيه كثرلي دعوات حلوه

::- هاي شغيرها هيج متغيرة بشكل فضيع
جاي أنصدم بيها وربي

صفنت على حايط شويه نوب اجتني لحظة إدراك كعدت اكلت بسرعة وكمت بدلت ملابسي وطلعت من الغرفة أركض حطيت واقي شمس ومسكاره ورجعت كلشي المكانه سمعت صوت الهورن جوه عرفت السايق اجه
اخذت جنطتي وطلعت اركض بس صعدت بسيارة أخذني الصيدلية

خلصت وقت شغلي وقبل لا يجي السايق لمحت سيارة راجح نزل الجامه واشرلي تعالي

::- سويت نفسي طبيعية واني بداخلي مطايه تكمز مشيت باتجاهه سيارته فتحلي الباب صعدت بصفه ابتسم وگال

راجح:: اجيت اخذج ونروح المكان

غفران:: وين راحج لا رجعني للبيت أبوي اذا
عرف يطيح حظي

راجح:: اكيد كتله واجيت
- أخذت أذنه وقبل ؟
- اي
- انتَ كتله ؟

- لا والله جوائح كالت اله
- مو اعرفه ما يقبل بس هاي تقنعه وهو
مايرفض الها طلب اكيد

راجح:: اخواتج كلهن يخبثن وياي إلا هي
الله يفرحها ويعوضها عوض عظيم

غفران:: امين بس وين ماخذني ؟

- هسه تعرفين اصبري
::- ضليت أرقب الطريق اريد أعرف وين ماخذني استغربت من صف سياره ونزل فتحلي الباب مشيت ويا لحد ما وگف
كدام محل مكتوب عليّ مجوهرات ال......

راجح:: اجه اليوم الي انتظره من سنوات
مستعدة نخطي اول خطوة بحياتنا الجديدة
يا دواء الروح..

::- لمعة عيونه ورجفت ايده حسستني شكد خايف ارفض وما ادخل ويا هزيت راسي مبتسمه

غفران:: مستعدة اخطي هاي الخطوة
واكمل حياتي وي ابن السادة

:- ابتسم فرحان أخذ نفس بعمق وگال

راجح:: ابن سادة من الفرحه گلبه راح يوگف تعالي ندخل نختار حلقات خطوبتنا والذهب

غفران:: ليش مستعجل خليها غير يوم

- لا ماكدر خلينا نشتري اليوم وبهذا الاسبوع نعقد لا دكليلي لا ماعندي صبر ورسول الله

::- لزم طرف اكمامي دخلنا سوه نختار
حلقات ومن الفرحة حسيت نفسي فراشه طايره اختاريت الحلقة الي عجبتني اني ويا

بعدها طلب اختار الي اريده بدون تردد رغم ما
ردت أشتري ذهب لان من الأساس هو جان مسافر يعالج وتگاليف العلاج مو سهلة

عدا مصاريف العرس الي راح تصير ماردت ازيدها عليّ لان متأكدة كلشي يتعوض بعدين
بس هو اتقرب مني وگال

راجح:: لا تفكرين بشي اختاري الي يعجبج
فلوس عرسنا من سنوات طويلة اجمع بيهن
خير من الله عندي

غفران:: راجح ما....
- لا تكملين خليني فرحان غفراني

::- هزيت راسي بمعنى اي
اختاريت شي بسيط وهو رجع اختار
كم قطعة ذهب على ذوقه وخلاها وي الي اختاريتهن ما خلاني احجي ولا ارفض

خلاهم صاحب المحل بأكياس اخذهم راجح وكرر نفس الحركة لزم طرف اكمامي وطلعنا

خلاهم بسياره وساق سيارة
تقريباً ربع ساعة صف سيارة مره ثانيه وكال

راجح:: انزلي نتعشه سوه
- تمام
::- نزلت ويا واني مبتسمة ماردت اخرب فرحته طول كعدتنا نسولف سوه يحجيلي عن أشياء يريد يسويها بعرسنا خلصنا ورجعنا للبيت وهو كل شويه يكول

راجح:: والله ما مصدك لحد الآن

غفران:: بعدك ما مستوعب

::- هز راسه يضحك دخلنا للبيت واستقبلونا
بكلامهم على اتفاق العقد وغيرها خليتهم يحجون وصعدت لمحت جوائح طالعه بالبلگونه لازمه تليفونها وكاعدة تكتب ولا مهتمه للجو وبرودته

عفتها براحتها وفتت الغرفتي وهيج مرت ايام الاسبوع الكل فرحان وداخلين بالجو كلش
وبيوم الجمعة كعدت على أصوات الأغاني المشغلها علي واسامه

رفعت راسي اباوع على فستان عقد قرآني
ابتسمت بفرح وأخيراً راح اصير على ذمة حب طفولتي

كمت بسرعة من مكاني لكيت البنات كلهن مجتمعات حتى فاطمه اجت من اليلة الفاتت بس شافوني صاحوا

- كعدت عروستنه وأخيراً

::- هلهلت زهره بصوت عالي سكتتها امي تعاركت وياها وهلهلت بين لمتهن وسوالفن اكعدت اتريك براحتي للعشرة ونص صبح اخذوني للصالون بين المكياج والشعر وباقي تفاصيل صارت بالوحده ونص ساعدتني رحمه البس فستاني لان العقد بقاعة

- مجرد كملت وكفت كدام المرايه
اخذت نظره مطوله على شكلي التفتت على رحمه الي دموع الفرح تنزل من عيونها

غفران:: لا تبجين هسه ابجي والله

رحمه:: روح اختج من أيام صغرنا وانا أشوف حبكم يكبر گدام عيوني واليوم أشوفكم تجمعكم هاللحظة الحلوة الله يسعدكم ويباركلكم ويخلي حياتكم كلها حب وفرح وذكريات حلوة مبروك عقد قرانكم .

- الله يبارك بيج حبيبتي ماعرف شنو ارد بس
جنتي الي ام واخت وصديقة جنتي تعامليني معاملة خاصة وكأني بنتج شكراً على وجودج
وعلى كلشي قدمتي الي

::- حضتني بقوة صاحت ام صالون عليها لا يخرب مكياجي ابتعدت عني تضحك وتمسح دموعها اتصلت على ايڤار يجي يأخذنا

لبستني البرگع ونزلته على وجهي من اجه ايڤار طلعت من صالون ما اشوف ايشي لزمني من ايدي وكال

ايڤار:: غفار كبر واليوم صار عروس
ألف مبروك حبيبتي

- الله يبارك بيك اخي العزيز

::- صعدني بسياره ورحمه بصفي
طول الطريق گلبي يدك همه يسولفون وياي حتى ما اتوتر واني مشاعري اختلطت خوف رهبة فرح سعادة كلهن حب سوه

وزاد التوتر من دخلت القاعة رتبوا مكياجي وشعري وحطوا الشال العقد على راسي فستاني جان مستور حسيت افضل شي يكون هيج

كعدت على كوشة وبصفي راجح
مرت بالي كل اللحظات وذكرياتنا طلعت من صفنتي صوت الشيخ اخذت نفس وگلت

غفران:: نــعــم انــتَ وكـيـلـي

في يومٍ غمره الفرح يومُ عقدٍ مشرق
تتراقص قلوبنا بين الذكريات واللحظات.
من صغرنا كنتَ الحلمُ كنتَ الأمان
واليوم أرتدي الفستان وأحتضنُ مستقبلي بحبك

كل ابتسامةٍ على وجهي تُخبرُ عن انتظارٍ طويل
وكل نظرةٍ منك تقول

"ها قد تحقق الحلم"
أشعرُ بروحي ترتفع وقلبي يرفرف كالعصفور،
فالطفولة التي جمعتنا أصبحت اليوم وعدًا أزليًا.

يا من أحببتُه قبل أن أعرف معنى الحب،
ها أنا أمامك أمد يدي وأهديك قلبي كله،
وكل دمعة فرحٍ تنهمر من عيني
هي شهادة على حبٍ بدأ صغيرًا وكبر ليصبح حياةً كاملة .......

::- خلصت حفلة عقد قرآني بعد ساعات
من الفرح والسعادة الضحكة ما راحت عن وجهي رجعنا للبيت وبسبب التجمع ماكدرنا
نحجي على انفراد

بنص الليل جوائح أخذت البنات من الغرفة
وقبل لا تسد الباب هزت حواجبها تضحك

بس سدت الباب ورا ثواني بسيطه انفتح دخل راجح قفل الباب واني طفرت من مكاني بسرعة

غفران:: عزاااااا روح راجح روح

- ما أروح والعباس ابو فاضل ما اروح
مرتي محد يحجي تعالي اريد ابوسج

- عزاااا عزااا شبيك تبوسني شنو روح
- والله ما اروح اله ابوسج

- وعلي اصيح ها
-: طفر بسرعة لزمني من أيدي صرخت حط ايده على حلكي كاتم صوت ضحكته

راجح:: شبيج نحسه هي بوسه
- مو بكيفك اني ما اقبل

- مو بكيفج شو تعالي

::- سحبني الصدره بحركة سريعة طبع بوسه على شفتي وابتعد مبتسم
لمني بحضنه وگال

راجح:: غفراني صارت حلال ابن السادة

::- سكتت خجلانه منه كعد على جرباية سوالي مجال بصفه كعدنا سوه نحجي
مواضيع مو مهمه للذكر

بعد حديث طول نمت فرحانه ثاني يوم ما دوامت بوقت الغده اندگ الباب كام علي يفتح الباب ثواني ودخل مسمعنا صوت الطلق طفروا من مكانهم الولد بس طلعوا بره صرخ اسامه بصوت عالي

- عليييييييي.....

ـــــــــــــ⊰ ـــــــــــــ

- فااطمة

- هـاا

:- فتحت الباب رفعت عيوني عليها

سما:: متأكدة ما تروحين ؟
فاطمة:: اي ماكدر اطلع نفسيتي تعبانه احتاج انام

- اخوج ما يقبل تبقين وحدج هنا راح نخلي خاله حمديه تجي يمج

- بعد احسن
- تمام انتبهي من طباخ ولا تحتاجين شي اتصلي عليه
- تمام حبيبتي

فاطمة:: كملي راحت
منى:: ليش ما رحتي وياهم ؟

- اكو مشاكل هناك واني نفسيتي ما تسمحلي
اتحمل شي ثاني تعبانه

- المشاكل ما تخلص انتظري اجيب ببسي واحجيلج موقف صار البارحة

- تمام
::- نزعت السماعة ورحت ضليت صافنه على مكالمة بس رجعت ثبتت التليفون وكعدت

منى:: اكو ولد كل ما اطلع اشوفه كاعد جوه بالحديقة والبارحة صارت عركة بين ثنين بنات
واني صرت شريفة كلت ادخل بينهم ودخلت صرت ما اعرف منين تجيني الضربه شويه وانحسبت من نص البنات واشوف نفس
الولد وخرني على صفحه وراح كعد بمكانه

خفت منه وكلت لازم اروح احجي الفاضل ورحت احجيله جان يحجي اتصال عبالي سد الاتصال بس طلع مخلي مفتوح واني حجيت اله كل المواقف الصارت وي هذا الولد

فاطمة:: عزاااا بس لا أسامه وسمع ؟

منى:: ياريت أسامه ياريت حمزه الچان على مكالمة وسمع كلشي بس عرفت رحت الغرفتي دزيت اله رساله لا فتحها ولا شافها من البارحة رغم ناشر ستوري قبل ساعتين

فاطمة:: امدددداج وامده حظج يا منى

- بس شفته ما يجاوبني حطيت وحظرته

- لاااااا ولحججج لاااا

- وراها بخمس دقائق اختفت صورته تالي حطني وحظرني

- لااااااااااا كافي راح انجلططط

- دقيقه فاطمة اجه فاضل شويه واتصل عليج

::- قبل لا ارد سمعت صوت بنيه يمها سدت المكالمة بسرعة صفنت على الصوت كأني سامعته من قبل وماكو بالبيت غيرها هي وانعام انتظرتها تجي حتى احجي وياها وافهم منو هاي

باوعت على ساعة بهذا الوقت يتصل اسامه بس لحد الان ما اتصل طلعت للحديقة خاف تجي خاله حمديه افتح الباب الها

وكفت اباوع على الباب خانكتني العبرة مرت ايام وأشهر واني انتظر أسامه للمره التانيه يغيب عني سنتين ما ضل صبر عني الانتظار أصعب شي بالحياة

حسيت گلبي يوجعني كعدت بالكاع صافنه
سمعت شي انشمر على باب البيت مثل الطابوكة توقعت واحد من الجهال مال منطقة فتحت الباب مديت راسي أريد اشوف منو

وبنفس اللحظه سمعت صوت طفره قوية داخل سياج بيتنا بس التفتت صار كدامي شخص لاف الغتره على وجه كله حتى عيونه مو واضحه مد ايده يحطها على خشمي
و....

ـــــــــــــ⊰ ـــــــــــــ